M’awofo Anammɔn Akyi a Midi

SƐNEA HILDA PADGETT KA KYERƐE

Amanneɛbɔsɛm no kenkanee sɛ: “Mahyira me nkwa so ama Ɔsorosoroni no som adwuma, na mintumi nsom awuranom baanu.” Saa nsɛm no ne m’ano asɛm a mekyerɛw kɔmaa Britania Adwumayɛ Asoɛe ne Ɔman Som mpanyimfo wɔ 1941 mu, de kyerɛɛ nea enti a mampene wɔn ahyɛde no so ankɔyɛ ayaresabea nnwuma wɔ Wiase Ko II no mu. Ɛno akyi no, ankyɛ na wobuu me fɔ de me too afiase asram abiɛsa esiane sɛ mampene so nti.

DƐN na ɛde me kɔɔ saa amanenya yi mu? Dabi, na emfi mmofraasɛm a ntease nnim anaa atuatew su bi. Mmom no, efi ntease a na mewɔ fi me mmofraase pɛɛ.

Paapa Nnamyɛ Wɔ Ahenni no Ho

Wɔwoo me June 5, 1914 wɔ Horsforth a ɛbɛn Leeds, wɔ England kusuu fam. Ná m’awofo, Atkinson ne Pattie Padgett, kyerɛ ade wɔ Primitive Methodist Chapel no Mmofra Asɔre na na wɔka nnwontofo kuw no ho, a Paapa na ɔbɔɔ adakabɛn no. Bere a meyɛ akokoaa no, na yɛn fie yɛ anigye, gye ade biako pɛ na na ɛhaw adwene. Ná wiase tebea haw Paapa. Ná okyi akodi ne basabasayɛ, na na ogye Bible ahyɛde yi di: “Nni awu.”—Exodus 20:13.

Wɔ 1915 mu no, aban no kae sɛ mmarimaa nyinaa mfi wɔn pɛ mu mfa wɔn ho nhyɛ sraadi mu sɛnea ɛbɛyɛ a wɔnhyɛ wɔn mma wɔnyɛ saa. Paapa de amemenemfe gyinaa osu a ɛretɔ mu twɛnee da mũ nyinaa sɛ ebedu ne so ma wɔakyerɛw ne din sɛ ɔsraani. Ɛda a edi hɔ ara na n’asetra nyinaa sakrae!

Bere bi a na ɔreyɛ adorobɛn ho adwuma wɔ fie kɛse bi mu no, ɔne adwumayɛfo foforo bɔɔ wiase nsɛm ho nkɔmmɔ. Turoyɛfo no maa no kratawa ketewa bi a ɛne Gathering the Lord’s Jewels. Paapa de kɔɔ fie kɔkenkanee, na ɔkenkan bio. Ɔkae sɛ: “Sɛ ɛno ne nokware no de a, ɛnde biribi foforo biara nteɛ.” Ɛda a edi hɔ no, obisaa nsɛm foforo, na adapɛn abiɛsa mu no, na osua Bible kosi ahemadakye. Ná onim sɛ wahu nokware no! Ne nhoma a na ɔkyerɛw da biara nsɛm wom no kae wɔ Kwasida, January 2, 1916 sɛ: “Mekɔɔ Asɔre anɔpa, anadwo mekɔɔ I.B.S.A. [International Bible Students Association, sɛnea na wɔfrɛ Yehowa Adansefo wɔ England saa bere no]—yesuaa Hebrifo 6:9-20—da a edi kan a mekɔsraa anuanom no.”

Ankyɛ na ɔsɔretia fii ase. Yɛn abusuafo ne yɛn asɔrefo susuwii sɛ Paapa abɔ dam. Nanso na wasi ne gyinae. Ná nhyiamkɔ ne adesua hia no sen biribiara wɔ asetram, na eduu March no, na ɔde nsu mu asubɔ ayɛ n’ahosohyira ma Yehowa no ho sɛnkyerɛnne. Bere a Paapa nkutoo kɔɔ nhyiam horow no adapɛn kakra akyi no, afei de Maame ampɛ sɛ ɔka fie bio. Ɔde me sii me mpa a wotumi pia no mu nantew kilomita awotwe kɔɔ Leeds, na oduu hɔ ara na nhyiam no baa awiei. Wubetumi de w’ani abu anigye a Paapa nyae. Efi saa bere no, yɛn abusua no bɛyɛɛ biako wɔ Yehowa som mu.

