Maliferensi gha Uteŵeti na Umoyo Wachikhristu—Kabuku ka Maungano

OGASITI 7-13

MAZGU GHA CHIUTA MBUSAMBAZI | EZEKIYELI 28-31

“Yehova Wakatumbika Mtundu Wakusopa Vikozgo”

it-2-E 1136 ¶4

Ture

Kuparanyika Kwake. Apo Nebukadinezara wakazingilizga msumba wa Ture, ‘mitu yose ya ŵasilikari ŵake yikazgoka vipala’ chifukwa vipewa (visoti) vikakwenthanga sisi kweniso viŵegha vikafyopoka chifukwa cha kuyegha vyakuzengera ivyo ŵakagwiliskira ntchito pa kuzingilizga msumba. Pakuti Nebukadinezara wakapokako yayi ‘malipiro’ chifukwa cha kupeleka cheruzgo cha Yehova pa Ture, Yehova wakamulayizga kuti wamupenge usambazi wa Eguputo. (Eze 29:17-20) Muyuda munyake wakulemba mdauko zina lake Josephus, wakati Ŵababuloni ŵakazingilizga Ture kwa vyaka 13 , ndipo ukaŵa mulimo ukuru chomene kwa Ŵababuloni. Mabuku gha ku charu ghakulongosora makora yayi vyose ivyo Nebukadinezara wakachita pakulimbana na Ture. Kweni icho tikumanya ntchakuti ŵanthu ŵanandi ku Ture ŵakafwa ndipo katundu wawo munandi wakasakazika.—Eze 26:7-12.

it-1-E 698 ¶5

Eguputo, Mueguputo

Ukaboni unyake wakulembeka wa ku Babuloni wa mu chaka cha 37 cha ufumu wa Nebukadinezara (588 B.C.E.), uli kusangika, ndipo ukuzunurapo ntchito iyo yikaŵako yakulimbana na Ŵaeguputo. Kweni ukulongosora makora viŵi yayi nyengo kweniso umo kulimbana kwake kukaŵira. Kweni mulimose umo vikaŵira, Nebukadinezara wakapoka usambazi wa Eguputo nga ni malipiro ghake ghakufuma kwa Yehova pakumulangira ŵanthu ŵa ku Ture awo ŵakaŵa ŵalwani ŵa ŵanthu ŵa Chiuta.—Eze 29:18-20; 30:10-12.

g86-E 11/8 27 ¶4-5

Kasi Misonkho Yose Yikwenera Kulipirika?

Kuti tizgore fumbo ili tiyeni tiwone ivyo Chiuta wakachita pakupeleka malipiro ku boma ilo likamugwilira ntchito. Chifukwa cha kukhozgera urunji lekani Yehova wakati msumba wa Ture uparanyike. Kuti ivi vichitike Yehova wakagwiliskira ntchito ŵasilikari ŵa ku Babuloni mwakulongozgeka na themba lawo Nebukadinezara. Nangauli Ŵababuloni ŵakaluska, kweni ntchito yikaŵapo. Lekani Yehova wakaŵapa malipiro pa ntchito iyo ŵakachita. Pa Ezekiyeli 29:18, 19 Yehova wakati: “Mwana wa munthu, Themba Nebukadinezara la Babuloni likagwiliska ŵasilikari ŵake ntchito yikuru pakwimikana na Ture. . . . Kweni iyo pamoza na ŵasilikari ŵake ŵakapokapo malipiro chara pa mulimo wake wakwimikana na Ture. Ntheura ichi ndicho Fumu Yikuru Yehova yayowoya, ‘Wona! Nkhupeleka charu cha Eguputo kwa Themba Nebukadinezara la ku Babuloni, ndipo lizamutora usambazi wake na kupoka vinthu vinandi kwa iyo na kumuphanga, ndivyo vizamuŵa malipiro gha ŵasilikari ŵake.’”

Baibolo likuti Nebukadinezara likaŵa themba lakujikuzga, lakujitemwa kweniso lakusopa vikozgo. Ŵasilikari ŵa ku Babuloni ŵakamanyikwanga chomene kuti mbankhaza. Ndipouli Yehova wakaŵapa malipiro ghawo ghose.

Ivyo Tasambira

it-2-E 604 ¶4-5

Urunji

Munthu wakwamba wakwananga na themba la ku Ture. Kwananga kukambira ku vilengiwa vyauzimu kuchanya pambere ŵanthu ŵandanange nga umo Yesu wakayowoyera pa Yohane 8:44 kweniso umo nkhani ya pa Genizesi chaputara 3 yikulongolera. Nangauli sumu yachitengero iyo yili pa Ezekiyeli 28:12-19, yikuyowoya za “themba la Ture,” kweni vikuwoneka kuti yikuyowoyaso za mwana wauzimu wa Chiuta uyo wakananga. Kujikuzga kwa “themba la ku Ture,” ilo likachemekanga “chiuta” na “kerubi,” kweniso kuzunulika kwa “Edeni, munda wa Chiuta,” vikukolerana na ivyo Baibolo likuyowoya vyakukhwaskana na Satana Dyabulosi uyo wakajikuzga, kweniso uyo ni njoka ya mu Edeni, na “chiuta wa nyengo iyi.”—1Ti 3:6; Ge 3:1-5, 14, 15; Chiv 12:9; 2Ko 4:4.

