Bible No Adwene

So Yehia Asɔfo Ankasa?

PAAPA JOHN PAUL II kae wɔ n’afe afe krataa a ɔde kɔmaa asɔfo wɔ “Yawda Kronkron” 1992 mu sɛ: “Momfa aseda mma wɔ Asɔfodi akyɛde no ho.” Ɛnyɛ Katolekfo nko na mmom afoforo nso ahu wɔn ankasa mfomso wɔ ɛyaw mu. Wɔabɛte nka sɛ wohia obi a Onyankopɔn gye no tom ma wakyerɛ wɔn Onyankopɔn apɛde, wabɔ No afɔre na wadi ama wɔn wɔ Onyankopɔn anim. Wɔfrɛ onipa a ɔte saa no sɛ ɔsɔfo. So yehia ɔsɔfo ankasa ma waboa yɛn ma yɛanya Onyankopɔn hɔ bɔne fafiri?

Ɛnyɛ nnipa na wɔde adwene no bae sɛ wɔmpaw asɔfo na wɔmmɔ afɔre ahorow na mmom Onyankopɔn. Sɛ wɔanyɛ bɔne biara antia Onyankopɔn a, anka asɔfo ho renhia. Na onipa a ɔyɛ pɛ Adam nhia ɔsɔfo wɔ Eden. Wɔbɔɔ no no na bɔne biara nni ne ho.​—Genesis 2:7, 8; Ɔsɛnkafo 7:29.

Ná Henanom ne Asɔfo a Wodi Kan?

Yɛn a yɛte ase nnɛ yi nyinaa nyaa bɔne fii awo mu efisɛ Adam boapa yɛɛ bɔne, na yɛyɛ n’asefo. (Romafo 3:23) Onipa a odi kan, Adam, babarima Habel huu eyi. Bible no ka ne ho asɛm sɛ: ‘Gyidi na Habel de bɔɔ Onyankopɔn afɔre.’ (Hebrifo 11:4) Ɛwom sɛ na wɔmfrɛ Habel ne tete gyidifo afoforo​—te sɛ Noa, Abraham, ne Hiob​—asɔfo de, nanso wɔbɔɔ Onyankopɔn afɔre maa wɔn ho ne wɔn mmusua. Sɛ nhwɛso no, Bible no ka Hiob ne ne mmabarima ho asɛm sɛ: ‘Hiob bɔɔ ɔhyew afɔre sɛnea wɔn nyinaa dodow te, efisɛ Hiob ka sɛ: Ebia me mma no ayɛ bɔne.’ (Hiob 1:5) Nanso, ɛyɛɛ dɛn na asɔfo ne afɔrebɔ ahorow buu so wɔ aman pii so?

Susuw tete agya Noa ho nsɛm ho. Noa ne n’abusua nkutoo ne nnipa a wonyaa nkwa wɔ wiase nyinaa Nsuyiri no mu. Bere a wosii asase a nsu ahohoro so ma ɛso atew no so no, Noa sii afɔremuka na ɔbɔɔ afɔre ahorow de kyerɛɛ Yehowa mmɔborohunu ne n’ahobammɔ ho anisɔ. Esiane sɛ aman nyinaa yɛ Noa asefo nti, akyinnye biara nni ho sɛ wodii ne nhwɛso no akyi, na bere bi akyi no, wɔhyehyɛɛ adimafo ne bɔne ho afɔrebɔ ahorow ho amanne ahorow.​—Genesis 10:32.

Bɛboro mfe ɔha akyi no, wofii ase tew atua tiaa Onyankopɔn wɔ kurow Babel mu. Onyankopɔn yɛɛ nnipa no kasa basabasa na wɔbɔ hwetee. (Genesis 11:1-9) Afei, asɔfo bi a wɔmaa gyidi ahorow a ɛmfata nyaa nkɔso hyehyɛɛ amanne ahorow a ɛyɛ hu wɔ nsase a wɔhwete kɔɔ so no so. Nanso, Onyankopɔn hui sɛ ɛho hia sɛ ɔkyerɛkyerɛ n’asomfo wɔ hia a ehia sɛ wonya nokware asɔfokuw a ɔsɔfo panyin ne asɔfo nkumaa wom na wɔbɔ afɔre ahorow a ɛsɔ n’ani.

Nea Enti a Onyankopɔn Paw Asɔfo

Bere bi akyi no, Yehowa maa Israel man no asɔfo a wɔyɛɛ nnwuma atitiriw abien. Nea edi kan no, wogyinaa hɔ sɛ Onyankopɔn atemmufo ne Onyankopɔn Mmara akyerɛkyerɛfo maa ɔman no. (Deuteronomium 17:8, 9; Malaki 2:7) Nea ɛto so abien no, wɔyɛɛ nnipa no ananmusifo wɔ Onyankopɔn anim denam afɔre a wogyinaa nnipa no ananmu bɔɔ Onyankopɔn no so. Paulo krataa a ɔde kɔmaa Hebrifo no kyerɛkyerɛ mu sɛ: “Na ɔsɔfo panyin biara, woyi no fi nnipa mu hyɛ no sɔfo ma nnipa, Onyankopɔn fam nneɛma ho, na bɔne nti ɔde ayɛyɛde ne afɔre ama. . . . Obi mfa saa nidi no mma ne ho, na mmom nea Onyankopɔn afrɛ no.”​—Hebrifo 5:1, 4.

