Mede Aseda Ma Yehowa Wɔ Me Haw Nyinaa Akyi—Sɛnea Bible no Boaa Me ma Migyinae

Sɛnea Enrique Caravaca Acosta ka kyerɛe

Wɔ April 15, 1971 mu no, misii mu sɛ merekɔsra m’abusuafo wɔ yɛn akuraa. Esiane sɛ mifii fie akyɛ nti, na me ho pere me sɛ mɛkɔ akɔto obiara. Ná mintumi nhu sɛ ebia mɛto wɔn nyinaa wɔ fie anaa. Na sɛ mipue hɔ a, hena na medi kan ahu no? Bere a miduu fie na mihui sɛ wɔakunkum nnipa baanan a me maame ka ho no, ehu kaa me paa!

ME HO dwiriw me araa ma na minhu nea menka. Asɛm bɛn na asi? Dɛn na menyɛ? Meto m’ani a minhu obiara, na na m’adwene atu afra araa ma na minhu nea menyɛ me ho. Ansa na mɛtoa asɛm yi so no, ma menka m’asetena mu nsɛm kakra nkyerɛ wo na ama woate sɛnea metee nka wɔ asɛm yi ho, ne ɔhaw afoforo a ɛtoo me wɔ m’asetena mu no ase yiye.

Yehuu Nokware No

Wɔwoo me wɔ Quirimán, kurow bi a ɛbɛn Nicoya wɔ Costa Rica. Wɔ afe 1953 mu, bere a na madi mfe 37 no, na me ne m’awofo te yɛn akuraa. Ɛwom sɛ wɔtetee yɛn sɛ Katolekfo de, nanso na yɛn ani nnye nkyerɛkyerɛ ahorow bi ho, na na yɛwɔ nsɛmmisa pii a yennyaa ho mmuae.

Da koro anɔpa bi, ɔbarima bi a wɔfrɛ no Anatolio Alfaro baa yɛn fie bɛhyɛɛ yɛn nkuran sɛ yɛmma ɔne yɛn nsua Bible. Ɔkenkanee kyerɛw nsɛm pii kyerɛɛ yɛn, na ɔkyerɛkyerɛɛ yɛn Bible mu nsɛm pii nso. Me ne Paapa, Maame, me nuabarima, ne me nuabea ne n’adamfo a na ɔne yɛn te nyinaa tenaa ase tiee no. Yɛbɔɔ nkɔmmɔ fi anɔpa kosii anadwo dasum. Yebisaa no nsɛm pii.

Anatolio daa yɛn fie ma ade kyee na ɔne yɛn toaa nkɔmmɔ no so. Yɛn ani gyee nea yɛtee no ho, na bere a ɔde Bible no buaa yɛn nsɛmmisa tẽẽ no, yɛn ani gyei mmoroso. Saa nkɔmmɔ a yɛbɔe no nyaa yɛn so nkɛntɛnso paa. Yedwennwen nea yesuae no ho, na yehui sɛ yɛahu nokware no. Anatolio gyaw yɛn Bible ho nhoma ahorow ne nsɛmma nhoma. Edu anwummere a, na yɛbom kenkan nhoma no, na na yesua ade sɛ abusua. Ná eyi nyɛ mmerɛw efisɛ na yenni anyinam nkanea. Sɛ yɛrebesua ade a, na yɛn mu biara de kotoku hyɛ ne nan ho sɛnea ɛbɛyɛ a ntontom renwe yɛn.

