Mataupu e 116

Ne Fakatoka ne Ia Ana Soko me i a Ia ka Fano

KO OTI atu te ‵kaiga o te fakamanatuga, kae ne ‵nofo atu eiloa a Iesu mo ana apositolo i te potu i luga i te fale. E tiga eiloa ko pili o fano keatea a Iesu, koi uke loa a mea e fia fai atu ne ia. Ne fakamafanafana atu a ia penei: “Sa manava‵se koutou. Fakatuanaki ki te Atua.” Kae ne toe fai atu foki a ia penei: “Kae fakatuanaki mai foki ki a au.”

“E uke a mea e ‵nofo ei koutou i te fale o toku Tamana,” ko nisi pati a Iesu. “Au ka fano o fakatoka mō koutou . . . ko te mea ke ‵nofo koutou i te koga telā e nofo ei au. Ko iloa foki ne koutou te auala ki te koga telā e fano au ki ei.” E se maina te kau apositolo me i a Iesu ne faipati e uiga ki te fanatuga ki te lagi, telā ne fesili atu penei a Toma: “Te Aliki, e se iloa ne matou a te koga e fano koe ki ei; e mafai la pefea o iloa ne matou te auala?”

“Ko au te auala, te munatonu, mo te ola,” ko te tali a Iesu. E tonu, e mafai fua ne se tino o fanatu ki te fale faka-te-lagi tenā o tena Tamana, māfai e talia ne ia a Iesu kae e fakaakoako foki ki tena vaegā olaga. Ana muna: “E seai se tino e fanatu ki te Tamana manafai e se alatu mai i a au.”

Ne fakamolemole atu a Filipo penei: “Te Aliki, fakaasi mai ki a matou te Tamana, tenā fua te mea e fia iloa ne matou.” Kāti ne manako a Filipo ke tuku atu ne Iesu se fakaasiga matea o te Atua, e pelā mo mea kolā ne tuku atu ki a Mose, Elia mo Isaia i aso mua. Kae ko te tonuga loa, ko oti ne maua ne te kau apositolo se mea telā e sili atu i vaegā fakaasiga penā. Telā ne fai atu penei a pati a Iesu: “Ko leva nei eiloa taku fakatasiga mo koutou katoa, kae e seki iloa ne koe au e Filipo? Ko te tino ko kilo mai ki a au, ko kilo foki ki te Tamana.”

Me ne fakaasi katoatoa atu ne Iesu a uiga o tena Tamana, e fai pelā me i te ‵nofo fakatasi mo ia ko te kilo tonu atu foki ki te Tamana. Kae e sili atu eiloa te Tamana i te Tama, e pelā mo pati konei a Iesu: “A pati kolā ko oti ne faipati atu ne au ki a koutou, e se māfua mai i a au eiloa.” Se mea ‵tau ke taku tonu atu ne Iesu me ne maua ne ia ana akoakoga katoa mai i tena Tamana faka-te-lagi.

E pefea te fakamalosi loto ke lagona ne te kau apositolo a pati konei a Iesu: “So se tino e talitonu mai ki a au, ka fai ne ia a galuega kolā ne fai ne au. E tonu, ka fai eiloa ne ia a galuega e sili atu i te ‵lasi”! Ne seki fakauiga i ei ne Iesu ana pati me ka sili atu a ‵mana fai vavega o ana soko i lō ana ‵mana. Ikai, kae ne fakauiga ne ia pelā me ka leva atu te lotou galuega, kae ka oko atu foki latou ki koga e uke atu mo tino foki e tokouke atu.

Ne seki tuku tiaki ne Iesu ana soko i tena fanoga. Ne folafola atu a ia penei: “So se mea e fakatagi atu ei koutou i toku igoa, e fai eiloa ne au.” Kae ne toe fai atu foki a ia penei: “Ka fakatagi atu foki au ki te Tamana, ko uga mai ei ne ia ki a koutou te suā Fesoasoani, ko te agaga o te munatonu.” Fakamuli ifo, mai tua ifo o tena fanakaga ki te lagi, ne ‵ligi ifo ei ne Iesu a te agaga tapu ki luga i ana soko, ko te suā fesoasoani tenā.

