Asɛmpatrɛwfo—Hann Adwumayɛfo Anaa Esum De?—Ɔfã 6

Nokware Asuafo a Wɔbɛyɛ Nnɛ

YESU KRISTO hyɛe sɛ: “Enti monkɔ nkɔyɛ amanaman nyinaa m’asuafo. Mommɔ wɔn asu.” (Mateo 28:19) Everyman’s Encyclopedia ka sɛ: “Kristofo a wɔatra ase wɔ awo ntoatoaso nyinaa mu” adi ahyɛde yi so, ɛwom sɛ ɛde ka ho sɛ, “ɛtɔ mmere bi a, wɔnyere wɔn ho nyɛ” de. Nhoma The Missionary Myth bisa sɛ: “Asɛmpatrɛw bere no aba awiei?”

Newsweek nsɛmma nhoma no kae wɔ afe a etwaam no January mu sɛ: “Pope John Paul II de Roma Katoleksom rekɔ mmɔnten so.” Nsɛmma nhoma no kyerɛkyerɛɛ mu sɛ: “Ɔresoma asɛnkafo 350 a wɔnyɛ asɔfo ma wɔakɔhwehwɛ gyidifo wɔ Rome disko ahorow, aguadi adan akɛse ne asase ase keteke gyinabea. Wobefi adwuma a wɔresɔ ahwɛ yi ase Nsõ Wukuda (Feb. 16). Sɛ ɛyɛ yiye a, pope no bɛma wɔayɛ wɔ wiase nyinaa—adeyɛ a ebetumi ama Katolekfo asɛmpatrɛwfo akɔbobɔ apon mu fi Buenos Aires kosi Tokyo.”

Nanso, Yehowa Adansefo fi bere tenten ate asɛyɛde a wɔwɔ sɛ wɔbɛyɛ asɛmpaka adwuma no ase. (2 Timoteo 4:5) Ɛwom, ɛnyɛ wɔn nyinaa na wɔka asɛm sɛ asɛmpatrɛwfo wɔ aman foforo so. Nanso wobetumi aka asɛm no—na wɔyɛ saa—wɔ baabiara a wɔwɔ. Ɔkwan yi so no, wɔn nyinaa yɛ asɛmpatrɛwfo.

Sukuu Soronko Bi

Wɔ 1940 mfe no mfiase hɔ no, Ɔwɛn Aban Asafo no tew sukuu bi a wɔde bɛtete asomfo a wɔn ho akokwaw ma wɔasom sɛ asɛmpatrɛwfo wɔ amannɔne nsase a wohia mmoa wɔ hɔ ntɛm no so. Wɔasakra nneɛma a wosua no mu wɔ mfe a atwam no mu, nanso ɛmman mfii ne botae titiriw a ɛne sɛ ebesi Bible adesua so dua na ayɛ asɛmpaka adwuma a ɛho hia no ho.

Edin a wɔpaw maa sukuu foforo no ne Gilead, na ɛkyerɛ “Adanse Kuw” wɔ Hebri mu. Esiane sɛ Gilead aboa ma wɔaboaboa adanse kuw ano de adi Yehowa ni nti, aboa kɛse ma wɔreyɛ wiase nyinaa asɛnka adwuma a Yesu hyɛɛ nkɔm sɛ wɔbɛyɛ wɔ yɛn nna yi mu no.—Mateo 24:14.

Bere a Nathan H. Knorr a saa bere no na ɔyɛ Ɔwɛn Aban Asafo no titrani no rekasa akyerɛ Gilead Sukuu adesuakuw a edi kan no wɔ 1943 mu no, ɔkae sɛ: “Wɔresan asiesie mo ama adwuma a ɛte sɛ nea ɔsomafo Paulo, Marko, Timoteo, ne afoforo a wotutuu akwan kɔɔ Roma Ahemman no mmaa nyinaa bɔɔ Ahenni asɛm no dawuru no yɛe no . . . Mo adwuma titiriw ne sɛ mobɛka Ahenni ho asɛmpa no wɔ afie afie sɛnea Yesu ne asomafo no yɛe no.”

Bere a adesuakuw a edi kan no wiee wɔn ntetee no, wɔde wɔn a wowiei no kɔɔ Latin Amerika aman akron mu. Ɛde besi nnɛ no, wɔatete adesuafo 6,500 ne akyi a wofi aman bɛboro 110 mu wɔ Gilead Sukuu, na wɔasoma wɔn sɛ asɛmpatrɛwfo akɔ nsase ne nsupɔw akuw bɛboro 200 so.

