Nhyehyɛe a Wɔayɛ Ma Yɛde Ayɛ Yehowa Apɛde

WOKƆ wiase baabiara a, wubehu ahyehyɛde ahorow pii. Ebi yɛ nyamesom, amanyɔkuw, aguadi, ne akuw ahorow. Ɛsono botae a esi wɔn mu biara ani so ne sɛnea wɔyɛ wɔn ade. Nanso ahyehyɛde bi wɔ hɔ a ɛno de, ɛyɛ soronko koraa. Onyankopɔn Asɛm ma yehu pefee sɛ saa ahyehyɛde no ne Yehowa Adansefo.

² Anigyesɛm ne sɛ, wo nso woabɛka Yehowa ahyehyɛde no ho. Woabehu Onyankopɔn apɛde, na seesei wode rebɔ wo bra. (Dw. 143:10; Rom. 12:2) Wo ne wo nuanom a wɔwɔ wiase nyinaa a wɔdodɔ wɔn ho na ɛbɔ, na woreyɛ asɛnka adwuma no bi. (2 Kor. 6:4; 1 Pet. 2:17; 5:9) Wei ma w’ani gye na ɛma wunya nhyira pii sɛnea Onyankopɔn Asɛm ahyɛ bɔ no. (Mmeb. 10:22; Mar. 10:30) Sɛ wokɔ so yɛ Yehowa apɛde a, ebesiesie wo ama daakye, na wubenya anigye a ɛtena hɔ daa.—1 Tim. 6:18, 19; 1 Yoh. 2:17.

³ Yɛn Bɔfo Kɛse no wɔ ahyehyɛde soronko bi wɔ wiase nyinaa. Yehowa ankasa na odi so, enti ɛyɛ teokrase ahyehyɛde. Yɛwɔ Yehowa mu ahotoso koraa. Ɔno ne yɛn Temmufo, yɛn Mmarahyɛfo, ne yɛn Hene. (Yes. 33:22) Esiane sɛ ɔyɛ Onyankopɔn a ɔhyehyɛ ne biribiara pɛpɛɛpɛ nti, wayɛ nhyehyɛe a yɛnam so ‘ne no bɛbom ayɛ adwuma’ na ama n’atirimpɔw aba mu.—2 Kor. 6:1, 2.

⁴ Onyankopɔn apaw Kristo Yesu sɛ Ɔhene. Ɔno na ɔkyerɛ yɛn ɔkwan a ɛsɛ sɛ yɛfa so yɛ asɛnka adwuma no wɔ awiei bere yi mu. (Yes. 55:4; Adi. 6:2; 11:15) Yesu ankasa kaa sɛ n’akyidifo bɛyɛ nnwuma akɛse asen nea ɔyɛe bere a na ɔwɔ asase so no. (Yoh. 14:12) Nea Yesu kae no yɛ nokware efisɛ na obenya akyidifo bebree, na na wɔde mfe pii na ɛbɛyɛ adwuma no. Enti na wɔbɛyɛ adwuma no akɔ akyiri asen no, na wɔaka Ahenni no ho asɛmpa akodu asase ano nohoa.—Mat. 24:14; 28:19, 20; Aso. 1:8.

⁵ Yehu sɛ wei aba mu dedaw. Nanso Yesu maa emu daa hɔ sɛ, sɛ bere a Yehowa ahyɛ no so a, asɛnka adwuma no bɛba awiei. Sɛnea nkɔmhyɛ a ɛwɔ Onyankopɔn Asɛm mu kyerɛ no, nneɛma nyinaa di adanse sɛ Yehowa da kɛse a ɛyɛ hu no abɛn.—Yoel 2:31; Sef. 1:14-18; 2:2, 3; 1 Pet. 4:7.

⁶ Yɛahu nea Yehowa pɛ sɛ yɛyɛ wɔ awiei bere yi mu, enti nea Onyankopɔn hwehwɛ fi yɛn hɔ biara, ɛsɛ sɛ yɛyere yɛn ho yɛ. Wei nti ɛsɛ sɛ yehu sɛnea Onyankopɔn ahyehyɛde no yɛ adwuma yiye na yɛne no yɛ baako. Efisɛ biribiara a yɛyɛ wɔ ahyehyɛde no mu no gyina Kyerɛwnsɛm mu nnyinasosɛm so. Ebi yɛ ahyɛde, mmara, ne nkyerɛkyerɛ a ɛwɔ Onyankopɔn Asɛm a ɔma wɔde ne honhom kyerɛwee no mu.—Dw. 19:7-9.

⁷ Sɛ Yehowa asomfo de Bible akwankyerɛ yɛ adwuma a, ɛma asomdwoe ne baakoyɛ tena wɔn ntam. (Dw. 133:1; Yes. 60:17; Rom. 14:19) Dɛn na ɛma yɛne yɛn nuanom a wɔwɔ wiase nyinaa yɛ baako? Ɛyɛ ɔdɔ. Nokwasɛm ne sɛ, ɔdɔ na ɛkanyan yɛn ma yɛyɛ biribiara. (Yoh. 13:34, 35; Kol. 3:14) Ɔdɔ a ɛwɔ yɛn ntam no ma yɛne Yehowa ahyehyɛde no fã a ɛwɔ soro no bɔ anan.

