“Mintumi Nyɛ Komm”

 1. Dɛn nti na Yeremia ne Yehowa adiyifo a wɔaka no anyɛ komm?

“MUNTIE Yehowa asɛm.” Efi afe 647 A.Y.B. mu na wɔtee saa asɛm yi wɔ Yerusalem akwan ne mmɔnten so. Onyankopɔn diyifo no annyae saa asɛm no ka. Bere a wɔsɛee kurow no mfe 40 akyi mpo no, ɔkɔɔ so de saa afotu no mae. (Yer. 2:4; 42:15) Ade nyinaa so Tumfoɔ Nyankopɔn no somaa adiyifo sɛnea ɛbɛyɛ a Yudafo no bɛte n’afotu na wɔasakra wɔn adwene. Sɛnea yɛadi kan ahu wɔ nhoma yi mu no, na Yeremia da nsow wɔ wɔn a na wɔkasa ma Onyankopɔn no mu. Bere a Onyankopɔn de adwuma rehyɛ Yeremia nsa no, ɔka kyerɛɛ no sɛ: “Sɔre ka nea mɛhyɛ wo nyinaa kyerɛ wɔn. Mmɔ hu wɔn anim.” (Yer. 1:17) Ná adwuma no yɛ den. Yeremia huu amane wɔ ne were mu, na odii yaw, nanso sɔhwɛ ahorow a ɛte saa a ohyiae nyinaa akyi no, biribi kanyan no ma ɔyɛɛ n’adwuma no. Yeremia kae sɛ: “Me koma repere wɔ me mu. Mintumi nyɛ komm.”—Yer. 4:19.

2, 3. (a) Ɔkwan bɛn so na Yesu asuafo no suasuaa Yeremia? (b) Dɛn nti na ɛsɛ sɛ wusuasua nhwɛso a Yeremia yɛe no?

² Sɛnea Yeremia yɛɛ ne nkɔmhyɛ adwuma no yɛɛ nhwɛso maa Yehowa asomfo a na wɔbɛba akyiri yi no. (Yak. 5:10) Wɔ Pentekoste afe 33 Y.B. mu akyi bere tiaa bi no, Yudafo mpanyimfo no kyeree ɔsomafo Petro ne ɔsomafo Yohane, na wɔhyɛɛ wɔn sɛ wonnyae asɛmpa no ka. Ɛda adi sɛ woakenkan mmuae a asomafo no de maa wɔn no. Wɔkae sɛ: “Nea yɛate na yɛahu no, yɛrentumi nnyae ho asɛm ka.” (Aso. 4:19, 20) Mpanyimfo no hunahunaa Petro ne Yohane sɛ sɛ wɔn nsa ka wɔn bere foforo a wɔne wɔn bedi no nwenenweneenwene, na ɛno akyi no, wogyaa wɔn. Wunim yiye sɛ na saa mmarima anokwafo no rentumi nnyae asɛmpa no ka, na wɔannyae nso.

³ So wutumi hu sɛ akokoduru a Petro ne Yohane de kasae a wɔayɛ ho kyerɛwtohɔ wɔ Asomafo Nnwuma 4:20 no te sɛ Yeremia de no? Sɛ́ Yehowa Nyankopɔn somfo a wote nna a edi akyiri a emu yɛ den yi mu no, ɛda adi sɛ wo nso woaka wɔ wo komam sɛ, “Mintumi nyɛ komm!” Momma yɛnhwɛ sɛnea yɛn nso yebetumi akɔ so ada akokoduru adi te sɛ Yeremia, na yɛakɔ so aka asɛmpa no ɛmfa ho sɛ tebea ahorow a atwa yɛn ho ahyia rekɔ so sɛe no.

