“Onipa a Onni Mmara” No a Wobeyi No Afi Hɔ

 1. Dɛn nti na ɛmmae da sɛ nnipa pii ahwehwɛ amanaman ntam asomdwoe te sɛ nnɛ?

ƐMMAE sɛ nnipa pii ahwehwɛ amanaman ntam asomdwoe saa da. Ɛda adi sɛ efisɛ yɛte “nuklea bere” mu, a aman akɛse anum wɔ nuklea atopae no bi dedaw, na ɛrenkyɛ aman pii benya nuklea ɔtopae no bi bere a ɛho akwan no da adi kɛse na wɔde di dwuma no. Ɛnyɛ mmeae a wɔde akode asisi wɔ asase kesee so nko na nuklea atopae fi hunahuna adesamma mprempren na mmom efi po ase akohyɛn ahorow a wɔde asiesie mmeae atitiriw bi wɔ po ase nso.

 2. Enti, amanaman ntam asomdwoe ho mmɔdenbɔ ahorow a ɛda nsow bɛn na yehu nnɛ?

² Ɛnde ɛnyɛ nwonwa sɛ wubehu amammui sodifo ahorow no sɛ ɛte sɛnea wɔrebɔ mmɔden ankasa de asiw nuklea akodi a edi kan ano. Bere a wohyia nuklea ɔsɛe ankasa no, ɛma wiase sodifo ahorow no susuw wɔn su wɔ wɔn ho wɔn ho ho no ho kɛse. Wɔn a na anka besi saa bere yi wɔyɛ atamfo no fa akwan ahorow a ɛde asomdwoe bɛba so. Kɔ ara na wɔkɔ so te nka sɛ ɛsɛ sɛ wɔyɛ nea wobetumi biara de hyɛ daakye asomdwoe mu den. “Asomdwoe ma awo ntoatoaso bi” ho anidaso sɔre. 1973 Europa Ahotɔ ɔne Biakoyɛ ho Nhyiam a aman aduasa anan yɛe no di aman ntam nkate wɔ asɛm no ho ho adanse. Botae no ne sɛ wobesiw amanaman ntam nsɛmmɔnedi ano!

 3. (a) Ɛte sɛnea nnansa yi wiase nsɛm rebɛn tebea a wɔbɛteɛm aka asɛm bɛn de akamfo wɔn ho? (b) Hena da na na abɛn afei, na dɛn nti na ɛbɛma wɔn a wɔreteɛm no ho adwiri wɔn?

³ Ɛte sɛnea nnansa yi wiase nsɛm redan akɔ tebea a atumfoɔ no de ahurusi bɛteɛm wɔ ɔkwan a wɔde rekamfo wɔn ho so sɛ, “Asomdwoe ne ahotɔ” no so. Sɛ bere no du, wɔ Amanaman Nkabom a ɛpene so no ase a, so na ɛkyerɛ “asomdwoe awo ntoatoaso ma adesamma” mfiase? Bible nkɔmhyɛ wɔ biribi ka wɔ asɛm no ho. Ɛwɔ pii ka wɔ nna ne mmere a nneɛma besisi no ho, efisɛ Bible no Kyerɛwfo, onipa Bɔfo no yɛ Bere-bufo. Ne bere bedu! Amanaman ntam amammuisɛm a ɛte sɛnea ayɛ yiye a awiei koraa no ɛde “asomdwoe ne ahotɔ” si hɔ no rentwe Ne da no nkɔ akyiri. Ɛnyɛ nnipa na ayi Ne da no ato hɔ. Amanaman ntam asomdwoe ho nhyehyɛe a wɔyɛ a ɛno so na wogyina te nka sɛ ɛfata sɛ wɔteɛm sɛ “Asomdwoe ne ahotɔ” no ara na ɛbɛyɛ sɛnkyerɛnne a wɔka too hɔ a ɛbɛkyerɛ sɛ Ne da no reba no. Nea ɛde ba no bɛma adesamma ho adwiriw wɔn. Wɔn ho bedwiriw wɔn efisɛ wɔannye nea ɔka too hɔ wɔ n’Asɛm no mu ne nea ɔnam n’adansefo so bɔɔ no dawuru no anni.

 4. Dɛn na Paulo kyerɛw kɔmaa Tesalonikafo Kristofo no fa bere a wobɛteɛm sɛ “Asomdwoe ne ahotɔ” no ho?

⁴ Mfehaha pii ansa na nnɛ bere yi reba no, na nnipa a wɔhwehwɛ Ne nkɔmhyɛ Asɛm a efi honhom mu no mu wɔ hɔ a wɔrehwehwɛ Ne da no ba no. Mfeha dunkron a atwam ni no, ɔsomafo Paulo kyerɛw kɔmaa Kristofo asafo foforo a na wɔahyehyɛ wɔ Tesalonika, Makedonia no, na ɔka kyerɛɛ saa Bible mu nhwehwɛmufo no sɛ: “Na nna no ne mmere no de, anuanom, enhia mo sɛ wɔkyerɛw brɛ mo. Efisɛ mo ankasa munim yiye sɛ [Yehowa] daa no bɛba sɛ owifo ba anadwo. Na bere a wɔbɛka sɛ: Yewɔ asomdwoe ne ahotɔ, no, ɛnde mpofirim na ɔsɛe bɛba wɔn so sɛ awoko ba ɔbea a ɔyem so, na wɔrennya ɔkwan nguan. Na mo de anuanom, munni esum mu, na ɛda no abɛto mo sɛ owifo. Mo nyinaa moyɛ hann mma ne adekyee mma; yɛnyɛ anadwo anaa esum dea. Enti mommma yɛnnna sɛ wɔn a aka no, na mmom momma yɛnwɛn, na yɛn ani nna hɔ.”​—1 Tesalonikafo 5:1-6.

 5. (a) Paulo kyerɛw ne krataa a edi kan no kɔmaa Tesalonikafo Kristofo no wɔ bɛyɛ bere a Yesu hyɛɛ nkɔm bɛn mfinimfini? (b) Nanso ebinom susuwii sɛ na dɛn na abɛn, na wɔpɛe sɛ wɔbɛyɛ wɔn dɛn?

⁵ Ɔsomafo Paulo kyerɛw saa krataa a edi kan no kɔmaa asafo a na ɛwɔ Tesalonika, Makedonia no bɛyɛ afe 50 Y.B. mu. Na ɛno bɛyɛ fi 33 Y.B. kosi 70 Y.B. bere no mfinimfini, bere a Yesu Kristo kae wɔ ne nkɔmhyɛ wɔ Ngo Bepɔw so no mu sɛ nea ɛbɛhyɛ no agyirae ne “ɔko ne akosɛm” no, efisɛ saa bere no, “ɔman bɛsɔre ɔman so, ne ahenni ahenni so.” Asomdwoe bere biara nni hɔ. (Mateo 24:4-7) Nanso, wɔ afe a edi bere a Paulo kyerɛw ne krataa a edi kan no akyi mu no, na Kristofo bi wɔ Tesalonika a wogyee asɛm a ɛne sɛ “[Yehowa] da no anya adu” no dii. Nanso adanse biara nni hɔ sɛ saa bere no mu, 50/51 Y.B. no, ná atumfoɔ no reka “Asomdwoe ne ahotɔ,” a sɛnea ná Paulo akyerɛw wɔ ne krataa no mu no, nea edi ne ka akyi ntɛm ara ne ‘mpofirim ɔsɛe’ a ɛba wɔn a wɔhwehwɛ wiase asomdwoe so no. Na Tesalonikafo Kristofo no wɔ ahohiahia bere mu esiane ɔtaa a na efi nyamesom mu asɔretiafo hɔ no nti, na na wɔpɛ sɛ wɔboa wɔn ano ntɛm ara kɔ soro ma wɔkɔka Awurade Yesu Kristo ho na wofi ɔhaw no mu.

 6, 7. Esiane sɛ na ehia sɛ wokyerɛ gyidi wɔ ahohiahia foforo ase nti, dɛn na Paulo kyerɛw kɔmaa saa Tesalonikafo no?

