Gyidi Ayaresa​—So Efi Onyankopɔn?

NA ƆBARIMA no ayare mfe 38. Yesu bisae sɛ, “Wopɛ sɛ wo ho yɛ wo den anaa?” Sɛ na wo ne saa ɔbarima yi a, so anka woremfa ahopere mmua sɛ yiw? Yesu ka kyerɛɛ no sɛ: “Sɔre, yi wo kɛtɛ, na nantew!” Dɛn na efii saa asɛm no mu bae? “Na ntɛm ara onipa no ho yɛɛ no den, na oyii ne kɛtɛ, na ɔnantewee.”​—Yohane 5:5-9.

Ɔsoro ayaresa yi yɛ nea Yesu maa nkurɔfo nyae wɔ n’asase so som adwuma no mu pii no mu biako. (Mateo 11:4, 5) Gyidi ayaresafo a wɔwɔ hɔ nnɛ no kyerɛ sɛ Onyankopɔn da so ara sa nkurɔfo yare wɔ saa kwan no so na wɔde adanse ahorow a nnipa mpempem pii a wɔkyerɛ sɛ gyidi ayaresafo asa wɔn yare no de ma no gyina akyi.

Nsonsonoe Atitiriw

Bible no sua da no adi sɛ nsonsonoe atitiriw ahorow pii wɔ ayaresa ahorow a wɔaka ho asɛm wɔ Bible no mu no ne nea gyidi ayaresafo a wɔwɔ hɔ nnɛ ka ho asɛm no mu. Sɛ nhwɛso no, Yesu ne n’asuafo no annye sika wɔ nkurɔfo a wɔsaa wɔn yare no ho. Yesu kyerɛkyerɛe sɛ: “Munyaa no kwa, na momfa mma kwa!” (Mateo 10:8) Enti wodii nhwɛso a Elisa a ɔpow sɛ obegye akyɛde afi ɔbarima bi a wɔfrɛ no Naaman a ɔsaa ne kwata maa no no de maa no no yɛe akyi. (2 Ahene 5:1, 14-16) Enti sɛ gyidi ayaresafo gye sika wɔ wɔn adwuma no ho a, na wonni Kyerɛwnsɛm mu nhwɛso yi akyi.

Ɛsɛ sɛ yɛhyɛ no nsow nso sɛ wɔn a wɔsaa wɔn yare wɔ Bible mmere no mu no ho tɔɔ wɔn amonom hɔ ara anaasɛ wɔ bere tiaa bi mu. Bere a ɔsomafo Petro huu ɔbarima bi a ɔyɛ “obubuafo fi ne na yam” no, ɔka kyerɛɛ ɔbarima no sɛ : “Nasareni Yesu Kristo din mu, nantew!” Kyerɛwtohɔ no da no adi sɛ: “Amonom hɔ ara [obubuafo no] nan ne ne nannweaa mu yɛ den. Na ohuruw gyinae na ɔnantwee.” (Asomafo no Nnwuma 3:1-8) W’ankasa kenkan nhwɛso afoforo wɔ Asomafo no Nnwuma 5:15, 16 ne 14:8-10.

Nanso gyidi ayaresafo a wɔwɔ hɔ nnɛ no ayaresa no gye nna, adapɛn ne asram pii mpo. Nea ɛsɛ sɛ yɛhyɛ no nsow nso ne nokwasɛm a ɛyɛ sɛ gyidi ayaresafo no taa de wɔn adwene si nyarewa ahorow te sɛ anifurae, mmubui anaasɛ asotiw so​—nyarewa ahorow a ɛtɔ bere bi a ɛyɛ nea efi adwene no mu. Oduruyɛfo Paulo Brand ka sɛ: “Bere a nipadua no fã bi abɛyɛ nea wontumi nyɛ ho hwee​—anan a atwitwa, anifurae anaasɛ biribi a ɛma ti so pa​—no, ɛnyɛ nea anwonwade taa si.” Nanso Yesu saa “nyarewa ne ahoɔmmerɛw nyinaa” a nipadua no afã horow a adi dɛm, te sɛ nsa a awu ka ho.​—Mateo 9:35; Marko 3:3-5.

