Atɛntrenee Ma Nnipa Nyinaa—Anya Aba

“Yɛbɛbɔ mmɔden afa akwan foforo so atie . . . nnipa a wɔresisi wɔn, nnipa a dadwen da wɔn so, ne nnipa a wonnya atiefo nti wɔapa abaw no sufrɛ. . . . Nea aka ne sɛ yɛbɛma mmara no ayɛ adwuma: de ahwɛ ahu sɛ awiei koraa no, sɛnea wɔde nidi woo nnipa nyinaa pɛ wɔ Nyankopɔn anim no, saa ara na wɔde nidi woo nnipa nyinaa pɛ wɔ nnipa anim.”—U.S. Ɔmampanyin Richard Milhous Nixon kasa a edi kan, January 20, 1969.

SƐ AHENE, aman mpanyimfo, ne aman asoafo mpanyin fi wɔn dwumadi ase a, wɔtaa ka atɛntrenee ho asɛm. Saa pɛpɛɛpɛ na Richard Nixon, kan United States ɔmampanyin no nso yɛe. Nanso sɛ yɛhwɛ nea akyiri yi ɛkɔɔ so no a, ne nsɛm dɛdɛɛdɛ no nka hwee. Ɛwom sɛ Nixon hyɛɛ bɔ sɛ ɔbɛma “mmara no ayɛ adwuma” de, nanso akyiri yi wɔkyeree no sɛ wabu mmara so, na wɔhyɛɛ no ma ɔde ne dibea too hɔ. Mfe aduasa akyi no, na wɔda so ara te ‘nnipa a wɔresisi wɔn, nnipa a dadwen da wɔn so, ne nnipa a wonnya atiefo nti wɔapa abaw no sufrɛ’ a wɔnyɛɛ ho hwee.

Sɛnea akannifo pii a wokura adwempa abehu no, sɛ́ wobetie sufrɛ a ɛtete saa no na wɔadi wɔn ahiade ho dwuma no nna fam. ‘Atɛntrenee ma nnipa nyinaa’ abɛyɛ botae a nnipa ntumi nnu ho. Nanso, mfehaha pii a atwam ni no, wɔhyɛɛ bɔ bi a ehia sɛ yɛde yɛn adwene kɔ so—atɛntrenee ho bɔhyɛ bi a ɛda nsow.

Onyankopɔn nam ne diyifo Yesaia so maa Ne nkurɔfo awerɛhyem sɛ ɔbɛsoma ‘n’akoa’ a n’ankasa bɛpaw no. Yehowa ka kyerɛɛ wɔn sɛ: “Mede me honhom magu no so; ɔde atemmu [atɛntrenee, NW] befi akɔ amanaman mu.” (Yesaia 42:1-3) Onipa sodifo biara ntumi mfa ne nsa nsi ne bo nka asɛm a ɛkɔ akyiri saa, asɛm a ɛbɛkyerɛ sɛ ɔman biara benya atɛntrenee a ɛnyɛ bere tiaa mu de. Yebetumi de yɛn ho ato bɔhyɛ yi so anaa? Wobetumi ayɛ anwonwade a ɛte saa da bi?

Bɔhyɛ a Yebetumi De Yɛn Ho Ato So

Sɛ yebetumi agye bɔhyɛ bi adi a, egyina nea ɔhyɛ bɔ no so. Wɔ eyi fam no, ɛnyɛ obiara sɛ Ade Nyinaa so Tumfoɔ Nyankopɔn no na ɔka sɛ ‘n’akoa’ de atɛntrenee bɛba wiase nyinaa. Yehowa nte sɛ amammuifo, enti ɔmfa bɔhyɛ ahorow nni agoru. Bible ma yɛn awerɛhyem sɛ: ‘Ontumi nni atoro.’ (Hebrifo 6:18) Onyankopɔn de ahotoso ka sɛ: “Sɛnea misusuwii no, saa na ɛbɛba mu.”—Yesaia 14:24.

Ade a ɛhyɛ ahotoso a yɛwɔ wɔ saa bɔhyɛ no mu den ne sɛnea Onyankopɔn ‘akoa’ a wapaw no, Yesu Kristo, bɔɔ ne bra no. Ɛsɛ sɛ obi a obetumi de atɛntrenee aba no ani gye atɛntrenee ho na ɔbɔ ne bra atɛntrenee kwan so. Yesu gyaw nhwɛso a asɛm biara nni ho sɛ onipa a na ‘ɔdɔ trenee, na okyi amumɔyɛ.’ (Hebrifo 1:9) Ne nsɛm a ɔkae, sɛnea ɔbɔɔ ne bra, ne ɔkwan a ɔfaa so wui mpo, nyinaa kyerɛe sɛ ɔyɛ obi a ɔpɛ atɛntrenee. Bere a wokum Yesu no, biribi kaa Romani sraani panyin bi a ɛda adi sɛ Yesu atemmu ne ne kum nyinaa sii wɔ n’anim no maa no kae sɛ: “Ampa ara, onipa yi yɛ onipa trenee.”—Luka 23:47.

