So Wudi Yehowa Akyi Wie?

TRENEEFO te sɛ gyataforo a ɔwɔ ahotoso.” (Mmebusɛm 28:1, New World Translation) Wɔkyerɛ gyidi, wofi ahotoso mu de wɔn ho to Onyankopɔn Asɛm no so, na wɔde akokoduru kɔ wɔn anim wɔ Yehowa som mu wɔ asiane biara mu.

Bere a Onyankopɔn yii Israelfo no fii Misraim nkoasom mu wɔ afeha a ɛto so 16 A.Y.B. mu akyi, a na wɔwɔ Sinai no, mmarima baanu titiriw kyerɛe sɛ wɔwɔ ahotoso te sɛ gyata. Wɔdaa nokwaredi ma Yehowa wɔ tebea horow a enye mu nso adi.

Mmarima yi mu biako ne Efraimni Yosua, a na ɔyɛ Mose somfo, na akyiri yi wɔpaw no ma osii Mose ananmu no. (Exodus 33:11; Numeri 13:8, 16; Deuteronomium 34:9; Yosua 1:1, 2) Ɔfoforo no ne Kaleb, Yefune a ofi Yuda abusua mu no ba.​—Numeri 13:6; 32:12.

Kaleb de nokwaredi ne nsi yɛɛ Yehowa apɛde. Mfe pii a ɔde som Onyankopɔn wɔ nokwaredi mu no maa otumi kae sɛ ‘odii Yehowa akyi wiei.’ (Yosua 14:8) The New American Bible se: “Midii AWURADE, me Nyankopɔn nokware korakora.” Kaleb “de nokwaredi tiei,” anaa “ofi nokwaredi mu dii” Yehowa Nyankopɔn “atirimpɔw ho dwuma.” (Today’s English Version; The New English Bible) Yɛbɛka no ɔkwan foforo so a, Kaleb kae sɛ: “Mifi . . . koma nyinaa mu dii AWURADE me Nyankopɔn akyi.” (New International Version) Na wo nso ɛ? So woredi Yehowa akyi korakora?

Asase no a Wɔkɔhwɛɛ So

Fa no sɛ bere a Yehowa gyee Israelfo no fii Misrifo nkoasom mu bere tiaa bi akyi no, na woka wɔn ho. Hwɛ sɛnea odiyifo Mose de nokwaredi di ahyɛde ahorow a Onyankopɔn de mae akyi. Yiw, na hyɛ ahotoso a Kaleb wɔ sɛ Yehowa ka Ne nkurɔfo ho no nsow.

Afe a ɛto so abien ni fi bere a Israelfo fii Misraim, na wɔabɔ nsra wɔ Kades-Barnea a ɛwɔ Paran sare no so. Wɔayɛ krado wɔ Bɔhyɛ Asase no hye so. Sɛnea Onyankopɔn hyɛe no, Mose rebɛsoma akwansrafo 12 ma wɔakɔ Kanaan. Ose: “Monkɔfa nifa fam ha yi na monkɔforo mmepɔw no; na monkɔhwɛ asase no sɛnea ɛte ne aman a wɔtete so no, sɛ wɔyɛ den anaasɛ wɔagurow, wosua anaasɛ wɔdɔɔso, ne sɛnea asase a wɔtete so no tetee, sɛ ɛyɛ asase pa anaa bɔne, ne sɛnea nkurow a wɔtete mu no te, sɛ wɔtete nsra mu anaa aban mu, ne sɛnea asase no te, sɛ emu yɛ fɔɔfɔɔ anaa kyenkyerenn, sɛ nnua wɔ so anaasɛ ebi nni so; na momfa akokoduru ntetew asase no so aba bi mmra.”​—Numeri 13:17-20.

Mmarima 12 no fi wɔn akwantu a ɛyɛ hu no ase. Wɔn akwantu no di nna 40. Wohu mmarima a wɔyɛ abran wɔ Hebron. Wɔ Eskol bon mu no, wohu sɛnea asase no sow aba fa, na wosi gyinae sɛ wɔde ɛhɔ nnɔbae no bi bɛba wɔn nkyi. Bobe kasiaw biako mu yɛ duru araa ma ɛsɛ sɛ wɔsoa no wɔ dua bi a ɛda mmarima baanu mmati so!​—Numeri 13:21-25.

