Tiro Awiei​—So Ɛbae Sesɛkwa So Ara?

SO WOATE Sur din pɛn anaa? Ebia wontee da, efisɛ saa Lebanon mpoano kurow yi nyɛ nea wonim yiye. Emu nnipa no dodow bɛyɛ 20,000. Wɔn mu titiriw na wɔyɛ apofofo a wɔde akorow nketewaa yi nam anaasɛ wɔyɛ akorow nketewaa yi bi. Sɛnea Sur adan amamfo afa no mma wonhu ne kan anuonyam no bio. Yiw, eyi ne nea aka ama kan Tiro kurow no.

Bɛyɛ afeha a ɛto so 11 A.Y.B. mu wo, Yuda ahemfo Dawid ne Salomo nniso bere mu no, na Tiro yɛ Foenikiafo mpoano kurow titiriw. (Fa toto 1 Ahene 9:11, 26-28 ho.) Na hyɛn di Mediteranea po no so akɔneaba de kosi Spania. Tiro nyaa sika yiye wɔ n’aguadi adwuma nti, a nkoatɔn nso ka ho.

Dɛn nti ɛna Tiro anyɛ kurow a ɛho hia bio? So ɛyɛ biribi a ɛbae mpofirim ara kwa?

Adanse a ɛda adi pefee wɔ hɔ a ɛkyerɛ sɛ Tiro awiei amma sesɛkwa so ara kwa. Hebri adiyifo dii kan kaa ho asɛm siei mfehaha pii. Dɛn ntia? Efisɛ Tirofo a na kan no wɔne Yuda ahemfo wɔ adamfofa mu no dan afatwafo, tɔn wɔn nnamfonom no kɔɔ nkoayɛ mu.

Nea ɛka nkɔmyɛ nsɛm a wɔde tia Tiro no ho ne nsɛm a edidi so yi: “Na [Yehowa] mɛdan nea moreyɛ magu mo atifi na Yuda mma ne Yerusalem mma no, motontɔn wɔn maa Helafo.” (Yoel 3:4-6) “Sɛ Yehowa se ni: Tiro amumɔyɛ abiɛsa ne anan nti merennan n’asotwe no, sɛ wɔde atukɔfo dodow a edu hyɛɛ Edom nsa, na wɔnkae anuanomapam no nti: na mɛto Tiro fasu mu gya, na ahyew n’aban afɛfɛ rio.”​—Amos 1:9, 10.

Amansan nyinaa hene Yehowa Nyankopɔn rempene ade a wɔyɛe yi so nkosi daa. Abakɔsɛm mu nokwasɛm si so dua sɛ nkɔmhyɛ ahorow a ɛfa Tiro ho no toatoaa so baa mu.

Ka a Nebukadnesar Twae

Kurow no huu n’asehwe a edi kan wɔ Babilonia Hene Nebukadnesar nsam wɔ afeha a ɛto so asia A.Y.B. mu. Sɛnea Yudani abakɔsɛm kyerɛwfo Josephus a ɔtraa ase wɔ afeha a edi kan no mu no kae no Tiro ho ka a wotwae no dii mfirihyia 13. (Against Apion, Nhoma I, nky. 21) Nnipa a wowuwui ne agyapade a wɔsɛee no no bɛyɛ kɛse yiye.

Afei nso Nebukadnesar asraafo no baa nhyɛfo kɛse ase. Wɔn ti so “pae” esiane kyɛw a na wɔhyɛ nti, na wɔn mmati so worɔworɔwee wɔ nneɛma a wɔsoa de yɛɛ nneɛma horow a wɔde twaa kurow no ho nti. Nanso, Tiro agyapade no nyinaa ammefi wɔn a wotwa ho ka no nsam. Odiyifo Hesekiel a ɔtraa ase Nebukadnesar bere mu no kyerɛwee sɛ: “Nanso akatua bi amfi Tiro anka ɔno [Nebukadnesar] ne ne dɔm nsa, ɔsom a ɔsom ho no so.” (Hes. 29:18) Dɛn nti na eyi te saa”?

