Dɛn Nti Na Wɔbɛwo Mmofra Binom No Na Wɔadi Dɛm?

BERE a ɛna no woe akyi no, wɔka kyerɛɛ no sɛ ne ba no adi dɛm fi awo mu na ɛrenkyɛ na n’ani afura koraa. Ɛna no bɔɔ amanneɛ sɛ: ‘Yaw a ɛyɛɛ me no ma mifii ase gyee Onyankopɔn atɛntrenee ho kyim. Dɛn nti na ɛsɛ sɛ abofra ketewaa a ontumi nyɛ hwee hu amane? Mehwɛɛ me ho so yiye ansa na merebenyinsɛn na ɛno akyi nso saa ara. Dɛn nti na ɛbaa me so?’ Wɔ wiase nyinaa no, wobu akontaa sɛ mmofra 20 biara a wɔwo wɔn mu biako yɛ nea wadi dɛm bi. Awofo a wodi yaw pii bisa sɛ . . .

So Onyankopɔn na Ɔyɛ?

Dabida! Ɛwom sɛ nnipa pii te nka sɛ asiane ahorow a ɛtete sɛɛ yɛ “Onyankopɔn pɛ” anaasɛ nea ɔde retwe awofo no aso wɔ bɔne bi a atwam ho de, nanso Bible a ɛyɛ Onyankopɔn Asɛm no kyerɛ sɛ ɛnyɛ saa na asɛm no te.

Sɛ nhwɛso no, Yesu asuafo no bisaa nea enti a wɔwoo ɔbarima bi onifuraefo. Wobisaa Yesu sɛ: “Hena na ɔyɛɛ bɔne, oyi anaa n’agya ne ne na, sɛ wɔwoo no onifuraefo?” Afei Yesu maa emu daa hɔ sɛ dɛm a wodi fi awo mu nyɛ asotwe a efi Onyankopɔn ho, sɛ: “Ɛnyɛ oyi anaa n’agya ne ne na na wɔyɛɛ bɔne.”​—Yohane 9:1-3.

Efi Dɛn?

Nneɛma ahorow pii na ɛde dɛm a wodi fi awo mu ba. Ɛtɔ bere bi a ɛba saa esiane abofra no nkwa mmoawa nketenkete a wɔfrɛ no borɔfo mu sɛ chromosomes anaa genes no a atõto nti. Ebetumi aba sɛ eyi fi awofo no anaasɛ emfi wɔn. Nanso, nhoma Textbook of Medicine se: “Wɔ nea anyɛ yiye no pii mu no yentumi nhu ade titiriw a ɛma ɛba saa, na yebetumi afa no sɛ nea enti a ɛwɔ hɔ no fi awo nhyehyɛe a ɛyɛ hwanyann no dwumadi ne baabi a obi te.”

Nneɛma ahorow a wogye di sɛ etumi de dɛmdi ba fi awo mu no obi ne: ɔyare anaa nyarewa bi a ɛna no nya bere a ɔnyem, X-ray a wɔyɛ ɛna no bere a ɔnyem, efĩ, nnuru ahorow (ebinom mpo a wobu sɛ eye bere a wɔnyem) , aduannuru bi a; wonya ma ɛboro so, aduan pa a wonnya nni, asetra bi a ɛna no wom bere a ɔnyem, ɛna no mfe, abusua, ne bere ko mpo a ɔwo. Mpɛn pii akodi ne pɛsɛmenkominya aguadi de tebea horow a ɛde awo mu dɛmdi ba aba.

Wɔ ɔkwan foforo so no, ɔwofo bi nneyɛe betumi ama asiane a ɛwɔ hɔ sɛ ɔbɛwo ba a wadi dɛm no ayɛ kɛse. Ebinom bu bra bɔne ma ɛka wɔn mma a wɔnwoo wɔn no. Abofra no betumi adi dɛm esiane sɛ awofo no anya babaso anaasɛ wɔadi mogyafra nti. Afei nso awofo betumi apira wɔn ba a ɔrenyin wɔ yafunu mu no denam nnubɔne ahorow ne tawa a wɔbɛnom no so.

Nanso, ade titiriw a ɛma wɔwo mmofra binom a wɔadi dɛm no ne asoɔden a awarefo a wodi kan, Adam ne Hawa yɛe no. Bɔne a wɔyɛ tiaa Onyankopɔn no ma wɔhweree wɔn pɛyɛ wɔ adwene ne nipadua mu no na wɔwoo mma a “wɔadidi dɛm.” Awo ntoatoaso a edidii akyi bae nyinaa fii pɛyɛ no ho nkakrankakra. Enti, sɛ ná mfiridwuma ho ɔhaw, akodi, aduan pa a wonnya nni anaasɛ nneyɛe bɔne biara nni hɔ mpo a, yɛbɛkɔ so ara anya mmofra a wɔadidi dɛm esiane nokwasɛm a ɛyɛ sɛ awofo a wɔnyɛ pɛ na wɔwo yɛn no nti.

Dɛn na Yebetumi Ayɛ sɛ Ɛba Saa A?

