Gomezgekani kwa Khristu na Muzga Wake wa Magomezgeko

“Fumu yake . . . yizamkumwimika pa vyose ivyo yili navyo.”—MATEYU 24:45-47.

1, 2. (a) Kasi Malemba ghakuti Mulongozgi withu ni njani? (b) Nchivici cikulongora kuti Khristu wakulongozga mpingo Wacikhristu?

“MUNGACEMEKANGA ŵacilongozgi: cifukwa Yumoza ndi Cilongozgi winu, Mweneuyo ndi Khristu.” (Mateyu 23:10) Pakuyowoya mazgu agha, Yesu wakaŵabisira yayi ŵalondezgi ŵake kuti pa caru capasi palije munthu uyo wakenera kuŵa mulongozgi wawo. Yesu Khristu, ndiyo yekha wakaŵa Mulongozgi wawo. Ciuta ndiyo wakamwimika. Yehova “wakamuwuska ku ŵakufwa, . . . ndipo wakamupeleka kuti waŵe mutu wa pacanya pa vyose ku ekleziya, ilo ndi thupi lake.”—Ŵaefeso 1:20-23.

² Pakuti Khristu ni “mutu wa pacanya pa vyose” mu mpingo Wacikhristu, wali na mazaza pa vyose ivyo vikucitika mu mpingo. Nakuti vyose ivyo vikucitika mu mpingo wakuviwona. Wakuwoneseska umo Ŵakhristu mu mpingo uliwose ŵakucitira mwauzimu. Ici cikuwoneka makora comene mu uvumbuzi uwo ukalongereka kwa mpositole Yohane ca m‘ma 90 C.E. Kankhondi kose, Yesu wakaphalira mipingo yinkhondi na yiŵiri kuti wakamanyanga milimo yawo, ivyo ŵakacitanga makora na ivyo ŵakatondekanga. Ndipo wakaŵapa ulongozgi kweniso kuŵakhuŵirizga. (Civumbuzi 2:2, 9, 13, 19; 3:1, 8, 15) Tikugomezga kuti Yesu wakamanyangaso umoyo wauzimu wa mipingo yinyake ya ku Asia Minor, Palestine, Syria, Babylonia, Greece, Italy na vigaŵa vinyake. (Milimo 1:8) Lero ke?

Muzga wa Magomezgeko

 3. Cifukwa wuli nchakwenelera kuyaniska Khristu na mutu ndiposo mpingo wake na thupi?

³ Yesu wakati wawuka, pambere wandakwelere kucanya ku Ŵawiske, wakaphalira ŵasambiri ŵake kuti: “Mazaza ghose ghapika kwa Ine kucanya na pasi.” Kweniso wakati: “Wonani, Ine ndili namwe mazuŵa ghose mpaka ku umaliro wa mgonezi.” (Mateyu 28:18-20) Fundo iyi yikulongora kuti iyo walutilirenge kuŵa Mutu wawo. Pakulembera Ŵakhristu ŵa ku Efeso na Kolose, mpositole Paulosi wakayaniska mpingo Wacikhristu na “thupi,” ilo mutu wake ni Khristu. (Ŵaefeso 1:22, 23; Ŵakolose 1:18) Buku la The Cambridge Bible for Schools and Colleges likuti mazgu agha “ghakulongora kuti kukolerana kwa viŵalo na mutu ndiko nkhwakuzirwa pera yayi, kweniso kuti viŵalo vikucita khumbo la mutu. Viŵalo ndivyo ni viteŵetero vyake.” Kasi Khristu watuma njani kuŵa citeŵetero cake kufuma apo wakapokera mazaza gha Ufumu mu 1914?—Daniel 7:13, 14.

