Koma A Ɛbom A Wode Bɛnantew

“O Yehowa, kyerɛkyerɛ me . . . Ka me koma bom ma ensuro wo din.”​—DWOM 86:11, New World Translation.

 1. Ɔkwan bɛn so na Yehowa tua n’anokwafo ka?

‘O YEHOWA, woyɛ Onyankopɔn, wo nkutoo.’ (Dwom 86:8, 10) Dawid fi koma a anisɔ ahyɛ no ma abu so mu yii Onyankopɔn ayɛ. Ansa na Dawid rebɛyɛ Israel nyinaa hene mpo no, na Yehowa agye no afi Saul ne Filistifo nsam. Enti ná obetumi ato dwom sɛ: “[Yehowa], me botan ne m’abankɛse ne me gyefo. Adɔeyɛfo na wo ne no bedi no adɔe so.” (2 Samuel 22:2, 26) Ná Yehowa akora ne somfo nokwafo no so wɔ sɔhwɛ ahorow pii mu. Ná Dawid betumi anya nokware Nyankopɔn no mu ahotoso ne gyidi, nanso na ohia akwankyerɛ daa. Afei Dawid srɛɛ Onyankopɔn sɛ: “[O Yehowa], kyerɛ me wo kwan.”​—Dwom 86:11.

 2. Ɔkwan bɛn so na Yehowa ayɛ nsiesiei a ɛbɛma wakyerɛkyerɛ yɛn?

² Dawid pɛe sɛ ɔkwati wiase adwene anaa nyansapɛ ahorow koraa. Ɔpɛe sɛ “Yehowa kyerɛkyerɛ” no, sɛnea Onyankopɔn diyifo no kaa akyiri yi no. (Yesaia 54:13, NW) Ɛda adi sɛ Bible mu nhoma akron pɛ a na ɛwɔ hɔ saa bere no, na na Dawid betumi asusuw emu nsɛm ho. Nanso na saa ɔkyerɛkyerɛ a efi Yehowa hɔ no som bo ma no! Bere a wɔkyerɛkyerɛ yɛn no, yɛn a yɛwɔ hɔ nnɛ no betumi asua Bible mu nhoma 66 no nyinaa ne afei Ahenni nhoma horow pii a wɔnam “akoa nokwafo ne ɔbadwemma” no so de ma no. (Mateo 24:45) Te sɛ Dawid no, momma yɛmfrɛ Yehowa sɛ ebia ne honhom bɛboa yɛn ma yɛahwehwɛ “nea Onyankopɔn asiesie ama wɔn a wɔdɔ no. . . . Onyankopɔn ade a emu dɔ no nso” mu.​—1 Korintofo 2:9, 10.

 3. Akwan bɛn so na Bible ɔkyerɛkyerɛ ho betumi aba yɛn mfaso?

³ Bible no wɔ asemmisa ne ɔhaw biara a ebia ɛbɛsɔre wɔ yɛn asetra mu ano aduru. “Na biribiara a wɔakyerɛw ato hɔ no, wɔakyerɛw ama yɛn kyerɛkyerɛ sɛ yɛmfa boasetɔ ne kyerɛw nsɛm no mu awerɛkyekye so nnya anidaso.” (Romafo 15:4) Ɔkyerɛkyerɛ a efi Yehowa hɔ a yebegye atom bɛhyɛ yɛn den ma yɛagyina amanehunu ahorow ano, ɛbɛkyekye yɛn werɛ bere a yɛahaw, na ama Ahenni anidaso no akɔ so ahyerɛn wɔ yɛn komam. Ɛmmra sɛ yebenya anigye wɔ Onyankopɔn Asɛm no kenkan, ne wɔ ɛho a yesusuw “awia ne anadwo” no mu, efisɛ nyansa a egyina Bible so bɛyɛ “nkwa dua ma wɔn a woso no mu, na nhyira ne nea okura mu.”​—Dwom 1:1-3; Mmebusɛm 3:13-18; hwɛ Yohane 17:3 nso.