Trenee a Yesu de traa ase no da nkyɛn a, ɔpoo ntɛnkyea a na abu so wɔ ne bere so no. Wamfa atuatew anaa anidan so na ɛyɛɛ saa, na mmom ɔnam nokware atɛntrenee a ɔde kyerɛkyerɛɛ obiara a otiee no no so. Ne Bepɔw so Asɛnka no yɛ nkyerɛkyerɛmu a etu mpɔn a ɛkyerɛ ɔkwan a ɛsɛ sɛ yɛfa so bu atɛntrenee na yɛyɛ adetrenee.—Mateo, atiri 5-7.

Yesu de nea ɔkyerɛkyerɛe no dii dwuma. Wammu akwatafo a na wɔn asɛm yɛ mmɔbɔ, a na Yudafo no bu wɔn sɛ “wɔn ho ntew” no abomfiaa. Mmom no, ɔne wɔn kasae, osoo wɔn mu, na ɔsaa wɔn yare mpo. (Marko 1:40-42) Ná wɔn a ohyiaa wɔn no nyinaa, a ahiafo ne abrɛfo ka ho no ho hia no. (Mateo 9:36) Ɔka kyerɛɛ wɔn sɛ: “Mo a moayɛ adwuma abrɛ na wɔasoa mo nnosoa nyinaa, mommra me nkyɛn, na mɛma moahome.”—Mateo 11:28.

Nea ɛsen ne nyinaa no, Yesu amma ntɛnkyea a na atwa ne ho ahyia no ansɛe no anaa anhyɛ no abufuw. Wamfa bɔne antua bɔne so ka da. (1 Petro 2:22, 23) Bere a na ɔredi yaw kɛse mpo no, ɔbɔɔ ne soro Agya no mpae maa asraafo koro no ara a wɔbɔɔ no dua mu no. Ɔsrɛe sɛ: “Agya, fa firi wɔn, na wonnim nea wɔyɛ!” (Luka 23:34) Akyinnye biara nni ho sɛ Yesu ‘maa amanaman no huu nea atɛntrenee kyerɛ ankasa.’ (Mateo 12:18) Adanse bɛn na yɛwɔ a ɛkyerɛ sɛ Onyankopɔn pɛ sɛ ɔde wiase a atɛntrenee te mu ba a ɛsen n’ankasa ne Ba no nhwɛso?

Wobetumi Adi Ntɛnkyea So Nkonim

Yɛwɔ nhwɛso wɔ nnɛ wiase yi mu a ɛkyerɛ sɛ wobetumi adi ntɛnkyea so nkonim. Sɛ́ ankorankoro ne kuw no, Yehowa Adansefo bɔ mmɔden sɛ wobedi afoforo ho adwemmɔne, nnipa mu nyiyim, mmusua mu mpaapaemu, ne basabasayɛ so nkonim. Susuw nhwɛso a edi so yi ho hwɛ.

Na Pedroa gye di sɛ ɔkwan koro pɛ a wobetumi afa so ama atɛntrenee aba Basque Country, a ɛwɔ Spain faako a na ɔte no, ne atuatew. Ne saa nti, ɔbɛyɛɛ amumɔyɛfo fekuw bi muni ma wɔde no kɔɔ France kɔmaa no asraadi mu ntetee. Bere a owiee ne ntetee no, wɔmaa no ahyɛde sɛ ɔntew amumɔyɛfo kuw na wɔmfa topae nsɛe polisifo atrae bi. Bere a na ne kuw no gu so reyɛ atopae no ho adwuma no, polisifo bɛkyeree no. Odii asram 18 wɔ afiase, nanso bere a ɔda afiase no mpo, ɔtoaa n’amammɔesɛm no so de abufuw kyenee ne yam kɔm, na bere bi mpo ɔhyɛɛ da de ade twaa ne nsa.

Ná Pedro gye di sɛ ɔreko apere atɛntrenee. Afei obehuu Yehowa ne n’atirimpɔw ahorow. Bere a na Pedro da afiase no, ne yere fii ase ne Yehowa Adansefo suaa Bible, na bere a woyii no no, ɔtoo nsa frɛɛ no sɛ ɔne no nkɔ wɔn nhyiam ahorow no mu biako. N’ani gyee sɛnea nneɛma kɔɔ so no ho araa ma ɔkae sɛ wɔne no nyɛ Bible adesua, na adesua no ma ɔyɛɛ nsakrae akɛse wɔ ne nsusuwii ne n’abrabɔ mu. Awiei koraa, wɔ 1989 mu no, Pedro ne ne yere nyinaa gyee asubɔ.

