Ahenni Ɔsɛmpɔw No Akyi A Wogyina Wɔ Wiase Nyinaa

“[Yehowa], woma ɔman no dɔ, woma ɔman no dɔ, w’anim aba nyam, wotrɛw asase no ahye nyinaa mu.”​—YESAIA 26:15.

 1. (a) Ɔkwan bɛn so na nnɛyi “ɔman” bi ama Yesaia 26:2 anya mmamu? (b) Ɔkwan bɛn so na ɛsono “ɔman” yi wɔ Wiase aman horow no ho?

ƆMAN bɛn na Yehowa hyira no ma ɛdɔ saa? Ɛyɛ ‘ɔman trenee a ekura nokwaredi mu no.’ (Yesaia 26:2) Ɛyɛ nokware Kristofo honhom mu man a Yehowa ahyehyɛde a ɛwɔ soro, “ɔsoro Yerusalem,” woo no “prɛko” wɔ yɛn bere so afe 1919 mu no. Nea ɛbɔ asase so aman ne wɔn asɔfo a wɔkoo Wiase Nyinaa Ko I de hwehwɛɛ wiase tumidi abira no, Yehowa “man” no de nokwaredi a edi mu ma Mesia Ahenni, a wɔde sii hɔ ɔsoro wɔ 1914 mu no. (Galatifo 4:26; Yesaia 66:8; Adiyisɛm 11:15-18) Yehowa de “ɔman trenee” yi baa honhom mu paradise Ahenni dwumadi mu ma efii ase de adansedi a etwa to maa asase so aman no nkurɔfo.​—Mateo 24:14; 25:31-33.

 2. Dɛn nti na “ɔman” yi di ahurusi?

² Nea ɛne nkɔmhyɛ dwom a ɛwɔ Yesaia 26:1-6 hyia no, ɔman a wɔawo no foforo no mufo ahyɛn apon akɛse a wɔabue mu na wɔrebɛn “Bepɔw Sion ne Onyankopɔn teasefo kurow, ɔsoro Yerusalem.” (Hebrifo 12:22) Saa Ahenni adedifo yi de anigye tie nsɛm a ɛwɔ dwom no mu no, sɛ: “Momfa mo ho nto [Yehowa] so daa daa, efisɛ Yah [Yehowa] ne daa botan.” Yehowa ‘ama ɔman no adɔ,’ ma adu ne mayɛ, na saa ɔman kronkron yi mufo yi Yehowa ayɛ sɛ wɔn “Botan” ne wɔn “Hene,” a na wɔwɔ ahotoso sɛ ɛrenkyɛ na wama n’atirimpɔw ahorow a ɛso nni no nyinaa abam.​—Yesaia 26:15; 25:8.

 3. Ɔkwan foforo bɛn so nso na wɔahyɛ Yehowa anuonyam?

³ Mfe kakraa yi mu no Yehowa ‘atrɛw’ ne teokrase asase no ‘ahye mu’ bio. Wayɛ eyi na ama ‘nneɛma pa’ a ɛwɔ wiase aman horow no nyinaa mu​—“nnipakuw kɛse” a wɔba bɛyɛ ne nkurɔfo a wɔahyira wɔn ho so no mufo​—no anya baabi atra. Eyinom ‘de anuonyam hyɛ ofi no ma,’ bere a wɔn nso wodi ne din ne Ahenni no ho adanse no.​—Hagai 2:7; Adiyisɛm 7:9, 15.

Yehowa De Bi Ka Ɔman No Ho Wo 1982 Mu

 4. (a) Ɔkwan bɛn so na Hesekiel 9:1-11 yɛ nhwɛso fɛfɛ ma wɔn a wɔreyɛ ‘agyiraehyɛ’ adwuma nnɛ no? (b) Esiane yɛn adwuma ho nkontaa a yɛde nokwaredi bu nti, anigye bɛn na yebetumi anya?

