Obi A Ɔde Adesrɛ Ayɛ N’adwuma Dan Obi A Ɔde Anigye Kyɛ Ade

MEDE ƆBRƐ nam a merekɔ akɔsra afipamfo na ɔdesrɛfo bi a ɔhyɛ atade a atetew teɛɛm frɛɛ me sɛ: “Jorge,wonsrɛsrɛ ade bio anaa? So woanya wo ho?”

Yiw, mene Jorge. Mede adesrɛ yɛɛ m’adwuma mfirihyia 15, nanso mensrɛsrɛ ade bio. Me maa mmuae sɛ: “Yiw; Afei de m’anya sika akyɛn afiri a wɔde yɛ asikre wura no.” Wɔ Brazil kusuu-apuei fam no, wɔn a wɔwɔ mfiri a wɔde yɛ asikre no ka nnipa a wɔyɛ asikafo no ho.

Ɔgyenee n’ani hwɛɛ me a ayɛ no nwonwa. Mede komm a wayɛ no dii dwuma na mede kaa ho sɛ: “Hwɛ! Nea enti a ɛte saa no ni: ‘Yehowa nhyira​—ɛno na ɛyɛ ɔdefo, na ɔmfa ɛyaw bi nka ho.’” (Mmeb 10:22) Me kyerɛkyerɛɛ mu kyerɛɛ no sɛ, ɛwom sɛ wiase yi mu nneɛma kakraa bi pɛ na mewɔ de, nanso mibu me ho sɛ meyɛ ɔdefo. Dɛn ntia? Efisɛ mabehu nokware Nyankopɔn no, na mate ne nhyira horow nka wɔ m’asetra mu, manya nnamfo pa, mewɔ adwuma ne nea ɛdɔɔso a midi.

Me kan yɔnko ɔdesrɛfo no ho dwiriw no, Obisae sɛ: “Wobɛyɛ dɛn agyae adesrɛ?” Nanso wobɛpɛ sɛ wuhu nea enti a nea edi kan no mebɛyɛɛ ɔdesrɛfo. Masɛm no ni.

Me Mmofraase a Ɛyɛ Awerɛhow

Wɔwoo me 1930, a mintumi nnantew me nan abien nyinaa so. Saa bere no na m’abusua no te kurow ketewaa bi mu wɔ Paraiba mansin no mu, Brazil. Kuadwuma na yɛyɛ de didi. Sɛnea ɛbɛyɛ na yɛbɛboa yɛn awofo no, me nuanom mmarima ne mmea 11 no nso yɛ adwuma wɔ afuw no mu. Mekotow fam de me nsa yɛ adwuma sɛnea metumi. Magya yɛ adwuma fi anɔpatutuutu kosi anadwo, da biara da wɔ dapɛn no mu. Ɔnhome Kwasida na onnye akwamma biara nso. Sɛ wotwa nnɔbae no wie na sɛ otua ne dan ka a, nea ɛbɛka no nnɔɔso a wobetumi de atɔ ntade anaa nnuru.

Nea eye wɔ me fam ne sɛ,minyaa nnwom ho dɔ fii me nenabarima hɔ. Misuaa sɛnea wɔbɔ sanku na yɛde mfe pii too nnwom bɔɔ sanku wɔ ɔman no afahyɛ ahorow ase. M’agya yaree bere a madi mfirihyia 14. Sɛnea ɛbɛyɛ na yɛbɛtɔ nnuru no na ɛsɛ sɛ yɛtɔn nneɛma a yɛwɔ. Me sui yiye bere a metɔn me sanku no. Ama m’agya nnɔnhwere pii a anigye wom. Nea ɛyɛ awerɛhow ne sɛ, m’agya wui no akyi ankyɛ, bɛyɛ sɛ nnanu pɛ na yɛn na nso wui. Wogyaw nnyisaa dumien wɔ wɔn akyi​—ohia, ɔkɔm, a wonnim nea wɔbɛyɛ anaasɛ faako a ɛsɛ sɛ wɔkɔ.

Nnipa a wosusuw sɛ wɔwɔ yɛn ho adwempa a wonnim Bible no ankasa ka kyerɛɛ yɛn sɛ: “Mompene nea aba mo so no so mmofra. Ɛyɛ Onyankopɔn apɛde.” Yɛpaapae mu a obiara afa ne kwan so rekɔ tebea a ɛyɛ awerɛhow yi mu.