 4. Su bɛn na na nkurɔfo taa da no adi wɔ tete Yerusalem?

⁴ So wunnye nni sɛ daakye a ɛyɛ anigye a Onyankopɔn ahyɛ bɔ sɛ ɛbɛba wɔ ne Ba no nniso ase no ne asɛmpa a eye sen biara a ɛsɛ sɛ nnipa te? Nanso ɛnnɛ, nnipa pii keka nsɛm te sɛ nea Yudafo binom yɛe bere bi no. Wɔka kyerɛɛ Yeremia sɛ: “Asɛm a woaka akyerɛ yɛn Yehowa din mu no, yɛrentie wo.” (Yer. 29:19; 44:16) Yeremia tee nsɛm a ɛte saa mpɛn pii. Saa ara na Yehowa asomfo te nsɛm a ɛte saa nnɛ, efisɛ nnipa pii ka sɛ, “M’ani nnye ho.” Asɛm no a nkurɔfo nkyerɛ ho anigye wɔ mmeae pii no betumi ama Ahenni adawurubɔfo no abam abu. Sɛ nnipa a wɔwɔ w’asasesin mu nkyerɛ asɛm no ho anigye ma enti ama ebinom a wɔwɔ w’asafo mu anaa w’ankasa mpo abam abu a, dɛn na wubetumi ayɛ?

 5. (a) Yeremia yɛɛ n’ade dɛn wɔ asɛm no a na nkurɔfo nkyerɛ ho anigye no ho? (b) Dɛn nti na wɔn a wɔnkyerɛ asɛmpa no ho anigye no nkwa da asiane kɛse mu?

⁵ Wo de, susuw adwene a Yeremia nyae bere a na Yudafo dodow no ara ntie no no ho hwɛ. Wɔ Yeremia adwuma no mfiase no, Yehowa ma ohuu Onyankopɔn atemmu a na ɛreba no ho biribi. (Monkenkan Yeremia 4:23-26.) Ɛno maa odiyifo no tumi hui sɛ na nnipa mpempem pii nkwa gyina tie a na wobetie asɛm a ɔbɛka akyerɛ wɔn na wɔayɛ ho biribi no so. Ɛnnɛ, nkurɔfo nkwa da asiane a ɛte saa ara mu, na wɔn a wɔwɔ w’asasesin mu nso ka ho. Yesu kaa “saa da” a ɛyɛ Onyankopɔn atemmu da a ɛreba wiase bɔne a ɛwɔ hɔ nnɛ so no ho asɛm sɛ: “Ɛbɛba wɔn a wɔtete asase so baabiara no nyinaa so. Enti, monkɔ so nwɛn, na monsrɛ bere nyinaa na moatumi aguan nneɛma a etwa sɛ esisi yi nyinaa, na moatumi agyina onipa Ba no anim.” (Luka 21:34-36) Wubetumi agyina asɛm a Yesu kae yi so ahu sɛ wɔn a wontie asɛmpa no nkwa da asiane kɛse mu.

 6. Dɛn nti na ɛsɛ sɛ wokɔ so ka asɛmpa no kyerɛ wɔn a wɔnkyerɛ asɛm no ho anigye papa no mpo?

⁶ Nanso, wɔn a wɔsakra wɔn adwene na wotie Yehowa asɛm a yɛka no na wɔyɛ ho biribi no benya akatua a ɛso bi nni. Onyankopɔn abue kwan ato hɔ ama yɛn a yebetumi afa so anya yɛn ti adidi mu na yɛakɔ wiase foforo a ɔde reba no mu. Wɔ akwan bi so no, saa na na ɔsom adwuma a Yeremia yɛe no nso te. Ná wɔn a wɔte Yuda no betumi anya wɔn ti adidi mu. (Monkenkan Yeremia 26:2, 3.) Yeremia de mfe pii boaa nkurɔfo no, na ɔka kyerɛɛ wɔn sɛ ‘wontie na wɔnsan wɔn akyi,’ wontie nokware Nyankopɔn no asɛm. Yennim nnipa dodow a asɛm a odiyifo no kae no ma wonuu wɔn ho na wɔsesaa wɔn abrabɔ. Nanso, ebinom nuu wɔn ho sesaa wɔn abrabɔ, na saa ara na nnipa pii ayɛ wɔ yɛn bere yi so. Bere a yɛkɔ so ka asɛmpa no, yɛtaa te sɛ nnipa bi a na anka wɔn ani nnye asɛm no ho no retie. (Hwɛ adaka a ɛne, “Nnipa a Wɔn Ani Nnye Asɛm no Ho Betumi Akyerɛ Ho Anigye,” a ɛwɔ kratafa 184 no.) So ɛno nyɛ ade foforo nti a ɛsɛ sɛ yɛkɔ so de nsi yɛ asɛmpaka adwuma a egye nkwa no?

 7. Ɔkwan bɛn na Yeremia atamfo no faa so sɛ wɔbɛsɛe nkɔmhyɛ adwuma a na ɔreyɛ no?