 4. Ɛdefa yɛn nneyɛe ho no, nhwɛso bɛn na Yesu yɛ maa yɛn?

⁴ Onyankopɔn Ba, Yesu, a wɔfrɛ no “Dawid Ba” no nso hwɛɛ Yehowa kwan bere nyinaa sɛ ɔnkyerɛkyerɛ no. (Mateo 9:27)a Ɔkae sɛ: “Ɔba no ankasa ntumi mmɔ ne tirim nyɛ hwee, gye nea wahu agya no sɛ ɔyɛ; efisɛ biribiara a ɔno yɛ no, ɛno ara na ɔba no nso yɛ.” “Memmɔ m’ankasa me tirim menyɛ biribi, na sɛnea agya no kyerɛkyerɛ me no, ɛno ara na meka.” (Yohane 5:19; 8:28) Yesu gyaw nhwɛso maa yɛn sɛ ‘yenni n’anammɔn akyi pɛɛ.’ (1 Petro 2:21) Susuw ho hwɛ! Sɛ yesua ade sɛnea ebia Yesu yɛe no a, yebetumi ayɛ yɛn ade sɛnea Yehowa bɛpɛ sɛ yɛyɛ wɔ tebea biara mu. Yehowa kwan ne ɔkwantrenee bere nyinaa.

 5. Dɛn ne “nokware”?

⁵ Afei Dawid ka sɛ: “Mɛnantew wo nokware mu.” (Dwom 86:11) Wɔ mfirihyia apem akyi bere a Pilato ne Dawid Ba, Yesu, rekasa no, obisae sɛ: “Dɛn ne nokware?” Nanso na Yesu abua saa asemmisa no a ɛnkyɛe, aka akyerɛ Pilato sɛ: “M’ahenni mfi wi yi ase,” de aka ho sɛ: “Wo na woka sɛ meyɛ ɔhene. Me de, eyi nti na wɔwoo me, na mebaa wi yi ase, sɛ merebedi nokware no ho adanse.” (Yohane 18:33-38) Yesu nam saayɛ so daa no adi sɛ nokware no gyina Mesia Ahenni no so. Nokwarem no, Bible no asɛmti mũ no nyinaa ne Yehowa din a wɔbɛtew ho denam Ahenni no so.​—Hesekiel 38:23; Mateo 6:9, 10; Adiyisɛm 11:15.

 6. Dɛn na ɛsɛ sɛ yɛhwɛ yiye wɔ ho bere a yɛnantew nokware no mu no?

⁶ Sɛ́ yɛbɛnantew nokware no mu no kyerɛ dɛn? Ɛkyerɛ sɛ yɛbɛma Ahenni anidaso no ayɛ yɛn asetra mu ahiade titiriw. Ɛsɛ sɛ yɛtra ase ma ɛne Ahenni nokware no hyia. Ɛnsɛ sɛ yehinhim wɔ Ahenni nneɛma a yɛde di kan no mu, na yɛyɛ nnam sɛnea hokwan horow a yɛwɔ a yɛde di Ahenni nokware no ho adanse de suasua Yesu nhwɛso no te. (Mateo 6:33; Yohane 18:37) Yɛrentumi mfa bere no fã bi nnantew nokware no mu, nyɛ ɔsom adwuma no kakraa bi na afei yɛayɛ nea yɛpɛ, aman de yɛn ho akɔhyɛ ahomegye ntraso mu anaasɛ adwuma a egye bere kɛse mu anaa ‘yɛasom ahonyade.’ (Mateo 6:24) Akwan a wɔman fa so yi mu biako betumi ama yɛayera a yɛrenhu ‘ɔkwan hihiaa a ɛkɔ nkwa mu’ no bio. Mommma yɛmmfom mmfi saa kwan no so! (Mateo 7:13, 14) Yɛn Kyerɛkyerɛfo a Ɔsen Biara, Yehowa, nam n’Asɛm ne n’ahyehyɛde no so ma ɔkwan no so hyerɛn, na ose: “Eyi ne kwan, sɛ mofa nifa oo, mofa benkum oo, monnantew so.”​—Yesaia 30:21.

