Nkurɔfo a Yɛbɛboa Wɔn Ma Wɔabɛn Yehowa

“Obi mma agya no nkyɛn, gye sɛ ɔnam me so.”—YOHANE 14:6.

 1. Ahyɛde bɛn na Yesu a wɔanyan no no de maa n’asuafo, na dɛn na afi mu aba bere a Yehowa Adansefo di so no?

YESU KRISTO hyɛɛ n’akyidifo sɛ ‘wɔnyɛ amanaman nyinaa asuafo, na wɔmmɔ wɔn asu nhyɛ Agya, Ɔba ne honhom kronkron din mu.’ (Mateo 28:19) Mfe du a atwam no, Yehowa Adansefo aboa nnipa bɛboro ɔpepem abiɛsa ma wɔaba Nyankopɔn nkyɛn, na wɔabɔ wɔn asu de ayɛ wɔn ho so a wɔahyira sɛ wɔbɛyɛ n’apɛde no ho sɛnkyerɛnne. Hwɛ anigye a ɛyɛ sɛ yɛbɛboa wɔn ma wɔabɛn Nyankopɔn!—Yakobo 4:8.

 2. Ɛwom sɛ wɔrebɔ nnipa foforo pii asu de, nanso dɛn na asi?

² Nanso, wɔ nsase a wɔabɔ asuafo foforo pii asu so no, wonnyaa nkɔanim biara wɔ Ahenni adawurubɔfo no dodow mu. Nokwarem no, yɛrenkan wɔn a wowuwu afe biara, a wɔn dodow yɛ ɔha biara mu nkyem 1 no nka ho. Nanso, mfe kakraa bi a atwam no, adawurubɔfo dodow bi ahwe ase esiane nneɛma bi nti. Dɛn ntia? Saa asɛm yi ne asɛm a edi hɔ no bɛpɛɛpɛɛ sɛnea wɔtwe nkurɔfo bɛn Yehowa ne nea enti a ebinom tumi hwe ase no mu.

Yɛn Asɛnka Adwuma no Atirimpɔw

 3. (a) Ɔkwan bɛn so na adwuma a wɔde hyɛɛ Yesu asuafo no nsa ne ɔbɔfo a wɔka ne ho asɛm wɔ Adiyisɛm 14:6 no de hyia? (b) Dɛn ne ɔkwan a etu mpɔn a wɔnam so akanyan nkurɔfo anigye wɔ Ahenni asɛm no ho, nanso asɛnnennen bɛn na ɛwɔ hɔ?

³ Wɔ “awiei bere” yi mu no, Yesu asuafo wɔ ahyɛde a ɛne sɛ wɔbɛtrɛw “ahenni no ho asɛmpa yi” ho ‘nokware nimdeɛ’ mu. (Daniel 12:4; Mateo 24:14) Wɔn dwumadi no te sɛ ɔbɔfo a “okura daa asɛmpa bi rekɔka akyerɛ wɔn a wɔte asase so, ne aman ne mmusuakuw ne kasa ne nkurɔfo nyinaa” no. (Adiyisɛm 14:6) Wɔ wiase a honam fam nneɛma agye nnipa adwene yi mu no, ɔkwan titiriw a etu mpɔn sen biara a yɛbɛfa so ama nkurɔfo akyerɛ Onyankopɔn Ahenni ho anigye na yɛaboa wɔn ma wɔabɛn Yehowa ne sɛ yɛbɛka daa nkwa wɔ paradise asase so ho anidaso ho asɛm akyerɛ wɔn. Bere a ntease wɔ eyi mu no, ebinom a wɔde wɔn ho bɔ Onyankopɔn nkurɔfo a wɔn botae ne sɛ wobenya kwan akɔ Paradise no nan nnyee ɔkwan hiahiaa a ɛkɔ nkwa mu no so.—Mateo 7:13, 14.