‘Wunni Gyidi’

Nea ɛyɛ awerɛhow no, nnipa a wɔyare denneennen no mu pii kɔ ‘ayaresa nhyiam’ ase nanso wɔsan ba fie a wɔn yare no mu ayɛ den sen biara. Gyidi ayaresafo kyerɛkyerɛ saa nyarewa a wontumi nsa no mu denam ka a wɔka sɛ ‘wonni gyidi’ no so! Nanso eyi yɛ nnaadaa. Sɛnea Ɔbenfo William Nolen ka no: “Esiane sɛ gyidi ɔyaresafo no nte sɛ oduruyɛfo nti, sɛ wantumi ansa obi yare a, ɛnsɛ sɛ ogye ho asodi to ne ho so da. Ɛsɛ sɛ meka sɛ mɛpɛ sɛ anka mede anoyi a ɛte sɛɛ ma sɛ mihyia ɔyarefo bi a merentumi nsa no yare a.”

Ɛho anhia da sɛ na ɛsɛ sɛ Onyankopɔn adiyifo, Yesu anaasɛ Yesu asuafo de anoyi ma wɔ bere bi mu sɛ wɔantumi ansa ɔyarefo no yare esiane gyidi a na onni nti. Ɛwom, ebia gyidi a na nkurɔfo nni no na ɛmaa nnipa kakraa bi na ɛkɔe sɛ wɔnsa wɔn yare no. Nanso na woma wɔn a wɔkɔhwehwɛɛ ayaresa no ho tɔ wɔn koraa bere nyinaa!​—Marko 6:5, 6.

Nokwarem no, wɔ nsɛm binom mu no, wɔsaa nnipa bi a na ɛda adi sɛ wonni gyidi no yare. Sɛ nhwɛso no, Naaman a na ɔyɛ Siriafo asraafo panyin no annye anni koraa sɛ wobetumi asa ne kwata no ama no wɔ ɔkwan a Elisa kyerɛe no so. Ɛyɛ bere a wɔsaa no yare no akyi na ogye toom sɛ: “Hwɛ, mahu sɛ Onyankopɔn nni asase nyinaa so, sɛ Israel nko.” (2 Ahene 5:11-13, 15) Enti gyidi ayaresafo anoyi ahorow no nnyinaso sɛe.

Ayaresa​—Akyɛde a Atwam

Nanso so na ɛnyɛ nokware sɛ anwonwa kwan so akyɛde a ɛfa ayaresa ho no abu so wɔ Kristofo a wodi kan no mu? (1 Korintofo 12:9) Yiw, nanso biribi pa bi nti na saa anwonwade ahorow no sisii wɔ saa bere no mu. Wɔ mfe apem ne fã mu no, na Israel yɛ Onyankopɔn man a wapaw wɔn; nanso wɔ afeha a edi kan no mu wɔ Yɛn Bere yi mu no, wɔpowee Israel esiane gyidi a na wonni nti na wɔde Kristofo asafo foforo sii ananmu. Na saa Kristofo a wodi kan no hia mmoa soronko bi na ahyɛ wɔn den ma wɔadi adanse akyerɛ wiase no sɛ Onyankopɔn gyina wɔn akyi.

Enti wɔde akyɛde ahorow a ɛyɛ nwonwa a ayaresa ka ho maa Kristofo asafo a na ɛyɛ akokoaa no. Eyi yɛɛ “sɛnkyerɛnne” maa wɔn a wɔnyɛ gyidifo ne ɔkwan a wɔnam so hyɛɛ gyidifo no gyidi den. (1 Korintofo 14:22) Nanso, wɔ bɛyɛ mfe mpem abien akyi no, Kristosom nyɛ akokoaa bio. (Fa toto 1 Korintofo 13:9-13 ho.) Wɔkyerɛw Bible no wiei akyɛ na wɔakyekyɛ ɔpepem pii. Enti nokware Kristofo a wɔwɔ hɔ nnɛ no betumi atwe wɔn a wɔnyɛ gyidifo no adwene akɔ so ntɛm ara de agyina nea wɔkyerɛkyerɛ no akyi. Anwonwade ahorow ho nhia bio.