Asram asia akyi no, me ne m’abusuafo baanum, a m’awofo nso ka ho bɔɔ asu. Yɛde anigye fii ase kɔɔ afie afie kɔkaa nea yɛasua no ho asɛm kyerɛɛ afoforo. Ná yɛnantew twa kwan bɛyɛ nnɔnhwerew abien kɔ kurow bi a wɔfrɛ hɔ Carrillo kohyia Yehowa Adansefo kuw bi a wɔwɔ hɔ, na ɛtɔ da a na yɛtena pɔnkɔ so kɔ. Anatolio kɔɔ so baa yɛn fie ne yɛn besuaa Bible no. Afei yɛyɛɛ nhyehyɛe hyiaam sɛ kuw wɔ yɛn fie, na na nnipa baawɔtwe na wɔwɔ kuw no mu. Akyiri yi, wɔn nyinaa bɔɔ asu. Ankyɛ na kuw no bɛyɛɛ asafo ketewa a na emu nnipa bɛyɛ 20.

Me De Me Bere Nyinaa Yɛɛ Onyankopɔn Adwuma

Eduu bere bi no, Yehowa Adansefo adwumayɛbea a ɛwɔ Costa Rica no too nsa frɛɛ wɔn a wobetumi no sɛ wɔmfa wɔn bere nyinaa mmɛyɛ asɛmpaka adwuma no. Wɔ afe 1957 mu no, mituu me ho mae na mede me ho hyɛɛ bere nyinaa asɛnka adwuma no mu. Nokwasɛm ni, na adwuma no yɛ anigye paa. Ná me nkutoo taa nantew nnɔnhwerew pii kɔ nkurɔfo nkyɛn wɔ nkuraase. Ɛtɔ da a, na nkurɔfo ntie me. Sɛ mɛkae a, anyɛ yiye koraa no, mmarima bi a wokurakura nkrante hunahunaa me mprɛnsa, na wobisaa me nnipa ko a meyɛ ne adwuma a na mereyɛ.

Wɔ 1950 mfe no mu no, na akwan no pii yɛ anammɔnkwan a ɛdeda sare so ma nti na ɛyɛ den sɛ yɛbɛkɔ nkurɔfo nkyɛn. Mmeae bi wɔ hɔ a, ansa na yɛbɛkɔ hɔ no, gye sɛ yɛtena pɔnkɔ so. Ná yɛtaa nantew twa nsu, na ɛtɔ mmere bi a, na yɛda abɔnten anadwo. Esiane ntontom pii a na ɛwɔ hɔ nti, na yɛn ho ntɔ yɛn koraa. Ná ɛsɛ sɛ yɛhwɛ yɛn ho yiye wɔ awɔ ne adɛnkyɛm nso ho. Nanso ne nyinaa mu no, m’ani gyei sɛ na mereboa nkurɔfo ma wɔasua Yehowa Nyankopɔn ho ade. Sɛ mifi asɛnka ba fie a, na minya anigye ne abotɔyam esiane Bible mu nokware a na meka kyerɛ afoforo no nti. Bere a mekaa asɛm no kyerɛɛ afoforo na misuaa Bible no da biara da no, ɔdɔ a mewɔ ma Yehowa Nyankopɔn no mu kɔɔ so yɛɛ den, na ɛma mebɛn no kɛse.

Bere bi akyi no, minyaa dwumadi foforo wɔ me som mu. Mede bɛboro mfe du somee sɛ ɔhwɛfo a otutu akwan, na na mesrasra asafo ahorow no hyɛ wɔn den. Dapɛn biara, na mekɔ asafo foforo bi mu wɔ beae bi. Esiane yare nti, ɛho behiae sɛ mede ɔsom hokwan yi to hɔ, nanso mekɔɔ so de me bere nyinaa som Onyankopɔn.

