Mmofra Wɔ Ahokyere Mu

Abarimaa bi a wadi mfe 12 de nnɔnhwerew 11 yɛ adwuma dennen da biara pae abo wɔ India abotubea bi. Wotua no cent 85 (U.S. de) da biara.

Abeawa bi a wadi mfe du si tuutuu wɔ Bangkok nguaman fie bi mu. Ɛnyɛ sɛ ɔpɛ nti na ɔwɔ hɔ. Ne papa tɔn no gyee $400.

Ɔsraani kumaa bi a wadi mfe du boa ma wɔwɛn faako a wɔasiw ɔkwan mu wɔ Afrika ɔman bi so. Otuo a ɛtotow ntɛmntɛm sɛn n’abati; ɔde bere a onya nom wii.

TEBEA horow a ɛte sɛɛ abu so yiye wɔ aman a afei na wɔrenya nkɔso mu. Mmofra ɔpepem pii na wɔwɔ ahokyere mu. Ɔpepem ason ayɛ basaa wɔ aguanfo atrae ahorow; ɔpepem 30 nenam mmɔnten so a wonni atrae; ɔpepem 80 a wɔadi fi mfe 10 kosi 14 yɛ nnwumaden a ɛmma wontumi nyin sɛnea ɛsɛ; bɛboro ɔpepem 100 betumi awuwu mfe du yi mu esiane aduan, nsu pa, ne ayarehwɛ a wonnya nti.

Susuw nsɛnnennen a mmofra a wɔwɔ asase no afãnan nyinaa rehyia no mu kakraa bi ho.

Ɔyare

Mmofra bɛyɛ 8,000 wuwu da biara efisɛ wɔmmɔɔ wɔn paane a wɔde siw nyarewa te sɛ ntoburo ne nkɔnkɔn ano. Afoforo 7,000 wuwu da biara efisɛ wɔn awofo nnim sɛnea wodi wɔn nipadua mu nsu a ayamtu ma ɛyow no ho dwuma. Da biara, mmofra 7,000 afoforo wuwu efisɛ wɔmma wɔn antibiotic nnuru a ne bo yɛ dɔla biako pɛ na wɔde ako atia ɔhome mu nyarewa.

Mfe pii ni a wɔanya nnuru ne ayaresa akwan a wɔde siw nyarewa a ahaw adesamma abusua bere tenten ni no ano, anaa wɔde sa. Nanso ɔpepem pii a wohia no nsa nkaa bi ɛ. Nea ɛde aba ne sɛ, wɔ mfe aduonu a atwam mu no, ayamtu ne ɔhome mu nyarewa nkutoo akunkum mmofra bɛyɛ ɔpepem ɔha. UNICEF’s State of the World’s Children 1990 bɔɔ abubuw sɛ, “ɛte sɛ nea awiei koraa no wɔanya akisikuru ano aduru, nanso wɔmfa nnii dwuma ahe biara wɔ mfe 20 mu.”

Ɛmfa ho sɛnea tebea no nye no, wɔatumi anya nkɔso bi. Sɛ́ nhwɛso no, UNICEF ne WHO (Wiase Akwahosan Ahyehyɛde) ayɛ paane a wɔbɔ de siw nyarewa ano ho ɔsatu bi a emu yɛ den. Wɔ 1991 mu no, wɔbɔɔ amanneɛ sɛ wɔabɔ wiase mmofra ɔha mu nkyem 80 paane de abɔ wɔn ho ban afi nyarewa asia a wotumi bɔ paane de siw ano no ho​—ntoburo, asensen, diphtheria, mmubui, nsamanwaw, ne nkɔnkɔn. Eyi, ne mmɔden a ɛte saa ara a wɔbɔ sɛ wobesiw ayamtu nyarewa ahorow ano no agye mmofra mpempem pii nkwa afe biara.

Nanso wɔ nnansa yi mfe mu no, ɔyare foforo​—AIDS​—ada adi, na ɛde nkɔso a aba wɔ Afrikafo mmofra a wogye wɔn nkwa mu wɔ mfe du a atwam ni mu no ato asiane mu, na ebetumi atwe asan mpo. Wɔ 1990 mfe mu no, ebia AIDS bekunkum mmofra bɛyɛ ɔpepem 2.7 wɔ Afrika nkutoo. Ebedu afe 2,000 mu no, efi ɔpepem abiɛsa kosi ɔpepem anum afoforo betumi ayɛ nyisaa esiane sɛ AIDS akum wɔn awofo nti.

