Kusungilira Mtende na Utuŵa mu Mpingo

CHAKA chilichose ŵanthu ŵanandi ŵakuthilimukira ku nyumba ya Yehova kuti ŵakamusope mwaunenesko. Ŵakufiska uchimi wa mu Baibolo. (Mika 4:1, 2) Tikukondwa chomene para ŵakwiza mu “mpingo wa Chiuta.” (Mil. 20:28) Ŵakuwonga kuti ŵali na mwaŵi wa kuteŵetera Yehova pamoza na ise ndipo ŵakukondwa na paradiso withu wauzimu. Mzimu utuŵa wa Chiuta na ulongozgi uwo uli mu Baibolo, ndivyo vikovwira kuti mu mpingo muŵe mtende kweniso kuti uŵe utuŵa.—Sal. 119:105; Zek. 4:6.

² Tikuvwara “wunthu uphya” para tikulondezga fundo za mu Baibolo. (Kol. 3:10) Tikukana mphindano. Tikuwona vinthu umo Yehova wakuviwonera ndipo tikugaŵikana yayi kweni tili ŵakukolerana pa charu chose chapasi.—Mil. 10:34, 35.

³ Kweni nyengo zinyake pakuŵa masuzgo agho ghakutimbanizga mtende na umoza mu mpingo. Kasi ntchivichi chikuchitiska masuzgo agha? Kanandi ghakuŵapo chifukwa cha kutondeka kulondezga ulongozgi wa mu Baibolo. Pakuti ndise ŵakwananga, tichali kulimbana na vizgoŵi viheni. Tose tili ŵakwananga. (1 Yoh. 1:10) Munyake wangachita vinthu viheni ndipo mpingo ungabinkhiskika mwauzimu. Tingakhuŵazga munyithu na ivyo tayowoya panji kuchita, panji nase tingakhuŵara chifukwa cha ivyo munyithu wayowoya panji kuchita. (Rom. 3:23) Kasi tingachita vichi para vyaŵa nthena?

⁴ Yehova wakumanya vyose ivi. Mu Mazgu ghake muli ulongozgi wa umo tingamazgira masuzgo. Munthu wangawovwirika na ŵalara, awo mbaliska ŵauzimu. Tikuŵa paubwezi na ŵanyithu ndiposo na Yehova para talondezga ulongozgi wa mu Baibolo uwo ŵalara ŵatipa. Para tapika chilango panji tachenyeka chifukwa cha ubudi uwo tachita, timanye kuti ntchilongolero chakuti Adada ŵithu ŵakuchanya ŵakutitemwa.—Zinth. 3:11, 12; Heb. 12:6.

⁵ Nyengo zinyake ŵabali mu mpingo ŵangapambana maghanoghano pa tunthu tuchokotuchoko. Mukwenera kumazga luŵiro mphindano izi mwachitemwa. (Efe. 4:26; Fil. 2:2-4; Kol. 3:12-14) Para mwapambana maghanoghano na munyinu mu mpingo, mungamazga suzgo ili para mungalondezga ulongozgi wa Petrosi wakuti: “Mutemwanenge chomene, chifukwa chitemwa chikubenekelera zakwananga zinandi.” (1 Pet. 4:8) Baibolo likuti: “Tose tikukhuŵara nyengo zinandi.” (Yak. 3:2) Para ŵanyithu tikuŵachitira vinthu kuyana na umo ise tikukhumbira kuti ŵatichitire, chiŵenge chipusu kuŵagowokera na kuluwako tumaubudi tuchokotuchoko uto ŵatibudira.—Mat. 6:14, 15; 7:12.

⁶ Para mwamanya kuti munyinu wali kukhuŵara chifukwa cha ivyo mukayowoya panji kuchita, mukwenera kuchitapo kanthu mwaluŵiro kuti mtende uwelerepo. Manyani kuti para mwakhalapo waka, ubwezi winu na Yehova nawo unganangika. Yesu wakaphalira ŵasambiri ŵake kuti: “Usange ukwiza na chawanangwa chako ku jotchero ndipo penepara wakumbuka kuti mubali wako wali nawe na kafukwa, uchileke chawanangwa chako penepapo panthazi pa jotchero. Ulute, ukawezgerepo dankha mtende na mubali wako. Para wawerako ndipo upeleke chawanangwa chako.” (Mat. 5:23, 24) Panji mukaleka waka kupulikiskana lekani mukapambana maghanoghano. Usange ndimo viliri, dumbiskanani. Ntchakuzirwa chomene kuti waliyose mu mpingo wayowoyenge makora na ŵanyake kuti paleke kuŵa mphindano. Para tikuchita nthena chiŵenge chipusu kumazga masuzgo agho ghakuŵapo chifukwa cha kwananga.

