Yohane 3:16—“Sɛnea Onyankopɔn Dɔ Wiase Ni”

“Na Onyankopɔn dɔ wiase paa. Ɛno nti, ɔde ne Ba a ɔwoo no koro no mae, na obiara a ogye no di no ansɛe, na mmom wanya daa nkwa.”—Yohane 3:16, Wiase Foforo Nkyerɛase.

“Na sɛnea Onyankopɔn dɔ wiase ni, sɛ ɔde ne ba a ɔwoo no koro no mae, na obiara a ogye no di no anyera, na wanya daa nkwa.”—Yohane 3:16, Akuapem Twi Bible a The Bible Society of Ghana Yɛe.

Onyankopɔn dɔ yɛn, na ɔpɛ sɛ yɛtena ase daa. Wei nti, ɔsomaa ne Ba Yesu Kristo baa asaase so. Bere a Yesu baa asaase so no, ɔyɛɛ nneɛma pii. Baako ne sɛ, ɔkaa ne Nyankopɔn a ɔsan yɛ n’Agya no ho asɛm kyerɛɛ n’akyidifo. (1 Petro 1:3) Nea ɛka ho bio ne sɛ, ɔde ne nkwa too hɔ maa nnipa. Sɛ yebenya daa nkwa a, gye sɛ yegye Yesu di.

Ade baako a ɛma yehu sɛ Onyankopɔn dɔ yɛn paa ne sɛ, kyerɛwsɛm no kaa sɛ, “ɔde ne Ba a ɔwoo no koro no mae.”a Yesu yɛ Onyankopɔn Ba a ɔda nsow. Dɛn na ɛma ɔda nsow? Ɛne sɛ, Yesu nkutoo ne obi a Onyankopɔn ankasa na ɔbɔɔ no. (Kolosefo 1:17) Ɔno ne “abɔde nyinaa mu abakan.” (Kolosefo 1:15) Abɔfo no ne abɔde a aka nyinaa, wɔnam Yesu so na ɛbɔe. Nanso anhaw Yehowab Nyankopɔn sɛ ɔbɛsoma ne Ba a ɔdɔ no paa no sɛ ‘ɔmmɛsom, na ɔmfa ne nkwa nyɛ agyede mfa nnye nnipa bebree.’ (Mateo 20:28) Yesu behuu amane, na owui sɛnea ɛbɛyɛ a obegye yɛn afi bɔne ne owu a yenya fii onipa a odi kan Adam hɔ no.—Romafo 5:8, 12.

Sɛ yɛka sɛ obi wɔ Yesu mu gyidi a, ɛnyɛ ɛno ara ne sɛ obegye adi sɛ Yesu wɔ hɔ anaa obegye atom sɛ Yesu ayɛ bi ama yɛn. Nea yɛbɛyɛ de akyerɛ sɛ yegye Onyankopɔn Ba no di ne sɛ yebetie no na yɛadi n’anammɔn akyi. (Mateo 7:24-27; 1 Petro 2:21) Bible ka sɛ: “Nea ogye Ɔba no di no wɔ daa nkwa; nea ontie Ɔba no rennya nkwa.”—Yohane 3:36.

Bere a Yesu kaa saa asɛm yi no, na ɔne Yudasom mu panyin bi a wɔfrɛ no Nikodemo na ɛrekasa. (Yohane 3:1, 2) Yesu kaa Onyankopɔn Ahennic no ne wo a ‘wɔsan wo obi bio’ ho asɛm wɔ saa nkɔmmɔ no mu. (Yohane 3:3) Ɔkwan a ɔbɛfa so awu nso, ɔhyɛɛ ho nkɔm sɛ: “Ɛsɛ sɛ wɔma onipa Ba no so [kyerɛ sɛ, wɔbɔ no asɛndua mu], sɛnea ɛbɛyɛ a obiara a obegye no adi no benya daa nkwa.” (Yohane 3:14, 15) Afei ɔmaa emu daa hɔ sɛ, ɔdɔ kɛse a Onyankopɔn wɔ ma nnipa nti na ɔyɛɛ saa nhyehyɛe yi maa yɛn sɛnea ɛbɛyɛ a yebenya nkwa. Nea Yesu de wiee n’asɛm no ne sɛ, sɛ obi benya nkwa a, ɛsɛ sɛ onya gyidi na ɔyɛ nneɛma a ɛsɔ Onyankopɔn ani.—Yohane 3:17-21.