Sɛnea Yɛbɛma Asomdwoe Atena Asafo No Mu Na Ɛho Atew

AFE biara, nnipa mpempem sen yuu ba Yehowa fie, na wɔde ɔsom kronn ma no. Ɛno ama asɛm bi a Bible hyɛɛ ho nkɔm aba mu. (Mika 4:1, 2) Yɛde anigye kɛse ma wɔn nyinaa akwaaba ba “Onyankopɔn asafo” no mu! (Aso. 20:28) Wɔn ani gye ho paa sɛ wɔanya hokwan ne yɛn abom resom Yehowa. Afei nso, ɛyɛ wɔn dɛ sɛ yɛn honhom fam paradise a emu tew na asomdwoe wom no, wɔaba mu bi. Onyankopɔn honhom kronkron ne afotu pa a ɛwɔ n’Asɛm mu no, ɛno na ɛboa ma asomdwoe tena asafo no mu na ɛho tew.—Dw. 119:105; Sak. 4:6.

² Yɛde Bible nnyinasosɛm bɔ yɛn bra, enti yɛahyɛ “nipasu foforo” no. (Kol. 3:10) Sɛ watĩ-me-waka-me biara sɔre a, yɛsɔ ano. Yesuasua Yehowa, enti biribiara a ebetumi apaapae yɛn mu no, yɛnsosɔ so koraa. Yɛne yɛn nuanom a wɔwɔ wiase nyinaa tumi bom yɛ adwuma.—Aso. 10:34, 35.

³ Nanso, ɛwom ara a, nsɛmnsɛm bi sɔre ma wobɛhwɛ no na ɛreyɛ asɛe asomdwoe ne baakoyɛ a ɛwɔ asafo no mu. Ne nyinaa fi dɛn? Mpɛn pii no, efi Bible afotu a yebu yɛn ani gu so. Afei nso, bɔne wɔ yɛn nyinaa ho, na yɛtɔ sin. (1 Yoh. 1:10) Obi betumi adi mfomso bi ma efĩ ne nkekae aba asafo no ho, na ama yɛn som ho aba asɛm. Ebia yɛn anom asɛm anaa yɛn nneyɛe bi betumi ahaw obi. Anaasɛ obi nso bɛka asɛm bi anaa ɔbɛyɛ biribi ama ahaw yɛn. (Rom. 3:23) Ɛba no saa a, yɛbɛyɛ dɛn asiesie yɛne yɛn nuanom ntam?

⁴ Yehowa nim sɛ nsɛmnsɛm betumi aba yɛn ntam. Ɔdɔ a ɔdɔ yɛn nti, wama yɛn Bible, na sɛ wontwiwontwi bi sɔre wɔ yɛne yɛn nuanom ntam a, yɛahu sɛnea yebesiesie. Ɛno da nkyɛn a, asafo mu mpanyimfo nso betumi de Kyerɛwnsɛm no atu yɛn fo. Wɔdɔ yɛn, enti sɛ yetie afotu no na yɛde yɛ adwuma a, ɛbɛboa ama yɛasiesie nsɛmnsɛm a ɛsɔre, na yɛne Yehowa ntam akɔ so ayɛ kama. Sɛ yedi mfomso bi na wɔteɛ yɛn so anaa wɔka yɛn anim a, ɛkyerɛ sɛ yɛn soro Agya no dɔ yɛn.—Mmeb. 3:11, 12; Heb. 12:6.

⁵ Ɛtɔ da a, akasakasa anaa ɔhaw nketenkete tumi ba wɔn a wɔwɔ asafo no mu ntam. Sɛ ɛba saa a, ɛsɛ sɛ yɛde onuadɔ siesie no ntɛm ara. (Efe. 4:26; Filip. 2:2-4; Kol. 3:12-14) Ɔsomafo Petro maa yɛn afotu bi. Sɛ yɛne yɛn nua Kristoni bi nya asɛm na yɛde saa afotu no yɛ adwuma a, ɛbɛboa yɛn ama yɛasiesie yɛn ntam. Ɔkaa sɛ: “Monnodɔ mo ho denneennen, efisɛ ɔdɔ kata bɔne pii so.” (1 Pet. 4:8) Bible ka sɛ: “Yɛn nyinaa di mfomso mpɛn pii.” (Yak. 3:2) Yesu kaa sɛ, biribiara a yɛpɛ sɛ afoforo yɛ ma yɛn no, yɛnyɛ saa ara mma wɔn. Sɛ yɛde saa afotu no yɛ adwuma a, ɛrenyɛ den sɛ mfomso nketenkete a afoforo yɛ yɛn no, yɛde bɛkyɛ wɔn na yɛayi afi yɛn mu.—Mat. 6:14, 15; 7:12.

