Hena Ne Onyankopɔn?

1, 2. Nsɛm bɛn na yɛtaa bisa?

MMOFRA pɛ nsɛmmisa paa. Sɛ abofra bisa asɛm na wuyi ano a, ɔbɛsan abisa wo sɛ, ‘Adɛn ntia?’ Wokyerɛkyerɛ mu sɛ dɛn mpo a, ɔbɛsan abisa foforo.

² Ɛnyɛ mmofra nko ara na wobisa nsɛm; yɛn nyinaa bisa nsɛm. Yetumi bisa yɛn ho sɛ dɛn na yebedi, dɛn na yɛbɛhyɛ, dɛn na yɛntɔ. Yɛn abrabɔ ho hia yɛn, na yedwen yɛn daakye nso ho, enti ɛyɛ a yebisa ho asɛm. Nanso sɛ yɛannya yɛn nsɛmmisa no ho mmuae a, anhwɛ a yebegyae akyidi.

 3. Adɛn nti na nnipa pii te nka sɛ wɔrennya wɔn nsɛmmisa ho mmuae?

³ Wokɔ Bible mu a, wubenya nsɛmmisa yi nyinaa ho mmuae anaa? Ɛyɛ ebinom sɛ ɛho mmuae wɔ Bible mu, nanso wɔte nka sɛ Bible no mu yɛ den dodo. Wɔn adwene yɛ wɔn sɛ, asɔfo ne akyerɛkyerɛfo nko ara na wonim. Ebinom deɛ, fɛre nti, wommisa mpo na obi ahu sɛ wonnim. Wo nso ɛ?

4, 5. Nsɛm bɛn paa na worepɛ ho mmuae? Adɛn nti na ɛsɛ sɛ wokɔ so hwehwɛ mmuae no?

⁴ Wo nso ebia nsɛm bi kyere w’adwene na worepɛ ho mmuae. Ebi ne sɛ: Adɛn nti na wɔwoo me baa wiase? Miwu a, ɛhe na merekɔ? Onyankopɔn koraa, ɔte sɛn? Yenim sɛ Yesu yɛ Ɔkyerɛkyerɛfo a wagye din paa; ɔkae sɛ: “Monkɔ so mmisa, na wɔde bɛma mo; monkɔ so nhwehwɛ, na mubehu; monkɔ so mmom, na wobebue mo.” (Mateo 7:7) Enti sɛ wunnyaa wo nsɛmmisa ho mmuae a, mma w’abam mmu; kɔ so hwehwɛ ara kosi sɛ wubenya ho mmuae a ɛtɔ asom.

⁵ Sɛ ‘wokɔ so hwehwɛ’ a, wubenya mmuae no wɔ Bible mu. (Mmebusɛm 2:1-5) Mmuae no nso, ɛnyɛ den sɛ wobɛte ase. Nea wubehu no bɛma w’ani agye paa, na daakye nso, ɛbɛboa wo. Nsɛm bi wɔ hɔ a ɛkyere nnipa pii adwene. Ma yɛnhwɛ emu baako.

 6. Adɛn nti na ebinom dwen sɛ wɔn asɛm mfa Onyankopɔn ho?

⁶ Nnipa pii adwene yɛ wɔn sɛ yɛn asɛm mfa Onyankopɔn ho. Wɔka sɛ, sɛ Onyankopɔn dwen nnipa ho paa a, anka wiase nte sei. Seesei baabi a wobɛfa biara, akokoakoko ne ɔtan ne awerɛhow nko ara. Yare, amanehunu, ne owu nso abu so. Enti ɛma nkurɔfo bisa sɛ, ‘Sɛ yɛn ho hia Onyankopɔn paa a, adɛn nti na wahwɛ ama wei nyinaa rekɔ so?’

 7. (a) Nsɛm bɛn na nyamesom mpanyimfo ka a ɛma nkurɔfo nya adwene sɛ Onyankopɔn tirim yɛ den? (b) Dɛn na ɛma yehu sɛ ɛnyɛ Onyankopɔn na ɔde bɔne ba?

