“Mɛyɛ Wɔn Ɔman Baako”

1, 2. (a) Adɛn nti na ɛbɛyɛ sɛ na Yudafo no yam hyehye wɔn? (b) Dɛn na esii a na wɔnhwɛ kwan koraa? (d) Nsɛmmisa bɛn na yebesusuw ho?

YUDAFO a na wɔwɔ Babilon no, na Yehowa ama Hesekiel ayɛ ɔyɛkyerɛ ahorow pii ama wɔahu. Saa ɔyɛkyerɛ ahorow no, na ne nyinaa yɛ nkɔmhyɛ. Ɔyɛkyerɛ a odii kan yɛe no, na ɛyɛ atemmusɛm. Nea ɛto so mmienu no nso ɛ? Ná ɛyɛ atemmusɛm. Nea ɛto so mmiɛnsa ne nea na edidi so nyinaa nso yɛ atemmusɛm. (Hes. 3:24-26; 4:1-7; 5:1; 12:3-6) Nokwasɛm ne sɛ, nkɔmhyɛ a Hesekiel yɛɛ ho ɔyɛkyerɛ no nyinaa, na ɛfa atemmu a ɛyɛ hu a na ɛbɛba Yudafo no so ho.

² Enti afei, hwɛ sɛ Hesekiel asan abegyina Yudafo no anim rebɛyɛ ɔyɛkyerɛ foforo de ahyɛ nkɔm. Ɛbɛyɛ sɛ ɛmaa wɔn yam hyehyee wɔn paa. Ebia wobisaa wɔn ho sɛ, ‘Atemmusɛm bɛn bio na ɔrebɛka akyerɛ yɛn?’ Nanso, na wɔrebehu biribi a wɔnhwɛ kwan koraa. Hesekiel fii ase yɛɛ nkɔmhyɛ bi ho ɔyɛkyerɛ, na wei de, na ɛyɛ soronko koraa. Ná ɛmfa atemmusɛm bi a ɛyɛ hu ho, mmom na ɛyɛ bɔhyɛ a ɛma anidaso. (Hes. 37:23) Dɛn na Hesekiel yɛ kyerɛɛ Yudafo no? Ná ɛkyerɛ sɛn? Na Onyankopɔn nkurɔfo a yɛwɔ hɔ nnɛ no, ɛfa yɛn ho sɛn? Momma yɛnhwɛ.

 3. (a) Dua a na wɔakyerɛw so ‘Yuda dea’ no, na egyina hɔ ma dɛn? (b) Adɛn nti na yɛka sɛ na “dua a egyina hɔ ma Efraim” no gyina hɔ ma mmusuakuw du ahemman no?

³ Yehowa ka kyerɛɛ Hesekiel sɛ ɔmfa nnua mmienu na ɔnkyerɛw baako so sɛ ‘Yuda dea,’ na nea ɛka ho no nso, ɔnkyerɛw so sɛ “Yosef dea, kyerɛ sɛ, dua a egyina hɔ ma Efraim.” (Kenkan Hesekiel 37:15, 16.) Nnua mmienu yi gyina hɔ ma dɛn? Dua a na wɔakyerɛw so ‘Yuda dea’ no, na egyina hɔ ma Yuda ne Benyamin mmusuakuw mmienu ahemman no. Wohwɛ mmusuakuw mmienu no a, ahemfo a na wodi wɔn so no, na wofi Yuda abusua no mu. Asɔfo no nso, na wɔbɛn ahemfo no, efisɛ na wɔsom wɔ Yerusalem asɔrefi hɔ. (2 Be. 11:13, 14; 34:30) Enti ahemfo a na wofi Dawid abusua mu oo, asɔfo a wofi Lewi abusua mu oo, na wɔn nyinaa wɔ Yuda ahemman no mu. “Dua a egyina hɔ ma Efraim” no, na egyina hɔ ma Israel mmusuakuw du ahemman no. Adɛn nti na yɛreka saa? Ɔhene a odii kan dii ade wɔ mmusuakuw du ahemman no mu ne Yeroboam, na na ofi Efraim abusuakuw no mu. Bere bi akyi no, Efraim na ɛbɛyɛɛ abusuakuw titiriw wɔ Israel. (Deut. 33:17; 1 Ahe. 11:26) Hyɛ no nsow sɛ, Israel mmusuakuw du ahemman no, na ahemfo a wofi Dawid abusua mu ne asɔfo a wofi Lewi abusua mu no nka ho.