⁴ Bere a wofi koma nyinaa mu da Ahenni ɔsɛmpɔw no adi no, Yehowa Adansefo bu wɔn ɔsram biara dwumadi ho akontaa. Wɔ eyi mu no, wɔte sɛ ɔbarima a ɔkyerɛwfo toaa bɔ n’asen, a wɔka ne ho asɛm wɔ Hesekiel 9:1-11, a wɔkyerɛɛ no sɛ ɔnhyɛ nkurɔfo moma so agyirae mma ogye na ɔde nokwaredi bɔ amanneɛ kyerɛ Yehowa sɛ, “Mayɛ sɛnea wohyɛɛ me no” no. Anigye bɛn ara na ebetumi ayɛ wɔ Ɔsom Nhyiam horow ase sɛ wobɛte asafo no nkontaabu fɛfɛ ho asɛm na wɔahu sɛ wo nso wo nkontaabu ka ho na ɛyɛɛ saa, ɛwom mpo sɛ ebia na ɛte sɛ ‘okunafo no de no’ ara kwa de! Afei nso, bere a afe biara yɛhwehwɛ adwuma a yɛn nyinaa yɛe no mu wɔ Yehowa Adansefo wiase nyinaa afe afe nkontaabu no mu no, ebetumi ayɛ anigye sɛ yebehu sɛ yɛn nso yɛn nkontaabu ka wiase nyinaa kyerɛwtohɔ fɛfɛ no ho, sɛ esua dɛn ara mpo a!​—Marko 12:42.

 5. (a) Ɔkwan bɛn so na Yehowa ahyɛ ne ho anuonyam wɔ 1982 Ɔsom Afe Nkontaabu no ho? (b) Ɔkwan bɛn so na ‘asuafoyɛ’ adwuma no asow aba?

⁵ Wubehu “1982 YEHOWA ADANSEFO WIASE NYINAA ƆSOM AFE NKONTAABU” no wɔ 1983 Afe Nhoma no nkratafa 24-31. Saa ɔsom adwuma ho kyerɛwtohɔ fɛfɛ yi hyɛ ɔsorosoroni Awurade Yehowa din kɛse no anuonyam! Bere a yɛhwɛ dodow nkabom ahorow no wɔ nkratafa 30 ne 31 no, yehu nkɔso a ɛhyɛ nkuran kɛse, a ɛyɛ ɔha biara mu nkɔanim 4.2 wɔ dodow a wonya Ahenni adwuma no mu kyɛfa ɔsram biara wɔ Yesu ahyɛde no ho osetieyɛ mu no mu: “Monkɔ nkɔyɛ amanaman nyinaa m’asuafo.” Afei nso, Adansefo dodow foforo a ɛkɔ soro sen biara 2,477,608 a wonyaa “baguam ne afie afie” asɛmpaka adwuma no mu kyɛfa bere bi wɔ afe no mu no nso wɔ hɔ.​—Mateo 28:19; Asomafo no Nnwuma 20:20.

 6. Ɛdefa adwuma a wɔde ahyɛ wɔn nsa no ho no, anidaso a emu yɛ den bɛn na Yehowa Adansefo wɔ?

⁶ Nanso, Yehowa Adansefo nhwɛ kwan sɛ wɔbɛsakra wiase no nyinaa. Mmom no, ahyɛde a wofi soro de ama wɔn ne sɛ ‘wɔmpae Yehowa anisɔ afe ne yɛn Nyankopɔn aweredi da.’ Yɛn anidaso ne mpaebɔ ne sɛ nnipa bebrebe a wɔwɔ asase so no mu ɔpepem pii begye Ahenni asɛm no atom ansa na “ahohiahia kɛse” no ayi nhyehyɛe horow a edi awu na ɛsɛe ade nyinaa afi hɔ. Ɛno na ‘Yehowa ho nimdeɛ bɛyɛ asase ma, sɛ nsu kata ɛpo so no.’​—Yesaia 61:2; Mateo 24:14, 21, 22; Yesaia 11:9.

 7. Ɔkwan bɛn so na Yehowa ahyehyɛde no asiesie ne ho ama ntrɛwmu foforo?

⁷ Bere a wɔhwɛ kwan sɛ ntrɛwmu kɛse bɛba ntɛmntɛm wɔ Ahenni adwuma no mu no, Yehowa Adansefo a wɔwɔ wiase nyinaa ayɛ adwuma denneennen wɔ mfe kakra a atwam yi mu de atrɛw wɔn dwumadibea ahorow no mu. Asafo ti a ɛwɔ Brooklyn, New York, no asiesie dwumadibea ahorow a ɛwɔ 25 Columbia Heights no atrɛw mu, na wɔde nnɛyi nhoma tintim mfiri a ɛyɛ nwonwa redi dwuma wɔ Brooklyn ne Watchtower Farms. Asase so nyinaa no, Asafo no baa dwumadibea ahorow bɛboro 30 resisi adan afoforo a ɛyɛ akɛse, a ebinom ho mfonini wɔ kratafa a edi so no mu. Wɔasiesie Yehowa ahyehyɛde no ama nkɔso ne ntrɛwmu foforo!

