Henok Wansuro Tebea Bɔne Biara a Ohyiae

WƆ ONIPA pa fam no, na ɛyɛ bere bɔne sen biara. Nnebɔne hyɛɛ asase so ma. Ná nnipa bra asɛe koraa. Nokwarem no, na ɛrenkyɛ na wɔaka sɛ: “Awurade [Yehowa, NW] hui sɛ nnipa bɔne dɔɔso pii wɔ asase so, na wɔn komam adwene nyinaa yɛ bɔne nko daa nyinaa.”—Genesis 6:5.

Henok, onipa a ɔto so ason wɔ Adam anato mu no nyaa akokoduru a ɛma ɔyɛɛ soronko. Ogyinaa trenee afã pintinn ɛmfa ho ɔhaw horow a na ebefi mu aba no. Ná Henok asɛm no haw amumɔyɛfo no araa ma enti wɔpɛe sɛ wokum no, na na Yehowa nkutoo na obetumi aboa no.—Yuda 14, 15.

Henok ne Amansan Ɔsɛmpɔw No

Amansan tumidi ho ɔsɛmpɔw no sɔree bere tenten ansa na wɔrewo Henok. Ná Onyankopɔn wɔ hokwan sɛ odi tumi? Sɛnea yɛbɛka no no, Satan Ɔbonsam kae sɛ, dabi. Ɔkae sɛ sɛ abɔde a wonim nyansa twe wɔn ho fi Onyankopɔn akwankyerɛ ase a, wobedi yiye. Satan bɔɔ mmɔden sɛ ɔbɛhyɛ n’asɛm no mu den denam anifere kwan a ɔnam so daadaa nnipa ma wobedii n’akyi tiaa Yehowa Nyankopɔn no so. Adam, ne yere Hawa, ne wɔn abakan, Kain, agye dimmɔne sɛ wodii Satan akyi denam paw a wɔpaw sɛ wobedi wɔn ho so sen sɛ Onyankopɔn bedi wɔn so no so. Nnipa baanu a wodi kan no nam aduaba a Onyankopɔn baraa sɛ wonnni a wodii no so yɛɛ saa, na Kain yɛɛ saa bere a ɔhyɛɛ da kum ne nua Abel, a na ɔyɛ ɔtreneeni no.—Genesis 3:4-6; 4:8.

Ná Abel de akokoduru agyina Yehowa afã. Esiane sɛ na Abel mudi mu kura no ama ɔsom kronn anya nkɔso no nti, akyinnye biara nni ho sɛ Satan ani gyei sɛ Kain de abufuw kum no. Efi saa bere no reba no, Satan de “owu ho hu” adi dwuma de ahunahuna nkurɔfo. Ɔpɛ sɛ ɔde ehu hyɛ obiara a ɔpɛ sɛ ɔsom nokware Nyankopɔn no mu.—Hebrifo 2:14, 15; Yohane 8:44; 1 Yohane 3:12.

Bere a wɔwoo Henok no, na ɛte sɛ nea wɔfoa Satan adwene a ɛne sɛ, nnipa rennyina Yehowa tumidi akyi no so yiye. Ná Abel awu, na na wonni ne nokwaredi ho nhwɛso no akyi. Nanso Henok daa ne ho adi sɛ ɔyɛ soronko. Ná ɔwɔ gyidi ho nnyinaso a emu yɛ den, efisɛ na onim nsɛm a ɛkɔɔ so wɔ Eden turom hɔ no.a Hwɛ sɛnea na n’ani begye Yehowa nkɔmhyɛ a ɛkyerɛ sɛ Aseni a wahyɛ ne ho bɔ no de Satan ne n’akwan nyinaa bɛba awiei no ho!—Genesis 3:15.

Abakɔsɛm a na ɛfa Abel a Ɔbonsam ma wokum no ho no anhunahuna Henok, bere a na ɔwɔ anidaso yi ho akwanhwɛ bere nyinaa no. Mmom no, ɔkɔɔ so ne Yehowa nantewee, na odii trenee akyi, ne nkwa nna nyinaa. Henok twee ne ho fii wiase no ho pow n’ahofadi honhom no.—Genesis 5:23, 24.

Bio nso, Henok de akokoduru kasae ma emu daa hɔ sɛ Ɔbonsam nnwuma bɔne no bedi nkogu. Wɔ Onyankopɔn honhom kronkron anaa n’adeyɛ tumi no akwankyerɛ ase no, Henok hyɛɛ abɔnefo ho nkɔm sɛ: “Hwɛ, Awurade [Yehowa, NW] ne n’ahotefo mpempem reba abebu wɔn nyinaa atɛn, na wayi wɔn mu amumɔyɛfo nyinaa ntɛn, wɔn amumɔyɛde a wɔyɛe ne wɔn nsɛm a ɛyɛ den a nnebɔneyɛfo amumɔyɛfo no kae de tiaa no nyinaa ho.”—Yuda 14, 15.