 4. Ɔyɛkyerɛ a edi hɔ a Hesekiel de nnua mmienu no yɛe no, na egyina hɔ ma dɛn? (Hwɛ mfoni a ɛwɔ ti yi mfiase no.)

⁴ Yehowa san ka kyerɛɛ Hesekiel sɛ ɔnka nnua mmienu no mmom “ma ɛnyɛ dua baako.” Wei nyinaa, na Yudafo no gyina hɔ rehwɛ, na na wɔnte nea Hesekiel reyɛ no ase. Enti wobisaa no sɛ: “Dɛn na eyi kyerɛ?” Obuaa wɔn sɛ, ɔyɛkyerɛ no gyina hɔ ma biribi a Yehowa ankasa rebɛyɛ. Yehowa kaa nnua mmienu no ho asɛm sɛ: “Mɛma ayɛ dua baako, na wɔbɛyɛ baako wɔ me nsam.”—Hes. 37:17-19.

 5. Ɔyɛkyerɛ a Hesekiel yɛe no, na ɛkyerɛ sɛn? (Hwɛ adaka a wɔato din “Nnua Mmienu a Wɔka Boom.”)

⁵ Afei, nnua mmienu a wɔka boom no, Yehowa ma wohuu nea ɛkyerɛ. (Kenkan Hesekiel 37:21, 22.) Nea na ɛkyerɛ ni: Yuda mmusuakuw mmienu ahemman no ne Israel mmusuakuw du ahemman (Efraim) no, na wɔbɛka wɔn abom de wɔn asan aba Israel asaase so ma wɔabɛyɛ “ɔman baako.”—Yer. 30:1-3; 31:2-9; 33:7.

 6. Nkɔmhyɛ mmienu a edi nsɛ bɛn na wɔaka ho asɛm wɔ Hesekiel ti 37?

⁶ Wohwɛ Hesekiel ti 37 a, nkɔmhyɛ mmienu na wɔaka ho asɛm wɔ hɔ. Ɛno ne nnompe a awo wosee ne nnua mmienu a wɔka boom ho nkɔmhyɛ no. Saa nkɔmhyɛ mmienu yi di nsɛ paa. Nea edi kan no (nkyekyɛm 1-14) ma yehu sɛ Yehowa yɛ Onyankopɔn a otumi ma biribi a awu san ba nkwa mu. Nea ɛto so mmienu no (nkyekyɛm 15-28) ma yehu sɛ, Yehowa tumi ma nnipa a wɔn ntam atetew san yɛ baako. Enti nkɔmhyɛ mmienu no ma yehu sɛ: Biribi a awu no, Yehowa tumi ma ɛsan nya nkwa, na baabi a mpaapaemu wɔ no, Yehowa tumi ma baakoyɛ san ba hɔ. Wei yɛ biribi a ɛka koma paa.

