Nhomatintimfo bi a Ɔbɔɔ Mmɔden Kɛse

WOABƆ mmɔden sɛ wobɛhwehwɛ Bible mu asɛm bi a woankae baabi a ɛwɔ pɛn? Nanso, ebia ɛdenam asɛmfua biako pɛ a wokaee so no, wutumi de nhoma a wɔde hwehwɛ Bible mu nsɛmfua hwehwɛe. Anaasɛ ebia wokɔɔ Kristofo nhyiam bi a nnipa ɔhaha pii, anaa mpempem mpo a wɔwɔ ase no tumi buee kyerɛwsɛm bi a wɔbɔɔ din kenkan fii wɔn Bible mu anibu kakraa bi mu.

Wɔ tebea abien yi mu biara mu no, ɔbarima bi a ebia wunnim no na ɛsɛ sɛ woda no ase. Wama wo Bible adesua ayɛ mmerɛw kakra, na onyaa kyɛfa nso wɔ hwɛ a wɔhwɛ maa yenyaa Bible ahorow a edi mu nnɛ no mu. Ɔka ho bi mpo na Bible pii ayɛ sɛnea ɛte no.

Ɔbarima no ne Robert Estienne.a Ná ɔyɛ nhomatintimfo a nhomatintimfo bi na ɔwoo no wɔ Paris, France, wɔ afeha a ɛto so 16 no mfiase hɔ. Ná saa bere no yɛ Nimdeɛ Foforo ne Ɔsesɛw mmere. Nhomatintim afiri bɛyɛɛ ade a wɔde dii dwuma saa bere no. Ná Robert papa Henri Estienne yɛ nhomatintimfo a wagye din a ɔyɛɛ Nimdeɛ Foforo bere no mu nhoma a edi mũ sen biara no bi. Ne nhoma no bi ne adesua nhoma ne Bible ahorow a ɔyɛ maa Paris Sukuupɔn ne ne nyamekyerɛ sukuu no—Sorbonne.

Nanso ma yɛmfa yɛn adwene nsi ne babarima Robert Estienne so. Wonnim ne nhomasua ho asɛm kɛse. Nanso wɔ ne mmofrase pɛɛ no, osuaa Latin kasa yiye, na ankyɛ na osuaa Hela ne Hebri kasa nso. Robert suaa nhomatintim ho nimdeɛ fii ne papa hɔ. Bere a Henri nhomatintimbea no bedii Robert Estienne nsam wɔ 1526 mu no, na wonim no dedaw sɛ ɔyɛ nhomanimfo a ɔwɔ kasa horow ho nimdeɛ a ɛkɔ akyiri. Ɛwom sɛ ɔyeyɛɛ ntotoho de siesiee Latin nhoma ne adesua nhoma afoforo de, nanso nea na akyinnye biara nni ho sɛ n’ani gye ho titiriw ne Bible no. Esiane sɛ na Estienne ani gye ho kɛse sɛ obesiesie Latin Bible no sɛnea na wayɛ wɔ Latin nhoma ahorow ho nti, ɔyɛɛ n’adwene sɛ ɔbɛsan ayɛ Jerome afeha a ɛto so anum Latin Vulgate Bible no ma ayɛ sɛ mfiase de no sɛnea obetumi biara.

Vulgate a Wɔayɛ no Yiye

Ná Jerome akyerɛ Bible no ase afi mfiase Hebri ne Hela kasa no mu, nanso ɛde besi Estienne bere so no, na Vulgate no adi mfirihyia apem. Ná mfomso ahorow ne nneɛma a ɛnsɛ pii abɛhyehyɛ mu esiane sɛ wɔhwɛɛ Vulgate no so kyerɛkyerɛw bi mfe pii no nti. Afei nso wɔ Mfinimfini Mmere no mu no, na anansesɛm, nsɛm a wɔabobɔ no mua, ne atosɛm abɛkata Bible no mu nsɛm a Onyankopɔn nam honhom so ma wɔkyerɛwee no so. Ná eyinom afrafra Bible no mu nsɛm mu araa ma wofii ase gye toom sɛ ɛyɛ nkyerɛwee a efi honhom mu.

