Ahoɔden Wɔ W’aduan Mu?

EFI NYAN! KYERƐWFO A ƆWƆ BRAZIL HƆ

Ɔkwan bɛn so na wopaw w’aduan? Sɛ woretɔ aduan a, nneɛma bɛn na wususuw ho? Ɛyɛ sɛnea wɔahyehyɛ nneɛma no? Ne bo? Ne siesie a ɛnyɛ den? Adɛfɛdɛfɛsɛm a ɛwɔ ho dawurubɔ mu no? Anaa sɛnea aduan no si te ne ne dɛ? Ɔkwan pa a wobɛfa so apaw no na ɛbɛkyerɛ sɛ ebia wudi aduan a ahoɔden wom anaasɛ nea ahoɔden nnim, sɛ́ w’akwahosan betu mpɔn anaasɛ ɛbɛsɛe.

OHIA yɛ ade titiriw a ɛmma wonni aduan pa. Bere a aduan abu nnipa pii so no, ɛyɛ den ma afoforo ɔpepem pii sɛ wobenya aduan a ahoɔden wom adi. Brazilni ɔbantoni bi a ɔwɔ mma baasia kae sɛ: “Biribiara a yɛn nsa bɛka na yedi wɔ fie ha.” Ɛno kyerɛ sɛ wɔtaa di paanoo a akyɛ ne kɔfe a wɔafra mu anaa ɛmo ne adua. Nokwarem no, sɛnea amanneɛbɔ a efi Amanaman Nkabom Ahyehyɛde a Ɛhwɛ Aduan ne Kuayɛ So hɔ kyerɛ no, nnipa a wɔwɔ wiase no mu ɔha biara mu 20 na ɔkɔm de wɔn. Bere a ɔkɔm wɔ Afrika aman bi mu kɛse no, ɔkɔm de nnipa pii nso wɔ Asia. Wɔ United States mpo no, wɔbɔ amanneɛ sɛ nnipa ɔha biara mu 12, anaa nnipa ɔpepem 30 na wɔn aduan a wodi nso wɔn.

Ɛnyɛ sɛ aduan a ahoɔden nni mu tumi pira nko, na mmom, ebetumi adi awu. Nhwehwɛmufo William Chandler ka sɛ: “Mmofra a wowuwu esiane aduan pa a wonnya mma wɔn no dodow bɛboro wɔn a ɔkɔm ankasa kunkum wɔn no so mpɛn 10.” “Sɛ ayamtu ne aduammɔne ka bom a, edi awu sen biara wɔ wiase.” UNICEF (Amanaman Nkabom Mmofra Foto Ahyehyɛde) no bɔ amanneɛ sɛ: “Ɔyaredɔm, nsuyiri, asasewosow, anaa akodi biara nni hɔ a akum mmofra 250,000 wɔ nnawɔtwe biako pɛ mu pɛn.” Nanso sɛnea Amanaman Nkabom ahyehyɛde no kyerɛ no, ɛno ne mmofra dodow a wowuwu wɔ wiase nyinaa, esiane aduan pa a wonnya nni ne nyarewa a efi mu ba nti. Nokwarem no, adesɛe a aduan pa a wonnya nni de aba no yɛ nea wontumi mmu ho akontaa: Tumi a wɔde sua ade so tew, ahoɔden a wɔde yɛ adwuma so tew, adwumayɛ brɛ ase na nea wotumi yɛ nni mu.

