Yiyedi Betumi Asɔ Wo Gyidi Ahwɛ

YIYEDI betumi asɔ obi a ɔteɛ gyidi ahwɛ. Yere a obi bɛyere ne ho sɛ obenya ne ho wɔ honam fam no betumi ama wahwere ne gyidi. (1 Timoteo 6: 9, 10) Nanso yiyedi betumi asɔ gyidi ahwɛ wɔ ɔkwan foforo so. Sɛ ɔtreneeni hu sɛ nnipa pii a wɔnteɛ renya wɔn ho wɔ honam fam bere a ɔrehu amane a, ebia ne kɔn bɛdɔ sɛ ɔbɛfa ɔkwan a ɛnteɛ bi so. Eyi ama Yehowa asomfo binom mpo adwene mu ayɛ wɔn naa wɔ mfaso a ɛwɔ so sɛ wɔbɛbɔ ɔbra pa no ho!

Eyi too Lewini dwontofo Asaf wɔ Israel hene Dawid nniso nna mu. Asaf hyehyɛɛ nnwom a wɔde dii dwuma wɔ baguam ɔsom mu. Ɔne Heman ne Yedutun boom hyɛɛ nkɔm nso, na wɔde nnwom yii Yehowa Nyankopɔn ayɛ daa no ase. (1 Beresosɛm 25:1; 2 Beresosɛm 29:30) Ɛwom sɛ na Asaf wɔ hokwan de, nanso Dwom 73 kyerɛ sɛ abɔnefo honam fam yiyedi sɔɔ ne gyidi hwɛe kɛse.

Asaf Su a Asiane Wom

“Ampa ara, Onyankopɔn ye ma Israel, ma wɔn a wɔn komam tew. Na me de, anka me nan reyɛ aman, m’anammɔn rekame awatiriw.” (Dwom 73:1, 2) Asaf nam nsɛm yi so gye toom sɛ na Yehowa ye ma Israel man. Ná ɛno te saa pɔtee ma “wɔn a wɔn komam tew,” efisɛ na ɛyɛ wɔn pɛ sɛ wɔde ɔsom a edi mu bɛma Onyankopɔn, na wɔaboa ma ne din ho atew. Sɛ yɛwɔ saa su no a, yɛbɛka Yehowa ho asɛmpa de ahyira no, sɛ abɔnefo yiyedi anaa tebea foforo biara sɔ yɛn hwɛ kɛse mpo a.​—Dwom 145:1, 2.

Ɛwom sɛ na Asaf nim sɛ Yehowa ye de, nanso anka ne nan reyɛ aman afi trenee kwan so. Ná ayɛ te sɛ nea ɛrewatiriw wɔ sukyerɛmma so bere a ɔretu mmirika tenten a ɔbrɛ wom. Dɛn nti na na ne gyidi ayɛ mmerɛw saa? Ɔkyerɛkyerɛɛ mu sɛ: “Na metwee ahupoofo ho ninkunu, efisɛ mihuu abɔnefo yiye a wodi no. Wonhu owu mu aninyanne, na wɔwɔ ɔhonam ne ahoɔden. Ɔdesani haw de, wonni bi, nanso wonguan wɔn ho sɛ nnipa binom.”​—Dwom 73:3-5.

Abɔnefo honam fam yiyedi maa Asaf ani beree wɔn. Ná ɛte sɛ nea asomdwoe wɔ wɔn asetra mu, ɛwom sɛ wɔfaa akontonkyi akwan so na wonyaa ahonyade no. (Fa toto Dwom 37:1 ho.) Ɛmfa ho sɛ na wɔyɛ nneɛma bɔne no, nnipa ani so no na ɛte sɛ nea wɔwɔ ahobammɔ. Na ɛte sɛ nea wowu a wonnya owu mu aninyanne a ɛyɛ hu biara! Ná ɛtɔ da bi a, wowu asomdwoe mu a wɔwɔ wɔn ankasa mu ahotoso, na wonhu sɛ wɔwɔ honhom mu ahiade biara . (Mateo 5:3) Nea ɛne eyi bɔ abira no, ɔyare ne owu a ɛyɛ yaw ba Onyankopɔn asomfo binom so, nanso ɔwowaw wɔn, na wɔwɔ owusɔre ho anidaso a ɛyɛ nwonwa no.​—Dwom 43:1-3; Yohane 5:28, 29.