Sɛnea ɛbɛyɛ a Estienne betumi ayiyi nea na ɛnka ho mfiase no nyinaa afi mu no, ɔfaa kwan a na wɔnam so hwehwɛ tete nhoma ahorow mu yɛ nsakrae wom no so. Ɔhwehwɛɛ nsaano nkyerɛwee a akyɛ na ɛyɛ papa sen biara a ɛwɔ hɔ no. Ohuu tete nsaano nkyerɛwee pii wɔ nhomakorabea ahorow a ɛwɔ Paris ne mmeae a ɛbemmɛn hɔ, ne mmeae bi te sɛ Évreux ne Soissons, a ɛda adi sɛ biako yɛ afeha a ɛto so asia no mu de. Estienne tɔɔ ne bo ase de Latin nkyerɛwee ahorow ahorow no mu asɛm biara totoo afoforo ho, na ɔpaw afã horow a na ɛda adi sɛ wonnye ho kyim koraa no nkutoo. Otintim nea ɔka boom nyae a ɛne Estienne Bible no nea edi kan wɔ 1528 mu, na na ɛyɛ nkɔanim kɛse wɔ Bible no mu nsɛm a wosiesie ma edii mu no mu. Ɛno akyi no, Estienne yeyɛɛ nkyerɛase afoforo a eye sen saa. Ná nnipa afoforo a wɔtraa ase ansa na ɔreba abɔ mmɔden sɛ wɔbɛyɛ Vulgate no yiye, nanso ne de no ne nea edi kan a na ekura ase nsɛm a etu mpɔn. Estienne kyerɛɛ mmeae a wayiyi nsɛm bi a asɛm wɔ ho anaa baabi a wobetumi akyerɛ ase wɔ akwan horow so wɔ nkyɛnkyɛn. Afei nso ɔkyerɛɛ nsaano nkyerɛwee a ogyinaa so de yɛɛ nsakrae ahorow yi.

Estienne de afã afoforo bi baa mu a na ɛyɛ foforo wɔ afeha a ɛto so 16 no mu. Ɔmaa nsonsonoe bɛdaa Atoro nhoma ahorow no ne Onyankopɔn Asɛm mu. Ɔde nhoma a ɛne Asomafo no Nnwuma hyɛɛ Nsɛmpa no ne Paulo nkrataa no ntam. Ɔkyerɛw nsɛmfua atitiriw kakraa bi a ɛbɛboa akenkanfo ma wɔahwehwɛ nsɛm pɔtee bi wɔ kratafa biara atifi. Eyi ne nea nnɛ wɔtaa frɛ no atifi asɛm no nea edi kan. Sɛ́ anka Estienne de Gothfo nkyerɛwee akɛseakɛse, anaa nkyerɛwde tuntum a efii ase wɔ Germany no bedi dwuma no, ɔka wɔn a wofii ase de roman nkyerɛwde a ɛnyɛ akɛse pii na ne kenkan yɛ mmerɛw, a seesei wɔtaa de di dwuma no, tintim Bible mũ no nyinaa ho. Ɔde kyerɛw nsɛm afoforo a wɔdan adwene kɔ so ne nsɛm asekyerɛ nsɛm pii nso kaa ho na ama nsɛm bi mu ada hɔ pefee.

Nnipa atitiriw ne asɔre mpanyimfo pii ani sɔɔ Estienne Bible no, efisɛ na eye kyɛn Vulgate nkyerɛase foforo biara a wɔatintim. Esiane sɛ na ne nkyerɛase no yɛ papa, ɛda ahokokwaw adi, na obiara tumi de di dwuma nti, ɛbɛyɛɛ nhwɛso ma bere tiaa bi akyi no, wɔhwɛɛ so yɛɛ bi wɔ Europa nyinaa.

