So Ahonyade Betumi Ama Wo Anigye?

Ná Ɔhene Salomo nim bo a sika som. Ɔkyerɛwee sɛ: “Ɔserew nti na wosiesie aduan, na nsã ma ateasefo ani gye, na sika na ɛyɛ ne nyinaa.” (Ɔsɛnkafo 10:19) Ɛyɛ anigye sɛ wo ne wo nnamfo bɛto nsa adidi, nanso sɛ wubenya aduan anaa nsã a, wuhia sika. Esiane sɛ sika na yɛde tɔ honam fam nneɛma nti, ‘ɛyɛ ade nyinaa.’

ƐWOM sɛ na Salomo anya ne ho tam de, nanso na onim sɛ ahonyade ho hia kodu baabi. Ohui sɛ ɛnyɛ honam fam adedodowpɛ na ɛde anigye ba. Ɔkyerɛwee sɛ: “Nea ɔpɛ sika no, sika mmee no, na nea ɔpɛ adedodow no nnya mu mfaso.”—Ɔsɛnkafo 5:10.

Yɛmfa no sɛ ɔdefo bi anya ne ho ma aboro so. Salomo ka sɛ: “Nea nnepa redɔɔso no, na adifo nso redɔɔso.” (Ɔsɛnkafo 5:11) Bere a obi “nnepa” anaa n’ahonyade redɔɔso no, ɛho behia sɛ onya nnipa bebree a wɔbɛhwɛ so. Ebehia sɛ ɔfa nnipa a wobesiesie nneɛma a asɛesɛe, ahwɛfo, asomfo, awɛmfo, ne afoforo—obetua wɔn nyinaa ka. Ɛno ma ohia sika pii.

Tebea a ɛte saa no nya obi anigye so tumi tẽẽ. Helani abakɔsɛm kyerɛwfo Xenophon, a ɔtraa ase wɔ afeha a ɛto so anan A.Y.B. mu no, kyerɛw ohiani bi a ɔbɛyɛɛ ɔdefo anom asɛm too hɔ sɛ:

“Dɛn nti na wususuw . . . sɛ dodow a mewɔ no, dodow no ara na m’asetra yɛ anigye?” Ɔtoaa so sɛ: “Wunnim sɛ seesei adidi ne ɔnom ne nna nyɛ me dɛ nsen bere a na ahia me no koraa. Nea manya afi adedodow mu ara ne sɛ abehia sɛ midi nneɛma pii ho dwuma, yi pii ma afoforo, na ɔkwan a mɛfa so ahwɛ nneɛma pii yi so abɛyɛ dadwen kɛse sen kan no. Seesei nea fiefo pii bedi, nea pii bɛnom, ne nea pii bɛhyɛ gyina me so, na wɔn mu binom nso hia nnuruyɛfo; na obi ba bɛka kyerɛ me sɛ mpataku atow ahyɛ nguan no bi so, anaa anantwi no bi akogu amena mu awuwu, anaa nsanyare bi asi anantwi no mu. Enti ɛyɛ me sɛ . . . adedodow ama me haw adɔɔso seesei asen bere a na ahia me no.”

Ade foforo a enti nkurɔfo di ahonyade akyi denneennen ne sɛ nea Yesu Kristo frɛɛ no “ahonyade nnaadaa” no afura wɔn ani. (Mateo 13:22) Ɛdaadaa wɔn efisɛ wonnya abotɔyam anaa anigye a wɔhwɛ kwan sɛ wobenya no mfi saa ahonyade a wɔhwehwɛ no denneennen no mu. Wonya adwene no sɛ, nea ohia ntumi nyɛ no, sika betumi ayɛ. Enti wɔpere hwehwɛ pii bere nyinaa.

Sikapɛ Mfa Anigye Mma

Ɔdefo ahonyade ho adwennwene betumi asɛe ne nna anadwo. Salomo kyerɛw sɛ: “Odwumayɛfo didi kakraa oo, pii oo, ne nna yɛ no dɛ, na ɔmee a ɔdefo mee no mma onnya adaye.”—Ɔsɛnkafo 5:12.

Sɛ osuro a obi wɔ sɛ n’ahonyade befi ne nsa no kɛntɛn ne so a, ɛnyɛ nna nko na ontumi nna yiye. Bere a Salomo reka obi a ɔyɛ pɛpɛe ho asɛm no, ɔkyerɛw sɛ: “Ne nna nyinaa, esum mu na [odidi], na n’abohuru ne ne yare ne n’awerɛhow dɔɔso.” (Ɔsɛnkafo 5:17) Sɛ́ anka n’ahonyade bɛma n’ani agye no, odidi ‘abohuru’ mu, te sɛ nea ɛyɛ no yaw mpo sɛ obeyi sika atɔ aduan adi. Adwene a ɛmfata saa no betumi abɔ no yare. Ɔyare nso ma obi a ɔyɛ pɛpɛe no dadwen yɛ kɛse, efisɛ ɛmma ontumi mmoa sika pii ano.

