Mmofra Bisa Sɛ . . .

Dɛn Nti na Ɛyɛ Me Mfomso Bere Nyinaa?

“Me papa ho mpɛ nneɛma bi, nanso ɔne nkurɔfo a wɔnom sigaret na ɛyɛ adwuma. Ɛtɔ mmere bi a, ɔbɛba fie no na wayɛ basaa paa. Otumi yera nneɛma na ɔde ahyɛ me. Sɛ meka kyerɛ no sɛ ɔno na ɔyeraa no a, ne bo fuw, na ɔka kyerɛ me sɛ ɛnsɛ sɛ anka meteɛ ne so.”—Abeawa bi a onnii mfe aduonu.

WO NSO ɛtɔ da bi a wote nka sɛ wɔtaa de asɛm hyɛ wo wɔ abusua no mu anaa? So ɛreyɛ ayɛ sɛ biribiara a ɛkɔ bɔne no, wo na wɔde hyɛ wo? Saa na Joy a wadi mfe 14 no te nka. Ɔne ɔwofo a onni hokafo na ɛte, na ɔtaa hwɛ ne nuabarima ne ne nuabea nkumaa so. Joy bɔ n’amanneɛ sɛ: “Bere a wɔde ntɔkwaw begyina mu no, na mewɔ ase hɔ. Wodi nkwaseasɛm ne mmofrasɛm, nanso sɛ Paapa ba fie a, ɔteɛteɛm gu me so esiane sɛ na minni hɔ a mɛpata nti.”

Sɛ w’awofo ka sɛ woyɛ tirimdɛ, ɔkwadwofo, anaa nipa hunu, anaasɛ wɔde din afoforo frɛ wo ma ɛyɛ te sɛ nea wɔyɛ wo hwee a ɛnyɛ yiye a, ɛtɔ mmere bi mpo a, ebia ɛbɛyɛ te sɛ nea wɔhwɛ kwan sɛ wobɛfom. Ramon abusuafo frɛɛ no awerɛfi wura—edin a na okyi koraa. Ebia wo nso wukyi din anaa biribi a wɔde frɛ wo de twe adwene si wo sintɔ ahorow so, ɛmfa ho mpo sɛ ebia wɔka no sɛnea wɔne wo redi fene no. Sɛ́ anka dimmɔne a wɔbɔ wo no bɛkanyan wo ma woabɔ wo ho mmɔden no, nea ɛbɛyɛ ara ne sɛ ɛbɛhyɛ adwene a woanya sɛ bere nyinaa wɔde asɛm hyɛ wo no mu den.

Sɛ ɛkɔba sɛ animhwɛ na ɛma wɔde asɛm hyɛ obi a, ɛma ɛyɛ yaw kɛse. Abofra bi a onnii mfe aduonu a wɔfrɛ no Frankie ka sɛ: “Mene abofra a ɔyɛ adantam, na asɛm biara ba a, me na migye ne kɛse.” Ebia ɛbɛyɛ te sɛ nea bere nyinaa asɛm nni wo nuanom ho, nanso sɛ asɛm ketewaa bi ba a, wobu wo fɔ wɔ ho.

Nea Enti a Awofo Bu Fɔ

Nokwarem no, ɛyɛ ne kwan so sɛ awofo bɛteɛ wɔn mma so bere a wɔadi mfomso no. Hwɛ, nteɛso a ɛfata na mfaso wɔ so yɛ akwan a awofo a wosuro Nyankopɔn fa so tete wɔn mma wɔ “[Yehowa, NW] kasakyerɛ ne nyansakyerɛ mu” no biako. (Efesofo 6:4) Nanso, ɛtɔ mmere bi a awofo a wɔbɔ mmɔden kɛse no mpo betumi ayɛ ade atra so, anaa wɔapere wɔn ho anya adwene a ɛnteɛ. Kae asɛm bi a esii bere a na Yesu yɛ abofra no. Saa bere no na wonhu Yesu. Ɛkɔbae sɛ na ɔwɔ Onyankopɔn asɔrefie rebɔ Bible mu nkɔmmɔ. Ɛno mpo bere a n’awofo kohuu no no, ne maame bisaa no sɛ: “Ɔba, adɛn na woayɛ yɛn sɛɛ yi? Hwɛ, me ne w’agya de ahoyeraw ahwehwɛ wo.”—Luka 2:48.

