Migyae Amammuisɛm Bɛyɛ Kristoni a Onni Ɔfã Biara

SƐNEA LADISLAV ŠMEJKAL KA KYERƐE

Wobuu me atɛn akyi no, wɔsan de me kɔtoo afiase dan a na meda mu no mu. Ntɛm ara na mifii ase miamiaa Morse code, (adwinnade bi a wɔnam so de nsɛm mena obi) a ɛbɔ dan no ho so ne adamfo bi a ɔwɔ abansoro dan a ɛto me de no so abien kasae. Na ɔretwɛn ahu atemmu ko a wɔde ama me.

Mekae sɛ: “Mfe dunnan.”

Na onnye nni. Enti obisae sɛ: “Asram dunnan?”

Mibuae sɛ, “Dabi. Mfe dunnan.”

NA AFE no yɛ 1953. Beae no—Liberec, Czechoslovakia (seesei Czech Republic). Na madi mfe 19 saa bere no, na mepɛe sɛ meyɛ amammuisɛm nsakrae. Ná yɛn a yedi akoten wɔ amammuisɛm mu no trɛw yɛn nsusuwii mu denam nkratawa a na ɛkasa tia Komunis Amanyɔ Kuw a na edi tumi saa bere no a yɛkyekyɛe so. Na wobu yɛn dwumadi no sɛ etutu ɔman ase—enti na wɔde me too afiase bere tenten no.

Na madi kan ada afiase afe biako dedaw ansa na wɔrebu me atɛn. Ná wɔde nneduafo baanu to afiase dan biako mu, na wɔkyekyere wɔn ani bisabisa wɔn nsɛm wɔ bere ne bere mu. Na wɔmma yɛn kwan mma yɛnkasa wɔ afiase hɔ, enti na yɛkasa brɛoo anaa na yemiamia Morse code no so ne yɛn ho di nkitaho.

Ankyɛ na mihui sɛ wɔn a wogu afiase no mu pii yɛ Yehowa Adansefo. Na ɛyɛ amammerɛ a ɛda hɔ wɔ afiase hɔ sɛ wɔbɛsesa nneduafo no wɔ ɔsram biako anaa abien mu. Esiane sɛ na m’ani gye Bible no ho nti, m’ani gyei sɛ awiei koraa no wɔde me kɔtoo afiase dan bi a na Ɔdansefo wɔ mu mu. Bere bi akyi no, mifii ase ne Adansefo no suaa Bible no.

Ɛwom sɛ na Bible anaa nhoma a wɔde sua Bible biara nni hɔ de, nanso migye di sɛ obi betumi afa yɛn nkɔmmɔbɔ no sɛ na ɛyɛ Bible adesua. Nokwarem no, na minhuu Bible da wɔ m’asetra mu. Nanso na yetumi kasa—na Ɔdansefo no kyerɛkyerɛ nsɛm bi a wasua afi Bible mu agu ne tirim mu—na na mekyerɛw nea ɔka no. Na yɛyɛ eyinom nyinaa bere a yɛtra bɛn ho na yɛbɔ nkɔmmɔ brɛoo no.

Nneɛma a na wɔde brɛ yɛn ara ne krataa a yɛde kɔ tiafi ne afẽ. Na mede afẽ no kyerɛw nsɛm gu tiafi krataa no so. Misuaa kyerɛw nsɛm a yɛbɔɔ ho nkɔmmɔ no pii guu me tirim. Adansefo a wɔne me suaa ade no nso kyerɛɛ me Ahenni nnwom. Ɔdansefo biako ka kyerɛɛ me sɛ: “Seesei wowɔ afiase sɛ amammui ho nsɛmmɔnedifo, nanso daakye wɔde wo bɛto afiase sɛ Yehowa Adansefo no mu biako.”

Awiei koraa, bere a wobisabisaa me nsɛm pii akyi no, wobuu me atɛn na wɔde me kɔtoo adwumayɛban a ɛbɛn Jáchymov kurow mu no mu. Saa bere no, na manya gyidi sɛ da koro mɛyɛ Yehowa Adansefo no mu biako.

Wɔde Me Too Afiase Mfe Pii

Bere a miduu adwumayɛban no mu baabi a wotu uranium no, mifii ase hwehwɛɛ Adansefo no ntɛm ara. Nanso ankyɛ na metee sɛ wɔde wɔn kɔ baabi foforo. Nanso wogyaw Ɔdansefo biako wɔ hɔ, esiane sɛ na ɔyɛ oduannoafo nti. Ɔde Bible dedaw bi a na wɔde asie mmeae ahorow fɛm me. Enti mitumi kenkan kyerɛw nsɛm a na minim dedaw wɔ me tirim no. Bere a mekenkan no, na meka no me tirim sɛ, ‘Ampa, ɛte saa pɛpɛɛpɛ sɛnea anuanom no kyerɛkyerɛɛ me no.’

