Yehowa ma Nea Wabrɛ Ahoɔden
“Wɔn a wɔtwɛn Awurade [Yehowa, “NW”] no nya ahoɔden foforo, wɔde ntaban foro sɛ akɔre.”—YESAIA 40:31.
1, 2. Dɛn na Yehowa de ma wɔn a wɔde wɔn ho to ne so, na dɛn na yebesusuw ho seesei?
AKƆRE ka wim nnomaa a wɔn ho yɛ den sen biara no ho. Wotumi twa kwan tenten wɔ wim bere a wɔmmɔ wɔn ntaban mu mpo. “Nnomaa Hene,” ɔkoropɔn no, yɛ “akɔre a wɔn ho yɛ nwonwa sen biara no biako a ne ntaban tɛtrɛtɛ tumi boro mita abien; otu fa nkoko ne nsasetaw so kɔfa mmepɔw atifi nnɔnhwerew pii, na afei otu dannan ne ho kosi sɛ ɔbɛyɛ tumm ketekete wɔ wim.”—The Audubon Society Encyclopedia of North American Birds.
2 Bere a sɛnea ɔkɔre tumi tu kɔ wim ho adwene wɔ Yesaia tirim no, ɔkyerɛwee sɛ: “[Yehowa] na ɔma nea wabrɛ otumi, na ɔma nea onni home ahoɔden dɔɔso. Mmerante brɛ, na wɔpa abaw, na nkwankwaa hwehwe ase. Na wɔn a wɔtwɛn [Yehowa] no nya ahoɔden foforo, wɔde ntaban foro sɛ akɔre, wotu mmirika, na wɔmpa abaw, wɔnantew, na wɔmmrɛ.” (Yesaia 40:29-31) Hwɛ awerɛkyekye a ɛyɛ sɛ yebehu sɛ Yehowa ma wɔn a wɔde wɔn ho to ne so ahoɔden ma wɔde kɔ wɔn anim, te sɛ nea ɔma wɔn ɔkɔre a otu nam wim no ntaban a ɛte sɛ nea ɛwɔ ahoɔden daa no! Afei susuw nsiesiei a wayɛ a ɛma nea wabrɛ ahoɔden no bi ho.
Mpaebɔ Tumi
3, 4. (a) Dɛn na Yesu hyɛɛ n’asuafo no nkuran sɛ wɔnyɛ? (b) Dɛn na yebetumi ahwɛ kwan sɛ Yehowa bɛyɛ de abua yɛn mpaebɔ?
3 Yesu hyɛɛ n’asuafo nkuran sɛ wɔmmɔ “mpae daa a wɔmmrɛ ho.” (Luka 18:1) Ɛyɛ ampa sɛ yɛn komam asɛm a yɛbɛka akyerɛ Yehowa no betumi aboa yɛn ma yɛanya ahoɔden bio na yɛakwati sɛ yɛbɛpa abaw bere a ɛte sɛ nea asetra mu nhyɛso ahorow abunkam yɛn so no? Yiw, nanso nneɛma bi wɔ hɔ a ɛsɛ sɛ yɛma ɛtra yɛn adwene mu.
4 Ɛsɛ sɛ yɛma nea yɛpɛ sɛ Yehowa yɛ de bua yɛn mpaebɔ no yɛ nea ntease wom. Kristoni bi a onyaa adwenemhaw a emu yɛ den kae akyiri yi sɛ: “Te sɛ nyarewa foforo no, Yehowa nyɛ anwonwade saa bere yi. Nanso ɔboa yɛn ma yegyina ano na yenya ayaresa kodu baabi a ebetumi ayɛ yiye wɔ saa nhyehyɛe yi mu.” Bere a ɔrekyerɛkyerɛ nea enti a ne mpaebɔ no di boaa no mu no, ɔde kaa ho sɛ: “Na minya Yehowa honhom kronkron nnɔnhwerew 24 da biara.” Enti, Yehowa nsiw asetram haw ahorow a ebetumi ahyɛ yɛn so no ano, nanso ɔde “honhom kronkron [ma] wɔn a wobisa no.” (Luka 11:13; Dwom 88:1-3) Saa honhom no betumi ama yɛadi sɔhwɛ anaa nhyɛso biara a yebehyia so. (1 Korintofo 10:13) Sɛ ɛho behia a, ebetumi de “tumi a ɛboro so no” ahyɛ yɛn mu ma yɛagyina ano akosi sɛ Onyankopɔn Ahenni beyi nsɛnnennen a ɛhyɛ yɛn so nyinaa afi hɔ wɔ wiase foforo a abɛn pɛɛ no mu.—2 Korintofo 4:7.