⁶ Enti, bɛyɛ afe 51 Y.B. mu no, ɔsomafo Paulo hui sɛ ɛho hia sɛ ɔkyerɛw Tesalonikafo Kristofo no krataa foforo sɛnea ɛbɛyɛ a wɔbɛsan akari pɛ wɔ honhom mu. Ɔkyerɛɛ anigye wɔ wɔn boasetɔ ne gyidi wɔ ɔtaa ne ahohiahia mu no ho, nna ɔkae sɛ: “Ɛno na ɛyɛ Onyankopɔn atɛntrenee agyirae, sɛ wobebu mo Sɛ Onyankopɔn ahenni a muhu ho amane no fata mo.” Wanhyɛ wɔn bɔ sɛ ɛrenkyɛ wobeyi wɔn afi wɔn a wɔhaw wɔn no nsam, na mmom ɔde nsra kyerɛɛ ‘Awurade Yesu a wobeyi no adi afi soro, ne ne tumi abɔfo’ no so. Bere a ohui sɛ ɛsɛ sɛ wɔkɔ so ara da wɔn Kristofo gyidi adi wɔ tebea horow a emu yɛ den ase no, ɔkae sɛ:

⁷ “Enti nso yɛbɔ mpae ma mo daa, sɛ yɛn Nyankopɔn mmu mo sɛ mosɛ ɔfrɛ no, na ɔmfa tumi so mma n’ayamye anisɔde ne gyidi adwuma nyɛ ma, na wɔahyɛ yɛn Awurade Yesu din anuonyam wɔ mo mu, ne mo nso wɔ no mu, sɛnea yɛn Nyankopɔn ne Awurade Yesu Kristo dom no te.”​—2 Tesalonikafo 1:5-12.

 8. Sɛnea ɛbɛyɛ a wɔn akwanhwɛ ahorow renni huammɔ wɔ Yerusalem sɛe a na ɛreba no ho no, Paulo srɛɛ wɔn sɛ wɔmmma wɔn ani nnye wɔ asɛm bɛn ho?

⁸ Ná asase so Yerusalem sɛe (wɔ 70 Y.B. mu) no rebɛn, wɔ saa awo ntoatoaso no mu, na ɔsomafo Paulo ampɛ sɛ Tesalonikafo Kristofo no aba mu bebu wɔ wɔn akwanhwɛ ahorow a enni nnyinaso no mu ansa na Yudafo man no amanehunu no aba anaasɛ wɔ ɛno akyi pɛɛ. Bere a wahu sɛ ɛho hia sɛ ɔteɛ wɔn adwene so no, afei ɔkɔɔ so kyerɛwee sɛ: “Nso yɛsrɛ mo, anuanom, yɛn Awurade Yesu Kristo ba ne yɛn ano a wɔbɛboa aba ne nkyɛn no ho: sɛ mommma wɔnnnan mo adwene ntɛm, na wonntu mo bo honhom anaa asɛm anaa nhoma a wose efi yɛn nkyɛn ho, sɛ ebia [Yehowa] da no anya adu.”​—2 Tesalonikafo 2:1, 2.

 9. Wɔ ne krataa a edi kan no mu no, dɛn na Paulo ka kyerɛɛ Tesalonikafo no wɔ Kristo ba no ne Kristofo a wɔbɛboa wɔn ano akɔ ne nkyɛn no ho?

⁹ Ɔsomafo Paulo ne ne mfɛfo asɛmpatrɛwfo Silwano ne Timoteo na wɔhyehyɛɛ saa asafo a ɛwɔ Tesalonika no, na wɔ ne krataa a edi kan, bere a na ɛsɛ sɛ ogyaw asafo no akyi mu no, ɔkyerɛw nea ɔfrɛ no “yɛn Awurade Yesu Kristo ba ne yɛn ano a wɔbɛboa aba ne nkyɛn” no ho asɛm kɔmaa wɔn. Wɔ 1 Tesalonikafo 4:14-18 no, ɔkyerɛwee sɛ: “Na sɛ yegye di sɛ Yesu wui na wasɔre bio a, saa ara nso na Onyankopɔn de wɔn a wɔadeda no nam Yesu so bɛka ne ho aba. Na eyi de, yɛnam [Yehowa] asɛm mu na yɛka kyerɛ mo sɛ, yɛn a yɛtete ase na yɛreka akosi Awurade ba mu no rentwa wɔn a wɔadeda no ho, efisɛ Awurade ankasa de osebɔ, ɔbɔfo panyin nne ne Onyankopɔn torobɛnto fi soro besian, na Kristo mu awufo bɛsɔre kan, ansa na wɔaba abɛfa yɛn a yɛtete ase na yɛaka yi ne wɔn nyinaa amununkum mu sɛ yenkohyia Awurade ewim, na saa na yɛne Awurade bɛtra daa. Enti momfa nsɛm yi nkyekyekyekye mo ho werɛ.”

10, 11. Wɔ ɔsomafo Mateo kyerɛwtohɔ a ɛfa Kristo asetra ho no mu no, ne nkɔmhyɛ no fã bɛn na ebia ɛbaa wɔn adwene mu?

¹⁰ Wɔ asɛm yi a wɔnam Paulo so de mae akyi no, na Mateo Asɛmpa a wɔkyerɛw no bɛyɛ afe 41 Y.B. mu wɔ Hebri ne afei Hela kasa a na wonim no yiye wɔ afeha a edi kan Y.B. mu no retrɛw saa bere no. Enti ebetumi aba sɛ na asafo a ɛwɔ Tesalonika no akae nea na ɔsomafo Mateo akyerɛw wɔ Yesu nkɔmhyɛ wɔ Ngo Bepɔw so ho no. Mateo kyerɛwtohɔ no kyerɛ sɛ, bere a Yesu aka Yerusalem sɛe (wɔ 70 Y.B. mu) ho asɛm ato hɔ akyi no, ɔkɔɔ so kae sɛ:

¹¹ “Na nna no mu ahohiahia akyi no, ntɛm ara na owia beduru sum, na ɔsram renhyerɛn, na nsoromma befi soro ahwehwe ase, na ɔsoro ahoɔden awosow. Ɛno na onipa Ba no sɛnkyerɛnne bɛda adi ɔsoro, na asase so mmusuakuw nyinaa besu, na wobehu onipa Ba no sɛ ɔreba ɔsoro mununkum so ahoɔden ne anuonyam kɛse mu. Na ɔbɛsoma n’abɔfo ma wɔde torobɛnto a ne nne so aba; na wɔaboaboa wɔn a wɔapaw wɔn no ano afi mframa anan no mu afi ɔsoro ano akɔpem ano.”​—Mateo 24:29-31.

12. (a) So Paulo hwɛɛ kwan sɛ wɔbɛboaboa Kristofo no ano akɔ Kristo a ɔwɔ soro no nkyɛn ntɛm ara wɔ Yerusalem sɛe no akyi? (b) Dɛn na Paulo kaee wɔn sɛ ɛsɛ sɛ ɛba ansa na Yehowa ɔsɛe da no aba?

¹² Afei na ɔsomafo Paulo nim sɛ wɔ Yerusalem sɛe no akyi pɛɛ wɔ saa awo ntoatoaso no mu no, abɔfo a wɔhyɛ onipa Ba a wɔahyɛ no anuonyam no ase remmoaboa wɔn a Onyankopɔn apaw wɔn no ano, a ɛbɛma wɔaboaboa Kristofo a wɔwɔ Tesalonika no ano akɔma Awurade Yesu Kristo. Na onim sɛ ansa na “[Yehowa]” ɔsɛe “da” no bɛba no, ɛsɛ sɛ nsɛm ahorow pii sisi sen Yerusalem a Romafo sɛee no ne nnaadaa mu a wofi teɛm sɛ “Asomdwoe ne ahotɔ” wɔ amammui sodifo ahorow no fam no. Saa ade a edi kan a ɛka ho bio yi na ɔsomafo Paulo kaee Tesalonika Kristofo no wɔ ho wɔ nsɛm yi mu no: “Mommma obiara nnnaadaa mo biribiara fam, efisɛ ɛremma, gye sɛ ɔwae a wɔbɛwae no aba ansa, na wɔayi onipa a onni mmara no adi, ɔsɛe ba no.”​—2 Tesalonikafo 2:3.

