Wiase a Akodi Nnim—Bere Bɛn?

WOFII ase de Amanaman Nkabom Mmara Nhoma no dii dwuma wɔ October 24, 1945. Ɛyɛ wiase asomdwoe ho nhyehyɛe pa a nnipa ayɛ pɛn a ɛsen biara. Bere a Aman 51 fii Amanaman Nkabom no ase no, ɛbɛyɛɛ amanaman ntam ahyehyɛde a ɛsõ sen biara wɔ wiase abakɔsɛm mu. Afei nso, na eyi ne bere a edi kan a amanaman ntam ahyehyɛde bi anya asraafo a ɛbɛhwɛ ma asomdwoe ne ahotɔ aba na ɛde wiase a akodi nnim aba.

Ɛnnɛ, bere a aman 185 na wɔwɔ Amanaman Nkabom no mu no, abɛyɛ den sen bere biara. Ɛnde, dɛn nti na amanaman ntam ahyehyɛde a ɛwɔ tumi sen biara wɔ abakɔsɛm mu no ntumi nni ne botae pa ahorow no ho dwuma nkosi ase?

Nyamesom—Akwanside Kɛse

Akwanside titiriw biako ne dwuma a nyamesom di wɔ wiase nsɛm mu no. Nokwarem no, efi bere a wɔde Amanaman Nkabom no sii hɔ no, wiase no mu ɔsom atitiriw no aboa saa ahyehyɛde no. Bere a Pope John Paul II reka Amanaman Nkabom no afedi a ɛto so 50 ho asɛm no, ɔkae sɛ ɛyɛ “adwinnade a ɛsen biara a ɛde asomdwoe ba na ɛhwɛ ma ɛtra hɔ.” Nyamesom akannifo a wɔwɔ wiase nyinaa ne no yɛ adwene. Nanso saa anifere kwan so nkitahodi a ɛda nyamesom ne nniso ntam no rentumi nkata nokwasɛm a ɛne sɛ nyamesom ayɛ akwanside ne ɔhaw bi ama Amanaman Nkabom no so.

Nyamesom de mfehaha pii adi dwuma titiriw ahyɛ aman ntam nitan, akodi, ne okunkɛse ho nkuran anaasɛ wɔaboa. Nnansa yi mfe mu no, afipamfo de nyamesom akata wɔn ani akunkum wɔn ho wɔn ho. Wɔde asɛm “mmusua asetɔre” no adi dwuma kɛse wɔ Balkans akodi no mu. Nanso, nitan bɔne a nnipa pii a wɔwɔ hɔ wɔ ma wɔn ho wɔn ho no gyina ɔsom a wɔsom so sen sɛ ebegyina abusua a wofi mu so, esiane sɛ wɔn mu dodow no ara fi abusua koro mu nti. Yiw, ɛsɛ sɛ nyamesom gye mogyahwiegu a akɔ so wɔ kan Yugoslavia no ho asodi kɛse to ne ho so, na Amanaman Nkabom no ntumi nsiw ano.

Wɔ ɔkwan a ɛfata so no, ɔbenfo bi a ɔwɔ kɔlege bi mu kae nnansa yi sɛ, “Wɔ apuei fam ne atɔe fam ntam ntawntawdi akyi a nyamesomfo redi ako no, ebia nhwehwɛmu a yɛbɛyɛ wɔ nyamesom ne okunkɛse mu no bɛyɛ yɛn ahiade ahorow a ɛsɛ sɛ yedi ho dwuma ntɛm no mu biako, ɛmfa ho ɔhaw a ɛde bɛba.” Hu a wɔasan ahu sɛnea nyamesom retwitware mmɔden a wɔbɔ sɛ wobenya wiase asomdwoe ananmu no da adi nnɛ.

Mpaemuka bi a Amanaman Nkabom no yɛe wɔ 1981 mu no kae sɛ: “Nneɛma ho koma a wonni a ɛda adi mpɛn pii ne nyiyim a wɔyɛ wɔ ɔsom ho nsɛm mu a ɛda so wɔ wiase no afã horow bi no haw adwene, na yɛasi Gyinae sɛ yɛbɛfa akwan a ehia nyinaa so ayi nneɛma ho koma a wonni biara ne nea ɛde ba no afi hɔ ntɛm na yɛako atia nyiyim a egyina nyamesom anaa gyidi so no.”