⁷ Ɛtɔ da a, nyamesom mpanyimfo ka nsɛm bi ma nkurɔfo nya adwene sɛ Onyankopɔn tirim yɛ den. Sɛ asɛmmɔne bi si a, nea wɔka ara ne sɛ Onyankopɔn na wama aba saa. Wɔn asɛm ne sɛ na Onyankopɔn pɛ sɛ esi. Sɛ wɔka saa a, na wɔrepɛ akyerɛ sɛ nea asi no fi Onyankopɔn. Nanso Bible ma yehu sɛ bɔne a ɛrekɔ so no mfi Onyankopɔn. Yakobo 1:13 kyerɛ sɛ Onyankopɔn mfa bɔne nsɔ obiara nhwɛ. Ɛka sɛ: “Sɛ sɔhwɛ to obi a, ɛnsɛ sɛ ɔka sɛ: ‘Onyankopɔn na ɔresɔ me ahwɛ.’ Efisɛ wontumi mfa nnebɔne nsɔ Onyankopɔn nhwɛ, na ɔno nso nsɔ obiara nhwɛ.” Ɛwom sɛ Onyankopɔn nsiw nneɛma bɔne a ɛrekɔ so no ano deɛ, nanso ɛnyɛ ɔno na ɔde ba. (Kenkan Hiob 34:10-12.) Yɛnhwɛ mfatoho bi.

8, 9. Asɛm to yɛn a, adɛn nti na ɛnyɛ papa sɛ yɛbɛka sɛ efi Onyankopɔn? Fa mfatoho kyerɛkyerɛ mu.

⁸ Fa no sɛ aberante bi ne n’awofo na ɛte. Ne papa atete no yiye, na onni ne ho agorɔ koraa. Nanso asoɔden nti, aberante no tu fii fie sɛ ɔrekɔbɔ ne bra. Ɔkɔe nso a, wankɔyɛ adepa, ɛnna asɛm too no. Wobɛbɔ papa no sobo sɛ adɛn nti na wama ne ba no afi fie ama asɛm ato no anaa? Worenka saa! (Luka 15:11-13) Yebetumi de papa no atoto Onyankopɔn ho. Bere a nnipa yɛɛ asoɔden no, Onyankopɔn ansiw wɔn kwan. Enti asɛm bi si a, ɛsɛ sɛ yɛkae sɛ emfi Onyankopɔn. Sɛ yɛde ɛho sobo bɔ no a, na antwa yiye.

⁹ Nneɛma bɔne a ɛrekɔ so no, Onyankopɔn nim nea enti a onyi mfii hɔ. Wudu Ti 11 a, wubehu nea Bible ka wɔ ho. Nanso ka wo koma to wo yam na nya awerɛhyem sɛ Onyankopɔn dɔ yɛn, enti ɛnsɛ sɛ yɛka sɛ ɔno na ɔde nneɛma bɔne ba. Nea ɛwom ara ne sɛ, Ɔno nko ara na obetumi ama yɛanya yɛn haw ano aduru.—Yesaia 33:2.

10. Adɛn nti na ɛsɛ sɛ yenya awerɛhyem sɛ Onyankopɔn beyi nneɛma bɔne afi hɔ?

¹⁰ Onyankopɔn yɛ kronkron. (Yesaia 6:3) Nea ɔyɛ biara ho tew na eye, enti yebetumi anya ne mu awerɛhyem. Nnipa nte sɛ Onyankopɔn, efisɛ ɛtɔ da a, yedi mfomso. Afei nso, nnipa a wodi yɛn so no, sɛ wɔn tirim wɔ asɛmpa mpo a, wonni tumi a wɔde beyi bɔne ne ɛho nsunsuanso afi hɔ. Obiara nni tumi te sɛ Onyankopɔn. Ɔno deɛ, obetumi ayi nea bɔne akɔfa abɛto yɛn so no afi hɔ, na ɔbɛyɛ nso. Obeyi bɔne nyinaa afi hɔ koraa.​—Kenkan Dwom 37:9-11.