⁶ Sɛ wuhu sɛ woaka biribi anaa woayɛ biribi ma ahaw obi a, ɛsɛ sɛ woyɛ ntɛm ne no kosiesie. Kae sɛ, sɛ wo ne wo nua ntam nye a, wo ne Yehowa ntam nso renyɛ papa. Yesu tuu n’asuafo fo sɛ: “Afei sɛ wode w’akyɛde reba afɔremuka ho na wokae wɔ hɔ sɛ wo nua wɔ biribi tia wo a, gyaw w’akyɛde no afɔremuka no anim na kɔ; di kan ne wo nua no nkosiesie mo ntam, na sɛ wosan ba a, woabɛbɔ w’afɔre.” (Mat. 5:23, 24) Ebia mente-me-ho-ase bi na ɛbaa mo ntam. Sɛ saa a, wo ne wo nua no ntena ase nka asɛm no. Sɛ yɛne asafo no mufo nyinaa te kama na obiara yi ne yam ne ne yɔnko bɔ nkɔmmɔ a, ɛbɛboa paa na mente-me-ho-ase ansɔre yɛn ntam, na mpo sɛ nsɛm nketenkete sɔre wɔ yɛn ntam esiane yɛn sintɔ nti a, yebetumi asiesie.

⁷ Ɛtɔ da a, na ɛho abehia sɛ asafo mu mpanyimfo no teɛ onua bi adwene de gye no si yiye. Wei nna fam. Ɔsomafo Paulo kyerɛw Kristofo a wɔwɔ Galatia no sɛ: “Anuanom, sɛ ɛba mpo sɛ obi di mfomso ansa na n’ani aba ne ho so a, mo a moyɛ Kristofo a mo ho akokwaw no, mommɔ mmɔden nnye onipa a ɔte saa no nsi yiye odwo honhom mu.”—Gal. 6:1.

⁸ Sɛ asafo mu mpanyimfo taa srasra anuanom hyɛ wɔn den a, wobetumi abɔ wɔn ho ban na biribiara ansɛe wɔne Yehowa ntam. Afei nso, sɛ nsɛm nketenkete bi wɔ hɔ a, mpanyimfo no betumi asɔ ano ntɛm na ammɛyɛ kɛse. Sɛ mpanyimfo no yere wɔn ho yɛ wɔn adwuma wɔ asafo no mu a, wɔbɛyɛ te sɛ nea Yehowa nam Yesaia so kae yi: “Wɔn mu biara bɛyɛ sɛ mframa ano hintabea ne ahum ano guankɔbea, asase kesee so nsuten ne asase wosee so botan kɛse onwini.”—Yes. 32:2.

⁹ Ɔsomafo Paulo bɔɔ kɔkɔ sɛ ebinom betumi abɛyɛ nhwɛso bɔne wɔ asafo no mu. Ɔkyerɛwee sɛ: “Yɛhyɛ mo . . . sɛ montwe mo ho mfi onua biara a ɔnenam basabasa na onni nsɛm a munya fii yɛn nkyɛn no so no ho.” Afei ɔkyerɛɛ mu sɛ: “Sɛ obi antie yɛn asɛm a ɛwɔ krataa yi mu a, monhyɛ onii no nsow, mo ne no mmmɔ na n’ani nwu. Nanso mummmu no sɛ ɔtamfo, na mmom monkɔ so ntu no fo sɛ onua.”—2 Tes. 3:6, 14, 15.

¹⁰ Ɛtɔ da a, na onua bi nyɛɛ bɔne a emu yɛ duru a ebetumi ama wɔatu no afi asafo no mu, nanso wobɛhwɛ no, na ahyɛde ne akwankyerɛ a Onyankopɔn de ama Kristofo no, ɔboapa bu n’ani gu so. Ebia na ɔyɛ akwadworɔ paa, ɔtaa kasa tia afoforo, anaa onni ne ho ni koraa. Ebi mpo a, ‘ɔde ne ho gyigye nsɛm a ɛmfa ne ho mu.’ (2 Tes. 3:11) Ebetumi aba nso sɛ odidi anuanom ho, anaa ɔde nneɛma a ɛnsɛ mfata gyigye n’ani. Ɛnyɛ sɛ “ɔnenam basabasa” kɛkɛ. Mmom, ne nneyɛe no betumi asɛe asafo no din, na anhwɛ a na anuanom binom ahwɛ no asua no.