Nea ɛne wɔn mpaemuka no hyia no, Amanaman Nkabom no de 1995 asi hɔ sɛ Afe a Wɔde Benya Nneɛma Ho Koma. Nanso, sɛ yɛbɛka ankasa a, ebetumi ayɛ yiye da bi sɛ yebenya asomdwoe ne ahotɔ wɔ wiase a nyamesom ama emu apaapae no mu?

Nyamesom Daakye

Nkɔmhyɛ bi a ɛwɔ Bible nhoma a ɛne Adiyisɛm no mu de mmuae no ma. Ɛka sɛnkyerɛnne kwan so “aguaman kɛse” bi a ɔte hɔ sɛ “ɔhemmaa” na odi “asase so ahene so hene” ho asɛm. Saa aguaman yi di “taamu” na ɔne wiase nniso horow no abɔ aguaman. Wɔyɛ saa nniso horow yi ho mfonini sɛ “aboa kɔkɔɔ” a aguaman no te ne so ahotɔ mu. (Adiyisɛm 17:1-5, 18; 18:7) Wɔde ɔbea guamanfo yi a ɔwɔ tumi a wɔfrɛ no “Babilon Kɛse” no too tete Babilon, baabi a abosonsom fi no. Wɔ ɔkwan a ɛfata so no, ɛnnɛ, aguaman no gyina hɔ ma wiase nyamesom a wɔde wɔn ho ahyehyɛ nniso horow no nsɛm mu no nyinaa.

Kyerɛwtohɔ no kɔ so ka sɛ, bere kɔ so no, Onyankopɔn de bɛhyɛ aboa no asraafo no komam ma wɔadi dwuma. Eyinom “bɛtan aguaman no, na wɔayɛ no pasaa, na wada adagyaw, na wɔadi ne nam, na wɔde ogya ahyew no.” (Adiyisɛm 17:16)a Enti Yehowa Nyankopɔn ankasa na ɔbɛma aman a wɔwɔ tumi no atu sa de ayi atoro som afi hɔ. Wɔbɛsɛe wiase nyinaa nyamesom nhyehyɛe no ne n’asɔrefie ne n’abosonnan a ɛyɛ fɛ no koraa. Afei, nyamesom rentwitware asomdwoe ne ahotɔ a wɔhwehwɛ no ananmu bio. Na mpo saa bere no, asomdwoe ne ahotɔ ankasa bɛba asase so?

Nipasu a Ɛnyɛ Pɛ

Anidaso bi wɔ hɔ sɛ nyamesom a wobeyi afi hɔ no de wiase a akodi nnim ankasa bɛba? Dabi. Amanaman Nkabom no bɛkɔ so ahyia tebea bi a emu yɛ den. Wɔ ɔkwan bi so no, nnipa pɛ asomdwoe ne ahotɔ. Nanso, wɔ ɔkwan foforo so nso no, ɛyɛ nnipa na wɔhaw asomdwoe ne ahotɔ kɛse. Nitan, ahantan, ahopɛ, pɛsɛmenkominya, ne anibiannaso yɛ nnipa su ahorow a ɛde ntawntawdi ne akodi nyinaa ba.—Yakobo 4:1-4.

Bible ka siei sɛ wɔ yɛn bere yi mu no, “nnipa bɛyɛ ahopɛfo, sikapɛfo, ahohoahoafo, ahantanfo, abususɛnkafo, awofo asɛm ho asoɔdenfo, bonniayɛfo, wɔn a biribiara ho ntew mma wɔn, wɔn a wonni dɔ, apamsɛefo, ntwirifo, wɔn a wɔnhyɛ wɔn akɔnnɔ so, wɔn a wɔyɛ keka, wɔn a wɔmpɛ papa, afatwafo, anuɔdenfo, wɔn a wɔhoman.”—2 Timoteo 3:1-4.

Ɔkyerɛwfo Panyin Boutros Boutros-Ghali gye toom sɛ, “Wiase no rehyia asetram ne sikasɛm mu nsɛnnennen, na emu yɛ den wɔ aman pii mu.” Anifere kwan biara nni hɔ a wobetumi afa so adwudwo nnipa a wɔtɔ sin suban ahorow a epira no ano.—Fa toto Genesis 8:21; Yeremia 17:9 ho.