 8. Ɛdefa Ahenni adawurubɔfo nkɔanim ho no, nneɛma a ɛyɛ anigye bɛn na wuhui bere a wohwehwɛɛ nkontaabu a ɛwɔ 1983 Afe Nhoma no nkratafa 24 kosi 31 no?

⁸ Ne nyinaa mu no, aman 95 a wɔwɔ wɔn a wɔabobɔ wɔn din wɔ Ɔsom Afe Nkontaabu no mu no nyaa Ahenni adawurubɔfo dodow a ɛkɔ soro sen biara wɔ 1982 mu, na eyinom mu binom yɛ nea ɛkɔ soro kɛse. Sɛ nhwɛso no, Ahenni no ho asomfo bɛboro 1,000 yɛɛ adwuma nea edi kan wɔ Hong Kong kurow kɛse no mu. (Yesaia 60:22) Brazil kɔɔ anim, ma wonyaa adawurubɔfo dodow foforo 133,377 wɔ asɛnka adwuma no mu, na oyi bɛyɛɛ Adansefo “kuw” a ɛsõ sen biara wɔ United States akyi. (Mika 2:12) Sɛ́ nyamesom kuw a ne kɛse to so abien wɔ Italy a ɛyɛ Katolekfo man mu no, Yehowa Adansefo nyaa ɔha biara mu nkɔanim 8, a ɛyɛ Ahenni adawurubɔfo dodow a ɛkɔ soro sen biara 98,172. (Marko 4:8, 20) Ɛpo mu nsupɔw ahorow, akɛse ne nketewa, efi Australia kosi Caribean, nyinaa nyaa adawurubɔfo dodow foforo a ɛkɔ soro sen biara. (Yesaia 42:10) Ɛyɛ anigye sɛ yehu nkɔso wɔ nsase a wɔwɔ nsɛm tebea a emu yɛ den kɛse, te sɛ Argentina, El Salvador, Pakistan ne Uganda, so. (Dwom 91:9, 10) Aman a Yehowa ahyehyɛde no ayɛ adwuma akyɛ wɔ hɔ no nso nyaa nkɔanim Britania, Canada, West Germany​—ne Amerika, a enyaa Ahenni asɛnkafo dodo foforo a ɛsen biara 613,007 wɔ August mu, a ɛyɛ ɔha biara mu nkɔanim 8.8 no.​—Asomafo no Nnwuma 16:5.

Asɛmpa No Ho “Akwampae Adwuma”

 9. (a) Dɛn ne amanneɛbɔ a ɛfa akwampaefo nkɔanim ho? (b) Dɛn nti na wɔkamfo saa adwuma yi kyerɛ wɔn a wobetumi ayɛ saa nyinaa?

⁹ Saa Ahenni ho asɛnkafo a wɔwɔ wiase nyinaa no mu bɛyɛ 172,859 buu akontaa sɛ asomfo “akwampaefo” ɔsram biara, ma wɔde bere a ɛdɔɔso kaa asɛmpa no kyerɛɛ afoforo da biara. Sɛ yɛde toto afe a etwaam no ho a, adwumayɛfo a wɔde bere nyinaa yɛ saa yi dodow kɔɔ anim ɔha biara mu 14! Afoforo nso reyɛ nhyehyɛe sɛ wɔde wɔn ho bɛhyɛ saa ɔsom adwuma a ɛyɛ anigye yi mu. Woka eyinom ho? Ampa, ɛbɛma woatumi ‘de adansedi pa ama,’ sɛnea asomafo no yɛe no, wɔ nhyira a ɛso nni a ɛrenkyɛ wɔn a wɔba Yehowa nkyɛn, na ‘wɔkyerɛ yɛn Awurade Yesu’ mu gyidi nsa bɛka no ho.​—Asomafo no Nnwuma 2:40; 8:25; 10:42; 20:21, 24; 23:11; 28:23.