⁷ Nyengo zinyake ŵalaŵiliri ŵangapeleka ulongozgi kwa mubali panji mudumbu kuti wawonenge vinthu mwakwenelera. Ntchipusu yayi kupeleka ulongozgi. Paulosi wakalembera Ŵakhristu ŵa ku Galatiya kuti: “Ŵabali, usange munthu wapuluka kwambura kumanya, imwe muli ŵakwenelera mwauzimu yezgani kumovwira munthu wanthena na mzimu wakuzika.”—Gal. 6:1.

⁸ Para ŵalaŵiliri ŵakuliska mskambo, ŵakuvikilira mpingo ku ngozi yauzimu na kovwira kuti pa mpingo paleke kuŵa masuzgo ghakuru. Ŵalara ŵakuŵikapo mtima kuteŵetera mpingo ndipo ŵakulondezga mazgu agho Yehova wakaphalira Yesaya, ghakuti: “Waliyose waŵenge nga ni malo ghakubisamamo ku mphepo, malo ghakujoŵamo ku chivula, nga nthumilonga twa maji mu charu chambura maji, nga ni mfwiri wa jalawe likuru mu charu chakomira.”—Yes. 32:2.

⁹ Paulosi wakachenjezga kuti pali ŵanthu awo ŵangananga mpingo. Wakati: “Tikumupani ulongozgi . . . kuti mufumeko kwa mubali waliyose uyo wakwenda mwambura kwenelera, mwakupambana na ulongozgi uwo mukapokera kwa ise.” Wakalongosora makora fundo iyi apo wakati: “Kweni usange munyake wakupulikira yayi mazgu ghithu gha mu kalata iyi, mumuŵanike munthu wanthena, ndipo muleke kwendezgana nayo, mwakuti wakhozgeke soni. Ndipouli, kumuwona nga ni mulwani yayi, kweni lutilirani kumuchenjezga pakuŵa mubali.”—2 Tes. 3:6, 14, 15.

¹⁰ Nyengo zinyake munthu wangaŵa kuti wandachite zakwananga zikuru zakuti wangasezgekerapo, kweni wangamba kuyuyura malango gha Chiuta. Wangaŵa kuti ni mukata chomene, wakutemwa kususka, panji wangaŵa kuti ni mukazuzi chomene. Wangaŵaso kuti ‘wakunjilirapo pa nkhani izo zikumukhwaska yayi.’ (2 Tes. 3:11) Wangaŵaso munthu uyo wakutemwa kulyera ŵanyake panji uyo wakutemwa vyakusanguluska viheni. Nkharo iyi njiheni chomene ndipo yingananga mbiri ya mpingo. Ŵakhristu ŵanyake ŵangamba kutolerako nkharo iyi.

¹¹ Chakwamba, ŵalara ŵangamovwira munthu uyo wali na nkharo iyi na kumupa ulongozgi wa mu Baibolo. Para ŵalara ŵamovwirapo kanandi waka kweni wakusintha yayi, ŵangapangana kuti ŵayowoye nkhani yakuchenjezga ŵabali. Ŵalara ŵakwenera kulongora vinjeru na umanyi pa nkhani iyi. Ŵakwenera kuwona usange nkharo ya munthu uyu njiheni nadi ndipo yingapuluska ŵabali kweniso usange pakukhumbikwa nadi nkhani yakuchenjezga. Para payowoyekenge nkhani, uyo wayowoyenge waleke kuzunura zina la uyo wananga, kweni wazunure waka nkharo iyo njambura kwenelera. Awo ŵakumumanya munthu uyo wali na nkharo yiheni iyo yayowoyeka mu nkhani, ŵalekenge kuchezga nayo. Kweni ŵalutilirenge kuchitira nayo lumoza vinthu vyauzimu, na “kumuchenjezga pakuŵa mubali.”