Ɔhene Nhomatintimfo

Mmebusɛm 22:29 ka sɛ: “Sɛ wuhu onipa a ɔyɛ n’adwuma ho nsi a, ahene anim na obegyina, ɔrennyina mpapahwekwa anim.” Francis I a na ɔyɛ France hene no hyɛɛ sɛnea Estienne tumi de ahokokwaw di adwini ne ne mmɔdenbɔ wɔ kasa horow mu no nsow. Estienne bɛyɛɛ obi a otintim ɔhene no Latin, Hebri, ne Hela nhoma maa no. Ne saa nti, Estienne yɛɛ nhoma ahorow a ɛde besi nnɛ no, wobu no sɛ ɛka nhoma a ɛsen biara a wɔatintim no France no ho. Wɔ 1539 mu no, ofii ase yɛɛ Hebri Bible mũ a edi kan a ɛyɛ fɛ sen biara wɔ France. Wɔ 1540 mu no, ɔde mfonini ahorow baa ne Latin Bible no mu. Nanso sɛ́ anka Estienne bɛbɔ ne tirim ayɛ Bible mu nsɛm ho mfonini sɛnea na wɔtaa yɛ wɔ Mfinimfini Mmere no mu no, ɔyeyɛɛ mfonini ahorow a ɛma nimdeɛ a egyina wɔn a wotutu fam hwehwɛ tete nneɛma adanse anaa nneɛma kɛse ne ho nkyerɛkyerɛmu a ɛwɔ Bible no ankasa mu no so. Saa mfonini ahorow a wɔde ntaboo yɛe yi kyerɛɛ nneɛma bi te sɛ apam adaka no, ɔsɔfo panyin no ntade, ntamadan no, ne Salomo asɔrefi no mu fefeefe.

Estienne de Hela nkyerɛwde soronko a ɔkra ma wɔde brɛɛ no ma ɔde tintim ɔhene no nsaano nkyerɛwee no na etintim Kristofo Hela Kyerɛwnsɛm a edi kan a wɔayeyɛ ntotoho de asiesie emu nsɛm no. Ɛwom sɛ na nsonsonoe kɛse biara nni Estienne Hela nkyerɛase abien a edi kan no ne Desiderius Erasmus de no mu de, nanso wɔ nea ɛto so abiɛsa a ɔyɛɛ no 1550 no mu no, Estienne yɛɛ ntotoho wɔ nsaano nkyerɛwee bɛyɛ 15 mu, a emu bi ne Codex Bezae a wɔyɛɛ no afeha a ɛto so anum Y.B., ne Septuagint Bible no, de kaa ho. Nnipa pii gyee Estienne nkyerɛase yi toom araa ma akyiri yi ɛno so na wogyina yɛɛ nea wɔfrɛ no Textus Receptus, anaa Nkyerɛwee a Nsa Aka, a ɛno na wɔde yɛɛ nkyerɛase pii te sɛ afe 1611 King James Version no.

Sorbonne Sɔre Tia Ɔsesɛw No

Esiane sɛ na Luther ne Ɔsesɛwfo afoforo nsusuwii retrɛw wɔ Europa nyinaa nti, Katolek Asɔre no bɔɔ mmɔden sɛ ebedi nkurɔfo nsusuwii so denam nea wɔkenkan no a wobedi so no so. Ná Pope Leo X akyerɛw ahyɛde bi June 15, 1520 de ahyɛ sɛ ɛnsɛ sɛ wotintim nhoma biara a “ɔwae” ho nsɛm wom, wɔtɔn, anaa wɔkenkan wɔ Katolek man biara mu, na ɔkae sɛ amammui sodifo ahorow no nhwɛ mma wonni saa ahyɛde no so wɔ wɔn man mu. Wɔ England no, Ɔhene Henry VIII de nhwehwɛmu no ho adwuma hyɛɛ Katolek ɔsɔfopɔn Cuthbert Tunstall nsa. Nanso, wɔ Europa aman dodow no ara mu no, sɛ woyi pope no a, wɔn a na wokura tumi a ɛsen biara wɔ nkyerɛkyerɛ ho nsɛm mu ne nyamekyerɛfo adesuabea a na ɛwɔ Paris Sukuupɔn mu—Sorbonne.

