Ivyo Yesu Wakasambizga Vyakukhwaskana na Ciuta

“Palije uyo wakumanya Ŵawiske, kweni Mwana ndiyo, na waliyose uyo Mwana wakusankha kumuvumbulira Ŵawiske.”—LUKA 10:22, PHANGANO LIPHYA.

PAMBERE wandize pa caru capasi, Mwana wakwamba wa Ciuta wakaŵa kuti wakhala na Ŵawiske kwa vilimika vinandi comene. (Ŵakolose 1:15) Ntheura, Mwana uyu wakamanyanga makora maghanoghano gha Ŵawiske, umo ŵakujipulikira, ndiposo umo ŵakucitira vinthu. Wakati wiza pa caru capasi, wakaŵa wakukhumbisiska kusambizga ŵanthu unenesko wakukhwaskana na Ŵawiske. Para tingategherezga kwa iyo, tingasambira vinandi vyakukhwaskana na Ciuta.

Zina la Ciuta Zina la Ciuta lakuti Yehova likaŵa lakuzirwa comene kwa Yesu. Mwana wakutemweka uyu wakakhumbanga kuti ŵanji ŵalimanye zina la Ŵawiske na kulizunura. Zina lakuti Yesu likung’anamura kuti “Yehova ni Mponoski.” Mu usiku wakuti namacero wafwenge, Yesu wakalomba kwa Yehova kuti: “Naŵamanyiska zina linu.” (Yohane 17:26) Nchakuzizika yayi kuti Yesu wakazunuranga zina la Ciuta na kumanyiska ŵanji. Nakuti ŵategherezgi ŵake ŵakatenge ŵapulikiskenge wuli unenesko wakukhwaskana na Yehova kwambura kumanya zina lake ndiposo ico likung’anamura?a

Citemwa cikuru ca Ciuta Pakulomba kwa Ciuta, nyengo yinyake Yesu wakati: “Ŵadada, . . . mukanitemwa pambere caru cindazikike.” (Yohane 17:24) Pakuti Yesu wakatemwekanga na Ciuta apo wakaŵa kucanya, wakati wiza pa caru capasi wakakhumba kuvumbura citemwa ici mu nthowa zakupambanapambana.

Yesu wakalongora kuti citemwa ca Yehova nchikuru comene. Iyo wakati: “Ciuta wakacitemwa comene caru, mwakuti wakapeleka Mwana wake wapadera yekha, ntheura kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.” (Yohane 3:16) Lizgu la Cigiriki ilo lili kung’anamulika kuti “caru” likung’anamura “caru capasi” yayi. Kweni likung’anamura ŵanthu wose. Ntheura, tingawona kuti citemwa ca Ciuta nchikuru nadi cifukwa wakatuma Mwana wake wapadera mwakuti ŵanthu ŵacipulikano ŵawombokwe ku kwananga na nyifwa kweniso kuti ŵaŵe na cilindizga ca umoyo wamuyirayira. Tingapulikiska yayi ukuru wa citemwa ca Ciuta ici.—Ŵaroma 8:38, 39.

Yesu wakutisimikizgira fundo yakuzirwa comene yakuti Yehova wakutemwa munthu waliyose uyo wakumusopa. Wakasambizga kuti Yehova wali nga ni muliska uyo wakuwona mberere yiliyose kuŵa yapadera ndiposo yakuzirwa. (Mateyu 18:12-14) Yesu wakati nanga ni mpheta yimoza yikuwa pasi cara kwambura Yehova kumanya. Iyo wakatiso: “Nanga ni masisi gha mu mitu yinu ghose ghali kupendeka.” (Mateyu 10:29-31) Usange Yehova wakumanya para mpheta yawa kufuma mu civwimbo, asi ndikuti wakuŵapwelelera comene awo ŵakumusopa? Usange Yehova wakupenda sisi lililose la ku mutu kwithu, kasi tingati cilipo ico wakutondeka kumanya cakukhwaskana na umoyo withu, vyakukhumba vithu, masuzgo ghithu, ndiposo ivyo tikwenjerwa navyo?