Osuro Pa

 7. Ɔkwan bɛn so na yebetumi ‘aka yɛn koma abom’?

⁷ Dawid mpaebɔ no toa so wɔ nkyekyem 11 sɛ: “Ka me koma bom ma ensuro wo din.” Te sɛ Dawid no, yɛbɛpɛ sɛ yɛn koma yɛ nea ɛbom, edi mu, wɔ Onyankopɔn apɛdeyɛ mu. Eyi ne Mose afotu no hyia: “Na afei, Israel, dɛn na [Yehowa] wo Nyankopɔn repɛ wo nkyɛn sɛ gye sɛ wusuro [Yehowa] wo Nyankopɔn, na wonantew n’akwan nyinaa so, na wodɔ no, na wode wo koma nyinaa ne wo kra nyinaa som [Yehowa] wo Nyankopɔn, na wudi [Yehowa] mmara nsɛm ne n’ahyɛde a merehyɛ wo nnɛ yi so, na ayɛ wo yiye?” (Deuteronomium 10:12, 13) Ampa, yɛn yiyedi nti na yɛde yɛn koma ne yɛn kra hyɛ Yehowa som mu. Yɛnam ɛno so da osuro pa adi wɔ ne din kɛse no ho. Yehowa din no ase kyerɛ sɛ “Ɔno na Ɔma Ɛyɛ,” na ɛfa n’atirimpɔw akɛse a ɔbɛma abam no ho titiriw. Egyina hɔ nso ma ne tumi a enni ano wɔ amansan nyinaa so no. Ɛdenam Onyankopɔn kɛseyɛ ho suro a yɛde bɛsom no so no, onipa a otumi wu ho hu rentwe yɛn mfi ɔkwan no so. Yɛn koma renyɛ ntanta. Mmom no, yebesuro sɛ yɛbɛyɛ biribi a ɛnsɔ Yehowa, Otemmufo Kɛse ne Amansan Hene a okura yɛn nkwa ankasa wɔ ne nsam no ani.​—Yesaia 12:2; 33:22.

 8, 9. (a) Sɛ́ “womfi wiase” no kyerɛ dɛn? (b) Esiane sɛ “yɛayɛ ahwɛde” nti, nneɛma bɛn na ɛsɛ sɛ yɛyɛ?

⁸ Wɔ ahohorabɔ ne ɔtaa mu mpo no, yebedi Yesu akokoduru nhwɛso no akyi na yɛanyɛ wiase bɔne a atwa yɛn ho ahyia no fã. (Yohane 15:17-21) Eyi nkyerɛ sɛ ɛsɛ sɛ Yesu asuafo tew wɔn ho kɔtra baabi anaa nkokorafi. Yesu kae wɔ mpae a ɔbɔɔ n’Agya no mu sɛ: “Mensrɛ sɛ: Yi wɔn fi wiase, na mmom sɛ: Yi wɔn fi ɔbɔne no ho sie! Womfi wiase, sɛnea me nso mimfi wiase no. Yɛ wɔn kronkron wɔ nokware no mu; w’asɛm yɛ nokware. Sɛnea wosomaa me wiase no, saa ara na me nso meresoma wɔn wiase.” (Yohane 17:15-18) Te sɛ Yesu no, wɔasoma yɛn sɛ yɛnkɔbɔ Ahenni nokware no ho dawuru. Na Yesu yɛ obi a wotumi bɛn no. Ɔkwan a ɔfaa so kyerɛkyerɛɛ no maa nkurɔfo nyaa ɔhome. (Fa toto Mateo 7:28, 29; 11:28, 29; Yohane 7:46 ho.) Saa ara na ɛsɛ sɛ yɛn nso yɛyɛ.