 4. Sɛnea Yesu ne ɔbɔfo a otu nam soro mfinimfini kyerɛ no, yɛn asɛnka adwuma no atirimpɔw ne dɛn?

⁴ Yesu kae sɛ: “Eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.” (Yohane 17:3) Ɔbɔfo a otu nam wim no ka “daa asɛmpa” bi ho asɛm, na ɔka kyerɛ wɔn a wɔte asase so no sɛ: “Munsuro Onyankopɔn na monhyɛ no anuonyam, efisɛ n’atemmu dɔn adu. Na monkotow nea ɔyɛɛ soro ne asase ne ɛpo ne asuti no.” (Adiyisɛm 14:7) Enti asɛmpa no a yɛka no atirimpɔw titiriw ne sɛ yɛbɛboa nkurɔfo ma wɔnam Kristo Yesu so abɛn Yehowa.

Yɛn Asɛyɛde Wɔ Yehowa Adwuma no Mu

 5. Nsɛm bɛn na Paulo ne Yesu kae a ɛkyerɛ sɛ yɛreyɛ Yehowa adwuma, na ɛnyɛ yɛn de?

⁵ Bere a ɔsomafo Paulo rekyerɛw ne mfɛfo Kristofo a wɔasra wɔn no, ɔkaa “mpata som” ho asɛm, na ɔkae sɛ Onyankopɔn nam Yesu Kristo agyede afɔrebɔ no so aka nkurɔfo afam ne ho. Paulo ka sɛ ɛte sɛ nea “Onyankopɔn nam yɛn so tu mo fo,” ne sɛ “yegyina Kristo ananmu srɛ mo sɛ: momma wɔmfa mpata nka mo mmɔ Onyankopɔn ho.” Asɛm a ɛka koma bɛn ara ni! Sɛ́ yɛyɛ “abɔfo” a wɔasra wɔn “ma Kristo” anaasɛ ananmusifo a yɛwɔ asase so anidaso no, ɛnsɛ sɛ yɛn werɛ fi da sɛ eyi yɛ Yehowa adwuma, ɛnyɛ yɛn de. (2 Korintofo 5:18-20) Ɛyɛ Onyankopɔn ankasa na ɔtwe nkurɔfo na ɔkyerɛkyerɛ wɔn a wɔba Kristo nkyɛn no. Yesu kae sɛ: “Obi ntumi mma me nkyɛn, gye sɛ agya a ɔsomaa me no twe no; na me de, menyan no ɛda a edi akyiri no. Wɔakyerɛw adiyifo no mu sɛ: Wɔn nyinaa bɛyɛ nnipa a Onyankopɔn akyerɛkyerɛ wɔn. Obiara a wate afi agya no nkyɛn na wasua no na ɔba me nkyɛn.”—Yohane 6:44, 45.

 6. Ɔkwan bɛn so na Yehowa rewosow amanaman no wɔ ɔkwan titiriw bi so, na bere koro no ara no, henanom na wɔrenya ahobammɔ wɔ ‘n’asɔrefie’?

⁶ Wɔ nna a edi akyiri yi mu no, ɔkwan bɛn so na Yehowa twe nkurɔfo na obue “gyidi pon” no ma wɔn? (Asomafo no Nnwuma 14:27, NW ase hɔ asɛm; 2 Timoteo 3:1) Ɔkwan titiriw ne sɛ ɔbɛma N’adansefo aka ne nkwagye ne n’atemmu nsɛm a etia nneɛma nhyehyɛe bɔne yi no ho asɛm. (Yesaia 43:12; 61:1, 2) Saa asɛm yi a wɔreka no wiase nyinaa no de—atemmu a ɛyɛ hu a ɛnkyɛ ɛbɛba—ho kɔkɔbɔ rema wɔ amanaman no mu. Bere koro no ara no, wɔretwe nkurɔfo a ‘wɔsom bo’ wɔ Onyankopɔn ani so afi saa nhyehyɛe yi mu, na wɔrenya ahobammɔ wɔ nokware som mu wɔ ne “fi.” Enti Yehowa rema ne nkɔmhyɛ nsɛm a Hagai yɛɛ ho kyerɛwtohɔ no anya mmamu sɛ: “[Mɛwosow] amanaman nyinaa, na amanaman nyinaa ade a wɔpɛ bɛba, na mede anuonyam mɛhyɛ ofi yi ma.”—Hagai 2:6, 7 NW ase hɔ asɛm; Adiyisɛm 7:9, 15.

