Ebla—Tete Kurow Bi A Wɔasan Ahu

Wɔ ahohuru bere mu wɔ afe 1962 mu no, Paolo Matthiae, a ɔyɛ Italiani aberante a otutu fam hwehwɛ tetefo nneɛma mu no kɔhwehwɛɛ asasetaw a ɛwɔ Siria atifi fam atɔe sɛ ebia obehu biribi anaa. Ná wosusuw sɛ mmeae a wobetumi atutu fam ahwehwɛ tetefo nneɛma mu no nnɔɔso wɔ Siria. Nanso mfe abien akyi no, wotutuu fam wɔ Tell Mardikh a ɛda Aleppo anafo fam no. Efi Aleppo rekɔ Tell Mardikh no yɛ akwansin 40. Ɛhɔ na wohuu ade a ebinom susuw sɛ ‘ɛsom bo paa sen nneɛma a wotutuu fam hui wɔ afeha a ɛto so 20 no mu nyinaa.’

TETE nkyerɛwee bi di adanse sɛ na kurow bi wɔ hɔ a wɔfrɛ no Ebla. Nanso, na obiara nnim faako a wobehu saa kurow no wɔ nkoko pii a ɛwowɔ aman a ɛwɔ Mediterranea Apuei fam no. Nkyerɛwee no biako kaa nkonim a Akkad hene Sargon dii wɔ “Mari, Yarmuti ne Ebla” so no ho asɛm. Wɔ nkyerɛwee foforo so no, Sumer hene Gudea kaa nnua a onya fii “mmepɔw a ɛwɔ Ibla [Ebla]” so no ho asɛm. Edin Ebla no nso puei wɔ Karnak, Egypt, baabi a wɔakyerɛw tete nkurow a Pharaoh Thutmose III dii so nkonim din agu no. Eyi ma wuhu nea enti a wɔn a wotutu fam hwehwɛ tetefo nneɛma mu no bɔɔ mmɔden sɛ wobehu Ebla no.

Akyiri yi a wɔsan tutuu fam no, wohuu biribi. Wɔ afe 1968 mu no, wohuu Ebla hene a wɔfrɛ no Ibbit-Lim nkaedum fã bi. Ná wɔakyerɛw ntam bi wɔ Akkadfo kasa mu agu ho a ɛkyerɛ sɛ na wɔahyira so ama onyamewa Ishtar a na “wagye din wɔ Ebla.” Nokwarem no, tete nneɛma a wotutuu fam hui no maa wohuu “kasa, abakɔsɛm ne amammerɛ a na wonnim” ho asɛm.

Abopon ahorow a wohui wɔ afe 1974 ne 1975 mu a na wɔakyerɛw saa tete kurow no din wowɔ so no ma ɛbɛdaa adi sɛ Tell Mardikh na na tete kurow Ebla wɔ. Fam a wotutui no nso ma wohui sɛ, anyɛ yiye koraa no, na wɔakyekye kurow no mprenu. Bere a edii kan gyee din akyi no, wɔsɛee no. Akyiri yi wɔsan kyekyee Ebla, na wɔsɛee no bio ma ɛyerae koraa.

Kurow Biako, Nanso Ɛho Abakɔsɛm Pii

Wɔkyekyee tete nkurow a akyɛ paa no wɔ asasetaw te sɛ nea ɛda Tigris ne Eufrate asubɔnten ntam a na wotumi yɛ kua wɔ hɔ kɛse no so. Wɔkyekyee nkurow a wodii kan bobɔɔ din wɔ Bible mu no wɔ Mesopotamia. (Genesis 10:10) Ɛbɛyɛ sɛ edin Ebla no kyerɛ “Ɔbo Fitaa,” a ɛtwe adwene si akadobo a ɛwɔ asase a na wɔakyekye kurow no wɔ so ase no. Nea enti a ɛbɛyɛ sɛ wɔpaw saa beae no ne sɛ na akadobo no betumi ama wɔanya nsu wɔ hɔ, baabi a na asubɔnten akɛse mmɛn hɔ no.

Esiane sɛ na nsu ntɔ kɛse wɔ Ebla mpɔtam hɔ nti, awi, bobe ne ngodua nkutoo na na wotumi dua wɔ hɔ. Ná wotumi yɛn mmoa nso wɔ hɔ, titiriw nguan. Esiane sɛ na Ebla da Mesopotamia Asasetaw ne Mediterranea Mpoano ntam nti, na ɛda baabi pa ma enti na nnua, abo pa, ne nnade ho aguadi kɔ so wɔ hɔ paa. Ná kurow no di ɔmantam a emu nnipa bɛyɛ 200,000 so, na na wɔn mu bɛyɛ 20,000 na wɔte n’ahenkurow mu.