Ko pili o fano keatea a Iesu, ana pati: “Ko se leva nei, ko se toe lavea ei au ne te lalolagi.” Ka fai a Iesu mo fai se tino faka-te-agaga telā e se mafai o matea ne tino. Kae ne toe folafola atu a ia penā ki ana apositolo fakamaoni: “Ka lavea faeloa au ne koutou; i a au e ola, tenā te mea e ola ei foki koutou.” E tonu, e se gata fua i te toe sae mai o Iesu i mua o latou i se foitino faka-te-tagata mai tua ifo i tena toetumaiga, kae fakamuli loa ka toe fakatu aka ne ia a latou ke ola fakatasi mo ia i te lagi e pelā me ne tino faka-te-agaga.

Ne taku atu ne Iesu i konā se tulafono faigofie: “So se tino e talia ne ia aku poloakiga kae e tausi ki ei, ko ia tenā e alofa mai ki a au; a ia foki telā e alofa mai ki a au, e alofagina ne toku Tamana. Au foki e alofa ki a ia, kae ka fakaasi foki ne au a au eiloa ki a ia.”

I konā loa, ne oso atu ei te apositolo ko Iuta, telā e fakaigoa foki ko Tataio, ana muna: “Te Aliki, kaia ka fakaasi mai ei koe ki a matou, kae e se ko te lalolagi?”

Ne tali atu a Iesu penei: “Kafai e alofa mai se tino ki a au, kae e tausi ne ia aku muna, ka alofa foki toku Tamana ki a ia . . . So se tino e se alofa mai ki a au, e se tausi foki ne ia aku muna.” E se pelā mo ana soko faka‵logo, e se fia ‵saga atu te lalolagi ki akoakoga a Keliso. Telā e se fakaasi atu ei ne ia a ia eiloa ki a latou.

E uke a mea ne akoako atu ne Iesu ki ana apositolo i te faiga o tena galuega i te lalolagi nei. Ka masaua pefea ne latou a mea katoa konā, kae maise eiloa me koi uke ‵ki a mea e se maina latou i ei? Se mea fakafiafia loto me ne folafola atu penei a Iesu: “Te Fesoasoani, ko te agaga tapu tenā, ka aumai ne te Tamana e ­alatu mai i toku igoa, o akoako atu ki a koutou i mea katoa; e fakamasaua atu foki a mea katoa kolā ko oti ne fai atu ne au ki a ­koutou.”

Ne toe fakamafanafana atu a Iesu ki a latou, ana muna: “E avatu ne au ki a koutou te filemu, ko toku filemu eiloa tenei e avatu ei ne au ki a koutou. . . . Sa manava‵se koutou.” E tonu, ka fano keatea a Iesu, kae ne fakamatala atu a ia penei: “Moi a‵lofa mai koutou ki a au, penei ko fia‵fia koutou i a au e fanatu ki te Tamana; me e sili atu toku Tamana i a au.”

Ko toetoe fua a taimi o Iesu ne ‵toe mai. Ana muna: “Ko se mafai ne au o faipati fakaloaloa atu ki a koutou, me tenei ko vau te aliki masei o te lalolagi nei. Kae e se sili atu tena malosi i a au.” A Satani te Tiapolo, ko te tino telā ne ulu atu ki a Iuta kae ne pule ki a ia, ko ia foki ko te pule o te lalolagi. Kae e seai lele eiloa se vāivāiga fiafai agasala i a Iesu telā e mafai o fakagalue aka ne Satani ke fai ne ia ke ‵fuli keatea Iesu mai tena taviniga ki te Atua.

Ke Maua se Fesokotakiga Gali

Ko oti te ‵kaiga fakamanatu, kae ne fakamalosi atu a Iesu ki ana soko i se faipatiga ‵loto telā ne seki fuafuagina. Kāti ko teka te valu­apo. Telā ne fakamalosi atu penei a Iesu: “Tou ‵tu ki luga o olo keatea mai konei.” Kae koi tuai o olo atu latou, ne fakaosofia Iesu i tena alofa ki a latou, kae ne tumau eiloa a ia i te faipati atu ki a latou, kae ne avatu foki ne ia se tala fakatusa fakamalosi loto.

Ne kamata a ia penei: “Ko au ko te vine tonu, kae ko toku Tamana ko te tino galue i vine.” A te Tino Toki Lakau Sili, ko Ieova te Atua, ne toki ne ia te vine fakatusa tenā i te taimi ne fakaeke ei ne ia a Iesu ki te agaga tapu i tena papatisoga i te tau e ‵to ei a lau o lakau i te 29 T.A. Kae ne toe fakaasi atu foki ne Iesu me ne seki fakauiga fua te vine tenā ki a ia, ana muna: “A kaula katoa kolā e ‵nofo i a au kae e se ‵fua, e ‵kati ne ia keatea, kae ko kaula takitasi kolā e ‵fua, e velevele faka‵lei ne ia, ko te mea ke gasolo o ‵fua malosi. . . . E se mafai o ‵fua mai ne fuaga o te kaula i a ia eiloa, seiloga ke ‵piki mau ki te vine. E penā foki koutou manafai e se ‵piki mau koutou i a au. Au ko te vine, kae ko koutou ko kaula.”