 7. Ɔkwan bɛn so na Yehowa bue nkurɔfo komam na ɔtwe ankorankoro ba ɔne ne Ba no nkyɛn?

⁷ Yehowa bue wɔn a wosuro Nyankopɔn—“amanaman nyinaa mu nneɛma a ɛsen biara a wɔapaw”—yi komam na ama ‘wɔatie nneɛma a’ N’adansefo ‘ka ho asɛm no.’ (Hagai 2:7, Jewish Publication Society; Asomafo no Nnwuma 16:14) Te sɛ afeha a edi kan no mu no, ɛtɔ mmere bi a, Yehowa de n’abɔfo di dwuma kyerɛ N’adansefo kwan kɔ nnipa komapafo a wosu hwehwɛ mmoa no nkyɛn. (Asomafo no Nnwuma 8:26-31) Bere a ankorankoro sua nsiesiei a ɛyɛ anigye a Onyankopɔn nam ne Ba, Yesu Kristo, so ayɛ ama wɔn ho ade no, Yehowa dɔ no twe wɔn bɛn no. (1 Yohane 4:9, 10) Yiw, Onyankopɔn nam ‘N’adɔe,’ anaa ne “nokware dɔ” so twe nkurɔfo bɛn ɔne ne Ba no.—Yeremia 31:3, NW ase hɔ asɛm.

Henanom na Yehowa Twe Wɔn?

 8. Nnipa bɛn na Yehowa twe wɔn?

⁸ Yehowa twe wɔn a wɔhwehwɛ no no ba ɔne ne Ba no nkyɛn. (Asomafo no Nnwuma 17:27) Eyinom mu bi ne wɔn a “wosisi apini di akyide a wɔyɛ wɔ” Kristoman mu, ne nokwarem no, wiase nyinaa ‘ho nkɔmmɔ’ no. (Hesekiel 9:4) Wɔyɛ nkurɔfo a “honhom mu nneɛma hia wɔn.” (Mateo 5:3, NW) Nokwarem no, wɔne ‘asase sofo a wɔbrɛ wɔn ho ase [“wodwo,” NW ase hɔ asɛm]’ a wɔbɛtra paradise asase so daa no.—Sefania 2:3.

 9. Ɔkwan bɛn so na Yehowa tumi hu nkurɔfo a ‘wɔpɛ daa nkwa,’ na ɔkwan bɛn so na ɔtwe wɔn?

⁹ Yehowa betumi ahu obi komam. Ɔhene Dawid ka kyerɛɛ ne ba Salomo sɛ: “[Yehowa, NW] pɛɛpɛɛ koma nyinaa mu na ohu adwene nyinaa mu. Sɛ wohwehwɛ no a, ɔbɛma woahu no.” (1 Beresosɛm 28:9) Yehowa betumi agyina obi komam tebea ne honhom, anaa ne su titiriw so ahu sɛ onii no bɛyɛ Ne nsiesiei a ɛfa bɔne fafiri ne daa nkwa wɔ Ne trenee nhyehyɛe foforo mu ho anidaso no ho biribi ɔkwan biara so. (2 Petro 3:13) Yehowa nam N’asɛm a N’adansefo ka ne kyerɛ a wɔkyerɛkyerɛ no so twe ‘wɔn a wɔpɛ daa nkwa nyinaa’ ba ɔne ne Ba no nkyɛn, na eyinom ‘bɛyɛ gyidifo.’—Asomafo no Nnwuma 13:48.