Ná Paapa tebea no yɛ den paa—obi a watu ne ho ama sraadi, a afei asram kakraa bi mu no, wabɛyɛ obi a ofi ahonim pa mu pow sraadi. Bere a wɔfrɛɛ no no, wampene so sɛ obekura tuo, na eduu July 1916 no, na asraafo asenni bagua a ebuu no fɔ mpɛn anum no abu no fɔ nea edi kan, na asraafo asenni bagua san dii n’asɛm de no too afiase nnafua 90 bio. Bere a Paapa kɔdaa afiase nea edi kan no akyi no, wogyaa no adapɛn abien, na ɛno akyi no, wɔsan buaa no fɔ ma okodii nnafua 90 bio wɔ afiase. Bere a ɔkɔdaa afiase nea ɛto so abien no akyi no, woyii no kɔɔ Adehyeman Sraadi Nnuruyɛfo Kuw no mu, na wɔ February 12, 1917 no, ɔtraa asraafo po so hyɛn mu kɔɔ Rouen, France. Ne nhoma a na ɔkyerɛw da biara nsɛm wom no ka sɛ ɛhɔ tebea a na ɔwom no yɛɛ no abofono da biara. Ohui sɛ n’adwuma ara ne sɛ ɔbɛma asraafo a wɔapirapira ho ayɛ wɔn den ma wɔasan akɔko.

Ɛno nso wamfa ne ti annye. Saa bere yi de, asraafo asenni bagua no kae sɛ wɔmfa no nto Britania asraafo afiase a ɛwɔ Rouen no mfe anum. Bere a Paapa kɔɔ so kae sɛ wonyi no nkɔ ɔmanfo a wɔnyɛ asraafo afiase sɛ obi a ofi ahonim pa mu pow sraadi no, wɔmaa no paanoo ne nsu nkutoo asram abiɛsa de twee n’aso, na ɛno akyi no, wɔmaa no aduan a wɔde ma nneduafo daa no bi kosii sɛ ɔyɛɛ kɛse; afei wɔsan yɛɛ no saa bio. Edu anwummere a, na wɔde ne nsa gu n’akyi gu no mpokyerɛ, na edu anadwo ne bere a ɔrebedidi a wɔde ne nsa ba n’anim. Wɔde mpokyerɛ a na ɛnkɔ no guu n’abakɔn, na ewuraa ne honam mu ma etutuu akuru hyehyɛɛ nsu, na egyaw no atwã wɔ ne nkwa nna nyinaa mu. Wɔde mpokyerɛ guu ne nan nso de soo ne sisi.

Asraafo mpanyimfo no yɛɛ nea wobetumi biara sɛ wɔbɛma wapa abaw, nanso ankosi hwee. Wogyee ne Bible ne nhoma ahorow fii ne nsam. Ne nsa anka krataa biara amfi fie, na wantumi nso amfa bi ankɔ hɔ. Mfe abien akyi no, osii gyinae sɛ ɔbɛyɛ biribi de akyerɛ ne nokwaredi denam aduan a ɔhyɛɛ da pow sɛ obedi so. Nnanson twaam a wansesa ne gyinaesi no, wannidi na wannom nsu, na ɛmaa ɔyaree denneennen ma wɔde no kɔɔ afiase no ayaresabea. Ɛwom sɛ anka ɛreyɛ ama wahwere ne nkwa de, nanso ɔkyerɛe sɛ odi nokware. Akyiri yi mfe mu no, ogye toom sɛ odii mfomso sɛ ɔde ne nkwa too asiane mu wɔ saa kwan yi so, na ɔrenyɛ saa bio da.

