Sɛnea Kristofo Yɛ Wɔn Ade Wɔ Ahohora A Ɔmanfo Bɔ Wɔn No Ho

SƐ OBI bɔ wo ahohora anaasɛ ɔkeka atosɛm fa wo ho a, wote nka dɛn? Nokwarem no, ɛbɛhaw wo yiye. Yehowa Adansefo te nka saa bere biara a wotwa atoro to wɔn so anaasɛ wɔka nsɛm a wɔakyinkyim no fa wɔn ho wɔ nsɛm ho amanneɛbɔ mu no. Nanso sɛnea Yesu kae wɔ Mateo 5:11, 12 no, wɔda so ara wɔ ntease a enti ɛsɛ sɛ wɔma wɔn ani gye.

Sɛ nhwɛso no, Katolekfo nhoma bi a ɛwɔ Germany kyerɛe sɛ “wɔhyɛ Ɔdansefo biara sɛ ɔmfa n’akatua ɔha biara mu nkyem 17 kosi 28 mma fekusɛm no adwumayɛbea ti.” Nanso, Yehowa Adansefo nyɛ fekusɛm, na wɔde ntoboa a wofi wɔn pɛ mu yi na etua wɔn adwuma no ho ka nyinaa. Atosɛm a ɛma Yehowa Adansefo di yaw yi daadaa akenkanfo pii. Nanso, ɛsɛ sɛ nokware Kristofo yɛ wɔn ade dɛn wɔ ahohora a wɔbɔ wɔn wɔ nsɛm ho amanneɛbɔ mu no ho?

Nhwɛso a Ɛsɛ sɛ Kristofo Di Akyi

Mateo ti 23 ka sɛnea Yesu kasa tiaa nyamesomfo a wɔsɔre tiaa no no wɔ wɔn nyaatwom ne nnaadaa ho no ho asɛm pefee. So eyi de nhwɛso ma nnɛyi Kristofo wɔ sɛnea ɛsɛ sɛ wɔne akasatiafo di ho? Ɛnte saa ankasa. Tumi soronko ne nhumu a na Onyankopɔn Ba no wɔ nti, ɔkasa tiaa nyamesomfo a wɔsɔre tiaa no no, na ɔyɛɛ saa na ama nnipadɔm a na wɔretie no no anya mu mfaso.

Mateo 15:1-11 ka sɛ wɔkasa tiaa Yesu efisɛ wɔkyerɛe sɛ na n’asuafo no abu Yudafo atetesɛm so. Yesu yɛɛ n’ade dɛn? Wampa abaw. Bere bi, Yesu ne n’akasatiafo yiyii nsɛm pefee, na ɔbɔɔ wɔn nsusuwii a ɛnteɛ no gui. Sɛnea ɛte no, ɛnyɛ mfomso sɛ nnɛyi Kristofo bɛbɔ mmɔden sɛ wɔbɛteɛ atosɛm a wɔka fa wɔn adwuma anaa nkyerɛkyerɛ ho no, bere a wɔbɔ mmɔden sɛ wɔde nokwaredi bɛkyerɛkyerɛ asɛm no mu wɔ ɔkwan a ntease wom so no. Wɔyɛ eyi de boa nnipa komapafo ma wohu sɛ nsɛm a wɔka tia Yehowa Adansefo no mfata na wɔde sɛe wɔn din.

Nanso hyɛ sɛnea Yesu yɛɛ n’ade wɔ bere tiaa bi akyi bere a n’asuafo no kaa eyi no nsow: “Wunim sɛ Farisifo no tee asɛm yi no, ato wɔn hintidua?” Ná “ato” Farisifo yi “hintidua”—wɔn bo amfuw kɛkɛ na mmom wɔbɛyɛɛ atamfo asobrakyefo a Yesu pow wɔn. Enti obuae sɛ: “Munnyaa wɔn, wɔyɛ anifuraefo.” Na mfaso biara nni so sɛ ɔbɛkɔ so ne akyinnyegyefo a wɔtan no yi akasa, obiara rennya mu mfaso, na ɛbɛma wɔagye akyinnye a hwee mfi mu mma ara kwa. (Mateo 7:6; 15:12-14; fa toto 27:11-14 ho.) Mmuae a Yesu de mae no kyerɛ sɛ “kommyɛ wɔ ne bere, na ɔkasa wɔ ne bere.”—Ɔsɛnkafo 3:7.