Awerɛhosɛm a Esii

Afei, bere a na mewɔ Nicoya wɔ afe 1971 mu no, mekɔe sɛ merekɔsra m’abusuafo. Bere a miwuraa yɛn fie hɔ no, mihui sɛ me maame a wadi mfe 80 no da fam. Ná wɔabɔ no tuo asan awɔ no sekan. Bere a mebɔɔ me mu ase pagyaw no no, na ɔda so ara rehome. Nanso, ankyɛ na owu tɔɔ me nsam. Bere a metotoo m’ani no, mihui sɛ ɔbea a ɔnoa aduan ma wɔn a na ɔyem asram awotwe no nso da fam wɔ gyaade hɔ. Ná ɔno nso awu. Ná ɛnsae, me san huu asafo no muni biako sɛ ɔda abrannaa no so awu, na na nea ɔnoa aduan no ba abarimaa nso awu da aguare hɔ. Ná wɔabɔ wɔn nyinaa tuo awowɔ wɔn sekan atirimɔden so. Hena na odii awurukasɛm yi, na dɛn koraa na ɛkaa no ma ɔyɛɛ saa?

Bere a mipue baa abɔnten no, mihuu me papa. Ná wɔabɔ ne tirim tuo, nanso na onwui! Mituu mmirika kɔɔ me nuabarima kumaa fie a na ɛbɛn hɔ no. Miduu hɔ no, metee sɛ wɔakum ɔbea bi ne ne babarima nso. Bere a mihui sɛ nea odii awu no yɛ me wɔfase abarimaa a wadi mfe 17 a n’adwenem kã no a na ɔnyɛ Yehowa Dansefo no, me ho dwiriw me paa! Ná ɔde ne ho aka nwura. Polisifo de anibere hwehwɛɛ no wɔ ɔkwan bi so a na ebi nsii saa da wɔ Costa Rica.

Asɛm no trɛw kɔɔ ɔman no mu baabiara. Nnawɔtwe akyi no, polisifo no huu owudifo no. Ná okura sekan kɛse bi ne tuo a na obi atɔn ama no ɛmfa ho sɛ na onnii no nim sɛ n’adwenem kã no no. Polisifo a na wɔrehwehwɛ me wɔfase no akyere no no bɔɔ no tuo kum no.

Bere a na wɔrehwehwɛ me wɔfase no, nkurɔfo tuu me fo sɛ minguan mfi hɔ anyɛ saa a, obetumi abedi me awu. Mebɔɔ ho mpae efisɛ na mete nka sɛ ɛnsɛ sɛ miguan gyaw m’abusuafo a wɔaka ne asafo no mufo no. Enti mankɔ baabiara.

Mihyiaa Ɔhaw Ntoatoaso

Awerɛhosɛm ne sɛ, me papa tenaa nkwa mu afe biako pɛ. Afe a edi hɔ no, wokum me nuabea kumaa a na ɔsom Yehowa Nyankopɔn nokware mu no nso wɔ asɛm foforo koraa mu. Me nuabea yi wu no ma ehu kaa m’abusuafo nyinaa. Minhu asɛm a menka mfa nkyerɛkyerɛ awerɛhow a owu yi de baa yɛne yɛn nnamfonom so no mu. Wɔ ɔhaw yi nyinaa mu no, mede me ho too Yehowa so kɛse, na mekɔɔ so srɛɛ no sɛ ɔnhyɛ me den.

Wɔ afe 1985 mu no, mekɔɔ sukuu bi a wɔyɛɛ no nnansa maa Kristofo mpanyimfo wɔ San José kurowpon no mu. Bere a yewiei no, mihui sɛ sukuu no ama me ne Yehowa ntam ayɛ papa paa. Dwoda anɔpatutuutu, misii mu sɛ merekɔfa bɔs akɔ fie. Bere a menam rekɔ bɔs gyinabea hɔ no, nnipa awudifo bi bɛtow hyɛɛ me so miaa me kɔn, na wogyee me ho nneɛma nyinaa. Eyinom nyinaa sii mpofirim ma enti, mantumi anhyɛ wɔn nsow. Eyi ama mintumi ne afoforo nkasa sɛnea Costa Ricafo taa yɛ no. Wɔ Guanacaste mantam ha no, sɛ mmarima hyia wɔ kwan so a, wɔteɛm kyia wɔn ho wɔn ho. Kan no, na mitumi teɛm paa, nanso efi bere a wɔto hyɛɛ me so miaa me kɔn no, mintumi nyɛ saa bio.