I te Penitekoso, i te 51 aso mai tua ifo o te faipatiga tenā a Iesu, ne fai te kau apositolo mo nisi tino aka mo fai ne kaula o te vine i te taimi ne ligi ifo ei te agaga tapu ki luga i a latou. Fakamuli loa, e toko 144,000 tino ka fai mo fai ne kaula o te vine fakatusa tenā. Fakatasi mo te kau vine, ko Iesu Keliso, e fai latou mo fai te vine fakatusa telā e ‵fua mai i ei a fuataga o te Malo o te Atua.

Ne fakamatala atu ne Iesu te kī telā e ‵fua mai i ei a fuataga: “So se tino e nofo ‵mau i a au, mo au i a ia, ka fua malosi mai a ia; me e se mafai ne koutou o fai se mea manafai e galo au i a koutou.” Kae kafai e se fua mai ne se tino ne fuataga, ne fai atu a Iesu me “ka ‵pei keatea a ia e pelā me se kaula ko pakupaku; ko kaula konā ka fakaputu fakatasi, kae ka ‵pei ki loto i te afi o ‵sunu i ei.” Kae i te suā feitu, ne folafola atu a Iesu penei: “Kafai e ‵nofo mau koutou i a au, kae tumau foki aku muna i a koutou, so se mea e ma‵nako koutou o fakatagi mai, ka maua eiloa ne koutou.”

Kae ne fai atu foki a Iesu ki ana apositolo: “Tenei te auala e fakaasi atu ei te vikiga o toku Tamana: manafai e ‵fua malosi mai koutou. Ko te auala foki tenei e fai ei koutou mo oku soko.” A fuataga kolā e manako ki ei te Atua mai i kaula konā ko te fakaasiatuga o uiga e pelā mo Keliso, kae maise eiloa ko te alofa. Kae ona ko te mea i a Keliso ne fai mo fai se tino telā e folafola atu te Malo o te Atua, e aofia foki i fuataga e manakogina ko te lotou galuega ko te faiga o soko e pelā eiloa mo tena galuega.

“Ke tumau la koutou i toku alofa,” ko pati fakamalosi a Iesu. Kae e mafai pefea ne ana soko o fai penā? Ana muna: “Kafai e tausi ne koutou aku poloakiga, ka tumau koutou i toku alofa.” Kae ne toe fakamatala atu a Iesu penei: “Tenei taku poloakiga; ke fakatau a‵lofa koutou, e pelā eiloa mo au e alofa ki a koutou. A te alofa tafasili e ‵tau o fakaasi atu ne te tino, ko te tuku atu o tena ola e sui ei a ola o ana taugasoa.”

I ne nāi itula mai tua ifo i ei ne fakaasi atu ei ne Iesu te alofa sili tenā mai i te avatuga o tena ola mō ana apositolo, penā foki loa mo nisi tino katoa kolā e fakatuanaki ki a ia. E ‵tau o fakamalosi atu tena fakaakoakoga ki ana soko ke maua ne latou a te vaegā alofa fia fai taulaga mō nisi tino, te suā tino ki te suā tino. A te vaegā alofa tenā ka fai ei ke ‵tu ‵kese latou, e pelā mo pati ko oti ne fai atu ne Iesu: “Tenā te mea e iloa ei ne tino katoa ko oku soko koutou, manafai e fakatau a‵lofa koutou.”

Ne fakailoa atu ne Iesu me ko oi ana taugasoa, ana muna: “Ko oku taugasoa koutou, manafai e fai ne koutou aku poloakiga. Ko se toe taku ne au koutou ko tavini, i te mea a te tavini e se iloa ne ia a mea a tena pule e fai. Kae ko taku ne au koutou ko taugasoa, me ko oti ne taku atu ne au a mea katoa ne lagona ne au mai toku Tamana.”