¹¹ Sɛ onua bi nenam basabasa a, asafo mu mpanyimfo no bedi kan de Bible atu no fo. Sɛ mpanyimfo no tu no fo mpɛn pii na wantie, na ɔkɔ so bu n’ani gu Bible nnyinasosɛm so a, ɛnde mpanyimfo no betumi ama ne subammɔne no ho ɔkasa akyerɛ asafo no ma wɔahwɛ wɔn ho yiye. Ansa na mpanyimfo bɛma ɔkasa a ɛte saa no, ɛsɛ sɛ wɔde wɔn ani to fam hwɛ sɛ onua no suban ne ne nneyɛe no haw adwene paa na ɛreteetee afoforo anaa. Onua a ɔbɛma ɔkasa no bɛka subammɔne no ho asɛm na ɔde ɛho afotu ama. Ɔremmɔ onua a ɔnenam basabasa no din, nanso anuanom a wonim asɛm no behu onii ko na wɔahwɛ wɔn ho yiye wɔ ne ho. Biribiara a ɛfa ɔsom ho de, anuanom ne no bɛbom ayɛ na wɔakɔ so ara ‘atu no fo sɛ onua.’ Ɛno pa ho a, anuanom ne no renyɛ biribi foforo biara.

¹² Sɛ Kristofo anokwafo a wɔwɔ asafo no mu si pi na wɔhwɛ wɔn ho yiye wɔ onua a ɔnenam basabasa no ho a, ebia ɛbɛma n’ani awu na wasakra n’akwan. Sɛ ɛbɛda adi sɛ ampa ara wasakra afi n’akwammɔne no ho a, ɛnde ɛho renhia sɛ wɔne no di sɛ obi a wɔahyɛ no nsow bio.

¹³ Sɛ obi yɛ yɛn bɔne na yɛde kyɛ no anaa yebu yɛn ani gu so a, ɛnkyerɛ sɛ ɛmfa yɛn ho anaa yɛsosɔ bɔne so. Bɔne a yɛyɛ no, ɛnyɛ ne nyinaa na efi yɛn sintɔ. Bɔne no bi wɔ hɔ a, emu yɛ duru, enti ɛnsɛ sɛ yebu yɛn ani gu so. (Lev. 19:17; Dw. 141:5) Mmara apam no ma yehu sɛ bɔne bi sõ sen bi. Saa ara na ɛte wɔ Kristosom mu nso.—1 Yoh. 5:16, 17.

¹⁴ Yesu kaa sɛ, sɛ Kristoni bi yɛ bɔne a emu yɛ duru tia ne nua a, biribi pɔtee wɔ hɔ a ɛsɛ sɛ wɔyɛ de siesie wɔn ntam. Nea ɔkae ni: “Sɛ wo nua yɛ bɔne bi a, [1] kɔda ne mfomso adi kyerɛ no wo ne ɔno nkutoo ntam. Sɛ otie wo a, woanya wo nua. Na sɛ wantie a, [2] fa onipa biako anaa baanu ka wo ho, na ama asɛm biara agyina adansefo baanu anaa baasa anom asɛm so. Sɛ wantie wɔn a, [3] ka kyerɛ asafo no. Sɛ wantie asafo no nso a, bu no sɛ amanaman muni anaa towgyeni.”—Mat. 18:15-17.

¹⁵ Bere a Yesu kaa saa asɛm no wiei no, ɔmaa mfatoho bi wɔ Mateo 18:23-35. Yɛhwɛ mfatoho no a, ɛbɛyɛ sɛ bɔne a Yesu kaa ho asɛm wɔ Mateo 18:15-17 no fa sikasɛm, agyapade, ne nsase ho nsɛm ho. Ebetumi ayɛ obi a ogye bosea nanso ɔmpɛ sɛ otua, obi a obu nkurɔfo fa so, anaa okyinkyim nkurɔfo nsa gye wɔn sika. Ebetumi mpo ayɛ ntwiri anaa dinsɛe.

¹⁶ Sɛ wowɔ adanse sɛ obi ayɛ bɔne a yɛaka ho asɛm yi bi atia wo a, mpere wo ho nkɔbɔ mpanyimfo amanneɛ sɛ wɔmmra asɛm no mu. Yesu kaa sɛ, di kan ne onii a wafom wo no nkɔka ho asɛm. Mmɔ ho waw nkyerɛ obiara. Mo mmienu nko ara nkosiesie. Kae, Yesu anka sɛ ‘kɔ wo nua no hɔ baako pɛ kɔda ne mfomso adi kyerɛ no.’ Enti wokɔ hɔ baako, na wannye antom sɛ wafom wo ansrɛ sɛ fa kyɛ no a, ebia ɛbɛyɛ papa sɛ wobɛsan akɔ hɔ bio bere foforo. Sɛ wo ne nea wafom wo no tena ase siesie asɛm no sɛnea Yesu akyerɛ yi a, wo nua no ani begye sɛ woammɔ bɔne a wayɛ wo no so ankyerɛ obiara anaa woansɛe ne din wɔ asafo no mu. Ɛba saa a, na “woanya wo nua.”