 7. Asɛm a ɛwɔ 1 Beresosɛm 9:2, 3 no, sɛn na esi so dua sɛ “Onyankopɔn fam de, ade nyinaa betumi ayɛ yiye”?

⁷ Nnipa ani so de, wobɛka sɛ na ɛrentumi nyɛ yiye da sɛ Yehowa nkurɔfo a na wɔatu wɔn afi wɔn asaase so no bɛsan aba na wɔabɛyɛ baako.a Nanso, “Onyankopɔn fam de, ade nyinaa betumi ayɛ yiye.” (Mat. 19:26) Yehowa maa ne nkɔmhyɛ baa mu. Afe 537 A.Y.B. mu na Yudafo no fii Babilon. Ɛno akyi no, Israel mmusuakuw du no ne Yuda mmusuakuw mmienu no mufo bi san kɔɔ Yerusalem, na wɔboa ma wɔsan maa nokware som so. Kyerɛwnsɛm no si saa asɛm yi so dua. Ɛka sɛ: ‘Wɔn a wɔyɛ Yuda asefo, Benyamin asefo, Efraim asefo, ne Manase asefo bɛtenaa Yerusalem.’ (1 Be. 9:2, 3; Esra 6:17) Anokwa, sɛnea na Yehowa ahyɛ nkɔm no, wɔkaa Israel mmusuakuw du ahemman no mufo ne Yuda mmusuakuw mmienu ahemman no mufo boom ma wɔyɛɛ baako.

 8. (a) Dɛn na Yesaia hyɛɛ ho nkɔm? (b) Nsɛntitiriw mmienu bɛn na ɛwɔ Hesekiel 37:21?

⁸ Sɛ wɔbɛsoa Israelfo no ne Yudafo no fi wɔn asaase so kɔ a, ɛno akyi no na biribi besi. Nea na ebesi no, Yehowa maa Yesaia hyɛɛ ho nkɔm too hɔ bɛyɛ mfe 200 ansa na ɛreba mu. Ɔkaa sɛ Yehowa bɛboaboa “Israelfo a wɔahwete” ne “Yudafo a wɔahwete no ano afi asaase afanan nyinaa.” Wɔn a ɔde wɔn bɛba no, na wɔn mu bi “befi Asiria.” (Yes. 11:12, 13, 16) Sɛnea na Yehowa aka ato hɔ no, saa pɛpɛɛpɛ na ɔyɛe. ‘Oyii Israelfo fii aman a wɔkɔɔ so no so.’ (Hes. 37:21) Hyɛ nsɛntitiriw mmienu yi nsow: Yehowa amfrɛ atukɔfo no “Yuda” ne “Efraim” bio, na mmom ɔfrɛɛ wɔn “Israelfo.” Enti na wɔabɛyɛ kuw baako. Bio nso, Yehowa anka sɛ Israelfo no befi ɔman baako a ɛne Babilon mu na aba, na mmom ɔkaa sɛ wobefi aman ahorow bi mu, kyerɛ sɛ, wobefi “mmaa nyinaa” na aba.

 9. Bere a Yehowa nkurɔfo no san baa Israel no, dɛn na Yehowa yɛ de boaa wɔn ma wɔyɛɛ baako?

⁹ Bere a Yehowa nkurɔfo no san baa Israel no, dɛn na Yehowa yɛ de boaa wɔn ma wɔyɛɛ baako? Ɔmaa Israelfo no ahwɛfo a na wɔbɛboa wɔn ama wɔasom no. Ahwɛfo no mu bi ne Serubabel, Ɔsɔfo Panyin Yosua, Esra, ne Nehemia. Onyankopɔn paw adiyifo Hagai, Sakaria, ne Malaki nso. Saa mmarima anokwafo yi nyinaa yeree wɔn ho hyɛɛ ɔman no nkuran sɛ wonni Onyankopɔn akwankyerɛ so. (Neh. 8:2, 3) Afei nso, Yehowa bɔɔ Israel man no ho ban. Enti pɔw bɔne biara a Onyankopɔn nkurɔfo no atamfo bɔ tiaa wɔn no, Yehowa amma anyɛ yiye.—Ester 9:24, 25; Sak. 4:6.