Ko tafaga la te gali o te fesokotakiga tenā​—⁠ke fai mo fai ne taugasoa pele o Iesu! Kae ke tumau i te fesokotakiga tenā, e ‵tau eiloa mo ana soko o “‵fua mai ne fuaga.” Kafai e fai ne latou penā, ne fai atu a Iesu me i “so se mea e fakatagi atu ei koutou ki toku Tamana i toku igoa, ka tuku atu ne ia ki a koutou.” A te tonuga loa, e gali ‵ki te taui tenā e maua ona ko te ‵fua mai o fuataga mō te Malo! Ne toe fakamalosi atu a Iesu ki ana apositolo “ke fakatau a‵lofa,” kae ne fakamatala atu ne ia me ka takalia‵lia te lalolagi ki a latou. Kae ne fakamafanafana atu a ia penei ki a latou: “Kafai e takalia‵lia a tino o te lalolagi ki a koutou, e ‵tau o mana­tua ne koutou me ne takalia‵lia muamua latou ki a au.” Ne ‵soko atu ki ei, ne fakaasi atu ei ne Iesu te pogai e takalia‵lia ei te lalolagi ki ana soko, ana muna: “Ko filifili koutou ne au mai tino o te lalolagi tenei, kae ko se ‵kau koutou i ei; tenei te mea e takalia‵lia ei a tino o te lalolagi ki a koutou.”

Ne toe fakamatala atu foki ne Iesu te pogai e takalia‵lia mai ei te lalolagi, ana muna: “Ka fai ne latou a mea katoa konei ki a koutou, me i a koutou e a aku; me e se iloa ne latou a ia [ko Ieova te Atua] telā ne uga mai ne ia au.” Kae ne fai pelā me ona ko ­vavega a Iesu ka fakasala ei a tino kolā e takalia‵lia ki a ia, e pelā mo ana muna konei: “Moifai ne se fai ne au i a latou a galuega kolā ne seki fai eiloa ne se tino, penei e se agasala latou; kae nei la, ko oti ne lavea ne latou aku mea ne fai, kae ko takalia‵lia mai latou ki a au mo toku Tamana.” Tela la, e pelā mo muna a Iesu ko fakataunu mai i ei te tusi siki tenei: “Ne takalia‵lia mai latou ki a au kae e seai eiloa se pogai.”

E pelā mo ana pati ko oti ne fai atu, ne toe fakamafanafana atu a Iesu ki a latou mai i te folafola atu me ka aumai ne ia te fesoasoani, ko te agaga tapu, telā ko te malosi galue o te Atua. “Ka molimau a ia e uiga ki a au. A koutou foki, ka molimau e uiga ki a au.”

Nisi Fakamalosiga a Koi Tuai o Fano Keatea a Ia

Ko toka a Iesu mo ana apositolo ke tiakina ne latou te potu tenā i luga i te fale. Kae ne toe fai atu a ia penei: “Ne faipati ne au a te mea nei ki a koutou, ko te mea ke se pa‵ku koutou.” Kae i konā loa ne fakailoa atu a ia penei ke fakaeteete latou: “Ka ‵tuli koutou ne latou ki tua mai i olotou fale tapuaki, kae e oko mai foki te aso ka tamate ei koutou ne se tino. E taofi te tino tenā pelā me i te faiga ne ia a te mea tenei, ko te taulaga tenā ki te Atua.”

Kāti ne manava‵se malosi te kau apositolo ona ko te pati tenā. E tiga eiloa ko oti ne fai atu a Iesu me ka takalia‵lia atu te lalolagi ki a latou, ne seki fakaasi tonu atu ne ia me ka tamate latou i ei. Ne fakamatala atu a ia penei: “Ne seki fai atu ne au ki a koutou a mea konei i te kamataga, i a tatou koi ‵nofo tasi.” Kae e pefea te ‵lei ke na fakatoka faka‵lei latou i te avatuga o fakamatalaga konā a koi tuai o fano keatea a ia!

Ne toe fai atu penei a Iesu: “Kae nei, au ka fano ki a ia telā ne uga mai ne ia au; kae e seai se tino o koutou e fesili mai ki a au penei, ‘E fano koe ki fea?’ ” I te afiafi tenā ko oti ne fesili atu latou e uiga ki te koga telā ka fanatu a ia ki ei. Kae i konā loa, ona ko te lotou ‵poi i ana pati ki a latou, ko se toe fesili atu latou e uiga ki te feitu tenā. E pelā mo muna a Iesu: “Ko oti ne fakaasi atu ne au ki a koutou; tela la, ko ‵fonu ei otou loto i te fanoanoa.” E se fanoa‵noa fua te kau apositolo ona ko te mea ko iloa ne latou me ka logo‵mae latou i fakasauāga fakama‵taku kae ka tamate foki latou i ei, kae ko fanoa‵noa eiloa latou me ka tiakina latou ne te lotou Matai.