Esiane sɛ na Yesu yɛ pɛ nti na ɛnsɛ sɛ wosuro sɛ ɔde ne ho bɛhyɛ mmofrabɔnesɛm mu. Nanso te sɛ awofo a wɔwɔ dɔ nyinaa no, ne maame tee nka sɛ ne ba no hwɛ hyɛ ne nsa, na ɔdaa atenka a emu yɛ den adi, a ebia na osuro sɛ ne ba no yiyedi da asiane mu. Saa ara na ɛtɔ mmere bi a w’awofo bɛyɛ ade atra so, a ɛnyɛ adwene no ne sɛ wɔpɛ sɛ wɔhaw wo anaa wodi wo ani, na mmom dwen a wodwen wo ho ara kwa ntia.

Hu nso sɛ yɛwɔ “mmere a emu yɛ den” mu. (2 Timoteo 3:1) Esiane sɛ w’awofo yɛ adwuma san toto nneɛma wɔ fie nti, ɛma wɔn adwennwene kɛse, na eyi betumi aka sɛnea wɔne wo di no. (Fa toto Ɔsɛnkafo 7:7 ho.) Adwene ayaresa ho dwumayɛni bi kae sɛ: “Wɔ mmusua bi mu no, sɛ ɔhaw bi rekɔ so a, awofo bo tumi fuw ma wɔde ahopere sisi gyinae bi, ɛwom mpo sɛ ebia na wɔyɛ nnipa a wobu atɛntrenee de.”

Awofo a wonni ahokafo titiriw na wobetumi de wɔn ahoyeraw akowie wɔn mma so, a nea efi ara ne sɛ wonni hokafo bi a wɔne no besusuw nsɛm ho. Nokwasɛm ne sɛ, sɛ obi wofo bi de n’ahoyeraw bɛsoɛ ne so a, ɛnyɛ anigye. Lucy a wadi mfe 17 no ka sɛ: “Sɛ meyɛ biribi a ɛfata asotwe a, ɛno nko. Nanso sɛ wɔtwe m’aso esiane sɛ me maame ahaw nti a, ɛyɛ asisi ankasa.”

Animhwɛ nso yɛ ade foforo. Ɛwom sɛ ɔwofo taa dɔ ne mma nyinaa de, nanso ɛnyɛ nwonwa sɛ ɔbɛpɛ abofra biako bi asɛm paa.a (Fa toto Genesis 37:3 ho.) Te a wobɛte nka sɛ wɔpɛ mmofra a aka no asɛm sen wo kɛkɛ no mpo yɛ yaw. Nanso sɛ ɛyɛ te sɛ nea wonni w’ahiade ho dwuma anaa wɔtaa de nneɛma a wo nuanom yɛ hyɛ wo a, akyinnye biara nni ho sɛ ɛde abufuw bɛba. Abofra Roxanne ka sɛ: “Mewɔ nuabarima bi a wɔfrɛ no Darren. Ɔyɛ abofra a Maame mfa bɔne nsusuw no koraa. . . . Maame bu me fɔ bere nyinaa, nanso ɔmfa nkɔ Darren so.”

Mmusua a Ɔhaw Wom

Wɔ mmusua a nneɛma kɔ so yiye mu no, wɔntaa mfa asɛm nhyɛ obi. Nanso wɔ mmusua a ɔhaw wom mu no, ebetumi aba sɛ awofo bu wɔn mma fɔ, hyɛ wɔn aniwu, gu wɔn anim ase bere nyinaa. Ɛtɔ mmere bi mpo a nea wɔde ka afobu no ho ne “anobow nyinaa ne bobɔne ne abufuw ne ano kurokuro ne abususɛm.”—Efesofo 4:31.

So yebetumi aka sɛ abufuw a ɔwofo de yɛ n’ade saa no fi abofra no? Ɛyɛ ampa sɛ ɔbabarima anaa ɔbabea soɔdenfo betumi ahyɛ ɔwofo bi “awerɛhow.” (Mmebusɛm 17:25) Nanso, awofo na Bible ka kyerɛ wɔn sɛ: “Munnyi mo mma abufuw [nea ɛkyerɛ ankasa ne, “munnhuruw wɔn bo”].” (Efesofo 6:4) Sɛnea ɛte wɔ Kristofo nyinaa fam no, ɛsɛ sɛ ɔwofo nya ahosodi, ‘hyɛ ne ho so wɔ bɔne ho.’ (2 Timoteo 2:24) Enti sɛ ɔwofo anni ne ho so a, ontumi mfa nhyɛ ne ba sintɔ ahorow.