¹⁷ Sɛ nea wafom wo no gye ne bɔne tom srɛ wo hɔ bɔnefakyɛ, na ɔyɛ biribi de siesie bɔne a ɔyɛɛ wo no a, ma asɛm no nso hɔ ara. Ɛwom sɛ bɔne no mu yɛ duru, nanso bɔne a ɛte saa de, nnipa a asɛm aba wɔn ntam no ankasa betumi asiesie.

¹⁸ Sɛ wokɔ wo nua no nkyɛn kɔda ne mfomso adi kyerɛ no “wo ne ɔno nkutoo ntam” na woannya wo nua no a, ɛnde wubetumi ayɛ nea Yesu kae no. Ɔkaa sɛ, “Fa onipa biako anaa baanu ka wo ho,” na san kɔ wo nua no nkyɛn. Nnipa a wo ne wɔn bɛkɔ no, wɔn nso, ɛsɛ sɛ wɔyɛ nnipa a wɔpɛ sɛ wɔboa ma wunya wo nua. Ne papa mu a, ɛsɛ sɛ wɔyɛ nnipa a wɔyɛ asɛm a aba no ho adansefo. Nanso sɛ woannya bi a, wubetumi afa onipa baako anaa nnipa mmienu a wɔnyɛ asɛm no ho adansefo ama wɔadi asɛm a morekɔka no ho adanse. Ebia wɔwɔ asɛm no ho suahu, enti wobetumi ama moahu sɛ ampa ara sɛ onii no ayɛ wo bɔne anaa. Sɛ wofa asafo mu mpanyimfo sɛ wɔnyɛ asɛm no ho adansefo a, kae sɛ, wonnyina asafo no ananmu efisɛ ɛnyɛ mpanyimfo kuw no na eyii wɔn sɛ wɔne wo nkɔ.

¹⁹ Ebia wo ne onipa a wafom wo no nko ara aka asɛm no, nanso anyɛ yiye. Afei, wode onipa baako anaa nnipa mmienu aka wo ho akɔ, ɛno nso anyɛ yiye. Sɛ wugye di sɛ asɛm a aba mo ntam no, wuntumi nnyaa mu a, ɛnde bɔ asafo mu mpanyimfo amanneɛ. Kae sɛ, asafo mu mpanyimfo no, nea ehia wɔn ne sɛ wɔbɛma asomdwoe atena asafo no mu na ɛho atew. Enti sɛ wode asɛm no kɔto wɔn anim a, gyaw ma wɔn, na wɔbɛhwɛ adi ho dwuma. Nya Yehowa mu ahotoso. Ɛnsɛ sɛ woma nea obi ayɛ to wo hintidua anaa ɛsɛe w’anigye wɔ Yehowa som mu.—Dw. 119:165.

²⁰ Asafo mu mpanyimfo no bɛhwehwɛ asɛm no mu. Sɛ wohu sɛ ampa, onii no ayɛ bɔne a emu yɛ duru atia wo nso onnuu ne ho, na ɔnyɛɛ n’adwene sɛ ɔbɛyɛ nea obetumi de asiesie a, ɛnde mpanyimfo no bɛpaw boayikuw a mpanyimfo nko ara wom ma wɔatu onii no afi asafo no mu. Wɔyɛ saa a, na wɔrebɔ asafo no ho ban ahwɛ ama ɛho atew.—Mat. 18:17.