Ahemfie kɛse bi amamfõ ma yehu sɛnea na Eblafo ani abue afa. Ná ɔpon a wɔfa mu kɔ ahemfie hɔ no tenten yɛ bɛyɛ anammɔn 40 kosi 50. Esiane sɛ na ahemfie adwuma no reyɛ kɛse nti, bere kɔɔ so no wɔtrɛw ahemfie no mu. Ná nnipa a wɔyɛ adwuma wɔ ahemfie hɔ no hyɛ atumfoɔ pii ase—na “mmapɔmma” ne “amradofo” boa ɔhene ne ɔhemmaa no.

Wɔahu abopon ne abopon asinasin bɛboro 17,000. Mfiase no, ɛbɛyɛ sɛ abopon bɛboro 4,000 na na wɔde asisi nnua apa bi so. Nneɛma yi di adanse sɛ na Ebla di gua kɔ akyiri. Sɛ nhwɛso no, kurow no ne Egypt dii gua sɛnea ɛda adi wɔ faraofo baanu ahyɛnsode so no. Ná Sumerfo nkyerɛwee titiriw na wɔde akyerɛw abopon yi so. Nanso na wɔde Eblafo nkyerɛwee akyerɛw bi. Ɛyɛ tete nkyerɛwee bi a na wobetumi akyerɛ ase esiane nneɛma a wɔahu yi nti. Ɛyɛɛ wɔn a wotumi kyerɛ Asiafo kasa ase no nwonwa sɛ wohuu tete kasa a ɛte saa. Ɛbɛyɛ wo nwonwa sɛ wubehu sɛ wɔakyerɛw Sumerfo ne Eblafo kasa nyinaa wɔ abopon no bi so. Ebla—Alle origini della civiltà urbana (Ebla—Baabi a Anibue Fi Bae) nhoma no frɛ eyi sɛ “nsɛm asekyerɛ nhoma a akyɛ sen biara a wɔahu.”

Ɛda adi sɛ na Ebla wɔ asraafodɔm a wɔyɛ den, efisɛ wɔatutu fam ahu adwinni ahorow bi a Eblafo akofofo a wɔrekum wɔn atamfo anaa wɔde wɔn ti a wɔatwitwa rekyerɛ wɔ so. Nanso, bere a Asiria ne Babilon renya tumi no, Ebla anuonyam nyinaa baa awiei. Ɛnyɛ mmerɛw sɛ yebehu sɛnea saa nsɛm no sisii pɛpɛɛpɛ de, nanso nea edi kan no, ɛte sɛ nea Sargon I (ɛnyɛ Sargon a wɔaka ne ho asɛm wɔ Yesaia 20:1) ne afei ne banana Naram-Sin kɔtow hyɛɛ Ebla so. Adanse a wɔatutu fam ahu kyerɛ sɛ na ɔko no yɛ hu, na wɔnam atirimɔden so fow wɔn nneɛma.

Nanso, sɛnea yɛaka no, bere bi akyi no, wɔkyekyee kurow no bio, na ɛsan begyee din wɔ mpɔtam hɔ. Wɔkyekyee kurow foforo yi yiye ma ɛyɛɛ fɛ sen kan de no koraa. Wohyiraa beae bi so maa Ishtar nyamewa a na Babilonfo no nso bu no sɛ abawo nyamewa no wɔ kurow no fã bi a egu bon mu no. Ebia woate Ishtar Ɔpon a agye din a wohui wɔ Babilon amamfõ so no ho asɛm. Ɛte sɛ nea na wɔde agyata a na wɔahyira wɔn so ama Ishtar nyamewa no gu ɔdan kɛse bi a na ɛwɔ Ebla no mu. Eyi de yɛn ba Ebla som so.

Ɔsom a Ɛwɔ Ebla

Ná anyame pii wɔ Ebla te sɛ mmeae afoforo a na ɛwowɔ tete Mesopotamia no. Emu bi ne Baal, Hadad (edin a na ɛka Siriafo ahemfo bi din ho) ne Dagan. (1 Ahene 11:23; 15:18; 2 Ahene 17:16) Eblafo no dii wɔn nyinaa ni. Ná wodi nnipa afoforo anyame mpo ni. Tetefo nneɛma a wɔatutu fam ahu da no adi sɛ, bɛboro mfe mpem abiɛsa ni titiriw no, na wɔsom ahemfo a wɔawuwu a wobu wɔn sɛ anyame no.

Eblafo no amfa wɔn werɛ nyinaa anhyɛ wɔn anyame no mu. Ná afasu akɛse abien a ebetumi ama Ebla atamfo abɔ hu nso atwa Ebla kurow a wɔsan kyekyee no ho ahyia. Ɔfasu a wohu no abɔnten a atwa kurow no ho ahyia no yɛ bɛyɛ akwansin abien. Afasu no da so ara wɔ hɔ.