Ná Sorbonne ne Katolek asɔre gyidi no ho nsɛm kasamafo. Mfehaha pii mu no, wobuu no sɛ ɛno na ɛbɔ Katolek gyidi no ho ban. Sorbonne nhwehwɛmufo no kasa tiaa Vulgate no a wɔayɛ ntotoho asiesie emu nsɛm, ne nea wɔakyerɛ ase fi mu aba ɔmanfo kasa mu no nyinaa sɛ ɛnyɛ nea “ɛso nni mfaso mma asɔre no [nko], na mmom ɛyɛ nea asiane wom.” Ɛnyɛ nwonwa sɛ ɛbaa saa wɔ bere a na Ɔsesɛwfo regye asɔre nkyerɛkyerɛ, guasodeyɛ, ne amammerɛ ahorow a na ennyina Kyerɛwnsɛm no so no ho kyim no. Nanso, Sorbonne nyamekyerɛfo pii buu asɔre no nkyerɛkyerɛ ahorow a na wobu no kɛse no sɛ ɛho hia sen Bible no ankasa a wɔbɛma emu nsɛm ayɛ nea edi mu. Nyamekyerɛfo bi kae sɛ: “Sɛ wonya nkyerɛkyerɛ no wie a, Kyerɛwnsɛm no te sɛ apa a wogyina so bere a wɔreto ɔfasu bi a sɛ wowie a woyi fi hɔ no.” Ná wɔn a wɔwɔ adesuabea hɔ no mu dodow no ara nni Hebri ne Hela ho nimdeɛ, nanso wobuu Estienne ne Nimdeɛ Foforo mmere mu nhomanimfo afoforo a na wɔrebɔre hwehwɛ nsɛmfua a wɔde dii dwuma wɔ Bible mu no ntease ankasa no nhwehwɛmu no animtiaa. Sorbonne ɔbenfo bi mpo sii ne bo kae sɛ, “Hela ne Hebri ho nimdeɛ a wɔbɛma atrɛw no betumi asɛe ɔsom nyinaa.”

Sorbonne Ntua Ahorow

Ɛwom sɛ adesuabea hɔ nhwehwɛmufo no penee Estienne Vulgate nkyerɛase ahorow a edi kan no so de, nanso anyɛ nea na asɛm biara nni ho. Wɔ afeha a ɛto so 13 mu no, na wɔde Vulgate no asie sɛ sukuupɔn no Bible a wɔapene so, na nnipa pii fam no, na mfomso biara nni ho. Adesuabea no kasa tiaa Erasmus a ɔyɛ nhomanimfo a na nkurɔfo bu no no mpo wɔ adwuma a ɔyɛe wɔ Vulgate ho no ho. Ɛyɛɛ ebinom nwonwa sɛ nhomatintimfo ɔpapahwekwa tumi sii ne bo sɛ ɔbɛteɛteɛ kyerɛwsɛm a wɔpene so mu mfomso.

Ebia nsɛm a Estienne kyerɛkyerɛw wɔ nkyɛnkyɛn no na na ɛhaw nyamekyerɛfo no sen biara. Nsɛm a ɔkyerɛkyerɛwee no maa fata a Vulgate nkyerɛwee no fata ho baa asɛm. Ɔpɛ a Estienne nyae sɛ ɔbɛkyerɛkyerɛ nsɛm bi mu no ma wɔbɔɔ no sobo sɛ ɔde ne ho regyigye nyamekyerɛfo adwuma mu. Ɔkae sɛ sobo no nyɛ nokware, na ɔkyerɛe sɛ ne nsɛm no yɛ nkyerɛkyerɛmu ntiantiaa anaa nea wɔde kyerɛ nsɛmfua mu ara kwa. Sɛ nhwɛso no, n’asɛm a ɔkyerɛwee wɔ Genesis 37:35 ho no kyerɛkyerɛɛ mu sɛ “hell” [Latin, infernum] a epue wɔ hɔ no ntumi nkyerɛ faako a wɔtwe abɔnefo aso. Adesuabea no de too ne so sɛ wapow ɔkra a enwu da ne tumi a “ahotefo” no wɔ sɛ wodi ma nnipa no.