Ebia eyi ma wokae ɔsomafo Paulo nsɛm a ɔkyerɛwee yi: “Wɔn a wɔpɛ wɔn ho anya no hwe sɔhwɛ ne afiri ne nkwasea akɔnnɔ a enye mma nnipa na ɛtwe wɔn kogu ɔsɛe ne ɔyera mu mu. Na bɔne nyinaa ntini ne sikapɛ a ebinom dii akyiri . . . na wɔde yaw pii wowɔɔ wɔn ho.” (1 Timoteo 6:9, 10) Nea ɛbɛma nkurɔfo anya sika no, wosisi afoforo, di atoro, bɔ korɔn, si tuutuu, na wodi awu mpo. Nea efi mu ba ne sɛ obi de nkate, honam, ne honhom fam yaw wowɔ ne ho esiane sɛ ɔrebɔ mmɔden anya ahonyade na wabɔ ho ban nti. So eyi sɛ biribi a ebetumi de anigye aba? Dabida!

Nea Yɛwɔ a Yɛbɛma Adɔɔ Yɛn So

Salomo kaa ahonyade ho adwene a ɛkari pɛ ho biribi foforo. Ɔkyerɛwee sɛ: “Sɛnea ofi ne nã yam adagyaw mu bae no, saa ara na ɔbɛsan akɔ, sɛ ɔbae no, na ɔremfa ne brɛ mu hwee a ɔde bekita ne nsam akɔ. Hwɛ, nea mahu sɛ eye ne sɛ ɛyɛ fɛ sɛ obi didi na ɔnom na ohu papa ne brɛ a ɔbrɛ owia ase no nyinaa mu, ne nkwa nna dodow a Onyankopɔn de ma no; na ɛne ne kyɛfa.”—Ɔsɛnkafo 5:15, 18.

Nsɛm yi kyerɛ sɛ ɛnyɛ ahonyade a yɛbɛboaboa ano atwɛn bere bi a ɛmmɛto yɛn da no na ɛde anigye ba. Nea eye paa ne sɛ yɛn ani bɛsɔ nea afi yɛn adwumaden mu aba na yɛadi mu ahurusi. Ɔsomafo Paulo daa adwene a ɛte saa adi wɔ ne krataa a honhom kaa no ma ɔkyerɛw kɔmaa Timoteo no mu sɛ: “Yɛamfa hwee amma wiase, nanso yentumi mfa hwee mfi mu nkɔ. Na sɛ yɛwɔ nnuan ne nea yɛde kata yɛn ho a, momma ɛno ara nnɔɔ yɛn so.”—1 Timoteo 6:7, 8; fa toto Luka 12:16-21 ho.

Nea Ɛde Anigye Ba

Ná Salomo wɔ ahonyade ne ɔsoro nyansa pii. Nanso ɔkae sɛ nyansa na ɛde anigye ba, na ɛnyɛ sika. Ɔkae sɛ: “Nhyira [anigye, NW] ne onipa a ohu nyansa, ne onipa a onya ntease. Na emu adenya ye sen dwetɛ de, na ne mfaso sen sika amapa. Ne bo yɛ den sen mmota, na afɛfɛde nyinaa, wɔmfa nto ho. Onyinkyɛ wɔ ne nifa mu, ne benkum kura ade ne anuonyam. N’akwan yɛ akwan a ɛyɛ fɛ, na n’asa nyinaa yɛ asomdwoe. Ɛyɛ nkwa dua ma wɔn a woso no mu, na nhyira [anigye, NW] ne nea okura mu.”—Mmebusɛm 3:13-18.

Dɛn nti na nyansa korɔn sen honam fam ahode? Salomo kyerɛwee sɛ: “Nyansa ma ahobammɔ sɛnea sika ma ahobammɔ no ara; nanso mfaso a ɛwɔ nimdeɛ so ne sɛ, nyansa gye ne wuranom nkwa.” (Ɔsɛnkafo 7:12, NW) Ɛwom sɛ sika ma ahobammɔ, na ɛma nea okura no tumi tɔ nea ohia de, nanso nyansa betumi abɔ obi ho ban na wanyɛ nneɛma bi a ɛde ne nkwa bɛto asiane mu. Ɛnyɛ sɛ nokware nyansa betumi abɔ obi ho ban afi ɔpatuwu ho nko, na mmom esiane sɛ egyina Onyankopɔn ho suro pa so nti, ɛbɛma wanya daa nkwa.

Dɛn nti na ɔsoro nyansa de anigye ba? Efisɛ Yehowa Nyankopɔn nkutoo na obetumi ama yɛn nokware anigye. Osuahu kyerɛ sɛ osetie a yɛbɛyɛ ama Ɔsorosoroni no nkutoo na ebetumi ama yɛanya nokware anigye. Anigye a ɛtra hɔ kyɛ gyina yɛne Onyankopɔn ntam abusuabɔ pa so. (Mateo 5:3-10) Sɛ yɛde nea yesua fi Bible mu no di dwuma a, yebenya “nyansa a efi soro no.” (Yakobo 3:17) Ɛbɛma yɛanya anigye a ahonyade ntumi mma yennya da no.

[Mfonini ahorow wɔ kratafa 4, 5]

Ná Ɔhene Salomo nim nea ɛma obi ani gye. Wo nso wunim?