Abɔnefo pii nni nyarewa a ɛremma wonni aduan pii a wɔwɔ no. “Wɔwɔ ɔhonam ne ahoɔden,” na wɔn yafunu sosoe. Afei nso, wonni “ɔdesani haw,” efisɛ enhia sɛ wɔyere wɔn ho na wɔn nsa aka asetrade te sɛ nea nnipa dodow no ara yɛ no. Asaf de baa awiei sɛ abɔnefo ‘nguan wɔn ho sɛ nnipa binom.’ Wɔfa wɔn ho di titiriw wɔ sɔhwɛ a ɛto nnipa a wosuro Nyankopɔn no ho, efisɛ nnipa a wɔte saa no di Onyankopɔn trenee nnyinasosɛm so wɔ Satan wiase bɔne yi mu.​—1 Yohane 5:19.

Esiane sɛ abɔnefo di yiye nti, Asaf toaa so kae wɔ wɔn ho sɛ: “Enti ahantan adi wɔn kɔn ho barehyia, na akokobirisɛm asi wɔn adurade. Srade ama wɔn ani apupuw, wɔn komam adwene fi bu so. Wosi atwetwe na wɔde tibɔne ka amimdi asɛm, wɔka akokurokosɛm. Wɔma wɔn ano to ɔsoro, na wɔn tɛkrɛma nennam asase so.”​—Dwom 73:6-9.

Abɔnefo hyɛ ahantan sɛ ‘kɔnmuade,’ na wɔn amumɔyɛsɛm dɔɔso araa ma ‘akata wɔn ho te sɛ adurade.’ Esiane sɛ wɔasi wɔn bo sɛ wɔbɛyɛ nea wɔn ankasa pɛ nti, wosisi afoforo. Abɔnefo aniwa mmem nkɔɔ mu esiane sɛ wonnya aduan nti, na mmom ‘srade ama apupuw,’ na ahyehyɛ esiane sɛ potwaa ama wɔn ayɛ kɛse mmoroso nti. (Mmebusɛm 23:20) Wɔn nhyehyɛe yɛ yiye araa ma wɔyɛ ade ‘tra wɔn komam adwene.’ Wɔde ahomaso ne “akokurokosɛm” ka wɔn amimdi ho asɛm. Hwɛ, “wɔma wɔn ano to ɔsoro, na wɔn tɛkrɛma nennam asase so”! Wɔnkyerɛ obu mma obiara a ɔwɔ soro anaa asase so nti wɔkeka Onyankopɔn ho abususɛm na wɔkeka nnipa ho nsɛmmmɔne.

Ɛda adi sɛ na ɛnyɛ Asaf nkutoo na nea ohui no nyaa ne so nkɛntɛnso bɔne. Ɔkae sɛ: “Enti [Onyankopɔn] nkurɔfo twiw bɛdan [no], na wonya nsu kuruwa ma nom Na wose: Ɛbɛyɛ dɛn na Onyankopɔn behu, so nimdeɛ wɔ Ɔsorosoroni no tirim anaa?” (Dwom 73:10, 11) Hebri kyerɛwsɛm no betumi akyerɛ sɛ: esiane sɛ ɛte sɛ nea esi abɔnefo yiye nti, Onyankopɔn nkurɔfo binom nya adwene a ɛnteɛ, na wɔba tebea koro no ara a abɔnefo wom no mu ka sɛ: ‘Onyankopɔn nnim nea ɛrekɔ so no na ɔrenyɛ amumɔyɛ ho hwee.’ Ɔkwan foforo so no, abɔnefo a ɛte sɛ nea wodi amumɔyɛsɛm fa wɔn ho di no a obi hu wɔn no te sɛ nea ɔnom aduru a ɛyɛ nwene, na ɛma atreneefo bisa sɛ: ‘Dɛn nti na ɛsɛ sɛ Onyankopɔn ma eyinom ho kwan? So onhu nea ɛrekɔ so no?’