⁷ Ade biako a ɛda nsow wɔ Yeremia som adwuma no ho ne sɛnea wɔn a na wɔsɔre tia no no bɔɔ mmɔden mpɛn pii sɛ wɔbɛsɛe ɔno ne adwuma a na ɔreyɛ no. Atoro adiyifo ne no yiyii nsɛm ano wɔ mmɔnten so. (Yer. 14:13-16) Sɛ na Yeremia nam Yerusalem mmɔnten so a na wɔn a wohu no no teɛteɛm didi no atɛm, na na wodi ne ho fɛw. (Yer. 15:10) Yeremia atamfo binom hwehwɛɛ akwan foforo a wɔbɛfa so agu n’anim ase. (Yer. 18:18) Afoforo nso kekaa Yeremia ho nsɛmmɔne sɛnea ɛbɛyɛ a nnipa a wɔwɔ koma pa no rentie Onyankopɔn asɛm a ɛyɛ nokware a na ɔreka no. (Kwa. 3:61, 62) So Yeremia paa abaw? Dabida, ɔkɔɔ so kaa asɛm no. Dɛn na ɛma otumi kɔɔ so kaa asɛm no?

 8. Bere a wɔn a wɔsɔre tiaa Yeremia no hyɛɛ no so denneennen no, dɛn na ɔyɛe?

⁸ Ade titiriw a ɛboaa Yeremia ma otumi gyinaa ɔsɔretia a wɔde baa no so nyinaa ano ne ne ho a ɔde too Yehowa so no. Onyankopɔn ka kyerɛɛ Yeremia wɔ ne som adwuma no mfiase sɛ ɔbɛwowaw no na wabɔ no ho ban. (Monkenkan Yeremia 1:18, 19.) Yeremia nyaa saa bɔhyɛ no mu gyidi, na Yehowa anni no huammɔ. Bere a wɔn a wɔsɔre tia no no hyɛɛ no na wɔbɔɔ mmɔden sɛ wɔbɛteetee no no, onyaa akokoduru ne boasetɔ. Hyɛ sɛnea saa su ahorow no boaa no kɛse no nsow.

9, 10. Nsɛm bɛn na ɛtoo Yeremia wɔ n’asetena mu a ɛsɛ sɛ ɛhyɛ wo nkuran ma wunya akokoduru?

⁹ Bere bi, asɔfo ne adiyifo a na wɔatew atua no de Yeremia kɔɔ Yuda mpanyimfo no anim sɛnea wɔbɛma wɔakum no. So wɔn ahunahuna no maa Yeremia kaa n’ano toom? Dabi. Ná mmuae a ɔde maa wɔn no tɔ asom paa ma enti wɔankum no.—Monkenkan Yeremia 26:11-16; Luka 21:12-15.

¹⁰ Kae sɛ bere a asɔrefie hɔ panyin bi a wɔfrɛ no Pasur tiee odiyifo no asɛm a ɛtɔ asom no wiei no, ɔde odiyifo no bɔɔ dua mu. Ɛbɛyɛ sɛ Pasur adwene yɛɛ no sɛ Yeremia besua biribi afi dua mu a ɔde no abɔ no mu, na afei ɛbɛma waka n’ano atom. Enti, ade kyee no, Pasur gyaee Yeremia. Nanso, Yeremia a na wɔayɛ no ayayade a akyinnye biara nni ho sɛ ama ne ho yɛ no yaw paa no kasa kyerɛɛ Pasur tẽẽ, na ɔkaa Yehowa atemmu a ɛreba no so no kyerɛɛ no. Ayayade mpo amma Yeremia anka n’ano antom! (Yer. 20:1-6) Dɛn ntia? Yeremia ankasa ka kyerɛ yɛn sɛ: “Yehowa gyina m’akyi sɛ ɔdɔmmarima a ne ho yɛ hu. Ɛno nti na m’ataafo behintiw na wɔrennyina no.” (Yer. 20:11) Bere a Yeremia hyiaa asɔretiafo a wɔn ho yɛ hu mpo no, wammɔ hu. Ná Yehowa mu ahotoso a ɔwɔ no mu yɛ den, na ahotoso a wo nso wowɔ mu betumi ayɛ den saa ara.