Telā ne fakamatala atu ei a Iesu penei: “E ‵tau o fano au keatea mō te ‵lei o koutou, i te mea kafai e se fano au, ka se vau ki a koutou te Fesoasoani. Kae kafai e fano au keatea, ko uga mai ei a ia ne au ki a koutou.” E pelā me se tagata, e mafai fua ne Iesu o nofo i se koga e tasi i te taimi e tasi, kae kafai ko nofo atu a ia i te lagi, e mafai ei ne ia o aumai te fesoasoani, ko te agaga tapu o te Atua, ki ana soko i so se koga telā e ‵nofo latou i ei i te lalolagi. Tela la, ka aogā te fanoga a Iesu.

Ne fai atu a Iesu me i te agaga tapu “ka fakamaonia ne ia ki tino o te lalolagi i a latou e ‵se i te agasala, ka fakamaonia foki ne ia te amiotonu mo te fakamasinoga a te Atua.” Ka fakaasi faka‵sau atu te agasala a te lalolagi, ko te lotou fakata‵mala o fakatuanaki ki te Tama a te Atua. Kae ka fakaasi atu foki a fakamaoniga mautinoa me i a Iesu e amiotonu mai i tena fanakaga ki tena Tamana. Ona ko te ma‵vale o Satani mo tena lalolagi masei i te lotou taumafaiga ke fai a Iesu ke se fakamaoni ka fakamaoni aka i ei me ko se manuia te fakamasinoga o te pule o te lalolagi tenei.

Ne toe fai atu a Iesu penei: “E uke a mea koi fia faipati ne au ki a koutou, kae e se mafai nei ne koutou o tau‵loto i otou mafaufau.” Tela la, ne folafola atu ne Iesu me kafai ko ‵ligi ifo ne ia te agaga tapu, telā ko te malosi galue o te Atua, ka takitaki atu i ei latou ke maina i mea konā e ‵tusa eiloa mo mea kolā e mafai o malama‵lama latou i ei.

Kae maise eiloa ko se maina te kau apositolo me ka mate a Iesu kae ka toe sae mai foki a ia ki a latou māfai ko oti ne toetu mai a ia. Telā ne fakatau fesili atu ei latou penei: “Se a te uiga o te mea nei? E muna mai a ia ki a tatou, ‘Ko pili nei o se toe lavea ne koutou au,’ kae e muna mai foki, ‘I te mea i a au e fano ki te Tamana’?”

Ne iloa ne Iesu me ne fia fesili atu latou ki a ia, telā ne fakamatala atu ei a ia penei: “Au e muna tonu atu ki a koutou: ka ‵tagi koutou kae ‵tagi mautuutu, kae ka fiafia te lalolagi; kae ka fanoa‵noa koutou, kae ko te otou fanoanoa ka ‵fuli ki te fiafia.” Fakamuli loa, i te aso eiloa tenā i te fakaafiafi, i te taimi ne tamate ei a Iesu, ne fia‵fia malosi i ei a takitaki lotu o te lalolagi, kae ne fanoa‵noa ‵ki te kau soko. Kae ne ‵fuli aka te lotou fanoa‵noa ki te fia‵fia i te taimi ne toetu mai ei a Iesu! Kae ne tumau eiloa te lotou fia‵fia i te taimi ne fakamalosi aka ei ne ia latou i te Penitekoso ke fai mo fai ne ana molimau mai te ‵ligiatuga o te agaga tapu ki luga i a latou!

Ne fakatusa ne Iesu te tulaga o te kau apositolo ki se fafine telā e fai o fanau mai se pepe, ana muna: “Kafai ko pili se fafine o fanau, a ia e fanoanoa, i te mea ko oko mai tena taimi fi‵ta.” Kae ne fai atu a Iesu me e se toe masaua ne te fafine ana logo‵maega māfai ko fanau mai tena pepe, kae ne fakamalosi atu a ia penei ki ana apositolo: “E penā foki eiloa koutou: i te taimi nei a koutou e fanoa‵noa, kae ka toe lavea ne au koutou, ko otou loto ka ‵fonu i te fiafia, ko te vaegā fiafia telā ka seai se tino e mafai ne ia o ave keatea mai i a koutou.”

