Mmofra​—Agyapade Anaasɛ Adesoa?

Awo ho nhyehyɛe ho asɛm ne nnipa a wɔredɔɔso dodo no na ɛnam. Wɔ adesamma abakɔsɛm mu fa kɛse no ara mu no, na nnipa nnɔɔso ntɛmntɛm; na nnipa a wowu ne wɔn a wɔwo wɔn no dodow yɛ pɛ. Bere kɔɔ so no, bɛyɛ afe 1830 mu no, wiase no mu nnipa dodow duu ɔpepepem biako.

Afei nnuruyɛ ne nyansahu mu nkɔanim maa nnipa a nyarewa, mmofraberem nyarewa titiriw, kunkum wɔn no yɛɛ kakraa bi. Eduu bɛyɛ 1930 no, na wiase no mu nnipa dodow yɛ ɔpepepem abien. Eduu 1960 no, na nnipa ɔpepepem biako bio abɛka ho. Eduu 1975 no, ɔpepepem biako bio bɛkaa ho. Eduu 1987 no na wiase no mu nnipa dodow adu ɔpepepem anum.

Sɛ wohwɛ asɛm no wɔ ɔkwan foforo so a, nnipa 170 bɛka nnipa a wɔte okyinsoroma yi so mprempren no ho wɔ anibu biara mu. Sɛ wɔka bom a, ɛyɛ nnipa bɛyɛ 250,000 da biara, wobedu kurow kɛse biako mufo. Eyi kyerɛ nso sɛ afe biara wɔwo nnipa bɛboro ɔpepem 90, bɛyɛ Canadafo mmɔho abiɛsa anaa Mexico foforo. Nkɔanim yi mu bɛboro ɔha biara mu nkyem 90 rekɔ so wɔ aman a afei na wɔrenya nkɔso a wiase no mu nnipa mu ɔha biara mu nkyem 75 te dedaw no mu.

Aban Ahorow a Asɛm no Haw Wɔn

Nanso dɛn nti na aban ahorow no pɛ sɛ wɔfa awo ho nhyehyɛe so tew nnipa a wɔredɔɔso no so? Oduruyɛfo Babs Sagoe, Nigeria Ɔman Dwumadi Panyin ma UN Population Fund, no de mfatoho a asete nyɛ den a ɔbɔ kɔkɔ sɛ ɛtaa ma tebea hwanyann a ɛho asɛm ka nyɛ mmerɛw yɛ mmerɛw boro so no bua asemmisa yi. Ɔkyerɛkyerɛ mu sɛ:

‘Fa no sɛ okuafo bi wɔ asase hekta 4. Sɛ ɔwɔ mma du na ɔkyɛ asase no ma wɔn pɛpɛɛpɛ a, abofra biara benya bɛyɛ hekta fã. Sɛ saa ne mma du no mu biara wɔ mma du na wɔkyɛ asase no saa ara ma wɔn a, wɔn mma no mu biara benya hekta 0.04. Ɛda adi pefee sɛ mmofra yi renni yiye te sɛ wɔn nanabarima a na ɔwɔ asase hekta 4 no.’

Mfatoho yi si abusuabɔ a ɛda nnipa a wɔredɔɔso ne asase a ebi mmɛka ho na ɛso nnɔbae betumi asa ntam so dua. Bere a nnipa redɔɔso no, aman a afei na wɔrenya nkɔso pii rebɔ mmɔden sɛ wobedi nnipa dodow a wɔwɔ hɔ mprempen no ho dwuma. Susuw ɔhaw ahorow no bi ho.

Asase so nneɛma. Bere a nnipa dɔɔso no, wɔde kwae, asase ani dɔte, asase pa a wodua so nnɔbae, ne nsu pa di dwuma kɛse. Dɛn na efi mu ba? Populi nsɛmma nhoma no ka sɛ: “Ahokyere taa ma aman a afei na wɔrenya nkɔso no . . . de wɔn nsase so nneɛma a wɔn daakye nkɔso gyina so no di dwuma tra so.”

Nneɛma a Aban Yɛ. Bere a nnipa dɔɔso no, ɛkɔ so yɛ den ma aban ahorow sɛ wɔbɛma wɔn manfo adan, sukuu, ahotew nneɛma, akwan, ne apɔwmuden nnwuma a ɛsɛ. Bere a adesoa abien a emu yɛ duru a ɛne ɛka kɛse ne nnɔbae a ɛresa da wɔn so no, ɛyɛ den ma aman a afei na wɔrenya nkɔso no sɛ wobetumi de wɔn manfo a wɔwɔ hɔ mprempren no ahiade ama wɔn, na mene sɛ nnipa a wɔdɔɔso sen saa.