²¹ Bɔne a emu yɛ duru no bi wɔ hɔ a, obi de di ne yɔnko na ɔde kyɛ no mpo a, ɛnsɛ sɛ ɛsõ hɔ ara. Ebi ne aguamammɔ, awaresɛe, mmarima a wɔne mmarima da, abususɛm, ɔwae, abosonsom, ne bɔne afoforo a emu yɛ duru. (1 Kor. 6:9, 10; Gal. 5:19-21) Bɔne a ɛtete saa betumi de efĩ ne nkekae aba asafo no ho na aka ɔsom a yɛde ma Yehowa no. Enti bɔne a ɛte saa no, ɛsɛ sɛ yɛbɔ mpanyimfo amanneɛ ma wodi ho dwuma. (1 Kor. 5:6; Yak. 5:14, 15) Obi wɔ hɔ a, sɛ ɔyɛ bɔne bi a ɛte saa a, ɔno ankasa kɔbɔ mpanyimfo amanneɛ. Ebinom nso te sɛ onua bi ayɛ bɔne a emu yɛ duru a, wɔkɔka kyerɛ mpanyimfo. (Lev. 5:1; Yak. 5:16) Sɛ Ɔdansefo bi a wabɔ asu yɛ bɔne a emu yɛ duru a, mpanyimfo mmienu hwehwɛ asɛm no mu. Sɛ ɔno ara na ɔkɔbɔɔ mpanyimfo amanneɛ oo, sɛ obi na okoyii mpanyimfo no asotiw oo, mpanyimfo mmienu di kan hwehwɛ mu. Sɛ wohu sɛ adanse wɔ hɔ a ɛkyerɛ sɛ ampa, onua no ayɛ bɔne a emu yɛ duru a, mpanyimfo kuw no bɛpaw mpanyimfo mmiɛnsa anaa nea ɛboro saa sɛ asɛnni boayikuw ama wɔadi asɛm no.

²² Mpanyimfo no ani kũ nguan no ho, na wɔhwɛ wɔn yiye paa. Enti biribiara a ebetumi asɛe nguan no ne Yehowa ntam no, wɔbɔ wɔn ho ban wɔ ho. Sɛ obi fom kwan a, wɔbɔ mmɔden de Bible yi no ntɛn gye no si kwan mu ma ɔne Yehowa ntam san yɛ papa. (Yuda 21-23) Saa na ɔsomafo Paulo ka kyerɛɛ Timoteo sɛ ɔnyɛ. Ɔkyerɛw Timoteo sɛ: ‘Mehyɛ wo wɔ Onyankopɔn ne Kristo Yesu, a wɔayi no asi hɔ sɛ obebu ateasefo ne awufo atɛn no anim sɛ yi ntɛn, ka anim, tu fo, abodwokyɛre ne ɔkyerɛkyerɛ a etu mpɔn nyinaa mu.’ (2 Tim. 4:1, 2) Saa adwuma yi gye bere, nanso ɛka adwumaden a mpanyimfo yɛ no ho. Anuanom ani sɔ adwumaden a mpanyimfo yɛ no nyinaa, na wɔma wɔn “nidi mmɔho.”—1 Tim. 5:17.

²³ Sɛ mpanyimfo no hu sɛ ampa-ne-ampa ara, onua bi ayɛ bɔne a emu yɛ duru a, wɔn ahiasɛm paa ne sɛ wɔbɛboa nea wayɛ bɔne no ama ɔne Yehowa ntam asan ayɛ papa. Sɛ onii no nu ne ho wɔ ne komam, na ogye mmoa a mpanyimfo de bɛma no no tom a, ɛnde wɔbɛka n’anim. Wobetumi aka n’anim wɔ kokoam, anaasɛ wɔbɛka n’anim wɔ anuanom a wodii adanse wɔ asɛnni no mu no anim. Nkaanim a ɛte saa bɛteɛ onii a wafom no so, na ama adansefo no nso asuro. (2 Sam. 12:13; 1 Tim. 5:20) Bere biara a mpanyimfo bɛka onua bi anim no, wɔbɛma no anohyeto ahorow bi. Ɛbɛma nea wayɛ bɔne no asiesie n’akwan sɛnea ɛbɛyɛ a ‘n’anammɔn kwan bɛyɛ tẽẽ.’ (Heb. 12:13) Sɛ mpanyimfo no hu sɛ ade rekye a ade resa nyinaa, nea ɔyɛɛ bɔne no ne Yehowa ntam reyɛ papa a, nkakrankakra wobeyi anohyeto no afi ne so.

²⁴ Sɛ onii a ɔyɛɛ bɔne no nu ne ho, nanso asɛnni boayikuw no hu sɛ bɔne a ɔyɛe no bɛda adi wɔ asafo no mu anaa mpɔtam hɔ, anaa ehia sɛ wɔn a wɔwɔ asafo no mu hwɛ wɔn ho yiye wɔ ne ho a, wɔbɛma nkaebɔ tiawa wɔ Abrabɔ Ne Asɛnka Adesua no ase sɛ: “Wɔaka [onii no din] anim.”

