Mishnah No ne Onyankopɔn Mmara a Ɔde Maa Mose No

“MFIASE no ɛyɛ yɛn sɛnea yɛakɔtɔ nkɔmmɔ bi a wɔafi ase dedaadaw a ɛfa nsɛm a yentumi nte ase da ho mu . . . Yɛte . . . nka te sɛ nea yɛte wimhyɛn gyinabea ahɔhodan bi mu wɔ akyirikyiri asase bi so retwɛn. Yɛte kasa a nkurɔfo reka no ase, nanso yenhu nea wɔrepɛ akyerɛ ne nea ɛhaw wɔn ankasa ne nea ɛsen biara no, ahopere a wɔde kasa no.” Saa na Yudani nhomanimfo Jacob Neusner kyerɛkyerɛ sɛnea ebia akenkanfo bɛte nka bere a wofi ase kenkan Mishnah no mu. Neusner de ka ho sɛ: “Mishnah no nhyɛ da nni mfiase. Ɛba awiei pen.”

Wɔ A History of Judaism mu no, Daniel Jeremy Silver frɛ Mishnah no “rabifo Yudasom nkyerɛwee titiriw.” Nokwarem no, ɔtoa so ka sɛ: “Mishnah no besii Bible no ananmu sɛ nhoma titiriw a [Yudafo] de toaa wɔn adesua so.” Adɛn nti na nhoma a wɔakyerɛw no hwanyann saa no ho behiaa nkurɔfo saa?

Mmuae no fã bi wɔ asɛm yi a wɔkae wɔ Mishnah mu no mu: “Mose nsa kaa Torah no wɔ Sinai na ɔde maa Yosua, na Yosua de maa mpanyimfo, na mpanyimfo no nso de maa adiyifo. Na adiyifo no nso de maa bagua kɛse no mu mmarima.” (Avot 1:1) Mishnah no kyerɛ sɛ ɛka nsɛm a wɔde maa Mose wɔ Bepɔw Sinai so no ho asɛm—Onyankopɔn Mmara a ɔde maa Israel no fã bi a wɔankyerɛw. Wobuu bagua kɛse (a akyiri yi wɔfrɛɛ no Sanhedrin) no mufo sɛ wɔka nhomanimfo a wɔaben, anaa anyansafo pii a wɔtoatoaa so bae, a wɔde wɔn ano kekaa nkyerɛkyerɛ ahorow bi kyerɛɛ awo ntoatoaso ahorow kosii sɛ awiei koraa no wɔkyerɛwee wɔ Mishnah mu no ho. Nanso ɛyɛ nokware? Hena ankasa na ɔkyerɛw Mishnah no, na dɛn ntia? Wɔde emu nsɛm no maa Mose nea edi kan wɔ Sinai anaa? So ɛkyerɛ biribi ma yɛn nnɛ?

Yudasom a Enni Asɔrefie

Bere a wɔnam honhom so rekyerɛw Kyerɛwnsɛm no, na gyidi a ɛne sɛ wɔde ɔsoro mmara a wɔde ano ka kyerɛ bi kaa Mose Mmara a wɔkyerɛwee no ho mae no nni hɔ.a (Exodus 34:27) Mfehaha pii akyi no, Yudasom mu kuw a wɔne Farisifo no na wɔkɔfa bae na wɔmaa enyaa nkɔso. Wɔ afeha a edi kan Y.B. mu no, Sadukifo ne Yudafo foforo annye saa nkyerɛkyerɛ a ennyina Bible so yi antom. Nanso, bere tenten a na Yudafo no som ti ne Yerusalem asɔrefie no, na mmara a wɔde ano ka kyerɛ ho ɔsɛmpɔw no da nkyɛn. Ɔsom a ɛkɔɔ so wɔ asɔrefie hɔ no maa Yudani biara asetra nyaa nhyehyɛe pa ne nnyinaso koduu baabi.

