Wɔyɛɛ Yehowa Apɛde

Hiob Nyaa ne Mudi mu Kura So Akatua

NÁ Hiob yɛ ɔbarima mmɔborohunufo a ɔboa akunafo, nyisaa, ne amanehunufo. (Hiob 29:12-17; 31:16-21) Nanso mpofirim ara, asɛnkɛse bi too no ma ɔhweree n’ahode, ne mma, ne n’akwahosan. Awerɛhosɛm ne sɛ, bere a ehiaa ɔbarima nuonyamfo yi a na odi boa wɔn a wɔhyɛ wɔn so no, wannya mmoa biara. N’ankasa ne yere mpo ka kyerɛɛ no sɛ ‘ɔnnome Onyankopɔn na onwu!’ Na ne “nnamfonom,” Elifas, Bildad, ne Sofar ankyekye no werɛ. Mmom no, wɔfaa kwan bi so kae sɛ na Hiob ayɛ bɔne ma enti na edi sɛ ohu amane no.—Hiob 2:9; 4:7, 8; 8:5, 6; 11:13-15.

Ɛmfa ho amanehunu bebrebe no, Hiob gyidi anhim. Esiane eyi nti, awiei koraa no, Yehowa huu Hiob mmɔbɔ na ohyiraa no. Ɔkwan a ɔfaa so yɛɛ saa no ho asɛm ma Onyankopɔn asomfo a wokura wɔn mudi mu nyinaa no nya awerɛhyem sɛ bere bi akyi no, wɔn nso wobenya akatua.

Bembu ne Ahotɔ

Nea edi kan no, Yehowa kaa Elifas, Bildad, ne Sofar anim. Bere a ɔne Elifas a ɛda adi sɛ ɔno na na ɔyɛ wɔn mu panyin no rekasa no, ɔkae sɛ: “Me bo afuw wo ne wo mfɛfo baanu no, efisɛ moanka me ho asɛm a ɛteɛ sɛ m’akoa Hiob. Na afei momfa anantwinini ason ne adwennini ason, na monkɔ m’akoa Hiob nkyɛn, na monkɔbɔ ɔhyew afɔre mma mo ho, na m’akoa Hiob mmɔ mo ti so mpae.” (Hiob 42:7, 8) Susuw nea na eyi kyerɛ ho hwɛ!

Ná Yehowa hwehwɛ sɛ Elifas, Bildad, ne Sofar bɔ afɔre titiriw bi, a ebia ɛbɛma wɔahu sɛnea wɔn bɔne no so fa. Nokwarem no, sɛ́ wonim anaa wonnim no, na wɔaka Onyankopɔn ho abususɛm denam ka a wɔkae sɛ ‘ɔmfa ne ho nto ne nkoa so’ no so, ne sɛ ɛmfa ne ho sɛ ebia Hiob yɛ ɔnokwafo anaasɛ ɔnyɛ no. Elifas kae mpo sɛ abubummabaa ho wɔ mfaso sen Hiob wɔ Onyankopɔn ani so! (Hiob 4:18, 19; 22:2, 3) Edi sɛ Yehowa kae sɛ: “Moanka me ho asɛm a ɛteɛ” no!

Nanso na asɛm no ntwae. Elifas, Bildad, ne Sofar yɛɛ bɔne tiaa Hiob ankasa nso denam ka a wɔka kyerɛɛ no sɛ ne haw ahorow no fi n’ankasa no so. Wɔn ntwatoso a na enni nnyinaso biara ne tema a wɔanna no adi koraa no yɛɛ Hiob yaw ma ɔbotowee, na ɛno ma ɔteɛɛm sɛ: “Mobɛhaw me kra akosi da bɛn, na mode nsɛm abubu me pasaa?” (Hiob 10:1; 19:2) Susuw sɛnea mmarima baasa yi ani bewu bere a afei ɛho abehia sɛ wɔde ayeyɛde brɛ Hiob ma ɔde bɔ afɔre ma wɔn bɔne ahorow no ho hwɛ!