5. (a) Sɛ yɛn mpaebɔ betu mpɔn a, nneɛma abien bɛn na ɛho hia? (b) Sɛ yɛreko tia ɔhonam mmerɛwyɛ bi a, ɔkwan bɛn na yebetumi afa so abɔ mpae? (d) Dɛn na mpae a yɛbɛbɔ no bere nyinaa, na yɛaka nsɛm pɔtee bi ho asɛm wom no bɛma Yehowa ahu?
5 Nanso, nea ɛbɛyɛ na yɛn mpaebɔ atu mpɔn no, ɛsɛ sɛ yɛbɔ no bere nyinaa, na ɛsɛ sɛ yɛka nsɛm pɔtee bi ho asɛm. (Romafo 12:12) Sɛ nhwɛso no, sɛ ɛtɔ mmere bi na sɛ honam mmerɛwyɛ bi a worepere sɛ wubedi so ma wohaw a, srɛ Yehowa anɔpa biara sɛ ɔmmoa wo saa da no, na woannyae wo ho mu amma saa mmerɛwyɛ pɔtee no. Bɔ saa mpae no da mũ no nyinaa ne bere a worebɛda anadwo biara. Sɛ wosan yɛ bio a, srɛ Yehowa hɔ fafiri, nanso ka nea ɛmaa wosan yɛɛ saa no ne nea wubetumi ayɛ de akwati tebea a ɛtete saa daakye no nso ho asɛm kyerɛ no. Mpae a wobɛbɔ no daa, na woaka nsɛm pɔtee wom saa no bɛma “Mpaebɔ tiefo” no ahu sɛ wopɛ sɛ wudi nkonim ankasa.—Dwom 65:2; Luka 11:5-13.
6. Dɛn nti na yebetumi ahwɛ kwan ma afata sɛ Yehowa betie yɛn mpaebɔ, ɛmfa ho mpo sɛ yɛte nka sɛ yɛmfata sɛ yɛbɔ mpae no?
6 Nanso, ɛtɔ mmere bi a wɔn a wɔahaw no bɛte nka sɛ wɔmfata sɛ wɔbɔ mpae. Kristoni bea bi a bere bi na ɔte nka saa kae akyiri yi sɛ: “Asiane wɔ saa nsusuwii no mu efisɛ ɛkyerɛ sɛ yɛafa ato yɛn ho so sɛ yebebu yɛn ho atɛn, nanso ɛnyɛ yɛn na ɛsɛ sɛ yɛyɛ saa.” Nokwarem no, “Onyankopɔn na ɔrebebu atɛn.” (Dwom 50:6) Bible ma yɛn awerɛhyem sɛ sɛ “yɛn koma bu yɛn fɔ a, Onyankopɔn sõ kyɛn yɛn koma na ohu ade nyinaa.” (1 Yohane 3:20) Hwɛ awerɛkyekye a ɛyɛ sɛ yebehu sɛ bere a yebetumi abu yɛn ho sɛ yɛmfata sɛ yɛbɔ mpae no, ebia Yehowa renhu yɛn saa! ‘Ohu ade biara’ a ɛfa yɛn ho, a yɛn asetram tebea horow a ebia ama yɛte nka sɛ yɛmfata koraa no ka ho. (Dwom 103:10-14) Ne mmɔborohunu ne sɛnea ne ntease mu dɔ no ka no ma otie mpae a efi “koma a abubu na apɛtɛw” mu. (Dwom 51:17) Ɛbɛyɛ dɛn na sɛ yesu frɛ no sɛ ɔmmoa yɛn a, ɔrentie, bere a n’ankasa kasa tia “nea osiw n’asõ fi ɔbrɛfo sũ ho” no?—Mmebusɛm 21:13.
