Yɛn Hann a Yɛbɛma Akɔ so Ahyerɛn

¹ Dɛn ne hann? Nsɛm asekyerɛ nhoma kyerɛ ase sɛ “biribi a ɛma wotumi hu ade.” Nanso nokwasɛm ne sɛ, onipa mfiridwuma ho nimdeɛ a ɛkɔ akyiri nyinaa akyi no, ɔda so ara nnim asɛm a Yehowa bisae wɔ Hiob 38:24 no mmuae nwie. Sɛ hann nni hɔ a, yebetumi akɔ so atra ase? Sɛ hann nni hɔ a, yentumi ntra nkwa mu. Hann ho hia na yɛatumi ahu de, na Bible no ka kyerɛ yɛn sɛ wɔ honhom fam no, “Onyankopɔn yɛ hann.” (1 Yoh. 1:5) Yɛdan Nea “wama hann ahyerɛn ama yɛn” no koraa.—Dw. 118:27.

² Eyi yɛ nokware wɔ honam fam, nanso ɛte saa kɛse mpo wɔ honhom fam. Atoro som adaadaa nnipa bebree, agyaw wɔn wɔ honhom mu sum mu, na “wɔhwehwɛ ɔfasu te sɛ anifuraefo.” (Yes. 59:9, 10, NW) Esiane sɛ Yehowa dɔ ne n’ayamhyehye a ɛso nni kanyan no nti, ‘ɔde ne hann ne ne nokware ma.’ (Dw. 43:3) Nnipa a wɔwɔ anisɔ ɔpepem pii agye atom, na wɔafi ‘esum mu aba ne hann a ɛyɛ nwonwa no mu.’—1 Pet. 2:9.

³ Yesu Kristo yɛ adwuma titiriw bi wɔ hann yi a ɔde baa wiase no mu. Ɔkae sɛ: “Maba wiase sɛ hann, na obiara a ogye me di no antra sum mu.” (Yoh. 12:46) Ɔde ne bere, n’ahoɔden ne n’ahode nyinaa dii dwuma de daa nokware no adi. Okyinkyin ne man mu nyinaa, na ɛkame ayɛ sɛ ɔkaa asɛm kyerɛkyerɛe wɔ kurow ne akuraa biara ase. Wɔkɔɔ so taa no wɔ baabiara, nanso ogyinaa pintinn wɔ ahyɛde a wɔde maa no sɛ ɔntrɛw nokware hann no mu no mu.

⁴ Yesu de n’adwene sii asuafo a ɔbɛpaw wɔn, atete wɔn, na wahyehyɛ wɔn no so a na ɔwɔ botae pɔtee bi wɔ n’adwenem. Yɛkenkan ahyɛde horow a ɔde maa wɔn wɔ Mateo 5:14-16 no sɛ: “Mone wiase hann. . . . Momma mo kanea nhyerɛn nnipa anim, na wɔahu mo nneyɛe pa, na wɔahyɛ mo agya a ɔwɔ soro no anuonyam.” Te sɛ Yesu no, na ɛsɛ sɛ wɔyɛ “akanea ewiase,” na wɔma nokware hann no trɛw kɔ baabiara. (Fil. 2:15) Wɔde anigye gyee saa asɛyɛde no, na wobuu no sɛ wɔn asetra mu atirimpɔw titiriw. Bere tiaa bi akyi no, Paulo tumi kae sɛ wɔaka asɛmpa no “wiase abɔde nyinaa mu.” (Kol. 1:23) Kristofo asafo mũ no nyinaa de biakoyɛ yɛɛ saa adwuma kɛse no.

⁵ Ɛnnɛ ɛsɛ sɛ yɛde aseda ma sɛ yɛabɛka wɔn a ‘wɔayi sum mu nnwuma agu no’ ho. (Rom. 13:12, 13) Yebetumi ada yɛn anisɔ adi denam nhwɛso a Yesu ne tete Kristofo anokwafo yɛe a yebesuasua no so. Hia a ɛho hia sɛ afoforo te nokware no gye ntɛmpɛ kɛse, na ɛyɛ aniberesɛm sen bere biara wɔ adesamma abakɔsɛm mu. Adwuma foforo biara nni hɔ a ebetumi agye ntɛmpɛ na ɛso wɔ mfaso pii sɛ adwuma yi.

