Ɔhene Bi A Na Ɔwɔ Ahonyade Ne Nyansa

Wususuw sɛ ahonyade betumi ama w’ani agye? Sɛ obi kyɛ wo sika bebree a, anka w’ani rennye? Ɛda adi sɛ anka w’ani begye. Ebia anka wubesusuw ɔkwan a wobɛfa so adi ho.

NOKWASƐM ne sɛ, nneɛma a ɛma asetra yɛ ahomeka ne anigye a wubetumi atɔ nyɛ na. Sika betumi ayɛ “ahobammɔ” wɔ ɔhaw a wɔnhwɛ kwan te sɛ ɔyare ne adwuma a wonnya nyɛ ano.—Ɔsɛnkafo 7:12, NW.

Nanso abusuabɔ bɛn na ɛda sika ne anigye ntam? So wukura adwene a nnipa pii wɔ sɛ ahonya na ɛde anigye ba no bi? Saa nsɛmmisa yi anoyi yɛ den efisɛ sika de, wotumi susuw anaa wotumi kan, na anigye de, ɛnte saa. Wuntumi mfa anigye nsi nsenia so nkari nhwɛ.

Afei nso adefo binom ani gye, bere a afoforo nso ani nnye. Saa ara na ɛte wɔ ahiafo nso fam. Nanso, nnipa dodow no ara—wɔn a wɔyɛ adefo dedaw mpo—gye di sɛ sɛ wonya sika pii a, ɛbɛma wɔn anigye ayɛ kɛse.

Onipa biako a ɔkyerɛw biribi faa nsɛm a ɛtete saa ho ne Ɔhene Salomo a ofi tete Israel. Ná ɔyɛ nnipa a wɔwɔ ahonyade sen biara a wɔatra ase pɛn no biako. Wubetumi akenkan nea wɔka faa n’ahonyade bebrebe no ho wɔ Bible no fã a ɛne Ahene Nhoma a Edi Kan no ti 10. Sɛ nhwɛso no, hyɛ no nsow sɛ nkyekyem 14 ka sɛ: “Sika a ɛba Salomo nsam afe biako mu duru si sika dwetikɛse ahansia aduosia asia.” Ɛno yɛ sika kɔkɔɔ nkaribo tɔn 25. Ɛnnɛ, sika kɔkɔɔ a ɛte saa no bɛboro U.S. $200,000,000!—Yɛn na yɛasi ɔfã bi so dua no.

Nanso, ɛnyɛ sɛ na Salomo yɛ ɔdefo kɛkɛ; Onyankopɔn de nyansa dom no. Bible ka sɛ: “Ɔhene Salomo sõe sen asase so ahene nyinaa, ade dodow ne nyansa fam. Na asase nyinaa hwehwɛɛ Salomo anim ahu, sɛ wobetie ne nyansa a Onyankopɔn de ahyɛ ne koma mu no.” (1 Ahene 10:23, 24) Yɛn nso yebetumi anya Salomo nyansa no mu mfaso, efisɛ ne nsɛm a ɔkyerɛwee no ka Bible kyerɛwtohɔ ho. Momma yɛnhwɛ nea ɔka faa abusuabɔ a ɛda ahonyade ne anigye ntam ho no.

[Mfonini Fibea wɔ kratafa 3]

Wɔfa fii Die Heilige Schrift - Übersetzt von Dr. Joseph Franz von Allioli mu. Druck und Verlag von Eduard Hallberger, Stuttgart