Atɛnnidi betumi ayɛ adanse a ɛkyerɛ sɛ ɔwofo bi ahaw, ɔwɔ adwenemhaw, anaa n’abam abu. Etumi kyerɛ nso sɛ ɔhaw ahorow bi te sɛ aware a ayɛ basaa anaa sadweamyɛ wɔ hɔ. Sɛnea nhoma bi kyerɛ no, wɔtaa de nsɛm hyɛ awofo a subammɔne bi aka wɔn hɔ no mma. “Nea wɔbɛyɛ biara nye. Wotumi frɛ wɔn ‘ɔkwasea,’ ‘abofra bɔne,’ ‘pɛsɛmenkominya,’ ne nea ɛkeka ho. Afei abusua no mufo de wɔn ani si saa abofra (anaa mmofra) no so sɛ ‘ɔhaw’ no fibea, na wɔn adwene fi sɛnea wɔn ankasa ayɛ basaa ne ɔhaw a wohyia no so.”

Sɛnea Wubedi Asɛm a Wɔde Hyɛ Wo Ho Dwuma

Ɔbenfo Kathleen McCoy ka sɛ: “Abɔ-din-akeka, animtiaabu ne abofra nipasu a wɔkasa tia . . . betumi anya abofra a onnii mfe aduonu so nkɛntɛnso ma n’abam abu, wanya adwenemhaw, na watew ne ho afi afoforo ho.” Anaasɛ sɛnea Bible ankasa ka no no, atirimɔdenne betumi ‘ahyɛ’ mmofra “abufuw” na ama wɔn ‘koma atu.’ (Kolosefo 3:21) Ebetumi ama woafi ase asusuw wo ho sɛ mfaso biara nni wo so. Wubetumi nso anya w’awofo ho adwemmɔne. Wubetumi anya adwene sɛ biribiara nni hɔ a woyɛ a ɛbɛsɔ wɔn ani, ma enti ɛho nhia sɛ wohaw wo ho. Abufuw ne menasepɔw betumi de ne ho agye mu, na ama woapo nteɛso nyinaa—afotu pa mpo.—Fa toto Mmebusɛm 5:12 ho.

Wobɛyɛ dɛn atumi adi ho dwuma? Fã kɛse no ara begyina wo nsɛm tebea pɔtee bi so. Adɛn nti na wunnyina nsusuw ho yiye? Sɛ nhwɛso no, ɛyɛ nokware ankasa sɛ wɔde asɛm to wo so bere nyinaa? Anaasɛ ebetumi aba sɛ w’awofo na ɛtɔ da bi a wɔn kasatia boro so kakra, na wɔka nsɛm a ɛnsɛ sɛ wɔka? Bible ka sɛ “yɛn nyinaa fom nneɛma pii mu,” na awofo nso ka ho. (Yakobo 3:2) Enti sɛ w’awofo yɛ ade tra so kakra wɔ bere ne bere mu mpo a, so ɛsɛ sɛ wo nso woyɛ ade tra so? Yebetumi de Bible afotu a ɛwɔ Kolosefo 3:13 no adi dwuma wɔ ha: “Sɛ obi ne obi nya asɛm bi a, munhuhu mma mo ho na momfa nkyekyɛ mo ho; sɛnea [Yehowa, NW] de akyɛ mo no, sɛnea mo nso monyɛ ne no.”

Tema a wubenya ama w’awofo no betumi aboa wo ma woayɛ saa. Mmebusɛm 19:11 se: “Onipa nimdeɛ twentwɛn n’abufuw ase, na mfomso ho twa yɛ no anuonyam.” Sɛ ɛtaa ba sɛ wo papa bo fuw ntɛmntɛm bere a wafi adwuma aba fie no, na sɛ ɔde biribi a wonyɛe hyɛ wo a, so ɛho hia sɛ woma ɛdan asɛnkɛse? Hu a wubehu sɛ gyama nneɛma ahyɛ ne so na wabrɛ kɛkɛ no mpo betumi aboa wo ma ‘woatwa ne mfomso ho.’

Nanso, sɛ asɛm a wɔde hyɛ wo no nyɛ bere ne bere mu haw bi kɛkɛ, na mmom ɛyɛ ade a ɛkɔ so daa a ennyae da nso ɛ? Asɛm bi a ɛbɛba akyiri yi bɛkyerɛ akwan a wobɛfa so ayɛ wo tebea no ho biribi.

[Ase hɔ asɛm]

[Kratafa 27 mfonini]

Ɛnyɛ mfomso sɛ ɔwofo de afotu a ɛde nteɛso ma bɛma bere a ɛho hia