 4. Nga umo wakacimira Malaki, kasi Yehova na Khristu Yesu ŵakasanga vici apo ŵakiza kuzakendera tempele lauzimu?

⁴ Malaki wakacimirathu kuti Yehova Ciuta pamoza na “thenga [lake] la phangano,” Mwana wake Yesu Khristu, uyo wali pa citengo ca Ufumu, ŵizenge kuzakeruzga na kwendera “tempele” lake, panji nyumba yauzimu yakusoperamo. “Nyengo” ya “ceruzgo mu nyumba ya Ciuta” yikamba mu 1918.a (Malaki 3:1; 1 Petros 4:17) Ŵanthu awo ŵakatenge ŵakusopa Ciuta mwaunenesko ŵakayezgeka. Machalichi gha Cikhristu, agho kwa nyengo yitali ghakasambizganga visambizgo vyautesi ndiposo kunjilirapo mu Nkhondo Yakwamba ya Caru cose, ghakakanika. Ŵakhristu ŵakuphakazgika awo ŵakakhalapo nawo ŵakayezgeka, ŵakaŵa nga ŵengeka na moto, ndipo ŵakazomerezgeka kuŵa ŵanthu ŵakupeleka “sembe zakurunjika” kwa Yehova.—Malaki 3:3.

 5. Mwakuyana na ucimi wa Yesu wa ‘kwiza’ kwake, kasi ni njani uyo wakasangika kuŵa “muzga” wa magomezgeko?

⁵ Mwakuyana na ucimi wa Malaki, Yesu wakazunura “muzga” nga nchimoza mwa vimanyikwiro ivyo wakapa ŵasambiri ŵake kuti ŵamanye nyengo ya ‘kwiza kwake na ya umaliro wa mgonezi.’ Yesu wakati: “Ipo ndi njani muzga wa magomezgeko na wa vinjeru, uyo fumu yake yamwimika pa ŵa mu nyumba yake, kuŵapa vyakurya mu nyengo yakwenelera? Ngwamwaŵi muzga mweneuyo, uyo fumu yake para yikwiza yizamkumusanga wakucita ntheura. Inya nadi nkhumunenerani, yizamkumwimika pa vyose ivyo yili navyo.” (Mateyu 24:3, 45-47) Apo ‘wakiza’ kuzakendera “muzga” mu 1918, Khristu wakasanga Ŵakhristu ŵakuphakazgika ŵakugomezgeka, awo kwambira mu 1879 ŵakapelekanga cakurya cauzimu mu “nyengo yakwenelera” kwizira mu Gongwe la Mulinda na mabuku ghanyake ghakulongosora Baibolo. Wakaŵazomerezga kuŵa citeŵetero cake panji “muzga” wake, ndipo mu 1919 wakaŵapa nchito yakupwelelera vyake vyose vya pa caru capasi.

Kupwelelera Vinthu vya Khristu vya pa Caru Capasi

6, 7. (a) Kasi Yesu wakazunura zina wuli linyake la “muzga” wake wa magomezgeko? (b) Kasi Yesu wakang’anamurangaci pakuzunura zina lakuti “mulinda”?

⁶ Myezi yicoko waka pambere Yesu wandayowoye za “muzga” nga nchimoza mwa vimanyikwiro vya kuŵapo kwake, wakazunura “muzga” na zina linyake ilo lingatovwira kumanya milimo yake. Yesu wakati: “Ipo ndi njani mulinda mulara wa magomezgeko na wa vinjeru, uyo fumu yake yimwimikenge pa ŵa mu nyumba yake, kuŵagaŵira vyakurya mu nyengo yakwenelera? Nkhumunenerani kwakuneneska, yizamkumwimika pa vyose ivyo yili navyo.”—Luka 12:42, 44.

⁷ Apa muzga wakucemeka mulinda, lizgu ilo mu Cigiriki likung’anamura “wakupwelelera nyumba panji katundu.” Mulinda mbanthu ŵavinjeru awo ŵakulongosora waka fundo zakukondweska za mu Baibolo yayi. Padera pa kupeleka cakurya ciwemi cauzimu mu “nyengo yakwenelera,” “mulinda wa magomezgeko” wimikika pa ŵa mu nyumba yose ya Khristu. Nakuti wapika mulimo wa kupwelelera vinthu “vyose” vya Khristu vya pa caru capasi. Kasi vinthu ivi ni vici?

8, 9. Kasi muzga wali kupika vici kuti wapwelelere?