Nanso, Estienne nyaa ɔhene no anim dom ne n’ahobammɔ. Francis I kyerɛɛ anigye kɛse wɔ Nimdeɛ Foforo ho adesua, titiriw ne nhomatintimfo no adwuma ho. Wɔbɔ amanneɛ sɛ bere bi mpo Francis I kɔsraa Estienne, na onyaa abotare twɛn no bere a na Estienne reyɛ awie ne nkyerɛase bi a ɔreteɛteɛ emu mfomso a etwa to no. Ɛdenam ɔhene no mmoa so no, Estienne tumi ne Sorbonne dii asi.

Nyamekyerɛfo Bara Ne Bible Ahorow

Nanso, wɔ 1545 mu no, nsɛm a esisii maa Sorbonne adesuabea no de wɔn abufuw nyinaa baa Estienne so. Ansa na ɛno resi no, na Katolek sukuupɔn ahorow a ɛwɔ Cologne (Germany), Louvain (Belgium), ne Paris no ahu mfaso a ɛwɔ so sɛ wɔbɛyɛ biako asɔre atia Asesɛwfo no na na wɔapene so sɛ wɔbɛka abom ahwehwɛ nkyerɛkyerɛ ahorow a ɛne nea wogye tom nhyia no mu. Bere a nyamekyerɛfo a wɔwɔ Louvain Sukuupɔn no kyerɛw Sorbonne daa no adi sɛ ɛyɛ wɔn nwonwa sɛ Estienne Bible ahorow no nka nhoma ahorow a wɔabara wɔ Paris ho no, Sorbonne dii atoro buae sɛ, sɛ wohui a, anka wɔbarae. Afei Estienne atamfo a na wɔwɔ adesuabea hɔ no nyaa ahotoso sɛ Louvain ne Paris adesuabea ahorow no tumi a wɔaka abom no bɛdɔɔso sɛ ɛbɛma Francis I agye adi sɛ ne nhomatintimfo no adi mfomso.

Bere a eyi rekɔ so no, esiane sɛ na wɔabɔ Estienne kɔkɔ wɔ adwene a n’atamfo afa no ho nti, odii kan kɔɔ ɔhene no hɔ. Estienne susuw ho kyerɛɛ no sɛ sɛ nyamekyerɛfo no tumi kyerɛkyerɛw mfomso ahorow biara a wɔahu a, wayɛ krado sɛ obetintim mfomso no ne sɛnea nyamekyerɛfo no ateɛteɛ no de aka Bible biara a ɔbɛtɔn ho. Ɔhene no penee ano aduru yi so. Ɔka kyerɛɛ Pierre du Chastel a ɔyɛ ɔhene kenkanfo sɛ onni asɛm no ho dwuma. Wɔ October 1546 mu no, adesuabea no kyerɛw Du Chastel sɛ Estienne Bible ahorow no yɛ “aduan ma wɔn a wɔpow yɛn Gyidi no a ɛfoa nnansa yi . . . awaefo nsɛm so,” na mfomso ayɛ no ma araa ma ɛfata sɛ “wɔsɛe ne nyinaa yi fi hɔ.” Esiane sɛ ɔhene no koma antɔ ne yam nti, afei n’ankasa kae sɛ adesuabea no mfa mfomso ahorow no bi mmra sɛnea ɛbɛyɛ a wobetumi atintim aka Estienne Bible ahorow no ho. Wɔhyɛɛ bɔ sɛ wɔbɛyɛ saa, nanso nokwarem no, wɔbɔɔ mmɔden biara kwatii sɛ wɔbɛkyerɛkyerɛw nea wɔkyerɛ sɛ ɛyɛ mfomso no.