⁶ Yɛbɛyɛ Dɛn Atumi Ahyerɛn sɛ Akanea? Ɔkwan titiriw a yɛbɛfa so ama yɛn hann ahyerɛn ne sɛ yebenya Ahenni asɛnka adwuma no mu kyɛfa. Asafo biara yɛ asɛnka ho nhyehyɛe daa wɔ asasesin a wɔde ama wɔn no mu. Wɔma wɔn nhoma ahorow pii a ɛwɔ kasa pii mu. Wɔnam asafo nhyiam horow no so de nkyerɛkyerɛ a ɛkɔ akyiri ma, na wɔn a wɔn ho akokwaw no boa ma wɔtete afoforo. Wɔma mmarima, mmea, mpanyimfo ne mmofra mpo nya hokwan ahorow ma wɔde wɔn ho hyem. Wɔto nsa frɛ asafo no muni biara sɛ ɔmfa ne ho nhyem nkodu baabi a n’ahoɔden ne ne nsɛm tebea horow ma kwan. Asafo no dwumadi nyinaa twe adwene si asɛnka so, na wɔayɛ nsiesiei a ɛbɛboa obiara ma ɔde ne ho ahyem wɔ kwan bi so. Asafo no a yɛne no benya fekubɔ a emu yɛ den daa ne ɔkwan pa a ɛsen biara a yɛbɛfa so ahwɛ ma yɛn hann akɔ so ahyerɛn.

⁷ Yebetumi ahyerɛn wɔ akwan horow so a ebia yɛmfa yɛn ano nni adanse. Yɛnam yɛn abrabɔ kɛkɛ so betumi akanyan afoforo anigye. Na ɛno na na ɛwɔ Petro adwene mu bere a ɔhyɛɛ nkuran sɛ: “Mommɔ ɔbra pa amanaman mu, na . . . wɔhwɛ mo nneyɛe pa no a, wɔahyɛ Onyankopɔn anuonyam” no. (1 Pet. 2:12) Nnipa pii kyerɛ sɛnea adwuma anaa ahyehyɛde bi te denam emufo abrabɔ so. Sɛ wɔn a wɔhwɛ no hu nnipa a wɔn abrabɔ ho tew, wodi nokware, wɔpɛ asomdwoe, na wodi mmara so a, wobu saa nnipa no sɛ wɔyɛ soronko, na wosi no pi sɛ wɔde gyinapɛn ahorow a ɛkorɔn sen nea nnipa dodow no ara di akyi na ɛbɔ wɔn bra. Enti okunu ma ne hann hyerɛn bere a odi ne yere ni na ofi ɔdɔ mu kyerɛ ne ho anigye no; ɔyere yɛ saa ara denam obu a ɔkyerɛ ma ne kunu tiyɛ no so. Sɛ mmofra tie wɔn awofo na wɔkwati aguamammɔ ne nnuru a wɔde di dwuma ɔkwammɔne so a, wɔda nsow. Wobu odwumayɛni a ɔntoto n’adwuma ase, odi nokware, na osusuw afoforo ho sɛ ɔsom bo yiye. Bere a yɛda saa Kristofo su horow yi adi no, na yɛma yɛn hann hyerɛn, yɛkamfo yɛn asetra kwan kyerɛ afoforo.

⁸ Asɛnka yɛ nea yɛasua afi Onyankopɔn Asɛm mu a yɛka kyerɛ afoforo. Yɛyɛ saa wɔ asɛnka agua so anaa apon ano, nanso ɛnyɛ saa mmere no nkutoo. Yɛn da biara da dwumadi ahorow ma yɛne nnipa bebree di nkitaho. Mpɛn ahe na wo ne w’afipamfo kasa da koro? Mpɛn ahe na obi bɛbɔ wo pon mu? Nnipa ahorow ahe na wo ne wɔn di nkitaho bere a wototɔ nneɛma, wote bɔs mu, anaa woreyɛ adwuma wɔ wo honam fam adwumam? Woyɛ abofra a wokɔ sukuu a, wubetumi akan nnipa a wo ne wɔn kasa da biara no dodow? Ɛkame ayɛ sɛ hokwan a wubenya ne afoforo akasa no nni ano. Nea ehia sɛ woyɛ ara ne sɛ wubenya Kyerɛwnsɛm mu nsɛm kakra wɔ w’adwenem, woma Bible ne nkratawa bi bɛn wo, na wudi kan kasa bere a wunya hokwan no.