Bɛyɛ ɔsram akyi no, wɔde me kɔɔ nsraban bi a wɔfrɛ no Bytiz, a ɛbɛn Příbram kurow no mu. Mihyiaa Adansefo foforo wɔ hɔ. Wɔ Bytiz no, na yɛn nsa ka Bible ho nhoma ahorow a wɔde fa sum ase ba daa. Ɛwom sɛ na nsraban no so ahwɛfo bɔ mmɔden sɛ wobehu ɔkwan a yɛn nsa nam so ka nhoma no de, nanso wɔanhu da. Na yɛwɔ nneduafo bɛyɛ 14 a wɔyɛ nnam a wodi afoforo adanse. Na eyinom mu fã yɛ Adansefo a wɔabɔ wɔn asu, na na ɔfã a aka no nso te sɛ me ara, nkurɔfo a na wɔabenya gyidi te sɛ Adansefo no bere a na wɔwɔ afiase.

Na yɛn mu dodow no ara pɛ sɛ yɛde nsu mu asubɔ yɛ yɛn ahosohyira ho sɛnkyerɛnne ma Onyankopɔn. Nanso esiane sɛ na nsu ho ayɛ den—anaa sɛ mɛka paa a, esiane sɛ na yenni ade kɛse a yebetumi asaw nsu pii agu mu nti, na ɛyɛ den ma yɛn sɛ yɛbɛbɔ asu. Ne saa nti, na ɛsɛ sɛ nnipa pii a wɔwɔ hɔ saa bere no twɛn kosi sɛ wobeyi wɔn ansa na wɔabɔ asu. Nanso wɔ Bytiz nsraban mu no, na abantenten ahorow bi wɔ hɔ a wɔde dwudwo mframa a wɔtwe kɔ baabi a wotu fagude. Wɔ 1950 mfinimfini mu no, wɔbɔɔ yɛn mu pii asu wɔ abantenten ahorow yi biako a nsu wɔ mu mu.

Mfe kakraa bi akyi wɔ March 1960 mu no, polisi panyin bi a na ɔhwɛ amammui mu nsɛmmɔnedifo so no samanaa me. Ɔkae sɛ sɛ mɛkeka nneduafo no ho nsɛm akyerɛ no a, ɔbɛyɛ nhyehyɛe ma wɔatew mmere dodow a medi wɔ afiase no so. Bere a mampene so sɛ mɛyɛ saa no, ofii ase teɛteɛɛm yeyaw me. Ɔteɛɛm sɛ, “Woapo hokwan a wode benya ahofadi. Mɛhwɛ sɛ worensan nkɔ fie da! Wobewu wɔ ha.” Asram abien akyi no, wɔkyerɛw krataa a wɔde rema me ahofadi, na mfe awotwe a medaa afiase akyi no, mesan kɔɔ fie.

Bere Tiaa Mu Ahofadi

Ná wɔabara Yehowa Adansefo dwumadi no wɔ Czechoslovakia fi April 1949 mu tɔnn, enti ntɛm ara na mihui sɛ, sɛ wobɛsom Nyankopɔn wɔ nea wobu no sɛ ahofadi mu no te sɛ nea woresom no wɔ afiase. Bere a woyii me akyi no, mihyiaa ɔhaw foforo. Na wɔahyɛ sɛ ɔbarima biara a ɔwɔ ɔman no mu bɛkɔ sraadi mfe abien.

Woyii mmarima binom a na wɔne Ɔman no nnwumakuw yɛ adwuma no fii sraadi mu. Sɛ nhwɛso no, wɔn a na wɔyɛ adwuma wɔ baabi a wotu amã no nyaa ahofadi a ɛte saa. Esiane sɛ na mayɛ nkurontu adwuma pɛn nti, minyaa adwuma wɔ beae a wotu amã no. Ɛhɔ no wogyee me fɛw so. Wɔka kyerɛɛ me sɛ, “Mma sraadi ho asɛm no nnhaw wo. Ɛrenyɛ den mma yɛn sɛ yebeyi wo afi sraadi mu.”