Ɔko no baa awiei November 1918 bere a na Paapa da so wɔ afiase wɔ Rouen no, nanso afe a edi hɔ no mfiase no, woyii no kɔɔ ɔmanfo a wɔnyɛ asraafo afiase wɔ England. Susuw anigye a onyae bere a ne nsa kaa nkrataa ne akyɛde a na abesum hɔ a efi Maame hɔ nyinaa, ne ne Bible ne nhoma ahorow a ɛsom bo no ho! Wɔde no kɔɔ Winchester Afiase, na ɛhɔ na ɔne aberante bi a tebea a ɔfaa mu wɔ ɔko bere mu no te sɛ ne de no hyiae. Ná wɔfrɛ no Frank Platt, na akyiri yi ɔsom wɔ London Betel mfe pii. Wɔyɛɛ nhyehyɛe sɛ ɛda a edi hɔ no, wobehyia, nanso eduu hɔ no, na wɔayi Frank kɔ baabi foforo.

Wɔ April 12, 1919 no, Maame nyaa nkra bi a ɛkenkan sɛ: “Haleluya! Mereba fie—merefrɛ London.” Hwɛ anigye bere a na ɛyɛ bere a na yɛahyia sɔhwɛ na yɛn ntam atetew mfe abiɛsa no! Adwene a Paapa dii kan nyae ne sɛ ɔbɛfrɛ London Betel anuanom no na wakɔ wɔn hɔ. Bere a oduu 34 Craven Terrace no, wofi ɔdɔ mu gyee no fɛw so. Paapa guare yii n’abogyesɛ, na ɔsrɛɛ coat ne kyɛw hyɛe no, ɔsan baa fie. Wubetumi de w’adwene abu nea esii bere a yɛsan hyiaam no? Saa bere no na aka kakra na madi mfe anum, na manhu no.

Wogyaa Paapa no, nhyiam a edi kan a ɔkɔe ne Nkaedi. Bere a ɔforoo atrapoe no kɔɔ asa no so no, wanhyia obiara sɛ Frank Platt, a na wɔayi no aba asraafo ayaresabea a ɛwɔ Leeds no. Hwɛ anigye ara a wonyae bere a obiara kaa ne suahu ahorow kyerɛɛ ne yɔnko no! Efi saa bere no kosi bere a woyii Frank no, ɔde yɛn hɔ yɛɛ ne fie.

Maame De Nokwaredi Som

Bere a Paapa nni hɔ no nyinaa Maame horoo nkurɔfo ntade gyee sika de sɔɔ sika kakraa bi a aban tua maa no no so. Anuanom yii ayamye kɛse adi kyerɛɛ yɛn. Adapɛn kakra biara mu no, na asafo mpanyimfo no de krataa kotoku a akyɛde a wɔnkyerɛ nea efi hyem ma no. Bere nyinaa na Maame ka sɛ ɛyɛ anuanom dɔ na ɛmaa ɔbɛn Yehowa na ogyinaa ne mudi mu wɔ saa mmere a emu yɛ den no mu. Bere a Paapa nni hɔ no nyinaa ɔkɔɔ asafo nhyiam horow a wantotom. Sɔhwɛ a emu yɛ den sen biara a ohyiae ne sɛ bɛboro afe no na onnim sɛ ebia Paapa te ase anaasɛ wawu no. Nea ɛde ɔhaw no bi kaa ho ne sɛ wɔ 1918 mu no, me ne Maame nyinaa nyaa Spania influensa. Ná nkurɔfo a wɔtete bɛn yɛn rewuwu. Afipamfo a wɔkɔboaa afipamfo foforo nyaa yare no bi wuwui. Akyinnye biara nni ho sɛ aduan ho a ɛyɛɛ den saa bere no nti, na nkurɔfo nipadua ntumi nko ntia ɔyare mmoawa yiye.

Ɔsomafo Petro nsɛm yi baam ankasa wɔ yɛn abusua no ho sɛ: “Nyankopɔn . . . ara na sɛ munya hu amane kakra ansa a, . . . ɔbɛma mo ase atim, ɔbɛhyɛ mo den”! (1 Petro 5:10) Amane a m’awofo hui no ma wonyaa Yehowa mu gyidi a enhinhim, awerɛhyem a edi mu koraa sɛ odwen yɛn ho, na biribiara ntumi ntetew yɛn mfi Onyankopɔn dɔ ho. Ɛyɛ hokwan kɛse na minyae sɛ wɔtetee me wɔ gyidi no mu saa.—Romafo 8:38, 39; 1 Petro 5:7.