¹² Para wose mu mpingo ŵalondezga ulongozgi uwo wayowoyeka, munthu wankharo yiheni wachitenge soni na kuleka nkharo yake. Para waleka nkharo yake yiheni, ntchakukhumbikwaso yayi kuti ŵabali ŵamuwonenge nga ngwankharo yiheni.

¹³ Para tikusulako panji kugowokera munthu uyo watinangira, chikung’anamura kuti tikuzomerezga ivyo wachita yayi. Ni maubudi ghose yayi agho tikuchita chifukwa chakuti ndise ŵambura urunji. Ntheura vingaŵa makora yayi kulekelera maubudi ghakuru. (Lev. 19:17; Sal. 141:5) Mu Dango mukalembeka kuti zakwananga zinyake ni zikuru apo zinyake ni zichoko. Mazuŵa ghano Ŵakhristu nawo ŵakumanya kuti pali zakwananga zinyake zikuru, zinyake zichoko.—1 Yoh. 5:16, 17.

¹⁴ Yesu wakalongosora umo tingachitira para tabudirana vikuru na Mkhristu munyithu. Iyo wakayowoya kuti: “Usange mubali wako wakunangira, [1] luta ukamuphalire ubudi wake pakati pa iwe na iyo pamwekha. Usange wakupulikira, ndikuti wamuwezga mubali wako. Kweni usange wakupulika chara, [2] tolerapo munthu yumoza panji ŵaŵiri, mwakuti nkhani yiliyose yikhozgeke na mulomo wa ŵakaboni ŵaŵiri panji ŵatatu. Usange wakuŵapulikira chara, [3] phalira mpingo. Usange wakupulikira chara nanga ni mpingo, umuwone nga ni munthu wamitundu na wakusonkheska msonkho.”—Mat. 18:15-17.

¹⁵ Chiyelezgero icho Yesu wakayowoya pa Mateyu 18:23-35, chikulongora kuti zakwananga izo zazunulika pa Mateyu 18:15-17 zikukhwaska nkhani za ndalama panji katundu, nga nkhutondeka kuwezga ngongoli panji ukhuluku. Zinyakeso mwa zakwananga izi nkhusesa chifukwa kukunanga mbiri ya munthu.

¹⁶ Para munthu munyake mu mpingo wamunangirani nadi, kuchimbilira kuluta ku ŵalara yayi kuti ŵanjilirepo pa nkhani zinu. Yesu wakayowoya kuti, chakwamba yowoyani na munthu uyo wamubudirani. Yezgani kumazga dankha mwaŵaŵiri nkhani yinu pambere mundachemerepo munthu munyake. Kumbukani kuti Yesu wakayowoyapo yayi kuti ‘Luta kamoza pera ukamuphalire ubudi wake.’ Para munthu wandazomere ubudi wake na kuphepiska pa nyengo yakwamba, chingaŵa chiwemi kuti muzakayowoyeso nayo nyengo yinyake. Para nkhani iyi yingamara munthowa iyi, uyo wakabuda wazamuwonga chomene kuti mundaphalirepo munthu munyake zakwananga izo wakachita, panji kunanga mbiri yake mu mpingo. Para mwachita nthena ndikuti ‘mwamuwezga mubali winu.’

¹⁷ Usange uyo wakananga wazomera ubudi wake, ndipo wakupempha chigowokero na kunozga ivyo vikabudika, palije chifukwa cha kukosera kuti nkhani iyo yilutilire. Nangauli ukaŵa ubudi ukuru, kweni ŵanthu ŵaŵiri awo ŵakabudirana ŵangamarana nayo ŵekha nkhani iyi.

¹⁸ Usange mwatondeka kumuwezga mubali winu mwati mwamuphalira ubudi wake “pamwekha,” mbwenu ‘mutolerepo munthu yumoza panji ŵaŵiri’ nga umo Yesu wakayowoyera, na kukayowoyaso nayo mubali winu. Ŵanthu awo mutorenge, nawo ŵakwenera kuŵa na chilato cha kumuwezga mubali winu. Chingaŵa chiwemi kuti mulute na ŵanthu awo ŵakumanya makora nkhani iyo. Kweni para palije uyo wakumanya, mungatoleraposo kaboni yumoza panji ŵaŵiri kuti ŵakaŵepo apo mukudumbiskana. Ŵaŵe ŵakuti ŵakumanya kovwira pa nkhani zanthena izo ndipo ŵangawona usange ivyo vikachitika mbubudi nadi. Ŵalara awo mwasankha kuti mulute nawo ŵakwimira mpingo yayi, chifukwa ni wupu wa ŵalara yayi uwo waŵatuma.