⁹ Ɛsɛ sɛ yɛn adamfofa su, yɛn ahosiesie a ɛfata, nkɔmmɔbɔ a efi ayamye mu a ɛho tew no ma nnipa komapafo gye yɛne yɛn asɛm no tom. Ɛsɛ sɛ yɛkwati ntadehyɛ a ɛmfata, fekubɔ ahorow a ebetumi ama yɛde yɛn ho ahyɛ wiase no mu, ne asetra kwan a asɛe a ɛmfa nnyinasosɛm nni dwuma a yehu wɔ wiase a atwa yɛn ho ahyia no mu no. Esiane sɛ “yɛayɛ ahwɛde ama wiase ne abɔfo ne nnipa nti,” ɛyɛ yɛn asɛyɛde nnɔnhwerew 24 da biara sɛ yɛbɛsom na yɛatra ase sɛ Kristofo a wɔyɛ nhwɛso pa. (1 Korintofo 4:9; Efesofo 5:1-4; Filipifo 4:8, 9; Kolosefo 4:5, 6) Ɛsɛ sɛ yɛn koma yɛ nea ɛbom wɔ eyi yɛ mu.

10. Ɔkwan bɛn so na Yehowa kae wɔn a wɔka wɔn koma bom wɔ ɔsom kronn mu no?

¹⁰ Yehowa bɛkae yɛn a yɛka yɛn koma bom ma esuro Yehowa din no, susuw n’atirimpɔw akɛse no ho na yɛde ɔsom kronn hyɛ yɛn asetra ma no. “Na [Yehowa] de n’aniwa kyini fa asase nyinaa so, sɛ ɔde denyɛ bedi ama wɔn a wɔn koma di mu wɔ ne ho no.” (2 Beresosɛm 16:9) Malaki 3:16 reka yɛn bere yi ho asɛm wɔ nkɔmhyɛ mu no, ɛka sɛ: “Ɛnna wɔn a wosuro [Yehowa] no kasakasae wɔn mu, na [Yehowa] yɛɛ asõ na ɔtee, na wɔkyerɛw n’anim nkae nhoma maa wɔn a wosuro [Yehowa] na wobu ne din no.” Momma yɛnka yɛn koma mmom wɔ Yehowa osuro pa a ɛte saa mu!

Yehowa Adɔe

11. Ɔkwan bɛn so na Yehowa bɛda n’adɔe adi wɔ anokwafo ho?

¹¹ Hwɛ sɛnea Dawid mpaebɔ no mu yɛ den! Ɔtoa so sɛ: “[O Yehowa] me Nyankopɔn, mede me koma nyinaa mɛda wo ase, na mahyɛ wo din anuonyam daa, sɛ w’adɔe so wɔ me so, na woayi me kra afi asaman bun mu.” (Dwom 86:12, 13) Mprenu ni wɔ dwom yi mu a Dawid ayi Yehowa ayɛ wɔ N’adɔe​—Ne nokware dɔ​—ho. Ɔdɔ yi yɛ kɛse araa ma etumi gye yɛn fi tebea horow a ɛte sɛ nea ɛrentumi nyɛ yiye mu. Bere a Saulo retaa Dawid wɔ sare so no, ebia ɔtee nka sɛ ɛte sɛ nea ɔrewea akɔ twea so baabi akowu. Ná ɛte sɛ nea ɔrekɔ Sheol a ɛwɔ fam sen biara​—ɔdamoa mu. Nanso Yehowa gyee no! Saa ara na Yehowa ama ne nnɛyi asomfo anya ahotɔ wɔ akwan a ɛyɛ nwonwa so mpɛn pii, na wawowaw mudi mu kurafo a wɔagyina nokwaredi mu akodu owu mpo mu no nso. Anokwafo nyinaa benya wɔn akatua, sɛ ɛho hia sɛ wonya eyi denam owusɔre so mpo a.​—Fa toto Hiob 1:6-12; 2:1-6, 9, 10; 27:5; 42:10; Mmebusɛm 27:11; Mateo 24:9, 13; Adiyisɛm 2:10 ho.b

12. Ɔkwan bɛn so na asɔfo ayɛ ahantan ne atirimɔdenfo, na dɛn na ɛbɛyɛ wɔn akatua?