⁸ Mulimo unyake wa muzga nkhulaŵilira vinthu ivyo vikovwira ŵalondezgi ŵa Khristu kufiska milimo yawo Yacikhristu, nga ni maofesi ghakuru na minthavi ya Ŵakaboni ŵa Yehova, kweniso malo ghawo ghakusoperamo nga ni Nyumba za Ufumu na Malo panji Nyumba zakucitirako Maungano Ghakuru, pa caru cose capasi. Cakuzirwa comene nchakuti muzga wakulaŵiliraso maungano ghakukhozga mwauzimu, agho ghakucitika sabata na sabata ndiposo gha dera na gha cigaŵa. Pa maungano agha, tikusambira za kufiskika kwa maucimi gha mu Baibolo, na ulongozgi uwemi wa umo tingalondezgera fundo za mu Baibolo mu umoyo withu wa zuŵa na zuŵa.

⁹ Kweniso mulinda wakulaŵilira mulimo wakuzirwa comene wa kupharazga “makani ghawemi gheneagha gha ufumu” na ‘kusambizga ŵanthu ŵa mitundu yose.’ Mulimo uwu ukusazgapo kusambizga ŵanthu kukoleska vyose ivyo Khristu, uyo ni Mutu wa mpingo, wakalangura kuti vicitike mu nyengo yino ya umaliro. (Mateyu 24:14; 28:19, 20; Civumbuzi 12:17) Mulimo wa kupharazga na kusambizga, wawovwira kuti paŵe “mzinda ukuru” wa ŵabwezi ŵakugomezgeka ŵa ŵakuphakazgika awo ŵacali pa caru capasi. Ntheura, “vyuma vyose vya mitundu” ivi, ni vinyake mwa vinthu vyakuzirwa vya Khristu ivyo muzga wa magomezgeko wakupwelelera.—Civumbuzi 7:9; Hagai 2:7.

Wupu Wakulongozga

10. Kasi ni wupu wuli uwo ukakakanga fundo mu nyengo ya Ŵakhristu ŵakwambilira, ndipo ici cikawovwira wuli mipingo?

¹⁰ Milimo yikuru ya muzga wa magomezgeko nkhukaka fundo pa nkhani zakupambanapambana. Mu nyengo ya Ŵakhristu ŵakwambilira, ŵapositole na ŵalara mu Yerusalemu ndiwo ŵakayimiranga muzga, ndipo ŵakakakanga fundo zakovwira mpingo wose Wacikhristu. (Milimo 15:1, 2) Fundo izo wupu wakulongozga wa mu nyengo yila ukakakanga, zikatumizgikanga ku mipingo kwizira mu makalata na ŵimiliri ŵakwendakwenda. Ŵakhristu ŵakwambilira ŵakaŵa ŵakukondwa kupokera ulongozgi wakupulikikwa makora uwu. Mtende na umoza vikaŵapo cifukwa cakuti ŵakakolerananga na wupu wakulongozga na mtima wose.—Milimo 15:22-31; 16:4, 5; Ŵafilipi 2:2.

11. Kasi lero Khristu wakutuma njani kulongozga mpingo wake, ndipo kasi tikwenera kuliwona wuli gulu la Ŵakhristu ŵakuphakazgika ili?

¹¹ Nga umo vikaŵira mu nyengo ya Ŵakhristu ŵakwambilira, lero pali kagulu kacoko ka ŵalaŵiliri ŵakuphakazgika ako kakupanga Wupu Wakulongozga wa ŵalondezgi ŵa Khristu pa caru. Na “woko lake lamalyero” ilo ndankhongono, Khristu, Mutu wa mpingo, wakulongozga ŵanalume ŵakugomezgeka aŵa kulaŵilira mulimo wa Ufumu. (Civumbuzi 1:16, 20) Mu nkhani ya mdauko wake, Albert Shroeder, uyo wakateŵetera mu Wupu Wakulongozga nyengo yitali, wakalemba kuti: “Wupu Wakulongozga ukukumana Citatu cilicose, ndipo ŵakwamba ungano na lurombo, kupempha mzimu wa Yehova kuti uŵalongozge. Ŵakuyezgayezga comene kuti nkhani yiliyose iyo ŵadumbiskanenge na fundo yiliyose iyo ŵakakenge yikukolerana na Mazgu gha Ciuta, Baibolo.”b Ntheura tingaŵa na cigomezgo mu Ŵakhristu ŵakuphakazgika aŵa. Kweniso tikwenera kupulikira languro la mpositole Paulosi lakuti: “Ŵapulikirani awo mbacilongozgi ŵinu, ndipo ŵalambirani: cifukwa ŵakulinda mizimu yinu.”—Ŵahebere 13:17.