Onuayɛ no mu Anigye
7. (a) Dɛn ne nsiesiei foforo a Yehowa ayɛ a ɛbɛboa yɛn ma yɛasan anya ahoɔden? (b) Dɛn na sɛ yehu wɔ yɛn onuayɛ no ho a, ebetumi ahyɛ yɛn den?
7 Nsiesiei foforo a Yehowa ayɛ a ɛboa yɛn ma yenya tumi bio ne yɛn Kristofo onuayɛ no. Hwɛ hokwan a ɛsom bo a ɛyɛ sɛ wobɛyɛ wiase nyinaa abusua a anuanom mmarima ne mmea na wɔwom no muni! (1 Petro 2:17) Sɛ asetram haw ahorow hyɛ yɛn so a, yɛn nuayɛ no mu anigye betumi aboa yɛn ma yɛanya ahoɔden bio. Ɔkwan bɛn so na ɛte saa? Hu a yebehu sɛ ɛnyɛ yɛn nko na yehyia ɔhaw a ɛhyɛ yɛn so no nkutoo mpo betumi ahyɛ yɛn den. Akyinnye biara nni ho sɛ yɛn nuanom mmarima ne mmea no bi ahyia nhyɛso anaa sɔhwɛ, na wɔanya atenka a ɛte sɛ yɛn de no ara pɛ. (1 Petro 5:9) Ɛyɛ awerɛkyekye sɛ yebehu sɛ tebea a yɛwom no nyɛ ade foforo, na yɛn atenka no nyɛ soronko.
8. (a) Nhwɛso ahorow bɛn na ɛkyerɛ ɔkwan a yebetumi afa so anya mmoa ne awerɛkyekye a ɛho hia kɛse afi yɛn onuayɛ no mu? (b) Ɔkwan bɛn so na “adamfo pa” bi aboa w’ankasa anaasɛ wakyekye wo werɛ?
8 Esiane onuayɛ no mu anigye nti, yebetumi anya ‘nnamfo pa’ a wobetumi ama yɛn mmoa ne awerɛkyekye a ɛho hia kɛse bere a yɛwɔ ahohia mu no. (Mmebusɛm 17:17) Mpɛn pii no, nea egye ara ne kasa pa anaa adɔe bi. Kristoni bi a na nkate a ɔwɔ sɛ ne ho nni mfaso haw no no ka sɛ: “Na mewɔ nnamfo a wɔda nneɛma pa a ɛwɔ me ho adi kyerɛ me de boa me ma midi nkate a ɛmfata so.” (Mmebusɛm 15:23) Bere a onuawa bi babea kumaa wui no, na ɛyɛ den ma no mfiase no sɛ ɔbɛto Ahenni nnwom wɔ asafo nhyiam horow ase, titiriw nnwom a ɛfa owusɔre ho. “Bere bi,” sɛnea ɔka no, “onuawa bi a na ɔte ɔfã foforo hui sɛ meresu. Ɔbaa me nkyɛn de ne nsa bɛtoo me kɔn mu, na ɔne me too dwom no nkae no. Minyaa ɔdɔ kɛse maa anuanom mmarima ne mmea no, na m’ani gyee yiye sɛ yɛkɔɔ nhyiam no, efisɛ mihui sɛ ɛhɔ, Ahenni Asa so hɔ, na yenya mmoa.”
9, 10. (a) Yɛbɛyɛ dɛn atumi aboa ma yɛn nuayɛ no ayɛ anigye? (b) Henanom titiriw na wohia fekubɔ pa? (d) Dɛn na yebetumi ayɛ de aboa wɔn a wohia nkuranhyɛ?
9 Nokwarem no, yɛn mu biara wɔ asɛyɛde sɛ ɔboa ma Kristofo onuayɛ no mu anigye no kɔ so. Enti, ɛsɛ sɛ yɛn koma mu ‘trɛw’ ma ebi sõ yɛn nuanom mmarima ne mmea nyinaa so. (2 Korintofo 6:13) Hwɛ awerɛhow a ɛbɛyɛ sɛ wɔn a wɔahaw no bɛte nka sɛ ɔdɔ a anuanom wɔ ma wɔn no ano adwudwo! Nanso, Kristofo binom ka sɛ wɔte nka sɛ wɔyɛ ankonam, na afoforo bu wɔn ani gu wɔn so. Onuawa bi a ne kunu mpɛ nokware no kae sɛ: “Hena na ɔmpɛ na onhia adamfofa a ɛma denhyɛ, nkuranhyɛ, ne fekubɔ a ɔdɔ wom? Mesrɛ sɛ monkae yɛn nuanom mmarima ne mmea no sɛ yehia wɔn!” Yiw, wɔn a wɔn asetram tebea hyɛ wɔn so—wɔn a wɔn ahokafo nnye nni, awofo a wonni ahokafo, wɔn a wɔwɔ nyarewa a enni sabea, wɔn a wɔn mfe akɔ anim, ne afoforo—titiriw na wohia fekubɔ pa. Ehia sɛ yɛbɔ yɛn mu bi nkae wɔ eyi ho anaa?