Esiane sɛ Henok kaa nsɛm a wansuro nti, bere a ɔsomafo Paulo rekyerɛw krataa akɔma Hebrifo Kristofo no, ɔde no kaa “adansefo mununkum” a wɔnam wɔn nnwuma so yɛɛ gyidi ho nhwɛso soronko no ho.b (Hebrifo 11:5; 12:1) Sɛ́ ɔbarima a ɔwɔ gyidi no, Henok gyinaa ne mudi mu bɛboro mfirihyia 300. (Genesis 5:22) Hwɛ sɛnea Henok nokwaredi no bɛhyɛ Onyankopɔn atamfo a wɔwɔ ɔsoro ne asase so no abufuw! Henok nkɔmhyɛ a ɛwowɔ no maa Satan faa ne ho tan, nanso ɛmaa no nyaa Yehowa ahobammɔ.

Onyankopɔn Faa Henok Kɔe—Ɔkwan Bɛn So?

Yehowa amma Satan anaa n’asase so asomfo kwan amma wɔankum Henok. Mmom no, kyerɛwtohɔ a efi honhom mu no ka sɛ: “Onyankopɔn faa no kɔe.” (Genesis 5:24) Ɔsomafo Paulo kyerɛkyerɛ nsɛm mu saa kwan yi so sɛ: “Gyidi nti na wɔfaa Henok kɔe na wanhu owu; na wɔanhu no, sɛ Onyankopɔn abɛfa no kɔ ntia; na ansa na wɔfaa no kɔe no, onyaa adanse sɛ ɔsɔ Onyankopɔn ani.”—Hebrifo 11:5.

Ɔkwan bɛn so na ‘wɔfaa Henok kɔe a wanhu owu’? Anaa sɛnea nkyerɛase a R. A. Knox yɛe de ba no, ɔkwan bɛn so na “wɔfaa” Henok “kɔe a wanwu”? Onyankopɔn twaa Henok nkwa so asomdwoe mu, na ogyee no fii owu nwowɔe a efi ɔyare anaasɛ nsɛmmɔnedi a efi n’atamfo hɔ no mu. Yiw, Yehowa twaa Henok nkwa so bere a na wadi mfirihyia 365 no—sɛ wɔde no toto ne bere sofo ho a, na onnyinii koraa.

Ɔkwan bɛn so na Henok ‘nyaa adanse sɛ ɔsɔ Onyankopɔn ani’? Adanse bɛn na onyae? Ɛbɛyɛ sɛ Onyankopɔn hwim Henok te sɛ nea ‘wohwim’ ɔsomafo Paulo anaasɛ wɔfaa no kɔɔ baabi foforo, a ɛda adi sɛ onyaa Kristofo asafo no daakye honhom mu paradise ho anisoadehu no ara pɛ. (2 Korintofo 12:3, 4) Adanse anaa nea ɛkyerɛ sɛ na Henok sɔ Onyankopɔn ani no betumi akyerɛ daakye asase so Paradise a wɔn a wɔte mu nyinaa begyina Onyankopɔn tumidi akyi no ho anisoadehu. Gyama bere a na Henok wɔ ohwim tebea mu no na Onyankopɔn maa no wui a wante yaw sɛ ɔnna nkosi bere a obenya owusɔre. Sɛnea na ɛte wɔ Mose fam no, ɛbɛyɛ sɛ Yehowa de Henok amu siei, efisɛ “wɔanhu no.”—Hebrifo 11:5; Deuteronomium 34:5, 6; Yuda 9.

Nkɔmhyɛ no Nya Mmamu

Ɛnnɛ, Yehowa Adansefo ka nea Henok nkɔmhyɛ no kyerɛ no ho asɛm. Wofi Kyerɛwnsɛm mu kyerɛ sɛnea ebenya mmamu, bere a Onyankopɔn sɛe amumɔyɛfo nnansa yi ara no. (2 Tesalonikafo 1:6-10) Wɔn asɛm a wɔka no mma wɔmpɛ wɔn asɛm, efisɛ ɛne wiase no nsusuwii ne botae horow nhyia. Ɔsɔretia a wohyia no nyɛ wɔn nwonwa, efisɛ Yesu bɔɔ n’akyidifo kɔkɔ sɛ: “Me din nti nnipa nyinaa bɛtan mo.”—Mateo 10:22; Yohane 17:14.

Nanso, te sɛ Henok no, wɔahyɛ Kristofo a wɔwɔ hɔ nnɛ bɔ sɛ, awiei koraa no, wobegye wɔn afi wɔn atamfo nsam. Ɔsomafo Petro kyerɛwee sɛ: “Awurade [Yehowa, NW] nim sɛnea obeyi wɔn a wɔde fɛre som no afi sɔhwɛ mu, na wama wɔatwe wɔn a wɔnteɛ aso de wɔn asie atemmu da.” (2 Petro 2:9) Ebia Onyankopɔn bɛhwɛ ma wɔayi ɔhaw anaa tebea bi a ɛyɛ den afi hɔ. Ebia ɔtaa to betwa. Nanso sɛ amma sa a, onim sɛnea ɔbɛma ‘ɔkwan abɛda ho’ sɛnea ɛbɛyɛ a ne nkurɔfo betumi agyina wɔn sɔhwɛ horow ano nkonimdi mu. Yehowa de “tumi a ɛboro so” mpo ma, bere a ɛho hia no.—1 Korintofo 10:13; 2 Korintofo 4:7.