Adwuma. UN Population Fund nhoma Population and the Environment: The Challenges Ahead, ka sɛ wɔ aman pii a afei na wɔrenya nkɔso mu no, nnipa a wobetumi ayɛ adwuma no mu ɔha biara mu nkyem 40 nnya adwuma nyɛ mprempren. Aman a afei na wɔrenya nkɔso nyinaa mu no, nnipa bɛboro ɔpepepem fã nnya adwuma nyɛ anaa wonni adwuma pa a wɔyɛ, wɔn dodow ne aman a wɔanya mfiridwuma mu nkɔanim mu adwumayɛfo nyinaa reyɛ ayɛ pɛ.

Sɛnea ɛbɛyɛ na nnipa a wonnya adwuma nyɛ no dodow annya nkɔanim no, ɛsɛ sɛ aman a afei na wɔrenya nkɔso no ma nnipa bɛboro ɔpepem 30 nnya adwuma yɛ afe biara. Nnipa a wobehia nnwuma yi te ase nnɛ​—wɔne mmofra a wɔwɔ hɔ nnɛ. Animdefo ka sɛ nnipa pii a wonnya adwuma nyɛ betumi de ɔman mu basabasayɛ ne ohia buruburoo aba na wɔakɔ so asɛe asase so nneɛma.

Enti ɛnyɛ nwonwa sɛ aman a afei na wɔrenya nkɔso no pii rebɔ mmɔden ma awo ho nhyehyɛe anya nkɔso. Ɛreka nea ɛda yɛn anim ho asɛm no, Britania nsɛmma nhoma, Lancet, a ɛka nnuruyɛ ho asɛm kae sɛ: “Ahokyere a nnipa a wɔredɔɔso, titiriw wɔ wiase aman a ahia wɔn no mu de ba no ma ɔhaw a ɛda wɔn anim no yɛ kɛse. . . . Ɔpepem pii rensua nhoma, nnya adwuma nyɛ, nnya adan pa ntra mu, nnya ayaresabea, yiyedi ne ahotew nhyehyɛe mu mfaso wɔ wɔn asetra mu, na nea ɛde ɔhaw yi ba titiriw yi mu biako ne nnipa a wɔdɔɔso a wonsiw ano.”

Mmusua a Asɛm no Haw Wɔn

Botae horow ne awo ho nhyehyɛe a wɔde si hɔ wɔ ɔman no mu nyinaa yɛ ade biako; na ɔmanfo a wɔbɛma wɔagye atom nso yɛ ade foforo. Aman pii mu no, wɔda so ara kura abusua kɛse a ɛsɛ sɛ wonya ho adwenhorow no mu denneennen. Sɛ nhwɛso no, ɛna Nigeriani bi kaa nkuranhyɛ a aban de ma sɛ wɔntew awo dodow so ho asɛm sɛ: “Meyɛ me papa mma 26 no mu ɔkaakyire. Me nuanom mpanyimfo, mmarima ne mmea nyinaa, mu biara wɔ fi mma baawɔtwe kosi 12. Enti so me na ɛsɛ sɛ mewo mma kakraa bi?”

Nanso, nnipa pii nkura adwene a ɛte saa no sɛ kan no, wɔ Nigeria a sɛ wɔkyekyem pɛpɛɛpɛ a, ɔbea biara wo mma baasia no mpo. Esiane sɛ nneɛma bo kɔ so yɛ den no nti, ɛyɛ den ma mpempem pii sɛ wobenya nea wɔn mmusua bedi na wɔafura ama wɔn. Bebree nam osuahu so ahu sɛ Yorubafo abebusɛm yi yɛ nokware: “Ọmọ bẹẹrẹ, òṣì bẹẹrẹ” (mmofra pii, ohia pii) .

Awarefo pii te awo ho nhyehyɛe no mu mfaso horow no ase, nanso wonni nhyehyɛe no so. Dɛn na afi mu aba? The State of the World’s Children 1992, a United Nations Children Fund no tintimii kae sɛ ɛnyɛ sɛ wɔanyɛ aman a afei na wɔrenya nkɔso no mu nyinsin bɛyɛ 3 biara mu 1 ho nhyehyɛe nko, na mmom na wɔmpɛ nso.

Awo ho Nhyehyɛe Gye Nkwa

Wɔ sikasɛm mu ahokyere akyi no, ade titiriw nti a ɛsɛ sɛ wosusuw awo ho nhyehyɛe ho ne ɛna no ne ne mma apɔwmuden. Afrika Atɔe Fam abebusɛm bi se: “Nyinsɛn yɛ kyakyato na awo yɛ nkwa ne owu asɛm.” Afe biara no mmea ɔpepem fã wu wɔ nyinsɛn anaa awo mu wɔ aman a afei na wɔrenya nkɔso no mu, mmofra ɔpepem biako nanom wu gyaw wɔn, na mmea afoforo ɔpepem anum kosi ason di dɛm anaa wɔdan mmubuafo esiane awo mu nyarewa nti.