Bere a Asaf de ne tebea horow totoo abɔnefo de ho no, ɔkae sɛ: “Hwɛ, eyinom ne abɔnefo, nanso wɔn ho dwo wɔn daa, wɔama wɔn ade adɔɔso. Ampa ara, matew me koma ho kwa, na mahohoro me nsa bemdi mu kwa, nanso wɔahaw me daa adesae na wɔatwe m’aso daa anɔpa.” (Dwom 73:12-14) Asaf tee nka sɛ mfaso nni so sɛ obi bu bra pa. Esii abɔnefo yiye, na ebia wɔnam amimdi so ‘maa wɔn ade dɔɔso.’ Ná ɛte sɛ nea wɔfa wɔn ho di wɔ amumɔyɛsɛm a enye koraa mu, nanso ɛhaw Asaf ‘daa daa’​—fi bere a ɔsɔre kosi bere a ɔkɔda anadwo. Ná ɔte nka sɛ Yehowa teɛ no so anɔpa biara. Esiane sɛ na ɛte sɛ nea eyi nteɛ nti, ɛsɔɔ Asaf gyidi hwɛe.

Nsusuwii mu Nsakrae

Bere a awiei koraa Asaf hui sɛ ne nsusuwii nteɛ no ɔkae sɛ: “Sɛ mise: Mɛka no sɛɛ de a, anka matwa wo mmasanten nkontompo. Na misusuw ho sɛ mehu ade yi, ɛyɛɛ m’ani so den dodo,​—kosii sɛ mekɔɔ Onyankopɔn kronkron mu hɔ mikohuu nea akyiri kowie wɔn. Ampa ara, wɔde wɔn gyina nea ɛhɔ yɛ toro, wɔde wɔn hwe fam bubu wɔn pasaa. Hwɛ sɛ wɔadan amamfo mprempren yi ara, ehu ama wɔawie sa. Sɛ ɔdae a wɔaso anyan, na wo, [Yehowa], wahwanyan wo ho a, woma ani pa wɔn sunsumaban so.”​—Dwom 73:15-20.

Ná ɛyɛ sɛ Asaf annwiinwii, efisɛ anka ka a ɔbɛka no baguam sɛ mfaso nni so sɛ wɔbɛsom Yehowa no betumi abu ne mfɛfo asomfo abam anaa asɛe wɔn gyidi. Eye dɛn ara sɛ wubemua w’ano na woayɛ nea Asaf yɛe no! Sɛnea ɛbɛyɛ na wahu nea enti a ɛte sɛ nea abɔnefo fa wɔn ho di wɔ wɔn bɔne ho, na treneefo hu amane no, ɔkɔɔ Onyankopɔn kronkronbea hɔ. Saa tebea no maa Asafo tumi dwen nsɛm ho dinn wɔ Yehowa asomfo ntam, na ɛsakraa ne nsusuwii. Enti nnɛ, sɛ nea yehu no haw yɛn a, momma yɛn nso yɛnhwehwɛ yɛn nsemmisa ho mmuae denam Onyankopɔn nkurɔfo a yɛne wɔn bɛbɔ so sen sɛ yɛbɛtew yɛn ho.​—Mmebusɛm 18:1.

Asaf behui sɛ Onyankopɔn de abɔnefo agyina “nea ɛhɔ yɛ toro.” Esiane sɛ wɔn asetra gyina honam fam nneɛma so nti, wobetumi ahwe ase mpofirim. Akyɛ koraa no, wonyin a wobewu, na wɔn ahonyade a wɔfaa ɔkwan bɔne so nyae no nto wɔn nkwa nna so. (Dwom 49:6-12) Wɔn yiyedi no bɛyɛ te sɛ ɔdae a etwam ntɛmntɛm. Ebi mpo a wobenya wɔn nnebɔne no so akatua ansa na wɔabɔ nkwakoraa, bere a wotwa nea wɔregu no. (Galatifo 6:7) Esiane sɛ wɔahyɛ da abu wɔn ani agu Onii a ne nkutoo na obetumi aboa wɔn so nti, wonni mmoa ne anidaso biara. Sɛ Yehowa sɔre hyɛ wɔn a, ɔbɛhwɛ wɔn “sunsumaban”​—wɔn anuonyam ne wɔn dibea​—wɔ animtiaabu kwan so.

