“Yehowa Mu Ahotoso” Ɔmantam Nhyiam​—Mma Ɛmmpa Wo Ti So!

Bible mu afotu a wɔde bɛma nnansa ne Kristofo fekubɔ pa retwɛn wo wɔ Yehowa Adansefo “Yehowa mu Ahotoso” ɔmantam Nhyiam ase. Wɔ December ne January mu no, wɔbɛyɛ nhyiam no 10 wo Ghana nyinaa, enti ɛbɛyɛ nea biako bɛbɛn faako a wote no. Yɛ nhyehyɛe sɛnea ɛbɛyɛ a wobɛkɔ ase fi bere a dwumadi no befi ase Fida 9:20 a.m., na tra ho kosi sɛ dwumadi a etwa to no bɛba awiei Kwasida awia.

Wɔbɛma ɔkasa a afotu wom a ɛne “Nnipa a Woayi Wɔn Afi Wiase” wɔ dwumadi a wɔde befi ase no mu. Wode afotu a emu da hɔ a ɛyɛ tẽẽ bɛma awofo ne mmofra. Wɔbɛboa mmofra ma wɔahwɛ wɔn ho yiye wɔ asetra a Wobetumi aka ho asɛm sɛ asetra ahorow abien no ho. Afei wobesi saa asɛm yi so dua wɔ drama a ɛfa nnɛ bere yi ho a ɛka koma no mu.

Wɔbɛma ɔkasa a ɛfa ahosohyira ne asubɔ ho na wɔde afotu a ɛfa akwan a yebetumi afa so ada ahotoso a yɛwɔ wɔ Yehowa mu adi ma ɛne nhyiam no asɛmti ahyia nso Memeneda anɔpa. “Abawo a Ɛde Asɛyɛde Ba Wɔ Nna a Edi Akyiri Yi Mu” no bɛyɛ ɔkasa titiriw a wɔbɛma wɔ awia dwumadi no mu a wɔde ɔkasa ahorow a egyina asɛmti a ɛne “Onyankopɔn Asɛm Wɔ Nkwa” so na ebewie.

Wɔbɛma ɔkasa a ɛne “Kyi Wiase no Aniwu Kwan Koraa” na wɔayɛ Bible mu drama a ɛkyerɛ sɛnea yɛn bere yi gye ntɛmpɛ nso wɔ Kwasida dwumadi no mu. Awia bere no, baguam ɔkasa a ɛne “Hena Na Wubetumi Anya Ne Mu Ahotoso Ankasa wɔ Yɛn Bere a Ɛyɛ Hu Yi Mu” no bɛyɛ nhyiam no mu asɛntitiriw foforo.

Bisa Yehowa Adansefo a wɔwɔ faako a wowɔ no na wɔnkyerɛ wo bere ne beae a wɔbɛyɛ nhyiam a ɛbɛn wo kɛse no.