Asɛmpatrɛwfo Soronko Bi

Nsɛm a yɛakyerɛw atoatoa so yi mu nea aba dedaw no kaa Kristoman asɛmpatrɛwfo adwuma wɔ tete no ho asɛm. Te sɛ wɔn a wɔde wɔn kɔɔ Greenland no, pii kyerɛɛ Bible no anaa n’afã horow ase kɔɔ ɔman no mu kasa mu. Nanso, na saa tete asɛmpatrɛwfo no ani taa gye nneɛma afoforo ho sen sɛ wɔbɛkyerɛ nkurɔfo Bible no.

Sɛ nhwɛso no, Kodansha Encyclopedia of Japan ka sɛ Kristoman asɛmpatrɛwfo a wɔde wɔn kɔɔ Japan no tew “asuae ne sukuu ahorow.” Ɛka sɛ: “Asɛmpatrɛwfo dodow bi nam wɔn nhomanim so agye din.” Wɔbɛyɛɛ kasa ho animdefo anaa abenfo, wɔkyerɛɛ nneɛma te sɛ nhomakyerɛw, kasa, abakɔsɛm, nyansapɛ, Asia Apuei Fam ɔsom ahorow, ne Japanfo amammerɛ. Encyclopedia no de ka ho sɛ: “Ná adɔe ne asetra mu yiyedi nnwuma nso yɛ asɛmpatrɛw adwuma fã titiriw.”

Asɛmpatrɛwfo no dodow no ara ammu asɛmpaka no ade titiriw. Mpɛn pii no wosii honam fam ahiade ahorow a wobenya so dua sen honhom fam ahiade ahorow. Nneɛma a wɔn ankasa pɛ na wodii akyi kɛse. Enti, ɛnnɛ wonim Anglikan Asɔre no ɔsɛmpatrɛwfo bi a wɔde no kɔɔ Japan wɔ 1889 mu no yiye sɛ “nea ɔde mmepɔw a wɔforo baa Japan.”

Ɛsono asɛmpatrɛwfo a wɔatete wɔn wɔ Gilead no wɔ wɔn a wɔwɔ Kristoman mu ho wɔ akwan atitiriw so. Nhoma Jehovah’s Witnesses—Proclaimers of God’s Kingdom, ti 23, ka sɛ: “Asɛmpatrɛwfo a wɔawie Gilead Sukuu kyerɛkyerɛ nkurɔfo Bible no. Sɛ́ anka wɔbɛtew asɔre ahorow na wɔahwɛ kwan sɛ nkurɔfo bɛba wɔn nkyɛn no, wɔkɔ afie afie . . , kɔsom na ɛnyɛ sɛ wɔbɛsom wɔn.”

Aba Bɛn na Wɔasow?

Bere a Kristoman asɛmpatrɛwfo anya mfehaha pii de ayɛ Kristofo asuafo wɔ Europa akyi no, dɛn na wɔatumi ayɛ? Nhoma A Global View of Christian Missions bua sɛ: “Nnipa bɛyɛ ɔpepem 160 a wɔwɔ Europa kyerɛ sɛ wɔnyɛ asɔre biara mufo. Wɔn a wɔda so ara kyerɛ sɛ wɔyɛ Kristosom mufo no mu kakraa bi na wobu nyamesom aniberesɛm. . . . Wontumi mfrɛ Europa da sɛ Kristofo asasepɔn.”

Tebea no te dɛn wɔ Asia? Kodansha Encyclopedia of Japan bua sɛ: “Nnipa no da so ara bu Kristosom sɛ ‘ɔman foforo bi’ gyidi, . . . enye mma Japanfo dodow no ara. . . . Japanfo mpapahwekwa da so ara mfa Kristosom nyɛ hwee.” Nokwarem no, nnipa a wɔwɔ Japan a wɔkyerɛ sɛ wɔyɛ Kristofo no nnu ɔha biara mu nkyem 4, wonnu ɔha biara mu nkyem 3 wɔ India, wonnu ɔha biara mu nkyem 2 wɔ Pakistan, na wonnu ɔha biara mu nkyem 0.5 wɔ China.