Aduan Pa a Wonnya Nni

Yɛn nyinaa de ɛyawdi ahu mmofra a ɔkɔm rede wɔn a wɔaka nnompe, wɔn afu ahyɛ, wɔn ani ayɛ kusukusu a ɛnhwɛ ade pɔtee biara ho mfonini a ɛyɛ awerɛhow no pɛn. Saa mmofra a wɔyɛ mmɔbɔ no yɛ wɔn a wonnya aduan pa nni no mu kakraa bi. Wɔ aman a afei na wɔrenya nkɔso nyinaa mu no, mmofra bɛyɛ ɔpepem 177​—3 biara mu 1​—bua da. Na wɔn dodow rekɔ soro.

Sɛ mmofra kɔ so hwere aduan pa a wobenya adi a, ɛmma wontumi nnyin nkodu faako a ɛsɛ sɛ wonyin du wɔ adwene ne nipadua mu. Mmofra a wonnya aduan pa nni mu dodow no ara nni ahoɔden, wɔnkyerɛ anigye, wɔn ani yɛ kusukusu, na hwee mfa wɔn ho. Wonni agoru pii na wonsua ade ntɛmtɛm sɛ mmofra a wonya aduan pa di. Wotumi yare ntɛmntɛm nso, na ɛyɛ ade titiriw a ɛde mmofra ɔpepem 14 a wowuwu afe biara wɔ aman a afei na wɔrenya nkɔso mu no nkyem abiɛsa mu biako ba.

Sɛnea nnɛyi nyansahu ayɛ nnuru a wɔde ko tia nyarewa no, saa ara nso na ama ayɛ yiye sɛ wobenya aduan a ɛdɔɔso sen nea ɛbɛsõ obiara a ɔwɔ asase so, na wɔakyekyɛ ama wɔn. Nanso aduan pa a wonnya nni ano aduru a ebedi ho dwuma ntɛm ara biara nni hɔ. Wontumi mfa nnuan a wɔde mana anaa aduan mu ahoɔden a ɛwɔ nnufuaw mu so nyi mfi hɔ. Nea ɛde ba ankasa ne ohia buruburoo, anibiannaso a abu so, nsu fĩ, mmeae a ɛhɔ ntew, ne asase a wɔyɛ so afuw a ɛho yɛ na wɔ mmeae a ahia wɔn no.

Nneɛma a Atwa Yɛn ho Ahyia ho Nsɛnnennen

Bere a nneɛma a atwa yɛn ho ahyia wɔ asase so ho asɛnnennen yɛ kɛse no, mmofra na ɛka wɔn kɛse. Susuw mframa a wɔsɛe no ho. Sɛ wɔde toto ho a, abofra a onnii mfe abiɛsa a wada no home mframa sen opanyin a wada, mmɔho abien, na ɛma ɔhome mframa a asɛe mmɔho abien saara. Na esiane sɛ mmofra asaabo, berɛbo, ne nkwaadɔm a ɛtwe aduan mu ahoɔden wɔ nipadua no mu nnuu nea etumi yɛ adwuma yiye nti, wontumi nyi nneɛma a ɛsɛe mframa no mfi wɔn mu yiye sɛnea mpanyimfo yɛ no.

Enti pɛtrol mu sumpii ne mframa ahorow te sɛ carbon monoxide, nitric oxide, ne sulfur dioxide pira mmofra sen mpanyimfo. Mmerɛwyɛ yi na ɛma ɔhome mu nyarewa ahorow kunkum mmofra a wonnii mfe anum ɔpepem 4.2 tẽẽ afe biara wɔ aman a afei na wɔrenya nkɔso mu. Wɔn a wofi mu ka no pii nyin a wɔwɔ ɔhome mu nyarewa a ɛhaw wɔn, wɔn nkwa nna nyinaa.

Esiane sɛ mmofra da so ara renyin wɔ ɔhonam mu nti, nea efi aduan pa a wonnya nni mu ba no tumi ka wɔn kɛse sen mpanyimfo. Wɔ aman pii mu no, mmofra na wohu amane kɛse bere a kwae ahorow so tew, anhweatam ahorow yɛ kɛse, na mfuw asase a wɔayɛ mu adwuma aboro so no so dɔte twetwe, ɛbrɛ, na ɛnsow aba pii bio no. Wɔ Afrika nkutoo no, mmofra ɔpepem 39 na aduan a ɛfata a wonnya nni nti wɔatotɔ apẽ.

Nea ɛka ɔhaw no ho ne nsu pa a ɛho ayɛ na kɛse no. Wɔ aman a afei na wɔrenya nkɔso nyinaa mu no, mmofra no mu fa pɛ na wonya nsu pa nom, na wɔn a wonya mmeae a ɛhɔ tew gyaw wɔn anan no sua sen saa mpo.