Nanso wɔ 70 Y.B. mu no, Yuda man no kɔɔ nyamesom mu ɔhaw bere a ɛso nni bi mu. Roma asraafo dɔm sɛee Yerusalem, na wokunkum Yudafo bɛboro ɔpepem biako. Ná asɔrefie no a ɛyɛ wɔn honhom fam asetra ti no nni hɔ bio. Ná wɔrentumi mfa Mose Mmara, a na ɛhwehwɛ afɔrebɔ ne asɔfo nnwuma wɔ asɔrefie hɔ no ntra ase. Ná Yudasom fapem no afi hɔ. Talmud ho nhomanimfo Adin Steinsaltz kyerɛw sɛ: “Ná ɔsɛe a ɛbae . . . wɔ 70 Y.B. mu no ama nyamesom asetra nnyinaso a wɔbɛsan ahyehyɛ no foforo koraa ho abehia denneennen.” Na wɔsan hyehyɛɛ no foforo nso.

Ansa na wɔresɛe asɔrefie no mpo no, Yohanan Ben Zakkai, Farisifo kannifo Hillel suani bi a na wobu no, nyaa hokwan a ɔde beyi Yudasom honhom fam dwumadibea ti ne Sanhedrin no afi Yerusalem akɔ Yavneh, fii Vespasian (a na aka kakra ma wabɛyɛ ɔhempɔn no) hɔ. Sɛnea Steinsaltz kyerɛkyerɛ mu no, bere a wɔsɛee Yerusalem no, Yohanan Ben Zakkai “benyaa asɛyɛde kɛse a ɛne sɛ ɔde dwumadibea ti foforo besi hɔ ama nkurɔfo no, na waboa wɔn ma wɔayɛ nsakrae ma ɛne tebea foforo a ɛbɛma wɔadan nyamesom mu nsiyɛ no akɔ biribi foforo so esiane sɛ na Asɔrefie no nni hɔ bio no ahyia.” Na saa nnyinaso foforo no ne mmara a wɔde ano ka kyerɛ no.

Esiane sɛ na asɔrefie no asɛe nti, na Sadukifo ne Yudafo nyamesom akuw foforo no nni biribi foforo biara a nkurɔfo ani begye ho. Farisifo no bedii akoten wɔ Yudafo mu, na wonyaa wɔn asɔretiafo ma wɔbɛkaa wɔn ho. Esiane sɛ na biakoyɛ na ehia wɔn kɛse nti, rabifo akannifo no ankɔ so amfrɛ wɔn ho Farisifo, edin a na ɛtwe adwene si fekusɛm ne akuw ahorow so no. Edin a wɔde bɛfrɛɛ wɔn ara ne rabifo, “Israel anyansafo no.” Ná saa anyansafo no bɛyɛ nhyehyɛe bi ma wɔde akora mmara a wɔde ano ka kyerɛ ho gyidi a wokura no so. Ná ɛbɛyɛ honhom fam nhyehyɛe a ɛbɛyɛ den paa sɛ nnipa betumi atow ahyɛ so te sɛ asɔrefie no.

Mmara a Wɔde Ano Ka Kyerɛ a Wɔma Edii Mũ

Ɛwom sɛ afei de na rabifo adesuabea a na ɛwɔ Yavneh (kilomita 40 wɔ Yerusalem atɔe fam) no na ɛyɛ dwumadibea titiriw de, nanso wobenyaa adesuabea afoforo a wɔkyerɛkyerɛɛ mmara a wɔde ano ka kyerɛ no pii wɔ Israel nyinaa, na wonyaa bi mpo wɔ Babilon ne Roma tɔnn. Nanso, eyi de ɔhaw bi bae. Steinsaltz kyerɛkyerɛ mu sɛ: “Bere tenten a na anyansafo no nyinaa aboa ano wɔ faako, na mmarima bi [a na wɔwɔ Yerusalem] nkutoo na wɔyɛɛ ɔkyerɛkyerɛ adwuma titiriw no, wotumi maa atetesɛm no yɛɛ biako. Nanso akyerɛkyerɛfo a wɔbɛyɛɛ pii, ne sukuu ahorow a wɔtewee no maa . . . akwan a wɔfa so kyerɛ ade na wɔde nkyerɛkyerɛmu ma no bɛyɛɛ bebree.”