Bere a Kristoman asɛmpatrɛwfo de mfehaha pii ayɛ adwuma wɔ Afrika no, tebea no te dɛn wɔ hɔ? Germanfo nsɛmma nhoma Focus bɔɔ amanneɛ wɔ nhyiam bi a Afrika asɔfo mpanyin yɛe wɔ fefɛw bere yi mu wɔ Rome ho amanneɛbɔ bi mu sɛ: “Ɛnsɛ sɛ wɔkasa tia Afrikafo som ahorow no bio sɛ abosonsom. Asɔre no krataa a wontintimii no de ‘Afrikafo som ahorow a egyina atetesɛm so’ no ka nea nidi wom na ɛho hia no ho. Nidi sɛ emufo. Asɔfo no hui sɛ ɔsom ahorow a na kan wɔkasa tia sɛ ɛyɛ abosonsom no ‘na obi a Katoleksom adi ne ti sen biara mpo de abɔ ne bra mpɛn pii.’”a

Bere a Kristoman asɛmpatrɛwfo anya mfehaha pii de ayɛ Kristo asuafo wɔ Amerika no, dɛn na wɔatumi ayɛ? Nhoma Mission to the World bua sɛ: “‘Latin Amerika’ da so ara fata din a ɛne ‘asasepɔn a wɔapow’ ɛmfa ho sɛ asɛmpatrɛw adwuma no anya nkɔanim kɛse nnansa yi.” Ɛdefa United States ho no, Newsweek ka sɛ nhwehwɛmu a wɔayɛ nnansa yi “da no adi sɛ ɛwom sɛ nyamesom wɔ Amerika de, nanso wɔn mu kakraa bi na wobu no aniberesɛm. . . . Nnipa a wɔka kyerɛ nhwehwɛmufo sɛ wɔde Kwasida kɔ asɔre no mu fã redi atoro. . . . Amerikafo a wɔadi mfe 18 ne akyi no mu bɛyɛ nkyem abiɛsa mu biako yɛ wiasefo ankasa . . . Wɔn mu ɔha biara mu nkyem 19 pɛ . . . na wɔde wɔn som bɔ wɔn bra daa.”

Ne tiaatwa mu ara ne sɛ, bere a Kristoman asɛmpatrɛwfo bɔ mmɔden sɛ wɔbɛma ɔhaw ahorow a ɛne ohia, akwahosan pa ne nhomasua a wonnya so atew no, sɛ kuw no, wɔagyina nnipa nhyehyɛe ahorow, a aboro so koraa no nea ɛde aba ne ahotɔ kakra a ɛtra hɔ bere tiaa bi, akyi. Nea ɛne eyi bɔ abira no, nokware Kristofo asɛmpatrɛwfo twe nkurɔfo adwene si Onyankopɔn Ahenni a wɔde asi hɔ, a ɛde ahotɔ koraa a enni awiei bɛba no so. Ɛmmrɛ ɔhaw ahorow ase kɛkɛ; ebedi ho dwuma. Yiw, Onyankopɔn Ahenni bɛma adesamma anya akwahosan a edi mu, sikasɛm mu ahobammɔ ankasa, hokwan ahorow a enni ano a ɛbɛma obiara anya adwuma pa ne daa nkwa!—Dwom 37:9-11, 29; Yesaia 33:24; 35:5, 6; 65:21-23; Adiyisɛm 21:3, 4.

Ebia Kristoman asɛmpatrɛwfo bɛtwe adwene asi wɔn a wɔkyerɛ sɛ wɔyɛ Kristofo a wɔkɔ asɔre bere ne bere mu no so sɛ adanse a ɛkyerɛ sɛ wɔayɛ ‘amanaman nyinaa asuafo abɔ wɔn asu.’ Nanso nokwasɛm ahorow no kyerɛ sɛ asɛmpatrɛwfo yi ankyerɛ wɔn a wɔabɔ wɔn asu yi sɛ ‘wonni nea Yesu ahyɛ no nyinaa so.’—Mateo 28:19, 20.

Nanso, nokware Kristofo ɔkyerɛkyerɛ adwuma no bɛkɔ so akodu Onyankopɔn wiase foforo no mu. Ɛbɛka ɔpepem pii a wɔanyan wɔn a ɛho behia sɛ wɔkyerɛ wɔn Onyankopɔn akwan no. Afei, esiane sɛ Satan rentoto Kristofo ananmu nti, wobenya hokwan a ɛyɛ anigye a ɛne sɛ wɔbɛkɔ so ayɛ asuafo—sɛnea wɔayɛ mfe du du pii mpo no.

[Ase hɔ asɛm]

[Kratafa 14 adaka]

Sɛnea Wɔaboa Nkurɔfo

Nsɛm a wɔn a wɔanya asɛmpatrɛwfo a wɔatete wɔn wɔ Gilead mmoa so mfaso aka na edidi so yi.