¹² Ɛdefa ataafo ho no, Dawid teɛɛm sɛ: “Onyankopɔn, ahantanfo asɔre ahyɛ me, na atirimɔdenfo asafo rehwehwɛ me kra, na wɔamfa wo ansi wɔn ani so.” (Dwom 86:14) Wɔn a wɔka ataafo no ho nnɛ ne Kristoman asɔfo. Saafo no ka sɛ wɔsom Onyankopɔn nanso wɔde abodin “Awurade” na esi ne din kronkron no ananmu, na wɔkyerɛ sɛ ɔyɛ Baasakoro ahintasɛm bi a wɔnka ho asɛm wɔ Bible no mu baabiara ankasa. Ahantan bɛn ara ni! Nea ɛka eyi ho no, wɔbɔ mmɔden sɛ wobenya amammui atumfo no ma wɔabara Yehowa Adansefo na wɔde wɔn agu afiase sɛnea wɔda so ara reyɛ ma ɛyɛ nwonwa wɔ aman pii so wɔ asase so nyinaa no. Asɔfo a wɔka Onyankopɔn din ho abususɛm yi ne Babilon Kɛse no afã horow a wɔte sɛ aguaman no nyinaa benya wɔn akatua.​—Adiyisɛm 17:1, 2, 15-18; 19:1-3.

13. Su horow bɛn na Yehowa da no adi bere a ɔma wohu ne papayɛ no?

¹³ Dawid mpaebɔ no toa so wɔ ɔkwan a ɛbɔ eyi abira ma ɛyɛ anigye so sɛ: “Na wo, [O Yehowa] woyɛ Onyankopɔn mmɔborohunufo ne ɔdomfo, wo boasetɔ kyɛ, na w’adɔe ne wo nokware dɔɔso.” (Dwom 86:15) Ampa yɛn Nyankopɔn su horow yi so bi nni. Nsɛm yi ma yɛkae Bepɔw Sinai so bere a Mose bisae sɛ wɔmma onhu Yehowa anuonyam no. Yehowa buae sɛ: “Mɛma me papa nyinaa asen w’anim, na mɛpae [Yehowa] din wɔ w’anim.” Nanso ɔbɔɔ Mose kɔkɔ sɛ: “Wuntumi nhu m’anim, efisɛ onipa renhu m’anim nnya nkwa.” Ɛno akyi no, Yehowa sian baa omununkum no mu, na ɔpaee mu kae sɛ: “[Yehowa], [Yehowa], Onyankopɔn mmɔborohunufo ne ɔdomfo, nea n’abodwo kyɛ na n’adɔeyɛ ne ne nokware dɔɔso pii.” (Exodus 33:18-20; 34:5, 6) Dawid faa nsɛm yi kae wɔ ne mpaebɔ mu. Saa Yehowa su horow yi kyerɛ pii ma yɛn sen hu a yɛde ani behu no! Wɔ yɛn ankasa osuahu mu no, so yɛnkyerɛ Yehowa papayɛ ho anisɔ sɛnea wɔada no adi wɔ su horow yi mu no?

‘Sɛnkyerɛnne a Ɛkyerɛ Papayɛ’

14, 15. Ɔkwan bɛn so na Yehowa yɛ ma n’asomfo nya ‘sɛnkyerɛnne a ɛkyerɛ papayɛ’?