Ne nyinaa akyi no, Ebla a wɔsan kyekyee no mpo bɔe. Ɛbɛyɛ sɛ Hetifo a wɔtraa ase wɔ afe 1600 A.Y.B. no na wɔsɛe kurow a na bere bi edi tumi no koraa. Sɛnea tete anwensɛm bi kyerɛ no, Ebla bɔe “te sɛ kuku a abubu nketenkete.” Ankyɛ na ɛho asɛm yera fii abakɔsɛm mu. Asɛm bi a mmeamudua ho akodifo a na wɔrekɔtow ahyɛ Yerusalem so wɔ afe 1098 mu kyerɛwee no ka baabi a bere bi na Ebla wɔ no ho asɛm sɛ ɛyɛ kurow a na atew ne ho wɔ ɔman no mu, na wɔfrɛ no Mardikh. Anka Ebla akyi reyɛ ayera koraa, nanso wɔsan hui wɔ mfe mpempem pii akyi.

[Mfonini wɔ kratafa 14]

EBLA NE BIBLE WƆ BIRIBI YƐ ANAA?

Asɛm bi a wotintimii wɔ afe 1976 mu wɔ Biblical Archeologist nsɛmma nhoma mu no maa Bible ho abenfo yɛe sɛ wɔbɛyɛ nhwehwɛmu. Onii a ɔkyerɛɛ Ebla abopon so nkyerɛwee ase no kae sɛ, ebetumi aba sɛ na wɔakyerɛw nnipa ne mmeae a wɔbobɔɔ din wɔ Bible mu akyiri yi no nso din wɔ so. Ɛbɛyɛ sɛ nnipa binom de nsɛm no bi kekaa ho, na wofii ase kyerɛwee sɛ, Ebla ho nsɛm a wɔatutu fam ahu no di adanse sɛ Genesis kyerɛwtohɔ no yɛ nokware.a Katolek sɔfo bi a wɔfrɛ no Mitchell Dahood kyerɛe sɛ “dɔte abopon a [efi Ebla] no rema nneɛma a yɛnte ase wɔ Bible mu no mu ada hɔ.” Sɛ nhwɛso no, na ogye di sɛ dɔte abopon no betumi aboa ma “wɔahu bere tenten a wɔde Israel Nyankopɔn no din dii dwuma.”

Seesei wɔrehwehwɛ nkyerɛwee yi mu yiye. Esiane sɛ Hebri ne Eblafo kasa nyinaa yɛ tete kasa a edi nsɛ nti, ebetumi aba sɛ nkurow anaa nnipa no bi din ne nea ɛwɔ Bible mu no di nsɛ. Nanso eyi nkyerɛ sɛ ɛyɛ mmeae anaa nnipa koro no ara. Sɛ Ebla ne Bible wɔ biribi yɛ a, daakye na yebehu. Ɛdefa Onyankopɔn din ho no, Biblical Archeologist kyerɛwfo no ka sɛ ɔnkaa da sɛ wɔbɔɔ edin “Yahweh” wɔ Ebla nkyerɛwee no mu. Abenfo binom kyerɛ sɛ abopon so asɛm a wɔkyerɛɛ ase ja no gyina hɔ ma Ebla anyame pii no mu biako pɛ, bere a abenfo afoforo nso kyerɛ ase sɛ ɛyɛ kasa ho mmara ahyɛnsode bi ara kwa. Emu biara nni hɔ a ɛkyerɛ sɛ ɛyɛ nokware Nyankopɔn koro, Yehowa.—Deuteronomium 4:35; Yesaia 45:5.

[Ase hɔ asɛm]

[Asase mfonini/​Mfonini wɔ kratafa 12]

(Wopɛ nsɛm a wɔahyehyɛ awie no a, hwɛ nhoma no mu)

ƐPO KƐSE

KANAAN

SIRIA

Aleppo

Ebla (Tell Mardikh)

Eufrate Asubɔnten

[Asɛm Fibea]

Obi a otutu fam hwehwɛ tetefo nneɛma mu: Missione Archeologica Italiana a Ebla - Università degli Studi di Roma ‘La Sapienza’

[Mfonini wɔ kratafa 13]

Ahemfie kɛse bi amamfõ

[Mfonini wɔ kratafa 13]

Sika kɔnmuade a wɔyɛɛ no bɛyɛ 1750 A.Y.B.

[Mfonini wɔ kratafa 13]

Dɔte abopon a odwumfo bi ayɛ a wɔde asie wɔ nneɛma akorae

[Mfonini wɔ kratafa 13]

Abopon

[Mfonini wɔ kratafa 13]

Egyptfo ahempoma, 1750-1700 A.Y.B.

[Mfonini wɔ kratafa 13]

Ebla ɔkofoni bi a okura wɔn atamfo ti

[Mfonini wɔ kratafa 14]

Nkaedum a wɔahyira so ama Ishtar nyamewa

[Asɛm Fibea]

Missione Archeologica Italiana a Ebla - Università degli Studi di Roma ‘La Sapienza’

[Mfonini Fibea wɔ kratafa 13]

Mfonini no nyinaa (ahemfie amamfõ no nka ho): Missione Archeologica Italiana a Ebla-Università degli Studi di Roma ‘La Sapienza’