10. Dɛn na ɛkyerɛ sɛ twe a Yehowa twe ebinom na ɛnyɛ nnipa nyinaa no mfa nkrabea ho?

¹⁰ So twe a Yehowa twe ebinom na ɛnyɛ obiara no fa nkrabea ho? Dabida! Twe a Onyankopɔn twe nkurɔfo no gyina nea nnipa no ankasa pɛ so. Ɔkyerɛ obu ma hokwan a wɔwɔ sɛ wɔpaw nea wɔpɛ no. Yehowa de botae koro no ara a ɔde sii Israelfo anim bɛboro mfe 3,000 atwam ni bere a Mose kaa nea edi so yi no asi asase sofo anim nnɛ: “Ɛnnɛ mede nkwa ne papa ɛne owu ne bɔne masi w’anim. . . . Ɛnnɛ mefrɛ ɔsoro ne asase midi mo adanse sɛ: Mede nkwa ne owu, nhyira ne nnome masi mo anim; enti fa nkwa, na wo ne w’asefo nnya nkwa, na dɔ [Yehowa, NW] wo Nyankopɔn na tie ne nne na bata ne ho, efisɛ ɛne wo nkwa ne wo nna dodow.”—Deuteronomium 30:15-20.

11. Ɔkwan bɛn so na na ɛsɛ sɛ Israelfo no paw nkwa?

¹¹ Hyɛ no nsow sɛ na ɛsɛ sɛ Israelfo no paw nkwa ‘denam Yehowa a wɔbɛdɔ no, atie ne nne, na wɔabata ne ho so.’ Bere a wɔkaa saa nsɛm yi no, na Israelfo no nnya mfaa Bɔhyɛ Asase no nnii. Ná wɔasiesie wɔn ho wɔ Moab Tataw so, a wɔreyɛ ahoboa atwa Asubɔnten Yordan akɔ Kanaan. Bere a na ɛnyɛ den sɛ wɔde wɔn adwene besi asase “pa a ɛtrɛw” a “nufusu ne wo sen wɔ so” a ɛrenkyɛ wɔn nsa bɛka so no, na ba a wɔn anidaso no bɛbam no begyina ɔdɔ a wɔwɔ ma Yehowa, ne nne a wobetie, ne bata a wɔbɛbata ne ho so. (Exodus 3:8) Mose maa eyi mu daa hɔ pefee, bere a ɔkaa eyi no: “Sɛ wubetie Yehowa wo Nyankopɔn ahyɛde a merehyɛ wo nnɛ, na woadɔ Yehowa wo Nyankopɔn, anantew n’akwan so, na woadi ne mmara nsɛm ne n’ahyɛde ne n’atemmude so a, ɛnde wubenya nkwa, na woadɔ, na Yehowa wo Nyankopɔn behyira wo wɔ asase a worekɔ akɔfa adi no so.”—Deuteronomium 30:16, NW.

12. Dɛn na ɛsɛ sɛ Israelfo nhwɛso no kyerɛ yɛn fa yɛn asɛnka ne nkyerɛkyerɛ adwuma no ho?

¹² So ɛnsɛ sɛ nea yɛasusuw ho no kyerɛ yɛn biribi fa yɛn asɛnka ne ɔkyerɛkyerɛ adwuma no ho wɔ awiei bere yi mu? Yesusuw Paradise asase a ɛreba no ho, na yɛka ho asɛm wɔ yɛn asɛnka mu. Nanso sɛ yɛn anaa wɔn a yɛyɛ wɔn asuafo no de pɛsɛmenkominya som Onyankopɔn a, yɛne wɔn nyinaa renhu bɔhyɛ no mmamu. Te sɛ Israelfo no, ɛsɛ sɛ yɛne wɔn a yɛkyerɛkyerɛ wɔn no sua sɛ ‘yɛbɛdɔ Yehowa, atie ne nne, na yɛabata ne ho.’ Sɛ yɛkae eyi bere a yɛreyɛ yɛn som adwuma no a, yɛbɛka Onyankopɔn ho ankasa ma watwe nkurɔfo aba ne nkyɛn.

Onyankopɔn Adwumayɛboafo

13, 14. (a) Sɛnea 1 Korintofo 3:5-9 kyerɛ no, ɔkwan bɛn so na yɛbɛyɛ Onyankopɔn adwumayɛboafo? (b) Hena na ɛsɛ sɛ yɛde nkɔanim ho anuonyam ma no, na dɛn ntia?