Bere a akwansrafo no san ba Israelfo no nsra mu no, wɔbɔ amanneɛ sɛ: “Yɛakɔ asase a wosomaa yɛn so no so, na ɛsen nufusu ne ɛwo ampa, na ɛso aba ni. Nanso aman a wɔtete asase no so no yɛ den, na nkurow no, wɔabɔ ho ban, ɛsosoe sɛ, na yehuu Anak mma nso wɔ hɔ. Amalek te nifa fam asase so, na Hetifo ne Yebusifo ne Amorifo tete bepɔw so, na Kanaanfo tete mpoano ne Yordan ho.” (Numeri 13:26-29) Akwansrafo du nyɛɛ krado sɛ wobegye Onyankopɔn ahyɛde no atom, na wɔabɔ aperenten akɔ Bɔhyɛ Asase no so.

‘Yehowa di Yɛn Akyi’

Nanso, ɔkwansrafo kokodurufo a ɔwɔ Yehowa mu gyidi, Kaleb hyɛ sɛ: “Momma yɛnkɔ nkɔforo, na yɛnkɔfa asase no; na otumi de, yebetumi wɔn.” Nanso akwansrafo du no mpene na wɔka sɛ wɔn a wɔtete Kanaan no ho yɛ den sen Israelfo no. Akwansrafo a wonni gyidi a wɔn bo atu no huu wɔn ho sɛ mmebɛw wɔ ntotoho kwan so.​—Numeri 13: 30-33.

Yosua ne Kaleb hyɛ sɛ: “[Yehowa] di yɛn akyi, munnsuro wɔn.” Wɔantie wɔn nsɛm no. Bere a nkurɔfo no ka sɛ wobesiw wɔn abo no, Onyankopɔn de ne ho gye mu, na obu anwiinwiifo no fɔ sɛ: “Morennu asase a mekaa ntam sɛ mede mo mɛtra so no so, gye Yefune ba Kaleb ne Nun ba Yosua. Na mo mma . . . na mede wɔn mɛkɔ so, na wɔahu asase a moto ho mpe no. . . . Na mo mma ayɛ mmoahwɛfo, sare so, mfirihyia aduanan, . . . akosi sɛ mo afunu bewie ɔsã sare so. Nna a mode kɔsraa asase no dodow a esi adaduanan no so na monsoa mo amumɔyɛ no mfirihyia aduanan, da koro da koro nyɛ afe afe.”​—Numeri 14:9, 30-34.

Wɔda so Di Nokware Mfe Pii Akyi

Mfirihyia 40 afobu no ba awiei, na owu fa anwiinwiifo awo ntoatoaso mũ no nyinaa. Nanso, Kaleb ne Yosua da so di nokware ma Yehowa. Wɔ Moab asasetaw no so no, Mose ne Ɔsɔfo Panyin Eleasar akan mmarima a wɔfata asraadi a wadi mfe 20 ne akyi no. Onyankopɔn paw Israel abusuakuw biara mu abarima biako a wɔde Bɔhyɛ Asase no mu kyekyɛ bɛhyɛ wɔn nsa. Kaleb, Yosua, ne Eleasar ka wɔn ho. (Numeri 34:17-29) Ɛwom sɛ Kaleb adi mfe 79 mprempren de, nanso ne ho da so yɛ den, odi nokware, na ɔwɔ akokoduru.

Bere a Mose ne Aaron kan nkurɔfo no wɔ Sinai bere tiaa bi ansa na ehu rema wɔapow sɛ wɔbɛhyɛn Kanaan asase so no, na Israel akofo yɛ 603,550. Wodii adaduanan wɔ sare no so akyi no, na asraafo dɔm a wosua sen saa, 601,730 na wɔwɔ hɔ. (Numeri 1:44-46; 26:51) Nanso, bere a Yosua yɛ wɔn kannifo, na ɔnokwafo Kaleb di wɔn mu no, Israelfo no hyɛn Bɔhyɛ Asase no so na wodii nkonim ntoatoaso. Sɛnea na Yosua ne Kaleb ahwɛ kwan bere nyinaa no, na Yehowa reko di nkonim ma ne nkurɔfo.