Yehowa Adansefo nhwɛ kwan sɛ obiara bɛka wɔn ho asɛmpa. Wɔma Yesu nsɛm yi tra wɔn adwenem: “Nnipa nyinaa kasa mo ho yiye a, munnue! na saa ara nso na wɔn agyanom de yɛɛ atoro adiyifo no.” (Luka 6:26) Bere bi wobisaa C. T. Russell, Ɔwɛn Aban Asafo no titrani a odi kan no, nea enti a wannyi ne ho ano wɔ ahohora a wɔbɔɔ no ho. Obuae sɛ: “Sɛ wugyina sɛ wode wo nan bɛbɔ ɔkraman biara a ɔbobom gu wo so a, wunnu faako a worekɔ no.”

Enti ɛnsɛ sɛ yɛma nsɛm a asɔretiafo atirimɔdenfo ka no twe yɛn adwene fi ɔsom a yɛde ma Onyankopɔn no so. (Dwom 119:69) Momma yɛmfa yɛn adwene nsi nokware Kristofo adwuma a ɛne asɛnka no so. Nea ebefi mu aba ne sɛ yebenya hokwan ahorow de abua nsemmisa na yɛakyerɛkyerɛ yɛn adwuma no atirimpɔw mu sɛ ɛboa ma obi abrabɔ yɛ papa na ɛkyerɛkyerɛ no Onyankopɔn Asɛm.—Mateo 24:14; 28:19, 20.

Ɛsɛ sɛ Wubua Ɔkasatia?

Yesu kaa n’akyidifo ho asɛm sɛ: “Mumfi wiase . . . eyi nti na wiase tan mo.” (Yohane 15:19) Nsɛm ho amanneɛbɔ pii a ɛbɔ Yehowa Adansefo ahohora no da ɔtan a ɛte saa yi adi, na ɛsɛ sɛ yebu yɛn ani gu so. Nanso, ɛtɔ mmere bi a, nsɛm ho amanneɛbɔ betumi aka asɛm bi a ɛkyerɛ sɛ wonnim Adansefo no yiye anaasɛ wɔakyinkyim nokwasɛm ahorow bi. Ebia nsɛnkyerɛwfo bi benya nsɛm afi nnipa a wɔmpɛ yɛn asɛm hɔ. Sɛ́ ebia yebebu yɛn ani agu nsɛm ho amanneɛbɔ mu atosɛm so anaasɛ yɛbɛfa ɔkwan a ɛfata so ama nokware no ada adi no gyina tebea no, ɔkasatia no farebae, ne ne botae so.

Ɛtɔ mmere bi a yebetumi ama nokwasɛm no ada adi denam krataa a yɛakyerɛw no yiye a yɛde bɛkɔ akɔma samufo no so, sɛ wotintim emu nsɛm nyinaa a. Nanso krataa a ɛte saa no betumi ama nea yɛmpɛ no mmom aba. Ɔkwan bɛn so? Ebetumi ama kan atosɛm no ahyeta kɛse, anaasɛ asɔretiafo benya hokwan foforo de akyerɛw atosɛm anaasɛ ahohorabɔ nsɛm. Mpɛn pii no, nyansa wom sɛ yegyaw krataa a wɔbɛkyerɛw akɔma samufo no ho asɛm ma mpanyimfo no. Sɛ nsɛm ho amanneɛbɔ bi a ɛmfata kanyan adwemmɔne a, Ɔwɛn Aban Asafo no baa dwumadibea no betumi ama saa ɔman no mu asafo ahorow no ate nokwasɛm no, na ɛnam saayɛ so ama adawurubɔfo no nyinaa anya nkyerɛkyerɛmu a ɛfata ama wɔn a wobisa ho asɛm no.