13. (a) Na Paulo nkyerɛ dɛn, bere a ɔkaa “ɔwae” ho asɛm no? (b) Ɔkwan bɛn so na Paulo huu nea asɛm no kyerɛ denam ɔno ankasa a wɔtotõo n’ano wɔ ɔwae ho no so?

¹³ A, yiw! Nea edi kan no, ɛsɛ sɛ ɔwae bi ba. Dɛn na na ɔsomafo Paulo kyerɛ bere a ɔkaa “ɔwae a wɔbɛwae” ho asɛm no? So na ɔkyerɛ Kristo asuafo no a wɔnhwɛ yiye a wogyae wɔ anibiannaso mu, wɔhwe ase wɔ Kristofo gyidi ne nneyɛe no ho ara kwa? Dabi? Asɛm no kyerɛ biribi a emu yɛ den sen saa. Ná ɔsomafo Paulo nim saa. Ɛdɛn, wɔtotõo ɔno ankasa ano sɛ odi ɔwae ho fɔ, nanso Yudafo twetwiafo a wonnye nni no na wɔtotõo n’ano saa. Ɛno nti na wɔ Paulo Yerusalem nsrahwɛ a etwa to mu no, Kristofo asafo no sodikuw no de afotu maa no wɔ asɛm bi ho no, sɛ: “Onua, wuhu Yudafo mpempem a wɔagye adi a wɔn nyinaa bɔ mmara no ho mmɔden. Na wɔate wo ho asɛm sɛ wokyerɛkyerɛ Yudafo a wɔwɔ amanaman no mu nyinaa sɛ wonnyaw Mose, na woka sɛ wonntwa wɔn mma twetia, na wonnni amanne no so. Afei yɛnyɛ no dɛn? Ɛnyɛ dɛn ara a, wɔbɛte sɛ woaba [Hela: e·leʹly·thas]. Enti yɛ nea yɛreka akyerɛ wo yi.” (Asomafo no Nnwuma 21:18-23) Sɛ́ Paulo bɛdan n’akyi akyerɛ Mose no kyerɛ wae a wawae, wɔ Yudafo adwene mu.

14. Dɛn na mfitiase Hela asɛmfua no kyere ankasa, na nkyerɛase afoforo bɛn na abenya?

¹⁴ Sɛnea Hela asɛmfua a wɔde dii dwuma no kyerɛ no, nea “ɔwae” kyerɛ ne sɛ, obi “twe ne ho,” “fi hɔ kɔ,” “yi ne ho fi mu.” Sɛ nhwɛso no, yɛkenkan wɔ Luka 8:13 sɛ: “Sɔhwɛ bere ba a, na wɔagyae.” Afei nso wɔ 1 Timoteo 4:1 sɛ: “Nna bi mu no, ebinom bɛtwe wɔn ho afi gyidi no ho.” (NE; Je) “Ɛda adi sɛ nkurɔfo bɛtew atua atia gyidi no.” (Mo) Afei nso Hebrifo 3:12: “Monhwɛ yiye, anuanom, na koma bɔne a ennye nni amma mo mu biara mu, na wanwae amfi Nyankopɔn teasefo ho.” “Koma bɔne a ennye nni a ɛdan fi Onyankopɔn a ɔte ase daa no ho.” (AT; Je) Enti, wɔ tete Helafo fam no, wɔn asɛmfua a emu na yɛn kasa “ɔwae” no fi no kyerɛ “akyirisan” anaa “ɔsɔretia,” afei nso “kɔ a wɔkɔ; ɔyera.” Eyi nti na nnɛyi nkyerɛase ahorow bi de “atuatew” di dwuma wɔ 2 Tesalonikafo 2:3 no.

15. Ɔkwan bɛn so na nnɛyi nkyerɛase ahorow kyerɛ sɛ wobu asɛm “ɔwae” no aniberesɛm?

¹⁵ Sɛ nhwɛso no, Roma Katolekfo Jerusalem Bible no kenkan wɔ hɔ sɛ: “Ɛrentumi mma kosi sɛ Ɔsɔretia Kɛse no bɛba na Otuatewfo, Nea Wayera no aba ansa.” An American Translation kenkan sɛ: “Na ɛno remma kosi sɛ atuatew no bɛba na asoɔdenfo no ada ne ho adi ansa​—nea wɔabu no fɔ ama ɔsɛe no.” Revised Standard Version no kenkan sɛ: “Na saa da no remma, gye sɛ atuatew no ba ansa, na wɔayi onipa a onni mmara no adi, ɔsɛe ba no.” Moffatt de ba sɛ: “Ɛremma kosi sɛ Atuatew no bedi kan aba ansa, na wɔayi Nea onni Mmara no adi, nea wɔabu no kumfɔ no.” Na The New English Bible kenkan sɛ: “Saa da no rentumi mma ansa na atuatew a etwa to a etia Onyankopɔn no aba, bere a wobeyi nsɛmmɔnedi adi te sɛ onipa no, onipa a wɔabu no fɔ ama ɔsɛe no.” Efi sɛnea wɔde 2 Tesalonikafo 2:3 ba wɔ akwan horow so yi mu no, yetumi hu sɛ wobu asɛm “ɔwae” no aniberesɛm.

TIA HENA?

16. (a) Yɛyɛ dɛn hu nea ɔwae anaasɛ nsanakyiri no tia no? (b) Dɛn na ɛkyerɛ sɛ ebia “onipa a onni mmara” yi yɛ onipa biako bi, anaasɛ ebia “onipa” yi yɛ antikristo ara kwa?

¹⁶ Ɛnde, hena na wɔde saa ɔwae, ɔsɔretia, atuatew, akyirisan yi tia no? Saa atuatew adeyɛ yi ho nsɛm afoforo a wɔde ma da no adi sɛ wɔde tia Yehowa Nyankopɔn a ne Da na ɛsɛ sɛ ɔwae yi di anim no. Nea ebefi ɔwae yi mu aba ne yi a wobeyi “onipa a onni mmara, ɔsɛe ba” ano adi no. Onipa ankasa? Dabi, efisɛ na onipa biako pɛ rentumi ntra ase bere tenten a ɛwɔ nkɔmhyɛ yi mmamu mu no. Nea ɛne nkyerɛkyerɛmu yi hyia ne sɛnea An American Translation a ɛde asɛm “ɔsoɔdenfo . . . a wɔabu no fɔ ama ɔsɛe” no di dwuma no. Yehu sɛ wɔmfrɛ oyi “Antikristo.” Ampa, ɔdan bɛyɛ antikristo. Te sɛ nea ɔsomafo Yohane ka wɔ n’ankasa bere so ho bere a ɔrekyerɛw wɔ bɛyɛ 98 Y.B. mu no: “Saa na mprempren yi antikristo [anaasɛ nea otia Kristo] bebree aba nen; . . . Ɛhena ne ɔtorofo no sɛ nea ɔsan sɛ Yesu nyɛ Kristo no? Oyi ne antikristo a ɔpo Agya no ne Ɔba no.” (1 Yohane 2:18, 22) Ɛnyɛ Onyankopɔn Ba no nko na ɔpo no, na mmom ɔpo Onyankopɔn a ɔyɛ Agya no nso.

17. Dɛn na nea-otia-Onyankopɔn yi a wɔfrɛ no “ɔsɛe ba” no kyerɛ, na bere bɛn na ɔsɛe no ba?

¹⁷ Enti, ɛnde ɛfata yiye sɛ wɔfrɛ “onipa a onni mmara” no nea-otia-Nyankopɔn. Nea-otia-Nyankopɔn yi nni mmara wɔ Onyankopɔn ho, na ɔsɔre tia Onyankopɔn a ɔyɛ Agya no, na otia Onyankopɔn Ba, Yesu Kristo nso. Ansa na “onipa a onni mmara” no reba koraa no na wɔafrɛ no “ɔsɛe ba.” Saa sɛnkyerɛnne kwan so asɛm no kyerɛ sɛ ɔyɛ ɔsɛe ɔdedifo, wɔabu no kumfɔ, “wɔabu no fɔ ama ɔsɛe.” “Onipa a onni mmara” no fata ɔsɛe; ɔrentumi nkwati. Ɔsɛe a ɛfata yi bɛba no so “[Yehowa] da” no. Woyi nea-otia-Nyankopɔn yi adi ansa na saa da no aba.