Wɔ afe 1979 mu no, mewaree Celia a na ɔno nso yɛ Ɔdansefo wɔ asafo bi a na ɛbɛn baabi a yɛte no mu. Ná Celia ani gye Bible no ho. Da biara da, na yɛbom kenkan Bible no, na na yesua. Nanso, awerɛhosɛm ne sɛ onyaa kokoram wui wɔ July 2001 mu. Ɛtɔ da a mete nka sɛ mayɛ ankonam, nanso owusɔre ho anidaso no hyɛ me den.—Yohane 5:28, 29.

Me Sɔhwɛ Nyinaa Akyi no, M’ani Gye

Ɛwom sɛ ebia mahyia nsɛm a ɛyɛ awerɛhow pii sen nnipa bebree de, nanso mibu sɔhwɛ ahorow yi nyinaa sɛ hokwan a mede bɛda me gyidi ne me nokwaredi adi akyerɛ Yehowa. (Yakobo 1:13) Nea ɛbɛyɛ na manya me suahu ahorow no ho adwempa no, memma me werɛ mfi da sɛ ‘asiane to yɛn nyinaa bere a yɛnhwɛ kwan.’ (Ɔsɛnkafo 9:11) Afei nso, mema ɛtena m’adwenem sɛ yɛte “mmere a emu yɛ den” mu, efisɛ nnipa yɛ keka, wodi awu, na wontumi nni wɔn ho so. (2 Timoteo 3:1-5) Bio nso, mekae nea ɛtoo Hiob no. Ɛmfa ho n’amanehunu—ne mma a wowuwui, yare a ɛbɔɔ no, ne n’ahode a ɔhweree—nyinaa akyi no, Hiob gyinaa pintinn kae sɛ: “Nhyira nka Yehowa din daa.” Yehowa hyiraa Hiob kɛse sɛ okuraa ne mudi mu. (Hiob 1:13-22; 42:12-15) Bible mu nsɛm yi nyinaa a midwennwen ho no boaa me ma mekɔɔ so nyaa anigye ɛmfa ho sɔhwɛ pii a ɛtoo me no.

Yehowa aboa me bere nyinaa ma makɔ so de ne som adi kan wɔ m’asetena mu. Bible a mekenkan no daa no akyekye me werɛ kɛse, na ama me ahoɔden a mede gyina me haw ahorow ano. Sɛ mebɔ Yehowa mpae a, ɛma mitumi nya “Onyankopɔn asomdwoe a ɛboro adwene nyinaa so” no bi. (Filipifo 4:6, 7) Eyi ma minya abotɔyam. Saa ara na Kristofo nhyiam ahorow a mekɔ na minya mu kyɛfa no nso hyɛ me gyidi den.—Hebrifo 10:24, 25.

Meda Yehowa ase sɛ ɛmfa ho sɛ me mfe akɔ anim no, meda so ara wɔ ahoɔden a ɛma mitumi ne me mfɛfo Kristofo bom yɛ adwuma, me ne afoforo sua Bible, na mekɔ asɛnka. Saa kwan a menam so boa afoforo no ma minya ahoɔden de gyina abasamtu ano. Ɛmfa ho ɔhaw pii a mahyia wɔ m’asetena mu no, mifi me koma nyinaa mu de aseda ma Yehowa.a—w09 06/01-E.

[Ase hɔ asɛm]

[Asɛm a wɔafa aka wɔ kratafa 18]

Bible a mekenkan no daa no akyekye me werɛ kɛse, na ama me ahoɔden a mede gyina me haw ahorow ano

[Mfonini wɔ kratafa 17]

Bere a edi kan a memaa Bible ho ɔkasa

[Mfonini wɔ kratafa 18]

Wɔ asɛnka mu wɔ me mmerantebere mu