10. (a) Ɔkwan bɛn so na wobetumi de nnɛyi akwampae adwuma atoto Nasirifo som adwuma wɔ Israel no ho? (b) Ɔkwan bɛn so na Yehowa Adansefo ayɛ adwumaden ankasa wɔ nsase ahorow so?

¹⁰ Ɛwom sɛ wɔnka ntam sɛ wɔbɛyɛ daa asɛnkafo de, nanso saa akwampaefo anokwafo yi, a “akwampaefo aboafo” (a ebia wɔbɛsom saa bɛyɛ ɔsram anaa asram abien) pii ka ho no te sɛ Nasirifo no wɔ tete Israel, efisɛ mpɛn pii no wɔde nneɛma pii bɔ afɔre wɔ Onyankopɔn som mu. Wɔ nsase horow bi so no Yehowa asomfo abɔ mmɔden pii sɛ wɔde ‘ayeyi afɔre bɛma Onyankopɔn daa.’ Sɛ nhwɛso no, wɔ April mu no, Venezuela buu akwampaefo aboafo 2,464 ho akontaa​—eyi boro dodow a na anka ɛkɔ soro sen biara no so ɔha biara mu 136. Na adawurubɔfo a wɔyɛ adwuma wɔ Trinidad no ɔha biara mu 51 bɛyɛɛ akwampaefo. June mu, bere a na nsu retɔ denneennen wɔ Japan no, na 25,140 renya akwampae adwuma no mu kyɛfa​—Ahenni adawurubɔfo a wɔwɔ asase no so no ɔha biara mu 36. Anigye ne abotɔyam bɛn ara na yebetumi anya sɛ yɛde nneɛma bi bɛbɔ afɔre na yɛatumi ayi Yehowa ayɛ yiye!​—Hebrifo 13:15; Numeri 6:8; Luka 9:23-25.

11. (a) Dɛn nti na ɛnsɛ sɛ wɔn a wontumi nyɛ akwampae adwuma no abasam tu? (b) Ɔsom adwuma ne nhyiam kɔ ho kyerɛwtohɔ pa bɛn na ɛkyerɛ sɛ Yehowa Adansefo a wɔwɔ baabiara ayɛ adwuma kɛse?

¹¹ Nanso, ɛnyɛ akwampaefo a wɔde wɔn ho ama no nko, na mmom honhom mu Israel “man” mũ no nyinaa, ne wɔn nnamfo “nnipakuw kɛse” ɔpepem pii no abɔ mmɔden kɛse wɔ Ahenni asɛnka adwuma no mu wɔ 1982 mu. Wɔn nyinaa aboa ma yetumi de nnɔnhwerew dodow a ɛkɔ soro sen biara 384,856,662 yɛɛ asɛnka adwuma wɔ afe no mu, na pii anya Bible adesua horow 1,586,293 a wɔyɛ no dapɛn biara wɔ wɔn a wɔwɔ asɛm no ho anigye afie no mu kyɛfa. Yesu wu Nkae a yedii no April 8, 1982 no, nnipa a wohyiaam wiase nyinaa, wɔ asafo horow 44,953 mu no yɛɛ 6,252,787​—nnipakuw kɛse ampa! Na momma yɛmfa mmɔdenbɔ nkɔ so mma “nguammaa” yi nyinaa honhom mu aduan!​—Yohane 21:15-17.

12. Nhyira bɛn na wɔka kyerɛ wɔ Numeri 6:24-26, na henanom na ebetumi afa wɔn ho nnɛ?

¹² Bere a wɔde mmara a ɛfa Nasirifo ho mae no akyi ara pɛ no, Yehowa maa Mose hyiraa ɔman mũ no nyinaa, sɛ: “[Yehowa] nhyira wo na ɔnhwɛ wo so; [Yehowa] ntew n’anim nkyerɛ wo, na ɔnnom wo; [Yehowa] mma n’ani so nhwɛ wo, na ɔmma wo asomdwoe.” Hwɛ sɛnea saa nsɛm no fata nnɛyi Yehowa honhom mu Israel ɔman kronkron no​—ne ‘afrafrafo dɔm kɛse’ a wofi aman nyinaa mu aba sɛ wɔbɛka wɔn ho asom Yehowa​—no ho ma ɛyɛ fɛ! Ɛyɛ anigye sɛ yehu sɛ wɔbɔɔ Yehowa Adansefo afoforo 138,540 asu wiase nyinaa wɔ afe no mu, a ɛboro dodow a wɔbɔɔ wɔn asu afe a etwaam no mu no so ɔha biara mu 15.6. Wɔde Yehowa din ato eyinom nyinaa so, ne asafo no mufo afoa foro nyinaa so, enti Yehowa ankasa aba sɛ ‘ɔrebehyira wɔn.’​—Numeri 6:24-27; Exodus 12:38.