Asram abien akyi, bere a me nsa kaa krataa sɛ menkɔ sraadi no, wɔn a wɔyɛ adwuma wɔ baabi a wodi nkrataasɛm ho dwuma no san maa me awerɛhyem sɛ: “Mma no nnhaw wo, ebia ɛno bɛyɛ mfomso. Yɛbɛkyerɛw asraafo no, na wɔbɛte biribiara ase.” Nanso amma saa. Bere bi akyi no, adwuma no mu panyin biako baa me nkyɛn bɛpaa me kyɛw sɛ: “Eyi ne nea edi kan a ebi asi, nanso ɛsɛ sɛ wokɔ sraadi no.” Bere a mifi ahonim mu kae sɛ merenkɔ ɔko no, mamfa me ho anhyɛ sraadi no mu, enti wɔkyeree me de me kɔɔ asraafo atrae a na ɛbɛn hɔ no.—Yesaia 2:4.

Wɔde Me Kɔ Asɛnnibea

Bere a wɔde me too afiase wɔ Kladno wɔ January 1961 mu no, wɔbɔɔ mmɔden sɛ wɔbɛma mayɛ ɔsraani. Ɔsraani panyin bi a na ɔwɔ hɔ no yɛɛ nhyiam bi ho nhyehyɛe. Wɔde me kɔɔ dan a wohyia mu a ɔpon kɛse kurukuruwa bi si mu, a nkogua a wotumi gye da mu atwa ho ahyia mu. Ankyɛ na mpanyimfo no fii ase bae bɛtraa ase twaa ɔpon no ho hyiae. Nea ɔhwɛ nhyiam no so no daa wɔn a wɔahyiam no adi kyerɛɛ me mmiako mmiako. Afei ɔtraa ase kae sɛ: “Seesei ka wo gyidi no ho asɛm kyerɛ yɛn.”

Bere a mebɔɔ mpae wɔ me tirim ntɛm ara akyi no, mifii ase kasa kyerɛɛ atiefo a na wɔawɛn wɔn aso no. Ankyɛ na nkɔmmɔbɔ no danee adannandi, na wogye toom sɛ adannandi yɛ nyansahu mu nokwasɛm. Wɔ adwumayɛban a na mewɔ mu kan no mu no, na masua nhomawa bi a ɛne Evolution Versus the New World.a Enti nea ɛyɛɛ asraafo mpanyimfo no nwonwa no, mitumi de adanse a ɛkyerɛ sɛ adannandi yɛ nkyerɛkyerɛ a enni nnyinaso mae.

Afei ɔpanyin biako a ɛda adi sɛ ɔwɔ Katolek som ho gyidi no kasae. Obisae sɛ: “Mubu Ɔbaabun Maria dɛn? Na su bɛn na mukura wɔ Mass kronkron no ho?” Mibuaa n’asɛmmisa no, na afei mekae sɛ: “Owura, mahu sɛ woyɛ obi a ɔwɔ nyamesom ho gyidi, efisɛ wo nsɛmmisa no yɛ soronko wɔ afoforo no de ho.”

Ɔkaa no denneennen sɛ: “Dabi! Dabi! Dabi! Menyɛ gyidini!” Wɔ Kɔmunis Man mu no, na wommu wɔn a wɔka sɛ wɔyɛ Kristofo no koraa anaasɛ na wɔmma wɔn asɛyɛde. Enti wɔ n’asɛmmisa ne me mmuae no akyi no, ɔpanyin no amfa ne ho anhyɛ nkɔmmɔbɔ no mu bio. M’ani gyei kɛse sɛ minyaa hokwan kyerɛkyerɛɛ Yehowa Adansefo gyidi ahorow mu kyerɛɛ saa mmarima no.

Hokwan Afoforo a Minya De Dii Adanse

Nna kakra akyi no, wɔde me kɔɔ asraafo dan bi mu wɔ Prague na wɔde me too baabi ma asraafo wɛn me. Ɛyɛɛ ɔsraani a odii kan wɛn me no nwonwa bere a wɔyɛɛ nhyehyɛe titiriw de bɔɔ me ho ban no. Ɔka kyerɛɛ me sɛ: “Eyi ne bere a edi kan a yɛn ankasa awɛn obi.” Enti mekyerɛkyerɛɛ nea enti a wɔde me ato afiase no mu. Eyi maa n’ani gyei araa ma ɔtraa ase—a ne tuo hyɛ ne nkotodwe abien ntam—na otiei. Nnɔnhwerew abien akyi no, ɔsraani foforo bɛsesaa no, na obisaa asɛm a ɛte saa ara, na Bible mu nkɔmmɔbɔ dii akyi.