¹³ Paulo kyerɛkyerɛɛ Onyankopɔn a yɛne no yɛ adwuma bom no mu denam afuw a ɔde yɛɛ mfatoho so. Ɔkyerɛwee sɛ: “Ɛno, Apolo ne hena? Paulo ne hena? Wɔyɛ asomfo a monam wɔn so agye adi, na wɔn mu biara wɔ nea Awurade de ama no. Me de, miduae, Apolo guguu so nsu, na Onyankopɔn na ɔma enyinii. Enti ɛnyɛ nea odua, na ɛnyɛ nea ogugu so nsu na ɔyɛ biribi, na mmom Onyankopɔn a ɔma enyin no. Na nea odua ne nea ogugu so nsu yɛ biako, na wɔn mu biara benya n’akatua sɛnea n’ankasa n’adwuma te. Na yɛyɛ Onyankopɔn adwumayɛboafo; moyɛ Onyankopɔn afuw.”—1 Korintofo 3:5-9.

¹⁴ Sɛ́ Onyankopɔn adwumayɛboafo no, ɛsɛ sɛ yɛde nokwaredi dua “ahenni asɛm” no wɔ nkurɔfo komam, na afei yegugu anigye biara a wɔkyerɛ so nsu denam sankɔhwɛ ne Bible adesua a etu mpɔn so. Sɛ asase no, koma no, ye a, Yehowa bɛyɛ n’afam de denam Bible mu nokware aba a ɔbɛma anyin abɛyɛ dua a ɛso aba no so. (Mateo 13:19, 23) Ɔbɛtwe onipa no aba ɔne ne Ba no nkyɛn. Enti, awiei koraa no, nkɔanim biara a ɛbɛba wɔ Ahenni adawurubɔfo mu no befi adwuma a Yehowa yɛ wɔ nkurɔfo komam a ɛma nokware aba no nyin na ɔtwe saafo no ba ɔne ne Ba no nkyɛn no.

Adansi Adwuma a Ɛbɛtra Hɔ

15. Mfatoho bɛn na Paulo de dii dwuma de kyerɛɛ sɛnea yɛboa afoforo ma wonya gyidi?

¹⁵ Bere a yedi nkɔanim no ho ahurusi no, yefi komam pɛ sɛ yehu sɛ nkurɔfo bɛkɔ so adɔ Yehowa, atie ne nne, na wɔabata ne ho. Sɛ yehu sɛ ebinom dɔ ano dwo na wɔhwe ase a, yɛn werɛ how. So yebetumi ayɛ biribi de asiw eyi ano? Wɔ mfatoho foforo mu no, Paulo kyerɛ sɛnea yebetumi aboa afoforo ma wɔanya gyidi. Ɔkyerɛwee sɛ: “Nhyɛase foforo de, obiara rentumi nto nka nea ɛhyɛ hɔ dedaw a ɛne Yesu Kristo no ho. Nanso sɛ obi de sika, dwetɛ, abo pa, nnua, sare, buronan to nhyɛase yi so a, obiara adwuma bɛda adi, na ɛda no beyi no adi, efisɛ ogya mu na ɛbɛda adi, na sɛnea obiara adwuma te no, ogya no bɛsɔ ahwɛ.”—1 Korintofo 3:11-13.

16. (a) Ɔkwan bɛn so na ɛsono mfatoho abien a Paulo de dii dwuma no biara atirimpɔw? (b) Ɔkwan bɛn so na yɛn dansi adwuma no betumi abɛyɛ nea ɛmfata na ɛnyɛ nea ebetumi agyina ogya ano?