11. Onyankopɔn hu nea worefa mu no a, sɛn na ɔte nka?

¹¹ Sɛ Onyankopɔn hu nea ɛrekɔ so wɔ wiase ne nea worefa mu a, sɛn na ɔte nka? Bible ka sɛ Onyankopɔn “dɔ atɛntrenee.” (Dwom 37:28) Enti nneɛma kɔ yiye a, n’ani gye, na sɛ ɛnkɔ yiye nso a, ɛhaw no. Sɛ nkurɔfo hu amane a, Onyankopɔn mpɛ koraa. Bible ka sɛ bere a bɔne hyɛɛ asase so ma no, “odii awerɛhow ne komam.” (Genesis 6:5, 6) Onyankopɔn nsesae. (Malaki 3:6) Bible se odwen wo ho.—Kenkan 1 Petro 5:7.

12, 13. (a) Ɔdɔ ne atenka a yɛwɔ ma nkurɔfo no, yenya fii he? Wuhu sɛ nkurɔfo rehu amane a, wote nka sɛn? (b) Dɛn na ɛma yenya awerɛhyem sɛ Onyankopɔn beyi ɔhaw ne ntɛnkyea nyinaa afi hɔ?

¹² Bible san ka sɛ Onyankopɔn bɔɔ yɛn ne suban so. (Genesis 1:26) Nea ɛkyerɛ ne sɛ, suban pa a Onyankopɔn wɔ no, ɛno ara bi na ɔde bɔɔ yɛn. Enti sɛ nkurɔfo te wɔn baabi redwen wɔn ho na asɛm to wɔn na ɛhaw wo a, ɛnde hu sɛ ɛhaw Onyankopɔn sen wo. Adɛn nti na yɛreka saa?

¹³ Bible ma yehu sɛ “Onyankopɔn ne dɔ.” (1 Yohane 4:8) Ɔdɔ na ɔde yɛ ne biribiara. Enti ɔdɔ a yɛwɔ no, Onyankopɔn na ɔde ama yɛn. Sɛ wowɔ tumi a wode beyi ɔhaw ne ntɛnkyea afi hɔ a, anka worenyɛ? Ɔdɔ a wowɔ ma nnipa nti, sɛnea ɛte biara anka wobɛyɛ. Onyankopɔn nso ɛ? Ɔno mpo deɛ ɔwɔ tumi a ɔde bɛyɛ, na ɔdɔ yɛn nso, enti ɔkwan biara so, obeyi ɔhaw ne ntɛnkyea nyinaa afi hɔ. Onyankopɔn bɔhyɛ a yɛaka ho asɛm wɔ nhoma yi mfiase no, emu baako mpo rentɔ fam; ne nyinaa bɛba mu. Sɛ wuhu Onyankopɔn yiye a, ɛbɛboa wo ama woanya saa bɔhyɛ no mu gyidi kɛse.

14. Onyankopɔn din de sɛn? Adɛn nti na ɛsɛ sɛ yɛde ne din frɛ no?

¹⁴ Sɛ wopɛ sɛ wo ne obi fa adamfo a, dɛn na wubedi kan ayɛ? Sɛ́ wobɛbɔ wo din akyerɛ no? Onyankopɔn nso ɛ? Ɔwɔ din? Asɔre bebree ka sɛ ne din de Onyankopɔn anaa Awurade. Nanso ne nyinaa yɛ mmrane; ɛte sɛ “ɔhene” anaa “ɔmampanyin.” Onyankopɔn se ne din paa ne Yehowa. Dwom 83:18 ka sɛ: “[Ma] nnipa nhu sɛ wo a wo din de Yehowa no, wo nko ara ne Ɔsorosoroni, asase nyinaa so.” Wɔn a wɔkyerɛw Bible no, wɔde Onyankopɔn din baa mu mpɛn pii. Yehowa pɛ sɛ wuhu ne din na wode frɛ no. Ɔpɛ sɛ ɔne wo fa adamfo, ɛno nti na wabɔ ne din akyerɛ wo no.