⁹ Ɛwom mpo sɛ bɔnnɔ so adansedi nyɛ den pii de, nanso ebinom mpɛ sɛ wɔsɔ hwɛ. Ebia wɔmpɛ kasa, na wɔkyerɛ sɛ wɔfɛre ade dodo anaa ehu ka wɔn dodo sɛ wɔbɛbɛn nnipa a wonnim wɔn. Ebia wosuro sɛ wɔbɛtwe adwene aba wɔn ho so, anaasɛ wɔde abufuw bebua wɔn. Wɔn a wɔn ho akokwaw wɔ bɔnnɔ so adansedi mu betumi aka akyerɛ wo sɛ ɛntaa nyɛ hu. Nneɛma pii mu no, afoforo te sɛ yɛn ara pɛ; wɔwɔ ahiade koro no ara, wɔwɔ dadwen koro no ara, na wɔpɛ ade koro no ara ama wɔne wɔn mmusua. Wɔn mu dodow no ara bɛkyerɛ animtew a wɔde serew anaa adamfofa kwan so nkyia ho anigye. Ebia ɛsɛ sɛ ‘wunya akokoduru’ na ama woatumi afi ase. (1 Tes. 2:2) Nanso, sɛ wunya fi ase pɛ a, nea ebefi mu aba no bɛyɛ wo nwonwa, na w’ani begye.

¹⁰ Yenya Nhyira Bere a Yɛma Yɛn Hann Hyerɛn No: Osuahu a ɛka koma a afi bɔnnɔ so adansedi mu aba ho nhwɛso bi ni: Na ɔbea bi a wadi mfe 55 rebɔ mmɔden atwa kwan mu. Bere a kar bi rebɛbɔ no ara pɛ na onuawa bi soo ne nsa mu twee no gyinaa baabi pa kae sɛ: “Hwɛ yiye. Yɛwɔ mmere bɔne mu!” Afei onuawa no kyerɛkyerɛɛ nea enti a mmere no yɛ hu kɛse saa no mu. Ɔbea no bisae sɛ, “Woyɛ Yehowa Adansefo mu biako?” Esiane sɛ na ɔbea no agye yɛn nhoma no biako afi ne nuabea hɔ nti, na ɔpɛ sɛ ohyia Yehowa Adansefo mu biako, na asɛm a esii yi ma etumi baa saa.

¹¹ Onuawa bi ne ɔbea bi a ɔwɔ ɔdan a ayarefo twɛn oduruyɛfo wom mu no fii ase bɔɔ nkɔmmɔ. Ɔbea no tiee asɛm no yiye, na afei ɔkae sɛ: “Bɛyɛ bere bi ni, me ne Yehowa Adansefo taa hyia; nanso sɛ m’ankasa mɛyɛ Yehowa Dansefo daakye bi ankasa a, na efi nea woaka akyerɛ me seesei ara no. Tie a mitiee wo no te sɛ nea mafi ase rehu hann wɔ baabi a esum wɔ.”

¹² Ayamye betumi ayɛ ade a wogyina so boa afoforo ma wohu nokware no. Bere a anuanom mmea baanu fi asɛnka renantew akɔ fie no, wohuu aberewa bi a na ɛte sɛ nea ɔyare bere a ofii bɔs mu sii fam no. Wogyinae bisaa aberewa no sɛ ebia ohia mmoa anaa. Ɛyɛɛ no nwonwa yiye sɛ nnipa baanu a onnim wɔn koraa no bɛkyerɛ ne ho anigye, ma enti ɔkae sɛ ɔpɛ sɛ ohu dekode a ɛkanyan ayamye a ɛte saa no. Eyi buee kwan ma wodii no adanse. Ɔbea no de n’address mae ntɛm ara, na ɔde anigye too nsa frɛɛ wɔn sɛ wɔmmɛsra no. Wofii adesua ase. Ankyɛ na ɔbea no fii ase kɔɔ nhyiam, na seesei ɔreka nokware no kyerɛ afoforo.

¹³ Ná onuawa aberewa bi di adanse anɔpa wɔ ne kurom mpoano. Na ohyia mmaawa, mmofra ahwɛfo, sikakorabea adwumayɛfo, ne afoforo a wotu mpase anɔpa fa ɔkwan a ɛda hɔ no so no. Wɔtra mmenkyi so yɛ Bible adesua ahorow. Nnipa pii asua nokware no afi ne hɔ na seesei wɔyɛ Yehowa Adansefo.

¹⁴ Wɔ onuawa bi adwuma mu no, ɔtee sɛ ne yɔnko dwumayɛni bi reka amanyɔkuw bi a ogye di sɛ ebedi wiase mu haw ahorow ho dwuma no ho asɛm. Onuawa no kasae, na ɔkaa nea Onyankopɔn Ahenni bɛyɛ ho bɔhyɛ ahorow ho asɛm. Adwuma mu nkɔmmɔbɔ yi maa ɔne ɔbea no yɛɛ Bible adesua daa wɔ fie, na awiei koraa no ɔne ne kunu bɛyɛɛ Adansefo.