10. Dɛn na Satan tumi yɛe?

¹⁰ Nhyehyɛe pa a Yehowa yɛ maa Israelfo no nyinaa akyi no, wɔn mu pii wae fii nokware som ho. Bible mu nhoma ahorow a wɔkyerɛwee bere a wɔsan baa wɔn asaase so no, wubehu nneɛma a wɔyɛe no bi wom. (Esra 9:1-3; Neh. 13:1, 2, 15) Nokwasɛm ne sɛ, bere a Israelfo no san bae akyi bɛyɛ mfe ɔha no, na wɔawae afi nokware som ho araa ma Yehowa ka kyerɛɛ wɔn sɛ: “Monsan mmra me nkyɛn.” (Mal. 3:7) Bere a Yesu baa asaase so no, na Yudasom mu akyekyɛ ayɛ akuwakuw, na na ahwɛfo a wonni nokware na edi wɔn anim. (Mat. 16:6; Mar. 7:5-8) Enti baakoyɛ a ɛde baakoyɛ de, Satan amma wɔannya bi. Nanso nkɔm a Yehowa hyɛe sɛ ne nkurɔfo bɛyɛ baako no, na ɛbɛbam ɔkwan biara so. Ná saa baakoyɛ no bɛyɛ dɛn aba?

11. (a) Dɛn na Yehowa daa no adi wɔ baakoyɛ ho nkɔm a ɔhyɛe no mu? (b) Bere a wotuu Satan fii soro no, dɛn na ɔde sii n’ani so bio sɛ ɔbɛyɛ?

¹¹ Kenkan Hesekiel 37:24. Yehowa daa no adi sɛ, sɛ nkɔmhyɛ a ɛfa baakoyɛ ho no bɛbam korakora wɔ ne nkurɔfo so a, gye sɛ ‘n’akoa Dawid’ anaa Yesu afi ase redi hene. Yesu fii ase dii hene afe 1914, na ɛno akyi na nkɔmhyɛ no baa mu.b (2 Sam. 7:16; Luka 1:32) Eduu saa bere no, na wɔde honhom fam Israel anaa Kristofo a wɔasra wɔn no asi honam fam Israel ananmu. (Yer. 31:33; Gal. 3:29) Satan san de sii n’ani so sɛ ɔbɛsɛe baakoyɛ a ɛwɔ Onyankopɔn nkurɔfo mu no. Bere a wotuu no fii soro baa asaase so no, asɛm no sɛee koraa. (Adi. 12:7-10) Yɛhwɛ afe 1916 sɛɛ a, bere a Onua Russell wui no, Satan hui sɛ obetumi afa awaefo so de mpaapaemu aba Kristofo a wɔasra wɔn no mu. Nanso ankyɛ na saa awaefo no fii asafo no mu. Afei Satan tumi ma wɔkyeree anuanom a na wodi asafo no anim saa bere no guu afiase, nanso ne nyinaa akyi, wantumi antɔre Yehowa nkurɔfo ase. Anuanom a wɔasra wɔn a na wodi Yehowa nokware no kɔɔ so ara yɛɛ baako.

12. Satan ayere ne ho sɛ ɔbɛsɛe baakoyɛ a ɛwɔ honhom fam Israelfo ntam no. Adɛn nti na nea ɔreyɛ nyinaa ayɛ kwa?

¹² Ɛwom, Satan tumi sɛee baakoyɛ a na ɛwɔ honam fam Israelfo mu no, nanso baakoyɛ a ɛwɔ honhom fam Israelfo mu de, ɔyɛɛ biara nanso wantumi ansɛe no. Adɛn nti na nea Satan ayɛ no nyinaa ayɛ kwa? Efisɛ wɔn a wɔasra wɔn no ayɛ nea wobetumi biara sɛ wɔde Yehowa akwankyerɛ bɛyɛ adwuma. Wei nti, wɔn Hene Yesu Kristo abɔ wɔn ho ban, na Yesu da so ara redi Satan so nkonim.—Adi. 6:2.

13. Nkɔmhyɛ a ɛfa nnua mmienu a wɔka boom ho no, nokware som ho ade titiriw bɛn paa na na ɛresi so dua?

¹³ Nkɔmhyɛ a ɛfa nnua mmienu a wɔka boom ho no, sɛn na abam wɔ yɛn bere yi so? Kae sɛ, nkɔmhyɛ no kyerɛ sɛnea na akuw mmienu bi bɛka abom ayɛ baako. Ade titiriw a nkɔmhyɛ no kaa ho asɛm ne sɛ Yehowa na ɔbɛma saa baakoyɛ no aba. Ɛnde yemmisa sɛ, nkɔmhyɛ a ɛfa nnua mmienu a wɔka boom ho no, nokware som ho ade titiriw bɛn paa na na ɛresi so dua? Ɛno ara ne sɛ: Yehowa ankasa bɛma n’asomfo ‘ayɛ baako.’—Hes. 37:19.