11, 12. (a) Bere a Hanania sɔre tiaa Yeremia no, ɔkwan bɛn so na Yeremia yɛɛ n’ade nyansam? (b) Sɛ ‘wohyɛ wo ho so wɔ bɔne ho’ a, adepa bɛn na ebetumi afi mu aba?

¹¹ Ɛyɛ papa sɛ yɛbɛma atena yɛn adwenem sɛ na Yeremia nyɛ obi a ɔyɛ katee. Sɛ ohyia wɔn a wɔsɔre tia no no a, na ɔyɛ n’ade nyansam. Ná onim bere a ɛsɛ sɛ ofi beae bi. Sɛ nhwɛso no, susuw ɔne Hanania asɛm no ho hwɛ. Bere a saa odiyifo torofo no kae wɔ baguam sɛ nkɔm a Yehowa maa Yeremia hyɛe no nyɛ nokware no, Yeremia kaa n’anim, na ɔkyerɛɛ nea ɛma wohu sɛ odiyifo bi yɛ ɔnokwafo. Ná Yeremia de kɔndua ato ne kɔn ho de rekyerɛ Babilon kɔndua a wɔreba abɛhyɛ ase no; Hanania bo fuwii, na obubuu kɔndua no mu. Hena na obetumi ahu nea na Hanania bɛsan ayɛ bio? Enti, dɛn na Yeremia yɛe? Yɛkenkan sɛ: ‘Odiyifo no siim kɔɔ ne kwan.’ Yeremia fii hɔ kɔe. Akyiri yi, Yehowa ma ɔsan kɔɔ hɔ kɔkaa nea na Onyankopɔn de reba no kyerɛɛ Hanania—ná Yudafo no bɛyɛ nkoa ama Babilon hene, na na Hanania nso bewu.—Yer. 28:1-17.

¹² Onyankopɔn asɛm yi ma yehu sɛ sɛ yɛwɔ asɛnka mu a, ɛyɛ papa sɛ yɛda akokoduru adi na yɛde nhumu yɛ adwuma. Sɛ obi annye Kyerɛwnsɛm mu nsɛm a yɛne no resusuw ho antom na ne bo fuw, na mpo ɔpɛ sɛ opira yɛn a, yebedi no ni na yɛafi hɔ akɔ ofie foforo mu. Ɛho nhia sɛ yɛne obiara gye akyinnye denneennen wɔ Ahenni no ho asɛmpa a yɛreka no ho. Sɛ ‘yɛhyɛ yɛn ho so wɔ bɔne ho’ a, yebue kwan ma wotumi boa ofiewura no wɔ bere a ɛfata mu.—Monkenkan 2 Timoteo 2:23-25; Mmeb. 17:14.

13. Dɛn nti na Yehowa ka kyerɛɛ Yeremia sɛ: “Nsuro,” na dɛn nti na ɛsɛ sɛ yesusuw saa asɛm yi ho?

¹³ Ahodwiriwde ahorow a ɛkɔɔ so ansa na wɔresɛe Yerusalem wɔ afe 607 A.Y.B. mu no haw asomfo anokwafo no. Enti, wubetumi ahu nea enti a Onyankopɔn ka kyerɛɛ Yeremia sɛ: “Nsuro” no. (Yer. 1:8; Kwa. 3:57) Yehowa maa Yeremia kaa asɛm a ɛhyɛ nkuran saa ara kyerɛɛ Yudafo a wɔaka no. (Monkenkan Yeremia 46:27.) Dɛn na yebetumi asua afi saa asɛm yi mu? Wɔ awiei bere a emu yɛ hu yi mu no, yebetumi abɔ hu bere ne bere mu. Wɔ mmere a ɛte saa mu no, so yebetie Yehowa a ɔreka akyerɛ yɛn sɛ: “Nsuro” no? Wɔ saa nhoma yi mfiase no, yesusuw sɛnea Onyankopɔn boaa Yeremia wɔ bere a na emu yɛ hu ankasa mu no ho. Momma yɛnsan nsusuw nea esii no ho tiawa, sɛnea ɛbɛyɛ a yebehu asuade a ɛwom no.

14, 15. (a) Tebea a ɛyɛ hu bɛn na Yeremia kɔɔ mu? (b) Ɔkwan bɛn so na Yehowa dii ne bɔhyɛ a ɛne sɛ ɔbɛbɔ Yeremia ho ban no so?