²⁵ Ɛtɔ da a, nea wayɛ bɔne no, wobɛhwɛ na wasen ne kɔn. Enti mmoa a asɛnni boayikuw no de bɛma no no, ɔrennye ntom. Bere a wɔredi n’asɛm mpo no, ebia wɔrenhu ne “nnwuma a ɛkyerɛ adwensakra” no papa. (Aso. 26:20) Ɛba saa a, dɛn na mpanyimfo no bɛyɛ? Wobetu nea wayɛ bɔne a wannu ne ho no afi asafo no mu. Ɛba saa a, ɔne Yehowa nkurɔfo a wɔn ho tew no rennya fekubɔ biara. Enti ɛremma anuanom nsuasua ne bɔne no. Ɛno bɛbɔ asafo no ho ban afi efĩ ne nkekae biara ho, na nkurɔfo ammɔ asafo no dimmɔne. (Deut. 21:20, 21; 22:23, 24) Bere bi, obi a na ɔwɔ Korinto asafo no mu yɛɛ aniwude bi. Ɔsomafo Paulo tee ho asɛm no, ɔka kyerɛɛ mpanyimfo no sɛ ‘wɔmfa onii no nhyɛ Satan nsa, na wɔagye asafo no honhom nkwa.’ (1 Kor. 5:5, 11-13) Bere foforo nso, Paulo kaa ebinom a wotuu wɔn ho asɛm. Saa nkurɔfo no tew nokware no so atua wɔ asomafo no bere so.—1 Tim. 1:20.

²⁶ Sɛ obi yɛ bɔne na wannu ne ho na sɛ asɛnni boayikuw si gyinae sɛ wobetu no a, ɛsɛ sɛ wɔde Bible no ma onii no hu nea wɔregyina so atu no no pefee. Sɛ asɛnni boayikuw no ka kyerɛ onii no sɛ wɔatu no a, ɛsɛ sɛ wɔsan ka kyerɛ no sɛ, sɛ ogye di sɛ boayikuw no akyea atemmu no na ɔpɛ sɛ ɔde asɛm no kɔdan a, ɛsɛ sɛ ɔkyerɛw krataa kyerɛ nea enti a ɔpɛ sɛ ɔde asɛm no kɔdan no pefee. Ɔwɔ nnanson a obetumi de asɛm no akɔdan. Nnanson no fi ase fi ɛda a boayikuw no bɔɔ no amanneɛ sɛ wɔatu no no. Sɛ mpanyimfo kuw no nsa ka krataa a ɛkyerɛ sɛ onii no de asɛm no rebɛdan a, wɔbɛbɔ ɔmansin sohwɛfo amanneɛ. Ɔmansin sohwɛfo no bɛpaw asafo mu mpanyimfo a wɔfata ama wɔasan atena asɛm no so. Mpanyimfo a ɔmansin sohwɛfo bɛpaw wɔn no bɛbɔ mmɔden atena asɛm no so wɔ nnawɔtwe ntam, kyerɛ sɛ, efi bere a onii no kyerɛw krataa de n’asɛm bɛdanee no. Sɛ obi de n’asɛm kɔdan a, wɔremmɔ asafo no amanneɛ sɛ wɔatu no ansa. Nanso, wɔremma onii no mma mmuae wɔ asafo nhyiam ase, ɔremmɔ mpae wɔ hɔ, na wɔremma no ɔsom hokwan biara.

²⁷ Nhyehyɛe a wɔayɛ sɛ obi betumi de n’asɛm akɔdan no, ɛkyerɛ ayamye, na nea wayɛ bɔne no nso, ɛma ɔsan nya kwan kyerɛ n’asɛm mu. Enti sɛ asɛnni boayikuw a wɔde asɛm akɔdan wɔn no frɛ nea wayɛ bɔne no, na ɔboapa sɛ ɔrenkɔ, na sɛ boayikuw no yɛ biara sɛ wɔn nsa bɛka no nso wamma a, ɛnde wɔbɛbɔ asafo no amanneɛ sɛ wɔatu no.

²⁸ Sɛ nea wayɛ bɔne no ka sɛ ɔremfa asɛm no nkɔdan a, asɛnni boayikuw no bɛma wahu nea enti a ehia sɛ onu ne ho. Bio, wɔbɛkyerɛ no nea obetumi ayɛ na daakye wɔagye no. Boayikuw no kyerɛ no saa nneɛma yi a, ɛbɛboa no paa, na ɛkyerɛ ayamye nso. Wɔyɛ wei nyinaa sɛnea ɛbɛboa onii no ama wasesa n’akwan, na daakye bi wasan aba Yehowa ahyehyɛde no mu.—2 Kor. 2:6, 7.