¹⁴ Dawid srɛ Yehowa hɔ nhyira bio sɛ: ‘Dan w’ani kyerɛ me, na dom me, fa w’ahoɔden ma w’akoa, na gye w’afenaa ba nkwa. Yɛ me ho sɛnkyerɛnne a ɛkyerɛ papayɛ, na m’atamfo nhu, na wɔn ani nwu, sɛ wo, Yehowa, woaboa me akyekye me werɛ.’ (Dwom 86:16, 17) Dawid hu sɛ sɛ́ ‘Yehowa afenaa ba’ no, ɔno nso yɛ Yehowa dea. Ɛte saa ara ma yɛn a nnɛ yɛahyira yɛn nkwa so ama Yehowa ne ne som no nyinaa. Yehia Yehowa ogye ahoɔden no denam ne honhom kronkron no so. Enti, yɛsrɛ yɛn Nyankopɔn no sɛ ɔnyɛ ‘sɛnkyerɛnne a ɛkyerɛ papayɛ’ mma yɛn. Su horow fɛfɛ a yɛaka ho asɛm mprempren no ka Yehowa papayɛ ho. Esiane eyi nti, sɛnkyerɛnne bɛn na yebetumi ahwɛ Yehowa kwan sɛ ɔde bɛma yɛn?

¹⁵ Yehowa ne “akyɛde pa nyinaa ne adekyɛde a ɛyɛ pɛ nyinaa” Mafo, na ɔyɛ ɔyamyefo sɛnea Yesu ma yɛn awerɛhyem sɛ ɔde ‘honhom kronkron ma wɔn a wobisa no.’ (Yakobo 1:17; Luka 11:13) Honhom kronkron​—akyɛde a ɛso nni a efi Yehowa hɔ bɛn ara ni! Yehowa nam honhom kronkron no so ma yenya komam anigye wɔ ɔtaa bere mu mpo. Enti bere a na wɔredi Yesu asomafo no asɛm a ɛfa wɔn nkwa ho no, wotumi de anigye kae sɛ Onyankopɔn de honhom kronkron ma wɔn a wotie no sɛ sodifo no. (Asomafo no Nnwuma 5:27-32) Anigye wɔ honhom kronkron mu ma wɔkɔɔ so nyaa ‘sɛnkyerɛnne a ɛkyerɛ papayɛ.’​—Romafo 14:17, 18.

16, 17. (a) Yehowa papayɛ ho sɛnkyerɛnne bɛn na ɔde maa Paulo ne Barnaba? (b) Sɛnkyerɛnne bɛn na wɔde maa Tesalonikafo a wɔtaa wɔn no?

¹⁶ Wɔ Paulo ne Barnaba asɛmpatrɛw akwan a ɛde wɔn kɔfaa Asia Kumaa no mu no, wohyiaa amanehunu ahorow, ɔtaa a emu yɛ den mpo. Bere a wɔkaa asɛm wɔ Pisidia Antiokia no, Yudafo no antie asɛm no. Enti wɔdan kɔɔ amanaman mufo no mu. Dɛn na ɛbae? “Na amanaman mufo no tee no, wɔn ani gyei, na wɔhyɛɛ [Yehowa] asɛm no anuonyam. Na dodow a wɔayi wɔn ama daa nkwa no gye dii.” Nanso Yudafo no maa basabasayɛ sii ma enti wɔpam saa asɛmpatrɛwfo no fii ɔman no mu. So eyi maa wɔne gyidifo afoforo yi aba mu bui? Dabida! Mmom no, “asuafo no de, anigye ne honhom kronkron hyɛɛ wɔn ma.” (Asomafo no Nnwuma 13:48, 52) Yehowa de saa sɛnkyerɛnne a ɛfa ne papayɛ ho no maa wɔn.

¹⁷ Akyiri yi wɔtaa asafo foforo a ɛwɔ Tesalonika no. Eyi maa ɔsomafo Paulo kyerɛw awerɛkyekye krataa, na ɔkamfoo wɔn boasetɔ wɔ ɔtaa mu no. Ná wɔde “honhom kronkron mu anigye agye asɛm no ahohia pii mu.” (1 Tesalonikafo 1:6) “Honhom kronkron mu anigye” kɔɔ so hyɛɛ wɔn den sɛ sɛnkyerɛnne a ɛda adi a efi Onyankopɔn a ɔyɛ mmɔborohunufo ne ɔdomfo, nea ne bo kyɛ fuw, na n’adɔe ne ne nokware dɔɔso pii no hɔ.