¹⁶ Wɔ Paulo afuw ho mfatoho no mu no, adenyin no gyina ahonim pa mu a yefi dua ade, ɛso nsu a yegugu, ne Onyankopɔn nhyira so. Ɔsomafo no mfatoho foforo no si nea ebefi Kristoni no dansi adwuma mu aba ho asɛyɛde a ɛda ne so no so dua. So ɔde nneɛma pa asi ɔdan no asi fapem a ɛyɛ den so? Paulo bɔ kɔkɔ sɛ: “Na obiara a ɔto so ńhwɛ sɛnea ɔto so fa.” (1 Korintofo 3:10) Bere a yɛaka daa nkwa wɔ Paradise ho anidaso ho asɛm akyerɛ obi de akanyan n’anigye no, so yɛde yɛn nkyerɛkyerɛ gyina Kyerɛwnsɛm mu mfitiase nimdeɛ nkutoo so, na afei yɛasi nea ɛsɛ sɛ onii no yɛ na wanya daa nkwa so dua? So nea edi so yi nkutoo na yɛka ho asɛm wɔ yɛn nkyerɛkyerɛ mu: ‘Sɛ wopɛ sɛ wotra ase daa wɔ Paradise a, ɛsɛ sɛ wusua ade, kɔ nhyiam, na wunya asɛnka adwuma mu kyɛfa’? Sɛ saa a, ɛnde na yɛrento onipa no gyidi nsi fapem a ɛyɛ den so, na nea yɛto no rentumi nnyina ogya ho sɔhwɛ ano anaa ɛrennyina nkyɛ. Nkurɔfo a yɛbɛbɔ mmɔden atwe wɔn abɛn Yehowa denam ka a yɛbɛka sɛ sɛ wɔsom no mfe kakraa bi a, wɔn nsa bɛka Paradise asetra no bɛyɛ sɛ nea yɛde “nnua, sare, buronan” resi dan.

Ɔdɔ a Yɛbɛma Nkurɔfo Anya Ama Onyankopɔn ne Kristo

17, 18. (a) Dɛn na ehia na obi atumi akɔ so akura ne gyidi mu? (b) Yɛbɛyɛ dɛn atumi aboa obi ma Kristo atra ne komam?

¹⁷ Sɛ gyidi bɛtra hɔ daa a, ɛsɛ sɛ egyina abusuabɔ a obi nam Yesu Kristo so ne Yehowa Nyankopɔn nya so. Sɛ́ nnipa a yɛnyɛ pɛ no, Onyankopɔn Ba no nkutoo so na yɛnam betumi ne No anya abusuabɔ a ɛte saa a asomdwoe wom no. (Romafo 5:10) Kae sɛ Yesu kae sɛ: “Obi mma agya no nkyɛn, gye sɛ ɔnam me so.” Nea ɛbɛyɛ na yɛaboa afoforo ma wɔanya gyidi no, ‘obiara rentumi nto nhyɛase foforo nka nea ɛhyɛ hɔ dedaw a ɛne Yesu Kristo no ho.’ Dɛn na eyi kyerɛ?—Yohane 14:6; 1 Korintofo 3:11.

¹⁸ Kristo so a yɛbɛto dan asi no kyerɛ sɛ yɛbɛkyerɛkyerɛ wɔ ɔkwan a ɛbɛma Bible suani no anya ɔdɔ a emu yɛ den ama Yesu denam Ne dwumadi sɛ Ogyefo, Asafo no Ti, Ɔsɔfo Panyin a ɔwɔ dɔ, ne Ɔhene a ɔredi tumi a yɛbɛma wahu koraa no so. (Daniel 7:13, 14; Mateo 20:28; Kolosefo 1:18-20; Hebrifo 4:14-16) Ɛkyerɛ sɛ yɛbɛma wɔahu Yesu araa ma ayɛ sɛ nea ɔte wɔn komam ankasa. Ɛsɛ sɛ mpae a yɛbɔ ma wɔn no yɛ sɛ Paulo de a ɔbɔ maa Kristofo a na wɔwɔ Efeso no. Ɔkyerɛwee sɛ: ‘Mede me nkotodwe mekotow agya no, sɛ ɔmma Kristo mfa gyidi so ntra mo komam, na moagye ɔdɔ mu ntini atim mu.’—Efesofo 3:14-17.