14. Efi afe 1919 reba no, nkɔmhyɛ a ɛfa nnua mmienu a wɔka boom ho no, sɛn na anya mmamu kɛse?

¹⁴ Efi afe 1919 reba no, nkɔmhyɛ a ɛfa nnua mmienu a wɔka boom ho no fii ase nyaa ne mmamu kɛse. Saa bere no, na wɔatew Onyankopɔn nkurɔfo ho sɛnea ɛbɛyɛ a wobetumi asom Onyankopɔn yiye, na na wɔn honhom fam paradise no afi ase. Wɔn a wɔboaboaa wɔn ano saa bere no, na wɔn mu dodow no ara anidaso ne sɛ wɔbɛyɛ ahemfo ne asɔfo wɔ soro. (Adi. 20:6) Ɔkwan bi so no, na Kristofo a wɔasra wɔn no te sɛ dua a ɛyɛ ‘Yuda dea’ no. Yɛbɛkae a, saa ɔman no mu na na ahemfo a wofi Dawid abusua mu ne asɔfo a wofi Lewi abusua mu no wɔ. Nanso nkakrankakra, nnipa a wɔn anidaso ne sɛ wɔbɛtena asaase so a na wɔn dodow rekɔ anim no bɛkaa honhom fam Yudafo no ho. Ɔkwan bi so no, na saa nnipa no te sɛ “dua a egyina hɔ ma Efraim” no. Saa ɔman no, na wonni ahemfo a wofi Dawid abusua mu, na na wonni asɔfo a wofi Lewi abusua mu nso. Akuw mmienu no abom ayɛ baako. Wɔyɛ Yehowa nkurɔfo a wɔde baakoyɛ resom no, na Ɔhene baako, Yesu Kristo, na odi wɔn so.—Hes. 37:24.

15. Nkɔmhyɛ a ɛwɔ Hesekiel 37:26, 27 no, sɛn na ɛrenya mmamu nnɛ?

¹⁵ Hesekiel nkɔmhyɛ no ma yehu sɛ, na nnipa pii bɛba de wɔn ho abɛbɔ Kristofo a wɔasra wɔn no ama wɔn nyinaa asom Onyankopɔn nokware mu. Yehowa kaa ne nkurɔfo ho asɛm sɛ: ‘Mɛma wɔadɔɔso,’ na “mɛtena me ntamadan mu wɔ wɔn mu.” (Hes. 37:26, 27) Saa nsɛm yi ma yɛkae nkɔmhyɛ foforo bi. Hesekiel wu akyi bɛyɛ mfe 700 na Yehowa honhom kaa ɔsomafo Yohane ma ɔhyɛɛ saa nkɔm no. Ɛka sɛ: “Nea ɔte ahengua no so no bɛtrɛw ne ntamadan mu” wɔ “nnipakuw kɛse bi” so. (Adi. 7:9, 15) Ɛnnɛ, Kristofo a wɔasra wɔn no ne nnipakuw kɛse no nyinaa abom sɛ ɔman baako. Wɔyɛ Onyankopɔn nkurɔfo, na wɔhyɛ ne ntamadan ase.

16. Honhom fam Israel ne wɔn a wɔwɔ anidaso sɛ wɔbɛtena asaase so a na wɔbɛka wɔn abom no, nkɔm bɛn na Sakaria hyɛ faa ho?