¹⁹ Usange nkhani yatondeka kumara makora ndipo mukuwona kuti mungayileka waka yayi mwati mwayezga kudumbirana nayo mwekha ndiposo pamaso pa munthu yumoza panji ŵaŵiri, mbwenu muphalire ŵalaŵiliri ŵa mpingo. Kumbukani kuti khumbo linu ndakuti mu mpingo mulutilire kuŵa mtende na utuŵa. Para mwaphalira ŵalara nkhani yinu, ŵalekerani ndipo gomezgani Yehova. Mungazomerezganga yayi kuti nkharo ya munthu munyake yimukhuŵazgani, panji kumupokani chimwemwe apo mukuteŵetera Yehova.—Sal. 119:165.

²⁰ Ŵalara ŵazamufufuza nkhani iyo. Usange ŵawona kuti mubali wakamunangirani nadi, ndipo wakukhumba yayi kuphepiska na kunozga ivyo wakabuda, ŵangamusezga munthu uyu, chifukwa watondeka kusintha nkharo yake. Para ŵalaŵiliri ŵachita nthena, ndikuti ŵavikilira mskambo na mpingo kuti uŵenge utuŵa.—Mat. 18:17.

²¹ Nkhani zakukhwaskana na uzaghali, uleŵi, kugonana kwa ŵanalume pera panji ŵanakazi pera, kutuka, kugaluka, kusopa vikozgo na zakwananga zinyake zikuru, zingamara na ŵanthu ŵaŵiri pera yayi. (1 Kor. 6:9, 10; Gal. 5:19-21) Ŵalara ŵakwenera kuphalirika nkhani zanthena izi ndipo ndiwo ŵakwenera kweruzga, chifukwa mpingo ungaŵa pangozi. (1 Kor. 5:6; Yak. 5:14, 15) Ŵanyake ŵangayowoya ŵekha zakwananga zawo ku ŵalara, ndipo ŵanyake ŵangayowoya zakwananga izo munthu munyake wachita. (Lev. 5:1; Yak. 5:16) Mulimose umo ŵalara ŵangapulikira zakwananga zikuru izo munthu wakubatizika wachita, chakwamba ŵalara ŵaŵiri ŵakwenera kufufuza. Usange ukaboni ulipo wakuti munthu wachita nadi zakwananga zikuru, wupu wa ŵalara usankhenge ŵalara ŵatatu kuti ŵapange komiti yacheruzgo kuti yeruzge nkhani iyo.

²² Ŵalara ŵakuŵa maso na chinthu chilichose icho chingapweteka mberere mwauzimu. Ŵakugwiliskira ntchito Mazgu gha Chiuta mwaluso kuti ŵachenye awo ŵananga na kuŵawovwira kuti ŵaŵeso ŵabwezi ŵa Chiuta. (Yuda 21-23) Ŵalara ŵakulondezga ulongozgi uwo Paulosi wakapeleka kwa Timote, wakuti: “Panthazi pa Chiuta na Khristu Yesu, uyo wazamweruzga ŵamoyo na ŵakufwa . . . nkhukuchiska kuti: . . . Uchenye, uchenjezge, na kuchiska. Pakuchita ivi uŵe wakuzikira na kusambizga mwaluso.” (2 Tim. 4:1, 2) Pakukhumbikwa nyengo yinandi kuti ŵalara ŵachite ntchito iyi, kweni ndiyo ni ntchito yawo. Mpingo ukuwonga ivyo ŵalara ŵakuchita ndipo ukuŵapa “ntchindi zikuru.”—1 Tim. 5:17.