Ɛho hia sɛ w’ankasa woka nsɛm a wɔakyinkyim no saa ho biribi koraa? Yesu afotu a ɛne sɛ “munnyaa wɔn,” mummmua wɔn, no fa atamfo kuw yi ho pefee. Kristofo anokwafo wɔ Bible mu ntease a enti wɔkwati awaefo ne wɔn nsusuwii. (1 Korintofo 5:11-13; Tito 3:10, 11; 1 Yohane 2:19; 2 Yohane 10, 11) Sɛ obi fi ne komam pɛ sɛ ohu sɛ ebia nsɛm a wɔka tia Adansefo no gyina nokwasɛm anaa atosɛm so a, mpɛn pii no w’ankasa nimdeɛ a edi mu no betumi ama woama no mmuae.—Hwɛ September 1, 1986, Ɔwɛn-Aban nkratafa 13 ne 14.

Sɛ wokenkan nsɛm a wɔakyinkyim no wɔ nsɛm ho amanneɛbɔ mu a, tie afotu a ɛwɔ Mmebusɛm 14:15 no: “Atetekwaa gye nsɛm nyinaa di, na onitefo hwɛ ne nantew mu yiye.” Nnipa pii bo fuwii wɔ Switzerland bere a nsɛm ho amanneɛbɔ bi a ɛkanyan nkate kae sɛ Ɔdansefo ababaa bi wui efisɛ n’abusuafo ampene so sɛ nnuruyɛfo bɛma no mogya. Nanso saa na ɛbae ankasa? Dabi. Ɔsom nti na ɔyarefo no pow mogya, nanso ɔpenee so sɛ wɔmma no ayaresa a wɔremma no mogya wom. Ná anka wobetumi afi eyi ase ntɛm ara, na ebia anka ebegye no nkwa. Nanso, nnuruyɛfo no twentwɛn wɔn nan ase dodo ma enti owui. Nsɛm ho amanneɛbɔ no anka nokwasɛm ahorow yi.

Enti, fa ahwɛyiye kari hwɛ sɛ nokwasɛm ahe na ɛwɔ amanneɛbɔ ahorow a ɛte saa no mu. Yebetumi akyerɛkyerɛ mu akyerɛ wɔn a wobisa ho nsɛm sɛ asafo no mu mpanyimfo de ɔdɔ di saa nsɛm no ho dwuma ma ɛne Bible akwankyerɛ hyia. Sɛ yɛde nnyinasosɛm ahorow nkutoo di dwuma bere a yɛrema mmuae no a, yɛmpere yɛn ho nka nsɛm a yennim.—Mmebusɛm 18:13.

Nsɛm a Wɔbɛte Afi Yɛn Ankasa Hɔ Ho Hia

Wɔ afeha a edi kan no mu no, nkurɔfo kaa atosɛm faa Yesu Kristo ho sɛnea ɛbɛyɛ a wɔbɛsɛe ne din, na ebinom kae mpo sɛ ɔyɛ ɔmammɔfo. (Luka 7:34; 23:2; fa toto Mateo 22:21 ho.) Akyiri yi, Kristofo asafo a na enyinii no hyiaa ɔsɔretia pii fii nyamesomfo ne wiasefo hɔ. Esiane sɛ “wiase nkwaseade na Onyankopɔn apaw” nti, nnipa pii buu ne nkoa animtiaa. (1 Korintofo 1:22-29) Ɛsɛ sɛ nokware Kristofo a wɔwɔ hɔ nnɛ gyina ahohorabɔ, a ɛyɛ ɔtaa, ano.—Yohane 15:20.

