‘Oo, Anka Obiara te sɛ Wɔn A!’

Eyi yɛ nsɛm a Luxembourg atesɛm krataa Letzebuerger Journal sɛnkyerɛwfo bi kyerɛwee. Ná ɔreka henanom ho asɛm?

Ɔkɔɔ Auschwitz ahofadi afedi a ɛto so 50 no bi wɔ Poland, na ohui sɛ wɔammɔ kuw biako bi a wohuu amane kɛse wɔ hɔ din. Wɔ n’asɛm a ɔkyerɛw no February 2, 1995 mu no, ɔkyerɛe sɛ saa kuw yi ne Yehowa Adansefo, na ɔkyerɛwee sɛ: “Afiase anaa nnadeban mu nna a ɛyɛ hu paa, ne awerɛhow wu a wobewuwu wɔ adan a ɔkɔm wom mu anaasɛ akuma anaa afiri a wɔde twa ti a wɔde bekunkum wɔn, ho ahunahuna antumi amma wɔampow wɔn gyidi.” Ɔtoaa so sɛ: “Akokoduru a Yehowa Adansefo nyae kosii owu mu no yɛɛ SS awɛmfo atirimmɔdenfo no mpo nwonwa.”

Ná ɛnyɛ sɛ Yehowa Adansefo pɛ sɛ wokunkum wɔn. Nanso, te sɛ afeha a edi kan mu Kristofo no, wɔn mu mpempem pii pawee sɛ wobewu sen sɛ wobegyae wɔn Kristofo nnyinasosɛm mu. Gyidi a ɛte saa no ma wɔyɛɛ soronko koraa wɔ Third Reich no nna a na aduru sum no mu.

Sɛnkyerɛwfo no de baa awiei sɛ: “Oo, anka nnipa nyinaa te sɛ Yehowa Adansefo a!” Sɛ na wɔte sɛ wɔn a, anka wiase ko a ɛto so abien no remma.