Ke oko eiloa ki te taimi tenā, ne seki fakatagi atu te kau apositolo ki se mea i te igoa o Iesu. Kae ne fai atu a ia i konā: “Ka avatu ne te Tamana ki a koutou so se mea e fakatagi atu ei koutou i toku igoa. . . . Me i te Tamana e alofa eiloa ki a koutou. E alofa a ia ki a koutou, me i a koutou e a‵lofa mai ki a au, kae e tali‵tonu koutou i a au ne vau mai te Atua. Au ne vau eiloa mai te Tamana, kae ne vau au ki te lalolagi; kae i te taimi nei, ka tuku ne au te lalolagi o fano ki te Tamana.”

E ‵lasi a fakama‵losiga kolā ne maua ne te kau apositolo mai pati konā a Iesu. “Ko tali‵tonu matou i te mea nei, i a koe ne vau mai te Atua,” ko olotou pati. Kae ne fesili atu a Iesu penei: “E a, ko talitonu nei koutou? Ko oko nei ki te taimi, ka ko oko foki eiloa ki ei; tela la, ka mafuta valevale ei koutou; ka taki fano eiloa te tino ki tena kāiga, kae ka tiakina au tokotasi.” E tiga eiloa e faigata o talitonu ki ei, ne fai eiloa ne latou penā i te po tenā!

“E fakaasi atu ne au te mea tenei ki a koutou, ko te mea ke maua ne koutou te filemu.” Kae ne fakaoti penei ne Iesu ana pati: “Ka fetaui koutou mo fakalavelave i te lalolagi. Ke loto malosi koutou! Ko oti ne fakatakavale ne au te lalolagi!” Ne fakatakavale ne Iesu te lalolagi me ne fakataunu mai ne ia mo te fakamaoni te loto o te Atua, faitalia a mea katoa kolā ne taumafai o fai ne Satani mo tena lalolagi ke fakasēaogā ei te fakamaoni o Iesu.

Te ‵Talo Fakaoti i te Potu i Luga i te Fale

Ona ko tena alofa ‵nau ki ana apositolo, ne fakatoka faka‵lei ne ia latou me ko pili o fano keatea a ia. I konā loa, ko oti a ia ne fakamalosi kae fakamafanafana atu ki a latou i se taimi tai mata leva, kae ne kilo atu a ia ki luga i te lagi kae ne akai atu penei ki tena Tamana: “Tuku mai te vikiga ki tau Tama, ko te mea ke tuku atu foki ne tau Tama a te vikiga ki a koe. Me ne tuku mai ne koe te pule ki a ia i luga o tino katoa, ko te mea ke avatu ne ia te ola se-gata-mai ki a latou kolā ne tuku mai ne koe ki a ia.”

Mā‵faga o matua gali e maua i pati fakatomua konā a Iesu​—⁠ko te ola se-gata-mai! Me ko oti ne tuku atu ki a Iesu ‘te pule ki tino katoa,’ e mafai ne ia o fakaoko atu te aogā o tena taulaga togiola ki tino katoa kolā ko gasolo o ‵mate. Kae e tuku atu fua ne ia “te ola se-gata-mai” ki tino kolā e talia ne tena Tamana. Ne toe faipati a Iesu ki te matua tenā ko te ola se-gata-mai i te faiga o pati konei i tena ‵talo:

“Kae tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.” E tonu, e fakalagolago atu te fakaolataga ki te ­mauaga ne tatou o te iloaga e uiga ki te Atua, penā foki loa mo tena Tama. Kae e se lava fua i te poto faka-te-mafaufau e ­manakogina.

E ‵tau o fakamasani faka‵lei atu se tino ki a laua e pelā me ne taugasoa ‵lei. E ‵tau o maina te tino i mea kolā e loto laua ki ei, penā foki loa mo lā kilokiloga. Kae e sili atu i mea katoa, e ‵tau o kausaki eiloa se tino o fakaakoako faka‵lei atu ki lā uiga sē fuafuagina i ana faifaiga ki nisi tino.

E ‵soko atu ki ei, ne ‵talo atu a Iesu penei: “Ne fakaasi atu ne au tou ‵malu ki te lalolagi. Ne fakapalele foki ne au te galuega telā ne tuku mai ne koe ki a au ke fai.” Me ko oti ne fakataunu faka‵lei ne ia tena tofiga ke oko eiloa ki te taimi tenā kae ne talitonu foki a ia me ka manuia ana taumafaiga i aso mai mua, ne akai atu a ia penei: “Te Tamana! Tuku mai nei ki a au a te ‵malu i ou mua, ko te ‵malu eiloa telā ne nofo i a taua, kae seki faite te lalolagi.” E tonu, ne fakamolemole atu a ia i ei ke na toe foki atu a ia ki tena ‵malu mua i te lagi mai tena toetumaiga.