‘Nkonim A Wodi’

13, 14. (a) Yɛn nuanom a wɔwɔ “Aman Afoforo 28” no mu no nsɛm tebea te dɛn? (b) Nkuranhyɛ bɛn na yebetumi anya afi wɔn nhwɛso no mu?

¹³ Aman pii so no ɛho hia sɛ Yehowa Adansefo ko denneennen ma gyidi no wɔ tebea horow a emu yɛ den mu. Esiane ɔtamfo no nsɛmmɔnedi ne sɛnea ɛbɛyɛ a ɛbɛbɔ yɛn nuanom ho ban nti, mmeae ahorow yi mu binom wɔ hɔ a wɔammobɔ wɔn din mmiako mmiako wɔ nkontaabu ahorow a wɔahyehyɛ no mu, nanso wɔn dwumadi a wɔaka abom pue wɔ nkontaabu no ase hɔ, baabi a wɔakyerɛw “Aman Afoforo 28 no.”

¹⁴ Adansefo a wɔn nkontaabu ka eyi ho no ‘nam nea ɔdɔɔ yɛn no so redi nkonim mmoroso.’ (Romafo 8:37-39) Bere a yesusuw adwuma a wɔde nokwaredi yɛ no ho no, momma yɛnyere yɛn ho sɛ yɛn nso yebedi akwanside ahorow nyinaa so nkonim na yɛde yɛn ‘koma nyinaa, yɛn kra nyinaa, yɛn adwene nyinaa ne yɛn ahoɔden nyinaa’ akɔ so asom Yehowa, bere a yefi ɔdɔ mu boa afoforo ma wɔyɛ saa no. Saa kwan yi so no yebetumi ada no adi sɛ ‘yɛne Onyankopɔn ahenni no ntam nware.’​—Marko 12:29-31, 34.

15-17. (a) Amanneɛbɔ a ɛhyɛ nkuran bɛn na yɛwɔ a efi asase so mmeae horow a akodi rekɔ so? (b) Amanneɛbɔ a ɛtete saa bɛn nso na woakenkan wɔ afe a etwaam no mu? (d) Dɛn ne mpae a Yehowa Adansefo bɔ wɔ sodifo ho?

¹⁵ Ɔhwɛfo kwantufo bi a ɔwɔ Lebanon yere kyerɛwee sɛ: “Wɔ asɛnka adwuma mu no, bere biara a yɛbɛte sɛ wɔretoto atuo a etumi sɛe wimhyɛn a ɛnam soro no, yeguan kɔhyɛ adan ase, efisɛ na atuo a wɔtotow wɔ wim akum nnipa baanum wɔ asasesin a yɛreyɛ mu afie afie adwuma saa dapɛn no ara mu no mu. Ná mpae a yɛbɔ Yehowa ara ne sɛ obehyira nhyiam a na ɛreba no so ne yɛn nuanom a wɔwɔ West Beirut no. Ná ɔmansin nhyiam no yɛ June 13. Na nea ɛmaa yɛn ani gyei no, wɔbɔɔ amanneɛ wɔ radio so June 12 sɛ wɔagyae akodi no, bere a aka dakoro pɛ ma nhyiam no afi ase no, na ɛkɔɔ so fɛfɛɛfɛ.” Na amanneɛbɔ a ɛbaa akyiri yi no kyerɛ sɛ Yehowa Adansefo mu biara ampira wɔ West Beirut saa bere no.