⁸ Adiyifo Yesaia, Hesekiel, ne Daniel nyaa Yehowa ahyehyɛde no fã a ɛwɔ soro no ho anisoadehu. (Yes., ti 6; Hes., ti 1; Dan. 7:9, 10) Ɔsomafo Yohane nso nyaa ɔsoro ahyehyɛde yi ho anisoadehu, na ɔma yehuu sɛnea ɛte wɔ Adiyisɛm nhoma no mu. Ohui sɛ Yehowa te anuonyam ahengua so a abɔfo atwa ne ho ahyia. Wɔka sɛ: “Kronkron, kronkron, kronkron ne Yehowa Nyankopɔn, ade nyinaa so Tumfoɔ, a na ɔwɔ hɔ, na ɔda so wɔ hɔ a ɔreba.” (Adi. 4:8) Yohane hui nso sɛ ‘oguammaa bi gyina ahengua no mfinimfini.’ Ɛyɛ Yesu Kristo, Onyankopɔn Guammaa no.—Adi. 5:6, 13, 14; Yoh. 1:29.

⁹ Yehowa a ɔte ahengua so wɔ anisoadehu yi mu no ma yehu sɛ ɔno ne ahyehyɛde no Ti. Bible ka Yehowa ne ne dibea a ɛkorɔn no ho asɛm wɔ 1 Beresosɛm 29:11, 12 sɛ: “O Yehowa, wo na kɛseyɛ ne tumi ne hyerɛn ne anuonyam ne nidi wɔ wo; na nea ɛwɔ ɔsoro ne asase so nyinaa yɛ wo dea. O Yehowa, wo na ahenni wɔ wo, na wo nso na wokorɔn sen ade nyinaa. Wo nkyɛn na ahonya ne anuonyam fi, na wo na wudi ade nyinaa so; tumi ne kɛseyɛ wɔ wo nsam, na onipa biara kɛseyɛ ne n’ahoɔden wɔ wo nsam.”

¹⁰ Yesu Kristo ne Yehowa na ɛbom yɛ adwuma. Yesu wɔ dibea a ɛkorɔn wɔ soro, na Yehowa ama no tumi kɛse. Nokwarem no, Onyankopɔn de “nneɛma nyinaa nso guu ne nan ase, na ɔyɛɛ no nneɛma nyinaa ti maa asafo no.” (Efe. 1:22) Ɔsomafo Paulo kaa Yesu ho asɛm sɛ: “Onyankopɔn pagyaw no maa no gyinabea a ɛkorɔn, na ɔdom maa no din a ɛkyɛn edin biara, ma enti Yesu din mu na ɛsɛ sɛ nkotodwe nyinaa kotow, nea ɛwɔ soro ne nea ɛwɔ asase so ne nea ɛwɔ asase ase nyinaa, na ɛsɛ sɛ tɛkrɛma nyinaa pae mu ka sɛ Yesu Kristo ne Awurade de hyɛ Agya Onyankopɔn anuonyam.” (Filip. 2:9-11) Wei nti, yebetumi anya ahotoso koraa wɔ Yesu Kristo mu efisɛ n’akanni teɛ.

¹¹ Odiyifo Daniel nso nyaa anisoadehu, na ohuu Nea Ne Nna Akyɛ no sɛ ɔte Ne soro ahengua so, na abɔfo “mpempem som no, na mpem du ahorow mpem du gyinagyina n’anim.” (Dan. 7:10) Bible ka ɔsoro abɔfodɔm yi ho asɛm sɛ wɔyɛ “ahonhom a wɔsom, a wɔsoma wɔn ma wɔkɔsom wɔn a wɔbɛyɛ nkwagye adedifo.” (Heb. 1:14) Wɔahyehyɛ honhom abɔde yi nyinaa ama wɔn dibea. Ebi yɛ ‘nhengua, mpanyinni, nniso, ne tumidi.’—Kol. 1:16.

¹² Sɛ yegye bere susuw Yehowa ahyehyɛde no fã a ɛwɔ soro no ho a, yɛbɛte nea Yesaia yɛe bere a ‘ohuu Yehowa sɛ ɔte ahengua kɛse kokuroo bi so’ na “serafim gyinagyina no so” no ase. Yesaia kaa sɛ: “Asɛm ato me! Mawu awie, efisɛ m’ano ho ntew, na nkurɔfo a mete wɔn mu nso ano ho ntew; na hwɛ, mede m’ani ahu Ɔhene no, asafo Yehowa ankasa!” Nokwarem no, bere a Yesaia huu sɛnea Yehowa ahyehyɛde no kɛse te no, ne ho dwiriw no ma na onhu nea ɔnyɛ. Anisoadehu yi kaa Yesaia araa ma enti bere a ɔtee ɛnne bi fii soro sɛ hena na ɔbɛyɛ adwuma titiriw a ɛne sɛ ɔbɛbɔ Yehowa atemmu ho dawuru no, ogyee so sɛ: “Mini, soma me.”—Yes. 6:1-5, 8.