Akodi

Wɔ mmere a atwam mu no, na wɔn a wohu akodi mu amane mu dodow no ara yɛ asraafo. Ɛnte saa bio. Efi wiase ko a ɛto so abien so no, nnipa ɔpepem 20 a wɔakunkum wɔn ne ɔpepem 60 a wɔapirapira wɔ akodi ahorow mu no mu ɔha mu nkyem 80 nnyɛ asraafo​—dodow no ara yɛ mmea ne mmofra. Eduu mmere bi wɔ 1980 mfe no mu no, ná akodi a ɛte sɛɛ no kunkum mmofra 25 dɔnhwerew biara! Mmofra mpempem pii na wɔakunkum wɔn, wɔapirapira wɔn, wɔapow wɔn, wɔayɛ nyisaa, anaa wɔafa wɔn nnommum.

Mmofra ɔpepem pii a wɔrenyin wɔ aguanfo atrae ahorow mu mprempren no nnim nipa ko a wɔyɛ ne ɔman ko a wofi so mpɛn pii, na afei wonnya aduan, ayarehwɛ, ne nhomasua a ɛfata. Ɛyɛ den ma pii sɛ wobesua nnwuma a ɛbɛma wɔanya baabi asi wɔ asetram.

Nanso nyɛ amane nko na mmofra hu wɔ akodi mu; wodi ako nso. Wɔ nnansa yi mfe mu no, mmofra 200,000 a wonnii mfe 15 na wɔafa wɔn sɛ asraafo, ama wɔn akode, na wɔakyerɛ wɔn nipakum. Wɔn a wɔka eyinom ho ne wɔn a a wɔhweree wɔn nkwa anaa wɔn nsa anaa wɔn anan esiane sɛ wodii ahyɛde a ɛne sɛ wɔmpae akwan wɔ nsase a wɔde akode ahyɛ mu so no so nti.

Mmofra a Wɔde Wɔn Pɛ Mfaso

Wɔ aman a afei na wɔrenya nkɔso nyinaa mu no, ohia ma awofo tɔn wɔn mma gye sika kakraa bi na ama wɔanya aduan anaa wɔde atua wɔn ho aka. Dɛn na ɛba mmofra yi so? Wɔhyɛ ebinom ma wosi tuutuu anaa wɔyɛ wɔn nkoa wɔ adwumayɛbea ahorow a ɛhɔ wɔ fĩ mu. Ntamgyinafo anaa Atɔe Fam abagye nnwuma ahorow tɔn ebinom bio gye bɛyɛ $10,000.

Ɛda adi sɛ mmofra a wosi tuutuu redɔɔso na mmofra a wonnyinii koraa, mmarimaa ne mmeawa nyinaa, na wɔreyɛ saa. Wɔ Brazil nkutoo no, wosusuw sɛ wɔn a wonnii mfe aduonu bɛyɛ 500,000 na wosi tuutuu. Mmofra a wɔde wɔn di dwuma wɔ nguamansɛm ho mfonini ahorow mu nso rekɔ so pii, na video ho nneɛma a ɛnyɛ na no ama eyi anya nkɔso.

Nneɛma a Edi Kan

Ɛyawdi a ɛwɔ akontaabu ahorow yi mu no hu yɛ den. Nea eye ne sɛ yentumi nhu sɛnea nnipa ɔpepem pii anaa mpempem pii amanehunu kɛse te. Nanso yɛn mu pii nim sɛnea ɛyɛ yaw sɛ wubehu abofra biako pɛ amanehunu anaa ne wu​—obi a ɔwɔ n’ankasa nipasu a ɛda nsow, ɔkra a ɔsom bo ma Nyankopɔn, ankorankoro a ɔwɔ hokwan sɛ ɔtra nkwa mu na odi yiye sɛ obiara.

Wɔn a wɔkɔɔ Wiase Akannifo Mmofra ho Nhyiam no de ahotoso kaa daakye ho asɛm, na wɔhyɛɛ bɔ sɛ wɔremma tebea no nkɔ so saa ara bio bere a wɔannye bere ansusuw asemmisa a ɛhaw adwene a ɛfa nea enti a mmofra tebea ayɛ sɛnea ɛte mprempren no ho. Nneɛma afoforo akyi no, wɔn “Dwumadi Nhyehyɛe” no kyerɛe sɛ ebedu afe 2,000 mu no, na adu botae ahorow yi ho:

□ Ɛbɛtew mmofra a wonnii mfe anum a wowui wɔ 1990 mu no dodow so nkyem abiɛsa mu biako.