Nanso, Yehowa Adansefo ani sɔ bere a onipa a wɔne no rebɔ nkɔmmɔ no wɔ adwempa na ɔda su koro no ara a nnipa a wɔbɛsraa Paulo wɔ Roma no mu bi a wɔkaa nea edi so yi daa no adi no: “Yɛpɛ sɛ yetie nea wo ara wudwen, na fekuwsɛm yi de, yenim sɛ wɔkasa tia mmaa nyinaa.”—Asomafo no Nnwuma 28:22.

Kyerɛkyerɛ nsɛm mu kyerɛ nnipa a wɔaka atosɛm akyerɛ wɔn no, na yɛ saa wɔ odwo mu. (Romafo 12:14; fa toto 2 Timoteo 2:25 ho.) To nsa frɛ wɔn sɛ wontie nsɛm a ɛfa Yehowa Adansefo ho no mfi wɔn ankasa hɔ, nea ɛma wotumi hu sɛ sobo ahorow no yɛ atoro. Wubetumi nso de nkyerɛkyerɛmu a Ɔwɛn Aban Asafo no atintim a ɛde ahyehyɛde no, n’abakɔsɛm, ne ne nkyerɛkyerɛ ho nsɛm pii ma adi dwuma.a Bere bi Filipo buaa Natanael sɛ: “Bra bɛhwɛ.” (Yohane 1:46) Yebetumi ayɛ saa ara. Yɛde anigye ma obiara a ɔpɛ sɛ ɔba yɛn Ahenni Asa so na ama n’ankasa ahu nnipa ko a Yehowa Adansefo yɛ ne nea wogye di no akwaaba.

Mma Asɔretiafo Nyi Wo Hu

Hwɛ nkuranhyɛ a ɛyɛ sɛ yebehu sɛ ahohorabɔ nsiw nkurɔfo kwan sɛ wɔbɛyɛ Adansefo! Wɔ TV so dwumadi bi mu wɔ Germany no, awaefo kaa atosɛm pii faa Adansefo no ho. Obi a ɔhwɛe no hui sɛ adɔkɔdɔkɔsɛm a awaefo no kae no yɛ nsusuwii hunu kɛkɛ, na ɛma ɔsan ne Adansefo no fii ne Bible adesua ase. Yiw, ɛtɔ mmere bi a, ahohora a ɔmanfo bɔ yɛn no de nnepa ba!—Fa toto Filipifo 1:12, 13 ho.

Ná ɔsomafo Paulo nim sɛ ebinom betie “anansesɛm” asen nokware no. Enti ɔkyerɛwee sɛ: “Ma w’ani nna hɔ ade nyinaa mu, mia w’ani hu amane, yɛ ɔsɛmpakafo adwuma, wie wo som no koraa.” (2 Timoteo 4:3-5) Enti mma biribiara nnye wo asabawmu, na mma w’atamfo ‘nnyi wo hu biribiara mu.’ (Filipifo 1:28) Nya akokoduru na mma biribiara nhaw w’adwene, fa anigye ka asɛmpa no, na wubegyina ahohora a ɔmanfo bɔ wo no ano pintinn. Yiw, kae Yesu bɔhyɛ no: “Nhyira ne mo sɛ wɔyaw mo na wɔtaa mo, na me din nti wodi atoro ka asɛmmɔne biara to mo so. Momma mo ani nnye, na mo ho nsɛpɛw mo, na mo akatua sõ ɔsoro; na saa ara na wɔtaa adiyifo a wodii mo kan no.”—Mateo 5:11, 12.

[Ase hɔ asɛm]

[Asɛm a wɔafa aka wɔ kratafa 27]

Bere a asɔretiafo ne Yesu dii asi no, ɔka kyerɛɛ n’asuafo no sɛ: “Munnyaa wɔn.” Ná ɔkyerɛ dɛn?

[Asɛm a wɔafa aka wɔ kratafa 29]

“Nhyira ne mo sɛ wɔyaw mo na wɔtaa mo, na me din nti wodi atoro ka asɛmmɔne biara to mo so.”—Mateo 5:11