18. (a) Esiane sɛ wɔde nea onni mmara no bata “ɔwae” no ho nti, dɛn na eyi kyerɛ wɔ saa onipa no ne Onyankopɔn ntam abusuabɔ ho? (b) So na Yudafo ankasa a na wɔwɔ Paulo bere so no ne Onyankopɔn wɔ abusuabɔ pa a wɔbɛwae afi ho?

¹⁸ Wɔde “onipa a onni mmara” a wɔbɛsɛe no yi bata “ɔwae,” ɔsɔretia, atuatew a etia Onyankopɔn a wɔkaa ho asɛm too hɔ no ho. Nokwasɛm yi ma ɛda adi sɛ, mfiase no na “onipa a onni mmara” no ne Onyankopɔn na ɛbɔ wɔ asomdwoe mu. Bere a ɔsomafo Paulo kyerɛw ne krataa no kɔmaa Tesalonikafo Kristofo no, na ɛnyɛ honam fam Yudafo twetiafo no na wɔne Nyankopɔn te wɔ asomdwoe ne biakoyɛ mu. Ná ɛyɛ Yudafo a wɔmaa nnipadɔm bi sɔree wɔ Tesalonika na wɔhyɛɛ ɔsomafo Paulo sɛ onguan mfi saa kurow no mu, ne afei nso Beroia, akyiri yi no. (Asomafo no Nnwuma 17:5-15) Wɔ ne krataa a edi kan a ɔde kɔmaa Tesalonikafo no mu no, Paulo kyerɛwee sɛ: “Mo nso muhuu mo ankasa manfo nsam amane saa ara, sɛnea wɔn [asafo a ɛwɔ Yudea] nso wohui Yudafo mu no. Wɔn na wokum Awurade Yesu nso ne adiyifo no, na wotaa yɛn pam yɛn, nso wɔnsɔ Onyankopɔn ani, na wɔne nnipa nyinaa di asi. Wɔbara yɛn sɛ yɛnnkasa nnkyerɛ amanaman no, na wɔannye wɔn nkwa,​—wɔde hyɛ wɔn bɔne ma daa,​—nso abufuw no anya aba wɔn so awie.”​—1 Tesalonikafo 2:14-16.

19. Ɛnde na wobetumi ahwɛ kwan sɛ ɔwae no befi ase afi henanom so, na dɛn nti na wɔn mu na ebefi?

¹⁹ Ɛnde, ɛhe bio na wobetumi ahwɛ kwan sɛ ɔwae no befi ase afi sɛ Kristofo asafo no mu? Ɛyɛ Kristofo no na ɔsomafo no kyerɛw kɔmaa wɔn, sɛnea ɔde asafo a ɛwɔ Tesalonika no gyinaa hɔ maa wɔn no: “Paulo ne Silwano ne Timoteo de kɔma Tesalonikafo asafo wɔ yɛn Agya Onyankopɔn ne Awurade Yesu Kristo mu: Ɔdom ne asomdwoe a efi Agya Onyankopɔn ne Awurade Yesu Kristo nka mo.” (2 Tesalonikafo 1:1, 2) Na Kristofo yi betumi awae afi Onyankopɔn ho, ná wobetumi atew atua, asɔre atia Onyankopɔn, efisɛ na wɔwɔ Ɔno ne ne Mesia Yesu no mu na na wɔrenya ɔdom ne asomdwoe fi Onyankopɔn wɔn soro Agya no hɔ denam ne Ba Yesu Kristo so. Enti, henanom ne saa atuatewfo a wofi Kristofo asafo no mu no?

20, 21. (a) Dɛn nti na na ɔwae no remfi ase wɔ Yudafo man no mu, na mmom wɔ Kristofo asafo no mu? (b) Nsɛm bɛn na Paulo de bɔɔ mpanyimfo a wɔwɔ Efeso no kɔkɔ wɔ ɔwae a na ɛreba no ho?

²⁰ Ɔsomafo Paulo ankasa bɔɔ kɔkɔ sɛ, ɔwae, nyamesom mu ɔsɔretia anaa atuatew no fi asafo a mprempren ɛyɛ Onyankopɔn de no mu na ɛbɛba, efisɛ na W’apow Yudafo man no sɛ ne nkurɔfo a wapaw wɔn. Na afei wɔn a wɔwɔ Onyankopɔn asafo no mu ne honhom mu Israelfo, honhom mu Yudafo, ná ɛnyɛ honam fam Yudafo twetiafo man no bio. Paulo kyerɛw ne krataa a ɛto so abien kɔmaa Tesalonikafo no akyi mfe bi no, na Paulo wɔ kurow Mileto, Asia Kumaa mu a ɔretu ne kwan a etwa to akɔ Yerusalem. Mileto hɔ na ɔkasa kyerɛɛ Efeso asafo a ɛbɛn no mu “mpanyimfo kuw” no. Ɔreka ɔwae a ɛbɛba no ho asɛm no, Paulo ka kyerɛɛ saa mpanyimfo anaasɛ ahwɛfo no sɛ:

²¹ “Monhwɛ mo ho ne nguankuw nyinaa a honhom kronkron de mo asisi wɔn so ahwɛfo sɛ monyɛn Onyankopɔn asafo a ɔde n’ankasa [ba] mogya anya wɔn no yiye. Na minim sɛ me kɔ akyi no, mpataku bɔne bɛhyɛn mo mu a wɔrenkyɛe nguankuw no so. Nso mo ankasa mu nnipa bɛsɔre a wɔbɛka nkontomposɛm de atwe asuafo no adi wɔn akyi.”​—Asomafo no Nnwuma 20:28-30.

22, 23. (a) Petro krataa no mu nea ɛwɔ he mu na ɔno nso bɔɔ kɔkɔ tiaa ɔwae a na ɛreba no, na na ɔde rekɔma henanom? (b) Ɔkwan bɛn so na nea Petro kae wɔ hɔ no boa yɛn ma yehu “ɔsɛe ba” a onni mmara no?

²² Te sɛ ɔsomafo Paulo no, na ne yɔnko ɔsomafo Petro nso nim ɔwae a ɛbɛba no. Wɔ ne krataa a ɛto so abien na etwa to a ɔkyerɛw no bɛyɛ afe 64 Y.B. mu no mu no, Petro kyerɛw kɔmaa “wɔn a wɔanya gyidi a ne bo yɛ den sɛ yɛn de no, yɛn Nyankopɔn ne agyenkwa Yesu Kristo trenee mu.”

²³ Wɔ ne krataa a ɔde kɔmaa wɔn no mu no, Petro kɔɔ so kae sɛ: “Adiyisɛm bi amfa nnipa pɛ so amma pɛn, na Onyankopɔn nnipa kronkron no, sɛnea honhom kronkron de wɔn rekɔ no na wɔkasae. Na atoro adiyifo nso wɔ ɔman no mu, sɛnea atoro akyerɛkyerɛfo bɛba mo mu nso. Wɔn na wɔde ɔsɛe fekusɛm bɛba abɛhyɛ mu, na wɔapa Awurade a ɔtɔɔ wɔn na ogyee wɔn no po, na wɔde ɔsɛe a ɛba ntɛmntɛm aba wɔn ho so. Na bebree bedi wɔn ahohwisɛm no akyi, na wɔn nti wɔbɛka nokware kwan no ho nsɛmmɔne. Na wɔnam anibere so de nsisisɛm bɛpɛ mo ho mfaso. Wɔn na efi tete wɔn atemmu ntwentwɛn ase, na wɔn sɛe ntɔ nko.” (2 Petro 1:1, 21 kosi 2Pe 2:3) Eyi boa yɛn ma yehu saa “ɔsɛe ba” a onni mmara no.

24, 25. Esiane nea Paulo ne Petro kae wɔ atifi hɔ no nti, nsɛm bɛn na yebisa wɔ hu a yebehu nea “onipa a onni mmara” no yɛ ho?