¹⁶ Wɔn a wɔsan baa wɔn asaase so no, na Sakaria ka ho. Ɔno nso hyɛɛ nkɔm sɛ, honhom fam Yudafo ne wɔn a wɔwɔ anidaso sɛ wɔbɛtena asaase so no bɛyɛ baako. Ɔkaa sɛ, “nnipa du” a wofi ‘amanaman no mu besuso Yudani baako ataade mu.’ “Wobesuso mu denneennen aka sɛ: ‘Yɛpɛ sɛ yɛne mo kɔ, efisɛ yɛate sɛ Onyankopɔn ka mo ho.’” (Sak. 8:23) Asɛm a ɛne “Yudani baako” a ɛwɔ kyerɛwsɛm yi mu no, ennyina hɔ mma onipa baako bi. Mmom egyina hɔ ma nnipakuw bi, efisɛ wotoa asɛm no so wɔ kyerɛwsɛm no mu a, ɛde asɛmfua “mo” na ɛka “Yudani baako” no ara ho asɛm. Ɛnnɛ, “Yudani baako” no gyina hɔ ma Kristofo a wɔasra wɔn a wɔda so wɔ asaase so anaa honhom fam Yudafo. (Rom. 2:28, 29) “Nnipa du” no gyina hɔ ma wɔn a wɔwɔ anidaso sɛ wɔbɛtena asaase so no. ‘Wosuso’ Kristofo a wɔasra wɔn no mu ‘ne wɔn kɔ.’ (Yes. 2:2, 3; Mat. 25:40) Nsɛm bi te sɛ “wobesuso” ne “yɛpɛ sɛ yɛne mo kɔ” a ɛwɔ kyerɛwsɛm no mu no ma yehu sɛ saa akuw mmienu no bɛyɛ baako.

17. Baakoyɛ a ɛwɔ yɛn ntam nnɛ no, sɛn na Yesu kaa ho asɛm?

¹⁷ Bere bi, Yesu kaa sɛ ɔyɛ oguanhwɛfo, na ɔbɛka ne nguan (wɔn a wɔasra wɔn) no ne “nguan foforo” (wɔn a wɔwɔ anidaso sɛ wɔbɛtena asaase so) no abom ama wɔabɛyɛ “kuw baako.” Bere a Yesu kaa saa asɛm no, ɛbɛyɛ sɛ Hesekiel nkɔmhyɛ a ɛfa baakoyɛ ho no na na ɛwɔ n’adwene mu. (Yoh. 10:16; Hes. 34:23; 37:24, 25) Wohwɛ baakoyɛ a ɛwɔ yɛn ntam nnɛ no a, ɛte sɛ nea Yesu ne adiyifo a wɔtenaa ase tete no kaa ho asɛm no pɛpɛɛpɛ! Sɛ yɛn anidaso ne sɛ yɛbɛkɔ soro oo, yɛbɛtena asaase so oo, yɛne yɛn nuanom nyinaa abom resom Onyankopɔn. Nanso yɛreka yi, atoro som mu apaapae ayɛ akuw bebree. Anokwa, baakoyɛ a ɛwɔ yɛn mu no de, ɛyɛ nwonwa.

18. Sɛnea Hesekiel 37:28 ma yehu no, ɛnsɛ sɛ Onyankopɔn nkurɔfo ‘ka wiase no ho’ anaa wɔde wɔn ho bɔ wiase no. Adɛn nti na ɛho hia saa?

¹⁸ Bere a Hesekiel de nkɔmhyɛ a ɛfa baakoyɛ ho no reba awiei no, ɔkaa asɛm bi a ɛma yehu nea enti a baakoyɛ a ɛwɔ yɛn ntam no rensɛe da. (Kenkan Hesekiel 37:28.) Nea enti a Yehowa nkurɔfo yɛ baako ne sɛ, ne kronkronbea “si wɔn mfinimfini,” kyerɛ sɛ, wɔsom no nokware mu. Sɛ wɔkɔ so ara ma wɔn ho tew na wɔtwe wɔn ho fi Satan wiase no ho a, Yehowa kronkronbea no bɛkɔ so asi wɔn mfinimfini. (1 Kor. 6:11; Adi. 7:14) Yesu kaa sɛ ehia paa sɛ yɛtwe yɛn ho fi wiase no ho. Bere bi, Yesu bɔɔ mpae bi a ɛka koma maa n’asuafo no, na ɔkaa wom sɛ: “Agya Kronkron, . . . hwɛ wɔn so sɛnea ɛbɛyɛ a wɔbɛyɛ baako. . . . Wɔnka wiase no ho . . . Fa nokware no tew wɔn ho.” (Yoh. 17:11, 16, 17) Wohwɛ asɛm yi a, wubehu sɛ na Yesu reka sɛ, sɛ n’asuafo bɛyɛ “baako” a, ɛnsɛ sɛ ‘wɔka wiase no ho’ anaa wɔde wɔn ho bɔ wiase no.