Wɔfrɛɛ mmara a wɔde ano ka kyerɛ ho akyerɛkyerɛfo no Tannaim, asɛmfua a wonya fii Aram kasa a ɛkyerɛ “sua ade,” “tĩ nsɛm mu ka,” anaa “kyerɛkyerɛ,” mu. Eyi sii sɛnea na wosua mmara a wɔde ano ka kyerɛ no, de kyerɛkyerɛ so dua sɛ na wotĩ nsɛm pii mu kyere nsɛm gu wɔn tirim. Nea ɛbɛma nsɛm a wɔkyere gu wɔn tirim no akɔ so no, wotwaa ahyɛde anaa atetesɛm biara so yɛɛ no asɛntiaa. Sɛ nsɛmfua no yɛ ntiantia paa a, na eye. Wɔpɛɛ ɔkwan a wɔbɛfa so aka no anwensɛm kasa mu, na na wɔtaa tĩ nsɛm mu ka, anaa wɔde to dwom. Nanso, na saa ahyɛde ahorow yi yɛ hwanyann, na na ɛsono ɔkyerɛkyerɛfo biara ne ne de.

Rabi a odii kan yɛɛ atetesɛm a wɔde ano ka kyerɛ ahorow pii no ho nhyehyɛe pɔtee ne, Akiba ben Joseph (bɛyɛ 50-135 Y.B. mu). Steinsaltz kyerɛw ne ho asɛm sɛ: “Ne bere sofo de ne dwumadi no totoo adwuma a ɔpaani a ɔkɔ wura mu kɔsesaw nnɔbae biara a obenya de gu kɛntɛn biako mu, na afei ɔsan kɔ fie kɔkyekyɛ mu de ebiara kɔ n’afã ho. Ná Akiba asua nsɛm pii a ɛyɛ hwanyann, akyekyɛ mu akuwakuw a ebiara ka asɛm pɔtee bi.”

Wɔ afeha a ɛto so abien Y.B. mu—Yerusalem sɛe no akyi bɛboro mfe 60—no, Bar Kokhba dii atua kɛse a ɛto so abien a Yudafo tew tiaa Romafo no anim. Saa bere no nso, atuatew kowiee amanehunu mu. Ná Akiba ne n’asuafo no pii ka Yudafo bɛyɛ ɔpepem biako a wokunkum wɔn no ho. Wɔbɔɔ anidaso biara a na ɛwɔ hɔ sɛ wobetumi asan asi asɔrefie no gui efisɛ Roma Ɔhempɔn Hadrian hyɛe sɛ Yudafo nni hokwan sɛ wɔkɔ Yerusalem, gye sɛ bere a wɔredi asɔrefie no sɛe ho afahyɛ no.

Ná Tannaim a wɔbae wɔ Akiba akyi no nhuu Yerusalem asɔrefie no da. Nanso nhyehyɛe a wɔnam so suaa atetesɛm a na ɛwɔ mmara a wɔde ano ka kyerɛ mu no bɛyɛɛ wɔn “asɔrefie,” anaa wɔn som ti. Tannaim a otwa to, Judah ha-Nasi toaa adwuma a Akiba ne n’asuafo fii ase a ɛmaa mmara a wɔde ano ka kyerɛ ho nhyehyɛe yi ase timii no so.

Sɛnea Wonyaa Mishnah No

Ná Judah ha-Nasi yɛ Hillel ne Gamaliel aseni.b Wɔwoo no wɔ Bar Kokhba atuatew bere no mu, na ɔbɛyɛɛ Yudafo a na wɔwɔ Israel no kannifo bere a afeha a ɛto so abien no rekɔ n’awiei ne afeha a ɛto so abiɛsa Y.B. mu mfiase no mu. Abodin ha-Nasi no kyerɛ “ɔbapɔmma,” a ɛkyerɛ gyinabea a na ɔwɔ wɔ ne mfɛfo Yudafo ani so. Wɔtaa frɛ no tiawa sɛ Rabi. Judah ha-Nasi dii n’ankasa adesuabea ne Sanhedrin no so, nea edi kan wɔ Bet She’arim ne akyiri yi, Sepphoris wɔ Galilea.