Wosii Tiro kurow no wɔ asase no ankasa ne supɔw bi a ɛne ne ntam kwan bɛyɛ ɔkwansin fã so. Ɛte sɛ nea kurow no a ɛwɔ asase no ankasa so no hwee ase, bere a supɔw no so kurow no traa hɔ. Eyi kyerɛ nea enti a Tiro san nyaa tumi bio wɔ ɔsɛe a ɛbaa no so no akyi. Bere a Israelfo no san fii Babilonia nkoayɛ mu bae no, Tirofo no tumi maa wɔn nnua ma wɔde sii asɔrefi no. (Esra 3:7) Akyiri no, Tiro aguadifo kɔɔ so dii gua pii wɔ Yerusalem.​—Neh. 13:16.

Wɔkaa Tiro Awiei Koraa Ho Asɛm Too Hɔ

Nanso, Yehowa aka asɛm atia Tiro. Ne sɛe a etwa to no bɛba daakye.

Hebri adiyifo Sakaria ne Hesekiel paee mu kae sɛ: “Yehowa bɛma wɔafa [Tiro] no adi, na wabɔ ne tumi ɛpo mu, na ɛno ankasa de ogya bɛhyew no.” (Sak. 9:4) “Enti sɛ Awurade Yehowa se ni: Hwɛ, me ne wo anya, Sor [Tiro], na mede amanaman bebree mɛba wo so, sɛnea ɛpo de n’asorɔkye reba no, na wɔabɛsɛe Sor [Tiro] afasu, na wɔabubu n’aban atenten no; na mɛpra ne dɔte mafi mu, na mayɛ no botan ferefere; ɛbɛyɛ asawu hatabea ɛpo mu.”​—Hes. 26:3-5.

Alexander Ɔkɛseɛ No Twa Ho Ka

Afe 332 A.Y.B. mu na saa nkɔmhyɛ ahorow a ɛfa Tiro ho no baa mu. Alexander Ɔkɛseɛ no sɔree sɛ ɔredi Apuei Mfinimfini nyinaa so.

Bere a Sidon gyaa ne ho mu maa no no, Alexander de ne dɔm no kɔɔ Tiro. Tiro mpanyimfo a Ɔhene Axemilcus ba ka ho kohyiaa wɔn kae sɛ wɔpɛ sɛ wɔde wɔn ho hyɛ n’ase. Alexander pɛe sɛ wɔde no kɔ kurow no mu, na wakɔbɔ afɔre ama Heracles (ɛnyɛ Hercules, Helafo anansesɛm mu nyame a ne ho yɛ den a wagye din no, na mmom onyame Melkart anaa Baal) . Bere a Tirofo no tee oyi ase pɛ na wɔpoo sɛ wɔbɛma no kwan ma wayɛ saa.

Esiane sɛ nea efii Alexander ne Persia Hene Dario akodi no mu bae no ho asɛm da so wɔ hɔ ara nti, Tirofo no susuwii sɛ ɛbɛyɛ papa ama wɔn sɛ wɔrempene so sɛ Makedonia anaasɛ Persiani bi bɛba wɔn kurow no mu. Wɔn adeyɛ no maa Alexander dii dwuma ntɛm ara.