15. Onyankopɔn din Yehowa no kyerɛ sɛn?

¹⁵ Onyankopɔn din Yehowa no, emu yɛ duru paa. Ɛkyerɛ sɛ biribiara a Onyankopɔn bɛka no, obetumi ama ayɛ hɔ, na nea ɔpɛ sɛ ɔyɛ biara nso, obetumi ayɛ; biribiara rentumi nsiw no kwan. Ɔno nko ara na saa din no fata no.a

16, 17. Dɛn na Onyankopɔn mmrane yi nyinaa kyerɛ? (a) “Ade nyinaa so Tumfoɔ.” (b) “Mmeresanten Hene.” (d) “Ɔbɔadeɛ.”

¹⁶ Yɛadi kan ahu asɛm a ɛwɔ Dwom 83:18 no. Ɛka sɛ Yehowa “nko ara ne Ɔsorosoroni.” Afei Adiyisɛm 15:3 ka sɛ: “Yehowa Nyankopɔn, ade nyinaa so Tumfoɔ, wo nnwuma yɛ akɛse na ɛyɛ nwonwa. Mmeresanten Hene, w’akwan teɛ na ɛyɛ nokware.” Yɛka “ade nyinaa so Tumfoɔ” a, dɛn na ɛkyerɛ? Ɛkyerɛ sɛ obiara nni soro anaa asase so a ɔwɔ tumi te sɛ Yehowa. Sɛ yɛka sɛ Yehowa yɛ “mmeresanten Hene” a, ɛno nso kyerɛ sɛ ɔwɔ hɔ daa. Dwom 90:2 ka sɛ ɔwɔ hɔ fi mmeresanten kosi mmeresanten. Wunhu sɛ ɛyɛ nwonwa paa?

¹⁷ Yehowa nko ara ne Ɔbɔadeɛ. Adiyisɛm 4:11 se: “Yehowa, yɛn Nyankopɔn, wofata sɛ wugye anuonyam ne nidi ne tumi, efisɛ wo na wobɔɔ nneɛma nyinaa, na wo pɛ nti na ɛwowɔ hɔ na wobɔe.” Enti ɔsoro abɔfo oo, wim nsoromma oo, nnua a ɛsow aba oo, ɛpo mu mpataa oo, ne nyinaa Yehowa na ɔbɔe.

18. Adɛn nti na ɛyɛ ebinom sɛ wɔrentumi ne Onyankopɔn mfa adamfo? Dɛn na Bible ka wɔ ho?

¹⁸ Ebinom wɔ hɔ a sɛ wɔkenkan Bible na wohu sɛnea Yehowa te a, na wɔabɔ hu. Ɛyɛ wɔn sɛ ‘ne ho yɛ hu dodo, anaasɛ onni adagyew, na yɛne ne ntam ware. Afei nso wɔte nka sɛ yɛn asɛm mfa Onyankopɔn ho.’ Nanso wohwɛ a, saa adwene no na Onyankopɔn pɛ sɛ yenya wɔ ne ho? Dabida! Yehowa pɛ sɛ yɛbɛn no. Bible se ɔne “yɛn mu biara ntam nware.” (Asomafo Nnwuma 17:27) Enti Onyankopɔn pɛ sɛ wobɛn no, na wahyɛ bɔ sɛ “ɔbɛbɛn” wo.​—Yakobo 4:8.

19. (a) Wopɛ sɛ wo ne Onyankopɔn fa adamfo a, dɛn na wobɛyɛ? (b) Yehowa suban bɛn paa na w’ani gye ho?