Bere a Judah ha-Nasi hui sɛ sɛ wɔne Roma di ako daakye a, ebetumi ama mmara a wɔde ano ka kyerɛ no mpo ho aba asɛm no, ɔde yɛɛ ne botae sɛ ɔbɛyɛ ho nhyehyɛe bi a ɛbɛma wɔatumi akora so. Ɔboaboaa ne bere so abenfo a wodi mũ paa no ano wɔ n’adesuabea hɔ. Wɔde mmara a wɔde ano ka kyerɛ no mu asɛm biara sii hɔ susuw ho. Wɔboaboaa saa nkɔmmɔbɔ yi mu nsɛntitiriw ano yɛɛ no nsɛm ntiantia, a wɔde Hebri anwensɛm kasa nkutoo na akyerɛw.

Wɔkyekyɛɛ saa nsɛntitiriw yi mu yɛɛ no nkyekyem anaa Akuw atitiriw asia a na egyina nsɛmpɔw so. Judah kyekyɛɛ eyi nso mu yɛɛ no afã anaa nsɛmti 63. Afei de na honhom fam akorae no adi mũ. Ɛde besi saa bere no, na wɔde wɔn ano na ɛka atetesɛm a ɛtete saa no kyerɛ bere nyinaa. Nanso adeyɛ a ɛmaa ahobammɔ no tuu mpɔn ne nsakrae titiriw bi a wɔyɛe—nsɛm no nyinaa a wɔkyerɛw too hɔ. Wɔfrɛɛ akyerɛw nhyehyɛe foforo yi a ɛkoraa mmara a wɔde ano ka kyerɛ no so no Mishnah. Edin Mishnah no fi Hebri asɛm sha·nahʹ, a ɛkyerɛ “tĩ nsɛm mu ka,” “sua ade,” anaa “kyerɛkyerɛ,” no mu. Wɔ Aram mu no ɛyɛ tenaʼʹ, a wonyaa tan·na·ʼimʹ, asɛmfua a na wɔde frɛ Mishnah no akyerɛkyerɛfo no fii mu.

Ná ɛnyɛ Mishnah no atirimpɔw ne sɛ ɛde biribiara ho mmara besi hɔ. Ná egyina nsɛm tebea a ɛyɛ soronko so titiriw, na na ɛfa no sɛ ɔkenkanfo no nim nnyinasosɛm atitiriw no. Nea ɛyɛe ankasa ne sɛ ɛbɔɔ nea na wosusuw ho de kyerɛkyerɛ wɔ rabifo adesuabea ahorow wɔ Judah ha-Nasi bere so no mua. Wɔyɛɛ Mishnah no sɛ mmara a wɔde ano ka kyerɛ no mu nsɛntitiriw a wobegyina so asi nsɛm foforo ho gyinae, fapem anaa nnyinasosɛm titiriw ama nsɛm foforo.

Sɛ́ anka Mishnah no bɛda biribi a wɔde maa Mose wɔ Bepɔw Sinai so adi no, ɛma yehu sɛnea mmara a wɔde ano ka kyerɛ no bae, biribi a Farisifo no na wofii ase. Nsɛm a wɔakyerɛw wɔ Mishnah no mu no ma yɛte nsɛm bi a ɛwɔ Kristofo Hela Kyerɛwnsɛm no mu ne nkɔmmɔbɔ ahorow bi a ɛkɔɔ so wɔ Yesu Kristo ne Farisifo no ntam ase. Nanso, ahwɛyiye ho hia efisɛ nsɛm a ɛwɔ Mishnah no mu no yɛ adwene a na Yudafo kura fi afeha a ɛto so abien Y.B. mu. Mishnah no na ɛde asɔrefie a ɛto so abien no bere toãã Talmud no mu.

[Ase hɔ nsɛm]

[Kratafa 26 adaka]

Sɛnea Wɔakyekyɛ Mishnah Mu

Wɔakyekyɛ Mishnah mu ayɛ no Akuw asia. Nhoma nketewa anaa nsɛmti 63 na ɛwom, a wɔakyekyɛ mu ayɛ no atiri ne mishnayot, anaa nkasapɛn (ɛnyɛ nkyekyem).

1. Zeraim (Kuayɛ Mmara)

Saa nsɛmti yi bi fa aduan ne kuayɛ ho mpae a wɔbɔ ho. Ntotoso du du, asɔfo kyɛfa, mpɛpɛwadi, ne Homeda mfe ho mmara nso ka ho.