¹⁶ Wɔ Mfinimfini Amerika man bi mu a nniso foforo no anya Yehowa Adansefo asomdwoe adwuma no ho adwene a ɛnteɛ koraa no, wɔpam asɛmpatrɛwfo no nyinaa. Wɔkyeree ɔsɛmpatrɛwfo bi ne ne yere de wɔn kɔhyɛɛ baabi bɛyɛ adapɛn abien kosi sɛ Adansefo anokwafo a wofi ɔman no mu huu faako a wɔde wɔn akosie na wɔbɔɔ Engiresi Aburokyi aban ananmusifo a wɔwɔ hɔ no amanneɛ ma wɔyɛɛ nhyehyɛe yii wɔn fii ɔman no mu. Wɔbɔɔ amanneɛ wɔ hɔ sɛ aban no rehwehwɛ “akoa nokwafo ne ɔbadwemma” a wɔate sɛ ɔno na odi Yehowa Adansefo adwuma no anim no.​—Mateo 24:45-47.

¹⁷ Wɔ Afrika man Zimbabwe mu no, aban mpanyimfo no mu biako kae wɔ guabɔ bi ase sɛ: “Bere tenten a wɔyɛ Yehowa Adansefo no, wɔrenhaw yɛn. Wɔnyɛ yɛn atamfo. Na mmom sɛ wogyae Yehowa Adansefo yɛ a, ɛnde na bere adu sɛ yɛhwɛ yiye.” Ɛyɛ mpae a Onyankopɔn nkurɔfo anokwafo bɔ sɛ aban mpanyimfo nyinaa benya ntease a ɛte saa na Yehowa Adansefo nyinaa ‘atumi atra ase komm na wɔn ho adwo wɔn, onyamesom pa ne abrabɔ a ɛho wɔ nyam nyinaa mu.’​—1 Timoteo 2:1, 2.

“Ahenni Nokware” Ɔmantam Nhyiam Horow Fi Biribi Ase!

18. Nhoma titiriw bɛn na wɔdaa no adi wɔ “Ahenni Nokware” Ɔmantam Nhyiam Horow no ase, na dɛn ne n’atirimpɔw?

¹⁸ Wɔ June 1982 ɔsram no mu no, “Ahenni Nokware” Ɔmantam Nhyiam Horow a Yehowa Adansefo yɛe no fii ase, na wɔyɛɛ nhyiam horow yi wɔ asase so mmeae horow pii. Wɔ Amerika nkutoo no, nnipa dodow a ɛkɔ soro sen biara a wɔkɔɔ ase no yɛ 1,108,022.a Wɔ saa 1982 nhyiam horow a wɔyɛe wɔ Amerika ne mmeae afoforo pii no, woyii Bible adesua nhoma foforo adi. Eyi ne nhoma a ekura nkratafa 256 a mfonini ahorow pii wom a wɔato din You Can Live Forever in Paradise on Earth (Wubetumi Atra Ase Daa wɔ Paradise wɔ Asase So) no. Nanso eyi nyɛ nhoma a mfonini ahorow wom ara kwa. Na ɛnyɛ nhoma a wɔahyɛ da asiesie ama mmofra nso. Emu mfonini ahorow fɛfɛ no atirimpɔw ne sɛ wɔde bɛkyerɛkyerɛ nnipa ahorow nyinaa, na aboa wɔn ma wɔanya su a ɛde nkwagye ba, a ɛne GYIDI. Ɛyɛ wɔn GYIDI a atim yiye wɔ Yehowa, n’Asɛm ne n’atirimpɔw ho nimdeɛ a edi mu mu no nti na Yehowa Adansefo anokwafo a wɔtraa ase tete hɔ no tumi dii akwanside ahorow a na ɛte sɛ nea obiara ntumi nni so no so. Ɛdenam GYIDI so na “nnipakuw kɛse” a wɔdɔ trenee nnɛ no rehyia “nna a edi akyiri” yi mu nsɛm a emu yɛ den no, na wobenya nkwa wɔ “ahohiahia kɛse” no mu akɔ Yehowa Nhyehyɛe Foforo no mu.​—Adiyisɛm 7:9, 14; 2 Timoteo 3:1; Hebrifo 10:38, 39; 11:32-38.

19. Dɛn na wo ankasa wowɔ ka wɔ nhoma yi ho?

¹⁹ Agya bi a ne nsa kaa nhoma yi biako ma n’ani gyei no kae sɛ: “Ɛyɛ akyɛde a efi Yehowa hɔ a ɛsen biara wɔ mfe 25 a mede atra nokware no mu no mu. Sɛnea wɔakyerɛw no no bɛma obiara ani agye ho. Mfonini ahorow no mu da hɔ yiye ma wutumi hu biribiara a wɔpɛ sɛ wɔkyerɛ. Onyankopɔn Ahenni atirimpɔw ahorow no da adi wɔ ɔkwan a ntease wom so.” Wɔatintim nhoma a ɛsom bo yi wɔ kasa horow 21 mu dedaw, a afoforo pii nso reba.