Themba la ku Ture ilo lindazunulike zina, ndipo likakhalanga mu msumba ‘wakutowa chomene,’ likaŵa ‘lakuzura na vinjeru na lakutowa chomene,’ na ‘lambura kafukwa mu nthowa zake,’ kufuma apo charu chikalengekera m’paka apo ubendezi ukasangikira mwa iyo. (Eze 27:3; 28:12, 15) Sumu yachitengero iyo yili mu buku la Ezekiyeli yikwenera kuti yikuyowoya za themba limoza pera yayi kweni mathemba ghose gha ku Ture. (Yaniskani na uchimi uwo uli pa Yes 14:4-20 uwo ukayowoyanga za “themba la ku Babuloni”) Ipo mauchimi ghose agha ghakwenera kuti ghakuyowoya za ubali uwo ukaŵapo pakati pa mathemba gha ku Ture agho ghakafika pakovwira mulimo wakuzenga tempele la Yehova ku Phiri la Moriya mu nyengo ya Themba Davide na Solomoni. Pakwamba, pakaŵavya suzgo lililose pa umo mathemba gha ku Ture ghakawoneranga ŵanthu ŵa Chiuta, Ŵaisrayeli. (1Ma 5:1-18; 9:10, 11, 14; 2Mi 2:3-16) Ndipouli, mathemba agho ghakiza pamanyuma, ghakamba kuchitira viheni ŵanthu ŵa Chiuta nga umo ntchimi Joyeli, Amosi na Ezekiyeli zikayowoyera. (Joy 3:4-8; Am 1:9, 10) Padera pa kuyana pakati pa “themba la Ture” na Mulwani Mukuru wa Chiuta, uchimi uwu ukutovwiraso kumanya kuti “urunji” uli na mphaka.

OGASITI 14-20

MAZGU GHA CHIUTA MBUSAMBAZI | EZEKIYELI 32-34

“Mulinda Wakaŵanga na Mulimo Ukuru”

it-2-E 1172 ¶2

Mulinda

Mwakuyelezgera. Yehova wakaphalira ntchimi kuti ziteŵeterenge nga mbalinda ŵakuyelezgera kuchenjezga mtundu wa Israyeli (Yer 6:17), ndipo nyengo zinyake ntchimi zikayowoyanga vyamulinda mwakuyelezgera waka. (Yes 21:6, 8; 52:8; 62:6; Ho 9:8) Ntchimi izi zikaŵa na mulimo ukuru chomene kuchenjezga mtundu wa Israyeli uwo ukaŵa pafupi kuparanyika, ndipo ntchimi zilekenge kuchenjezga ŵanthu aŵa, mphanyi zikaŵa na mulandu. Kweni para ŵanthu ŵatondeka kuchita mwakuyana na uthenga wakuchenjezga, ndopa zawo zikaŵanga pa iwoŵene. (Eze 3:17-21; 33:1-9) Ntchimi yambura kugomezgeka yikayananga waka na mulinda wachibulumutira panji ntcheŵe yambura kubwentha.—Yes 56:10.

w88-E 1/1 28 ¶13

Lutilirani Kupharazga Ufumu

Lekani Kuŵa na Mulandu wa Ndopa

¹³ Ntchito ya Ŵakaboni ŵa Yehova yakuchenjezga ŵanthu za pharanyiko ilo likwiza, yikuyana waka na iyo yikachitikanga mu nyengo ya Ezekiyeli. Iyo wakimikika kuŵa mulinda ku nyumba ya Israyeli. Ntchito yake yikaŵa ya kuchenjezga ŵanthu kuti Yehova waŵaparanyenge usange ŵakuleka kusintha viheni ivyo ŵakachitanga. Mulinda watondekenge kuphalira ŵanthu za pharanyiko, ŵanthu ŵakatenge ŵaparanyikenge nipera, kweni ndopa zawo zikatenge ziŵenge pa mutu wa mulinda uyu. Yehova wakayowoya umo wakuwonera kuparanya ŵanthu. Iyo wakati: “Nkhukondwa chara na nyifwa ya muheni, kweni nkhukhumba kuti muheni wasinthe nthowa yake na kuŵa wamoyo. Weraniko, weraniko ku nthowa zinu ziheni. Kasi mufwirengechi, imwe nyumba ya Israyeli?”—Ezekiyeli 33:1-11.

OGASITI 21-27

Ivyo Tasambira

w88-E 9/15 24 ¶11

“Ŵazamumanya Kuti Ine Ndine Yehova”

¹¹ Ŵayuda ŵakukhalira ŵati ŵawelera ku Yerusalemu, charu chakupasuka chikaŵa nga ni “munda wa Edeni.” (Ŵazgani Ezekiyeli 36:33-36.) Mwakuyana waka, mu 1919 Yehova wakasintha ukhaliro wa chitima wa Ŵakhristu ŵakukhalira ŵakuphakazgika na kuŵa paradiso mukuru wauzimu pamoza na ŵamzinda ukuru. Pakuti paradiso wauzimu uyu wazura na ŵanthu ŵatuŵa, ipo Mkhristu waliyose wakwenera kuŵikapo mtima kuti paradiso uyu walutilire kuŵa wakutowa.—Ezekiyeli 36:37, 38.

OGASITI 28–SEPUTEMBALA 3

MAZGU GHA CHIUTA MBUSAMBAZI | EZEKIYELI 39-41

w89-E 8/15 14 ¶20

Kujura Nthowa Yakulutira ku Paradiso

²⁰ Wuli pakuyowoya za vilwero vya nkhondo ivyo mitundu yizamuvileka? Vikuwoneka kuti pazamuŵa vilwero vinandi chomene ivyo mitundu yizamuvileka. (Ezekiel 39:8-10) Awo ŵazamupona pa nkhondo ya Haramagedoni ŵazamuzgora vilwero vya nkhondo ivi, kuŵa vinthu vyakugwiliskira ntchito pa umoyo wawo.—Yesaya 2:2-4.