Ŵakhristu, “Muŵenge Ŵakunozgeka” mu Mbumba Zinu

“Muŵenge ŵakunozgeka, cifukwa pa ora ilo mukughanaghana kuti ndilo cara, Mwana wa munthu wakwiza.”—LUKA 12:40.

1, 2. Cifukwa wuli tikwenera kukumbuka cenjezgo la Yesu lakuti “muŵenge ŵakunozgeka”?

“PARA Mwana wa munthu wakwiza mu ucindami wake” na kupatura “ŵanthu, yumoza ku munyake,” kasi vinthu vizamuŵa wuli kwa imwe na mbumba yinu? (Mat. 25:31, 32) Pakuti ivi vizamucitika pa ora ilo tikughanaghana kuti ndilo cara, ipo nchakuzirwa comene kupulikira cenjezgo la Yesu lakuti “muŵenge ŵakunozgeka.”—Luka 12:40.

² Mu nkhani iyo yajumpha tikasambira umo waliyose mu mbumba wangacitira kuti mbumba yose yiŵe maso mwauzimu. Tiyeni tiwone nthowa zinyake izo tingalondezga kuti mbumba yiŵe maso mwauzimu.

Ŵani na Jiso ‘Lakulata pa Cimoza’

3, 4. (a) Kasi mbumba Zacikhristu zikwenera kuŵa maso na vici? (b) Kasi fundo yakuti tiŵe na jiso ‘lakulata pa cimoza’ yikung’anamuraci?

³ Kuti mbumba zinozgekere kwiza kwa Khristu, zikwenera kucenjera kuti zileke kutimbanizgika pa kusopa kwaunenesko. Zikwenera kuŵa maso na vinthu ivyo vingaŵatimbanizga mwauzimu. Pakuti mbumba zinandi zawira mu cipingo ca kutemweska vinthu vyakuthupi, wonani ivyo Yesu wakayowoya vyakukhwaskana na jiso ilo “likulata pa cimoza.” (Ŵazgani Mateyu 6:22, 23.) Nga umo nyali yingangweruskira mu nthowa na kutovwira kuti tileke kuwa, “maso gha mtima” withu nagho ghangatovwira kuti tileke kukhuŵara mwauzimu.—Efe. 1:18.

⁴ Kuti jiso liwone makora, likwenera kugwira nchito makora ndiposo kudodoliska pa ico likulaŵiska. Maso gha mtima withu agho Baibolo likuyowoya, nagho ni nthena pera. Kuŵa na jiso lakulata pa cimoza kukung’anamura kuŵika mtima withu pa cinthu cimoza. M’malo mwa kutangwanika comene na vinthu vyakuthupi, jiso lithu lidodoliskenge pa vinthu vyauzimu. (Mat. 6:33) Fundo iyi yikung’anamura kuti tikhorwenge na ivyo Ciuta wakutipa ndiposo kuŵika uteŵeti wake pa malo ghakwamba.—Heb. 13:5.

 5. Kasi msungwana munyake wakalongora wuli kuti “jiso” lake likalata pa kuteŵetera Ciuta?

⁵ Ŵana ŵakwandula comene para ŵakusambizgika kuŵa na jiso lakulata pa cimoza. Wonani ivyo msungwana munyake wa ku Ethiopia wakacita. Wakacitanga makora ku sukulu, ndipo wati wamalizga masambiro ghake gha ku sekondare, wakapika mwaŵi wa masambiro ghapacanya. Kweni cifukwa cakuti jiso lake likadodoliska pa kuteŵetera Yehova, wakakana mwaŵi uwu. Pamasinda wakapika mwaŵi wa nchito iyo pa mwezi wakatenge wapokerenge ndalama izo zingakwana K630,000. Agha ghakaŵa malipiro ghapacanya comene mu caru cakwawo. Kweni “jiso” la msungwana uyu likalata pa upayiniya. Pakukana nchito iyi wakafumba dankha ku ŵapapi ŵake yayi. Kasi ŵapapi ŵake ŵakajipulika wuli na ivyo wakacita? Ŵakakondwa comene ndipo ŵakamuphalira umo ŵakanothera.

6, 7. Kasi tikwenera ‘kuŵa maso’ na vici?

⁶ Fundo ya Yesu pa Mateyu 6:22-23 yikucenjezga za umbunu. Yesu wakati jiso ilo likutondeka “kulata pa cimoza” ndikuti “ndiheni.” ‘Jiso liheni’ ndiwemi yayi, ndabina, kung’anamura kuti ndidokezi panji ndambunu. (Mat. 6:23) Kasi Yehova wakuwuwona wuli udokezi panji umbunu? Baibolo likuti: “Uzaghali na ukazuzi wa mtundu uliwose panji umbunu [panji udokezi] vileke nanga nkhuzunulika pakati pinu.”—Efe. 5:3.