²³ Para pali ukaboni wakuti munthu wananga, chakwamba ŵalara ŵakovwira munthu uyo wananga kuti wanozge ubwezi wake na Chiuta. Usange walongora kuti walapa nadi ndipo ŵamovwira, ŵalara ŵamuchenye kumphepete panji pamaso pa awo ŵakapelekanga ukaboni pa nyengo ya kweruzga mulandu uwu. Para vyaŵa nthena, wakwananga wasambirengepo kanthu, ndipo ŵanyake awo ŵakumanya ivyo wakachita nawo ŵaŵenge na wofi. (2 Sam. 12:13; 1 Tim. 5:20) Para munthu wachenyeka, wakukanizgika kuchita vinthu vinyake mu mpingo. Vikuŵa nthena kuti uyo wananga ‘wanyoloske nthowa yake.’ (Heb. 12:13) Para ŵalara ŵawona kuti wanozga ubwezi wake na Chiuta, wakwambaso kuchita vinthu ivyo wakakanizgika.

²⁴ Usange komiti yacheruzgo yawona kuti zakwananga za munthu uyo walapa nadi zimanyikwenge mu mpingo panji uko wakukhala, kweniso yawona kuti mpingo ukwenera kuchenjera nayo, paŵenge chipharazgo pa Ungano wa Uteŵeti na Umoyo Wachikhristu. Chilembeke kuti: “[Zina la munthu] wachenyeka.”

²⁵ Nyengo zinyake munthu wakwananga wakuŵa munonono mtima ndipo wakukana kumovwira kuti wasinthe nkharo yake yiheni. Pa nyengo iyo ŵalara ŵakudumba nayo, wangatondeka ‘kulongora milimo yakuti wang’anamuka mtima.’ (Mil. 26:20) Para vili nthena, ntchiwemi kumusezga mu mpingo munthu wakwananga wambura kulapa uyu. Ŵakumusezga kuti waleke kwendezgana na ŵanthu ŵa Yehova awo mbatuŵa. Wakwenera kusezgeka kuti nkharo yake yiheni yileke kunanga mpingo. Ntheura mpingo ukuŵa wakuvikilirika mwauzimu ndiposo ukuŵa na mbiri yiwemi. (Doto. 21:20, 21; 22:23, 24) Paulosi wakati wapulika vya munthu uyo wakaŵa na nkharo yakulengeska mu mpingo wa Korinte, wakaphalira ŵalara kuti ‘munthu wanthena ŵamupeleke kwa Satana mwakuti mzimu [wa mpingo] upone.’ (1 Kor. 5:5, 11-13) Paulosi wakazunuraso mazina gha ŵanthu awo ŵakasezgeka chifukwa cha kugaluka.—1 Tim. 1:20.

²⁶ Para komiti yacheruzgo yawona kuti ntchakwenelera kusezga munthu wakwananga uyo wandasinthe nkharo yake, yikwenera kumuphalira vifukwa vya mu Malemba ivyo wasezgekera. Yimuphalireso kuti wangachita apilu usange wawona kuti mulandu wake underuzgike makora. Walembe kalata ndipo walongosore vifukwa ivyo wakuchitira apilu. Kufuma apo ŵamuphalilira kuti wasezgeka, ŵamupenge mazuŵa 7 kuti wachite apilu. Para wupu wa ŵalara wapokera kalata ya apilu, ukwenera kumanyiska mulaŵiliri wa dera nkhani iyi. Iyo wazamusankha ŵalara ŵaluso kuti ŵapange komiti ya apilu kuti yipulikeso mulandu wake. Awo ŵali mu komiti ya apilu ŵakwenera kuyiwona nkhani iyi mu sabata yimoza kufuma apo ŵapokelera kalata ya apilu. Para munthu wachita apilu, kupharazga dankha yayi ku mpingo kuti wasezgeka. Pa nyengo iyi, uyo wachita apilu wakwenera yayi kuzgorapo na kulomba pa maungano panji kuchita mauteŵeti ghanyake ghalighose.

²⁷ Ni lusungu kuti munthu wakwananga wapike mwaŵi wakuti wachite apilu kuti wakayowoyeso madandawuro ghake. Para uyo wachita apilu watondekera dala kukumana na komiti ya apilu, ndipo ŵalara ŵayezgayezga kuti ŵakumane nayo kweni vyatondeka, mbwenu ŵalara ŵakwenera kupharazga ku mpingo kuti wasezgeka.