10 Dɛn na yebetumi ayɛ de aboa? Momma yɛntrɛw ɔdɔ a yɛda no adi no mu. Sɛ yɛreyi ahɔhoyɛ adi a, mommma yɛn werɛ mmfi wɔn a wohia nkuranhyɛ no. (Luka 14:12-14; Hebrifo 13:2) Sɛ anka yɛbɛfa no sɛ wɔn nsɛm tebea mma wontumi mmɛsra yɛn no, dɛn nti na yɛn de yɛnto nsa mfrɛ wɔn? Afei ma wonsi gyinae no. Sɛ wontumi mma mpo a, akyinnye biara nni ho sɛ ɛbɛhyɛ wɔn nkuran sɛ wobehu sɛ afoforo dwen wɔn ho. Ebia ɛno ara na wohia na ama wɔanya ahoɔden bio.
11. Akwan bɛn so na wɔn a nneɛma hyɛ wɔn so behia mmoa?
11 Ebia wɔn a nneɛma hyɛ wɔn so no behia mmoa wɔ akwan foforo so. Sɛ nhwɛso no, ebia ɛna a onni ɔhokafo behia onua bi a ne ho akokwaw a ɔbɛkyerɛ ne babarima a onni agya no ho anigye. (Yakobo 1:27) Onua anaa onuawa a ɔyare denneennen behia mmoa wɔ nneɛma totɔ anaa ofie nnwuma mu. Obi a ne mfe akɔ anim ani begye fekubɔ ho anaasɛ obehia mmoa bi na ama watumi ayɛ asɛnka adwuma no. Nokwarem no, sɛ ɛho hia sɛ yɛkɔ so de mmoa a ɛte saa ma bere nyinaa a, ‘ɛsɔ yɛn dɔ hwɛ sɛ ɛyɛ papa anaa.’ (2 Korintofo 8:8) Sɛ anka yɛbɛtwe yɛn ho afi wɔn a wohia mmoa ho esiane sɛ egye bere ne mmɔdenbɔ nti no, momma yenni Kristofo dɔ ho sɔhwɛ no mu nkonim denam afoforo ahiade a yɛbɛma ahia yɛn na yɛayɛ ho biribi no so.
Onyankopɔn Asɛm no mu Tumi
12. Ɔkwan bɛn so na Onyankopɔn Asɛm boa yɛn ma yenya ahoɔden bio?
12 Onipa a ogyae adidi no bɛhwere n’ahoɔden anaa ne tumi bere tiaa bi akyi. Saa ara nso na ɔkwan foforo a Yehowa fa so ma yɛn ahoɔden ma yɛde kɔ yɛn anim ne sɛ ɔbɛhwɛ ahu sɛ yenya honhom mu aduan di mee. (Yesaia 65:13, 14) Honhom mu aduan bɛn na ɔde ama? Nea ɛsen biara ne n’Asɛm Bible no. (Mateo 4:4; fa toto Hebrifo 4:12 ho.) Ɔkwan bɛn so na ebetumi aboa yɛn ma yɛanya ahoɔden bio? Sɛ nhyɛso ne nsɛnnennen a yehyia no ma yefi ase brɛ a, yebetumi anya ahoɔden afi kenkan a yɛbɛkenkan nkate ne asetra mu ɔbrɛ ankasa a mmarima ne mmea anokwafo a wɔtraa ase wɔ Bible mmere mu no faa mu no ho asɛm mu. Ɛwom sɛ wɔyɛɛ mudi mu kura ho nhwɛso a ɛda nsow de, nanso na wɔyɛ nnipa “a wɔwɔ nkate te sɛ yɛn ara.” (Yakobo 5:17, NW; Asomafo no Nnwuma 14:15) Wohyiaa sɔhwɛ ne amanehunu ahorow a ɛte sɛ yɛn de. Susuw nhwɛso ahorow bi ho.