Mɛyɛ dɛn atra nkwa mu? Mitu kɔtraa Santa Rita na mifii sankubɔ ase bio wɔ kurow no afahyɛ ahorow ase. Nanso na ɛsɛ sɛ mefɛm sanku no tua ho ka ansa na me nsa aka ahorow a mebɔ no na mpɛn pii no ɛyɛ a minnya sika ntua ɔdan a mete mu no ka, minni ahoɔden na minni anidaso nso.

Da koro bi wɔtoo nsa frɛɛ me sɛ memmɛbɔ sanku wɔ ɔman no afahyɛ bi ase. Ebia na sɛnea me nipadua anaasɛ m’ahosiesie te no ma mekasakasae, na mekaa tebea a ɛyɛ awerɛhow a mewɔ mu no ho asɛm kyerɛɛ wɔn. Wɔn mu pii yii mmɔborohunu adi kyerɛɛ me a wɔka kyerɛɛ me sɛ: “Bra me fie. Mɛboa wo.” Na meyɛɛ saa nso. Mifii ase nyaa akyɛde ahorow na misusuw sɛ wɔ ne nyinaa akyi no ɔdesrɛfo asetra nyɛ yaw pii biara. Ankyɛ biara na minyaa hokwan a mɛfa so asrɛsrɛ ade. Ɛno akyi no minyaa ɔhokafo a ɔpenee so sɛ ɔne me bɛtra wɔ mpenatwe aware mu. Ntade, mpaboa, aduan ne nneɛma horow a wɔde ma me wɔ “ɔkwan” yi so no dɔɔso ma yetumi de hwɛ yɛn ho.

Sɛ́ obubuafo no de, saa ara na mete, na ɛyɛ nokware nso wɔ adesrɛfo pii ho. Nanso, sɛnea mihui wɔ bere tiaa bi mu no, wɔn a wɔsrɛsrɛ ade no mu pii wɔ hɔ a wonnii dɛm na wɔwɔ ahoɔden.

Nnaadaa a Wɔde Yɛ Adwuma

Adesrɛfo no mu binom sua sɛnea wɔbɛyɛ wɔn ade mmɔbɔmmɔbɔ, na afoforo de ayamhyehye ahwɛ wɔn. Sɛ nhwɛso no, me kan “adwumayɛfo” no mu biako bɔɔ mmɔden de sika a onya fi nea ɔsrɛsrɛ no mu hwɛ n’abusua no mufo a wɔdɔɔso no. Ɔtaa tu kwan mpɛn pii kɔ Rio de Janeiro, a ne tenten bɛyɛ akwansin 1,860 kɔyɛ “adwuma” efisɛ onya sika pii wɔ hɔ. Bere bi ɔnantew kɔe, a ne mma no mu biako kyerɛ no kwan, a ɔsrɛsrɛ ade fi kurow biako so kɔ kurow foforo mu, a waboa pa ayɛ ne ho sɛ ɔyɛ onifuraeni. Sɛ mihyia no bere ne bere mu a, nea ɔka ne sɛ: “Jorge, biribiara nyɛɛ me ɛ. Mete apɔw, me ho ye.

Ɔbea bi a na ɔte bɛn nea mewɔ no boapa dan no ho okunafo, a bere biara ɔhyɛ n’atade tuntum. Wɔ nokwarem no na ɔwɔ kunu, mmofra baanu, na ɔwɔ ofie nso. Wɔ sika ne aduan a ne nsa ka no kwa no akyi no, ne nsa ka ntadetam foforo nso, na ɔtɔn eyinom ntɛm ara. Bere a ɔkɔ “adwuma” no, na n’abusua nso regye wɔn ani wɔ ofie.

Ɔdesrɛfo foforo nso de nnaadaa foforo dii dwuma. Ɔfa akokoaa bi a ne ho ayɛ fĩ a ɔresu fi n’afipamfo a ɔte wɔn ntam no mu kura no de no kyin akwan so di awerɛhow sɛ: “Onyankopɔn nti, munhu me mmɔbɔ. Mommoa me na matɔ nufusu ama me ba yi.” Akokoaa a ɔresu no kanyan mmɔborohunu wɔ nnipa no mu, na wɔn a wotwam no yɛ ntɛm de sika ma no. Ɛno akyi no ɔsan kɔ ofie de abofra no kɔma n’awofo, de sika ketewaa bi tua wɔn ka wɔ wɔn ba a ogyee no kɔyɛɛ “adwuma” no nti.