Wɔ nna a edi hɔ no mu no, minyaa hokwan kasa kyerɛɛ wɔn a wɔwɛn me ne nneduafo afoforo bere a awɛnfo no ma me kwan no. Na awɛnfo no mpo bue nneduafo no ma wɔboa wɔn ho ano tie Bible mu nkɔmmɔbɔ! Bere bi akyi no, misusuwii sɛ ahofadi a awɛnfo no ma minya ne nneduafo afoforo kasa no bɛda adi na akɔfa asɛm aba. Nanso wɔamma obiara ante ho asɛm da.

Awiei koraa no, bere a wɔde me kɔɔ asɛnnibea sɛ wommu me atɛn no, wɔn a maka me gyidi ho asɛm akyerɛ wɔn no hyɛɛ me nkuran. Wɔmaa me mfe abien de kaa mfe asia a wodii kan de maa me a mannya ansom esiane krataa a na wɔakyerɛw de ama me ahofadi nti no ho. Eyi kyerɛ sɛ na mewɔ bɛyɛ mfe awotwe da m’anim a mede bɛda afiase.

Minyaa Onyankopɔn Mmoa

Mpɛn pii no metee nka sɛ Onyankopɔn boaa me bere a wɔde me fi nsraban biako mu kɔ foforo mu na wɔde me fi afiase biako kɔ foforo mu wɔ Czechoslovakia no. Bere a miduu afiase a ɛwɔ Valdice no, ɔpanyin a ɔwɔ hɔ no bisaa me nea enti a mewɔ hɔ. Mibuae sɛ, “Mankɔ sraadi. Ɛne me gyidi bɔ abira sɛ mede me ho bɛhyɛ akodi mu.”

Ofi ayamye mu kae sɛ, “Sɛ nnipa nyinaa wɔ suban a ɛte saa a anka ɛbɛyɛ anigye.” Nanso bere a osusuw ho kakra no, ɔkae sɛ: “Nanso esiane sɛ nnipa dodow no ara nte nka saa nti, ɛsɛ sɛ yɛtwe w’aso—na yɛbɛtwe w’aso denneennen!”

Wɔde me kɔtoo baabi a wotwa ahwehwɛ, a na ɛyɛ asotwe beae. Hwɛ, ɛwom sɛ wobuu me atɛn esiane sɛ mepoo sraadi sɛ Yehowa Adansefo no mu biako nti, nanso wobuu me sɛ amammui mu nsɛmmɔnedifo, enti wɔmaa me adwuma a ɛyɛ den. Ahwehwɛ a wotwa ma wɔn a wɔyɛ dan mu nkanea ne ahwehwɛ ho nneɛma afoforo a ɛyɛ fɛ no yɛ adwumaden ankasa efisɛ ɛnsɛ sɛ wɔma mfomso bi ba saa nneɛma no ho. Mpɛn pii no, sɛ nneduafo no de wɔn nnwuma a wɔawie no kɔma a, na wɔde mu fã san ba da a edi hɔ no sɛ wɔnyɛ no yiye. Enti na ɛyɛ den yiye sɛ wubetumi adu dodow a wɔhwehwɛ no ho.

Da a edi kan a mekɔɔ baabi a wotwa ahwehwɛ no, na ɛsɛ sɛ metwɛn ɔpanyin a ɔhwɛ hɔ no. Bere a ɔbae no, ofii ase kekaa mu guu nneduafo no so, a na osusuw sɛ ebinom nyɛ adwumaden sɛnea ɛfata. Otwaam baa me nkyɛn na ɔkae sɛ: “Na wo nso ɛ? Dɛn nti na wonyɛ adwuma?”

Mekyerɛɛ mu sɛ meyɛ ɔdeduani foforo. Ɔde me kɔɔ n’adwumayɛbea kobisaa me nsɛm koro no ara, nea enti a wɔde me ato afiase. Bere a mekyerɛkyerɛɛ me tebea no mu kyerɛɛ no no, ɔkae sɛ: “Enti woyɛ Yehowa Adansefo no mu biako?”

Mibuae sɛ, “Yiw.”

Ne su sakrae. Ɔkae sɛ, “Ɛnyɛ hwee. Yɛanya Yehowa Adansefo pii wɔ ha pɛn. Yebu wɔn nyinaa, efisɛ wɔyɛ nkurɔfo a wɔn ho twa na wɔpɛ adwumaden. Mɛhwɛ sɛ mɛma wo dodow a wubetumi adu ho.”