Pedro ka sɛ: “Meda Yehowa ase sɛ m’ankasa mankum obiara wɔ mfe a mede traa ase sɛ omumɔyɛfo no mu. Afei de mede Onyankopɔn honhom nkrate a ɛne Bible no di dwuma de ka nokware asomdwoe ne atɛntrenee ho asɛm—Onyankopɔn Ahenni ho asɛmpa—kyerɛ nkurɔfo.” Nnansa yi ara, Pedro a seesei ɔyɛ ɔpanyin wɔ Yehowa Adansefo som mu no kɔsraa polisifo atrae koro no ara a ɔyɛɛ n’adwene sɛ ɔbɛsɛe hɔ no. Saa bere yi de, atirimpɔw a ɔde kɔɔ hɔ ne sɛ ɔrekɔka asomdwoe asɛm akyerɛ mmusua a wɔtete hɔ no.

Nea enti a Yehowa Adansefo yɛ nsakrae yi ne sɛ wɔn kɔn dɔ wiase a trenee te mu. (2 Petro 3:13) Ɛwom sɛ wɔwɔ Onyankopɔn bɔhyɛ a ɛde eyi bɛba no mu ahotoso kɛse de, nanso wohu sɛ ɛyɛ wɔn asɛyɛde nso sɛ wɔde atɛntrenee bɔ wɔn bra. Bible no ma yehu pefee sɛ Onyankopɔn pɛ sɛ yɛyɛ yɛn fam de.

Trenee Aba a Wogu

Ampa, sɛ wobu yɛn ntɛnkyea a, ebia yɛbɛte nka sɛ yɛnteɛm sɛ: “Atemmu [atɛntrenee, NW] Nyankopɔn no wɔ he?” Saa na Malaki bere so Yudafo no kae. (Malaki 2:17) So Nyankopɔn faa wɔn asɛm no aniberesɛm? Nea ɛne no bɔ abira no, ɛhyɛɛ Yehowa “brɛ” efisɛ na wotwa wɔn yerenom a wɔanyinyin nkontompo, na wogyina nsɛm nketenkete koraa so gyae wɔn, na wɔsan yɛ nneɛma foforo nso. Yehowa ani annye ho sɛ ‘wotwaa wɔn mmerantebere mu yerenom nkontompo ɛmfa ho sɛ na wɔyɛ wɔn ahokafo ne wɔn apam yerenom no.’—Malaki 2:14.

Sɛ yɛn ankasa mfa atɛntrenee ntra ase a, yebetumi anwiinwii wɔ ntɛnkyea ho ma afata? Nanso, sɛ yɛbɔ mmɔden sɛ yebesuasua Yesu, na yeyi adwemmɔne ne mmusua mu nyiyim fi yɛn komam, kwati animhwɛ na yɛdɔ nnipa nyinaa, a yɛmfa bɔne ntua bɔne so ka a, yɛda no adi sɛ yɛdɔ atɛntrenee ankasa.

Sɛ yebetumi atwa atɛntrenee a, Bible hyɛ yɛn nkuran sɛ ‘yengu trenee aba.’ (Hosea 10:12) Ɛmfa ho sɛnea ebia ɛbɛyɛ yɛn ani so ade ketewa no, ntɛnkyea biara so nkonim a yebedi no ho hia. Sɛnea Martin Luther King Jr., kyerɛwee wɔ ne Letter From Birmingham Jail nhoma no mu no, “sɛ ntɛnkyea kɔ so wɔ baabi a, ɛsɛe atɛntrenee wɔ baabiara.” Wɔn a ‘wɔhwehwɛ trenee’ no ne nnipa a Onyankopɔn paw wɔn ma wonya ne wiase foforo a trenee te mu a ɛbɛba nnansa yi ara no.—Sefania 2:3.

Yɛrentumi mfa yɛn ani nto nnipa bɔhyɛ ahorow a enni mũ so nhwɛ atɛntrenee kwan, nanso yebetumi anya yɛn Bɔfo a ɔwɔ ɔdɔ no asɛm mu ahotoso. Ɛno nti na Yesu ka kyerɛɛ n’akyidifo sɛ wɔnkɔ so mmɔ mpae sɛ Onyankopɔn Ahenni mmra no. (Mateo 6:9, 10) Yesu a ɔyɛ saa Ahenni no Hene a wɔapaw no no “[begye] ohiani a osu frɛ no, ne ɔmanehunufo a onni boafo. Ɔbɛkora ɔbrɛfo ne ohiani so, na wagye ahiafo kra nkwa.”—Dwom 72:12, 13.

Ɛda adi pefee sɛ ntɛnkyea renkɔ so daa. Kristo nniso a ɛbɛkata asase nyinaa so no bedi ntɛnkyea so nkonim akosi daa, sɛnea Onyankopɔn nam ne diyifo Yeremia so ma yɛn awerɛhyem no: ‘Nna bi reba a mɛma asɛmpa a mekae no abam. Saa bere no so na mɛma trenee bãa afefɛw ama Dawid. Saa ɔhene no bebu atɛntrenee ayɛ adetrenee asase nyinaa so.’—Yeremia 33:14, 15.

[Ase hɔ asɛm]