¹⁴ Bere a Babilonfo twaa Yerusalem ho hyiae denneennen no, ɔkɔm dee kurow no mufo. Ankyɛ na wɔn mu pii aduan sae. (Yer. 37:21) Ɔkɔm a na ɛde Yeremia nyinaa akyi no, wɔsan de no kɔtoo baabi a anka obetumi awu wɔ hɔ. Ná Yuda mpanyimfo no ahyɛ Ɔhene Sedekia a na ɔyɛ ohufo no ma ɔne wɔn ayɛ adwene. Afei wɔma wɔtow Yeremia too abura bi a emu dɔ mu. Ná nsu nni abura no mu, na atɛkyɛ pii na ɛwom. Bere a Yeremia fii ase sɛ ɔremem wɔ atɛkyɛ no mu no, ohui sɛ na ɔrentumi nnye ne ho wɔ ɔkwan biara so. Sɛ wo na wokɔɔ tebea a ɛte saa mu a, so anka woremmɔ hu?—Yer. 38:4-6.

¹⁵ Ɛwom sɛ na Yeremia yɛ onipa te sɛ yɛn ara de, nanso ɔde ne ho too Yehowa asɛm a ɛne sɛ ɔrennyaw no da no so. (Monkenkan Yeremia 15:20, 21.) So Yehowa tuaa no ka wɔ saa ahotoso a onyae no ho? Yenim paa sɛ otuaa no ka. Onyankopɔn kaa Ebed-Melek koma ma wansuro mpanyimfo no, na okoyii Yeremia. Ɔhene no maa Ebed-Melek kwan ma okoyii odiyifo no fii abura no mu, na ogyee no fii owu a anka ɔrebewu wɔ saa atɛkyɛ a emu dɔ mu no mu.—Yer. 38:7-13.

16. Asiane ahorow bɛn na Yehowa gyee n’anokwafo fii mu?

¹⁶ Bere a woyii Yeremia baa asase kesee so mpo no, na ne nkwa da so ara da asiane mu. Bere a na Ebed-Melek resrɛ ama Yeremia no, ɔka kyerɛɛ ɔhene no sɛ: “Ɔkɔm no nti, obewu wɔ hɔ. Aduan bi nni kurow yi mu bio.” (Yer. 38:9) Ná aduan ho ayɛ nã wɔ Yerusalem araa ma enti na nkurɔfo rewe nnipa nam. Nanso, Yehowa san de ne ho gyee asɛm no mu gyee ne diyifo no. Yehowa nam Yeremia so hyɛɛ Ebed-Melek bɔ sɛ ɔbɛbɔ ne ho ban. (Yer. 39:16-18) Ná Yeremia werɛ mfii awerɛhyem a Onyankopɔn de ama no no. Ná Onyankopɔn aka akyerɛ no sɛ: “Midi w’akyi, na megye wo.” (Yer. 1:8) Esiane sɛ na ade nyinaa so Tumfoɔ Nyankopɔn no rebɔ saa mmarima anokwafo baanu no ho ban nti, na ɔremma wɔn atamfo a wɔyɛ nnipa anaa ɔkɔm renkum wɔn. Wonyaa wɔn ti didii mu wɔ saa kurow a na wɔrebɛsɛe no no mu. Dɛn na yebetumi asua afi saa asɛm yi mu? Ɛne sɛ, Yehowa hyɛɛ bɔ sɛ ɔbɛbɔ wɔn ho ban, na odii ne bɔhyɛ so.—Yer. 40:1-4.