20. (a) Dɛn nti na ɛbɛyɛ papa sɛ ɔpepem afoforo pii sua nokware no denam saa nhoma yi so? (b) Wɔn a wotie Yesaia 26:2, 4 no nsa betumi aka dɛn wɔ bere tiaa bi mu?

²⁰ Yɛwɔ anidaso sɛ nnipa ɔpepem pii a wɔwɔ yɛn asase yi so nam saa nhoma foforo, You Can Live Forever in Paradise on Earth, yi so besua nokware no, ne sɛ eyinom begyina Ahenni ɔsɛmpɔw no afã pintinn, bere a ɛrenkyɛ, “dwom” a ɛwɔ Yesaia ti 26 no mu nsɛm a etwa to no bɛbam no: “Me man, kɔ na kɔhyɛ wo mpia mu, na totow w’akyi apon mu; fa wo ho hintaw kakraa bi kosi sɛ abufuw no betwam akɔ. Na hwɛ, [Yehowa] refi n’afã akɔtwe asase sofo asõ, wɔn amumɔyɛ nti; asase beyi ne mogya adi, na ɛrenkata wɔn a wɔakum wɔn ɛso no so bio.” Bere a ɔsorosoroni Awurade Yehowa ada ne din kɛse no adi saa wɔ Harmagedon akyi no, ‘ɔman trenee a wɔkora nokwaredi’ no ne wɔn mfɛfo asomfo “nnipakuw kɛse” no befi aba a hwee nyɛɛ wɔn na wɔabenya nneɛma pa a “Yah Yehowa” ahyɛ ho bɔ na wɔakyerɛw ato hɔ fɛfɛɛfɛ wɔ n’Asɛm mu no mu anigye.​—Yesaia 26:2, 4, 20, 21; Adiyisɛm 7:9, 14; 16:13-16.

[Ase hɔ asɛm]

Nkɔmhyɛ kwan so “dwom” a ɛwɔ Yesaia 26 na nnɛyi mmamu ho a yesusuw:

□ Yes 26 Nkyekyem 2: Henanom na wodii kan gyinaa Ahenni ɔsɛmpɔw no akyi wiase nyinaa, ɔkwan bɛn so, na dɛn na afi mu aba?

□ Yes 26 Nkyekyem 4: Awerɛhyem bɛn na ɛsɛ sɛ saa nsɛm yi ma Yah akoa biara nya?

□ Yes 26 Nkyekyem 15: 1982 Ɔsom Afe Nkontaabu no mu nsentitiriw da dɛn mmamu adi?

□ Yes 26 Nkyekyem 20: Guankɔbea bɛn na Yehowa de ma, na ɔde ma bere tenten bɛn?

□ Yes 26 Nkyekyem 21: Eyi si nea enti a Yehowa de atemmu ba no so dua dɛn?

[Kratafa 25 adaka/mfoni]

Wɔ wɔn “Ahenni Nokware” Ɔmantam Nhyiam Horow no ase no, Yehowa Adansefo a wɔwɔ wiase nyinaa ani gyei sɛ wɔdaa nhoma a ekura nkratafa 256 a mfonini pii wom a wɔato din You Can live Forever in Paradise on Earth no adi. Saa nhoma yi a ɛda Bible mu nkyerɛkyerɛ atitiriw adi pefee no yɛ nea nkurɔfo, mpanyin ne mmofra, a wɔhwehwɛ nneɛma pa ama yɛn asase yi, ani agye ho. Yɛhwɛ kwan sɛ ɛbɛboa kɛse ma adwuma a Adansefo no reyɛ wɔ wiase nyinaa de ahyɛ Bible adesua wɔ fie ho nkuran no akɔ so.

[Kratafa 19 mfoni]

Ɔwɛn Aban boa dwumadibea adan afoforo a no wɔresisi wɔ Europa 1982 mu no binom

ENEBAKK, NORWAY

HOLBÆK, DENMARK

AJALVIR (MADRID), SPAIN

SELTERS, GERMANY