⁷ Nchipusu kuŵanika kuti munyithu wamba udokezi, kweni nchipusu yayi kuŵanika para cili pa mutu. Ipo nchamahara kupulikira ulongozgi wa Yesu wakuti: “Muŵenge maso ndipo cenjerani na mtundu uliwose wa udokezi.” (Luka 12:15) Ntheura, tikukhumbikwira kujisanda mwakuti tiwone ivyo tikuŵikapo mtima. Mbumba Zacikhristu zikwenera kughanaghanirapo comene pa nyengo na ndalama izo zikumalira pa vyakusanguluska, maseŵera, na vinthu vinyake vyakuthupi.

 8. Pa nkhani ya kugura vinthu, kasi ‘tingaŵa wuli maso’?

⁸ Nangauli mungaŵa na ndalama zakukwana, kweni mukwenera kughanaghanirapo dankha pambere mundagure cinthu. Mungakhumbikwira kuwona fundo nga ni izi: ‘Kasi cinthu ico nigurenge nicigwiliskirenge nchito nyengo zose na kucipwelelera? Kasi cinitolerenge utali wuli kuti nicimanye makora umo cikugwilira nchito? Ŵawukirano, lekani kuyegheka na vyose ivyo caru cikusaska, ivyo vingamupangiskani kuti mugure vinthu vyakudura ivyo vingamumalirani waka ndalama. Sambirani kujikora. Kweniso ghanaghanirani umo cinthu ico mungagura cingatimbanizgira mbumba yinu kuti yileke kunozgekera kwiza kwa Mwana wa munthu. Gomezgani layizgo la Yehova lakuti: “Nikulekenge cara napacoko nesi kukutaya mu nthowa yiliyose.”—Heb. 13:5.

Ŵani na Vilato Vyauzimu

 9. Kasi mbumba yingandula wuli para yingajiŵikira vilato vyauzimu?

⁹ Ŵamumbumba ŵangakhozgaso cipulikano cawo na kuŵa maso mwauzimu para ŵakujiŵikira vilato vyauzimu na kuvifiska. Kucita nthena kungawovwira mbumba kuti zimanye usange zikuluta panthazi mwauzimu na kumanya milimo iyo njakuzirwa comene pa umoyo wawo.—Ŵazgani Ŵafilipi 1:10.

10, 11. Nga ni mbumba, kasi ni vilato wuli vyauzimu ivyo mukukhumba kufiska sono ndiposo munthazi?

¹⁰ Mbumba zingasangaso candulo nanga nipara zingajiŵikira vilato vicokovicoko vyakuti waliyose mu mbumba wangafiska. Mwaciyelezgero, mungaŵa na cilato ca kudumbiskana lemba la zuŵa, zuŵa lililose. Fundo izo waliyose wakuyowoyapo zingawovwira mutu wa mbumba kumanya umo waliyose waliri mwauzimu. Cilato cakuti mbumba yiŵazgirenge Baibolo pamoza nyengo zose cikovwira kuti ŵana ŵaŵe na luso pakuŵazga kweniso kuti ŵalipulikiskenge makora. (Sal. 1:1, 2) Kasi cingaŵa ciwemi yayi kuŵa na cilato ca kulomba vinthu vyakwenelera? Tingajiŵikiraso cilato cakuti tiŵe na vigaŵa vyose vya cipambi ca mzimu. (Gal. 5:22, 23) Kweniso tingacita makora kupenjerezga nthowa izo tingalongolera kuti tikufipira mtima ŵanthu awo tikuŵapharazgira. Para mbumba zikuyezgayezga kucita nthena zingawovwira ŵana kuti ŵaghanaghanirenge ŵanji, ndipo nchakuwonekerathu kuti ŵaŵenge na khumbo lakucita upayiniya wanyengozose panji umishonale.

¹¹ Mwalekeraci kughanaghanira vilato vinyake ivyo imwe na mbumba yinu mungafiska? Kasi mbumba yinu yingaŵa na cilato cakuti yimalirenge maora ghanandi mu uteŵeti? Kasi mungajiŵikira cilato cakuti mucepeske wofi para mukupharazga pa telefoni, mu misewu, panji mu malo gha bizinesi? Kasi mungaŵa na cilato ca kupharazga uko kukukhumbikwira ŵapharazgi ŵanandi ŵa Ufumu? Kasi yumoza mu mbumba yinu wangasambira ciyowoyero cinyake mwakuti wapharazgirenge ŵanthu ŵakufuma ku vyaru vinyake?

