Awo ho Nhyehyɛe Abɛyɛ Amansan Nyinaa Asɛm

“Awo ho nhyehyɛe betumi de mfaso pii abrɛ nnipa pii a wɔnhwerew nneɛma pii sen ‘ɔkwan foforo biara’ a adesamma betumi afa so nnɛ. . . . Sɛ nnipa a wɔredɔɔso ho asɛnnennen biara nni hɔ mpo a, eyi bɛkɔ so ayɛ nokware ara.”​—The State of the World’s Children 1992.

BERE a atwam no na wobu no sɛ eye sɛ wɔbɛwo mma pii. Bɛyɛ mfe mpem anan a atwam ni, bere a na Rebeka rebefi Mesopotamia akɔware Isak no, ne na ne ne nuabarima de nsɛm yi hyiraa no sɛ: “Yɛn nuabea, dan ɔpedu ahorow mpem.” (Genesis 24:60) Mmere adan. Ɛnnɛ, mmea pii reka sɛ wɔpɛ sɛ wɔwo mma kakraa bi.

Bu, Indonesiani bea bi a wadi mfe 22 a ɔwɔ ɔbabea biako kae sɛ: “Me na meto so abiɛsa wɔ mma baason mu. Na me papa tɔn nsafufu wɔ Klaten, Java Mfinimfini mantam mu, na m’awofo brɛe yiye wɔ mmɔden a wɔbɔe sɛ wɔbɛtete mmofra pii saa no mu. . . . Sɛ wowɔ mma kakraa bi a, wɔn ntetee nyɛ den.”

Bu nkate horow yi te sɛ awofo a wɔwɔ wiase nyinaa de ara pɛ. Awarefo a wɔredɔɔso pɛ sɛ wɔyɛ bere a wobefi ase awo mma, dodow a wɔbɛwo, sɛnea wɔbɛtete wɔn ntam ne bere a wobegyae awo ho nhyehyɛe. Eyi da adi wɔ Amanaman Nkabom akontaabu a ɛkyerɛ sɛ wɔn a wofi wɔn pɛ mu sɛ wɔde awo anosiw nnuru bedi dwuma no adɔɔso yiye wɔ aman a afei na wɔrenya nkɔso no mu, efi awarefo mu ɔha biara mu nkyem 10 wɔ 1960 mu abedu ɔha biara mu nkyem 51 nnɛ.

Aban ahorow nso ani gye ho kɛse sɛ wɔbɛma awo ho nhyehyɛe anya nkɔso. Aman a afei na wɔrenya nkɔso no mu bɛboro fã reyɛ nhyehyɛe asiw nnipa a wɔredɔɔso no ano. UN Population Fund bu akontaa sɛ sika dodow a wɔsɛe no wɔ nnipa a wɔredɔɔso anosiw ho dwumadi ho mprempren bɛyɛ Amerika sika $4,500,000,000 afe biara. Nea ɛbɛyɛ na wɔatumi adi daakye ahiade ho dwuma no, atumfo hwɛ kwan sɛ ebedu afe 2000 no, na saa sika yi abu abɔ ho.

Dɛn nti na aman ne nnipa ankorankoro ani gye ho saa sɛ wobesiw awo dodow ano? Na dɛn ne Kristoni adwene wɔ asɛnhia yi ho? Nsɛm abien a edidi so no bɛka nsemmisa yi ho asɛm.