13. Kyerɛwnsɛm mu nhwɛso ahorow bɛn na ɛkyerɛ sɛ na mmarima ne mmea anokwafo a wɔtraa ase wɔ Bible mmere mu no wɔ atenka ne osuahu ahorow te sɛ yɛn de pɛpɛɛpɛ?
13 Tete agya Abraham dii ne yere wu ho awerɛhow kɛse ɛmfa ho sɛ na ɔwɔ owusɔre no mu gyidi no. (Genesis 23:2; fa toto Hebrifo 11:8-10, 17-19 ho.) Dawid a onyaa ahonu no tee nka sɛ na ne bɔne no ama ɔmfata sɛ ɔsom Yehowa. (Dwom 51:11) Mose tee nka sɛ ɔmfata. (Exodus 4:10) Epafrodito hawee bere a afoforo behui sɛ ɔyare a emu yɛ den bi siw no kwan wɔ “Kristo adwuma” mu no. (Filipifo 2:25-30) Na ɛsɛ sɛ Paulo pere di ɔhonam mmerɛwyɛ so. (Romafo 7:21-25) Ɛda adi sɛ na Euodia ne Sintike, anuanom mmea baanu a wɔasra wɔn a na wɔwɔ Filipi asafo no mu no, ani nhyia. (Filipifo 1:1; 4:2, 3) Hwɛ sɛnea ɛhyɛ nkuran sɛ yebehu sɛ na saa anokwafo yi wɔ atenka ne osuahu ahorow a ɛte sɛ yɛn de pɛpɛɛpɛ, nanso wɔampa abaw! Saa ara na Yehowa nso ampow wɔn.
14. (a) Adwinnade bɛn na Yehowa de adi dwuma ma ɛboa yɛn ma yenya ahoɔden fi n’Asɛm mu? (b) Dɛn nti na nsɛm a ɛfa nnipa asetra, abusua, ne nkate ho apue Ɔwɛn-Aban ne Nyan! nsɛmma nhoma no mu?
14 Yehowa nam akoa nokwafo ne ɔbadwemma kuw no so kɔ so ma yɛn “aduan ɛbere a ɛsɛ mu” na aboa yɛn ma yɛanya ahoɔden afi n’Asɛm mu. (Mateo 24:45) Akoa nokwafo no fi bere tenten de Ɔwɛn-Aban ne Nyan! nsɛmma nhoma no adi dwuma de akasa ama Bible mu nokware, abɔ Onyankopɔn Ahenni dawuru sɛ onipa anidaso koro pɛ. Ɛnkanka wɔ mfe kakra a atwam ni mu no, Kyerɛwnsɛm mu nsɛm a ɛfa asetra, abusua, ne nkate fam haw ahorow a Onyankopɔn nkurɔfo binom mpo hyia bi ho asɛm a ɛyɛ ne bere mu de pue saa nsɛmma nhoma yi mu. Atirimpɔw bɛn nti na wotintim nsɛm a ɛtete saa? Ɛda adi sɛ sɛnea ɛbɛboa wɔn a wɔrehyia saa nsɛnnennen yi ma wɔanya ahoɔden ne nkuranhyɛ afi Onyankopɔn Asɛm no mu. Nanso nsɛm a ɛtete saa no boa yɛn nyinaa nso ma yɛte tebea a yɛn nuanom mmarima ne mmea binom wom no ase yiye. Saa kwan no so no, yetumi de Paulo nsɛm yi di dwuma yiye: “Monkyekye wɔn a wɔn koma atu werɛ, munso wɔn a wɔyɛ mmerɛw mu, montɔ mo bo ase mma nnipa nyinaa.”—1 Tesalonikafo 5:14.