²⁸ Para wakwananga wakukhumba yayi kuchita apilu, komiti yacheruzgo yimuphalire kuti wakwenera kulapa. Kweniso ŵamuphalire ivyo wangachita kuti wazakawezgekeremo mu mpingo. Para ŵalara ŵangachita nthena ndikuti ŵamovwira ndiposo ŵamulongora lusungu. Khumbo lawo ndakuti wasinthe nkharo yake na kuweleraso mu gulu la Yehova para nyengo yajumphapo.—2 Kor. 2:6, 7.

²⁹ Para wakwananga watondeka kulapa ndipo wasezgeka mu mpingo, paŵe chipharazgo chifupi chakuti: “[Zina la munthu] kufuma muhanya uno njumoza wa Ŵakaboni ŵa Yehova yayi.” Chipharazgo ichi chovwirenge ŵanthu mu mpingo kuti ŵaleke kwendezgana nayo.—1 Kor. 5:11.

³⁰ Lizgu lakuti “kujilekaniska” likuyowoya vya munthu wakubatizika uyo wayowoya yekha kuti wakukhumbaso yayi kuŵa Kaboni wa Yehova. Nyengo zinyake vyakuchita vyake ndivyo vingalongora kuti wajilekaniska, nga nkhunjira mu wupu uwo uzamweruzgika na Yehova Chiuta, uwo ukuchita vinthu vyakususkana na ivyo Baibolo likusambizga.—Yes. 2:4; Chivu. 19:17-21.

³¹ Pakuyowoya za ŵanthu awo ŵakajilekaniska, mpositole Yohane wakalemba kuti: “Ŵakafumako kwa ise, kweni ŵakaŵa ŵamoza na ise yayi, pakuti ŵaŵenge ŵamoza na ise, mphanyi ŵakakhalilira na ise.”—1 Yoh. 2:19.

³² Pamaso pa Yehova munthu uyo wajilekaniska wakupambana na Mkhristu wakulopwa, uyo waleka kupharazga. Nyengo zinyake munthu wangalopwa chifukwa chakuti wakusambira yayi Mazgu gha Chiuta zuŵa lililose. Nyengo zinyake munthu wangaleka kuteŵetera Yehova chifukwa cha masuzgo panji kutambuzgika. Ŵalara na ŵanji mu mpingo ŵakwenera kulutilira kumovwira mwauzimu Mkhristu uyo walopwa.—Rom. 15:1; 1 Tes. 5:14; Heb. 12:12.

³³ Kweni usange Mkhristu wajilekaniska, paŵe chipharazgo ku mpingo chakuti: “[Zina la munthu] kufuma muhanya uno njumoza wa Ŵakaboni ŵa Yehova yayi.” Mpingo ukwenera kumanya kuti munthu uyu wakuyana waka na wakusezgeka.

³⁴ Para pajumpha nyengo, munthu uyo wasezgeka panji uyo wajilekaniska wangaweleramo mu mpingo para pali ukaboni wakuti walapa nadi ndiposo kuti wasintha nkharo yake yiheni. Wakulongora kuti wakukhumbisiska kuŵaso paubwezi na Yehova. Ŵalara ŵakwenera kuwoneseska kuti pajumpha nyengo yakukwana. Kuyana na umo wakwananga wakuchitira, pangajumpha myezi yinandi, chaka chimoza, panji vinandi kuti uyo wakasezgeka walongore kuti wang’anamuka nadi mtima. Usange wupu wa ŵalara wapokera kalata ya munthu uyo wakukhumba kuwelera mu mpingo, komiti ya kuwezgeramo yikwenera kukumana nayo. Komiti iyi yiwonenge usange munthu uyu ‘walongora milimo yakuti wang’anamuka mtima,’ na kuwona usange pa nyengo iyo wangaweleramo mu mpingo panji yayi.—Mil. 26:20.

³⁵ Usange munthu uyo wakupempha kuti wawelere mu mpingo wasamira ku mpingo unyake, wupu wa ŵalara wa mpingo uwo wakuwunganako ukwenera kusankha komiti kuti yipulikizge pempho lake. Usange ŵalara ŵa mu komiti yakuwezgera munthu mu mpingo uwo wasamirako ŵakuwona kuti wakwenera kuwelera mu mpingo, ŵalongosore vifukwa ivyo vyaŵakhorweska kwa ŵalara ŵa mpingo uwo ukamusezga. Makomiti ghaŵiri agha ghakwenera kuphalirana vyose ivyo vilipo vyakukhwaskana na nkhani iyi, kuti ŵadumure makora nkhani. Kweni komiti ya kuwezgeramo ya mpingo uwo wakasezgekeramo ndiyo yili na wenelero wa kumuwezgeramo mu mpingo.