Mmofraberem Som Adwuma

Bere a woyii Paapa no, Ahenni som adwuma bɛyɛɛ yɛn asetram ade titiriw. Menkae da a asafo nhyiam bi paa me ti so, gye da a meyare. Bere a Paapa san baa fie no, ankyɛ na ɔtɔn n’afiri a ɔde twa mfonini wɔ ahwehwɛ so ne Maame sika ntweaban na ama yɛanya sika akɔ ɔmantam nhyiam bi. Ɛwom sɛ na yenni sika a yɛde tutu akwan kodi akwamma de, nanso nhyiam yi biara, a London de no nso ka ho, ampa yɛn ti so da.

Ná ɔko no akyi mfe abien anaa abiɛsa no yɛ ahomeka bere. Paapa ne Maame de hokwan a wonyae nyinaa dii dwuma yiye ne afoforo bɔɔ fekuw. Mekae sɛ na yɛkɔsrasra anuanom mmarima ne mmea foforo, na sɛ abeawa ketewa no, na metra hɔ yeyɛ mfonini bere a mpanyimfo no bɔɔ nkɔmmɔ nnɔnhwerew pii faa nokware no ho ntease foforo ho no. Nkɔmmɔ a wɔbɔe, adakabɛn a wɔbɔ de nnwonto kaa ho, ne fekuw a ɛyɛ anigye a wɔbɔe, ma wonyaa anigye ne ahotɔ kɛse.

M’awofo antoto me ntetee ase koraa. Bere a na madi mfe anum mpo no, na meyɛ soronko wɔ sukuu mu, na mede me “Apam Foforo” no kɔ kɔkenkan bere a adesuakuw no resua gyidikasɛm no. Akyiri yi wɔde me begyinaa sukuufo no nyinaa anim sɛ obi a “ofi ahonim pa mu pow sraadi” efisɛ mamfa me ho anhyɛ Nkae Da afahyɛ no mu.a Ɛnyɛ me yaw sɛ minyaa saa ntetee yi. Nokwarem no, na ɛyɛ ahobammɔ, na ɛma ɛyɛɛ mmerɛw sɛ mɛkɔ so anantew ‘kwan hihiaa’ no so. Baabiara a m’awofo kɔe, sɛ ɛyɛ nhyiam anaa asɛnka no, mekɔɔ bi.—Mateo 7:13, 14.

Ade a mekae paa ne Kwasida anɔpa a mifii ase sɛ me nkutoo mɛkɔ asɛnka no. Ná madi mfe 12 pɛ. Bere a misii so no, mekae Kwasida anɔpa bi a mekae sɛ merenkɔ asɛnka no. Obiara anka me hwee anaa wanhyɛ me sɛ menkɔ, enti metraa turo no mu suaa me Bible na m’ani annye koraa. Meyɛɛ saa toaa so dapɛn biako anaa abien no, meka kyerɛɛ Paapa sɛ: “Ɛyɛ me sɛ anɔpa yi me ne mo bɛkɔ!” Efi saa bere no, mansan m’akyi da.

Hwɛ sɛnea na 1931 yɛ anigye afe! Ɛnyɛ sɛ yenyaa yɛn din foforo, Yehowa Adansefo nko, na mmom wɔbɔɔ me asu wɔ ɔman nhyiam bi ase wɔ Alexandra Palace, London. Me werɛ remfi saa da no da. Yɛhyehyɛɛ ntade tuntum atenten yuu, na na onipa foforo ahyɛ nea mehyɛe no de abɔ asu dedaw ma afɔw!