Ne fakatoetoe malie aka ne Iesu te fakamatalaga e uiga ki tena galuega tāua i te lalolagi, penei: “Ko oti ne fakaasi atu ne au a tou igoa ki a latou kolā ne tuku mai ne koe ki a au mai te lalolagi. Ko ou tino latou, kae ne tuku mai foki ne koe ki a au. Ne tausi foki ne latou tau muna.” Ne fakaaogā sāle ne Iesu a te igoa o te Atua, ko Ieova, i tena talaiga kae ne fakaasi atu foki ne ia te faka‵leoga tonu o te igoa tenā. Kae e uke atu foki a nisi mea ne fai ne ia ke fakaasi atu ei te igoa o te Atua ki ana apositolo. Ne fakalasi aka foki ne ia te lotou malamalama mo te lotou loto fakafetai e uiga ki a Ieova, ana uiga, penā foki loa mo ana fuafuaga.

Ne taku tonu atu ne Iesu mo te loto maulalo me e sili atu a Ieova i a ia, me e tavini atu a ia ki a Ieova, penei: “Ne tuku atu foki ne au te muna telā ne tuku mai ne koe ki a au, kae ne talia ne latou; ko iloa foki ne latou me tonu eiloa i a au ne vau mai i a koe, ko tali‵tonu foki latou i a au ne uga mai ne koe.”

Ne fakaasi atu foki ne Iesu a te ‵kese o ana soko mo nisi tino i te lalolagi i nisi pati konei ne ‵talo atu ne ia: “Au e se ‵talo mō te lalolagi, kae mō latou kolā ne tuku mai ne koe ki a au . . . I te motou fakatasiga, ne tausi ne au latou . . . , ne puipui latou ne au, kae e seai se tino o latou ne galo, kae na ko te tama o te malaia,” ko Iuta te Isikaliota. I te taimi eiloa tenā, ne fanatu ei a Iuta o fakataunu tena aofaga ke fakalata a Iesu. Tela la, e tiga eiloa ne seki iloa ne Iuta, ne fakataunu tonu ne ia a muna i te Tusi Tapu.

Ne toe ‵talo atu a Iesu penei: “Ne takalialia te lalolagi ki a ­latou. Au e se ‵talo atu ke ave ne koe latou keatea mai te lalolagi, kae ko au e ‵talo atu ke tausi latou ne koe mai te Tino Masei. E se ne tino o te lalolagi latou, e penei foki mo au e se se tino o te lalolagi.” E ‵nofo atu a soko o Iesu i te lalolagi, ko te sosaiete telā ne fakatoka ne tino kae e pule ne Satani, kae e ‵tau o tumau ­faeloa latou i te ‵vae keatea mai te lalolagi mo ana amioga ma‵sei.

e toe fai atu a Iesu: “Ke fakatapu ne koe latou ki te munatonu, i tau muna ko te munatonu.” I konā loa, ne fai atu ei a Iesu me i Tusitusiga Faka-Epelu kolā ne maua mai te Atua, kae ne siki sāle mai ne ia a pati mai i ei, ko te “munatonu.” Kae ko mea kolā ne akoako atu ne ia ki ana soko, penā foki loa mo mea kolā ne tusi fakamuli ne latou mai lalo i te takitakiga a te Atua, ko Tusitusiga Kelisiano Faka-Eleni, e ‵tau foki o fai pelā me ko “te ­munatonu.” E mafai ne te munatonu tenā o fakatapu se tino, o ‵fuli katoatoa tena olaga, kae fai foki a ia mo fai se tino e vae keatea mai te lalolagi.

Ne toe ‵talo atu a Iesu penei: “E se fakapito fua taku ‵talo mō latou konei, kae mō latou foki kolā e fakatuanaki ki a au ona ko te talaiga a latou.” Tela la, ne ‵talo atu a Iesu mō tino katoa kolā ka fai mo fai ne ana soko fakaekegina, penā foki loa mo nisi soko i aso mai mua kolā ka fakamaopoopo mai ki “te lafu mamoe e tasi.” Kae ne a mea ne fakamolemole atu a ia ki ei mō tino katoa konā?