Nanso, nnuan pa a ɛdɔɔso a wodi no betumi ayi ɔhaw ahorow te sɛ mogya a ɛso tew ne nyarewa foforo a aka a wonya bere a wonnya nnuan pa nni no afi hɔ. Ebia aban mmoa te sɛ sukuu mu a wodidi awia ne ahyehyɛde a ɛde nnuan pa ma afoforo no bɛma nya a wonnya aduan pa nni so atew wɔ mmeae bi de, nanso sɛnea UNICEF mpanyimfo kyerɛ no, wobehia dɔla ɔpepepem 25 afe biara na wɔatumi atew mmofra a ayamtu, mpafe ne ntoburo ma wowuwu mpatuwu no so. Ebia ebinom bɛka sɛ ‘sika no dɔɔso.’ Nanso wɔbɔ amanneɛ sɛ ɛno ne sika a Amerikafo sɛe no mpaboa a wɔhyɛ de di agoru ho, na Europafo sɛe no nsã ho wɔ afe biako mu. Ade foforo a ɛsɛ sɛ wɔhwɛ di ho dwuma ne aduansɛe. Ɛwom sɛ Brazilfo ɔpepem 32 na ɔkɔm de wɔn de, nanso Brazil Asoɛe a Ɛhwɛ Kuadwuma So bɔ amanneɛ sɛ, “nnuan a ɛsɛe bere a wɔatwa awie na wɔde retu kwan anaa wɔrekɔkora so no [a ɛho sika yɛ dɔla ɔpepepem 1.5] ma wɔhwere ɔman no nnɔbae a wonya no ɔha biara mu nkyem 18 kosi 20.” Ɛwom, ɔhaw akɛse wɔ kuadwuma, nnɔbae so nsu a wogugu, aduan so a wɔkora ne akwantu mu wɔ aman pii mu de; nanso asase betumi ama yɛn nyinaa nnuan pii. Enti, wobɛyɛ dɛn atumi ama w’abusua anya aduan adi?

Sika Nkutoo Nnɔɔso

Wɔ aman a wonnyaa nkɔso pii mu no, nkurɔfo bɔ mmɔden ma wɔn mmusua aduan denam adwuma abien anaa abiɛsa a wɔyɛ so. Wɔ Brazil no, nnipa ɔpepem 1.5 na wogyaw wɔn mmusua anaa wɔn nnamfo hɔ afe biara tutu kwan kɔ nkurow akɛse mu kɔhwehwɛ adwuma ne aduan. Ɛwom sɛ akwahosan gyina aduan a onipa di so ɔkwan bi so de, nanso wɔsɛe sika kɛse no ara wɔ ntama, dabere ne akwantu ho.

Nea ɛyɛ anigye no, nnuan a wonim no yiye te sɛ ɛmo, adua, aburow, ntɔmmɔ, bankye ne kwadu a wɔde nam ka ho di no, ne nnuan a mmusua a wɔwɔ wiase nyinaa di. Brazil aduan ho nimdefo José Eduardo de Oliveira Dutra kae sɛ: “Adua ne ɛmo yɛ nnuan a wɔde bom a ahoɔden wom kɛse. Bere a yɛwɔ nnuan a ɛte sɛɛ a ne noa nyɛ den na ne bo wɔ fam no, yebetumi atu ɔkɔm ase wɔ [ɔman] no mu.” Yiw, ebia aduan a ne bo nyɛ den wɔ baabi a wote no. Anaasɛ ebia wubedua w’aduan no bi mpo.

Ɛwom sɛ ebia wowɔ sika pii de, nanso wode tɔ aduan a ahoɔden wom ma w’abusua no? Anaasɛ woma dawuru a wɔbɔ no anifere kwan so daa no kɛntɛn wo so ma w’ani gye nnɔkɔnnɔkɔwade anaa aduan a ahoɔden nnim ho ma enti wubu w’ani gu hia a aduannuru te sɛ protein, mineral ne vitamin ho hia no so? Biribi dɛw a ɛyɛ no ho hia wo sen ye a eye? The World Book Encyclopedia ka sɛ: “Ansa na nkurɔfo benya akwahosan pa no, ɛsɛ sɛ wonya nipadua no ne sɛnea ɛyɛ adwuma no ho nimdeɛ kakra. Ɛno ansa na wobetumi ahu nea ɛbɛboa wɔn ne nea ɛmmoa wɔn anaa nea ebepira wɔn akwahosan. Ɛsɛ sɛ wɔde akwahosan ho ade a wosua no ka onipa biara nhomasua ho.”

Ampa, ɛnyɛ adidi ara kwa nti na yɛte ase, nanso adidi yɛ yɛn asetra fã titiriw. Bible no ka adidi pa ho asɛm sɛ adwumaden mu akatua, na ɛka sɛ: “Nanso sɛ onipa biara didi nom hu adepa ne brɛ nyinaa mu a, Onyankopɔn akyɛde ne no.” (Ɔsɛnkafo 3:13) Wubu aduan pa sɛ ɛsom bo na ɛho hia? Sɛ saa a, ɛnde yɛsrɛ wo, hwehwɛ asɛm a ɛfa ɔkwan a aduan a ahoɔden wom bɛboa wo ne w’abusua ho no mu.