19. (a) Dɛn na yɛyɛ de kyerɛ sɛ ‘yesuasua Onyankopɔn’? (b) Anadwo a ade rebɛkye ama Yesu awu no, baakoyɛ ho nokwasɛm titiriw bɛn na osii so dua?

¹⁹ Wohwɛ Bible mu a, ɛha nko ara na Yesu frɛɛ Onyankopɔn sɛ “Agya Kronkron.” Sɛ yɛreka obi a ɔyɛ kronkron na ɔteɛ a, obiara ne Yehowa nsɛ. Yehowa ka kyerɛɛ tete Israelfo no sɛ: “Monyɛ kronkron, efisɛ meyɛ kronkron.” (Lev. 11:45) ‘Yesuasua Onyankopɔn,’ enti ɛsɛ sɛ yetie saa ahyɛde no na yɛde bɔ yɛn bra wɔ biribiara mu. (Efe. 5:1; 1 Pet. 1:14, 15) Sɛ yɛka sɛ nnipa bi yɛ “kronkron” a, nea ɛkyerɛ ne sɛ “wɔayi wɔn asi nkyɛn.” Wei nti anadwo a ade rebɛkye ama Yesu awu no, ɔka kyerɛɛ n’asuafo no sɛ, sɛ wɔbɛkɔ so ayɛ baako a, gye sɛ wɔtwe wɔn ho fi wiase yi ne mpaapaemu a ɛrekɔ so wom no ho.

20, 21. (a) Dɛn na ɛma yenya ahotoso paa sɛ Yehowa bɔ yɛn ho ban? (b) Dɛn na woasi wo bo sɛ wobɛyɛ?

²⁰ Baakoyɛ soronko a ɛwɔ Yehowa Adansefo mu nnɛ wɔ wiase nyinaa no kyerɛ sɛ, Yehowa atie mpae a Yesu bɔe yi: “Hwɛ wɔn so esiane ɔbɔnefo no nti.” (Kenkan Yohane 17:14, 15.) Sɛ yɛhwɛ sɛnea Satan ntumi nsɛee baakoyɛ a ɛwɔ Onyankopɔn nkurɔfo mu no a, ɛma yenya ahotoso paa sɛ Yehowa bɔ yɛn ho ban. Yehowa kaa wɔ Hesekiel nkɔmhyɛ no mu sɛ nnua mmienu no bɛyɛ baako wɔ ne nsam. Enti Yehowa ankasa na ɔnam anwonwakwan so aka ne nkurɔfo abom wɔ ne nsam. Nea Satan bɛyɛ biara, ne nsa renka wɔn.

²¹ Ɛnde, dɛn na ɛsɛ sɛ yesi yɛn bo sɛ yɛbɛyɛ? Ɛne sɛ, baakoyɛ a ɛsom bo a ɛwɔ yɛn mu no, ɛsɛ sɛ yɛkɔ so yɛ yɛn fam de boa ma ɛtena hɔ. Ɔkwan titiriw bɛn na yɛn mu biara betumi afa so ayɛ saa? Ɛne sɛ yɛbɛkɔ so ara asom Yehowa nokwarem wɔ ne honhom fam asɔrefi hɔ. Yɛbɛyɛ no sɛn? Yebehu wɔ ti ahorow a edi hɔ no mu.