18. Ɔkwan bɛn so na yɛn nuanom a wɔwɔ Europa Apuei Fam akyerɛ Yehowa papayɛ ho anisɔ?

¹⁸ Wɔ nnansa yi mmere mu no, Yehowa ada ne papayɛ adi wɔ yɛn nuanom anokwafo a wɔwɔ Europa Apuei Fam no so de ahyɛ wɔn a wɔtan wɔn​—wɔn kan ataafo​—no aniwu. Ɛwom sɛ wɔayi wɔn afi mfe du du pii nhyɛso ase de, nanso ɛsɛ sɛ yɛn nuanom adɔfo yi kɔ so ara gyina mu, efisɛ wɔn mu pii rehyia sikasɛm mu ahokyere a emu yɛ den. Nanso, wɔn “honhom kronkron mu anigye” no kyekye wɔn werɛ. Anigye kɛse bɛn na anka wobetumi anya sen sɛ wɔde ahofadi foforo a wɔanya yi bɛtrɛw adansedi adwuma no mu? Nnipa pii retie wɔn, sɛnea nhyiam ne asubɔ ho amanneɛbɔ ahorow da no adi no.​—Fa toto Asomafo no Nnwuma 9:31 ho.

19. Ɔkwan bɛn so na yebetumi de nsɛm a ɛwɔ Dwom 86:11 no ayɛ yɛn ankasa de?

¹⁹ Nea yɛasusuw ho wɔ asɛm yi ne nea edii eyi anim mu no nyinaa da Yehowa mpae a emu yɛ den a Dawid bɔe no adi: “O Yehowa, kyerɛkyerɛ me . . . ka me koma bom ma ensuro wo din.” (Dwom 86:11, NW) Momma yɛmfa saa asɛm a ɛwɔ 1993 afe asɛm no mu no nyɛ yɛn ankasa de bere a yefi koma nyinaa mu gyina Ahenni nneɛma akyi de kyerɛ yɛn Nyankopɔn koro, Amansan Hene Yehowa, no papayɛ a ɛnsa da no ho anisɔ no.

[Ase hɔ asɛm]

Wubebua Dɛn?

◻ Sɛ yɛbɔ mpae sɛ ‘O Yehowa, Kyerɛkyerɛ me’ a, na yɛkyerɛ dɛn?

◻ Sɛ́ yɛbɛka yɛn koma abom asuro Yehowa din no kyerɛ dɛn?

◻ Ɔkwan bɛn so na Yehowa beyi n’adɔe adi akyerɛ anokwafo nyinaa?

◻ Ɔkwan bɛn so na Yehowa yɛ ma yenya ‘sɛnkyerɛnne a ɛkyerɛ papayɛ’”

[Adaka wɔ kratafa 16]

1993 afe asɛm: “O Yehowa, kyerɛkyerɛ me . . . Ka me koma bom ma ensuro wo din.”​—Dwom 86:11, NW.

[Mfonini wɔ kratafa 15]

Yehowa yɛ ɔbotan ne abannennen ma wɔn a wɔnantew tee wɔ nokware no mu

[Mfonini wɔ kratafa 18]

Wɔ Yehowa Adansefo “Hann Kurafo” Amanaman Ntam Nhyiam wɔ St. Petersburg, Rusia, wɔ June mu ase no, nnipa 46,214 na wɔbae, na wɔbɔɔ 3,256 asu. Hwɛ sɛnea ɛyɛ anigye sɛ eyinom renya Yehowa papayɛ mu mfaso wɔ “honhom kronkron mu anigye” mu!