Kucindika Muzga wa Magomezgeko Mwakwenelera

12, 13. Kasi pali vifukwa wuli vya mu Malemba vyakucindikira muzga?

¹² Cifukwa cikuru ca kucindikira muzga wa magomezgeko nchakuti para tikucita nthena, ndikuti tikucindika Yesu Khristu, Fumu. Paulosi wakalemba za ŵakuphakazgika kuti: “Uyo wakacemeka, pakuŵa mwanangwa, ndi muzga wa Khristu. Mukagulika na mtengo.” (1 Ŵakorinte 7:22, 23; Ŵaefeso 6:6) Ntheura para tikujilambika kwa muzga wa magomezgeko na Wupu wake Wakulongozga, tikujilambika kwa Khristu, uyo ni Fumu ya muzga. Para tikucindika muzga uyo Khristu wamwimika kupwelelera vinthu vyake vya pa caru capasi, ndikuti tikuzomera “kuti Yesu Khristu ndi Fumu, ku ucindami wa Ciuta Ŵawiske.”—Ŵafilipi 2:11.

¹³ Cifukwa cinyake ca mu Malemba ca kucindikira muzga wa magomezgeko nchakuti, Ŵakhristu ŵakuphakazgika awo ŵali pano pasi mwakuyelezgera ŵakucemeka “tempele” leneilo Yehova wakukhalamo “mu mzimu.” Pa cifukwa ici, iwo ‘mbatuŵa.’ (1 Ŵakorinte 3:16, 17; Ŵaefeso 2:19-22) Yesu waŵikizga gulu lakucemeka tempele lituŵa ili vinthu vyake vya pa caru capasi, ico cikulongora kuti muzga pera ndiyo wali na mazaza kweniso milimo yinyake mu mpingo Wacikhristu. Ntheura, wose mu mpingo ŵakuwona kuti nchakwenelera kukolerana na ulongozgi wakufuma kwa muzga wa magomezgeko na Wupu wake Wakulongozga. Nakuti ŵa “mberere zinyake” ŵakuwona kuti ni mwaŵi ukuru comene kovwira muzga pakupwelelera vinthu vya Fumu.—Yohane 10:16.

Kuŵawovwira Mwakugomezgeka

14. Nga umo Yesaya wakacimira, kasi ŵa mberere zinyake ŵakulondezga wuli muzga na kuteŵetera nga “ŵanchito ŵambura kupokera malipiro”?

¹⁴ Nchimi Yesaya yikayowoyerathu kuti ŵa mberere zinyake ŵazamujilambika ku ŵakuphakazgika Ŵaisrayeli ŵauzimu. Yikati: “Yehova wakuti: ‘[Ŵanchito ŵambura kupokera malipiro ŵa ku Eguputo na ŵamalonda ŵa ku Etiyopiya, NW] na Ŵasabi, ŵanthu ŵakuru msinkhu, tiŵizenge kwa imwe, tiŵaŵe ŵinu, ŵamkumulondezgani, ŵamkwiza kukakika na maunyoro, na kumulambirani. Tiŵalombenge namwe, ŵamkuti, Ciuta wali na imwe pera nadi, kulije munyake; kumphepete kwake kulije munyake.’” (Yesaya 45:14) Lero, ŵa mberere zinyake ŵakulondezga muzga na Wupu wake Wakulongozga, ndipo ŵakupulikira udangiliri wawo. Pakuŵa “ŵanchito ŵambura kupokera malipiro,” ŵa mberere zinyake ŵakujipeleka na nkhongono zawo kweniso vyuma vyawo pakovwira mulimo wa kupharazga pa caru cose uwo Khristu wakapa ŵalondezgi ŵake ŵakuphakazgika.—Milimo 1:8; Civumbuzi 12:17.