¹⁹ Wopɛ sɛ wo ne Onyankopɔn fa adamfo a, dɛn na wobɛyɛ? Yesu kae sɛ: “Eyi ne daa nkwa, sɛ wobehu wo, nokware Nyankopɔn koro pɛ no, yiye, ne nea wosomaa no no, Yesu Kristo.” (Yohane 17:3) Enti kɔ so sua Yehowa ne Yesu ho ade, na wubehu wɔn yiye na ɛbɛma woanya daa nkwa. Yɛahu dedaw sɛ “Onyankopɔn ne dɔ.” (1 Yohane 4:16) Nanso ɛnyɛ ɔdɔ nko ara na Onyankopɔn wɔ; ɔwɔ suban foforo nso a ɛyɛ anika paa. Bible ma yehu sɛ Yehowa yɛ “mmɔborɔhunufo ne ɔdomfo, nea ne bo kyɛ fuw na n’adɔe ne ne nokwaredi dɔɔso.” (Exodus 34:6) Ɛsan ka sɛ Yehowa ‘ye, na ɔwɔ ɔpɛ sɛ ɔde bɔne befiri.’ (Dwom 86:5) Onyankopɔn wɔ abotare na ɔyɛ ɔnokwafo. (2 Petro 3:9; Adiyisɛm 15:4) Wokenkan Bible a, wubehu ne suban a ɛyɛ fɛ no bi aka ho.

20-22. (a) Yenhu Onyankopɔn, enti yɛbɛyɛ dɛn abɛn no? (b) Sɛ obi pɛ sɛ wugyae Bible a woresua no a, dɛn na ɛsɛ sɛ woyɛ?

²⁰ Yenhu Onyankopɔn, enti yɛbɛyɛ dɛn abɛn no? (Yohane 1:18; 4:24; 1 Timoteo 1:17) Sɛ wokenkan Yehowa ho asɛm wɔ Bible mu a, ɛma wuhu sɛnea ɔte ankasa. (Dwom 27:4; Romafo 1:20) Bere a woresua Yehowa ho ade nyinaa na ɔdɔ a wowɔ ma no no nso reyɛ kɛse, na ɛbɛma woabɛn no yiye.

²¹ Ɛbɛma woahu sɛ Yehowa ne yɛn Agya. (Mateo 6:9) Ɔno na ɔmaa yɛn nkwa, na ɔpɛ sɛ esi yɛn yiye. Nea agya a ɔdɔ ne mma bɛyɛ ama wɔn ara na Yehowa ayɛ ama yɛn no. (Dwom 36:9) Enti Bible ma yehu sɛ wubetumi afa Yehowa adamfo ama ayɛ yiye. (Yakobo 2:23) Yehowa a ɔbɔɔ soro ne asase no pɛ sɛ woyɛ n’adamfo. Dɛn na ɛkyɛn saa!

²² Ɛnyɛ obiara na ohu sɛ woresua Bible a n’ani begye ho. Ebia obesusuw sɛ wubegyae w’asɔre. Nanso nhwɛ obi ho nyɛ biribi a ɛbɛma Yehowa adamfofa abɔ wo; worennya adamfo biara te sɛ ɔno.

23, 24. (a) Yɛnte biribi ase a, adɛn nti na ɛsɛ sɛ yebisa? (b) Dɛn na ti a edi hɔ no bɛka ho asɛm?

²³ Bible a woresua yi, ɛnyɛ biribiara na wobɛte ase ntɛm. Ɛba saa a, mfɛre sɛ wubebisa. Yesu kae sɛ ɛsɛ sɛ yɛbrɛ yɛn ho ase te sɛ mmofra nkumaa. (Mateo 18:2-4) Mmofra nso deɛ, wobisa nsɛm paa. Onyankopɔn pɛ sɛ wunya wo nsɛmmisa ho mmuae. Enti sua Bible no yiye na hwɛ sɛ nea woresua no yɛ nokware anaa.​—Kenkan Asomafo Nnwuma 17:11.

²⁴ Sɛ wopɛ sɛ wuhu Yehowa yiye a, worentumi nkɔ nnyaw Bible no. Ti a edi hɔ no bɛma yɛahu sɛ nhoma biara nni hɔ a ɛne Bible sɛ.