Bere a ɔrekasa akyerɛ ne nkurɔfo no ɔkae sɛ: “Nnamfonom ne mfɛfo asraafo, mintumi nhu ɔkwan a yɛbɛfa so akodu Misraim dwoodwoo, mpɛn dodo a Persia di ɛpo so no; na sɛ yebetĩw Dario, a Tiro kurow no wɔ hɔ a ɛkyerɛ sɛ ɛremfa ne ho nhyɛ mu, a ɛwɔ yɛn akyi na Misraim ne Kipro nso da so wɔ atamfo nsam no bɛyɛ asiane, titiriw wɔ tebea a ɛwɔ Hela no nti. Nanso sɛ yɛsɛe Tiro a, Foenikia nyinaa bɛyɛ yɛn de, na Foenikia ahyɛn a wɔdɔɔso na wɔn ho yɛ den no ne ade titiriw a ɛma Persiafo di tumi wɔ po so, na ne nyinaa bɛdan yɛn de.”​—Arrian, TheCampaigns of Alexander, Penguin Classics, nkr. 131, 132.

Alexander asraafo mpanyimfo no gye toom, na wotwaa Tiro ho ka. Sɛnea wɔbɔɔ saa ka yi ho mmɔden no ne Bible mu nkɔmhyɛ hyia. Ná Hesekiel akyerɛw sɛ: “Na mɛpra ne dɔte afi mu, na wayɛ ɔbotan ferefere.” (Hes. 26:4) AIexander sii gyinae sɛ ɔbɛhyehyɛ ɔkwan bi akɔ supɔw no so. Enti ɔde kurow dedaw no mu dɔte ne abo yɛɛ ɔkwan

Bere a ɔkwan no yɛ rekɔ so no, Tirofo no de wɔn ahyɛn bɔɔ mmɔden biara a wobetumi de asɛe adwuma no. Alexander nso sɔre tiaa wɔn sii aban ahorow abien wɔ akyi. Nanso, Tirofo no tumi de ogya too eyi mu hyew no. Afei Alexander hyɛe ma wɔtrɛw ɔkwan no mu na wɔanya aban horow pii wɔ mu. Afei ɔboaboaa ahyɛn bebree ano fii Sidon, Rhodes, Mallus, Lykia, Makedonia ne mmeae afoforo a afei de na Tiro ahyɛn ntumi mma hɔ bio.

Bere a ɔkwan yi yɛ maa nkɔmhyɛ baa mu no, ɛyɛ akohyɛn a wɔde dii ako no na ɛde Tiro kurow a wotwaa ho ka asram ason no baa awiei. Sɛnea Arrian kyerɛ no, 8,000 wuwui wɔ ka no mu na wɔtɔn 30,000 kɔɔ nkoayɛ mu.

Wɔ nokwarem no, wɔrentumi nka sɛ Tiro asehwe no bae mpofirim anaasɛ sesɛkwa so ara kwa. Ɛbae sɛnea Yehowa Nyankopɔn atirimpɔw ne n’apɛde kyerɛ wɔ Tiro ankasa abrabɔ bɔne nti. Saa Onyankopɔn a ɔhyɛ nokware nkɔm no betumi aka afa n’ankasa ho sɛ: “Na sɛnea osu ne sukyerɛma fi soro gu fam na ɛnsan nko bio, gye sɛ ɛfɔw asase ansa, ma ɛba aduan na ɛsow aba, na ɛde aba ma ogufo ne aduan ma odifo no, saa ara na m’asɛm a efi m’anom bɛyɛ: ɛrensan mma me nkyɛn kwa, gye sɛ ɛyɛ nea mepɛ nã ewie nea enti a mesomae no.”​—Yes. 55:10, 11.

Tiro sɛe no nyɛ biribi a esii wɔ tete hɔ a atwam ara kwa. Egyina ho pintinn sɛ Ɔsorosoroni no atemmu horow nyinaa bɛbam. Yehowa Nyankopɔn ahyɛ wɔ n’Asɛm no mu sɛ nneɛma nhyehyɛe a ennim Nyankopɔn yi a ne suban te sɛ Tiro yi nyinaa bɛba awiei (2 Pet. 3:9-12) Yɛhyɛ wo nkuran sɛ sua na hu nea Bible no ka fa eyi ho ne ɔkwan a wobɛfa so aguan amanehunu a ɛreba ntɛmntɛm no.