²⁴ Esiane nea asomafo Paulo ne Petro ka fa ɔwae no ho nti, hena ne “onipa a onni mmara . . . ɔsɛe ba no” ankasa? “Mpanyimfo,” “ahwɛfo” a na wogyina Efeso asafo no ananmu no na ɔsomafo Paulo ka kyerɛɛ wɔn sɛ, nnipa bɛsɔre ‘abɛka nkontomposɛm,’ wɔ nyamesom mu no. Eyi dan asɛm no ba nyamesom akannifo a wɔwɔ Kristofo asafo no mu, wɔn a wɔasra wɔn anaasɛ wɔapaw wɔn sɛ ‘wɔnyɛn Onyankopɔn asafo’ no so. Ɛnde, henanom ne nyamesom akannifo a wɔkyerɛ sɛ wɔwɔ Onyankopɔn asafo mu a na wɔte sɛ “mpataku bɔne” no? Henanom ne wɔn a wɔkyerɛ sɛ wɔyɛ Kristofo akannifo a ‘wɔankyɛe nguankuw no so’ no? Henanom ne nyamesom akannifo a wɔsɔree na wɔkaa “nkontomposɛm” sɛnea ɛbɛyɛ a ‘wɔde bɛtwe asuafo’ a wɔwɔ asafo no mu “adi wɔn akyi” no? Henanom ne nnipa a te sɛ atoro adiyifo a na wɔwɔ tete Israelfo mu no, wɔada wɔn ho adi sɛ wɔyɛ “atoro akyerɛkyerɛfo” wɔ honhom mu Israelfo mu no?

²⁵ Yiw, henanom ne nyamesom akannifo a wɔde “ɔsɛe fekusɛm” aba wɔn a wosusuw sɛ wɔne Onyankopɔn asafo no mu no? Henanom ne saa akuw no akannifo a denam wɔn nyamesom nkyerɛkyerɛ me nneyɛe so no wɔapa ɔsoro “Awurade a ɔtɔɔ wɔn” ankasa no? Nyamesom akannifo bɛn na wɔada wɔn ho adi sɛ wodi “ahohwisɛm” ho fɔ wɔ wɔne wiase atumfoɔ abusuabɔ mu no? Nyamesom akannifo bɛn na wɔatwa sa bɔne ato hɔ ma wɔn nguankuw no nam so ma enti wɔaka “nokware kwan” no ho “nsɛmmɔne” no? Nyamesom akannifo bɛn na wɔama wɔn ani abere nneɛma a wɔn asafo mufo wɔ, na afei wɔde “nsisisɛm” apɛ wɔn ho mfaso?

“ONIPA A ONNI MMARA” NO A WOBEHU NO

26. Henanom so na wɔde nsa kyerɛ, na ɔkwan bɛn so na The Encyclopedia Americana ka nea wɔde nsa kyerɛ so no ho asɛm?

²⁶ Adesamma abakɔsɛm wɔ mfeha dunsia a atwam no mu de nsa kyerɛ Kristoman asɔfo so. So obi wɔ hɔ a ɔnte nea asɛm Kristoman “asɔfo” kyerɛ no ase? Sɛ saa a, ɛnde ma The Encyclopedia American (1929 de no) , Po 7, kratafa 90 nkyerɛkyerɛ mu nkyerɛ oniiko no, wɔ nsɛm a edidi so yi mu:

“ASƆFO (Latin clericus, efi Hela kléros, mu) , wɔ Kristofo Asɔre mu no, wɔde saa anokwafo afã no asie ama nyamesom mu adwumayɛ. Wɔn ho a woyi fii asɔremma ho no bɛdaa adi kɛse denam dwumadi ne abodin ahorow, hokwan ahorow, atade soronko ne su ahorow pii a wɔde bɛkaa ho no so. Wɔ Roma Katolek Asɔre no mu no, wɔwɔ asɔfo dibea ahorow awotwe, a ɛne asɔfo mma, wɔn a wɔwɔ dibea anan a ɛba fam no mu, ne wɔn a wɔwɔ dibea kronkron abiɛsa no mu a ɛne asɔfo nkumaa, asɔfo abediakyiri ne asɔfo. . . . Wobu abiɛsa a edi akyiri no sɛ ahyehyɛde kronkron. Asɔfo mma ne wɔn a wɔanya nkyerɛkyerɛ denhyɛ; denam saa amanne yi so no wɔyɛ wɔn akyerɛkyerɛfo anaa akyerɛwfo, ma enti wɔwɔ hokwan ne ahobammɔ ahorow ne asɛyɛde ahorow bi a asɔremma no nni bi. Wɔ Protestantfo asɔre horow mu no nsonsonoe a ɛda asɔfo ne asɔremma ntam no nyɛ kɛse saa.”

27. (a) Yesu asɛm bɛn na etia asafo no a wɔbɛkyekyɛ mu ayɛ no asɔfo ne asɔremma? (b) Wɔ Adiyisɛm no mu no, ɔkwan bɛn so na Yohane kaa asafo no mufo nyinaa boom?

²⁷ So Yesu Kristo a ɔyɛ Kristofo asafo no ti no kyerɛɛ n’asuafo no sɛ wɔmpaapae wɔn mu nyɛ no asɔfo kuw ne asɔremma? Nsɛmpa anan, Mateo, Marko, Luka ne Yohane anaa Asomafo no Nnwuma nhoma no anaa Adiyisɛm nhoma no mu baabiara nni hɔ a wɔakyerɛ sɛ ɛsɛ sɛ wɔpae n’asuafo no mu yɛ wɔn akuw abien. N’afotu ahorow no yɛ nea ɛbɔ ɛno abira. Wɔ asɔrefi hɔ wɔ Yerusalem no, Yesu ka kyerɛɛ n’asuafo no ne Yudafo nnipakuw no sɛ: “Na mo de, wɔmfrɛ mo Rabi; na obiako ne mo kyerɛkyerɛfo, na mo nyinaa yɛ anuanom. Na mommfrɛ obiara mo agya asase so; na obiako ne mo agya, ɔne nea ɔwɔ soro no. Nanso wɔmmfrɛ mo akyerɛkyerɛfo; na obiako ne mo kyerɛkyerɛfo, ɔne Kristo no. Na mo mu kɛse no nyɛ mo somfo.” (Mateo 28:8-11) Wɔ Adiyisɛm a wɔnam Yesu Kristo so de maa ɔsomafo Yohane no mu no, ɔkaa Kristo asuafo no nyinaa ho asɛm sɛ wɔyɛ asɔfo, sɛ “Wayɛ yɛn ahemman sɛ yɛnyɛ asɔfo mma n’Agya Onyankopɔn no. . . .” “Woayɛ wɔn ahemman ne asɔfo ama yɛn Nyankopɔn, na wobedi asase so ahene”​—Adiyisɛm 1:6; 5:10.

28. Ɔkwan bɛn so na Petro krataa a edi kan no nso kaa wɔn a wɔwɔ asafo no mu nyinaa boom biako?

²⁸ Saa ara na ɔsomafo Petro kyerɛw Kristofo no sɛ wɔn nyinaa yɛ asɔfo, sɛ: “Mo nso momma wɔmfa mo sɛ abo a nkwa wom nto aban, na moayɛ honhom mu dan, asɔfokuw kronkron, sɛ mobɛbɔ honhom mu afɔre a ɛnam Yesu Kristo so sɔ Onyankopɔn ani. Na mo de, moyɛ abusua a wɔapaw wɔn, ahene asɔfokuw, ɔman kronkron, ɔman a wafa wɔn ayɛ ne de, sɛ monka nea ɔfrɛɛ mo fii esum mu baa ne hann a ɛyɛ nwonwa mu no mmaninyɛ nkyerɛ.”​—1 Petro 2:5, 9.

29, 30. (a) Ɔkwan bɛn so na Douay Version Bible no de asɛmfua ‘asɔfo’ no di dwuma wɔ 1 Petro 5:1-3? (b) Ɔkwan bɛn so na nnɛyi Katolek nkyerɛase ahorow de Hela asɛmfua a yɛreka ho asɛm wɔ ha no ba?

