Asiane Kɛse Bi

Erika adi asram asia. Nanso, ne mu duru ne ne tenten te sɛ-abofra a wadi-ɔsram biako-anaa abien. Wɔ ne mu a ɛnyɛ duru akyi no, ne nan ase ataatae, n’afuru ayɛ kutuu na n’anim ahonhon. Wayɛ hoyaa, ne ti nhwi ayɛ sorohaa na ebubu, na akuru atotɔ ne honam ani. Sɛ wohwɛ no a ɛte sɛ nea ne bo afuw yiye. Esiane sɛ Erik ani ho nam no betumi aworɔw nti, ɛsɛ sɛ oduruyɛfo no yɛ ahwɛyiye bere a ɔrehwɛ n’ani ase no. Ɛda adi sɛ biribi atɔ kyim wɔ Erik adwene mu nkɔso ho. Awerɛhosɛm ne sɛ, ɛnyɛ abofra yi nko na ne tebea te saa.

“ƐKA ho bi na wiase mmofra nyinaa mu nea ɛboro fã hwere wɔn nkwa—akunkum mmofra pii sen nea nsan yare biara akunkum fi bere a Black Death (Owuyare) bae no. Nanso, ɛnyɛ nsan yare. Adesɛe a ɛde ba no bi ne nnipa ɔpepem pii a ɔyare yi ankunkum wɔn nanso wɔadi dɛm wɔ nipaduam, nyarewa haw wɔn daa, na wɔtɔ apẽ wɔ adwene mu no. Ɛde ɔhaw bɛto mmea, ne mmusua so, na awiei koraa no esiw ɔman mũ nyinaa nkɔso kwan.”—The State of the World’s Children, Amanaman Nkabom Mmofra Foto.

Ɔyare bɛn na saa nsɛm no ka ho asɛm? Aduan pa a wonnya nni—titiriw no, nnuan a ahoɔdennuru wom a wonnya nni (PEM), a Wiase Nyinaa Akwahosan Ahyehyɛde (WHO) ato ne din sɛ “ahiasɛm a wɔnka ho asɛm.” Saa asiane yi kɛse te dɛn? WHO kyerɛ sɛ “anyɛ yiye koraa no mmofra ɔpepem 10.4 a wowuwu afe biara no mu fã fi saa yare yi.”

Aduan pa a wonnya nni de nyarewa pii ba, efi fɔn a obi fɔn esiane nnuannuru biako anaa nea ɛboro saa a enni aduan a odi mu—te sɛ vitamin ne mineral—so kosi kɛseyɛ mmoroso ne yare afoforo a enni sabea so. Nanso, WHO ka sɛ, “yare a aduan pa a wonnya nni de ba no na ekum nnipa sen biara.” Wɔn a enya wɔn paa ne mmofra a wonnya nnii mfe anum.

Fa bere kakra susuw Erik, a yɛadi kan aka ne ho asɛm, ne mmofra ɔpepem pii a aduan pa a wonnya nni ma wɔyare no ho hwɛ. Ɛnyɛ wɔn pɛ ne sɛ anka wɔbɛba saa tebea no mu, na saa ara nso na wontumi nkwati. Mmofra ayaresa ho nimdefo Georgina Toussaint ka kyerɛɛ Nyan! sɛ: “Mfomso biara mfi wɔn a wohyia saa amanehunu yi nanso wɔn na yare yi so wɔn mu ara na ɛde wɔn resen.”

Ebia ebinom besusuw sɛ yentumi nkwati ɔhaw yi—efisɛ sɛ yebetwa no tiawa a, yennya aduan a ɛdɔɔso mma obiara. Nanso anwonwasɛm ne sɛ, sɛnea WHO kyerɛ no, “yɛte wiase bi a aduan abu so wom mu nnɛ.” Aduan pii wɔ hɔ a ɛbɛsõ nnipa a wɔte asase so nyinaa—ma aboro so. Bio nso, yare a aduan pa a wonnya nni de ba yɛ yare a ne ko nyɛ den koraa na ne bo nso wɔ fam. So saa nokwasɛm yi nhyɛ wo abufuw?

Hena na Ɛka No?

Ɛnyɛ mmofra nkutoo na aduan pa a wonnya nni ma wɔyare. Sɛnea WHO amanneɛbɔ ma July 2001 kyerɛ no, “nnipa pii na aduan pa a wonnya nni ma wɔyare, ɛka nnipa bɛyɛ ɔpepem 800—nnipa dodow a wɔwɔ aman a enyaa nkɔso pii mu no mu ɔha mu 20.” Eyi kyerɛ sɛ, sɛ woyi nnipa a wɔwɔ wiase yi mu 8 biara si hɔ a, emu 1 nnya aduan pa nni.

Ɛwom sɛ nnipa a wonnya aduan pa nni no dodow no ara wɔ Asia—titiriw no wɔ kusuu fam ne mfinimfini fam de—nanso nnipa dodow a wonnya aduan pa nni no fã kɛse no ara wɔ Afrika. Aman a wonnyaa nkɔso pii a ɛwɔ Latin America ne Caribbean no na wodi hɔ.

So aman a wodi yiye no ade wɔn ho afi ɔyare a aduan pa a wonnya nni de ba ho? Dabi. Sɛnea The State of Food Insecurity in the World 2001 kyerɛ no, nnipa a wonnya aduan pa nni ɔpepem 11 na wɔwɔ aman a wɔanya nkɔanim wɔ mfiridwuma mu no mu. Nea ɛka ho no nnipa a wonnya aduan pa nni ɔpepem 27 na wɔwɔ aman a wɔka wɔn ho asɛm sɛ wɔresesa afi aman a wonnyaa nkɔso mu abɛyɛ aman a wɔanya nkɔanim wɔ mfiridwuma mu, titiriw no aman a ɛwɔ Europa Apuei fam ne kan Soviet Union adehyeman mu.

Dɛn nti na aduan pa a wonnya nni abɛyɛ ɔhaw a anibere wom saa? So biribi wɔ hɔ a ebetumi ama aduan pa a wonnya nni tebea no ayɛ yiye mprempren? So aduan pa a wonnya nni befi yɛn okyinnsoromma yi so da bi? Nsɛm a edi hɔ no bebua nsɛmmisa yi.

[Ase hɔ asɛm]

[Asɛm a Wɔahyehyɛ/Asase mfonini wɔ kratafa 4]

(Wopɛ nsɛm a wɔahyehyɛ awie no a, hwɛ nhoma no mu)

AMAN A EMU NNIPA NNYA ADUAN A ƐDƆƆSO NNI

ƆHAW NO WƆ FAM

ƆHAW NO NYƐ KƐSE NA ENNI FAM

ƆHAW NO YƐ KƐSE

ƆHAW BIARA NNI HƆ ANAASƐ ƐHO AKONTABU NO SUA

[Mfonini wɔ kratafa 3]

Wɔretwɛn nneɛma a wɔde boa wɔn a wɔn ho akã wɔ Sudan no

[Asɛm Fibea]

UN/DPI Photo by Eskinder Debebe