²⁹ Sɛ obi yɛ bɔne na wannu ne ho a, wobetu no afi asafo no mu. Ɛsɛ sɛ wɔbɔ asafo no amanneɛ sɛ: “[Onii no din] nyɛ Yehowa Dansefo bio.” Nkaebɔ yi bɛma anokwafo a wɔwɔ asafo no mu atwe wɔn ho afi ne ho.—1 Kor. 5:11.

³⁰ Yɛka sɛ “obi atwe ne ho” a, ɛkyerɛ sɛ onii no yɛ Yehowa Dansefo a wabɔ asu, nanso ɔno ankasa aka no pen sɛ ɔnyɛ Yehowa Dansefo bio. Anaasɛ, ɔde ne nneyɛe kyerɛ sɛ ɔne Kristofo asafo no nni hwee yɛ bio. Nneɛma a ɔyɛ no bi ne sɛ, ahyehyɛde a wɔn nnwuma ne Bible nkyerɛkyerɛ nhyia a enti Yehowa Nyankopɔn bɛsɛe wɔn no, wobɛhwɛ no, na ɔde ne ho akɔhyɛ mu.—Yes. 2:4; Adi. 19:17-21.

³¹ Ɔsomafo Yohane bere so no, ebinom paa Kristofo gyidi no. Yohane kyerɛw wɔn ho asɛm sɛ: “Wofi yɛn mu na ɛkɔe, nanso na wɔnka yɛn ho; sɛ wɔka yɛn ho a, anka wɔne yɛn tenae.”—1 Yoh. 2:19.

³² Yehowa ani so no, obi a watwe ne ho no, ɔne Kristoni a wagyae asɛnkakɔ tebea nyɛ pɛ. Obi gyae asɛnkakɔ a, ebetumi aba sɛ Onyankopɔn Asɛm a ɔntaa nsua ntia. Ebetumi nso aba sɛ asetenam nsɛmnsɛm ne ɔtaa na ama n’ahokeka a ɔde som Yehowa no abrɛ ase. Sɛ Kristoni bi gyae asɛnkakɔ a, mpanyimfo ne wɔn a wɔwɔ asafo no mu bɛkɔ so ara aboa no ama wasan agyina ne nan so asom Yehowa bio.—Rom. 15:1; 1 Tes. 5:14; Heb. 12:12.

³³ Nanso, sɛ Kristoni bi twe ne ho a, wɔbɛma nkaebɔ tiawa akyerɛ asafo no sɛ: “[Onii no din] nyɛ Yehowa Dansefo bio.” Sɛnea yɛtwe yɛn ho fi obi a wɔatu no ho no, saa ara na yɛyɛ obi a watwe ne ho.

³⁴ Sɛ wotu obi fi asafo no mu, anaa ɔno ara twe ne ho, na akyiri yi ɔde ne nneyɛe kyerɛ pefee sɛ wanu ne ho agyae ne bɔne no bere tenten, na ampa ɔpɛ sɛ ɔne Yehowa ntam yɛ papa bio a, wobetumi asan agye no. Mpanyimfo no bɛma bere a ɛfata atwam sɛnea ɛbɛyɛ a onii no bɛkyerɛ sɛ wanu ne ho ampa. Ebetumi adi abosome bebree, afe, anaa nea ɛboro saa mpo. Tebea no na ɛbɛkyerɛ. Sɛ obi a wɔatu no de krataa kɔma mpanyimfo kuw no sɛ wonnye no a, ɛsɛ sɛ wɔpaw boayikuw ma wɔne onipa no tena ase. Sɛ boayikuw no hyia no a, wɔbɛhwɛ sɛ onii no yɛ “nnwuma a ɛkyerɛ adwensakra” anaa. Nea wobehu no na wobegyina so asi gyinae sɛ wobegye no saa bere no anaa wɔrennye no.—Aso. 26:20.

³⁵ Sɛ wotu obi na okopue asafo foforo mu na ɔkyerɛw ma mpanyimfo a ɛwɔ hɔ sɛ wonnye no a, ɛhɔ mpanyimfo no bɛpaw boayikuw ama wɔahyia no. Sɛ boayikuw no mufo hu sɛ ɛsɛ sɛ wɔsan gye no a, wɔbɛbɔ mpanyimfo kuw a wɔwɔ asafo a edii onii no asɛm no mu no amanneɛ. Boayikuw a ɛwɔ asafo ahorow mmienu no mu no bedi nkitaho akosi sɛ wobenya biribiara a wobegyina so asi gyinae a ɛfata. Nanso asafo a edii onii no asɛm no, boayikuw a wɔbɛtew wɔ hɔ no na wobesi gyinae asan agye no.