Mpanyimfo a Wɔyɛ “Mframa Ano Hintabea”
15. Nkɔm bɛn na Yesaia hyɛ faa wɔn a wɔsom sɛ mpanyimfo ho, na asɛyɛde bɛn na eyi de to wɔn so?
15 Yehowa ama yɛn biribi foforo a ɛbɛboa yɛn bere a yɛahaw—asafo mu mpanyimfo. Odiyifo Yesaia kyerɛw faa eyinom ho sɛ: “Wɔn mu biara [da ne ho adi, NW] sɛ mframa ano hintabea ne osu ano guankɔbea, sɛ nkyerekyerewa so nsuwansuwa, sɛ asase a akyen so botan kɛse onwini.” (Yesaia 32:1, 2) Ɛnde, mpanyimfo wɔ asɛyɛde sɛ wɔbɛyɛ wɔn ade ma ɛne nkɔm a Yehowa hyɛ faa wɔn ho no ahyia. Ɛsɛ sɛ ‘wɔda wɔn ho adi’ sɛ awerɛkyekye ne abotɔyam fibea ma afoforo, na wonya ɔpɛ sɛ “wɔbɛkɔ so asoa wɔn ho wɔn ho nneɛma akɛse [anaa, “nneɛma a ɛhaw adwene”; nea ɛkyerɛ ankasa ne “nneɛma a emu yɛ duru”].” (Galatifo 6:2, New World Translation of the Holy Scriptures—With References ase hɔ asɛm) Wɔbɛyɛ dɛn atumi ayɛ eyi?
16. Dɛn na mpanyimfo betumi ayɛ de aboa obi a ɔte nka sɛ ɔmfata sɛ ɔbɔ mpae?
16 Sɛnea yɛadi kan aka no, ɛtɔ mmere bi a obi a wahaw betumi ate nka sɛ ɔmfata sɛ ɔbɔ mpae. Dɛn na mpanyimfo no betumi ayɛ? Wobetumi ne onii no abɔ mpae na wɔabɔ bi ama no. (Yakobo 5:14) Akyinnye biara nni ho sɛ srɛ a wobɛsrɛ Yehowa ama nea wahaw no ate, sɛ ɔmmoa onii no mma onhu sɛnea Yehowa ne afoforo dɔ no kɛkɛ no betumi akyekye ne werɛ. Ɔpanyin mpaebɔ a efi komam a obi a ɔwɔ ahohia mu bɛte no betumi aboa no ma n’ahotoso ayɛ kɛse. Ebetumi aboa onii no ma wadwen ho ahu sɛ sɛ mpanyimfo no wɔ ahotoso sɛ Yehowa betie mpae a wɔbɔ no no a, ɛnde ɔno nso betumi anya ahotoso saa.
17. Dɛn nti na ɛsɛ sɛ mpanyimfo yɛ atiefo a wɔwɔ tema?
17 Yakobo 1:19 ka sɛ: “Nnipa nyinaa nyɛ ntɛm ntie, nyɛ nyaa nkasa.” Sɛ mpanyimfo betumi aboa wɔn a wɔahaw ma wɔanya ahoɔden bio a, ɛsɛ sɛ wɔyɛ atiefo a wɔwɔ tema nso. Wɔ tebea horow bi mu no, ebia na asafo no mufo no reko tia ɔhaw anaa nhyɛso a wontumi nni ho dwuma wɔ saa nneɛma nhyehyɛe yi mu. Enti, ɛnyɛ nyansahyɛ a wɔde “besiesie” wɔn haw no na wobehia, na mmom otiefo pa a wɔne no bɛkasa kɛkɛ—obi a ɔnka sɛnea ɛsɛ sɛ wɔte nka nkyerɛ wɔn na mmom obetie wɔn a ommu wɔn ntɛn.—Luka 6:37; Romafo 14:13.
18, 19. (a) Ɔkwan bɛn so na yɛ a ɔpanyin bɛyɛ ntɛm atie no bɛboa no na wamfa adesoa no bi anka obi a wahaw ho? (b) Sɛ mpanyimfo nya “tema” ma afoforo a, dɛn na ɛba?