Bere a Yosua ne Kaleb a wɔn mfe akɔ anim ne Israel akofo no bom twa Yordan Asubɔnten no, wodi wɔn asɛyɛde ahorow ho dwuma wɔ akodi ahorow a ɛba mu. Nanso mfe asia mu akodi akyi no, nsase pii wɔ hɔ a ɛsɛ sɛ wodi so. Yehowa betu wɔn a wɔtete so no afi so, nanso mprempren ɔhyɛ sɛ wɔmmɔ asase no so ntonto nkyekyem mma Israel mmusuakuw no.​—Yosua 13:1-7.

Odii Yehowa Akyi Wiei

Sɛ́ obi a wanya ɔko pii mu osuahu no, Kaleb gyina Yosua anim na ɔka sɛ: “Midii mfirihyia aduanan na [Yehowa] akoa Mose somaa me fi Kades-Barnea sɛ menkɔsra asase no, na mesan mede emu asɛm mebrɛɛ no, sɛnea ɛwɔ me koma mu. Na me nuanom a wɔne me foro kɔe no maa ɔman no koma tui, na me de, midii [Yehowa] me Nyankopɔn akyi miwiei.” (Yosua 14:6-8) Yiw, Kaleb dii Yehowa akyi wiei, de nokwaredi yɛɛ Onyankopɔn apɛde.

Kaleb de ka ho sɛ: “Na Mose kaa ntam da no ara sɛ: Asase a wo nan tiaa so no bɛyɛ wo ne wo mma agyapade daa, efisɛ woadi [Yehowa] me Nyankopɔn akyi awie. Na afei hwɛ, [Yehowa] ama matra ase sɛnea ɔkae no, mfirihyia aduanan anum yi, efi bere a [Yehowa] kaa asɛm yi kyerɛɛ Mose, bere a Israel nam sare so no. Na afei, hwɛ, ɛnnɛ madi mfirihyia aduɔwɔtwe anum. Meda so mewɔ ahoɔden nnɛ ara, sɛnea mete da a Mose somaa me no; sɛnea m’ahoɔden te da no, saa ara na ɛte nnɛ ma ɔko ne adifi ne emuba. Na afei fa bepɔw yi a [Yehowa] kaa ho asɛm da no ma me, efisɛ da no ara wotee sɛ Anakfo ne nkurow akɛse a wɔatoto ho afasu wɔ hɔ; ebia [Yehowa] bedi m’akyi na matu wɔn, sɛnea [Yehowa] kae no.” Afei Kaleb nya Hebron sɛ n’agyapade.​—Yosua 14:9-15.

Wɔde dwumadi a ɛyɛ den sen biara na ahyɛ Kaleb a ne mfe akɔ anim no nsa​—asase a abran ahyɛ so ma. Nanso eyi nyɛ den dodo mma ɔkofo yi a wadi mfe 85 no. Akyiri yi, wodi asisifo a wɔtete Hebron no so nkonim. Otniel, Kaleb nuabarima kumaa ba, ne Israel temmufo, dii Debir so nkonim. Akyiri yi, Lewifo na wɔbɛtra nkurow abien yi mu, na Hebron bɛyɛ guankɔbea kurow ma wɔn a wɔnhyɛ da na wokum obi.​—Yosua 15:13-19; 21:8, 11-16; Atemmufo 1:9-15, 20.

Di Yehowa Akyi Wie Bere Biara

Ná Kaleb ne Yosua yɛ nnipa a wɔnyɛ pɛ. Nanso, wofi nokwaredi mu yɛɛ Yehowa apɛde. Wɔn gyidi ano ammrɛ ase wɔ mfe 40 mu ɔhaw a efi pow a Israel pow sɛ wobetie Onyankopɔn mu bae no mu. Saa ara na nnɛyi Yehowa asomfo mma biribiara nsiw ɔsom a wɔde yi Yehowa ayɛ no kwan. Wogyina pintinn, de nsi bɔ mmɔden sɛ wɔbɛsɔ wɔn soro Agya no ani wɔ ade nyinaa mu, bere a wonim sɛ Onyankopɔn ahyehyɛde ne Satan de redi asi no.