Botae a bere nyinaa na esi m’ani so sɛ abofra ne sɛ mɛyɛ bere nyinaa nhoma kyekyɛfo, sɛnea na wɔfrɛ bere nyinaa asɛnkafo saa bere no. Bere a merenyin no, metee nka sɛ ɛsɛ sɛ meyɛ pii wɔ Yehowa som adwuma no mu. Enti wɔ March 1933 mu, bere a na madi mfe 18 no, mebɛkaa bere nyinaa asomfo no ho.

Ade biako a na ɛma yɛn ani gye titiriw ne “Nnawɔtwe Akwampae Adwuma” wɔ nkurow akɛse bi mu, bere a na bere nyinaa asomfo bɛyɛ dummien boa yɛn ho ano, na yɛtra ɛhɔ anuanom nkyɛn yɛ adwuma bom sɛ kuw no. Yɛmemaa nyamesom akannifo ne nnipa atitiriw foforo nhomawa. Na egye akokoduru na yɛatumi akɔ wɔn hɔ. Mpɛn pii no, na wonnye yɛn fɛw so, na ebinom kaa wɔn apon hwee mu wɔ yɛn mu bebree anim. Eyi anhaw yɛn, efisɛ na yɛyɛ nnam araa ma yedii ahurusi sɛ Kristo din nti wɔbɔɔ yɛn ahohora.—Mateo 5:11, 12.

Wɔ Leeds no, yɛdanee nea wɔde nkokoaa si so pia, sakre a ne nan yɛ abiɛsa, ne Paapa moto ne nea ɛbata ho a nnipa tra mu, ne akyiri yi, ne kar de gramafon akasamu nnaka sisii so. Ná anuanom baanu de afiri no kogyina borɔn bi so de apaawa a nnwom wɔ so si so de twetwe nkurɔfo adwene ma wobegyina wɔn apon ano, na afei ɛno akyi no, wɔbɔ Onua Rutherford kasa a ɔde simma anum ama a ɛwɔ apaawa so no. Wowie a, wɔkɔ borɔn foforo so, na na yɛn adawurubɔfo no di akyi kyekyɛ Bible nhoma ahorow.

Wɔ mfe pii mu no, sɛ yɛpɔn nhyiam Kwasida anwummere biara a, na yɛkɔ Kurow Aguabɔ Asa no Prama a na ɛwɔ Akasafo Agyinae no so, na na yɛboa denam Onua Rutherford kasa a ne tenten yɛ dɔnhwerew biako a wɔbɔ ma yetie na yɛkyekyɛ nkratawa kɔhwehwɛ obiara a ɔkyerɛɛ ho anigye no so. Wobehuu yɛn yiye wɔ hɔ. Ná polisifo mpo bu yɛn. Anwummere bi a yehyiaam sɛnea na yɛyɛ daa no, yɛtee akyene ne nnwom bi nnyigyei wɔ akyirikyiri. Ankyɛ na Fasistfo nsrabɔfo dɔm bɛyɛ ɔha bɛsen faa kwan no so. Wotuu aperenten hyiae wɔ yɛn akyi, na wogyina memaa wɔn afrankaa so kɔɔ soro. Wogyaee nnwom no bɔ, na bere a ɛhɔ yɛɛ dinn ara pɛ na Onua Rutherford nne boom sɛ: “Sɛ wɔpɛ a, momma wonkyia wɔn frankaa na wɔnkamfo nnipa. Yehowa yɛn Nyankopɔn nkutoo na yɛbɛsom no akamfo no!” Ná yennim nea ebesi wɔ ɛno akyi! Biribiara ansi, ɛno ara ne sɛ edii wɔn adanse fɛfɛ, na polisifo no maa womuaa wɔn ano sɛnea ɛbɛyɛ a yebetie baguam ɔkasa no nkae no.

Eduu saa bere yi no, na gramafon apaawa aba so ma ɛrebɛboa yɛn ma yɛadi adanse kɛse. Sɛ yegyina apon no ano a, na yɛde yɛn ani si apaawa no so yiye de hyɛ nkurɔfo nkuran ma wotie Bible nsɛm a wɔka kyerɛ a ɛwɔ apaawa so simma anum no nyinaa. Ná afiewuranom taa ma yɛkɔ wɔn dan mu, na na wɔn ani gye ho sɛ yɛbɛsan aba abɛbɔ mpaawa pii.