Paulo kɔ so kyerɛkyerɛ mu sɛ na Israel asɔfodi no nyɛ ɔkwan a etwa to a Onyankopɔn bɛfa so de nnipa abata ne Ho. Ná asɔfo no nnwuma yɛ nsɛnkyerɛnne a ɛtwe adwene si nneɛma pa, “ɔsoro nneɛma” so. (Hebrifo 8:5) Bere a ɔsoro nneɛma no aba yi, nsɛnkyerɛnne no ho nhia bio. Ɛho mfatoho ni: Ebia wode aguade a wuhia yiye ho dawurubɔ krataa besie, nanso so worentow nkyene bere a wo nsa aka saa aguade no?

Bere tenten ansa na wɔde Israel man resi hɔ no, Onyankopɔn bɔɔ ne tirim sɛ ɔde asɔfokuw bi besi hɔ na ɔde ahyira adesamma nyinaa na ɛnyɛ Israel nkutoo. Mfiase no, esiane hokwan a na Israel wɔ nti, na asɔfokuw no mufo fi wɔn mu. Bere a wɔkyekyee Israel man no, Yehowa ka kyerɛɛ Israel sɛ: ‘Sɛ mubetie me nne a, mobɛyɛ me asɔfo ahemman ne ɔman kronkron.’ (Exodus 19:5, 6; fa toto Genesis 22:18 ho.) Nea ɛyɛ awerɛhow no, ɔman no antie Onyankopɔn nne. Enti, Yesu ka kyerɛɛ asɔfo no ne Farisifo no sɛ: “Wobegye Onyankopɔn ahenni no afi mo nsam de akɔma ɔman a wɔde mu aduaba bɛba.” Afei henanom na wɔbɛsom sɛ asɔfo a wɔde nhyira bɛbrɛ adesamma no?​—Mateo 21:43.

Asɔfokuw Bɛn na Kristofo Hia?

Esiane sɛ yɛanya bɔne afi Adam mu nti, Yesu afɔrebɔ a ɛyɛ pɛ no nkutoo so na yɛnam betumi anya nkwagye akɔ daa nkwa mu. (1 Yohane 2:2) Yesu ankasa di ma yɛn sɛ Ɔsɔfo Panyin, sɛnea Israel asɔfokuw no yɛɛ ho mfonini no. Hebrifo 9:24 ka sɛ: “Kristo anhyɛn kronkronbea a wɔde nsa yɛe a ɛyɛ kronkronbea ankasa no ho sɛnkyerɛnne no mu, na mmom ɔhyɛn ɔsoro ankasa sɛ afei okoyi ne ho adi Onyankopɔn anim ama yɛn.” Enti, sɛnea Kristo asɔfodi korɔn kyɛn so no ma nnipa asɔfo a wɔbɛsom sɛ adimafo no ho nhia. Nanso, asɔfo nkumaa dwumadi ahorow ho da so ara hia. Wɔ ɔkwan bɛn so?

Ɛsɛ sɛ asɔfo ‘bɔ honhom mu afɔre a ɛnam Yesu Kristo so sɔ Onyankopɔn ani.’ (1 Petro 2:5) Paulo kyerɛw afɔre a eyinom yɛ no ho asɛm sɛ: “Momma yɛmfa no so mmɔ Onyankopɔn ayeyi afɔre daa, ɛne anofafa a ɛbɔ no abodin no aba.” (Hebrifo 13:15) Enti, bere a wɔn a wɔka bom yɛ ahene asɔfokuw no da so wɔ asase so ha no, wɔyɛ Onyankopɔn ananmusifo wɔ nnipa no anim sɛ n’Adansefo na ɛnyɛ adimafo. Akyiri yi, bere a wɔakɔka Yesu Kristo ho wɔ soro no, wɔyɛ nnipa ananmusifo wɔ Onyankopɔn anim, na wɔde Kristo afɔrebɔ mu mfaso horow di dwuma na wɔasa nyarewa nyinaa.​—Fa toto Marko 2:9-12 ho.

Ɛwom sɛ ɛsɛ sɛ gyidifo nyinaa di adanse de, nanso wɔn mu kakraa bi pɛ na wɔbɛsom wɔ ɔsoro “asɔfo ahemman” no mu. Yesu kae sɛ: “Kuw ketewa, munnsuro! Efisɛ ɛyɛ mo agya no fɛ sɛ ɔde ahenni no bɛma mo.” (Luka 12:32; Adiyisɛm 14:1) Eyinom benya owusɔre akɔ soro na “wɔbɛyɛ Onyankopɔn ne Kristo asɔfo, na wɔne no bedi ahene mfirihyia apem.”​—Adiyisɛm 20:6.

Onyankopɔn ayɛ nhyehyɛe ama ɔsoro asɔfo yi na ama wɔayɛ honhom ne honam fam nneɛma a asɔfokuw biara ntumi nyɛɛ bi da. Ɛrenkyɛ, bere a wɔde Yesu agyede afɔrebɔ no mu mfaso bedi dwuma no, wobetumi aboa ama adesamma gyidifo nyinaa ayɛ pɛ. Afei, Yesaia 33:24 benya mmamu a ɛyɛ nwonwa. Ɛka sɛ: “Ɔmanfo no mu bi renka sɛ: Magurow! Ɔman a wɔte mu no, wɔde wɔn amumɔyɛ befiri wɔn.”

[Mfonini Fibea wɔ kratafa 26]

“Benediction of the Wheat at Artois” 1857, by Jules Breton: France / Giraudon/Art Resource, N.Y.