15. Kasi ucimi wa pa Yesaya 61:5, 6 ukuyowoyaci za wenenawene pakati pa mberere zinyake na Israyeli wauzimu?

¹⁵ Ŵa mberere zinyake ŵakuwonga ndiposo ŵakukondwa pakuteŵetera Yehova mwakulongozgeka na muzga na Wupu wake Wakulongozga. Ŵakumanya kuti ŵakuphakazgika mbamoza ŵa “Ŵaisrayeli ŵa Ciuta.” (Ŵagalatiya 6:16) Pakuŵa “ŵayeni” ŵakukolerana na Israyeli wauzimu, ŵakuteŵetera mwakukondwa nga “ŵalimi” na ŵakupwelelera “mpheska” mwakulongozgeka na ŵakuphakazgika, awo ‘mbapristi ŵa Yehova’ na “ŵaliska ŵa Ciuta.” (Yesaya 61:5, 6) Ŵakulimbikira kupharazga makani ghawemi gha Ufumu na kusambizga ŵanthu ŵa mitundu yose. Ŵakovwira muzga na mtima wose pakuliska na kupwelelera mberere ziphya.

16. Nchivici cikuŵakhuŵilizga ŵa mberere zinyake kovwira muzga wa magomezgeko na wa vinjeru mwakugomezgeka?

¹⁶ Ŵa mberere zinyake ŵakumanya kuti ŵandula comene cifukwa ca kutokatoka kwa muzga wa magomezgeko pakuŵapa cakurya cauzimu mu nyengo yakwenelera. Ŵakuzomerezga kuti kuŵavyenge muzga wa magomezgeko na wa vinjeru, mphanyi ŵakumanya yayi unenesko wakuzirwa uwo ukusangika mu Baibolo. Mphanyi ŵakumanya yayi muwuso wa Yehova, kutuŵiskika kwa zina lake, Ufumu, macanya ghaphya na caru ciphya, mzimu, umo ŵakufwa ŵaliri, ndiposo kumumanya makora Yehova, Mwana wake, na mzimu utuŵa. Pakulongora kuwonga na kugomezgeka, ŵa mberere zinyake ŵakovwira mwacitemwa “ŵabali” ŵakuphakazgika ŵa Khristu mu nyengo yino yaumaliro.—Mateyu 25:40.

17. Pakuti ciŵelengero ca ŵakuphakazgika cikukhira, kasi Wupu Wakulongozga wacitaci, ndipo nkhani yakulondezgapo yizamuzgora fumbo wuli?

¹⁷ Pakuti ciŵelengero cawo cikukhira, ŵakuphakazgika ŵangaŵa mu mipingo yose yayi kuti ŵapwelelere vinthu vya Khristu. Ntheura, Wupu Wakulongozga ukwimika ŵanalume kufuma mu mberere zinyake kuti ŵaŵe ŵalaŵiliri mu minthavi, vigaŵa, madera, na mipingo ya Ŵakaboni ŵa Yehova. Kasi umo tikuwonera ŵanalume aŵa vikukhwaskaso kugomezgeka kwithu kwa Khristu na muzga wake wa magomezgeko? Fumbo ili lizamuzgoreka mu nkhani yakulondezgapo.

[Mazgu ghamusi]

Kuweleramo

• Kasi Mulongozgi withu ni njani, ndipo nchivici cikulongora kuti wakumanya umo vinthu viliri mu mipingo?

• Apo Yesu wakenderanga “tempele,” mbanjani ŵakasangika kuti ŵakaŵa muzga wa magomezgeko, ndipo ni vinthu wuli ivyo ŵakaŵikizgika?

• Kasi pali vifukwa wuli vya mu Malemba vyakovwilira muzga mwakugomezgeka?

[Vithuzithuzi pa peji 25]

‘Vinthu’ ivyo “mulinda” wakulaŵilira vikusazgapo malo ghakucitirapo milimo yacikhristu, maungano, na mulimo wa kupharazga

[Cithuzithuzi pa peji 26]

Ŵa mberere zinyake ŵakovwira muzga wa magomezgeko mwa kupharazga mwamwamphu