Adesrɛfo no mu bionm tintim nkrataa a ɛka sɛ: “Asiamasi, a ɔte sɛɛ ne sɛɛ kwan yi so [a ɛnte saa] ani afura na ohia wo mmoa na ɔde ahwɛ ne ba.” Ɔdesrɛfo no foro bɔɔs na ɔkyekyɛ krataa yi ma wɔn a wɔwɔ mu no nyinaa, afei ɔdan no ho gye krataa no na biribiara a obi pɛ no ɔde ka ho ma no. Ebinom de wɔn apira kuru kyerɛkyerɛ na wɔsrɛsrɛ sika a wɔde bɛma nnuruyɛfo na wɔde ayɛ wɔn opirehyɛn. Wɔka asɛm koro yi ara afe mũ no nyinaa mu bere nyinaa a wɔnyɛ saa opirehyɛn no da.

Afei nso, ɔdesrɛfo bɔ aguaman yiye wɔ n’asetra mu. Na wonnyi me mfi mu. Sɛ me ne ɔbea biako tra brɛ anaasɛ ɔhyɛ me abufuw a nea meyɛ ara ne sɛ mepam no na mehwehwɛ ɔfoforo.

Asetra a ahosodi biara nni mu yi betumi de anigye ankasa aba? Amfa anigye biara ammrɛ me.

Me Kɔn Dɔɔ Ɔkwan a Mɛfa So Afi Mu

Mpɛn pii no m’ani wuu tebea a mewom no ho na nusu hyɛ m’aniwam ma. Mekɔɔ so ka kyerɛɛ me ho sɛ: “Da koro bi mehwehwɛ ɔkwan a mede befi adesrɛ asetra yi mu, wɔ Onyankopɔn mmoa so.” Nanso saa bere no ná minnim nokware Nyankopɔn no.

Nsɛm bi sisii a ɛma misusuw nneɛma ho denneennen. Me nnamfo a wɔsrɛsrɛ ade no no mu biako nom nsa bowee wɔ Campina Grande asanombea bi mu na mmarima a wɔwɔ hɔ no mu biako teɛɛm sɛ: “Kɔ na kɔyɛ adwuma, wo onihafo, wo kwadwofo, ɔsabofo a wunni suban.” Eyi yɛɛ me yaw de kɔɔ me koma mu tɔnn, esiane sɛ misusuw sɛ adesrɛ ne ɔkwan biako pɛ a obi a wadi dɛm wɔ nipadua mu betumi afa so anya n’ano aduan.

Sɛ mete nka sɛ mahaw a, nnipa a wɔtaa boa me bere nyinaa no ka kyerɛ me sɛ: “Wonyɛ ɔdesrɛfo mma yɛn. Jorge yɛpɛ sɛ yɛboa wo.” Nanso, mpɛn pii no, nea mihyia no ne nea wɔka no bɔ abira. Ɔbarima bi teɛɛm ka kyerɛɛ me sɛ: “Kɔ hɛll na kɔ srɛsrɛ ade wɔ hɔ.” Ɛyɛɛ me awerɛhow. So ɛsɛ sɛ mekɔ so saa ara m’asetra bere nyinaa mu?

Da koro bi mefaa bɔɔs sɛ meresan akɔ fie bere a makɔsrɛsrɛ ade wɔ ɔman no kurowpɔn mu. Aberante bi a ɔte me nkyɛn fii ase ne me bɔɔ nkɔmmɔ. Ɔtwee Bible na ɔkyerɛɛ me sɛ ɛyɛ Onyankopɔn atirimpɔw sɛ ɔbɛma ɔyare nyinaa, mmubui, ɔkɔm ne owu mpo to atwa. (Yes. 33:24; 35:6; Dw. 72:16; Yes. 25:8) Mentee biribi a ɛte sɛɛ da. Ɔkae sɛ: “Onyankopɔn atirimpɔw ne sɛ ɔbɛsakra asase no ama ne nyinaa adan paradise.” Paradise anaa? Eyi ma meyɛɛ asõ tiei! Misusuw me tirim sɛ: ‘Hokwan a woanya a wode begyae adesrɛ asetra a ɛyɛ aniwu no ni.” Meyɛɛ nhyehyɛe na wasan abɛsra me bio. Aberante yi baa me a meyɛ ohiani yi fie wɔ bere a wahyɛ no mu pɛpɛɛpɛ.

