So Mmuadadi Bere Atwam?

MRUDULABEN, Indiani bea bi a wadi mfe 78 a odi yiye ka sɛ: “Madi mmuada Dwoda biara fi bere a m’ani fii.” Eyi ayɛ ne som fã, ɔkwan a ɔfa so hwɛ hu sɛ wanya aware pa ne mma a wɔwɔ akwahosan pa, ne afei ahobammɔ ma ne kunu nso. Seesei a ɔyɛ okunafo no, ɔkɔ so di mmuada Dwoda biara de hwehwɛ akwahosan pa ne ne mma yiyedi. Te sɛ ɔno no, Hindufo mmea fã kɛse no ara de mmuada a wodi no daa yɛ wɔn asetra fã.

Prakash, odwumayɛni abasriwa bi a ɔte Mumbai (Bombay) borɔn bi so wɔ India no ka sɛ odi mmuada afe biara wɔ Sawan (Shravan) ɔsram no Dwoda biara. Eyi yɛ Hindufo kalenda so ɔsram a wodi ɔsom mu nneɛma ho dwuma titiriw. Prakash kyerɛkyerɛ mu sɛ: “Ɔsom nti na mifii ase, nanso seesei mihu sɛ ade foforo a ɛma mekɔ so yɛ ne akwahosan. Esiane sɛ Sawan yɛ osutɔ bere awiei hɔ baabi nti, ɛma me nipadua no nya kwan tew ne ho wɔ nyarewa a ɛtaa ba wɔ asusow bere mu ho.”

Ebinom te nka sɛ mmuadadi boa obi wɔ honam, adwene, ne honhom fam. Sɛ nhwɛso no, Grolier International Encyclopedia no ka sɛ: “Nyansahu mu nhwehwɛmu a wɔayɛ nnansa yi kyerɛ sɛ mmuadadi betumi ayɛ nea mfaso wɔ so, na sɛ wɔyɛ no yiye a, ebetumi ama w’adwenem ada hɔ na woahu nyansa.” Wɔka sɛ na Helani nyansapɛfo Plato di mmuada dadu anaa nea ɛboro saa, na na ɔkontaabufo Pythagoras ma n’asuafo di mmuada ansa na wakyerɛ wɔn ade.

Wɔ ebinom fam no, nea mmuadadi kyerɛ ne sɛ wonni aduan na wɔnnom nsu koraa bere bi, bere a afoforo nom nsu wɔ bere a wɔredi mmuada no. Nnipa pii susuw sɛ nnuan bi a wogyae di anaa aduan pɔtee bi a wɔbɛtwe wɔn ho afi ho no yɛ mmuadadi. Nanso mmuadadi a wɔyɛ no bere tenten na wɔnhwɛ ntwa so no betumi ayɛ nea asiane wom. Sɛnkyerɛwfo Parul Sheth ka sɛ bere a nipadua no de setakye a ɛwɔ mu adi dwuma awie no, ɛsan dan ntini mu ahoɔdennuru no yɛ no asikre na afei, asan akɔ nipadua no srade mu. Srade a ɛdan no asikre no yi nsufĩ bi a wɔfrɛ no ketone body fi nipadua no mu. Sɛ eyi boaboa ano a ɛkɔ amemene no mu, na ɛhaw ehon nkwaadɔm atitiriw no. Sheth ka sɛ: “Saa bere yi na mmuadadi betumi abɛyɛ nea asiane wom. Wubetumi ayɛ basaa, w’adwene betu afra, ne nea ɛsen saa. . . . [Ebetumi ama] woatɔ mum na woawu mpo.”

Adwinnade ne Amanne

Wɔde mmuadadi adi dwuma sɛ adwinnade titiriw a wɔfa so du amammui ne asetram botae ahorow ho. Obi a wagye din wɔ adeyɛ yi mu ne Mohandas K. Gandhi a ofi India no. Sɛ́ obi a nnipa ɔpepehaha pii bu no kɛse no, odii mmuada de nyaa India Hindufo so nkɛntɛnso a emu yɛ den. Bere a Gandhi reka nea efi ne mmuada a odii de siesiee adwumayɛ mu ntawntawdi a na ɛda adwinnan mu adwumayɛfo ne adwuma wuranom ntam mu bae ho asɛm no, ɔkae sɛ: “Ade titiriw a efi mu bae ne sɛ tebea pa bɛdaa wɔn nyinaa ntam. Ɛkaa adwuma wuranom no koma . . . Wogyaee atuatew no bere a na madi mmuada nnansa pɛ no.” South Africa mampanyin, Nelson Mandela, de ne ho hyɛɛ nnanum mmuadadi a wɔde tew atua wɔ ne mfe a ɔde daa afiase sɛ amammui ho deduafo no mu.

Nanso ɔsom ho nsɛm nti na nnipa dodow no ara de wɔn ho hyɛ mmuadadi mu. Mmuadadi yɛ amanne titiriw wɔ Hindusom mu. Fast and Festivals of India nhoma no ka sɛ, nna bi wɔ hɔ a, “wodi mmuada wesee . . . wɔnnom nsu mpo. Mmarima ne mmea nyinaa di mmuada wesee . . . de hwehwɛ anigye, yiyedi ne mmarato ne bɔne fafiri.”

Wodi mmuada wɔ Jainsom mu kɛse. The Sunday Times of India Review bɔ amanneɛ sɛ: “Jain muni [nyansafo] bi a ɔwɔ Bombay [Mumbai] nom nsuɔhyew kuruwa abien pɛ da biara—nna 201. Ne so tewee kilogram 33.” Ebinom di mmuada mpo ma ɔkɔm kunkum wɔn, a wɔwɔ gyidi sɛ eyi bɛma wɔanya nkwagye.

Mmuadadi yɛ ahyɛde ma Nkramosom mu nnipa a wɔanyinyin nyinaa wɔ Ramadan ɔsram no mu. Ɛnsɛ sɛ wodi aduan nom nsu fi owipuei kosi owitɔe wɔ ɔsram no nyinaa mu. Ɛsɛ sɛ obi a ɔyare anaa otu kwan saa bere yi di mmuada nna foforo hyɛ anan. Nnafua 40 a edi Easter anim a wɔfrɛ no Lent no yɛ mmuadadi bere ma Kristoman mufo bi, na nyamesom akuw pii di mmuada nna pɔtee bi.

Nokwarem no, mmuadadi bere ntwaam. Na esiane sɛ ɛyɛ ɔsom pii mu adeyɛ nti ebia yebebisa sɛ, So Onyankopɔn hwehwɛ mmuadadi? Mmere bi wɔ hɔ a Kristofo betumi asi gyinae sɛ wobedi mmuada? Eyi so betumi aba mfaso? Asɛm a edi hɔ no bɛka saa nsɛmmisa yi ho asɛm.

[Kratafa 3 mfonini]

Jainsom no bu mmuadadi sɛ ɔkwan a ɔkra no nam so nya nkwa

[Kratafa 4 mfonini]

Mohandas K. Gandhi dii mmuada sɛ ɔkwan a ɔnam so du amammui ne asetram botae ahorow ho

[Kratafa 4 mfonini]

Wɔ Nkramosom mu no, mmuadadi yɛ ahyɛde wɔ Ramadan ɔsram mu

[Asɛm Fibea]

Garo Nalbandian