¹⁵ Mma Wo Werɛ Mmfi Da sɛ Woyɛ Ɔdansefo! Bere a Yesu reka n’asuafo ho asɛm sɛ “wiase hann” no, ɔkae sɛ ɛsɛ sɛ wɔboa afoforo ma wonya Onyankopɔn Asɛm mu honhom mu ntease so mfaso. Sɛ yɛde Yesu afotu no di dwuma a, yebebu yɛn som adwuma no dɛn?

¹⁶ Sɛ ebinom rehwehwɛ adwuma a, wɔpaw adwuma a wɔde bere fã yɛ. Wɔto bere dodow ne mmɔden a wɔde bɛyɛ no ano hye, efisɛ wɔpɛ sɛ wɔde wɔn bere no fã kɛse yɛ nnwuma a wobu no sɛ ɛso wɔ mfaso kɛse. Yebu yɛn som adwuma saa ara? Ɛwom mpo sɛ yebetumi ate nka sɛ ɛyɛ yɛn asɛyɛde, na yɛpɛ mpo sɛ yebeyi bere bi asi hɔ de ayɛ ɔsom adwuma no de, nanso ɛsɛ sɛ nea yɛn ani gye ho titiriw yɛ biribi foforo?

¹⁷ Esiane sɛ yenim sɛ biribi te sɛ bere fã Kristoni nni hɔ nti, yehyiraa yɛn ho so, ‘paa yɛn ho akyi,’ na yɛpenee so sɛ yebedi Yesu akyi “daa.” (Mat. 16:24, NW ) Nea yɛpɛ ne sɛ yɛbɛkɔ so afi ‘yɛn kra nyinaa’ mu ayɛ saa, na yɛde hokwan biara a ɛbɛma yɛn hann ahyerɛn adi dwuma ma yɛadu nkurɔfo nkyɛn wɔ baabiara a wɔwɔ. (Kol. 3:23, 24) Ɛsɛ sɛ yɛko tia wiase su horow, yekura yɛn nnamyɛ mu sɛ mfiase no, na yɛhwɛ hu sɛ yɛn hann kɔ so hyerɛn yiye. Ebinom ama wɔn nnamyɛ abrɛ ase, na wɔn hann ayɛ wusiwusi, wuntumi nhu mpo bere a wobɛn no pɛɛ no. Ebia obi a ɔte saa no behia mmoa, na ama wasan ayɛ nnam wɔ ɔsom adwuma no mu.

¹⁸ Ebia ebinom twentwɛn wɔn nan ase efisɛ nnipa pii ani nnye yɛn asɛm no ho. Paulo kae sɛ Kristo ho asɛm no yɛ “nkwaseasɛm ma wɔn a wɔbɛyera.” (1 Kor. 1:18) Nanso nea afoforo kae nyinaa akyi no, ɔde tumi kae sɛ: “M’ani nwu asɛmpa no ho.” (Rom. 1:16) Obi a n’ani wu no te nka sɛ ɔba fam anaa ɔmfata. Sɛ yɛka Amansan Hene no ne nsiesiei pa a wayɛ na ama yɛanya anigye daa ho asɛm a, ɛbɛyɛ dɛn na yɛn ani atumi awu? Ɛmfata sɛ yɛte nka sɛ yɛba fam anaa yɛmfata bere a yɛka nokware ahorow yi kyerɛ afoforo no. Mmom no, ɛsɛ sɛ ɛkanyan yɛn ma yɛyɛ nea yebetumi nyinaa, na yɛda yɛn gyidi adi sɛ ‘biribiara nni hɔ a ehia sɛ yɛfɛre wɔ ho.’—2 Tim. 2:15.

¹⁹ Nokware hann a ɛrehyerɛn seesei wɔ aman a ɛwɔ asase so nyinaa mu no de daa nkwa wɔ wiase foforo paradise mu ho anidaso ma wɔ ɔkwan a ɛkanyan nnipa so. Momma yɛnkyerɛ sɛ yetie afotu a ɛne sɛ yɛmma yɛn hann nhyerɛn daa no! Sɛ yɛyɛ saa a, yebenya biribi agyina so adi ahurusi, te sɛ asuafo a ‘wɔannyae Yesu Kristo ho asɛmpa no ka ne kyerɛkyerɛ’ da biara no.—Aso. 5:42.