“Me ho dwiriw me wɔ pa a wɔampa abaw, gyina a wogyinaa nneɛma pii a ɛyɛ soronko wɔ wɔn kurom de ho ano no ho: wim tebea, kasa, amammerɛ, aduan, ne ɔsom ahorow. Nanso wɔkɔɔ so yɛɛ wɔn adwuma no, ebinom yɛ de kosii sɛ wowui mpo. Wɔn su pa wɔ adesua ho ne wɔn nnamyɛ wɔ ɔsom adwuma no mu boaa me ma meyɛɛ ade koro no ara.”—J. A., India.

“Ɔsɛmpatrɛwfo no bere sodi wɔ adesua a ɔne me yɛe mu no maa m’ani gyei. Ɔde ahosodi kɛse gyinaa adwene a ɛnteɛ a na mewɔ ne nimdeɛ a na minni no ano.”—P. T., Thailand.

“Me ne me yere ani sɔɔ kronnyɛ a Adansefo asɛmpatrɛwfo daa no adi no. Wɔn adwuma no nyaa yɛn so nkɛntɛnso ma yɛde bere nyinaa som adwuma yɛɛ yɛn botae, na yɛn ani agye nnɛ sɛ yɛn ankasa abɛyɛ asɛmpatrɛwfo.”—A. C., Mozambique.

“Ná m’asetra adan ahopɛ. Asɛmpatrɛwfo no a mihyiaa wɔn no ma minyaa nkuranhyɛ a mihia na masakra no. Mihui sɛ wɔwɔ anigye ankasa na ɛnyɛ aniani de.”—J. K., Japan.

“Kristoman asɛmpatrɛwfo traa ase wɔ taamudi mu. Nkoa siesiee fie hɔ, noaa nnuan, horoo nneɛma, hwɛɛ turo no, na wɔkaa kar no. Me ho dwiriw me sɛ mihui sɛ Gilead asɛmpatrɛwfo reyɛ wɔn ankasa fie nnwuma fɛfɛɛfɛ, bere a wɔboaa ɔman no mu nnipa ma wosuaa Onyankopɔn Ahenni nso ho ade no.”—S. D., Thailand.

“Asɛmpatrɛwfo mmea no de sakre kɔsrasraa nkurɔfo bere a wim hyew duu 46° C. ne akyi mpo no. Wɔn ahɔhoyɛ ne nyiyim a wɔnyɛ, ne boasetɔ nso boaa me ma mihuu nokware no.”—V. H., India.

“Asɛmpatrɛwfo no ante nka sɛ wɔkorɔn. Wɔde ahobrɛase yɛɛ nsakrae tumi ne mpɔtam hɔ nnipa trae na wogyinaa ohia tebea no ano. Na wɔaba sɛ wɔrebɛsom, enti wɔannwiinwii da, na mmom na ɛte sɛ nea wɔwɔ anigye ne akomatɔyam daa.”—C. P., Thailand.

“Wɔammrɛ Bible nokware no ase. Nanso, wɔamma ɔman no mu nnipa ante nka sɛ wɔn amammerɛ afã horow nyinaa nnye anaasɛ ɛsɛ sɛ wɔyɛ wɔn ade te sɛ Atɔe Famfo. Wɔamma afoforo ante nka da sɛ wɔba fam anaasɛ wɔmfata.”—A. D., Papua New Guinea.

“Esiane sɛ na ɔnte sɛ Kristoman asɛmpatrɛwfo no nti, ɔpɛe sɛ ɔtra fam bobɔw ne nan te sɛ Koreafo, bere a yɛyɛɛ yɛn Bible adesua no. Ná ɔwɔ ɔpɛ sɛ obedi yɛn Koreafo nnuan. Ɔdɔ a minya maa no no boaa me ma minyaa nkɔso.”—S. K., Korea.

“Na madi mfe du na na mepɔn sukuu awia dumien. Ná ɔsɛmpatrɛwfo bi to nsa frɛ me ma me ne no kɔ asɛnka awia. Ɔkyerɛɛ me Bible mu nnyinasosɛm pii na ɔma minyaa anisɔ ankasa maa Yehowa ahyehyɛde no.”—R. G., Colombia.

“Wɔkyerɛɛ me sɛ minnnyae m’adwuma, menyɛ nea ehia sɛ meyɛ a minnwiinwii. Mifi me komam tɔnn da Yehowa ne Yesu Kristo ase sɛ wɔsomaa asɛmpatrɛwfo no baa yɛn nkyɛn.”—K. S., Japan.

[Kratafa 13 mfonini]

Asɛmpatrɛwfo a wɔtetee wɔn wɔ Gilead a wofi aman 16 mu ka wɔn suahu ahorow wɔ ɔmantam nhyiam bi a wɔyɛe nnansa yi ase