“Ko te mea ke tasi latou katoa, e pelā mo koe te Tamana e loto tasi mo au, kae ko au foki e loto tasi mo koe, . . . ko te mea ke tasi latou, e pelā mo taua e tasi.” A Iesu mo tena Tamana e se se tino e tokotasi, kae e loto tasi faeloa a laua i mea katoa. Ne ‵talo atu a Iesu ke maua ne ana soko a te loto tasi tenā ko te mea “ke iloa foki ne te lalolagi, me ne uga mai ne koe au, kae e alofa foki koe ki a latou, e pelā eiloa mo tou alofa ki a au.”

I konā loa, ne fakamolemole atu a Iesu ki tena Tamana mō latou kolā ka fai mo fai ne ana soko fakaekegina. Mo ā? “Ke ‵nofo latou mo au i te koga e nofo ei au, ko te mea ke matea ne latou toku ‵malu, ko te ‵malu telā ne tuku mai ne koe ki a au i tou alofa, kae ne seki fakatu aka te lalolagi,” ko tena uiga, a koi tuai o fai ne Atamu mo Eva lā tama‵liki. Ne seki tāitāi o fai penā, kae ko leva ne alofa te Atua ki tena Afutasi, telā ne fai fakamuli mo fai Iesu Keliso.

I te fakaotiga o tena ‵talo, ne toe faka‵mafa mai ne Iesu te ­manatu tenei: “Ne fakailoa atu foki ne au tou igoa ki a latou, kae ka fakailoa atu faeloa ne au; ko te mea ke maua i loto i a ­latou a te alofa ne alofa mai ei koe ki a au, ko au foki ke i loto i a ­latou.” A te tau‵loto o te kau apositolo ki te igoa o te Atua ne fai pelā me ne gasolo o iloa aka ne latou taki tokotasi te alofa o te Atua. Ioane 14:1–17:26; 13:27, 35, 36; 10:16; Luka 22:3, 4; Esoto 24:10; 1 Tupu 19:9-13; Isaia 6:1-5; Kalatia 6:16; Salamo 35:19; 69:4; Faataoto 8:22, 30.

▪ Tefea te koga ne fai o fano ki ei a Iesu, kae se a te tali telā ne maua ne Toma e uiga ki te auala ki te koga tenā?

▪ I te faiga o tena fakamolemole, kāti se a te mea ne manako Filipo ki ei ke tuku mai ne Iesu?

▪ Kaia e fai ei pelā me i te tino telā ko oti ne matea atu ne ia a Iesu ko oti foki ne matea ne ia te Tamana?

▪ E fai pefea me e sili atu a galuega kolā ka fai ne soko o Iesu i lō ana galuega?

▪ Ko te feitu fea ne fai ei pelā me e se pule atu a Satani ki a Iesu?

▪ Ko te taimi fea ne toki ei ne Ieova a te vine fakatusa, kae ko te taimi fea ne fai ei a nisi tino mo fai ne vaega o te vine tenā, kae e pefea la?

▪ Fakamuli loa, e fia kaula o te vine fakatusa tenā?

▪ Ne a fuataga e manako te Atua ki ei mai kaula konā?

▪ E fai pefea tatou mo fai ne taugasoa o Iesu?

▪ Kaia e takalia‵lia ei te lalolagi ki soko o Iesu?

▪ Ne a mea ne fakailoa atu ne Iesu kae ne manava‵se i ei ana apositolo?

▪ Kaia ne seki fesili atu ei te kau apositolo ki a Iesu me tefea te koga ka fanatu a ia ki ei?

▪ Se a te mea ne seki maina ‵lei i ei te kau apositolo?

▪ Se a te tala fakatusa telā ne fakaaogā ne Iesu ke fakaasi atu i ei me ka fuli te fanoa‵noa o te kau apositolo ki te fia‵fia?

▪ Se a te mea ne fai atu ne Iesu me ko pili o fai ne te kau apositolo?

▪ Ne fakatakavale pefea ne Iesu te lalolagi?

▪ Se a te uiga me ne tuku atu ki a Iesu ‘ke pule ki tino katoa’?

▪ Se a te uiga ke maua te iloaga e uiga ki te Atua mo tena Tama?

▪ Ne a auala ne fakaasi atu ei ne Iesu te igoa o te Atua?

▪ Se a “te munatonu,” kae e “fakatapu” pefea se Kelisiano i ei?

▪ E fai pefea me e tasi katoa te Atua, tena Tama, mo tino tapuaki ‵tonu katoa?

▪ Ko te taimi fea ‘ne fakatu aka ei te lalolagi’?