²⁹ Engiresi asɛmfua “clergy” (asɔfo) no pue pɛnkoro wɔ Douay Version Bible no mu wɔ Petro krataa a edi kan no mu sɛnea edidi so yi: “Me a meyɛ teteni bi ne Kristo amanehunu ho dansefo ne anuonyam a wɔrebeyi adi no fafafo nso, mitu tetefo a wɔwɔ mo mu no fo sɛ: Monyɛn Onyankopɔn nguankuw a wɔwɔ mo mu no. Monhwɛ wɔn so, ɛnyɛ ɔhyɛ so, na mmom ɔdɔ so, sɛnea Onyankopɔn pɛ; ɛnyɛ adifudepɛ nti, na mmom koma a ɛpɛ nti; ɛnyɛ sɛ wɔn a wodi asɔfo (clergy) no so bakoma, mmom monyɛ nhwɛso mma nguankuw no.” (1 Petro 5:1-3, Dy) Nanso wɔ Bible nkyerɛase yi mu mpo no, wɔfrɛ Onyankopɔn honhom mu nguankuw no nyinaa “asɔfo,” na wɔka kyerɛ “tetefo” te sɛ ɔsomafo Petro sɛ wonnni “asɔfo” yi so bakoma. Nanso esiane sɛ wɔn ani nnye sɛnea Douay Version no de Hela asɛmfua kleʹros no ba (wɔ dodow kabea mu) wɔ 1 Petro 5:3 no ho no nti, nnɛyi Roma Katolek Bible nkyerɛase ahorow de Hela asɛmfua no di dwuma soronko wɔ Engiresi mu. Sɛ nhwɛso:

³⁰ “Ɛnyɛ kankabi wɔ kuw biara a wɔde wɔn ahyɛ wo nsa no so, na mmom yɛ nhwɛso sɛnea ɛbɛyɛ a nguankuw no nyinaa betumi asua.” (The Jerusalem Bible) “Yɛ nhwɛso ma nguankuw no, nni wɔn a wɔde wɔn ahyɛ wo nsa no so abakoma.” (The New American Bible) “Ɛnyɛ sɛ wudi nea wɔde ahyɛ wo nsa no so abakoma, na mmom yɛ nhwɛso ma nguankuw no.”​—The New Testament in the Westminster Version of the Sacred Scriptures.

31. Esiane nea Yesu kae wɔ Mateo 23:10-12, 14, 33 no nti, dɛn nti na yebisa nnipa a wɔda wɔn ho nsow sɛ “asɔfo” a wɔatew wɔn ho afi “asɔremma” ho no adwene ho asɛm?

³¹ Esiane sɛ Yesu Kristo asomafo a honhom kaa wɔn no de asɛm “asɔfokuw” ne “asɔfo” (Douay Version) no di dwuma ma Onyankopɔn nguankuw no nyinaa na wɔmfa nni dwuma wɔ “tetefo” anaa “mpanyimfo” no nkutoo ho te sɛ ɔsomafo Petro nti, ɛyɛ nea ɛho hia wɔ ha sɛ yebebisa sɛ: Henanom ne Kristoman nyamesom akannifo a wɔbɔ wɔn ho abodin sɛ “asɔfo” na wɔfrɛ wɔn ho “asɔfokuw” a wɔatew wɔn ho na wɔda nsow wɔ nea wɔfrɛ wɔn “asɔremma” ho no, asɛm a empue wɔ Kyerɛw Kronkron no mu no? Dɛn ne nyamesom akannifo yi adwene nti a ɛma wɔda wɔn ho nsow saa? Wɔpɛ sɛ wɔyɛ wɔn ho dɛn? Yɛkae sɛ bere a Yesu Kristo rekasa atia Yudafo akyerɛwfo ne Farisifo no sɛ wɔyɛ “nyaatwomfo” ne “awɔ, nhurutoa mma” no ɔkae sɛ: “Nanso wɔmmfrɛ mo akyerɛkyerɛ; na obiako ne mo kyerɛkyerɛfo, ɔne Kristo no. Na mo mu kɛse no nyɛ mo somfo. Na obiara a ɔbɛma ne ho so no, wɔbɛbrɛ no ase; na obiara a ɔbɛbrɛ ne ho ase no, wɔbɛma no so.”​—Mateo 23:10-12, 14, 33, Douay Version.

32. Bere bɛn na nyamesom akannifo a wɔwɔ Kristoman mu no fii ɛse frɛɛ wɔn ho “asɔfo” a wɔda nsow wɔ “asɔremma” ho?

³² Nokwarem, bere bɛn na Kristoman nyamesom akannifo no fii ase frɛɛ wɔn ho asɔfokuw na wogyee abodin “asɔfo” no maa wɔn ho? Nea edi asɛmti: “2. Nsonsonoe a Ɛda Asɔfo ne Asɔremma Ntam” so no, M’Clintock ne Strong’s Cyclopaedia, Po II, kratafa 386, ka wɔ “abirabɔ” anaasɛ nsonsonoe a ɛda asɔfo ne asɔremma ntam no ho sɛ:

“Abirabɔ a ɛwɔ asɔfo ne asɔremma mu wɔ Yudafo mu no yɛ nea na mfiase no wonnim wɔ Kristofo mu; na ɛyɛ ‘bere a nnipa hwee ase fii asɛnka no ho kɔɔ Yudafo nsusuwii mu’ no na Kristofo gyidifo nyinaa asɔfodi adwene no maa nea ɛne asɔfo anaa asɔfokuw no kwan koraa. . . . Enti Tertulian, mpo (De Baptisimo, c. 17, ansa na ɔrebɛyɛ Montasom muni) : ‘Asɔremma no nso wɔ hokwan sɛ wɔbɛbɔ asu ne ade na wɔakyerɛkyerɛ wɔ ɔman no mu. Wɔnam Onyankopɔn dom so de Onyankopɔn Asɛm ne asubɔ ne nea ɛkeka ho no ama yɛn nyinaa, na enti ɛsɛ sɛ Kristofo nyinaa de di dwuma sɛ adom kronkron no nnwinade. Nanso asemmisa a ɛwɔ ha no nyɛ nea ɛfa nea wɔma nnipa nyinaa hokwan ho nko, na mmom nea eye wɔ tebea horow a ɛwɔ hɔ ase nso ho. Yɛbɛpɛ sɛ yɛde ɔhotewfo Paulo asɛm no di dwuma wɔ ha, ‘Nneɛma nyinaa hokwan wɔ hɔ ma nnipa, nanso ɛnyɛ nneɛma nyinaa na eye.’ Sɛ yɛhwɛ nhyehyɛe a ɛho hia sɛ wɔma ɛtra Asɔre no mu no a, na ɛsɛ sɛ asɔremma no di hokwan a wɔwɔ sɛ asɔfo a wɔbɔ asu ne nea ɛkeka ho no ho dwuma bere a bere ne tebea horow hwehwɛ sɛ wɔyɛ saa no nkutoo.’ Efi Cyprian . . . asɔfo dibea nhyehyɛe no agya bere so no, nsonsonoe a ɛda asɔfo ne asɔremma ntam no begyee din, na ankyɛ na wogye toom wɔ wiase nyinaa. Ampa, efi afeha a ɛto so abiɛsa no so reba no, ɛkame ayɛ sɛ wɔde asɛm clerus (kleʹros, ordo) no dii dwuma wɔ ɔsom adwuma no nkutoo ho na ama asono no wɔ asɔremma no ho. Bere a Roma asɔfo dibea no kɔɔ so no, asɔfo no ammɛyɛ wɔn a wɔda nsow nko (a ehia asomafo nhyehyɛe ne nkyerɛkyerɛ horow no nyinaa ka ho) , na mmom wobegyee wɔn toom sɛ asɔfodi koro pɛ, ne ɔkwan titiriw a onipa nam so ne Onyankopɔn di nkitaho nso.”

