Nsemmisa a Efi Akenkanfo Hɔ

◼ Dɛn nti na Onyankopɔn maa Mose srɛɛ Farao sɛ ‘ɔma wɔnkɔ sare so nnansa kwan,’ bere a na wabɔ ne tirim sɛ ɔrema Israelfo no afi Misraim koraa no?

Wɔ faako a na ogya redɛw no, Onyankopɔn kae sɛ ɔde Mose bedi dwuma de ayi Israelfo no afi Misraim na wadi wɔn anim akɔ asase a ɛwo ne nufusu sen wɔ so no so. Onyankopɔn ka kyerɛɛ Mose sɛ ɔnka nkyerɛ Farao sɛ: “[Yehowa], Hebrifo Nyankopɔn, abehyia yɛn, enti yɛsrɛ wo, ma yɛnkɔ sare so nnansa ɔkwan nkɔbɔ [Yehowa], yɛn Nyankopɔn, afɔre.”​—Exodus 3:18.

Esiane sɛ na Onyankopɔn aka akyerɛ Mose sɛ Israelfo no rekɔ Bɔhyɛ Asase no so nti, ɛte sɛ nea wanka asɛm no mu nokware nyinaa ankyerɛ Farao. Nanso ɛda adi fi sɛnea nneɛma kɔɔ so no mu sɛ Onyankopɔn kwan a ɔfaa so dii nneɛma ho dwuma no teɛ na edii n’atirimpɔw ho dwuma.

Ná Israelfo no atra Misraim bɛboro mfirihyia 200 na na wɔreyɛ wɔn sɛ ɔman a wɔyɛ nkoa. Nanso ná Onyankopɔn, wɔ nea ɛne ne bɔ a ɔhyɛɛ Abraham a ɛnsakra no hyia mu no, rebɛyɛ Israel, ɔman kɛse. Na wɔbɛtra ase asomdwoe mu wɔ asase a na Onyankopɔn akyerɛ Abraham, Kanaan asase, no so. (Genesis 12:1, 2, 7; 18:18; 22:17, 18) So na Farao befi ne pɛ mu apene Onyankopɔn atirimpɔw so?

Dabi, na Yehowa nim dedaw sɛ Farao fi asoɔden mu bɛpow sɛ ɔbɛma Israelfo no afi Misraim, sɛ ɛyɛ bere tiaa bi mpo a. Sɛ Onyankopɔn nam Mose ne Aaron so kyerɛe sɛ, ná Ne pɛ ne sɛ Israel befi hɔ koraa a, anka ebia Farao de anoyi ahorow bɛma a ebetumi ayɛ te sɛ nea ntease wom, sɛ ebia asase no so a ɛbɛyɛ basaa, sɛ nnipa a wɔn dodow bɛboro ɔpepem biako no fi hɔ prɛko pɛ a wɔnsan mma bio a. Na ebia anka ɛbɛma afoforo apene Farao su no so anaasɛ wɔne no ayɛ adwene. Gosen asase no a Israelfo befi so nna kakraa bi no renyɛ nea ɛbɛhaw Misrifo no kɛse.

Bere a Farao de asoɔden powee sɛ ɔbɛma Israelfo akɔ nnansa pɛ mpo no, ná ɛda adi pefee sɛ ne koma yɛ den. Ná anoyi biara nni hɔ mma atirimɔden su a ɛte sɛɛ, ne adwumaden a ɔhyɛe sɛ wɔmma wɔnyɛ esiane ɛno nti no.​—Exodus 5:1-9.

Wɔ ɔhaw ahorow pii akyi mpo no, ɔsoɔdenfo Farao amma Israel amfi Misraim ankɔ. Awiei koraa no, ɔhaw a ɛto so 10 no mu yɛɛ den maa Misraim araa ma Farao ka kyerɛɛ Mose sɛ ɔmfa ɔman no na ɔne wɔn nkɔ​—a na ɔmpenee nnansa nhyehyɛe no so. Nanso bere a wɔda so ara rekɔ no, Farao bɔɔ mmɔden sɛ obenya Israel na wasan de wɔn aba. Ɛno anyɛ yiye, efisɛ Farao ankasa mpo wui wɔ Po Kɔkɔɔ no mu.​—Exodus 12:31-39; 14: 5-9, 21-28; Dwom 136:15.

Enti, ka a Onyankopɔn ka kyerɛɛ Mose sɛ ɔnsrɛ nna kakraa bi a ɛne nnansa no yɛ nea wɔde sɔɔ Farao hwɛe. Ɛdaa nea na ɛwɔ ne komam adi.

October Da Biara Da Asɛm

(Wopɛ nsɛm a wɔahyehyɛ no nyinaa a, hwɛ nhoma no mu)