³⁶ Boayikuw a ɛrehwɛ ama wɔasan agye onii no, sɛ wɔn adwene si wɔn pi sɛ nea wɔatu no no anaa nea watwe ne ho no anu ne ho paa ma enti ɛfata sɛ wɔsan gye no a, wɔbɛbɔ amanneɛ wɔ asafo a wodii onii no asɛm wom no sɛ wɔasan agye no. Sɛ onii no akopue asafo foforo mu a, ɛhɔ nso, wɔbɛma nkaebɔ no bi wɔ hɔ. Wɔbɛka no tiawa sɛ: “Wɔasan agye [onii no din] sɛ Yehowa Dansefo.”

³⁷ Sɛ abofra a wabɔ asu yɛ bɔne a emu yɛ duru a, ɛsɛ sɛ wɔbɔ asafo mu mpanyimfo amanneɛ. Sɛ mpanyimfo tena asɛm no so a, ɛbɛyɛ papa sɛ abofra no awofo a wɔabɔ asu tena mu bi. Sɛ asɛnni boayikuw no de nteɛso bi rema abofra no a, ɛnsɛ sɛ awofo no gyina abofra no akyi. Mmom no, ɛsɛ sɛ wɔne mpanyimfo no yɛ adwene. Sɛ asɛnni boayikuw redi obi a wanyin asɛm a, wɔbɔ mmɔden sɛ wobeyi no ntɛn na wɔaboa no ama ɔne Yehowa ntam asan ayɛ papa. Saa ara na wɔredi abofra bi asɛm a, wɔyɛ. Nanso sɛ abofra no annu ne ho a, ɛnde wobetu no.

³⁸ Sɛ ɔdawurubɔfo a ɔmmɔɔ asu yɛ bɔne a emu yɛ duru a, ɛho asɛm te sɛn? Ɔmmɔɔ asu mmɛyɛɛ Ɔdansefo, enti yetu no a ɛnyɛ yiye. Ebia ɔntee Bible no ase yiye, enti sɛ wotu no fo a, ɛbɛboa no ama ‘n’anammɔn kwan ayɛ tẽẽ.’—Heb. 12:13.

³⁹ Sɛ ɔdawurubɔfo a ɔmmɔɔ asu yɛ bɔne, na mpanyimfo mmienu bɔ mmɔden sɛ wɔbɛboa no, nanso wannu ne ho a, ɛsɛ sɛ mpanyimfo no bɔ asafo no amanneɛ. Wɔbɛma nkaebɔ tiawa sɛ: “[Onii no din] nyɛ obi a wɔagye no atom sɛ ɔdawurubɔfo a ɔmmɔɔ asu bio.” Ɛba saa a, asafo no bebu no sɛ wiaseni. Ɔnyɛ obi a yɛatu no, nanso anuanom bɛhwɛ wɔn ho yiye wɔ ne ho. (1 Kor. 15:33) Sɛ ɔde asɛnka akontaabu ba a, yɛrennye.

⁴⁰ Sɛ wɔma ɔdawurubɔfo a ɔmmɔɔ asu gyae asɛnkakɔ a, ebia akyiri yi, ɔbɛka sɛ ɔpɛ sɛ ɔsan bɛyɛ ɔdawurubɔfo. Ɛba saa a, mpanyimfo mmienu behyia no ahwɛ sɛ ɔne Yehowa ntam te sɛn. Sɛ wohu sɛ ɔfata a, wɔbɛma nkaebɔ tiawa sɛ: “Wɔasan agye [onii no din] atom sɛ ɔdawurubɔfo a ɔmmɔɔ asu.”

⁴¹ Yehowa ama yɛn honhom fam paradise kamakama. Enti obiara a ɔne Onyankopɔn asafo bɔ nnɛ no ani gye paa. Honhom fam aduan a ɛte apɔw ne nkwa nsu abu yɛn so. Afei nso, Yehowa asafo a ɛhyɛ Kristo nsa no, ɔnam so bɔ yɛn ho ban. (Dw. 23; Yes. 32:1, 2) Ɔhaw ne abɛbrɛsɛ atu atese wɔ nna a edi akyiri yi mu. Nanso honhom fam paradise a yɛwom no nti, yɛwɔ akomatɔyam.

⁴² Sɛ yɛma asomdwoe tena asafo no mu na yɛma ɛho tew a, Ahenni no ho nokwasɛm bɛkɔ so ahyerɛn ama nkurɔfo ahu. (Mat. 5:16; Yak. 3:18) Onyankopɔn behwie ne nhyira agu yɛn so, na ɛno bɛma nnipa pii abehu no na wɔne yɛn abom ayɛ n’apɛde. Wei bɛma yɛanya akomatɔyam ne anigye.