1914​—Bere A Wɔtwe Adwene Si So

“NÁ NEA ebesi ankasa wɔ 1914 mu de yennim saa bere no, nanso ade biako de na yenim: Afe 1914 mu na ɔhaw bere a emu yɛ den sen biara a wiase yi ahu pɛn befi ase; efisɛ Bible nkɔmhyɛ pii aka ɛno ato ho. Ná yɛn gyidi yɛ den na na yɛn anidaso gyina nea ɛsen onipa nsusuwii ara kwa so.”

Nsɛm yi na A. H. Macmillan a ɔno na ɔkyerɛw nhoma a wɔtɔe kɛse wɔ 1957 mu a wɔfrɛ no Faith on the March no de kaa gye a na ogye di sɛ 1914 bɛyɛ bere a wɔatwe adwene asi so wɔ Bible nkɔmhyɛ mu no ho asɛm. Wɔ nea ɛboro mfirihyia 40 wɔ 1914 akyi mu no, ne gyidi no ano ammrɛ ase.

Bere A Nsɛm Sisi

Wɔkyerɛ biribi a “wɔtwe adwene si so” ase sɛ “beae a wodii dwuma bi anaa biribi a ɛyɛ anigye: beae a wɔma nneyɛe anaa dwumadi ahorow hyiam.” So na 1914 yɛ bere a wɔatwe adwene asi so wɔ saa ntease no mu? Yiw. Susuw nea na Macmillan ne Bible Asuafo afoforo pii hwɛ kwan wɔ saa afe no mu no ho.

Zion’s Watch Tower and Herald of Christ’s Presence a ɛbae March 1880 mu no kaa nsɛm abien a ɛho hia a ɛbɛwosow asase a wɔhwɛɛ kwan sɛ ebesisi wɔ 1914 mu ho asɛm: “Amanaman Mmere no kɔ kosi 1914, na ɔsoro ahenni no” renni tumi kɛse kosi saa bere no,” Enti, Bible Asuafo pii hwɛɛ kwan sɛ wɔde Onyankopɔn Ahenni no besi hɔ koraa saa afe no. Eyi bɛkyerɛ bere a Kristo ‘bedi hene n’atamfo mfinimfini’ no mfiase. Titiriw no, ɛbɛkyerɛ “nneɛma nhyehyɛe [bɔne] yi awiei” mfiase nso.​—Dwom 110:1, 2; Mateo 24:3, New World Translation; Adiyisɛm 12:10, 12.

Saa Bible Asuafo a wobɔ mmɔden yi nyaa adwene yi bere a woayɛ Bible mmerebu mu nhwehwɛmu no akyi.a Nanso sɛnea ɛte no na Bible mmerebu yɛ adanse biako pɛ. Sɛnea Bible kyerɛ no, na Onyankopɔn Ahenni no bɛyɛ ɔsoro de, enti na aniwa renhu. Enti na Bible asuafo bɛyɛ dɛn ahu sɛ wɔn anidaso no abam anaasɛ amma mu? Ná wobehia adanse a wotumi de aniwa hu, sɛnkyerɛnne.

Ná Yesu asuafo no abisa sɛnkyerɛnne a ɛte saa bere a wɔkae sɛ: “Ɛdɛn na ɛbɛyɛ wo ba ne wiase awiei ho sɛnkyerɛnne?” no. (Mateo 24:3) Ɛdenam sɛnkyerɛnne yi a ɔde mae so no, Yesu de adanse a ɛto so abien a ebesi 1914 so dua kaa ho. Ná eyi ne Bible nnyinasosɛm a ese “nsɛm nyinaa nnyina adansefo baanu anaa baasa anom” no hyia.​—Mateo 18:16.

Bere a mmerebu mu adanse ahorow no twe adwene kɔ anim kosi 1914 so no, Yesu sɛnkyerɛnne pii a ɛbom no yɛ nea ɔde mae na atwe adwene asan akyi akosi 1914 so sɛ bere foforo mfiase. Enti afe 1914 bɛdaa adi sɛ ‘bere a nneyɛe anaa dwumadi ahorow hyiam wom.’

Ná ɛte saa? So wobetumi ahu sɛnkyerɛnne a Yesu de mae no wɔ nsɛm a asisi fi 1914 no mu ankasa? Yɛto nsa frɛ wo sɛ hwehwɛ asɛm no mu na afei wo ankasa woabua.

[Ase hɔ asɛm]