Sɛnea nea ɔhwɛ adwuma no so su sakrae no yɛɛ me nwonwa ankasa. Medaa Yehowa ne mfɛfo gyidifo a minnim wɔn a wɔmaa Adansefo nyaa din pa wɔ saa afiase hɔ no ase. Nokwarem no, metee ɔdɔ a Yehowa wɔ ma me no nka wɔ bere a mede daa afiase no nyinaa mu.

Ɛmfa ho sɛnea na me tebea no mu yɛ den fa no, na mete nka bere nyinaa sɛ awiei koraa no, mehu me nuanom Kristofo. Afei mehu wɔn anim sereserew no na manya wɔn nkuranhyɛ. Sɛ ɛnyɛ wɔn a anka ɛbɛyɛ den sɛ metumi agyina mu wɔ m’afiasenna no mu.

Nneduafo pii fam no, nea na wɔte nka ara ne sɛ wobetua nneyɛe bɔne a wɔde ayɛ wɔn no so ka. Nanso mante nka saa da. Na minim sɛ osetie ma Onyankopɔn trenee nnyinasosɛm nti na merehu amane. Enti na minim sɛ da koro biara a midi wɔ afiase no, Yehowa betumi ama me nna a enni ano a ɛyɛ anigye wɔ asetra mu wɔ ne Paradise asase foforo no mu.—Dwom 37:29; 2 Petro 3:13; Adiyisɛm 21:3, 4.

Anisɔ a Mewɔ Ma Nnɛyi Nhyira Horow

Awiei koraa, bere a na mada afiase bɛboro mfe 15 akyi no, woyii me wɔ May 1968 mu. Nea edi kan no, na metwentwɛn me nan ase sɛ me ne nkurɔfo bɛkasa, biribi a na wɔtaa hu wɔ wɔn a wɔde wɔn asetra mu fã kɛse no ara ne nkurɔfo a wɔhyɛ afiase ntade anaa wɔn a wɔhwɛ afiase abɔ no ho. Nanso ankyɛ na me nuanom Kristofo boaa me ma mede me ho hyɛɛ asɛnka mu, a na wɔda so ara yɛ, bere a na wɔabara yɛn mpo no.

Woyii me akyi adapɛn kakraa bi no, mihyiaa Eva. Ɛmfa ho abusua mu ɔsɔretia a emu yɛ den no, na ɔne ne nua barima de akokoduru agyina Bible mu nokware no afã bɛyɛ mfe abiɛsa a na atwam no mu. Ankyɛ na yɛboom yɛɛ asɛnka adwuma. Yɛyɛɛ adwuma nso wɔ beae a wotintim yɛn Bible ho nhoma. Na wɔyɛ eyi wɔ sum ase tintimmea. Afei wɔ November 1969 mu no, yɛwaree.

Yɛwoo yɛn abakan Jana wɔ 1970 mu. Bere kɔɔ so no, mifii ase som Yehowa Adansefo asafo ahorow no sɛ ɔhwɛfo kwantufo wɔ dapɛn awiei, ná mesrasra wɔn hyɛ wɔn nkuran wɔ honhom fam. Bere a mereyɛ saa adwuma yi wɔ 1975 mu no, wɔkyeree me de me kɔtoo afiase bio. Nanso saa bere yi de midii asram kakraa bi pɛ. Afei wɔ 1977 mu no, yɛwoo yɛn babarima Štěpán.

Awiei koraa, wɔ September 1, 1993 mu no, Czech Republic gyee Yehowa Adansefo toom wɔ mmara mu. Afe a edi hɔ no, yɛn babea, Jana, waree Dalibor Dražan, a ɔyɛ Kristoni ɔpanyin. Afei wɔ 1999 mu no, yɛn babarima Štěpán, a ɔyɛ asafo mu somfo no, waree Blanka, a ɔyɛ bere nyinaa som adwuma no. Seesei yɛn nyinaa yɛ Prague asafo no mufo. Yɛn nyinaa hwɛ bere a wiase foforo no bɛba kwan—ne titiriw no m’ani gyina bere a afiase afasu nni baabiara bio no.

[Ase hɔ asɛm]

[Mfonini ahorow wɔ kratafa 28]

Na mede afẽ hyɛ Bible kyerɛw nsɛm nsow

[Mfonini wɔ kratafa 29]

Bytiz nsraban no, baabi a wɔde me too afiase na akyiri yi wɔbɔɔ me asu no

[Mfonini wɔ kratafa 31]

Yɛn ayeforohyia da

[Mfonini wɔ kratafa 31]

Me ne Eva, a Štěpán ne Blanka wɔ yɛn benkum so, na Jana ne Dalibor wɔ yɛn nifa so