Yɛsan yɛɛ nhyehyɛe foforo bere a ɔresan akɔ. Nanso bere a ɔkɔe no na mekaee sɛ ɛsɛ sɛ mekɔ abosonsom nhyiam bi a metaa kɔ ase no. Midwen ho dapɛn mũ no nyinaa sɛ: “Dɛn na ɛsɛ sɛ meyɛ​—minsua Bible no anaasɛ menkɔ abosonsom afahyɛ no ase?” Misii gyinae: Mesua Onyankopɔn Asɛm. Na minnuu me ho wɔ saa gyinaesi no mu da. Wɔ nokwarem no bere a masua ade adapɛn kakraa akyi no mihui sɛ Ɔbɔadeɛ no kasa tia ahonhomsɛm nyinaa. (Deut 18:9-13; Adi. 21:8) Esiane sɛ mepɛ sɛ mesɔ Onyankopɔn ani nti, ankyɛ na migyaee abosonsɛm nyinaa na mifii ase de me ho bɔɔ Yehowa Adansefo asafo a aberante no wɔ mu no ho.

Adesrɛfo Asetra a Migyaee

Mihui sɛ mintumi nyɛ Kristoni ne ɔdesrɛfo bere koro no ara mu. Efisɛ Bible gyinapɛn ne sɛ obi mpɛ sɛ ɔyɛ adwuma a, mma onnnidi.” (2 Tes. 3:10) Nanso mɛyɛ dɛn anya adwuma? Ɛyɛ den ma wɔn a wɔwɔ akwahosan mpo sɛ wobenya adwuma ayɛ wɔ ɔman yi fã a yɛte yi mu. Ɛbɛyɛ dɛn na me a mintumi nnyina me nan abien so no atumi ayɛ saa! Dɛn na mɛyɛ? Adansefo no mu biako de ɔdɔ kyerɛɛ me sɛnea mede kube bɛyɛ asikretɛ. Nanso, wɔ me mmɔdenbɔ yi nyinaa akyi no, nea metɔn no nnɔɔso a metumi de ahwɛ me ho. Enti mekɔɔ so srɛsrɛɛ ade. Ɛyɛɛ me yaw. So na anidaso asa koraa?

Da koro bi na wɔkyerɛɛ me nea Bible no ka wɔ Dwom 37:25: “Mayɛ abofra, na afei mabɔ akora, nanso minhuu onipa trenee a wɔapa no anaasɛ n’asefo srɛ aduan.” M’ani gyee asɛm yi ho. So odwontofo no asɛm no teɛ? Ɛsɛ sɛ midi eyi ho adanse ma m’ankasa. Ɛsɛ sɛ mesakra adwene a mikura a ɛyɛ mmɔbɔ a mihu m’ankasa ho no. Enti meka kyerɛɛ me hokafo no sɛ: “Efi dapɛn a ɛreba yi mu kɔ de merenkɔ nkɔsrɛsrɛ ade bio.” Ne ho dwiriw no. “Yɛbɛyɛ dɛn atra ase? Ɔkɔm bekum yɛn!”

Me maa mmuae sɛ: “Mewɔ ahotoso sɛ Yehowa bɛfa ɔkwan bi so adi nea ehia yɛn no ho dwuma. Onim nea ehia yɛn ansa na yɛrebisa no.” Misusuw Mateo 6:31-34​—-bɔhyɛ sɛ Onyankopɔn behyira yɛn mmɔdenbɔ so na yɛde anya honam fam nneɛma sɛ yedi kan hwehwɛ n’ahenni ne ne trenee kan no ho.

Yehowa ayɛ nea eye ama yɛn efi saa bere no. Menteɛɛ me nsa mmisaa abodoo da! Menam adwumayɛ so abɔ mmɔden anya nea ehia yɛn. Nea odwontofo no kae no teɛ. Dɛn na ɛbae? Adansefo a wɔwɔ asafo no mu no kɔɔ so boaa me na wotuu me fo maa me nneɛma a ehia me a metumi de ayɛ asikretɛ, na mekɔ so tɔn eyi. Nea ɛka ho bio no, mede adapɛn pii boaboa nkrataa a ayɛ dedaw wɔ kurow no mu no ano tontɔnee. Akyiri yi no, Adansefo no boaa me ma minyaa mmubuafo mmoa wɔ sika fam kakra ɔsram biara. Wɔ nokwarem no, Yehowa ayɛ ɔmafo a ɔwɔ ɔdɔ, denam mmoa a Kristofo asafo no de ama me no so.