19. Dɛn na ɛsɛ sɛ efi yɛn Bible asuafo a yɛbɛma wɔanya Kristo ho dɔ wɔ wɔn komam no mu ba, nanso dɛn na ɛsɛ sɛ yɛkyerɛkyerɛ wɔn?

¹⁹ Sɛ yɛtow nhyɛase wɔ saa kwan no so ma yɛn asuafo nya Kristo ho dɔ wɔ wɔn komam a, ɛbɛma wɔanya ɔdɔ ama Yehowa Nyankopɔn ɔkwan biara so. Yesu dɔ, ne nkate, ne n’ayamhyehye no yɛ Yehowa su ahorow a Yesu fi nokwaredi mu da no adi. (Mateo 11:28-30; Marko 6:30-34; Yohane 15:13, 14; Kolosefo 1:15; Hebrifo 1:3) Enti sɛ nkurɔfo hu Yesu na wɔdɔ no a, wobehu Yehowa na wɔadɔ no.a (1 Yohane 4:14, 16, 19) Ɛsɛ sɛ yɛkyerɛkyerɛ Bible asuafo sɛ Yehowa na ɔhyɛ nea Kristo ayɛ ama adesamma no nyinaa akyi, ɛne sɛ ɛsɛ sɛ yɛda No ase, yi no ayɛ, na yɛsom no sɛ “yɛn nkwagye Nyankopɔn.”—Dwom 68:19, 20; Yesaia 12:2-5; Yohane 3:16; 5:19.

20. (a) Yɛbɛyɛ dɛn atumi aboa nkurɔfo ma wɔabɛn Onyankopɔn ne ne Ba no? (b) Dɛn na yebesusuw ho wɔ asɛm a edi hɔ no mu?

²⁰ Sɛ́ Onyankopɔn adwumayɛboafo no, momma yɛmmoa nkurɔfo mma wɔmmɛn ɔne ne Ba no, na yɛmmoa mma wonnya ɔdɔ ne gyidi wɔ wɔn komam. Saayɛ bɛma wɔahu sɛ Yehowa wɔ hɔ ankasa. (Yohane 7:28) Wɔnam Kristo so betumi ne Nyankopɔn anya abusuabɔ a emu yɛ den, na wɔbɛdɔ no na wɔabata ne ho. Wɔremfa bere nsi wɔn ani so wɔ ɔsom adwuma a wofi ɔdɔ mu yɛ no mu, na wobenya gyidi sɛ Yehowa bɔhyɛ ahorow a ɛyɛ anigye no benya mmamu wɔ ne bere a ɛfata mu. (Kwadwom 3:24-26; Hebrifo 11:6) Nanso, bere a yɛreboa afoforo ma wɔanya gyidi, anidaso, ne ɔdɔ no, ɛsɛ sɛ yɛn ankasa ma yɛn gyidi yɛ den sɛ po so hyɛn a etumi gyina ahum a ano yɛ den ano. Yebesusuw eyi ho wɔ asɛm a edi hɔ no mu.

[Ase hɔ asɛm]

Ntimu

◻ Ɔkwan bɛn so na mpɛn pii no, yɛkanyan nkurɔfo anigye wɔ Ahenni asɛm no ho, nanso asiane bɛn na ɛwɔ hɔ?

◻ Nnipa bɛn na Yehowa twe wɔn ba ɔne ne Ba no nkyɛn?

◻ Dɛn so na na Bɔhyɛ Asase no so a Israelfo bɛhyɛn no gyina, na dɛn na yebetumi asua afi eyi mu?

◻ Dwuma bɛn na yedi wɔ nkurɔfo a yɛbɛboa wɔn ma wɔabɛn Yehowa ne ne Ba no mu?

[Kratafa 10 mfonini]

Ɛwom sɛ yɛde daa nkwa wɔ Paradise ho anidaso na ɛkɔ nkurɔfo nkyɛn de, nanso yɛn botae titiriw ne sɛ yɛbɛma wɔabɛn Yehowa

[Kratafa 13 mfonini ahorow]

Sɛ yesiesie yɛn ho yiye a, yɛn sankɔhwɛ betumi atu mpɔn yiye