Hwɛ Nea Woyɛ wɔ Tebea no ho Yiye

Esiane sɛ Asaf annya adwene a ɛfata wɔ nea ohui no ho nti, ogye toom sɛ: “Sɛ ɛyɛ me koma awerɛhow na m’asaabo mu wowɔ me a, anka meyɛ ɔkwasea a minnim de, na mayɛ sɛ aboa, w’ani so. Na me de, mɛtra wo nhyɛn daa yi, woaso me nsa nifa mu. Wonam w’atirimpɔw so kyerɛkyerɛ me kwan, na akyiri no, woagye me akɔ anuonyam mu.”​—Dwom 73:21-24.

Abɔnefo honam fam yiyedi ne atreneefo amanehunu a obi de n’adwene si so no betumi ama wadi koma mu yaw anaa ahaw no. Wɔ Asaf mu tɔnn​—n’asaabo mu​—no, saa tebea yi a ɛhaw no no maa ɔtee ɛyaw kɛse nka. Wɔ Yehowa ani so no, ɔbɛyɛɛ te sɛ aboa a onnim nyansa, a ofi nkate ara kwa mu yɛ ade. Nanso, Asaf ‘traa Onyankopɔn, a na waso ne nsa nifa mu no nkyɛn bere nyinaa.’ Sɛ yɛfom wɔ yɛn nsusuwii mu nanso yɛhwehwɛ Yehowa afotu sɛnea Asaf yɛe no a, Onyankopɔn bɛso yɛn nsa, aboa yɛn na wakyerɛ yɛn kwan. (Fa toto Yeremia 10:23 ho.) N’afotu a yɛde bedi dwuma nkutoo na ebetumi ama yɛanya daakye a ɛyɛ anigye. Ebia yebehyia animguase kakra, nanso Yehowa bɛsakra nneɛma, na ‘wagye yɛn akɔ anuonyam mu’ anaa nidi mu. Bere a Asaf huu hia a ehia sɛ ɔde ne ho to Yehowa so no, ɔde kaa ho sɛ: “Hena na mewɔ no ɔsoro? Na sɛ wowɔ me a, menhwehwɛ asase so hwee. Ma me honam ne me koma nwie sã, Onyankopɔn ne me koma botan ne me kyɛfa daa. Na hwɛ, wɔn a wofi wo nkyɛn kɔ akyiri no bɛyera, wobɛsɛe wɔn a wofi wo nkyɛn kɔbɔ aguaman nyinaa. Na me de, Onyankopɔn nkyɛn tra ye ma me, mede [Amansan Hene Yehowa] mayɛ me guandɔbea, na maka wo nnwuma nyinaa.”​—Dwom 73:25-28.

Te se Asaf no, yenni obiara a yebetumi de yɛn ho ato no so na ama yɛn nsa aka nokware ahobammɔ ne awerɛkyekye te sɛ Yehowa. (2 Korintofo 1:3, 4) Enti momma yɛnsom Onyankopɔn na yɛnhyehyɛ ademude wɔ soro, sen sɛ yɛn ani bɛbere obi asase so ahonyade. (Mateo 6:19, 20) Ɛsɛ sɛ Yehowa anim dom a yebenya no yɛ ade a yɛn ani gye ho sen biara. Sɛ ɛba sɛ yɛn honam ne yɛn koma di huammɔ mpo a, ɔbɛhyɛ yɛn den na wama yɛn koma ayɛ pintinn na yɛn abam ammu na yɛanhwere akokoduru wɔ ɔhaw mu. Abusuabɔ pa a yɛne Yehowa benya no yɛ ade a ɛsom bo yiye. Sɛ yɛpow a, ebetumi de asiane abrɛ yɛne wɔn a wɔpow no nyinaa. Enti te sɛ Asaf no, momma yentwiw mmɛn Onyankopɔn na yɛmfa yɛn haw nyinaa nto ne so. (1 Petro 5:6, 7) Eyi ma yenya honhom mu nkɔso na ɛka yɛn ma yɛka Yehowa nnwuma a ɛyɛ nwonwa ho asɛm kyerɛ afoforo.