Wɔ bere a ɛsɛ mu no misuaa Onyankopɔn gyinapɛn ma aware na me ne me hokafo a me ne no atra ase mfirihyia pii no de yɛn aware no hyɛɛ mmara ase. Afei, wɔ April 13, 1975 no, wɔbɔɔ me asu de yɛɛ me ho so a m’ahyira ama Yehowa Nyankopɔn denam Kristo so no ho sɛnkyerɛnne. Mekɔɔ so de me ho hyɛɛ asafo no nnwuma mu pii, na mehwɛɛ asafo no Bible adesua no biako so dapɛn biara Hokwan a manya a mede yɛ nneɛma ma afoforo yi ama manya anigye kɛse.​—Aso. 20:35.

Mfiase no na me yere ani nnye dwumadi yi nyinaa ho yiye. Nanso ankyɛ na ɔde anibere suaa Bible no na ɛmaa m’ani gyei, na mprempren yi ɔka me ho wɔ nneɛma pa a yesua na yɛka kyerɛ afoforo no mu. Abeawa a wadi mfirihyia 10 a yɛafa no ayɛ yɛn ba no nso ne yɛn ko.

Ɛtɔ bere bi a mihyia me kan ayɔnkofo a me ne wɔn dii dwuma wɔ akwan so no. Sɛ wobisa me nea enti a migyaee adesrɛ a memfa nea enti a ɛbaa saa no nhintaw wɔn. Afei nso, makyerɛkyerɛ nea ɛma medee me ho fii ɔdesrɛfo asetra a mfaso biara nni mu no mu akyerɛ wɔn a wɔn yam ye a wɔboaa me bere a na ahia me no nyinaa. Wɔ nokwarem no, mesakra fii ɔdesrɛfo bɛdanee ɔmafo, hyɛɛ afoforo nkuran sɛ ‘wommegye nkwa nsu no kwa.​—Adi. 22:17.

Esiane sɛ minim sɛ ɔhaw horow a adesrɛfo ankasa a wɔwɔ tebea horow a ɛyɛ awerɛhow mu hyia no yɛ nea mprempren nneɛma nhyehyɛe yi rentumi nnya ano aduru nti, mebɔ mmɔden biara boa wɔn sɛnea ɛbɛyɛ na wobehu nea Onyankopɔn asiesie ama wɔn wɔ daakye. Ebinom yɛ asõ tie no yiye. Afoforo di fɛw. Nanso magye atom sɛ Bible mu bɔhyɛ horow no yɛ nea wotumi de wɔn ho to so.

Anigye a ɛwɔ hɔ sɛ menya nipadua a edi mũ wɔ Onyankopɔn nhyehyɛe foforo no mu no de anigye a enni kabea hyɛ me mu ma. Nea mepɛ bere a manya nipadua a ɛte saa ne sɛ ​—ɛnyɛ sɛ mɛkɔ so asrɛsrɛ ade​—na mmom sɛ mede me nsa ne m’anan no bedi anidaso a ɛma mifii ase gyaw adesrɛ asetra no ho dwuma: Hokwan a obi benya sɛ ɔbɛboa ma asase yi adan paradise, faako a “asase no so aburofuw bedu mmepɔw atifi” ama obiara. (Dw. 72:16) Ɛno de obi rennya nea obegyina so akɔ so asrɛsrɛ ade.

[Asɛm a wɔafa aka wɔ kratafa 8]

Bere a m’Agya ne me Na wui no, wogyaw nnyisaa 12​—ohia ne ɔkɔm a minnim nea mɛyɛ.

[Asɛm a wɔafa aka wɔ kratafa 9]

‘Dɛn na ɛsɛ sɛ meyɛ​—minsua Bible no anaasɛ menkɔ abosonsom nhyiam no ase? Misii gyinae.’

[Asɛm a wɔafa aka wɔ kratafa 10]

“Mihui sɛ mintumi nyɛ Kristoni ne ɔdesrɛfo bere koro no ara mu.”