□ Ɛbɛtew aduan pa a mmofra a wonnii mfe anum nnya nni a emu yɛ den, ne nea emu nyɛ den pii no so bɛyɛ 1990 mfe no mu de no fã.

□ Ɛbɛma wɔanya nsu a eye anom ne ɔkwan a ɛho tew a wɔfa so tow tiafi gu wɔ baabiara.

□ Ɛbɛbɔ mmofra a wɔba tebea a emu yɛ den kɛse, titiriw akodi tebea mu, ho ban.

Wɔabu akontaa sɛ nhyehyɛe a ɛde botae ahorow a ebesiw mmofra ɔpepem 50 wu wɔ 1990 mfe no mu ano bɛba no ho ka afoforo bɛyɛ dɔla ɔpepepem 2.5 afe biara.

Ɛno nyɛ sika kɛse biara wɔ wiase nyinaa fam. Amerika nnwumakuw de dɔla ɔpepepem 2.5 bɔ sigaret ho dawuru wɔ afe biako mu. Wiase no sɛe dɔla ɔpepepem 2.5 wɔ sraadi ho da koro biara.

Mprempren, sika a wɔsɛe wɔ sraadi ho​—Amanaman Nkabom no bu ho akontaa sɛ ɛboro dɔla ɔpepepepem biako afe biara​—boro adesamma fã a ahia wɔn sen biara no nyinaa afe biako akatua a wɔaka abom. Sika kɛse yi ɔha mu nkyem 5 mpo a wobeyi no yɛ nea ɛdɔɔso a ɛbɛboa ma amampanyin nhyiam no botae horow no ho du ayɛ ntɛm. Sɛ nhwɛso no, F/A-18 akodi wimhyɛn no bo (ɛboro dɔla ɔpepem 30) ne nnuru a wobetumi de abɔ mmofra ɔpepem 400 paane asiw nyarewa a edi awu kɛse ano no bo yɛ pɛ.

Amanaman no betumi adu botae akɛse a wɔde sii hɔ wɔ amampanyin nhyiam no ase no ho. Wɔwɔ nimdeɛ, nyansahu, ne sika a wɔde bɛyɛ saa. Asemmisa no ne sɛ, So wɔbɛyɛ saa?

[Box/Mfonini wɔ kratafa 6]

Aduan Pa a Wonnya Nni a Wɔko Tia

Nneɛma Asia a Ɛsɛ Sɛ Awofo Hu

1. Nufusu nkutoo ne aduan a ɛfata sen biara wɔ abofra asetram asram anan kosi asia a edi kan no mu. Ɛma abofra no nya aduan a edi mũ na ɛbɔ ne ho ban fi nyarewa a abu so ho.

2. Efi asram anan kosi asia so no, abofra no hia nnuan afoforo. Nnuan a ɛyɛ den a wɔde ma ntɛm dodo no ma ɛyɛ mmerɛw sɛ obenya nyarewa; ɛka akyiri dodo a ɛde aduan pa a wonnya nni na ɛba.

3. Ehia sɛ wɔma abofra a onnii mfe abiɛsa aduan mpɛn mmɔho abien sen ɔpanyin, na ɛsɛ sɛ wɔde nnuan a ɛma ahoɔden pii no kakraa ka ho.

4. Ɛnsɛ sɛ wɔde aduan ne nsu kame abofra bere a ɔyare anaa ne yam retu.

5. Abofra yare akyi no, ohia sɛ wɔma no aduan pɛnkoro ka daa de no ho dapɛn biako na ama watumi anya nea ɔhweree wɔ ne nyin mu no bio.

6. Eye ma ɛna ne ɔba nyinaa sɛ anye yiye koraa no, mfe abien bɛda abawo ntam na ama wɔanya adidi mu akwahosan pa.

[Asɛm Fibea]

Source: United Nations Children Fund

UNICEF/C/91/ Roger Lemoyne

[Mfonini wɔ kratafa 5]

Mmofra a wɔwɔ aman a afei na wɔrenya nkɔso mu no fa pɛ na wonya nsu pa nom

[Asɛm Fibea]

UNICEF/3893/89/ Maggie Murray-Lee

[Mfonini wɔ kratafa 7]

Abofra biara, a ɔwɔ nipasu a ɛda nsow, som bo ma Nyankopɔn na ɔwɔ hokwan sɛ ɔtra nkwa mu sɛ obiara

[Asɛm Fibea]

Photo: Cristina Solé/Godo-Foto