Francis I wui wɔ March 1547 mu, na Estienne hweree ne boafo a ɔyɛ den sen biara a ɔne no ko tiaa Sorbonne tumi no. Bere a Henry II bedii ade no, otĩĩ ne papa ahyɛde a ese adesuabea no mfa mfomso ahorow a wɔahu no mmra no mu. Nanso, bere a Henry II huu sɛnea Germany adehye no de Ɔsesɛw no redi amammui fam botae horow ho dwuma no, na ye a ɔhene nhomatintimfo no Bible no ye anaa enye no nhia no kɛse te sɛ France a ɔbɛhwɛ ma akɔ so ayɛ Katolekfo man, na ayɛ biako wɔ ne hene foforo no ase no. December 10, 1547 no, ɔhene no Ahemfie Bagua sii gyinae sɛ wɔmmara Estienne Bible ahorow no tɔn nkosi sɛ nyamekyerɛfo no betumi akyerɛkyerɛw mfomso ahorow a wɔahu no aba.

Wɔbɔ No Sobo sɛ Ɔyɛ Ɔwaefo

Afei adesuabea no hwehwɛɛ ɔkwan a wɔbɛfa so de Estienne asɛm no akɔ asennibea soronko a na wɔahyehyɛ no foforo sɛ ɛnhwehwɛ awaefo nsɛm mu no. Ná enhia sɛ obi ka kyerɛ Estienne ansa na wahu asiane a ɔwom no. Wɔde asennibea no sii hɔ no, anni mfe abien na wɔbɛfrɛɛ no chambre ardente, anaa “ɔdan a emu redɛw.” Wɔde nnipa bɛyɛ 60 a wodii wɔn asɛm, a na nhomatintimfo ne nhomatɔnfo bi ka ho, kɔfam dua ho hyew wɔn anikan wɔ Place Maubert a wufi Estienne fie rekɔ hɔ bedi simma kakraa bi no. Wɔkɔhwehwɛɛ Estienne fie mpɛn pii sɛnea ɛbɛyɛ a wobenya adanse bi atia no. Wobisabisaa adansefo bɛboro 80 nsɛm. Wɔhyɛɛ wɔn a wobetumi akotietie ne nsɛm mu abɛka na ama wɔatumi de ato ne so sɛ ɔyɛ ɔwaefo no bɔ sɛ wɔbɛma wɔn n’agyapade mu nkyem anan mu biako. Nanso, adanse a wonyae ara ne nea na Estienne atintim no pefee wɔ ne Bible ahorow mu no.

Ɔhene no san hyɛe sɛ adesuabea no mfa mfomso ahorow a wɔahu no mmrɛ n’Ahemfie Bagua no. Adesuabea a wɔbara no a ɛmmara no buae sɛ ‘ɛnyɛ nyamekyerɛfo su sɛ wɔbɛkyerɛw nea enti a wobu biribi fɔ sɛ ɛyɛ awaefo nsɛm, na mmom wɔn ano na wɔde ma mmuae, na ɛsɛ sɛ wogye tom, anyɛ saa a akyerɛkyerɛw no remma awiei da.’ Henry penee so. Wɔbarae koraa. Ɛkame ayɛ sɛ wɔbaraa Bible a Estienne ayɛ pɛn biara. Ɛwom sɛ ɔfaa ne ho dii wɔ Place Maubert gya no ho de, nanso osii gyinae sɛ obefi France esiane sɛ na wɔabara ne Bible ahorow no koraa ne adwoodwoo a ebia akyiri yi wɔde bɛba ne so nti.