33. Ná hena ne saa Cyprian yi, na dibea bɛn na na okura wɔ asafo no mu wɔ afeha a ɛto so abiɛsa no mu?

³³ Sɛnea, The Encyclopedia Americana, Po 8, kratafa 368 kyerɛ no, wɔwoo Thascius Caecilius Cyprian a wɔbɔɔ ne din wɔ atifi hɔ no bɛyɛ 200 Y.B. mu na owui wɔ Carthage, Afrika, September 14, 258. “Wɔbɔɔ no asu (246) akyi bere tiaa bi no, wɔsraa no sɛ ɔsɔfo na afei Kristofo a wɔwɔ Carthage no paw no sɛ wɔn sɔfo panyin (248) . . . Ɔyɛɛ nneɛma pii de hyɛɛ ne dibea no mu den. Wɔyɛɛ nhyiam ahorow ason wɔ ne bere so, nea etwa to no wɔ 256 mu.” Ɛwom sɛ wobuu Obibini sɔfo panyin yi sɛ Asɔre “agyanom” no biako na Roma Katolek Asɔre no yɛɛ no ɔhotewfo de, nanso nokwasɛm no wɔ hɔ sɛ na ɔyɛ ɔsɔfo, asɔfokuw a wɔbae wɔ Yesu Kristo asomafo no ne wɔn mfɛfo a na wɔka wɔn ho no wu akyi no biako.

34. Bere a Bible no de asɛm “onipa a onni mmara” no di dwuma no, na onipa bɛn ho asɛm na ɛreka, na dɛn nti na ɛte saa?

³⁴ Ɛyɛ wɔn a wɔfrɛ wɔn ho “Kristofo” asɔfo yi na wɔdaa wɔn ho adi sɛ wɔne “onipa a onni mmara . . . ɔsɛe ba,” a “ɔwae,” “ɔsɔretia” anaa “atuatew” no fa ne ho no. Ɛda adi sɛ bere a ɛde asɛm yi di dwuma no, na Bible no reka ‘nnipa’ kuw a atra ase bere tenteenten a emufo anaasɛ wɔn a wɔwom no sakra fi bere kɔ bere mu ho asɛm. Enti nnɛ ɛsono “onipa a onni mmara” yi mufo wɔ afeha a ɛto so abiɛsa de no ho.

WƆYƐ WƆN HO SƐ ONYANKOPƆN

35. Dɛn nti na ɛnyɛ nwonwa sɛ “onipa a onni mmara” no bɛpere Onyankopɔn dibea no? Ɔpere kodu he?

³⁵ Esiane sɛ asɔfo a wɔne “onipa a onni mmara” yi “ɔwae” anaasɛ “atuatew” no yɛ nea etia Yehowa Nyankopɔn nti, ɛnyɛ nwonwa sɛ saa “onipa” kuw yi bɛpere Onyankopɔn dibea no, pɛ sɛ ɔyɛ nne ho onyame. Nea odii kan tew atua tiaa Yehowa Nyankopɔn a ɔne Satan ɔbonsam yɛɛ ne ho nyame, ma enti ɔsomafo Paulo frɛ no “wi yi ase nyame.” (2 Korintofo 4:4) Wɔ Satan Ɔbonsam ase no, tete Babilon hene bosonsomfo no pɛe sɛ ɔne Yehowa Nyankopɔn a na n’asɔrefi wɔ Yerusalem no bɛyɛ pɛ. Sɛnea Yesaia 14:14 kyerɛ no, tete Babilon hene no kae wɔ ne koma mu sɛ: “Mɛforo makɔ amununkum sorɔnsorɔmmea, mɛyɛ me ho sɛ Ɔsorosoroni no.” Ná osusuw sɛ ne nsa aka nea ɔpɛ bere a ɔsɛee Yerusalem ne Yehowa Nyankopɔn asɔrefi no wɔ afe 607 A.Y.B. mu no. Nanso, Yerusalem ne n’asɔrefi no a saa Babilonni a ɔpɛe sɛ ɔne Yehowa Nyankopɔn bɛyɛ pɛ no sɛee no no yɛ ade ketewaa bi, sɛ wɔde toto nneɛma nyinaa a ɛfa Yehowa Nyankopɔn ho a asɔfo a wɔne “onipa a onni mmara” yi asɛe no no ho a.

36. Ɔkwan bɛn so na saa “onipa” kuw no yɛ n’ade te sɛ nea ɔnnan Yehowa, na dɛn na Paulo ka kyerɛɛ Tesalonikafo no wɔ saa “onipa” no ho?

³⁶ Esiane sɛ ɔyɛ otuatewfo a onni mmara wɔ nneɛma a ɛfa nyamesom ho mu nti, wayɛ n’ade te sɛ nea ɔnnan Ɔsorosoroni ne Ade nyinaa so tumfoɔ Nyankopɔn, Yehowa no, te sɛ nea nokware Nyankopɔn teasefo koro no mmara mfa ne ho. Ɔsomafo Paulo nkɔ akyiri biara bere a ɔka ade a ɛyɛ nwonwa yi ho asɛm nkɔmhyɛ kwan so wɔ “onipa a onni mmara” yi ho no: “Ɔsɔre na ɔma ne ho so hyɛ nea wɔfrɛ no Nyankopɔn anaa wɔsom nyinaa, ma ɔno kɔtra Onyankopɔn asɔredan mu de ne ho kyerɛ sɛ ɔne Nyankopɔn. Monkae sɛ mewɔ mo nkyɛn no, mekaa mo eyinom anaa?”​—2 Tesalonikafo 2:4, 5.

37. Bere a wɔresi sɛnea Paulo nkɔmhyɛ no anya mmamu so dua no, nyamesom mu nipa titiriw bɛn na ebia obi de nsa bɛkyerɛ no so, na dɛn ntia?

³⁷ Ampa, bere a wɔresi sɛnea asɔfo a wɔne “onipa a onni mmara” no ama nkɔmhyɛ yi aba mu so dua no, ebia obi de nsa bɛkyerɛ sɛnea wɔn a wɔfrɛ wɔn ho “Kristofo” asɔfo no biako akasa na wayɛ n’ade anaasɛ wakyerɛ sɛ ɔyɛ onyame na wɔayɛ no saa no so. Sɛ nhwɛso no, ebia obi de nsa bɛkyerɛ Roma Katolek Asɔre no paapa no so, na wafa nea wɔaka afa paapa sɔfo panyin a ɔwɔ Roma no ho wɔ Ferraris nsɛm asekyerɛ nhoma a ɛfa asɔfodi ho mu no aka, a ɛne sɛ:

Paapa no wɔ anuonyam ne dibea a ɛkorɔn a ɛkyerɛ sɛ ɔnyɛ onipa ara kwa, na mmom sɛnea ɛte no Onyankopɔn, ne Onyankopɔn Nsiananmu. . . . Enti wɔde ahenkyɛw abiɛsa na ahyɛ paapa no, sɛ ɔsoro, asase ne hell so ‘hene. . . . Dabi, paapa no anuonyam ne tumi nyɛ nea ɛfa ɔsoro, asase ne hell nneɛma nkutoo ho, na mmom ɔsen abɔfo nso, na ɔyɛ wɔn panyin . . . Ma enti sɛ abɔfo tumi fom fii gyidi no ho, anaasɛ wɔmaa nkate ahorow a ɛbɔ no abira kwan a, ɛnde na paapa no betumi abu wɔn atɛn na wapam wɔn. . . . Ɔwɔ anuonyam ne tumi kɛse araa ma ɔne Kristo tra atemmu agua koro so . . . Ma enti ɛkame ayɛ sɛ biribiara a paapa yɛ no fi Onyankopɔn anom. . . . Sɛnea ɛte no, paapa no yɛ Onyankopɔn wɔ asase so, Kristo nokware sahene koro pɛ, ahene nyinaa hene a ɔsen biara, a okura tumi nyinaa; a ɔno na wɔde asase so di ne ɔsoro ahenni ahyɛ ne nsa. . . . Paapa no wɔ tumi ne ahoɔden kɛse a otumi sakra mmara kronkron no. . . . Ɛtɔ bere bi a paapa no tumi dan mmara kronkron no denam yi a oyi bi fi mu ne nkyerɛase a ɔde ma so,” ne nea ɛkeka ho.

38. Nanso, bere a wɔde nsa kyerɛ ɔsɔfo biako bi so no, dɛn na ɛsɛ sɛ wɔkae, na enti ɔkwan bɛn so ma nkɔmhyɛ yi a ɛfa “onipa mmara” ho no anya mmamu ankasa?