12. Kasi mitu ya mbumba yingacita wuli kuti yovwire mbumba zawo kuti zikure mwauzimu?

¹² Ŵafumu, pakuŵa mutu wa mbumba, manyani vinthu vyauzimu ivyo mbumba yinu yingakhumbikwira kugwilirapo nchito. Ŵani na vilato vyakuti vimovwirani. Vilato ivyo mungajiŵikira pa mbumba viŵenge vyakuti mungavifiska kwakuyana na ukhaliro winu. (Zinth. 13:12) Kweni manyani kuti pakutora nyengo kuti munthu wafiske cilato cakuzirwa. Ntheura, cepeskaniko nyengo iyo mukuwonelera TV mwakuti mucitenge vinthu vyauzimu. (Efe. 5:15, 16) Fwiliranipo kufiska vilato ivyo mwajiŵikira pa mbumba yinu. (Gal. 6:9) Mbumba iyo yikufwilirapo kufiska vilato vyauzimu, ŵanthu ‘wose ŵayiwonenge’ umo yikukulira makora.—1 Tim. 4:15.

Lutilirani Kuŵa na Nyengo Yakusopera ya Mbumba

13. Kasi nkhusintha wuli uko kuli kucitika, ndipo tikwenera kujifumba mafumbo wuli?

¹³ Ndondomeko yakucitira maungano gha mpingo iyo yikamba pa Janyuwale 1, 2009, njakovwira comene kuti mbumba zinozgekere kwiza kwa Mwana wa munthu. Pasono Sambiro la Buku la Mpingo likucitikiraso palekha yayi, likucitikira lumoza na Sukulu ya Uteŵeti wa Ciuta ndiposo Ungano wa Uteŵeti. Kusintha uku kukacitika na cilato ca kupeleka mwaŵi ku mbumba Zacikhristu kuti ziŵe zakukhora mwauzimu mwa kupatura zuŵa la kusopa kwa mbumba sabata yiliyose. Pakuti sono nyengo yajumphapo kufuma apo kusintha uku kukacitikira, tingajifumba kuti: ‘Kasi pa nyengo iyi nkhucita kusopa kwa mbumba, panji kusambira pa nekha? Kasi nkhuyezgayezga kufiska cilato ca ndondomeko iyi?’

14. (a) Kasi cilato cikuru ca kulutilira kuŵa na Nyengo Yakusopera ya Mbumba panji ya kusambira pa tekha nchakuti wuli? (b) Cifukwa wuli Nyengo Yakusopera ya Mbumba njakuzirwa?

¹⁴ Cilato cikuru ca kulutilira kuŵa na Nyengo Yakusopera ya Mbumba panji ya kusambilira pa tekha, nchakuti tisendelere comene kwa Ciuta. (Yak. 4:8) Para nyengo zose tikusambira Baibolo na kumumanya makora Mlengi withu, mbwenu ubwezi withu na iyo ukhorenge. Para tikusendelera pafupi na Yehova, ‘timutemwenge na mtima withu wose, na umoyo withu wose, maghanoghano ghithu ghose, na nkhongono zithu zose.’ (Mrk. 12:30) Tiŵenge ŵakukhumbisiska kupulikira Ciuta ndiposo kumuyezga. (Efe. 5:1) Para tikuŵa na Nyengo Yakusopera ya Mbumba nyengo zose ndikuti tikucita cinthu cakuzirwa comene ico ciwovwirenge waliyose mu mbumba yithu kuŵa ‘wakunozgeka’ mwauzimu apo tikulindilira “suzgo yikuru” iyo yikwiza. (Mat. 24:21) Kusopa kwa mbumba nkhwakuzirwa comene kuti tizakapone.

15. Kasi Nyengo Yakusopera ya Mbumba yikovwira wuli ŵamumbumba?

¹⁵ Nyengo Yakusopera ya Mbumba yikovwiraso mbumba kuŵa paubwezi uwemi. Kuŵa pamoza sabata yiliyose na kudumbiskana vinthu vyauzimu kukovwira ŵamumbumba kuti ŵaghanaghaniranenge. Ŵakutorana ŵakuŵa ŵakukolerana comene para ŵakusambilira lumoza Baibolo. (Ŵazgani Mupharazgi 4:12.) Nchakuwonekerathu kuti ŵapapi na ŵana para ŵakusopera pamoza, ŵakuŵa na citemwa, ico “nchakukakira cakufikapo ca umoza.”—Kol. 3:14.