Dada wakucanya Nga umo tanguwonera mu nkhani iyo yajumpha, Yesu ni Mwana wapadera yekha wa Ciuta. Nchakuzizika yayi kuti Mwana wakutemweka uyu kanandi wakatenge Yehova Mbawiske. Apo Yesu wakaŵa na vilimika 12, wakati Yehova ‘Mbadada’ ŵake. Agha ni mazgu ghake ghakwamba kulembeka ndipo wakaghayowoyera mu tempele. (Luka 2:49) Pakuyowoya za Yehova, Yesu wakatemwanga kuyowoya kuti “Ŵawiskemwe,” “Ŵadada ŵithu,” na “Ŵadada.” Mazina agha ghakusangika mu malo pafupifupi 190 mu mabuku gha Mateyu, Mariko, Luka, na Yohane. (Mateyu 5:16; 6:9; 7:21) Mwakuzunura mazina agha, Yesu wakalongora kuti ŵanthu ŵambura kufikapo kweniso ŵakwananga ŵangaŵa paubwezi na Yehova.

Ngwalusungu ndipo ngwakunozgeka kugowokera Yesu wakamanya kuti ŵanthu ŵambura kufikapo ŵakukhumbikwira kuti Yehova waŵacitire lusungu lukuru. Mu ntharika ya mwana wakusakaza, Yesu wakayaniska Yehova na dada wacisungusungu, uyo wakugowokera ndiposo uyo wakupokelera mwana uyo waleka zakwananga zake. (Luka 15:11-32) Ntheura, Yesu wakutisimikizgira kuti Yehova wakuwona kusintha kulikose uko munthu wakwananga wakucita mu mtima wake, ndipo wakumucitira lusungu. Yehova ngwakunozgeka kugowokera munthu wakwananga. Yesu wakati: “Nkhumuphalirani kuti ntheura ndimo kuzamuŵira cimwemwe cikuru kucanya pa wakwananga yumoza uyo wapera kuluska ŵarunji makumi ghankhondi na ghanayi pacanya ŵankhondi na ŵanayi (99) awo ŵakukhumbikwira kupera cara.” (Luka 15:7) Ni njani uyo wangakana kuŵa paubwezi na Ciuta walusungu nga ni uyu?

Wakupulika malurombo Pambere Yesu wandize pa caru capasi, wakajiwonera yekha kuti Yehova ‘wakupulika malurombo’ ndipo wakukondwa na malurombo gha ŵanthu ŵakugomezgeka awo ŵakumusopa. (Salmo 65:2) Lekani apo wakiza pa caru capasi, wakasambizga ŵasambiri ŵake umo ŵangalombera ndiposo ivyo ŵangalomba. Yesu wakati: ‘Mungayowoyanga vinthu vimoza pera mwakuwerezgawerezga cara.’ Wakaciska ŵasambiri ŵake kulomba kuti khumbo la Ciuta “licitike, umo kuliri kucanya, ntheura pera pa caru capasi.” Tingalombaso kuti watipe cakurya ca zuŵa na zuŵa, kuti watigowokere kwananga kwithu, ndiposo kuti tizizipizge viyezgo. (Mateyu 6:5-13) Yesu wakasambizga kuti Yehova wakuzgora malurombo agho ŵateŵeti ŵake ŵakulomba mu cipulikano nga umo dada wacitemwa wakucitira.—Mateyu 7:7-11.

Tikukayika yayi kuti Yesu wakaŵa na nthowa zakusambizgira unenesko wakukhwaskana na Yehova ndiposo wunthu wake. Kweni pakaŵaso cinthu cinyake cakukhwaskana na Yehova ico Yesu wakakhumbisiskanga kupharazga. Wakapharazga nthowa iyo Yehova wazamusinthira vinthu pa caru cose mwakuti wazakafiske cilato cake. Nakuti ndiwo ukaŵa mutu ukuru wa upharazgi wake.

[Mazgu ghamusi]