Paulo kyerɛe bio sɛ akyɛde ahorow a efi tumi a ɛkorɔn sen onipa hɔ no ‘begu.’ (1 Korintofo 13:8) Wɔde akyɛde horow a ɛte saa no mae tẽẽ denam Kristo Yesu asomafo no so anaasɛ bere a wɔwɔ hɔ no nkutoo. (Asomafo no Nnwuma 8:18-20; 10:44-46; 19:6) Wɔ asomafo no wu akyi no, anwonwade ahorow no baa awiei.

Cyclopedia of Biblical, Theological, and Ecclesiastical Literature a McClintock ne Strong yɛe (Po VI, kratafa 320) ka sɛ “ɛyɛ asɛm a wontumi nnye ho akyinnye sɛ wɔ mfe ɔha a edi asomafo no wu akyi no, yɛnte hwee wɔ anwonwade ahorow a Kristofo a wodi kan no yɛe ho.”

Nea Enti a Ɛsɛ sɛ Wohwɛ Yiye

Yesu Kristo bɔɔ kɔkɔ sɛ bere bi bɛba a nnipa pii bɛka akyerɛ no sɛ: “Awurade, Awurade, yɛmfaa wo din nhyɛɛ nkɔm, na yɛmfaa wo din nyɛɛ ahoɔdenne pii anaa?” Nanso Yesu bɛka akyerɛ wɔn sɛ: “Mumfi me so nkɔ, mo a moyɛ nea ɛnteɛ!” (Mateo 7:22, 23) Ɛnde dɛn na egyina “ahoɔdenne” a ɛte sɛ nea wotumi yɛ no akyi sɛ ɛnyɛ Onyankopɔn honhom a?

Wɔ nsɛm ahorow bi mu no, ɛte sɛ nea nnaadaa wom. Sɛ nhwɛso no, The Herald a ɛyɛ Zimbabwe atesɛm krataa bi no kaa nnipa baasa a gyidi ɔyaresafo bi kae sɛ wasa wɔn yare no ho asɛm. Atesɛm krataa no kae sɛ ɛyɛ nnaadaa: “Abofra biako ntumi nte asɛm ara, saa ara nso na otumi nkasa; na abofra biako nyɛ ɔsotifo saa ara nso na na ɔnyɛ mum; na ɔbea bi a ɔyɛ ɔsotifo no ntumi nte asɛm.”

Ɛtɔ bere bi a, gyidi ayaresa no ma ɔyarefo no ho tɔ no kakra. Wɔ nsɛm afoforo mu​—ne titiriw bere a ɛkyɛ ansa na ada adi sɛ ne ho reyɛ no den no​—ɛte sɛ nea nipadua no mu nneɛma bi ka ho. Oduruyɛfo William Nolen ka wɔ Science and the Paranormal nhoma no mu sɛ “ayarefo a wɔkɔ [oduruyɛfo] nkyɛn no mu bɛyɛ ɔha biara mu 80​—wɔ nyarewa a n’ankasa begyae.” Enti bere a mmere retwam no, gyidi ɔyaresafo bi betumi agye ayaresa no ho anuonyam afa.

Awiei koraa no, Bible no bɔ kɔkɔ sɛ “Satan ankasa po dan ne ho sɛ hann bɔfo” de bɔ mmɔden sɛ ɔbɛdaadaa nkurɔfo. (2 Korintofo 11:14) Paulo kyerɛkyerɛ mu bio wɔ 2 Tesalonikafo 2:9, 10 sɛ: “Ɔno nso na ne ba no, ɔba no Satan adwumayɛ so, atoro tumi [“anwonwade ahorow nyinaa,” The Jerusalem Bible] ne sɛnkyerɛnne ne ahodwiriwde nyinaa mu, ne nea ɛnteɛ nnaadaa nyinaa mu, wɔn a wɔyera no mu.” Enti hwɛ yiye! Ɛtaa yɛ nea adaemone tumi ka gyidi ayaresa ho. Paulo bɔɔ kɔkɔ sɛ: “Mempɛ sɛ mo ne ahonhommɔne fa ayɔnko. Muntumi nnom [Yehowa] kuruwa ano ne ahonhommɔne kuruwa ano.” 1 Korintofo 10:20, 21.