16. Longosorani umo ŵadumbu ŵatatu ŵasangira candulo cifukwa ca kupatura nyengo yakusambilira pamoza.

¹⁶ Wonani umo ŵadumbu ŵatatu ŵasangira candulo cifukwa ca kupatura nyengo yakusambilira pamoza Mazgu gha Ciuta. Nangauli mphaubali yayi, ŵadumbu aŵa, awo mbacekuru kweniso vyokoro, ŵakukhala mu msumba umoza ndipo ŵaŵa paubwezi kwa vilimika vinandi. Cifukwa ca khumbo lakuti ŵacezgenge pamoza nyengo yinandi kweniso kuti ŵadumbiskanenge vinthu vyauzimu, ŵakapatura nyengo yakuti ŵasambirenge Baibolo pamoza. Ŵakamba kusambira buku lakuti “Kucitira Ukaboni Mwakukwana vya Ufumu wa Ciuta.” Ndipo yumoza wa ŵadumbu aŵa wakati: “Tikusangwa comene pa nyengo iyi mwakuti kanandi sambiro lithu likujumpha pa ora limoza. Tikughanaghanira umo vinthu vikaŵira na Ŵakhristu ŵakwambilira ndipo tikudumbiskana umo ise tikatenge ticitirenge tiŵengeko. Pamasinda ivyo tadumbiskana tikuvigwiliskira nchito mu uteŵeti. Ivi vyatovwira kuti tikondwenge na mulimo wa kupharazga na kuzgora ŵanthu kuŵa ŵasambiri. Ndipo tikusanga vitumbiko vinandi kuluska kale.” Padera pa kusanga candulo cauzimu, ndondomeko iyi yawovwiraso kuti ubwezi wa ŵadumbu ŵatatu aŵa ukhore comene. Iwo ŵakati: “Tikukondwa comene na ndondomeko iyi.”

17. Kasi ni vici vikovwira kuti Nyengo Yakusopera ya Mbumba yendenge makora?

¹⁷ Wuli pakuyowoya za imwe? Kasi mwandula wuli na kusopa kwa mbumba panji sambiro lamwaŵene? Usange mukucita mwakujwanthira, mbwenu mufiskenge yayi cilato ca ndondomeko iyi. Waliyose mu mbumba wakwenera kunozgekera nyengo iyo muli kupatura. Muleke kutimbanizgika na tunthu tucokotucoko. Nakuti mukwenera kusambira nkhani izo mukuwona kuti zingawovwira mbumba yinu. Kasi mungacitaci kuti nyengo iyi yiŵenge yakukondweska? Sambizgani mwaluso, ndipo woneseskani kuti pali kucindikana ndiposo mtende.—Yak. 3:18.a

‘Ŵani Maso’ Ndipo ‘Ŵani Ŵakunozgeka’

18, 19. Pakuti Mwana wa munthu wali pafupi kwiza, kasi imwe na mbumba yinu mukujipulika wuli?

¹⁸ Vinthu viheni ivyo vyazara mu caru mazuŵa ghano, vikupeleka ukaboni wakuti kwambira mu 1914, mgonezi uheni wa Satana uli mu mazuŵa gha kuumaliro. Vyakucitika vikulongora kuti Haramagedoni yili pafupi. Sonosono apa nyengo yikwanenge yakuti Mwana wa munthu wize na kweruzga ŵanthu ŵambura kopa Yehova. (Sal. 37:10; Zinth. 2:21, 22) Fundo iyi yikwenera kumuciskani imwe na mbumba yinu kuti muŵenge maso.

¹⁹ Kasi mukupulikira ulongozgi wa Yesu wakuti mulutilire kuŵa na jiso ilo “likulata pa cimoza”? Pakuti ŵanthu ŵanandi ŵakutangwanika kupenja usambazi, kumanyikwa, panji mazaza, kasi mbumba yinu yikujiŵikira vilato vyauzimu? Kasi muli na Nyengo Yakusopera ya Mbumba panji yakucitira sambiro lamwaŵene? Kasi mukufiska cilato ca ndondomeko iyi? Nga umo tikasambilira mu nkhani iyo yajumpha, kasi imwe pakuŵa mfumu, muwoli, panji mwana, mukufiska mulimo winu wa mu Malemba kuti movwire mbumba yose kuti yilutilire ‘kuŵa maso’ mwauzimu? (1 Tes. 5:6) Usange mukucita nthena, ndikuti ‘mwanozgekera’ kwiza kwa Mwana wa munthu.

[Mazgu ghamusi]

Kasi Mwasambiraci?

• Longosorani umo mbumba Zacikhristu zingaŵira ‘zakunozgeka’ mwa. . . .

kuŵa na ‘jiso lakulata pa cimoza.’

kujiŵikira vilato vyauzimu.

kulutilira kuŵa na Nyengo Yakusopera ya Mbumba.

[Cithuzithuzi pa peji 13]

Jiso ‘lakulata pa cimoza’ litovwirenge kuti tileke kutimbanizgika na caru