Ná afe 1939 yɛ bere a adagyew nnim na ɛyɛ den, yehyiahyiaa ɔsɔretia ne basabasayɛ. Yɛrebɛyɛ yɛn mantam nhyiam bi no, anuanom huu basabasayɛ ne gyegyeegye pii wɔ mmɔnten. Enti bere a nhyiam no rekɔ so no, wɔyɛɛ nhyehyɛe maa anuanom kuw soronko bi a wɔtete kar mu kɔkaa asɛm wɔ mmeae a basabasayɛ wɔ no, na anuanom mmea no ne mmarima a aka no kɔɔ faako a dwoodwoo wɔ no. Bere a me ne kuw bi reyɛ adwuma wɔ borɔn bi so no, mekɔfaa anammɔnkwan bi so kɔɔ afie a ɛwɔ akwannya no mu. Bere a mewɔ ɔpon bi ano no, metee sɛ gyegyeegye bi refi ase—na nteɛteɛm ne dedeyɛ rekɔ so wɔ abɔnten hɔ. Mekɔɔ so ne nea ogyina pon ano hɔ no kasae, na memaa nkɔmmɔ no yɛɛ tenten kosii sɛ dede no baa fam. Afei mekɔfaa anammɔnkwan no so pue kɔɔ kar kwan no so, na mihui sɛ bere a na anuanom mmarima ne mmea nkae no nhu baabi a mewɔ no, wɔn koma tui! Nanso akyiri yi, saa da no ara, basabasayɛfo no bɔɔ mmɔden sɛ wɔbɛsɛe yɛn nhyiam no, nanso anuanom mmarima no pam wɔn fii hɔ.

Wiase Ko II Fi Ase

Eduu saa bere yi no, na sraadi a wɔhyɛ nkurɔfo de wɔn kɔ no gyina mu denneennen, na wɔde anuanom mmarima nkumaa pii guu afiase fi asram 3 kosi 12. Paapa nyaa hokwan foforo saa bere no sɛ obi a ɔkɔsrasra nneduafo. Kwasida biara, na ɔkɔhwɛ Ɔwɛn-Aban Adesua so wɔ afiase hɔ. Edu Wukuda anwummere a, na ɔkɔsrasra anuanom wɔ wɔn afiase adan mu. Esiane sɛ na n’ankasa ada afiase bere tenten abrɛ wɔ wiase ko a edi kan no mu nti, na n’ani gye ho kɛse sɛ ɔbɛboa wɔn a wɔrehyia sɔhwɛ a ɛtete saa. Ɔyɛɛ eyi mfe 20, kosii sɛ owui wɔ 1959 mu.

Eduu 1941 no, na abufuw ne ɔtan a nkurɔfo da no adi wɔ ɔfã biara a yenni ho no rekokwaw yɛn. Ná ɛnyɛ mmerɛw sɛ obi de nsɛmma nhoma ahorow no begyina abɔnten wɔ saa tebea no mu. Bere koro no ara, yɛn ani gyei sɛ yetumi boaa aguanfo a na wɔte yɛn mpɔtam hɔ no. Latviafo, Polandfo, Estoniafo, Germanfo—hwɛ anigye ara a yenyae bere a yehui sɛ Ɔwɛn-Aban anaa Consolation (seesei wɔfrɛ no Nyan!) a wohui wɔ wɔn ankasa kasa mu no, maa wɔn ani gyei!

Afei wodii m’asɛm wɔ ɔfã biara a mannyina wɔ Wiase Ko II mu no ho. Wɔde me too afiase dan no mu nnɔnhwerew 19 wɔ nnɔnhwerew 24 biara mu, na na afiase asetra yɛ den ma me. Nnansa a edi kan no koraa na na ɛyɛ den paa, efisɛ na me nkutoo na meda hɔ. Ɛda a ɛto so anan no, wɔfrɛɛ me kɔɔ amrado no adwuma mu, na mihuu mmeawa baanu nso sɛ wogyina hɔ. Mmeawa no biako bisaa me bɔkɔɔ sɛ: “Dɛn nti na wɔde wo aba ha?” Mekae sɛ: “Sɛ meka kyerɛ wo a, ɛbɛyɛ wo nwonwa.” Ɔde nne soronko bisaa me bɔkɔɔ sɛ: “Woyɛ Yehowa Ɔdansefo?” Abeawa a ɔka ho no tee, na obisaa yɛn baanu sɛ: “Moyɛ Yehowa Adansefo?” na yɛn baasa nyinaa yɛɛ yɛn ho atuu. Ná yɛnyɛ ankonam bio!