Yesu Kristo—Asomdwoe Hene No

Ɛda adi pefee sɛ, Amanaman Nkabom no nni tumi a ɛbɛma atumi de wiase a asomdwoe wom aba. Wɔn a wɔdɔm ne n’aboafo no nyinaa yɛ nnipa a wɔnyɛ pɛ, ɛmfa ho sɛ wɔwɔ botae ahorow a ɛkorɔn no. Bible no ka sɛ, “onipa kwan nni ne nsam, enni ɔbarima nsam, sɛnea ɔnam a obetutu n’anammɔn.” (Yeremia 10:23) Afei nso, Onyankopɔn bɔ kɔkɔ sɛ: “Mommfa mo ho nnto ahene anaa onipa ba a nkwagye bi nni ne mu so.”—Dwom 146:3.

Bible no ka nea Yehowa nam ne Ba, “Asomdwoe Hene,” no so bɛyɛ ho asɛm. Yesaia 9:6, 7 ka sɛ: “Wɔawo akokoaa ama yɛn, wɔama yɛn ɔbabanin; na n’ahenni bɛda ne mmati so, na wɔafrɛ ne din sɛ: Nwonwa, Ɔfotufo, Onyankopɔn-tumfoɔ, Daa agya, Asomdwoe-hene; na n’ahenni mu bɛtrɛw, na asomdwoe a enni awiei aba.”

Nkogu a wiase aman no adi wɔ mfirihyia 50 mmɔdenbɔ mu no ama wɔabrɛ. Ɛrenkyɛ koraa, wɔbɛsɛe nyamesom ahyehyɛde ahorow a ɛte sɛ aguaman no. Afei, Yesu Kristo, ‘ahene mu Hene ne awuranom mu Awurade’ no ne ne soro akofo dɔm no bɛsɛe nnipa nniso nyinaa na wɔakum wɔn a wɔpow Onyankopɔn tumidi no nyinaa. (Adiyisɛm 19:11-21; fa toto Daniel 2:44 ho.) Saa kwan yi so na Yehowa Nyankopɔn nam de wiase a akodi nnim bɛba.

[Ase hɔ asɛm]

[Kratafa 7 adaka]

KRISTOFO ADWENE WƆ AMANAMAN NKABOM NO HO

Wɔtaa yɛ nnipa nniso ho mfonini wɔ Bible nkɔmhyɛ mu sɛ aboa. (Daniel 7:6, 12, 23; 8:20-22) Enti Ɔwɛn-Aban nsɛmma nhoma no de mfe du du pii aka aboa a ɔwɔ Adiyisɛm atiri 13 ne 17 no ho asɛm sɛ ɛyɛ nnɛyi wiase nniso horow no. Nea ɛka eyi ho ne Amanaman Nkabom no a wɔayɛ ne ho mfonini wɔ Adiyisɛm ti 17 sɛ aboa kɔkɔɔ a ɔwɔ ti ason ne mmɛn du no.

Nanso, Kyerɛwnsɛm mu gyinabea yi mpene animtiaa biara a wobu nniso ahorow anaa wɔn mpanyimfo no so. Bible no ka no pefee sɛ: “Momma akra nyinaa mmrɛbrɛ wɔn ho ase nhyɛ tumi a ɛwɔ anuonyam no ase. Na tumi biara nni hɔ sɛ nea efi Nyankopɔn; nanso tumi a ɛwowɔ hɔ no, Onyankopɔn na wahyɛ ato hɔ. Enti obiara a ɔne tumi no di asi no, ɔne nea Onyankopɔn ahyɛ ato hɔ di asi; na wɔn a wodi asi no benya afobu.”—Romafo 13:1, 2.

Nea ɛne no hyia no, Yehowa Adansefo a wonni ɔfã biara wɔ amammuisɛm mu koraa no mfa wɔn ho nhyehyɛ nnipa nniso mu. Wɔnkanyan ɔman anidan anaasɛ wɔnyɛ atumfoɔ so asoɔden da. Mmom no, wogye tom sɛ nniso bi ho hia na ama wɔakura mmara ne nhyehyɛe pa mu wɔ adesamma abusua mu.—Romafo 13:1-7; Tito 3:1.

Yehowa Adansefo bu Amanaman Nkabom no sɛnea wobu wiase nniso ahyehyɛde ahorow. Wogye tom sɛ Onyankopɔn na wama kwan ma Amanaman Nkabom no da so wɔ hɔ. Sɛnea ɛne Bible hyia no, Yehowa Adansefo de obu a ɛfata ma nniso horow no nyinaa na wotie wɔn, bere tenten a osetie a ɛte saa no nhwehwɛ sɛ wɔyɛ bɔne tia Onyankopɔn no.—Asomafo no Nnwuma 5:29.