¹³ Sɛ yehu Yehowa ahyehyɛde no na yɛkyerɛ ho anisɔ a, ɛka yɛn ma yɛyɛ yɛn ade te sɛ Yesaia. Sɛ ahyehyɛde no rekɔ n’anim a, yɛbɔ mmɔden sɛ yɛne no bɛbɔ anan. Yɛyɛ nea yebetumi biara ma nnipa hu sɛ yɛwɔ Yehowa ahyehyɛde no mu ahotoso nnɛ.

¹⁴ Wohwɛ Hesekiel nkɔmhyɛ nhoma no ti 1 a, wɔaka Yehowa ho asɛm sɛ ɔte ɔsoro teaseɛnam kɛse bi so. Saa teaseɛnam fɛfɛɛfɛ yi gyina hɔ ma Yehowa ahyehyɛde no fã a aniwa nhu no. Teaseɛnam yi so a ɔte no kyerɛ sɛ ofi ayamye mu kyerɛ ahyehyɛde no kwan, na ɔde di n’atirimpɔw ho dwuma.—Dw. 103:20.

¹⁵ Ntwahonan anaa kɔba hyehyɛ teaseɛnam yi ntwahonan biara mu. Ntwahonan no ankasa ne nea ɛbea mu no nyinaa kɛse yɛ pɛ. Wei nti na Bible ka sɛ ntwahonan no ‘nam n’afã anan no so’ no. (Hes. 1:17) Ntwahonan no betumi adan n’ani akyerɛ baabiara prɛko pɛ. Nanso wei nkyerɛ sɛ teaseɛnam no wɔ hɔ kwa a obiara nkyerɛ no kwan. Yehowa renhwɛ mma n’ahyehyɛde no mfa n’ani nkyerɛ baabiara a ɛpɛ kɛkɛ. Hesekiel 1:20 ka sɛ: “Baabiara a honhom no bɛkyerɛ sɛ ɛnkɔ no, na ɛkɔ.” Enti ɛyɛ Yehowa na ɔma n’ahyehyɛde no kɔ baabiara a ne honhom kyerɛ no kwan sɛ ɛnkɔ. Asɛm a ɛsɛ sɛ yebisa yɛn ho ne sɛ, ‘Me ne ahyehyɛde no rebɔ anan anaa?’

¹⁶ Sɛ wɔka sɛ yɛne Yehowa ahyehyɛde no mmɔ anan a, ɛnyɛ nea ɛkyerɛ ara ne sɛ yɛbɛkɔ asafo nhyiam ne asɛnka kɛkɛ. Nea ɛkyerɛ paa ne sɛ, yebenyin wɔ honhom mu na yɛama yɛn ho akokwaw. Enti ‘yɛpɛɛpɛɛ mu hu nneɛma a ehia koraa no,’ na yɛhwɛ sɛ honhom fam nneɛma a wɔrekyerɛkyerɛ yɛn no, yɛte ne nyinaa ase anaa. (Filip. 1:10; 4:8, 9; Yoh. 17:3) Ɛsɛ sɛ yɛkae nso sɛ, sɛ ahyehyɛde biara begyina a, ehia akwankyerɛ, na ɛsɛ sɛ emufo yɛ baako. Enti sɛ yebetumi awie adwuma a Yehowa de ama yɛn no a, ɛho hia paa sɛ yɛhwɛ honhom fam ne honam fam nneɛma a ɔde ahyɛ yɛn nsa no so yiye, na yɛde di dwuma nyansam. Sɛ yɛne Yehowa soro teaseɛnam no bɛbɔ anan a, ɛnde ɛsɛ sɛ yɛn abrabɔ ne asɛm a yɛka no hyia.

¹⁷ Yehowa ahyehyɛde no aboa yɛn ma enti, yɛreyɛ Onyankopɔn apɛde. Kae sɛ Yehowa na ɔte ɔsoro teaseɛnam no so. Enti sɛ yɛne ɔsoro teaseɛnam no bɔ anan a, ɛkyerɛ sɛ yɛwɔ obu ma Yehowa, na yɛwɔ yɛn Botan no mu ahotoso. (Dw. 18:31) Bible hyɛ bɔ sɛ: “Yehowa na ɔbɛma ne nkurɔfo ahoɔden. Yehowa na ɔde asomdwoe behyira ne nkurɔfo.” (Dw. 29:11) Ɛnnɛ, yɛka Yehowa ahyehyɛde no ho, enti yɛn nso yenya ahoɔden a ɔde dom n’asomfo no bi. Asomdwoe a ɔde hyira wɔn no, yɛn nso yenya bi. Akyinnye biara nni ho sɛ, sɛ yɛkɔ so yɛ Yehowa apɛde a, yebenya nhyira pii nnɛ, na ɛbɛtoa so akosi daa.