Sɛ́ nhwɛso no, Yehowa nkurɔfo pii de wɔn ho ato aninyanne ne owu mpo ho asiane mu na ama wɔatumi adi Awurade Anwummeduan, anaa Yesu Kristo wu Nkaedi no. (1 Korintofo 11:23-26) Wɔ eyi mu no, Kristoni bea bi a wɔde no too Nasifo nneduaban mu wɔ Wiase Ko II mu no bɔɔ amanneɛ sɛ:

“Wɔka kyerɛɛ obiara sɛ ɔnkɔ baabi a wɔhoro ntade no anadwo 11. Ɛbɔɔ anadwo 11 pɛpɛɛpɛ no na yɛahyia, nnipa 105. Yegyina bemmɛn ho twaa kanko, a agua ketewaa bi a ntama fitaa bi sɛw so na nkaedi abodoo ne nsa no sisi so. Kyɛnere na yɛsɔe, esiane sɛ anka kanea a wɔde anyinam ahoɔden sɔ bɛma wɔakyere yɛn nti. Yɛtee nka te sɛ tete Kristofo a wɔwɔ asiei. Ɛyɛɛ afahyɛ a edi mu. Yɛpaee mu kaa bɔhyɛ a emu yɛ den a yɛde maa yɛn Agya, sɛ yɛde yɛn ahoɔden nyinaa bɛtew Ne din kronkron no ho, de nokwaredi agyina Teokrase No akyi, no foforo.”

Ɛmfa ho yɛn sɔhwɛ horow sɛ Yehowa asomfo a wɔtaa wɔn no, yebetumi de yɛn ho ato ahoɔden a Onyankopɔn de ma no so asom no akokoduru mu, na yɛde nidi aba ne din kronkron no so. (Filipifo 4:13) Bere a yɛbɔ mmɔden sɛ yɛbɛsɔ Yehowa ani no, mfaso bɛba so ama yɛn sɛ yɛbɛkae Kaleb. Ne nhwɛso wɔ Yehowa akyi a odi wiei mu no kanyan abarimaa bi a ofii bere nyinaa asɛnka adwuma ase wɔ 1921 mu no. Ɔkyerɛw sɛ:

“Ɛwom sɛ ɔkwampaefo a meyɛe no ma migyaee adwuma a ahotɔ wom bi yɛ wɔ nhoma tintimbea bi a ɛhɔ yɛ fɛ wɔ Coventry [England] de, nanso mannu me ho. Ná m’ahosohyira no de asɛm no aba awiei; ná mahyira me nkwa so ama Onyankopɔn. Mekaee Kaleb, a ɔne Yosua hyɛn Bɔhyɛ Asase no so, na wɔkaa wɔ ne ho sɛ, ‘Odii Yehowa akyi wiei’ no. (Yos. 14:8) Ná mihu sɛ ɛno ne su a ɛfata. Ná minim sɛ Onyankopɔn a mɛsom no ‘awie’ no bɛma m’asetra a mahyira so no ayɛ nea ɛho hia kɛse; ná ɛbɛma me hokwan ma masow aba horow a ɛhyɛ Kristoni agyirae no.”

Ɛda adi sɛ wohyiraa Kaleb wɔ Yehowa akyi a odi wiei, na ɔhwehwɛe sɛ ɔbɛyɛ ɔsoro apɛde no ho. Afoforo anya anigye kɛse ne nhyira pii wɔ Onyankopɔn som mu te sɛ ɔno. Ɛmmra sɛ ɛno bɛyɛ wo suahu, sɛ obi a ɔkɔ so di Yehowa akyi wie.

[Mfonini wɔ kratafa 26]

Kaleb ne Yosua dii nokware maa Yehowa wɔ sɔhwɛ mu. So woreyɛ saa?