Yebetumi ayɛ pii, a mpɛn pii no egyina dɛm kõ so. Nnuruyɛ ho nhwehwɛmufo renya akwan afoforo da biara a wɔbɛfa so aboa ma wɔasa nyarewa ahorow a ɛtete saa no anaasɛ wɔbɛma ayɛ mmerɛw sɛ wɔbɛboa wɔn. Nneɛma a ɛte sɛ nsa ne nan a wɔde hyɛ ama bebree a wɔwoo wɔn a na wonni eyinom bi no anya asetra a anigye wom.

Nteteebea ahorow wɔ hɔ a wɔrebɔ mmɔden sɛ wɔbɛboa mmofra a wɔadidi dɛm. Nnuruyɛfo a wɔyɛ mmofra a wɔadi dɛm ho adwuma pii reda no adi sɛ, sɛ wofi ntetee no ase ntɛm sɛnea ɛsɛ a, “mmofra a sɛnea wɔn adwene te biara betumi anya nkɔso asua ade.” Ɛtɔ bere bi a ebia ɔwofo no nni biribiara a obetumi ayɛ ka to a ɔde abofra no bɛkɔ akɔto nteteebea bi mu ho. Nanso ɔdɔ a efi awofo hɔ ho hia. Abofra bi a wadi dɛm kɛse agya kae sɛ: “Ɔdɔ bɛyɛ pii asen ntetee titiriw no nyinaa.”

Wɔaboa mmofra a wɔwoo wɔn mmubuafo koraa pii, na mprempren sɛ́ mpanyimfo no, wotumi yɛ biribi wɔ asetra mu. Mmea a wonni nsa mpo ayɛn wɔn ankasa mma. Ɛmfa ho sɛ wɔadidi dɛm, wɔn ani gye sɛ wɔwɔ nkwa mu.

So mmofra a wɔtete sɛɛ benya ahoɔden da bi? Yiw, wobenya. Yesu daa “Onyankopɔn nnwuma” adi denam onipa bi a wɔwoo no onifuraefo a ɔsaa no yare no so. Saa anwonwade a wɔde Onyankopɔn tumi yɛe yi kyerɛ sɛ Onyankopɔn susuw wɔn a wɔadidi dɛm fi awo mu no awerɛhow tebea no ho. Saa “Onyankopɔn nnwuma” yi bɛda adi kɛse mpo nnansa yi ara. Onyankopɔn hyɛ bɔ sɛ obeyi mprempren pɛsɛmenkominya nhyehyɛe no afi hɔ na ɔde “ɔsoro foforo ne asase foforo a trenee te mu” aba.​—2 Petro 3:13; Yohane 9:3.

Sɛnea bere a Yesu wɔ asase so no ɔsaa anifuraefo, mpakye ne wɔn a wɔn nsa awu yare no, saa ara na wobebue ani a afura ne aso a asi fi awo mu wɔ “asase foforo” no so. Wɔn a wonni nkwaa ahorow anaasɛ wontumi mfa nyɛ hwee no benya bi ma wɔde ayɛ ade wɔ anigye mu! Awerɛhow ne osu nyinaa betwam wɔ Yesu ɔsoro nniso no ase. Owu mpo befi hɔ!​—Marko 3:1-5; Adiyisɛm 21:3, 4.

Saa anidaso yi hyɛ wɔn a wowɔ mma a wɔadidi dɛm no den. Abarimaa bi a wadi mfe 15 a ɔyɛ mum fi awo mu nã gye toom sɛ: “Ɛtɔ bere bi a na ɛyɛ me ne me babea no sɛ yennyae n’akyi di, nanso Yehowa Nyankopɔn a yehuu no ne hu a yehui sɛ daakye obeyi saa tebea yi afi me ba no so no maa yɛn biribi a yebetumi ahwɛ kwan. Eyi na ɛboaa yɛn ma yɛkɔɔ so.”

Sua pii fi Bible no mu fa anidaso a ɛyɛ nwonwa yi ne ɔkwan a wo ne w’abusua no betumi afa so anya mu anigye no ho. Yehowa Adansefo ani begye sɛ wɔbɛboa wo a wonnye ho hwee.

[Kratafa 18 adaka]

NEA MMOFRA A WƆADIDI DƐM AWOFO BINOM KA

“Ansa na merebɛwo no no, ná me koma haw me yiye, nanso misuaa boasetɔ ne ayamye wɔ ne hwɛ mu. Eyi mpo boaa me ma mebɛyɛɛ obi a osusuw afoforo ho kɛse bere a me ne wɔn reyɛ ade.”​—Abofra a wadi mfe 15 a ɔyɛ mum na wadi dɛm ahorow wɔ ne nnompe mu maame

‘Yɛasusuw oduruyɛfo a ɔpɛe sɛ wɔbɛma no kwan ma wokum no no ho mpɛn pii. Hwɛ nhyira ara a yɛn babea ketewaa no ayɛ ama yɛn! Bere a ɔtɔ sin wɔ akwan horow pii so no, ɛte sɛnea abofra a wadi dɛm wɔ ɔdɔ pii.’​—Abeawa a wadi mfe 10 a wadi dɛm kɛse agya