³⁶ Para komiti ya kuwezgeramo yakhorwa kuti munthu uyo wakasezgeka panji wakajilekaniska wang’anamuka nadi mtima ndipo wakwenera kuwezgekeramo mu mpingo, paŵe chipharazgo ku mpingo uwo wakasezgekera. Usange sono wali ku mpingo unyake, ŵapharazgeso ku mpingo uko wali. Chilembeke kuti: “[Zina la munthu] wawezgekeramo ndipo sono njumoza wa Ŵakaboni ŵa Yehova.”

³⁷ Ŵalara ŵakwenera kuphalirika usange mwana wakubatizika wachita zakwananga zikuru. Para ŵalara ŵakweruzga milandu ya ŵana ŵakubatizika awo ŵachita kwananga kukuru, chingaŵa chiwemi kuti ŵapapi ŵawo awo Mbakaboni ŵaŵepo. Ŵapapi ŵakwenera kukolerana na komiti yacheruzgo ndipo ŵaleke kumuŵikira kumanyuma mwana wawo kuti waleke kupokera chilango. Nga umo ŵakuchitira na ŵanthu ŵalara, chilato cha komiti yacheruzgo ntchakuti yichenye na kovwira uyo wananga. Kweni para mwana watondeka kung’anamuka mtima, wakusezgeka.

³⁸ Kasi vikwenda wuli para ŵapharazgi ŵambura kubatizika ŵachita zakwananga zikuru? Pakuti mbapharazgi ŵa mpingo ŵambura kubatizika, iwo ŵakusezgeka yayi. Panyake ŵakupulikiska makora yayi ivyo Baibolo likusambizga. Ntheura ŵakukhumbikwira waka kuŵawovwira kuti ‘ŵanyoloske nthowa zawo.’—Heb. 12:13.

³⁹ Usange mupharazgi wambura kubatizika watondeka kung’anamuka mtima apo ŵalara ŵaŵiri ŵamovwiranga, mbwenu mpingo uphalirike. Paŵe chipharazgo chifupi chakuti: “[Zina la munthu] kufuma muhanya uno ni mupharazgi wambura kubatizika yayi.” Pamanyuma pa chipharazgo, mpingo umuwonenge nga ni munthu wakucharu. Nangauli wakwananga uyu wandasezgeke, kweni Ŵakhristu ŵakwenera kuchenjera kuti ŵaleke kwendezgana nayo. (1 Kor. 15:33) Ngwakwenelera yayi kupeleka malipoti.

⁴⁰ Para nyengo yajumphapo, munthu wambura kubatizika uyo wakalekeskeka kuŵa mupharazgi wangakhumba kuŵaso mupharazgi. Para vyaŵa nthena, ŵalara ŵaŵiri ŵakwenera kukumana nayo kuti ŵawone umo wakuchitira mwauzimu. Usange ngwakwenelera kuŵaso mupharazgi, paŵe chipharazgo chifupi chakuti: “[Zina la munthu] kufuma muhanya uno ni mupharazgiso wambura kubatizika.”

⁴¹ Mpingo wa Chiuta uli nga ni malo ghawemi chomene ghakuliskako viŵeto uko kuli utheka wakubiliŵira na maji ghanandi. Ntheura para tikuwungana na mpingo wa Chiuta, tikukondwa na vyakurya vyauzimu ivyo Yehova wakupeleka. Kweniso Yehova wakutivikilira kwizira mu ŵaliska awo ŵakulongozgeka na Khristu. (Sal. 23; Yes. 32:1, 2) Waliyose uyo wali mu paradiso wauzimu ngwakuvikilirika nangauli tili mu mazuŵa ghaumaliro na ghakusuzga.

⁴² Para tikulutilira kuŵa ŵamtende ndiposo ŵatuŵa mu mpingo, tilutilirenge kuŵaliska unenesko wa Ufumu. (Mat. 5:16; Yak. 3:18) Chiuta watitumbikenge, ndipo tikondwenge kuwona ŵanthu ŵanandi ŵakumanya Yehova na kumuteŵetera pamoza na ise apo tikuchita khumbo lake.