18 Mpanyimfo, yɛ a mobɛyɛ ntɛm atie no betumi aboa mo ma moakwati sɛ mode adesoa no bi mpo bɛka obi a wahaw ho a monhyɛ da. Sɛ nhwɛso no, sɛ onua anaa onuawa bi atoto asafo nhyiam bi mu anaa n’asɛnka adwuma akɔ fam a, ohia afotu a ɛbɛma wayɛ pii wɔ asɛnka mu anaa wataa akɔ nhyiam horow ankasa? Gyama. Nanso wunim asɛm no ani so yiye? Ɔwɔ yare bi a emu kɔ so yɛ den anaa? N’abusua mu asɛyɛde ahorow asesa nnansa yi anaa? Nsɛm tebea anaa ɔhaw foforo bi wɔ hɔ a ɛhyɛ ne so? Kae, ebia na onipa no te afobu kɛse nka dedaw sɛ ontumi nyɛ pii.
19 Ɛnde, ɔkwan bɛn so na wubetumi aboa onua anaa onuawa no? Ansa na wubenya adwene bi na wode afotu ama no no, tie no! (Mmebusɛm 18:13) Fa nsemmisa a emu dɔ ‘saw’ nkate a ɛwɔ onii no komam. (Mmebusɛm 20:5) Mmu w’ani ngu saa nkate yi so—ma w’ani nkũ ho. Ebia ebehia sɛ wɔma nea wahaw no awerɛhyem sɛ Yehowa dwen yɛn ho na ɔte ase sɛ ɛtɔ mmere bi a yɛn nsɛm tebea betumi asiw yɛn kwan. (1 Petro 5:7) Sɛ mpanyimfo “nya tema” ma afoforo saa a, wɔn a wɔahaw no ‘benya ɔhome ama wɔn kra.’ (1 Petro 3:8, NW; Mateo 11:28-30) Sɛ wonya ɔhome a ɛte saa a, ɛho renhia sɛ wɔka kyerɛ wɔn sɛ wɔnyere wɔn ho; wɔn koma bɛkanyan wɔn ma wɔayɛ nea wobetumi nyinaa de asom Yehowa.—Fa toto 2 Korintofo 8:12; 9:7 ho.
20. Bere a awo ntoatoaso bɔne yi awiei abɛn pɛɛ yi, dɛn na ɛsɛ sɛ yesi yɛn bo sɛ yɛbɛyɛ?
20 Nokwarem no, bere a yɛwom yi yɛ nnipa abakɔsɛm mu ahokyere bere a ɛsen biara. Satan wiase no asetra mu nhyɛso no mu reyɛ den bere a yɛkɔ yɛn anim wɔ awiei bere no mu no. Kae, te sɛ gyata a ɔhwehwɛ ne tamfo no, Ɔbonsam twɛn ma yɛhaw na yɛpa abaw sɛnea ɛbɛyɛ a ɔde hokwan no benya yɛn akyere yɛn ntɛm. Hwɛ sɛnea yebetumi de aseda ama sɛ Yehowa ma wɔn a wɔabrɛ ahoɔden! Momma yɛmfa nsiesiei a wayɛ a ɛhyɛ yɛn den ma yɛkɔ yɛn anim, te sɛ ɔkɔre a otu nam wim ntaban akɛse a ɔde ma yɛn no, nni dwuma nkosi ase. Bere a yɛabɛn awo ntoatoaso bɔne yi awiei pɛɛ no, ɛnyɛ saa bere yi na ɛsɛ sɛ yegyae mmirikatu a ɛbɛma yɛanya akyɛde no—daa nkwa.—Hebrifo 12:1.
Wo Mmuae Ne Dɛn?
◻ Dɛn na yebetumi ahwɛ kwan sɛ Yehowa bɛyɛ de abua yɛn mpaebɔ?
◻ Akwan bɛn na yebetumi afa so anya ahoɔden afi yɛn Kristofo nuayɛ no mu?
◻ Ɔkwan bɛn so na Onyankopɔn Asɛm boa yɛn ma yenya ahoɔden bio?
◻ Dɛn na mpanyimfo betumi ayɛ de aboa wɔn a wɔahaw ma wɔanya ahoɔden bio?
[Kratafa 17 mfonini]
Sɛ yɛreyi ahɔhoyɛ adi a, mommma yɛn werɛ mmfi wɔn a wohia nkuranhyɛ no
[Kratafa 18 mfonini]
Mpanyimfo betumi asrɛ Yehowa sɛ ɔmmoa wɔn a wɔahaw no ma wontumi nhu sɛnea wɔdɔ wɔn