17. Dɛn nti na ɛsɛ sɛ wugye ɛbɔ a Yehowa ahyɛ sɛ ɔbɛbɔ n’asomfo ho ban no di?

¹⁷ Wiase nhyehyɛe no awiei ho nkɔm a Yesu hyɛe no rebam a biribiara rentumi nsiw no kwan. Ɛrenkyɛ, “nsɛnkyerɛnne bɛba owia ne ɔsram ne nsoromma so, na amanaman ho ayeraw wɔn asase so a wɔrenhu nea wɔnyɛ . . . na ehu ne nneɛma a ɛreba asase so no bɛma nnipa atotɔ piti.” (Luka 21:25, 26) Ɛsɛ sɛ yɛtwɛn kosi sɛ yebehu nsɛnkyerɛnne kõ a ɛbɛba ne ehu a ɛbɛma nnipa pii abɔ no. Ɛmfa ho nea ɛbɛba biara no, ɛnsɛ sɛ woma w’adwenem yɛ wo nãã wɔ tumi a Yehowa wɔ a ɔde begye ne nkurɔfo ne ɔpɛ a ɔwɔ sɛ ɔbɛyɛ saa no ho da. Nanso, nea ɛbɛba wɔn a wonni Yehowa anim dom so no bɛyɛ biribi foforo koraa. (Monkenkan Yeremia 8:20; 14:9.) Sɛ ɛba mpo sɛ n’asomfo wɔ tebea bi a anidaso biara nnim mu te sɛ nea wɔde wɔn agu abura bi a emu yɛ tumm na ase yɛ fɔkyee mu a, obetumi agye wɔn! Asɛm a Onyankopɔn ka kyerɛɛ Ebed-Melek no bɛbam wɔ ne nkurɔfo so sɛ: “‘Ofi na mɛma woafi mu, na worentɔ nkrante ano; wubenya wo kra sɛ asade, efisɛ wode wo ho too me so,’ Yehowa asɛm ni.”—Yer. 39:18.

18. (a) Asɛm bɛn na ɛsesaa Yeremia asetena? (b) Wote Onyankopɔn ahyɛde a ɛwɔ Yeremia 1:7 no ase dɛn?

¹⁸ “Obiara a mɛsoma wo ne nkyɛn no, kɔ, na asɛm biara a mɛhyɛ wo no, ka.” (Yer. 1:7) Bere a Yeremia tee saa ahyɛde yi fii Onyankopɔn hɔ no, n’asetena sesae koraa. Efi saa bere no, na ade a ɛho hia no paa ne sɛ ɔbɛka “Yehowa asɛm” no. Saa asɛm no pue mpɛn pii wɔ Yeremia nhoma no mu nyinaa. Yeremia kaa Yerusalem a wɔko fae ne Yuda hene a otwa to a ɔne Sedekia a wɔde no kɔɔ nkoasom mu no ho asɛm wɔ ne nhoma no ti a etwa to no mu. Nokwarem no, Yeremia kɔɔ so kyerɛkyerɛɛ Yudafo no, na otuu wɔn fo sɛ wontie Yehowa kosii sɛ nsɛm a esisii no ma ɛdaa adi sɛ wawie n’adwuma no.

19, 20. (a) Dɛn nti na ɛsɛ sɛ wusuasua sɛnea Yeremia yɛɛ ne som adwuma no? (b) Ɔkwan bɛn so na asɛnka adwuma a yɛyɛ no ma yenya anigye ne abotɔyam? (d) Ɔkwan bɛn so na Yeremia ne Kwadwom nhoma no a yɛasusuw ho no aka wo koma?

¹⁹ Adwuma a wɔde maa Yeremia ne asɛnka adwuma a Yehowa Adansefo yɛ no baguam nnɛ no di nsɛ wɔ nneɛma pii mu. Wo nso woresom nokware Nyankopɔn no wɔ atemmu bere mu te sɛ Yeremia. Asɛyɛde afoforo wɔ hɔ a egye wo bere ne w’ahoɔden; nanso asɛmpaka adwuma no ne adwuma a ɛho hia sen biara a wubetumi ayɛ wɔ wiase nhyehyɛe yi mu. Ɛno so na wonam kamfo Onyankopɔn din kɛse no, na wugye tom koraa sɛ ɔno ne Amansan Hene a ɔwɔ wo so tumi no. (Monkenkan Kwadwom 5:19.) Wosan da ɔdɔ soronko adi nso kyerɛ wo yɔnko nnipa denam boa a woboa afoforo ma wobehu nokware Nyankopɔn no ne nneɛma a ɔhwehwɛ sɛ nnipa yɛ na ama wɔanya nkwa no so.—Yer. 25:3-6.

²⁰ Yeremia kaa adwuma a Yehowa de maa no no ho asɛm sɛ: “W’asɛm bɛyɛɛ ahurusi ne anigye wɔ me koma mu; wo din na ɛda me so, O Yehowa, asafo Nyankopɔn.” (Yer. 15:16) Anigye ne abotɔyam a ɛte saa wɔ hɔ ma wɔn a wɔn koma ka wɔn ma wɔkasa ma nokware Nyankopɔn no nyinaa. Enti, wowɔ nea enti paa a ɛsɛ sɛ wokɔ so ka Yehowa asɛm no sɛnea Yeremia yɛe no.