Bere Nyinaa Som Adwuma a Ɛyɛ Anigye

Bere a woyii me fii afiase no, metoaa me bere nyinaa som adwuma no so, na abeawa bi a wadi mfe 16 a na wawie sukuu foforo bɛkaa me ho. Yetu kɔɔ Ilkley, kurow fɛfɛ bi a ɛwɔ Yorkshire Dales no ano hɔ. Yɛde asram mmiako mmiako asia bɔɔ mmɔden kɛse sɛ yebenya baabi pa ayɛ yɛn nhyiam horow. Awiei koraa no, yekogyee ɔdan bi a anka wɔde kar sisi mu, yɛɛ no Ahenni Asa. Paapa bɛboae, na ɔmaa yɛn kanea ne nea ɛma dan mu yɛ hyew. Osiesiee dan no mu nso maa yɛn. Mfe pii mu no, asafo a ɛbɛn hɔ no boaa yɛn, na wɔmaa anuanom mmarima bɛmaa baguam ɔkasa nnawɔtwe biara. Yehowa hyiraa yɛn ma yenyaa nkɔso, na yɛdɔɔso maa awiei koraa yɛhyehyɛɛ asafo.

Wɔ January 1959 mu no, Paapa yaree mpofirim. Wɔfrɛɛ me ma mekɔɔ fie, na owui wɔ April mu. Ná mfe a edi hɔ no nyɛ mmerɛw. Maame yaree, na afei na ontumi nkae asɛm, na na ɛyɛ den ma me. Nanso Yehowa honhom boaa me, na mitumi hwɛɛ no kosii ne wu mu wɔ 1963 mu.

Manya Yehowa hɔ nhyira pii wɔ mfe a atwam no mu. Ɛdɔɔso dodo sɛ metumi abobɔ din. Asafo a mewɔ mu no anyin ama wɔakyɛ mu mpɛn anan ma mahu, na yɛanya adawurubɔfo ne akwampaefo, ma ebinom akɔyɛ asɛmpatrɛwfo wɔ aman a ɛmmemmɛn ho koraa te sɛ Bolivia, Laos, ne Uganda. Antumi anyɛ yiye amma me da sɛ mɛware anya m’abusua. Ɛmmaa me werɛ nhowee; manya pii ayɛ. Ɛwom sɛ minni honam fam abusuafo biara de, nanso mewɔ mma ne mmanana pii wɔ Awurade mu, mmɔho ɔha mpo.—Marko 10:29, 30.

Metaa to nsa frɛ akwampaefo nkumaa ne mmofra foforo ba me fie ne wɔn nya Kristofo fekubɔ. Yɛbom siesie yɛn ho ma Ɔwɛn-Aban Adesua no. Yɛka osuahu ahorow kyerɛ yɛn ho to Ahenni nnwom nso sɛnea na m’awofo taa yɛ no. Esiane sɛ mmerante ne mmabaa a wɔn ani gye atwa me ho ahyia nti, mekɔ so yɛ ade te sɛ nea minnyinii, na mema m’ani gye. Asetra biara nyɛ papa mma me nsen akwampae adwuma no. Meda Yehowa ase sɛ manya hokwan adi m’awofo nhwɛso akyi. Mpae a merebɔ ne sɛ metumi akɔ so asom Yehowa akosi daa.

[Ase hɔ asɛm]

[Kratafa 23 mfonini]

Hilda Padgett ne n’awofo, Atkinson ne Pattie

[Kratafa 23 mfonini]

Kratawa a ɛkanyan Paapa anigye wɔ nokware no ho no