Kɔ so Di Yehowa Nokware

Asaf hawee esiane sɛ ohui sɛ amumɔyɛfo di yiye wɔ ne man Israel mu nti. Ná “abɔnefo” a wɔhoahoa wɔn ho, wɔyɛ ahantan, wodi amumɔyɛsɛm, wodi fɛw ne amim, a wɔkae sɛ Onyankopɔn nnim nea wɔreyɛ no wɔ Yehowa asomfo anokwafo mu. (Dwom 73:1-11) Kɔkɔbɔ bɛn ara ni! Sɛ yɛbɛsɔ Yehowa Nyankopɔn ani a, ɛsɛ sɛ yekwati sɛ yɛbɛda su horow te sɛ ahantan, basabasayɛ, fɛwdi, ne nsisi adi. Te sɛ Asaf no, momma Yehowa asomfo nyinaa ‘mmra Onyankopɔn kronkronbea kɛse no mu’ denam N’asomfo anokwafo a yɛne wɔn bɛhyiam daa no so. Nokwarem no, momma wɔn a wɔdɔ Yehowa nyinaa ‘ntwiw mmɛn Onyankopɔn,’ na wɔmfa wɔn ho nto no so mma ɔnwowaw wɔn wɔ ɔhaw mu, a nea afoforo bɛka anaa wɔbɛyɛ mfa ho.​—Dwom 73:12-28; 3 Yohane 1-10.

Ɛyɛ nokware sɛ ebia abɔnefo honam fam yiyedi bɛsɔ yɛn gyidi ahwɛ sɛnea ɛyɛɛ Asaf de no. Nanso, sɛ yɛde yɛn asetra gyina Yehowa som so a, yebetumi agyina saa sɔhwɛ yi ano. Yebenya akatua afi eyi yɛ mu, efisɛ ‘Onyankopɔn nyɛ nea ɔnteɛ a ne werɛ befi yɛn adwuma ne ɔdɔ a yɛkyerɛ wɔ ne din ho.’ (Hebrifo 6:10) Sɛ yɛde yɛn sɔhwɛ ahorow toto yɛn akatua ho a, ‘ɛnkyɛ, na ɛyɛ hare.’ (2 Korintofo 4:17) Sɛ yɛde mfe 70 anaa 80 mu amanehunu mpo toto daa nkwa a ɛyɛ anigye a Yehowa de ahyɛ n’asomfo anokwafo bɔ no ho a, ɛte sɛ ɔhome a epue fi obi anom bere a ɔkasa brɛoo no ara kwa.​—Dwom 90:9, 10.

Ɛmmra sɛ yɛmmma kwan mmma abɔnefo honam fam yiyedi nsiw yɛn kwan sɛ yɛbɛda gyidi a ɛyɛ Onyankopɔn honhom aba no adi, bere a trenee nti yɛhu amane no. (Galatifo 5:22, 23; 1 Petro 3:13, 14) Sɛ yesuasua abɔnefo, a nnyinasosɛm so a wonni nti wɔtaa di yiye no a, Satan ani begye. Mmom no, momma yɛnhyɛ Yehowa din anuonyam denam sɔhwɛ ahorow a ɛbɛma yɛapow ne trenee gyinapɛn ahorow a yɛbɛko atia so. (Sefania 2:8) Mommma yiye a abɔnefo di nnhaw yɛn, efisɛ nea wobetumi anya ara ne honam fam yiyedi. Na mfaso bɛn na ɛwɔ so? Wontumi mfa ntoto honhom fam yiyedi a wɔn a wɔkyerɛ Amansan Hene Yehowa mu gyidi wɔ no ho ɔkwan biara so.