Nanso na ɛnsɛ sɛ Hiob di wɔn animguase no ho ahurusi. Nokwarem no, Yehowa hwehwɛe sɛ ɔbɔ mpae ma wɔn a wɔtotoo n’ano no. Hiob yɛɛ sɛnea wɔhyɛɛ no no, na eyi nti, wohyiraa no. Nea edi kan no, Yehowa saa owuyare a ɛbɔɔ no no. Afei Hiob nuabarimanom, ne nuabeanom, ne wɔn a wonim no kan no nyinaa bɛkyekyee ne werɛ, “na wɔn mu biara maa no sika dwetɛbona biako ne sika kaa biako.”a Bio nso, Hiob nyaa “nguan ɔpedunnan ne yoma mpemnsia ne anantwi mpamho apem ne mfurum abere apem.”b Na ɛda adi sɛ Hiob yere ne no boom bio. Bere bi akyi no, Hiob woo mmabarima baason ne mmabea baasa, na ɔtraa ase huu ne mma ne ne mma mma awo ntoatoaso anan.—Hiob 42:10-17.

Asuade Ahorow a Yenya Fi Mu

Hiob yɛɛ nhwɛso pa maa Onyankopɔn asomfo a wɔwɔ hɔ nnɛ no. Ná ɔyɛ ɔbarima a “odi mu na ɔteɛ,” a na Yehowa ani gye sɛ ɔbɛfrɛ no “m’akoa.” (Hiob 1:8; 42:7, 8) Nanso eyi nkyerɛ sɛ na Hiob yɛ pɛ. Bere a ne sɔhwɛ no duu baabi no, odii mfomso susuwii sɛ na ne haw no fi Onyankopɔn. Ɔkasa tiaa ɔkwan a Onyankopɔn ne nnipa di nsɛm no mpo. (Hiob 27:2; 30:20, 21) Ɔkaa ne trenee ho asɛm sen Nyankopɔn de. (Hiob 32:2) Nanso Hiob ampa ne Bɔfo no akyi, na ofi ahobrɛase mu gyee Onyankopɔn nteɛso toom. Ogye toom sɛ: “Mekaa nea mente ase . . . Enti na m’ani wu na minu me ho, dɔte ne nsõ mu.”—Hiob 42:3, 6.

Yɛn nso, sɛ yɛkɔ sɔhwɛ mu a, yebetumi asusuw nneɛma ho anaa yɛayɛ ade wɔ ɔkwan a ɛmfata so. (Fa toto Ɔsɛnkafo 7:7 ho.) Nanso sɛ ɔdɔ a yɛwɔ ma Onyankopɔn no mu dɔ a, yɛrensɔre ntia no, anaa yɛrenni yaw sɛ ɔma kwan ma yehu amane. Mmom no, yebekura yɛn mudi mu na awiei koraa no, yɛanya nhyira pii. Odwontofo no kaa Yehowa ho asɛm sɛ: “Ɔdɔeyɛfo na wo ne no bedi no adɔe so, onipa a odi mu na wo ne no bedi no mudi so.”—Dwom 18:25.

Ansa na Yehowa resan ama Hiob ho atɔ no no, ɔhwehwɛe sɛ ɔbɔ mpae ma wɔn a wɔayɛ bɔne atia no no. Hwɛ nhwɛso fɛfɛ a ɛno yɛ ma yɛn! Yehowa hwehwɛ sɛ yɛde wɔn a wodi mfomso tia yɛn no mfomso firi wɔn ansa na watumi de yɛn ankasa mfomso afiri yɛn. (Mateo 6:12; Efesofo 4:32) Sɛ yenni ɔpɛ sɛ yɛde befiri afoforo bere a ntease wom sɛ yɛyɛ saa no a, so yebetumi ahwɛ kwan sɛ Yehowa behu yɛn mmɔbɔ?—Mateo 18:21-35.

Bere ne bere mu no, yɛn nyinaa hyia ɔtaa ahorow. (2 Timoteo 3:12) Nanso, te sɛ Hiob no, yebetumi akura yɛn mudi mu. Ɛdenam saayɛ so no, yebenya akatua kɛse. Yakobo kyerɛwee sɛ: “Hwɛ, yebu wɔn a wohuu amane tɔɔ wɔn bo ase wɔ mu no ahotɔfo. Moate Hiob amanehunu mu boasetɔ no, na moahu sɛnea [Yehowa, NW] ma ewiee no, sɛnea [Yehowa, NW] ayamye dɔɔso, na ɔyɛ timmɔbɔ.”—Yakobo 5:11.

[Ase hɔ nsɛm]