Ɛnyɛ aman a afei na wɔrenya nkɔso no mu mmea nyinaa na wohyia asiane a ɛte saa. Sɛnea adaka a ɛka eyi ho da no adi no, wɔn a wohyia asiane kɛse sen biara ne mmea a wɔwo pii ntɛm, wɔwo ntɛmntɛm dodo, anaa wonyin dodo ansa na wɔawo no. Amanaman Nkabom bu akontaa sɛ awo ho nhyehyɛe betumi asiw mmea a wowu wɔ nyinsɛn ne awo mu no mu nkyem anan mu biako kosi abiɛsa mu biako ano, na ebetumi asiw dɛmdi ɔpepem pii ano.

Nanso so nnipa ɔpepem pii a wobegye wɔn nkwa no remma nnipa nnɔɔso? Anwonwasɛm ne sɛ animdefo pii se ɛmma saa. 1991 Human Development Report se: “Ebia wobesusuw sɛ, sɛ mmofra pii nya nkwa a, nnipa dodow ho haw no bɛyɛ kɛse. Ɛremma saa koraa. Wɔtew mma a wɔbɛwo wɔn no dodow so bere a awofo wɔ ahotoso kɛse sɛ wɔn mma no renwu no.”

Nanso, mmea ɔpepem pii, titiriw aman a ahia wɔn no mu mmea kɔ so wo ntoatoaso. Dɛn ntia? Efisɛ wɔn manfo hwehwɛ sɛ wɔyɛ saa, efisɛ mma pii a wɔbɛwo no ma wonya anidaso kɛse sɛ ebinom bɛtra ase, na ebia wonnim anaa wonnya awo ho nhyehyɛe ho mmoa nso nti.

Nanso, mmea pii a wɔwɔ mmusua akɛse no mmu no saa. Wobu abofra biara a wɔbɛwo no sɛ Onyankopɔn nhyira.

[Adaka wɔ kratafa 15]

Nyinsɛn a Asiane Wom Kɛse wɔ Wiase Aman a Afei na Wɔrenya Nkɔso Mu

Awo Ntɛm: Wu a mmea a wɔadi mfe 15 kosi 19 betumi awu wɔ wɔn nyinsɛn ne awo mu kɔ soro mprensa sen sɛnea mmea a wɔadi fi mfe 20 kosi 24 betumi awu no. Mma a mmea a wonnii mfe aduonu wo wɔn no betumi awu, wɔwo wɔn ntɛm koraa ansa na wɔn awo bere aso, anaasɛ wɔn mu nyɛ duru koraa wɔ awo mu.

Mpoabɔ: Ɛbere a eda awo ntam wɔ nkɛntɛnso kɛse wɔ tra a abofra bɛtra ase no so. Sɛ abofra bi anni mfe abien na wɔwo n’akyi a, asiane a ɛwom sɛ abofra a wɔwoo no akyiri yi betumi awu wɔ mmofraase no yɛ ɔha biara mu nkyem 66. Sɛ mmofra yi tra ase mpo a, wɔtaa tɔ ape na wɔntaa nnya nkɔso wɔ nimdeɛ mu. Wobetumi afa awo a wɔtetew ntam sɛnea ɛsɛ so asiw mmofra wu anum biara mu biako ano. Asiane nni awo a wɔtetew ntam mfe abiɛsa anaa nea ɛboro saa no mu kɛse.

Awo Dodow: Mmofra bɛboro baanan a wɔwo wɔn ma nyinsɛn ne awo mu asiane yɛ kɛse, titiriw sɛ mmofra a wodi kan no anni mfe abien ansa na wɔwo wɔn akyi a. Wɔ nyinsɛn anan akyi no, ɛnanom mogya so betumi atew na mogya atu wɔn, na asiane kɛse wom sɛ wɔbɛwo mma a wɔadi dɛm.

Wo a Wɔnwo Ntɛm: Asiane a ɛne sɛ mmea a wɔadi bɛboro mfe 35 betumi awu wɔ nyinsɛn anaa awo mu no kɔ soro mpɛn anum sen sɛnea mmea a wɔadi fi mfe 20 kosi 24 no betumi awu. Mma a mmea a wɔanyinyin wo wɔn no taa wuwu nso.

Nsɛm No Fibea: World Health Organization, UN Children Fund, ne UN Population Fund.