Nhomatintimfo a Ɔwɔ Amannɔne

Wɔ November 1550 mu no, Estienne tu kɔtraa Geneva, Switzerland. Ná adesuabea no ama abɛyɛ nea mmara mma ho kwan wɔ France sɛ obi betintim Bible biara aka Vulgate no ho. Afei a na Estienne wɔ ahofadi a obetumi atintim nea ɔpɛ no, ɔsan tintim ne Hela “Apam Foforo” no 1551, a na Latin nkyerɛase abien (Vulgate ne Erasmus de no) ne no bɔ anan. Eyi akyi na ɔkyerɛɛ Hela Kyerɛwnsɛm no ase kɔɔ Franse kasa mu wɔ 1552 mu, a na Erasmus Latin nkyerɛase no ne no bɔ anan. Wɔ saa nkyerɛase abien yi mu no, Estienne fii ase yɛɛ Bible no nkyekyem maa ebiara nɔma—nhyehyɛe koro no ara a wɔde di dwuma baabiara nnɛ no. Ɛwom sɛ na afoforo adi kan abɔ mmɔden sɛ wɔbɛfa akwan afoforo so ayeyɛ nkyekyem no de, nanso Estienne de no bɛyɛɛ nea wɔagye atom. Ne Bible a ɔkyerɛw no Franse kasa mu 1553 no ne Bible mũ a edi kan a ɔkwan a ɔfaa so yɛɛ ne nkyekyem no wom.

Estienne Latin Bible nkyerɛase abien a wɔaka abom a ɔyɛɛ no 1557 no da nsow bio wɔ Onyankopɔn din ankasa, Jehova, a ɔde di dwuma wɔ Hebri Kyerɛwnsɛm no nyinaa mu no ho. Ɔkyerɛwee wɔ dwom a ɛto so abien no ano sɛ, ʼAdho·naiʹ a na wɔde si Hebri Nkyerɛwde Anan (יהוה) no ananmu no gyina Yudafo atetesɛm so titiriw, na ɛsɛ sɛ wɔpow. Wɔ saa nkyerɛase yi mu no, Estienne kyeakyeaa Latin nsɛmfua a ɔde aka Hebri no ho na ama ntease no adi mu no. Akyiri yi, wɔde saa kwan yi dii dwuma wɔ Bible afoforo mu, ade a ɛtaa kyere nnɛyi akenkanfo a wɔbɛtoe a nea wonim ne sɛ wɔde nkyerɛwde a akyeakyea si nsɛm so dua no.

Esiane sɛ na Estienne asi ne bo sɛ ɔbɛma afoforo anya nea wasua no so mfaso nti, ɔde ne nkwa nna nyinaa sii hɔ de tintim Kyerɛw Kronkron no. Wɔn a ɛnnɛ Onyankopɔn Asɛm no som bo ma wɔn no ani betumi asɔ ne mmɔdenbɔ ne afoforo a wɔyeree wɔn ho denneennen maa Bible nsɛmfua daa adi sɛnea na ɛte mfiase no brɛ no. Adeyɛ a wofii ase no gu so, bere a yenya tete kasa ahorow no mu nimdeɛ a edi mu na yehu Onyankopɔn Asɛm no nsaano nkyerɛwee a akyɛ na edi mu paa no. Ansa na Estienne rewu (1559) no, na ɔreyɛ Hela Kyerɛwnsɛm no nkyerɛase foforo. Wobisaa no sɛ: “Hena na ɔbɛtɔ? Hena na ɔbɛkenkan?” Ɔde ahotoso buae sɛ: ‘Animdefo a wɔwɔ onyamesompa nyinaa.’

[Ase hɔ nsɛm]

[Kratafa 10 mfonini]

Robert Estienne mmɔdenbɔ no aboa Bible asuafo wɔ awo ntoatoaso pii mu

[Asɛm Fibea]

Bibliothèque Nationale, Paris

[Kratafa 12 mfonini]

Nkurɔfo suasuaa Estienne mfonini ahorow a ɛma nimdeɛ no wɔ awo ntoatoaso pii mu

[Asɛm Fibea]

Bibliothèque Nationale, Paris