Bere a Kristoni Yare

Ampa, sɛ obi yare a, anwonwa kwan so ayaresa betumi ayɛ nea eye. Nanso, hyɛ no nsow sɛ Paulo yɔnko dwumayɛni Epafrodito yare ma ɛkaa kakraa bi na anka owui. (Filipifo 2:25-27) Saa ara nso na na Paulo hokafo paa Timoteo nso “taa yareyare.” (1 Timoteo 5:23, NW) Nanso, Paulo ansa saa mmarima baanu yi mu biara yare wɔ anwonwa kwan so. Na bere a na ɛho hia sɛ wɔsa Paulo ankasa yare no, ɛbɛyɛ sɛ ɔmaa Luka, “oduruyɛfo dɔfo no” hwɛɛ no yare.​—Kolosefo 4:14.

Saa ara nso na nnɛ Kristoni a ɔyare no betumi ahwehwɛ mmoa afi oduruyɛfo a ne ho akokwaw hɔ na amma wankodi ayaresa a adaemone de ma a abu so wɔ aman pii so nnɛ no akyi. Obetumi abɔ mpae nso de ahwehwɛ nyansa a ɛbɛma wadi ɔyare no ho dwuma na ɛnyɛ anwonwa kwan so ayaresa. (Yakobo 1:5) Obetumi asrɛ Yehowa nso sɛ ‘ɔnwowaw no ɔyarepa so.’​—Dwom 41:3.

Yegye tom sɛ ebetumi ayɛ abasamtu kɛse bere a nyansahu mu nnuru ntumi nsa ɔyare pɔtee bi no. Nanso sɛ Kristoni bi yare a, ɛsɛ sɛ ɔbɔ mmɔden sɛ ‘obehu nneɛma a ehia kyɛn so no mu yiye’ na ɛnsɛ sɛ ɔma n’akwahosan ho dadwen bunkam honhom mu nneɛma so korakora. (Filipifo 1:10, NW) Obetumi de anidaso a ɛfa tra a ɔbɛtra Onyankopɔn Ahenni ase ho no ahyɛ ne ho den, bere a “obiara renka sɛ: ‘meyare’” no.​—Yesaia 33:24, NW; 65:17-19.

Nokwarem no, trenee wiase foforo ho anidaso yi som bo kɛse sen gyidi ayaresafo bɔhyɛ ahorow hunu no. Fa Peter a ɔyɛ onifuraefo a ɔte Akumadan, Ghana no sɛ nhwɛso. Ɔde mfe 26 traa gyidi ayaresa asɔre ahorow mu a na ɔwɔ anidaso sɛ wɔbɛsa n’anifurae no ama no. Nanso gyidi ɔyaresafo biara nni hɔ a otumi buee n’aniwa no. Afei bere a ɔda so ara kɔ gyidi ayaresa asɔre bi no, Yehowa Adansefo kɔɔ ne nkyɛn.

Adansefo no fi Bible no mu kyerɛkyerɛ mu sɛ wɔ Onyankopɔn Ahenni ase no wɔbɛsa nyarewa ahorow nyinaa korakora. Eyi buee Peter ntease aniwa. Esiane sɛ onyaa Bible no mu nokware a ɛyɛ nwonwa no ho anisɔ nti, ɔbɛyɛɛ Onyankopɔn Ahenni no ho bere nyinaa dawurubɔfo na wayɛ saa bɛboro mfe abiɛsa! Ɔhwɛ bere a “afuraefo aniwa bebue, na asotifo aso atue” ankasa no kwan.​—Yesaia 35:5, 6.

Ɛdenam Onyankopɔn Asɛm mmoa so no, mpempem pii ade wɔn ho afi ahotoso a ɛnteɛ a wɔwɔ wɔ gyidi ayaresafo mu no ho.

[Mfonini wɔ kratafa 5]

Gyidi ayaresafo ntaa ntumi nsa nkurɔfo a wɔwɔ nipadua mu nyarewa yare

[Mfonini wɔ kratafa 7]

Kristoni a ɔyare bɔ mpae de hwehwɛ ahoɔden a ɛbɛma watumi agyina ano. Ɔhwɛ wiase foforo no nso kwan, faako a ‘obiara renka sɛ: meyare no’