Sɛ́ “wɔn a wɔhwehwɛ n’akyi kwan no katuafo” no, Yehowa de daa nkwa betua ne nkoa anokwafo ka nso. (Hebrifo 11:6) Wɔ wɔn mu dodow no ara fam no, eyi bɛyɛ daa nkwa wɔ asase so paradise mu. Te sɛ Henok no, ɛmmra sɛ yɛbɛka Onyankopɔn asɛm no a yensuro. Ɛmfa ho tebea bɔne biara no, momma yemfi gyidi mu nyɛ eyi.

[Ase hɔ nsɛm]

[Kratafa 30 adaka]

Wogu Onyankopɔn Din Ho Fĩ

Wɔwoo Adam nena Enos bɛyɛ mfeha anan ansa na wɔrewo Henok. Genesis 4:​26 ka sɛ: “Ɛbere no mu na wofii ase bɔɔ Awurade [Yehowa, NW] din.” Nhomanimfo a wɔaben Hebri kasa mu no bi gye di sɛ ɛsɛ sɛ nkyekyem yi kenkan sɛ “fii ase de abususɛm” bɔɔ Onyankopɔn din anaa “saa bere no na abususɛm fii ase.” Ɛdefa saa abakɔsɛm mu bere no ho no, Jerusalem Targum no ka sɛ: “Saa awo ntoatoaso no bere so na wofii ase yɛɛ bɔne, na wɔyeyɛɛ ahoni fae, na wɔde Awurade Asɛm totoo wɔn ahoni din.”

Enos bere so na wɔde Yehowa din dii dwuma kɛse wɔ ɔkwammɔne so. Ebetumi aba sɛ nnipa de Onyankopɔn din totoo wɔn ho so anaa wɔde too nkurɔfo bi a wɔkyerɛe sɛ wɔnam wɔn so kɔ Yehowa Nyankopɔn nkyɛn wɔ ɔsom mu. Anaa ebia wɔde Onyankopɔn din frɛɛ wɔn ahoni. Sɛnea ɛte biara no, Satan Ɔbonsam kaa adesamma abusua no hyɛɛ abosonsom mu. Ebeduu bere a wɔwoo Henok no, na nokware som ho yɛ na. Te sɛ Henok no, wɔampɛ obiara a na ɔde nokware no tra ase na ɔka ho asɛm no asɛm, ma ne saa nti, wɔtaa wɔn.​—Fa toto Mateo 5:​11, 12 ho.

[Adakda wɔ kratafa 31]

So Henok Kɔɔ Soro?

“Gyidi nti na wɔfaa Henok kɔe na wanhu owu.” Sɛ Bible nkyerɛase ahorow bi rekyerɛ Hebrifo 11:5 no fã yi ase a, wɔkyerɛ sɛ Henok anwu ankasa. Sɛ nhwɛso no, A New Translation of the Bible a James Moffatt yɛe no ka sɛ: Gyidi nti na wɔfaa Henok kɔɔ soro a wanwu da.”

Nanso, Henok wu akyi bɛyɛ mfe 3,000 no, Yesu Kristo kae sɛ: “Obi mforoo soro, gye nea ofi soro sianee no, onipa ba a ɔwɔ soro no.” (Yohane 3:13) The New English Bible no kenkan sɛ: “Obiara nkɔɔ soro pɛn, gye nea ofi ɔsoro bae no, Onipa Ba no.” Bere a Yesu kaa saa asɛm no, na ɔno mpo mforo nkɔɔ soro.—Fa toto Luka 7:28 ho.

Ɔsomafo Paulo ka sɛ, Henok ne afoforo a wɔbom yɛ adansofo mununkum a wɔtraa ase ansa na Kristofo bere reba nyinaa ‘wuwui’ a “wɔn nsa anka bɔhyɛ no.” (Hebrifo 11:13, 39) Dɛn ntia? Efisɛ adesamma nyinaa a Henok ka ho, anya bɔne afi Adam mu. (Dwom 51:5; Romafo 5:12) Nkwagye nam Kristo Yesu agyede afɔrebɔ no nkutoo so. (Asomafo no Nnwuma 4:12; 1 Yohane 2:1, 2) Henok bere so no, na wonnya ntuaa saa agyede no. Enti, Henok ankɔ soro, na mmom, wada wɔ owu mu retwɛn owusɔre wɔ asase so.—Yohane 5:28, 29.

[Mfonini Fibea wɔ kratafa 29]

Woyi fii Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s mu