2. Moed (Nna Kronkron, Afahyɛ Ahorow)

Saa Kuw yi mu nsɛmti no ka Homeda, Mpata Da, ne afahyɛ afoforo ho mmara ho nsɛm.

3. Nashim (Mmea, Aware Mmara)

Eyinom ne nsɛmti a ɛka aware ne awaregyae, ntanka, Nasirifo, ne awaresɛe ho sobo ho nsɛm.

4. Nezikin (Ɛkabɔ ne Aban Mmara)

Saa Kuw yi mu nsɛmti ka nsɛm a ɛfa aban ne agyapade ho mmara, asɛnnii ne ɛkabɔ, Sanhedrin no dwumadi, abosonsom, nsewdi, ne Agyanom Mmara ho ho asɛm (Avot).

5. Kodashim (Afɔrebɔ Ahorow)

Saa nsɛmti yi ka mmoa ne aduan ayɛyɛde ne afei asɔrefie no kɛse ho ahyɛde ahorow no ho nsɛm.

6. Toharot (Ahodwira Amanne Ahorow)

Saa Kuw yi yɛ nsɛmti a ɛka amanne kwan so ahotew, aguare, nsa ho hohoro, honam ani nyarewa, ne nneɛma foforo a ɛho ntew ho nsɛm.

[Kratafa 28 adaka]

Mishnah No Ne Kristofo Hela Kyerɛwnsɛm No

Mateo 12:1, 2: “Ɛbere no mu no, Yesu kɔfaa aburofuw bi mu home da bi; na ɔkɔm dee n’asuafo no, na wofii ase pempan mmɛtem no bi wee. Na Farisifo no hui no, wɔka kyerɛɛ no sɛ: Hwɛ, w’asuafo yɛ nea enni ho kwan sɛ wɔyɛ home da.” Hebri Kyerɛwnsɛm no mmara nea Yesu asuafo no yɛe no. Nanso yehu nnwuma 39 a wɔabobɔ din sɛ rabi ahorow no barae sɛ ɛnsɛ sɛ wɔyɛ no Homeda wɔ Mishnah no mu.—Shabbat 7:2.

Mateo 15:3: “Yesu bua see wɔn sɛ: Adɛn nti na mo nso mo atetesɛm nti munni Onyankopɔn ahyɛde so?” Mishnah no foa saa su yi so. (Sanhedrin 11:3) Yɛkenkan sɛ: “Ɛsɛ sɛ wɔyɛ katee wɔ Akyerɛwfo no nsɛm [sodi] mu sen Mmara [a wɔakyerɛw] no [sodi] mu. Sɛ obi ka sɛ, ‘Ɛnyɛ nhyɛ sɛ wɔbɛbɔ adakawa’ ma enti ɔto Mmara no mu nsɛm a, onni fɔ; [nanso sɛ ɔka sɛ], ‘Ɛsɛ sɛ wɔkyekyɛ mu anum’, ma enti ɔde bi ka Akyerɛwfo no nsɛm ho a, odi fɔ.”—The Mishnah, a Herbert Danby kyerɛwee, kratafa 400.

Efesofo 2:14: “[Yesu ne] yɛn asomdwoe, wayɛ abien no biako, na waburuw fasu a etwa [yɛn] ntam . . . no.” Mishnah no ka sɛ: “Ná adaban bi (Soreg no) a ne tenten yɛ nsateakwaa du wɔ Asɔrefie Bepɔw no mu.” (Middot 2:3) Wɔbaraa Amanaman mufo sɛ wɔnntra nnkɔ abangua a ɛwɔ mu no so. Ebetumi aba sɛ ɔsomafo Paulo twee adwene sii saa ɔfasu yi so wɔ sɛnkyerɛnne kwan so bere a ɔkyerɛw krataa kɔmaa Efesofo no wɔ afe 60 anaa 61 Y.B. mu, bere a na ɛda so ara wɔ hɔ no. Ná sɛnkyerɛnne kwan so ɔfasu no yɛ Mmara apam a na efi bere tenten atwa Yudafo ne Amanaman mufo ntam no. Nanso wogyinaa wu a Kristo wui wɔ 33 Y.B. mu no so tutuu saa fasu no gui.