³⁸ Nanso, ɛnsɛ sɛ yɛn werɛ fi sɛ “onipa a onni mmara” no nyɛ nyamesom ɔkannifo biako bi te sɛ paapa a ɔwɔ Rome no anaasɛ Helafo Orthodox agya a ɔwɔ Atene, Helafo Orthodox agya a ɔwɔ Konstantinopole (Istanbul) no anaasɛ nyamesom mu agya foforo bi. Nea “onni mmara” a wɔkaa ne ho asɛm too hɔ no yɛ ‘nnipa’ kuw, wɔn a wɔkyerɛ sɛ wɔyɛ “Kristofo” no asɔre mu nyamesom asɔfo no nyinaa. Ɛwom, nea saa “onipa” a ɛyɛ asɔfokuw no muni titiriw biako yɛ no de asodi to asɔfokuw no mufo nkae nyinaa so efisɛ wɔpene nea ɔyɛ no so anaasɛ wɔnnkasa ntia anaasɛ wɔda so ara wɔ asɔfo nhyehyɛe no mu. Wɔn nyinaa di nea asɔfokuw no muni bi yɛ bere a ɔrekasa anaa ogyina kuw no ananmu reyɛ biribi no ho fɔ. Ɛyɛ nea asɔfokuw no nyinaa bom yɛ wɔ mfehaha no mu no na ɛma nkɔmhyɛ a ɛfa “onipa a onni mmara” no ho no nya mmamu.

39. Ɔkwan bɛn so na “onipa a onni mmara” kuw no ada ne ho adi sɛ ‘ɛsɔre tia’ Yehowa?

³⁹ “Onipa a onni mmara” kuw no ada ne ho adi sɛ ‘ɛsɔre tia’ denam wiase no “adamfo” a ɛyɛ no so, sɛnea mmara a osuani Yakobo a honhom kaa no no kae wɔ ne krataa no mu kyerɛ no: “Wiase adamfofa ne ɔtan a wɔtan Onyankopɔn. Enti obiara a ɔbɛyɛ wiase yi adamfo no yɛ Onyankopɔn tamfo,” (Yakobo 4:4, Douay) Ɔsɔre tia Yehowa Nyankopɔn bere a ɔsɔre tia Onyankopɔn Asɛm a efi honhom mu a wɔakyerɛw no, ná ɔbɔ mmɔden sɛ ɔbɛma ayɛ hunu, na ɔbɔ mmɔden mpo sɛ obesiw Bible no ano anaasɛ ɔremma wɔn a wɔwɔ asɔre no mu nsa nka no. Ɔsɔre tia Yehowa Nyankopɔn bere a ɔsɔre tia Kristo asuafo a wɔde honhom ne nokware resom Yehowa Nyankopɔn nam Yesu Kristo so na wɔtaa wɔn no. (Yohane 4:24) Ɔsɔre tia nokware Nyankopɔn teasefo koro no denam fa a ɔfa ɔsom ne nkamfo a ɛyɛ Onyankopɔn yi de, na ɔde saa ɔsom ne nkamfo no ma asɔfokuw a wɔhyɛ wɔn anuonyam no.

40. Ɔkwan bɛn so na “onipa a onni mmara” kuw no abɔ mmɔden ayɛ ne ho asase so onyame koro pɛ a ɔwɔ hɔ, sɛnea ɛfa Asɔre ne Ɔman ho no?

⁴⁰ “Onipa a onni mmara” kuw no pɛ sɛ ɔyɛ onyame koro pɛ a ɔwɔ asase so, nokwarem, asase so anyame mu nyame. Wɔada eyi adi wɔ abusuabɔ a na Kristoman Asɔre no ne amammui Man no wɔ no mu. Wɔ Asɔre ne Ɔman aware yi mu no, asɔfo no abɔ mmɔden bere nyinaa sɛ wɔbɛyɛ wɔn a wodi kan a wɔde akwankyerɛ ma. Asɔre ne Ɔman aware yi akɔ so fi Konstantino bere so. Eyi ayɛ amammui aware ankasa, efisɛ nea asɔfo no betumi anya afi mu ne tumidi, nkɛntɛnso, ahobammɔ, mmoa ne pɛsɛmenkominya mfaso ahorow. Ɛdefa “Asɔre ne Ɔman” ho no, The Encyclopedia Americana, Po 6, nkratafa 657, 658, se:

Wɔ ahyehyɛde ahorow abien yi ntam wɔ nnɛ bere yi mu no, biakoyɛ ankasa a wobenya ho yɛ den. Ɛte sɛnea sɛ biribi a ɛyɛ hu bi ansi a, apereperedi a akɔ so fi bere tenten yi bɛkɔ so bere nyinaa. Ayɛ nea ɛyɛ awerɛhow. Ayɛ nea ɛfa nneɛma pii ho na ama akyinnyegye ahorow a emu yɛ den asɔre. Ahyɛ basabasayɛ ahorow nyinaa bi ho nkuran na wɔakyerɛw nsɛm ahorow a ɛso bi nni atiatia wɔn ho wɔ amammui mu ɔtan no akyi. Ɛnyɛ nnakoro nnakoro amammui ntam ntawtawdi ara kwa. . . . Wɔ Konstantino ase no, Asɔre no de ne ho hyɛɛ wiase nyinaa dwumadi mu sɛ nea ɛne afoforo abom redi dwuma sɛ wɔn a wobue nnipa no ani. Bere a wogye toom sɛ honhom mu sodifo no, ɛde nkakrankakra nyaa trabea ne din sɛ bere tiaa mu tumi. Ɛbɛyɛɛ wiase tumi. Yiyedi yi ne Asɔre no asiane ahorow pii no nyinaa mfiase. . . . Efi Konstantino so baa Charlemagne so, na bere a ɔregye Asɔre no atom mmara kwan so no, ɔmanfo mmara no kãa ne nniso no. Efi Charlemagne so besi bere a na ɛrebɛn Nyamesom mu Ɔsesɛw no, na Asɔre ne Ɔman no yɛ biako na na wogye tom wɔ baabiara sɛ ɔman no hyɛ honhom mu tumidi no ase.

41. (a) Nyamesom mu dibea bɛn na na Roma ahempɔn no kura, a na ɛho hia sɛ “onipa a onni mmara” no ma ne ho so tra? (b) Nyamesom mu dibea bɛn na na Roma ɔhempɔn no kura, na ɔkwan bɛn so na ɔde eyi dii dwuma wɔ asɔre a na awae no ho?

⁴¹ Ɛyɛ nokware wɔ abakɔsɛm mu sɛ na wobu abosonsom Roma Ahemman no ahempɔn no se anyame, na wɔmaa wɔn aduhuam te sɛ anyame anaa akronkronfo. Efi Ɔhempɔn Konstantino Ɔkɛseɛ no bere so wɔ afeha a ɛto so anan no mu no, asɔfo mpanyin a ‘wɔawae’ no de wɔn ho fam Ɔman no na wɔpɛe sɛ wobenya tumi a ɛsen Roma ɔhempɔn a wɔayɛ no onyame no de. Ɔhempɔn Konstantino bɔɔ mmɔden sɛ ɔbɛka abosonsom ne Kristosom abom, na ɔhyɛɛ mmara sɛ ɛsɛ sɛ asɔfo mpanyin a wɔawae no som no yɛ Ɔman som. Ɛde kosi bere a owui wɔ 337 Y.B. mu no, wɔbɔɔ no abosonsom abodin a ɛne Pontifeks Maksimo, nsɛm a ɛfa nyamesom ho no ti; na ɛyɛ bere a ɔyɛ Pontifeks Maksimo no na Konstantino a na wonnya mmɔɔ no asu no frɛɛ Nicean Bagua no wɔ 325 Y.B. mu sɛ ɔrebɛsiesie asɔre no asɔfo mpanyin nyamesom mu ntawtawdi ahorow no. Ɛbere no mu na ɔpenee abosonsom nkyerɛkyerɛ a ɛne Baasakoro (Onyankopɔn koro wɔ Nnipa Baasa mu) no so sɛnea asɔre no asɔfo mpanyin no pii kyerɛkyerɛ no.

[Ase hɔ nsɛm]